ᐅᖃᓚᐅᑎᓯᐅᑏᑦ

You are here

ᖁᐃᕿᓇᖅᑐᒧᑦ ᓄᕙᑦᑐᑦ ᖃᐅᔨᔭᐅᔪᑦ ᐃᖃᓗᓐᓂ

ᓄᕕᐱᕆ 29, 2019

ᑭᒃᑯᑐᐃᓐᓇᕐᓄᑦ ᑐᓴᕋᔅᓴᖅ ᐋᓐᓂᐊᓇᐅᑉ ᒥᔅᓵᓄᑦ 

ᖁᐃᕿᓇᖅᑐᒧᑦ ᓄᕙᑦᑐᑦ ᖃᐅᔨᔭᐅᔪᑦ ᐃᖃᓗᓐᓂ 
 
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᕝᕕᖓ ᓄᓇᕗᒻᒥᐅᓂᑦ ᐅᔾᔨᖅᓱᕆᐊᖁᔨᕗᑦ ᐱᓗᐊᖅᑐᒥᑦ ᑖᒃᑯᓂᖓ ᓄᑕᕋᓛᓕᓐᓂᑦ, ᓇᓗᓇᐃᖅᑕᐅᓯᒪᔪᖃᕐᓂᖓᓄᑦ ᖁᐃᕿᓇᖅᑐᕐᒧᑦ ᓄᕙᑦᑐᕐᒪᑦ ᐃᖃᓗᓐᓂ. ᑭᓇᑐᐃᓐᓇᖅ ᓄᕙᓕᕈᓐᓇᖅᑐᖅ ᖁᐃᕿᓐᓇᖅᑐᒥᑦ, ᑭᓯᐊᓂ ᓄᕙᓕᕐᓂᖅᐹᖑᖃᑦᑕᖅᑐᑦ ᓄᑕᕋᐃᑦ ᐅᑭᐅᖅᑖᖅᓯᒪᓐᖏᑦᑐᑦ ᓱᓕ. 

ᖁᐃᕿᓐᓇᖅᑐᖅ ᓄᕙᓐᓇᖅ ᐋᓐᓂᐊᓕᖅᑎᑦᑎᓲᖅ ᐃᒡᒋᐊᒃᑯᑦ ᐳᕙᒃᑯᓪᓗ ᐊᒻᒪ ᑖᓐᓇ ᓱᑲᔪᒥᑦ ᓯᐊᒻᒪᒍᓐᓇᖅᑐᖅ ᐊᐃᑦᑐᓪᓗᐃᒍᑕᐅᓗᓂ ᐃᓄᓐᓄᑦ. ᐃᕕᓪᓘᓐᓃᑦ ᕿᑐᕐᖓᐃᓪᓘᓐᓃᑦ ᐋᓐᓂᐊᒍᔅᓯ, ᐊᖏᕐᕋᖅᓯᒪᑐᐃᓐᓇᕐᓂᐊᖅᐳᓯ ᐊᒻᒪ ᐃᓄᓕᓐᓃᑦᑕᐃᓕᒪᑲᐃᓐᓇᕐᓗᓯ ᐋᓐᓂᐊᒍᓐᓃᕋᓱᐊᕐᓂᓯᓐᓂᑦ. ᑕᐃᒫᒃ ᐋᓐᓂᐊᓇᖅᑐᖅ ᐊᓯᓐᓄᑦ ᐊᐃᑦᑐᕐᓘᑕᐅᔪᓐᓃᕈᓐᓇᖅᑐᖅ. 

ᖃᐅᔨᔭᐅᓴᕋᐃᓪᓗᓂ ᐋᓐᓂᐊᔾᔪᑎᖓᓂᑦ ᐊᒻᒪ ᐃᓅᓕᓴᐅᑎᓅᖅᑎᑕᐅᓗᓂ ᐱᒻᒪᕆᐅᔪᖅ. ᓄᓇᓕᔅᓯᓐᓂᑦ ᐋᓐᓂᐊᕕᓕᐊᕐᓗᓯ ᖃᐅᔨᓴᖅᑕᐅᔭᖅᑐᕐᓗᓯ ᐋᓐᓂᐊᓯᐅᖅᑎᓄᑦ ᑭᓇᑐᐃᓐᓇᖅ ᐃᓪᓗᒻᒥᐅᖃᑎᓯᓘᓐᓃᑦ ᐃᒪᐃᑉᐸᑕ ᖃᐅᔨᔾᔪᑕᐅᔪᓐᓇᖅᑐᓂᑦ:

  • ᖁᐃᖅᓱᖃᑦᑕᖅᑐᑦ ᐱᓇᓱᐊᕈᓯᑦ ᐱᖓᓱᑦ ᐅᖓᑖᓂ;
  • ᖁᐃᖅᓱᖅᑎᓪᓗᒍ ᐊᒻᒪ ᓂᐱᒧᑦ ᑭᖑᓂᖓᒍᑦ ᓂᐱᑕᖃᖅᐸᑦ ᐊᔾᔨᐅᓐᖏᑦᑐᒥᑦ ᓲᕐᓗ "ᐆᑉ";
  • ᐊᓂᕐᓂᑭᓪᓗᑎᑦ;
  • ᒥᕆᐊᖃᑦᑕᖅᑲᑦ ᖁᐃᖅᓱᓚᐅᖅᑎᓪᓗᒍ;
  • ᐅᓐᓄᐊᒃᑯᑦ ᖁᐃᖅᓱᓕᐅᒥᓯᒪᖃᑦᑕᖅᑲᑦ; ᐊᒻᒪ,
  • ᐆᓇᕐᓂᖓ ᖁᕙᓯᓗᐊᓕᖅᐸᑦ (39°C ᐊᒻᒪ ᖁᑦᑎᖅᓯᓴᐅᓗᓂ) ᐅᓪᓗᑦ ᐱᖓᓱᑦ ᖄᖏᐅᑎᓯᒪᓕᕋᓗᐊᖅᑎᓪᓗᒍ. 

ᖁᐃᕿᓇᖅᑐᒧᑦ ᓄᕙᓐᓇᖅᑐᒧᑦ ᐊᐃᑦᑐᖅᑕᐅᙱᒍᓐᓇᖅᑐᑎᑦ ᑲᐱᔭᐅᓗᑎᑦ ᐋᓐᓂᐊᓕᕇᒃᑯᑎᓕᒻᒧᑦ. ᐃᓄᐃᑦ ᑐᑭᓯᒋᐊᕆᐊᓖᑦ ᐋᓐᓂᐊᓕᕇᒃᑯᑎᒧᑦ ᑲᐱᔭᐅᕕᔅᓴᖏᓐᓄᑦ ᓈᒻᒪᓈᖅᓯᒪᒐᓗᐊᕐᒪᖔᑕ. ᐃᒫᑦᑕᐅᖅ ᐱᔾᔭᐃᖅᓯᒪᔪᓐᓇᖅᑐᑦ:

  • ᐊᒡᒐᑎᑦ ᐃᕐᕈᖅᑐᒪᓚᐃᓐᓇᕐᓗᒋᑦ;
  • ᖁᐃᖅᓱᕐᓗᑎᑦ ᐃᕝᕕᑦ ᐊᐃᖓᓄᑦ ᐅᕙᓗ ᑲᒃᑭᐅᑎᔅᓴᒧᑦ; ᐊᒻᒪ, 
  • ᓂᕆᔭᑎᑦ, ᐃᒥᖅᑕᑎᑦ, ᓂᕆᔾᔪᑎᑎᑦ ᐅᕙᓗ ᑭᒍᑎᓯᐅᕈᑎᑎᑦ ᐊᓯᓐᓄᑦ ᐊᑐᖅᑕᐅᑕᐃᓕᓗᑎᑦ. 

ᖁᐃᕿᓐᓇᖅᑐᒧᑦ ᓄᕙᓐᓇᖅᑑᑉ ᒥᔅᓵᓄᑦ ᑐᑭᓯᒋᐊᒃᑲᓐᓂᕈᒪᓐᓂᕈᕕᑦ ᐅᑯᐊ ᐅᖃᓕᒫᕈᓐᓇᖅᑕᑎᑦ ᐅᕙᓂ ᖁᐃᕿᓐᓇᖅᑑᑉ ᖃᓄᐃᑦᑑᓂᖓᐊᑐᐃᓐᓇᔪᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᕝᕕᖓᑕ ᐃᑭᐊᖅᑭᕕᖓᓐᓂᑦ. 

### 

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:  
 
ᑯᕆᔅ ᐴᒡᓕᐊ 
ᑐᓴᒐᒃᓴᓕᕆᔨᓄᑦ ᖃᐅᔨᒪᔨᑕᖅ 
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ 
867-975-5762
cpuglia@gov.nu.ca