ᐅᖃᓚᐅᑎᓯᐅᑏᑦ

You are here

ᐱᖦᖤᙱᓴᖅᑐᖃᑐᐃᓐᓇᕆᐊᓕᒃ ᑕᓗᕐᔪᐊᕐᒥ

ᒫᑦᓯ 05, 2019

ᐃᓄᐃᑦ ᐋᓐᓂᐊᓕᖁᔭᐅᓇᑎᒃ ᑐᓴᖅᑎᑦᑎᔾᔪᑎ

ᐱᖦᖤᙱᓴᖅᑐᖃᑐᐃᓐᓇᕆᐊᓕᒃ ᑕᓗᕐᔪᐊᕐᒥ

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑐᓴᖁᔨᕗᑦ ᑕᓗᕐᔪᐊᕐᒥᐅᓂ ᕿᒻᒥᕐᒥ ᐅᐸᒃᑕᐅᔪᖃᓚᐅᕐᓂᖓᓄᑦ ᑎᕆᒐᓂᐊᕐᒥ. ᐱᖦᖤᙱᓴᖅᑐᖃᑐᐃᓐᓇᕆᐊᖃᕐᓂᖓᓄᑦ, ᑕᓗᕐᔪᐊᕐᒥᐅᓕᒫᑦ ᐅᖃᐅᑎᔪᒪᕙᕗᑦ ᐅᔾᔨᖅᓱᖃᑦᑕᖁᓗᒋᑦ ᑎᕆᒐᓂᐊᕐᓂᒃ ᖃᓂᒋᔭᖏᓐᓂᑦ.

ᑮᔭᐅᓐᓂᕈᕕᑦ ᑕᓪᓕᒃᑕᐅᓐᓂᕈᕕᓪᓘᓐᓃᑦ ᑎᕆᒐᓂᐊᒧᑦ ᕿᒻᒥᕐᒧᓪᓘᓐᓃᑦ, ᐋᓐᓂᐊᕕᓕᐊᕐᓗᑎᑦ ᖃᓄᐃᓕᐅᖅᑕᐅᓂᕆᔭᐃᓪᓗ ᐅᖃᐅᓯᕆᑲᐅᑎᒋᓗᒍ. ᐃᓅᓕᓴᖅᑕᐅᓯᑲᐅᑎᒋᔭᕆᐊᓕᒃ. ᐆᒪᔪᒥᒃ ᑕᑯᒍᕕᑦ ᐃᓕᖅᑯᓯᖅᓱᙱᑦᑐᒥᒃ, ᐱᓱᒡᒐᖅᑐᒥᒃ, ᖃᓂᒃᑯᑦ ᖃᐳᐊᒃᑐᒥᒃ, ᐊᓂᖅᓵᖅᑐᒡᒐᖅᑐᒥᒃ ᐅᕝᕙᓘᓐᓃᑦ ᓂᐱᒋᙱᑕᒥᓂᒃ ᓂᓪᓕᐊᔪᒥᒃ, ᑕᐃᒪ ᐱᖦᖤᙱᓴᑐᐃᓐᓇᕆᐊᖃᖅᐳᖅ. ᓂᕐᔪᑎ ᓱᖁᑎᒋᙱᓪᓗᒍ ᐅᖃᐅᓯᕆᓗᒍᓗ ᐆᒪᔪᕐᓂᐊᖅᑎᒧᑦ.

ᑎᕆᒐᓂᐊᖅ ᓂᐊᖅᑭᕆᒐᓗᐊᖅᐸᑦ ᐅᓇᖅᑰᔨᔪᓐᓇᖅᐳᖅ. ᓄᑕᖅᑲᑦ ᐱᙳᐊᖃᑎᖃᕆᐊᖃᙱᑦᑐᑦ ᑎᕆᒐᓐᓂᐊᓂᒃ ᐊᓯᖏᓐᓂᒡᓘᓐᓃᑦ ᐆᒪᔪᓂᒃ. ᖃᐅᔨᓴᖅᐸᒡᓗᒋᑦ ᓂᕐᔪᑎᑦ ᑎᒍᐊᕆᔭᐅᔪᑦ ᓯᓚᒥ ᐃᐱᖅᓯᒪᔪᑦ ᐃᓕᖅᑯᓯᖅᓱᕈᓐᓃᕐᒪᖔᑦ ᐊᒻᒪ ᐱᖦᖤᙱᓴᕐᒪᖔᑦ ᖃᐅᔨᓇᓱᒃᐸᒡᓗᒋᑦ.

ᑎᕆᒐᓂᐊᑦ ᐊᒻᒪ ᐊᒪᕈᐃᑦ ᐱᖦᖤᙱᓴᓲᖑᕗᑦ ᓄᓇᕗᒻᒥ, ᓯᐊᒻᒪᒃᑎᕈᓐᓇᖅᖢᑎᒡᓗ ᕿᒻᒥᓄᑦ ᑮᔭᐅᓐᓂᕌᖓᑕ ᐱᖦᖤᙱᓴᖅᑐᒧᑦ ᑎᕆᒐᓂᐊᒧᑦ ᐅᕝᕙᓘᓐᓃᑦ ᐊᒪᖅᑯᒧᑦ. ᐃᓄᐃᑦ ᐱᖦᖤᙱᓴᖅᑐᒧᑦ ᑮᔭᐅᓐᓂᖅᐸᑕ, ᑕᓪᓕᒃᑕᐅᓐᓂᖅᐸᑕ ᐅᕝᕙᓘᓐᓃᑦ ᐊᓗᐱᖅᑕᐅᓐᓂᖅᐸᑕ ᐊᐃᑦᑐᕐᓗᒡᕕᐅᔪᓐᓇᖅᑐᑦ. ᐃᓄᖕᒥᑦ ᐱᖦᖤᙱᓴᖅᑐᖃᓕᕈᓐᓇᖅᐳᖅ ᐱᖦᖤᙱᓴᖅᑐᕕᓂᕐᒥᒃ ᓂᕐᔪᑎᒥᒃ ᓂᕿᓕᕆᒍᓂ/ᐊᒥᓕᕆᒍᓂ.

ᑕᑯᒍᕕᑦ ᑎᕆᒐᓐᓂᐊᒥᒃ ᐊᒪᖅᑯᒥᒡᓘᓐᓃᑦ ᓄᓇᓕᖕᓂᑦ, ᕿᒻᒦᓪᓘᓐᓃᑦ ᐊᐳᖅᑕᐅᓯᒪᒃᐸᑦ ᑎᕆᒐᓐᓂᐊᒧᑦ ᐊᒪᖅᑯᒧᓪᓘᓐᓃᑦ, ᐆᒪᔪᓕᕆᔨᒧᑦ ᐅᖃᓗᑲᐅᑎᒋᓗᑎᑦ ᐅᕗᖓ 867-561-6231 ᐅᕝᕙᓘᓐᓃᑦ ᐊᕙᑎᓕᕆᔨᒧᑦ ᐅᕗᖓ 867-983-4236.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᓴᐃᕋ ᐋᕐᓯᓅ
ᑐᓴᒐᒃᓴᓕᕆᔨᓄᑦ ᖃᐅᔨᒪᔨᑕᖅ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5949
sarsenault@gov.nu.ca