You are here

ᑎᕆᒐᓂᐊᕐᒥᒃ ᕿᒻᒥᕐᓂᒃ ᑮᓯᔪᖃᖅᐳᖅ ᑲᖏᖅᖠᓂᕐᒥ

ᓯᑎᐱᕆ 26, 2022

ᐋᓐᓂᐊᖃᕐᓇᙱᑦᑐᓕᕆᔨᓂᑦ ᑐᓴᖅᑎᑦᑎᔾᔪᑎ

ᑎᕆᒐᓂᐊᕐᒥᒃ ᕿᒻᒥᕐᓂᒃ ᑮᓯᔪᖃᖅᐳᖅ ᑲᖏᖅᖠᓂᕐᒥ

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑲᖏᖅᖠᓂᕐᒥᐅᓂᒃ ᐅᖃᐅᔾᔨᒋᐊᖅᐳᑦ ᑎᕆᒐᓂᐊᕐᒥᒃ ᒪᕐᕉᖕᓂᒃ ᓄᓇᓕᖕᓂ ᕿᒻᒦᖕᓂᒃ ᑮᓯᔪᖃᓚᐅᕐᒪᑦ ᓯᑎᐱᕆ 23−ᖑᑎᓪᓗᒍ. ᑎᕆᒐᓂᐊᖅ ᐱᖦᖤᙱᓴᓚᐅᕐᒪᖔᑦ ᖃᐅᔨᓴᖅᑕᐅᓚᐅᖅᐳᖅ ᑮᓯᐊᓪᓚᓚᐅᖅᑎᓪᓗᒍ. ᕿᒦᑦ ᓱᓕ ᐅᐸᒃᑕᐅᑦᑕᐃᓕᑎᑕᐅᔪᑦ ᖃᐅᔨᓴᖅᑕᐅᓪᓗᑎᒡᓗ ᐱᓚᙱᓴᓕᙱᒃᑲᓗᐊᕐᒪᖔᑕ.

ᐱᖦᖤᙱᓴᖅᑐᑦ ᐅᓗᕆᐊᓇᕐᓂᖏᓐᓄᑦ, ᑲᖏᖅᖠᓂᕐᒥᐅᓕᒫᑦ ᐅᖃᐅᑎᔪᒪᕙᕗᑦ ᐅᔾᔨᖅᓱᖁᓪᓗᒋᑦ ᑎᕆᒐᓂᐊᓂᒃ ᖃᓂᒋᔭᒥᓂᒃ.

ᑮᔭᐅᓐᓂᕈᕕᑦ ᑕᓪᓕᒃᑕᐅᓐᓂᕈᕕᓪᓘᓐᓃᑦ ᑎᕆᒐᓂᐊᒧᑦ ᕿᒻᒥᕐᒧᓪᓘᓐᓃᑦ, ᐋᓐᓂᐊᕕᓕᐊᕐᓗᑎᑦ ᖃᓄᐃᓕᐅᖅᑕᐅᓂᕆᔭᐃᓪᓗ ᐅᖃᐅᓯᕆᑲᐅᑎᒋᓗᒍ. ᐃᓅᓕᓴᖅᑕᐅᓯᑲᐅᑎᒋᔭᕆᐊᖃᖅᐳᖅ ᑮᔭᐅᓐᓂᕈᓂ, ᐱᖦᖤᙱᓴᖅᑐᒧᑦ ᐊᐃᑦᑐᕐᓗᒃᑕᐅᔪᑦ ᐊᑦᑕᕐᓇᖅᑐᒦᕐᔪᐊᓕᕋᔪᖕᒪᑕ.

ᓄᓇᓕᖕᓂ ᐃᐱᖅᓯᒪᐃᓐᓇᐅᔭᖅᑐᑦ ᕿᒻᒦᑦ ᓯᓚᒥ ᖃᐅᔨᓴᖅᑕᐅᖃᑦᑕᕆᐊᖃᖅᐳᑦ ᐃᓕᖅᑯᓯᖓ ᐊᓯᔾᔨᖅᓯᒪᖕᒪᖔᑦ ᐊᒻᒪ ᐱᖦᖤᙱᓴᖅᑰᔨᖕᒪᖔᑦ.

ᐱᖦᖤᙱᓴᖅᑐᑦ ᐃᒪᐃᑦᑐᓐᓇᖅᐳᑦ ᐃᓕᖅᑯᓯᖅᓱᕈᓐᓃᕐᓗᑎᒃ, ᐱᓱᒡᒐᕐᓗᑎᒃ, ᖃᓂᒃᑯᑦ ᖃᐳᐊᒡᓗᑎᒃ, ᐊᓂᖅᓵᖅᑐᒡᒐᕐᓗᑎᒃ ᐅᕝᕙᓘᓐᓃᑦ ᓂᐱᒋᙱᑕᒥᓂᒃ ᓂᓪᓕᐊᓗᑎᒃ. ᐆᒪᔪᒥᒃ ᑕᐃᒪᐃᓕᖓᔪᒥᒃ ᑕᑯᒍᕕᑦ ᓱᖁᑎᒋᔭᕆᐊᖃᙱᑕᑦ ᐅᖃᐅᓯᕆᓗᒍᓗ ᐊᕙᑎᓕᕆᔨᒃᑯᑦ ᑎᑎᕋᕐᕕᖓᓄᑦ ᐅᕝᕙᓘᓐᓃᑦ ᐆᒪᔪᕐᓂᐊᖅᑎᒧᑦ. 

ᑎᕆᒐᓂᐊᕐᒥᒃ ᐊᒪᖅᑯᒥᒡᓘᓐᓃᑦ ᓄᓇᓕᖕᒦᑦᑐᒥᒃ ᑕᑯᓐᓂᕈᕕᑦ, ᑐᓴᖅᑎᑦᑕᕆᐊᖃᖅᑐᑦ ᐆᒪᔪᕐᓂᐊᖅᑎ ᐅᕗᖓ ᐅᖄᓚᕝᕕᒋᓗᒍ 867-645-8084.

###

ᑐᓴᒐᒃᓴᓂᑦ ᖃᐅᔨᒋᐊᕐᕕᒃᓴᖅ:

ᑯᕆᔅ ᐴᒡᓕᐊ
ᑐᓴᒐᒃᓴᓕᕆᔨᓄᑦ ᐊᐅᓚᑦᑎᔨ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5949
cpuglia@gov.nu.ca