ᐅᖃᓚᐅᑎᓯᐅᑏᑦ

You are here

ᖁᓕᓂᒃ ᓄᕙᒡᔪᐊᕐᓇᖅ-19−ᑖᖅᑐᖃᖅᐳᖅ ᐊᕐᕕᐊᓂ

ᒫᑦᓯ 04, 2021

ᐱᕙᓪᓕᐊᔪᑦ ᓴᖅᑭᑕᐅᔪᑦ

ᖁᓕᓂᒃ ᓄᕙᒡᔪᐊᕐᓇᖅ-19−ᑖᖅᑐᖃᖅᐳᖅ ᐊᕐᕕᐊᓂ

ᐃᖃᓗᐃᑦ, ᓄᓇᕗᑦ (ᒫᔾᔨ 4, 2021) – ᐅᓪᓗᒥ, ᓄᓇᕗᒻᒥ ᖁᓕᓂᒃ ᓄᑖᓂᒃ ᓄᕙᒡᔪᐊᕐᓇᖅ-19−ᑖᖅᑐᖃᖅᐳᖅ ᑎᓴᒪᓪᓗ ᐊᓂᒍᐃᓯᒪᓕᖅᖢᑎᒃ. 14-ᖑᔪᑦ ᓇᓗᓇᐃᖅᑕᐅᓯᒪᔪᑦ ᓄᕙᕐᔪᐊᓕᖅᑐᑦ ᓄᓇᕗᒻᒥ, ᑕᒪᕐᒥᒡᓗ ᐊᕐᕕᐊᒦᖦᖢᑎᒃ. ᑖᒃᑯᐊ ᑕᒪᕐᒥᒃ ᖃᓄᐃᙱᑦᑐᑦ, ᐅᐸᒃᑕᐅᑦᑕᐃᓕᒪᓪᓗᑎᒃᓗ ᐊᖏᕐᕋᖏᓐᓂ ᑲᑎᙵᖃᑎᒋᔭᐅᓚᐅᖅᑐᓪᓗ ᓱᓕ ᖃᐅᔨᓴᖅᑕᐅᕙᓪᓕᐊᓪᓗᑎᒃ.

“ᐊᕐᕕᐊᑦ – ᐊᓂᑦᑕᐃᓕᒪᓂᖅ ᐊᒃᓱᕈᕐᓇᖅᓯᒪᔪᖅ ᑕᖃᓇᕐᖢᓂᓗ. ᖃᐅᔨᒪᔪᖓ ᐊᒃᓱᕈᕐᖢᓯ ᐱᓕᕆᓂᔅᓯᓐᓂᒃ ᐊᒃᓱᕈᕐᓇᖅᓯᒪᓪᓗᓂᓗ. ᑕᐃᒃᑯᓄᖓ ᓄᕙᒃᔪᐊᕐᓇᖅ−19−ᖃᖅᑐᓄᑦ, ᐃᓄᑑᓯᒪᐃᓐᓇᕆᑦᑎ ᐅᔾᔨᖅᓲᑎᒋᓗᒍᓗ ᓴᐳᒻᒥᓗᒋᑦ ᓇᒡᓕᒋᔭᑎᑦ ᓄᓇᓕᔅᓯᓗ,” ᐅᖃᖅᑐᖅ ᓯᕗᓕᖅᑎ ᔫ ᓴᕕᑲᑖᖅ. “ᓄᓇᕗᒻᒥᐅᓕᒫᑦ ᐊᑦᑕᑎᖃᖅᑐᑦ ᐊᕐᕕᐊᕐᒥᐅᓄᑦ, ᑕᒫᓃᑦᑐᒍᓪᓗ ᐃᑲᔪᕈᒪᓪᓗᑎᒋᑦ. ᐃᓚᓐᓇᕆᔭᔅᓯᓐᓄᑦ ᖃᑕᙳᑎᓯᓐᓄᓪᓗ ᖃᐅᔨᒋᐊᖅᐸᒃᓗᓯ ᐅᖃᓘᑎᒃᑯᑦ, ᐅᖃᓘᑎᕋᓛᒃᑯᑦ ᖃᕆᑕᐅᔭᒃᑯᓪᓗ. ᓯᐊᒻᒪᒍᑎᖓ ᐊᐃᑦᑐᕐᓗᖕᓇᖅᑑᑉ ᐱᑦᑕᐃᓕᑎᓚᐅᕐᓚᕗᑦ ᓱᓕᓂᒃᑰᕐᓂᒃᑯᑦ ᐱᔪᒪᓂᖃᕐᓂᒃᑯᓪᓗ.”
“ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᔨᐅᖃᑎᒌᑦ ᐱᓕᕆᐊᖃᐃᓐᓇᖅᐳᑦ ᐅᓪᓗᓕᒫᒃᑯᑦ ᐊᕐᕕᐊᓂ ᖃᐅᔨᓇᓱᒃᖢᒋᑦ ᑲᓲᑎᔾᔪᑎᑦ ᐱᖃᖅᑐᓂ,” ᐅᖃᖅᑐᖅ ᓘᒃᑖᖅ ᒪᐃᑯᓪ ᐹᑐᓴᓐ, ᓄᓇᕘᑉ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᖓ. “ᐊᓂᑦᑕᐃᓕᒪᓂᖅ ᐃᓚᐅᖃᑕᐅᓂᕐᓗ ᖃᐅᔨᓴᕐᓂᕐᓂ, ᖃᐅᔨᓇᓱᒍᑎᓂ ᐊᓂᑦᑕᐃᓕᒪᓂᕐᓂᒃᓗ ᐱᕙᓪᓕᐊᔾᔪᑎᓂᒃ ᐱᐅᓛᖑᓪᓗᓂ ᓴᐳᑎᔪᓐᓇᖅᑖᑎᒍᑦ ᐱᕐᔪᐊᕆᔭᐅᔭᕆᐊᓕᒃᓗ. ᐃᖅᑲᐃᓯᒋᐊᕈᒪᔭᒃᑲ ᐊᕐᕕᐊᕐᒥᐅᑦ ᐱᓪᓚᕆᐅᓂᖓᓂᒃ ᒪᓕᑦᑎᐊᕐᓗᓂ ᑕᒪᒃᑮᓂᒃ ᐃᓄᖕᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐆᒃᑑᑎᖏᓐᓂ ᐱᖃᓐᓇᕆᔭᑎᑦ, ᖃᑕᙳᑎᑎᑦ, ᓄᓇᓕᒃᓯᓗ ᐊᑦᑕᕐᓇᙱᑦᑐᒦᑎᓪᓗᒋᑦ.”

ᒫᔾᔨ 4−ᒥ ᐱᒋᐊᖅᖢᓂ, ᐊᕐᕕᐊᓂ ᖃᐅᔨᓴᖅᑕᐅᔪᑦ 2419−ᖑᔪᑦ ᐱᑕᖃᙱᓐᓂᕋᖅᑕᐅᔪᑦ ᖃᐅᔨᓴᖅᑕᐅᔾᔪᑎᖏᑦ. ᐅᓪᓗᒥᒧᑦ, 8628 ᓄᓇᕗᒻᒥᐅᑦ ᐊᒃᓱᓪᓘᓐᓃᑦ ᐊᑕᐅᓯᐊᕐᖢᑎᒃ ᑲᐱᔭᐅᓯᒪᓕᖅᑐᑦ ᒪᑑᓇ ᐋᓐᓂᐊᓕᕇᒃᑯᓯᕐᒧᑦ, ᐊᒻᒪ 5125 ᓄᓇᕗᒻᒥᐅᑦ ᒪᕐᕈᕐᖢᑎᒃ ᑲᐱᔭᐅᓯᒪᓕᖅᑐᑦ ᒪᑑᓇ ᐋᓐᓂᐊᓕᕇᒃᑯᓯᕐᒧᑦ. ᑲᐱᓯᑲᑕᖕᓂᐊᖅᑐᑦ ᑕᒫᓂ ᐅᑭᐅᖅᑕᖅᑐᒥ ᓱᓕ ᑲᔪᓯᕗᑦ. ᓄᓇᕗᒻᒥᐅᑦ ᓄᕙᕐᔪᐊᕐᓇᖅ−19ᒧᑦ ᑲᐱᔭᐅᔪᓐᓇᖅᑎᑕᐅᔪᑦ ᐋᓐᓂᐊᕕᖕᒧᑦ ᐅᖄᓚᔪᓐᓇᖅᐳᑦ ᐃᓂᒃᓴᓕᐅᕈᒪᓗᑎᒃ.

ᑭᓇᑐᐃᓐᓇᑦᑎᐊᑦ ᐅᐸᒍᑎᓯᒪᓚᐅᕋᓱᒋᔪᖅ ᓄᕙᒡᔪᐊᕐᓇᖅ−19-ᓕᖕᒧᑦ ᐅᖄᓚᖁᔭᐅᕗᖅ ᓄᕙᕐᔪᐊᕐᓇᒧᑦ−ᐅᖄᓚᕝᕕᒃᓴᒧᑦ ᐅᕗᖓ 1-888-975-8601 10−ᒥᑦ ᐅᓪᓛᒃᑯᑦ ᐱᒋᐊᕐᓗᓂ 6−ᒧᐊᕋᓱᖕᓂᖓᓄᑦ ᐅᓐᓄᒃᑯᑦ. ᕿᑭᖅᑖᓗᖕᒥᐅᑦ ᖃᐅᔨᓴᐅᑎᖓ ᒪᓕᒡᓗᒍ, ᑐᓴᖅᑎᑦᑎᑲᐅᑎᒋᓗᓂᓘᓐᓃᑦ ᓄᓇᓕᖕᓂ ᐋᓐᓂᐊᕕᖓᓂ, ᐊᓂᑦᑕᐃᓕᒪᓯᑲᐅᑎᒋᓗᓂᓗ ᐅᓪᓗᓄᑦ 14−ᓄᑦ. ᐋᓐᓂᐊᕕᓕᐊᖅᑕᐃᓕᓗᑎᑦ ᓇᖕᒥᓂᖅ.

ᓄᑖᖑᓛᑦ ᑐᓴᒐᒃᓴᐃᑦ ᑕᑯᔪᒪᒍᕕᒋᑦ ᓄᓇᕗᒻᒥ ᓄᕙᒡᔪᐊᕐᓇᖅ−19 ᐋᓐᓂᐊᓕᕇᒃᑯᑎᒧᑦ ᐱᓕᕆᐊᖑᔪᓄᑦ, ᐅᕗᙵᕐᓗᑎᑦ: www.gov.nu.ca/health/information/covid-19-vaccination.

ᓄᑖᖑᓛᑦ ᑐᓴᒐᒃᓴᑦ ᑕᑯᔪᒪᒍᕕᒋᑦ, ᐅᑯᐊᓗ ᖃᔅᓯᐅᓂᖏᑦ ᐊᓂᒍᐃᔪᑦ ᐊᒻᒪ ᓇᓗᓇᐃᖅᑕᐅᓯᒪᔪᑦ ᐱᖃᕐᓂᖏᓐᓂ ᓄᓇᓕᒃᑎᒍᑦ, ᐅᕗᙵᕐᓗᑎᑦ: www.gov.nu.ca/health/information/covid-19-novel-coronavirus.

ᓄᑖᖑᓛᑦ ᑐᓴᒐᒃᓴᑦ ᑕᑯᔪᒪᒍᕕᒋᑦ ᒫᓐᓇᓗ ᐋᓐᓂᐊᖅᑐᓕᕆᔨᒃᑯᓐᓂ ᑭᒡᓕᖃᖅᑎᑕᐅᔪᑦ, ᐅᕗᙵᕐᓗᓯ: https://www.gov.nu.ca/health/information/nunavuts-path.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑲᐃᑦ ᒪᒡᓚᐅᑦ
ᐱᕙᓪᓕᐊᔪᓄᑦ ᑎᑎᕋᖅᑎ ᓯᕗᓕᖅᑎ ᓴᕕᑲᑖᕐᒧᑦ
867-975-5059
cmacleod@gov.nu.ca

ᑕᐃᓇᕋᐃ ᓴᒧᕕᐅᓪ
ᑐᓴᒐᒃᓴᓕᕆᔨᓄᑦ ᖃᐅᔨᒪᔨᑕᖅ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5712
dsommerville1@gov.nu.ca