ᕿᑭᖅᑖᓘᑉ ᐃᑭᖓᑕ ᓇᓅᖃᑎᒃᑲᓐᓂᖏᑦ ᑲᑐᔾᔭᐅᓪᓗᑎᒃ ᓇᓐᓄᒐᓱᒃᑕᐅᕙᒃᐳᑦ ᓄᓇᕗᒻᒥᐅᓄᑦ, ᑯᐸᐃᒡᒥ (ᓄᓇᕕᒃ), ᐊᒻᒪ ᓂᐅᕙᐅᓐᓛᓐ ᐊᒻᒪ ᓛᐸᑐᐊᒥᐅᓄᑦ (ᓄᓇᑦᓯᐊᕗᑦ). ᓇᓄᐃᑦ ᐅᓄᕐᓂᖏᑦ ᓈᓴᖅᑕᐅᓚᐅᖅᓯᒪᔪᑦ 1970 ᐊᕐᕌᒍᐃᑦ ᐊᑐᖅᑎᓪᓗᒋᑦ ᑭᓯᐊᓂ ᓇᓗᓇᐃᖅᑕᐅᓪᓚᕆᓚᐅᖅᓯᒪᖅᑰᙱᑦᑐᑦ ᖃᖓᑕᓲᒃᑯᑦ ᐊᑲᐅᓈᙱᑦᑐᒃᑯᑦ ᓈᓴᖅᑕᐅᓚᐅᖅᓯᒪᖕᒪᑕ. ᓈᓴᐃᑦᑎᐊᓕᓚᐅᖅᓯᒪᔪᑦ ᐅᓄᕐᓂᖏᓐᓂᒃ ᐊᕐᕌᒍᑦ 2005-ᒥ 2007-ᒧ ᐊᒥᓱᓂᒃ ᓇᓂᓯᓚᐅᖅᐳᑦ ᐃᒻᒪᖄ 2,158 ᒥᒃᓵᓃᑦᑐᓂᑦ ᓇᓄᕐᓂᑦ. ᐊᕐᕌᒍᓂᑦ ᖄᖏᖅᑐᓂᑦ, ᐃᓄᐃᑦ ᐅᖃᖃᑦᑕᖅᓯᒪᖕᒪᑕ ᓇᓄᐃᑦ ᑎᑭᕌᖃᑦᑕᖅᐸᓪᓕᐊᑐᐃᓐᓇᕐᓂᖏᑦ ᐊᑦᑕᕐᓇᕐᒪᑕ ᓄᓇᓕᖕᓄᑦ ᐱᓗᐊᖅᑐᒥᑦ ᓄᓇᑐᐃᓐᓇᕐᒧᑦ ᐊᐅᓪᓚᖅᐸᒃᑐᓄᑦ. ᐃᓄᐃᑦ ᐅᒃᐱᕈᓱᖕᒪᑕ ᓇᓄᐃᑦ ᐆᒪᔪᓂᑦ ᓂᕐᔪᑎᓂᑦ ᐊᒃᑐᐃᓯᒪᓂᖏᓐᓂᑦ ᐱᓗᐊᖅᑐᒥ ᓇᑦᑎᐊᓂᑦ ᐅᓄᓗᐊᖅᑐᓂᑦ ᓂᕆᕙᖕᓂᖏᑦ, ᑎᖕᒥᐊᑦ ᐊᔾᔨᒌᙱᑦᑐᑦ ᒪᓐᓂᖏᓐᓂᑦ ᒪᓐᓂᒃᑐᖅᐸᒃᑭᓪᓗᑎᒃ. ᓱᓕ ᐃᓚᖏᑦ ᖃᐅᔨᔭᐅᓪᓚᕆᙱᑦᑐᑦ ᕿᑭᖅᑖᓘᑉ ᐃᑭᖓᑕ ᓇᓄᖏᑦ, ᐃᓚᖓᒍᑦ ᖃᐅᔨᒪᔭᐅᓂᖓ ᐃᓂᒋᕙᒃᑕᖏᑦ ᓯᑯᐃᑦ ᐊᓯᔾᔨᖅᐸᓪᓕᐊᓕᕐᒪᑕ, ᑭᓯᐊᓂ ᐅᒃᐱᕆᔭᐅᔪᑦ ᐅᓄᕐᓂᖏᑦ ᓱᕐᕋᒃᓯᒪᓗᐊᙱᑦᑕᕆᐊᖏᓐᓂᑦ ᐅᕝᕙᓘᓐᓃᑦ ᐅᓄᖅᓯᒋᐊᒃᑲᓐᓂᕋᓱᒋᔭᐅᓪᓗᑎᒃ ᑕᐃᒪᙵᑦ ᓈᓴᖅᑕᐅᓚᐅᖅᓯᒪᖕᒪᑕ 2007-ᒥ. ᑖᒃᑯᐊ ᐱᔾᔪᑕᐅᔪᑦ ᒪᓕᒃᖢᒋᑦ, ᐊᐅᓚᑦᑎᖃᑎᒋᔭᕗᑦ ᐃᑲᔪᖅᑐᐃᔪᐃᓐᓇᐅᓚᐅᖅᐳᑦ ᓄᑖᒥᒃ ᖃᐅᔨᓴᕈᑎᒋᓂᐊᖅᑕᑦᑎᓐᓂᒃ 2017 ᐊᒻᒪ 2018 ᐊᑯᓐᓂᖓᓂ. ᓄᑖᒥᒃ ᐊᕐᕌᒍᖕᓂᒃ ᒪᕐᕉᖕᓂᒃ ᖃᐅᔨᓴᕐᓂᐊᖅᑐᓂᒃ ᐱᒋᐊᖅᑎᑦᑎᓚᐅᖅᐳᑦ 2017-ᒥᑦ ᓄᑖᙳᕆᐊᖅᓯᒪᔪᓂᒃ ᑐᑭᓯᒋᐊᕈᑎᒃᓴᓂᒃ ᓴᖅᑭᑎᑦᑎᖁᓪᓗᒋᑦ ᓇᓄᐃᑦ ᐊᒥᓲᓂᖏᓐᓂᒃ ᕿᑭᖅᑖᓘᑉ ᐃᑭᖓᓂ. ᓇᓗᓇᐃᒃᑯᑦᑎᖅᑕᐅᓯᒪᔪᓂᒃ ᖃᐅᔨᓴᕐᓂᖅ ᑭᖑᓂᑦᑎᓐᓂ ᖃᐅᔨᓴᕈᑎᒋᔭᐅᓚᐅᖅᑐᒥᑦ ᐊᔾᔨᖃᙱᑉᐳᖅ ᓇᓄᓕᒫᑦ ᐱᔭᐅᔪᑦ ᓯᓂᒃᑎᑕᐅᔭᕆᐊᖃᖅᐸᓚᐅᖅᑐᓂᑦ ᐊᒻᒪ ᓇᓗᓇᐃᒃᑯᑦᑎᖅᑕᐅᓗᑎᒃ. ᑖᓐᓇ ᖃᐅᔨᓴᕈᑕᐅᔪᖅ ᓇᓄᕐᓂᒃ ᑎᒍᓯᓇᓱᖃᑦᑕᙱᑉᐳᑦ ᑭᓯᐊᓂ ᐊᑐᖃᑦᑕᖅᐳᓪᓕ ᑮᓇᐅᔾᔪᑎᖏᓐᓂᒃ ᐲᖅᓯᕝᕕᐅᓪᓗᑎᒃ ᐊᒥᖓᓂ/ᒥᖅᑯᖓᓂ ᖃᐅᔨᓴᒐᒃᓴᒥᑦ ᐃᓚᙵᖅᓯᓪᓗᑎᒃ ᓴᒃᑯᒧᑦ ᐊᔾᔨᖃᙱᑦᑐᑦ ᓇᓗᓇᐃᖅᑕᐅᖁᓪᓗᒋᑦᐃᓛᒃᑰᖅᑐᑦ. ᑖᒃᑯᐊ ᓇᓅᖃᑎᒌᑦ ᐅᓄᕐᓂᖏᑦ ᓈᓴᖅᑕᐅᓂᑯᑦ ᒥᒃᓴᐅᓴᒃᑕᐅᓂᖏᑦ ᖃᓄᐃᓕᖓᓂᖏᓪᓗ ᖃᐅᔨᔭᐅᓴᓱᖕᓂᐊᖅᑐᑦ ᑎᒥᖏᑦᑎᒍᑦ ᓇᓗᓇᐃᖅᑕᐅᓗᑎᒃ ᐱᔭᐅᒃᑲᓐᓂᖅᑐᓪᓗ.
ᐋᒋᓯ 4 ᐊᒻᒪ ᐅᑐᐱᕆ 11 ᐊᑯᓐᓂᖓᓂ, ᑲᑎᖦᖢᒋᑦ 350-ᓂᒃ ᐃᑲᕐᕋᓂᒃ ᒪᕐᕉᖕᓄᑦ ᖃᖓᑕᓲᖕᓄᑦ ᕿᓂᓚᐅᖅᐳᑦ ᓇᓄᕐᓂᒃ ᖃᐅᔨᓴᕐᕕᐅᔫᑉ ᐃᓚᖓᓂ. 639-ᓂᒃ ᓇᓄᕐᓂᒃ ᑕᑯᓚᐅᖅᐳᒍᑦ ᐊᕐᓇᓂᒃ ᐊᖑᑎᓂᒡᓗ ᐊᒻᒪ ᐊᕐᕌᒍᖏᑦ ᐊᔾᔨᒌᙱᖦᖢᑎᒃ, 530-ᓂᒃ ᐃᓚᙵᖅᓯᕝᕕᐅᔪᖃᓚᐅᖅᖢᓂᒃ ᓴᒃᑯᒧᑦ. ᓇᓄᐃᑦ ᐊᒥᓲᓂᖏᑦ ᖃᐅᔨᓴᖅᑕᐅᔪᑦ 2.2 ᓇᓄᐃᑦ ᐃᑲᕐᕋᒧᑦ ᐊᑕᐅᓯᕐᒧᑦ ᕿᓂᖅᑕᐅᔪᓂ. ᓇᓄᐃᑦ ᐅᓄᕐᓂᖏᑦ ᑕᑯᔭᐅᔪᑦ ᐅᑭᐊᒃᓵᖅ 2017−ᒥᑦ ᐊᔾᔨᐸᓗᒋᓚᐅᖅᐸᖓ 29.2-ᐳᓴᓐ ᖃᓂᒋᔮᓂ ᑭᖑᓂᖔᑦᑎᓐᓂ 2005-2007−ᒥᑦ ᓇᓗᓇᐃᒃᑯᑦᑎᖅᓯᒪᔪᑦ ᐱᔭᐅᒃᑲᓐᓂᖅᑐᓂᑦ ᓇᓄᖏᓐᓂᒃ ᓇᓚᐅᑦᑖᖅᑕᐅᓚᐅᖅᑐᓂᑦ ᒫᓐᓇ ᐊᑐᖅᑕᐅᔪᒥ ᐊᖑᓇᓱᒃᑕᐅᕙᒃᑐᑦ ᐊᐅᓚᑕᐅᓂᖏᓐᓂᒃ. ᓇᓄᕋᐃᑦ ᐊᖏᓂᖏᑦ ᐊᑎᖅᑕᓛᓄᑦ ᐊᕐᕌᒍᒥ ᐊᒻᒪ ᐊᑎᖅᑕᕕᓃᑦ ᐊᔾᔨᖃᐸᓗᓚᐅᖅᐳᖅ 1.5−ᖑᓪᓗᑎᒃ ᐊᑐᓂ. ᑭᓯᐊᓂ ᓯᕗᓕᖅᓱᕈᑎᖏᓐᓄᑦ ᖃᐅᔨᓴᕈᑕᐅᓯᒪᔪᑦ ᐱᔭᒃᓴᐅᓕᖅᐸᑕ ᑐᑭᓯᔪᓐᓇᔾᔮᙱᑦᑐᒍᑦ ᖃᔅᓯᓂᒃ ᐊᔾᔨᒌᙱᑦᑐᓂᒃ ᓇᓄᕐᓂᒃ ᐃᓄᑑᔪᓂᒃ ᑕᑯᔭᐅᔪᖃᓚᐅᕐᒪᖔᑦ, ᐅᕝᕙᓘᓐᓃᑦ ᖃᔅᓯᓂᒃ ᐱᔭᐅᔪᖃᒃᑲᓐᓂᓚᐅᕐᒪᖔᑦ.
