ᐅᖃᓚᐅᑎᓯᐅᑏᑦ

You are here

ᖁᓕᑦ ᓄᑖᑦ ᓄᕙᔾᔪᐊᕐᓇᖅ 19-ᑖᖅᓯᒪᔪᑦ ᓄᓇᕗᒻᒥ

ᓄᕕᐱᕆ 24, 2020

ᐱᕙᓪᓕᐊᔪᑦ ᑐᓴᕋᑦᓴᑦ

ᖁᓕᑦ ᓄᑖᑦ ᓄᕙᔾᔪᐊᕐᓇᖅ 19-ᑖᖅᓯᒪᔪᑦ ᓄᓇᕗᒻᒥ

ᐃᖃᓗᐃᑦ, ᓄᓇᕗᑦ (ᓄᕕᐱᕆ 24, 2020) - ᐅᓪᓗᒥ, ᓄᓇᕗᒻᒥ 142 ᓇᓗᓇᐃᖅᑕᐅᓯᒪᔪᑦ ᓄᕙᔾᔪᐊᕐᓇᖅ 19-ᓖᑦ. 9 ᓄᑖᑦ ᓇᓗᓇᐃᖅᑕᐅᓯᒪᔪᑦ ᐊᕐᕕᐊᓂ ᑲᑎᓕᒫᖅᑐᒋᑦ 107 ᓄᕙᔾᔪᐊᕐᓇᖅᑖᖅᓯᒪᔪᑦ. ᑲᖏᖅᖠᓂᕐᒥ ᐊᑕᐅᓯᕐᒥᒃ ᓄᑖᒥᒃ ᓇᓗᓇᐃᖅᑕᐅᓯᒪᔪᖅ, ᓄᓇᖓᓐᓂ ᑲᑎᓕᒫᖅᑐᒋᑦ 19 ᓇᓗᓇᐃᖅᑕᐅᓯᒪᔪᑦ.

“ᖃᐅᔨᕙᓪᓕᐊᑎᓪᓗᑕ ᐅᓪᓗᑕᒫᑦ ᐊᒥᓱᕐᖑᐸᓪᓕᐊᔪᓂᒃ ᓄᕙᔾᔪᐊᕐᓇᖅ 19-ᒥᒃ ᑲᓇᑕᓕᒫᒥ, ᐱᒻᒪᕆᐅᕗᖅ ᓄᓇᕗᒻᒥᐅᑦ ᐊᓯᐊᒎᕐᕕᖃᙱᑐᒃᑯᑦ ᒪᓕᑦᓯᐊᕆᐊᖃᕐᓂᖏᓐᓂᒃ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᒪᓕᑦᑕᐅᒋᐊᓕᓐᓂᒃ,” ᐅᖃᖅᓯᒪᔪᖅ ᓘᑦᑖᖅ ᒪᐃᑯᓪ ᐸᑐᓴᓐ, ᓄᓇᕗᒻᒥ ᐋᓐᓂᐊᖃᕐᓇᖏᑦᑐᓕᕆᔨᒻᒪᕆᒃ. “ᐱᓇᓱᐊᕈᓯᐅᑉ ᐊᐃᑉᐸᖓᓅᓕᖅᑎᓪᓗᑕ ᐊᑦᓱᖏᖅᑕᐅᒋᐊᖅᓯᒪᑎᓪᓗᒋᑦ ᒪᓕᑦᑕᐅᒋᐊᖃᖅᑐᑦ ᓄᓇᕗᒻᒥ, ᐃᓘᓐᓇᑕ ᐊᑕᖏᖅᑐᑕ ᐊᑦᓱᕉᑎᖃᕆᐊᖃᖅᑐᒍᑦ ᓱᒃᑲᐃᓪᓕᒋᐊᖁᓪᓗᒍ ᓄᖅᑲᖅᑎᑕᐅᖁᓪᓗᒍᓗ ᓯᐊᕐᒪᐸᓪᓕᐊᓂᖓ ᓄᕙᔾᔪᐊᕐᓇᖅ ᓄᓇᓕᑦᑎᓐᓂ.”

ᓱᓕ ᓇᓗᓇᐃᖅᑕᐅᓯᒪᙱᑦᑐᖅ ᓄᓇᓕᓐᓂ ᓯᐊᕐᒪᐸᓪᓕᐊᓂᖓᓂᒃ ᑲᖏᖅᖠᓂᕐᒥ ᑎᑭᕋᕐᔪᐊᒥᓗ. ᐃᓘᓐᓇᑎᒃ ᓄᕙᔾᔪᐊᕐᓇᖅ 19-ᑖᖅᓯᒪᔪᑦ ᖃᐅᔨᒋᐊᖅᑕᐅᖏᓐᓇᖅᑐᑦ ᐊᓂᑦᑕᐃᓕᑎᓪᓗᒋᑦ ᓱᓕᓗ ᖃᓄᐃᒐᑎᒃ, ᐃᓚᖏᑦ ᖃᓄᐃᒍᑎᖃᒑᓛᑦᑐᑎᒃ.

ᓄᕕᐱᕆ 23-ᒧᓄᑦ, 158 ᖃᐅᔨᓴᖅᑕᐅᓯᒪᔪᑦ ᑲᖏᑦᖠᓂᕐᒥ ᓄᕙᔾᔪᐊᕐᓇᖅᑐᖃᙱᑦᑐᑦ. ᐊᕐᕕᐊᓂ ᖃᐅᔨᓴᖅᑕᐅᓯᒪᔪᑦ 375 ᓄᕙᔾᔪᐊᕐᓇᖅᑐᖃᙱᑦᑐᑦ. ᖃᐅᔨᓴᖅᑕᐅᓯᒪᔪᑦ ᑎᑭᕋᕐᔪᐊᒥ 52 ᓄᕙᔾᔪᐊᕐᓇᖅᑐᖃᙱᑦᑐᑦ. ᖃᐅᔨᓴᖅᑕᐅᕙᓪᓕᐊᖏᓐᓇᖅᑐᑦ ᓴᓂᑭᓗᐊᕐᒥ.

ᑭᓇᑐᐃᓐᓇᖅ ᖃᓂᒋᔭᖃᖅᑐᒥᓂᐅᓱᕆᒍᓂ ᓄᕙᔾᔪᐊᕐᓇᖅ 19-ᓕᒻᒧᑦ ᐅᖄᓚᖁᔭᐅᔪᖅ ᓄᕙᔾᔪᐊᕐᓇᐅᑉ ᒥᑦᓵᓄᑦ ᐅᖃᓚᕕᒻᒧᑦ 1-888-975-8601 ᐊᑯᓐᓂᖏᓐᓂ 10 ᐅᓪᓛᓴᒃᑯᑦ ᐊᒻᒪᓗ 6 ᐅᓐᓄᓴᒃᑯᑦ, ᖃᐅᔨᒃᑲᐃᑦᓴᐅᑎᒋᓗᑎᓪᓘᓐᓃᑦ ᓄᓇᓕᓐᓂ ᐋᓐᓂᐊᕐᕕᖓᓄᑦ, ᐊᓂᑦᑕᐃᓕᑦᓴᐅᑎᒋᓕᕐᓗᑎᓪᓗ ᐊᖏᕐᕋᒥᓐᓂᒃ ᐅᓪᓗᓂᒃ 14-ᓂᒃ. ᐅᐸᒍᑎᑦᑕᐃᓕᓗᑎᒃ ᐋᓐᓂᐊᕐᕕᒻᒧᑦ.

ᓄᑖᖑᓂᖅᐹᓂᒃ ᑐᑭᓯᒋᐊᖃᑦᑕᕈᒪᒍᕕᑦ ᐃᑲᔫᑎᑦᓴᐃᓪᓗ ᒥᑦᓵᓄᑦ ᓄᕙᔾᔪᐊᕐᓇᖅ 19 ᓄᓇᕗᒻᒥ, ᐅᕗᖓᕐᓗᑎᑦ: https://www.gov.nu.ca/health/information/covid-19-novel-coronavirus

ᓄᑖᖑᓂᖅᐹᓂᒃ ᑐᑭᓯᒋᐊᖃᑦᑕᕈᒪᒍᕕᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᒪᓕᑦᑕᐅᒋᐊᓕᓐᓂᒃ, ᐅᕗᖓᕐᓗᑎᑦ: https://www.gov.nu.ca/health/information/nunavuts-path

ᑐᓴᖅᑎᑦᓯᒋᐊᓚᖓᔪᑦ ᐱᕙᓪᓕᐊᔪᓕᕆᔨᓂᒃ ᖃᐅᔨᒃᑲᐃᓕᖅᑲᑕ 11:00 ᐅᓪᓛᓴᒃᑯᑦ ᑲᓇᓐᓇᕐᒥ ᓯᕿᕐᖑᔭᖓᒍᑦ, ᐱᖓᑦᓯᕐᒥ, ᓄᕕᐱᕆ 25.

###

ᐱᕙᓪᓕᐊᔪᓕᕆᔨᓄᑦ ᖃᐅᔨᒋᐊᕐᕕᑦᓵᒃ:

ᑲᐃᑦ ᒪᒡᓚᐅᑦ
ᐱᕙᓪᓕᔪᓄᑦ ᑎᑎᕋᖅᑎ ᓯᕗᓕᖅᑎᒧᑦ ᓴᕕᑲᑖᕐᒧᑦ
867-975-5059
cmacleod@gov.nu.ca

ᑯᕆᔅ ᐴᒡᓕᐊ
ᐊᐅᓚᑦᑎᔨᐅᑲᐃᓐᓇᖅᑐᖅ, ᑐᓴᐅᒪᔪᓕᕆᓂᖕᓄᑦ
ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᐱᓕᕆᕝᕕᖓ
867-975-5949
cpuglia@gov.nu.ca