ᐅᖃᓚᐅᑎᓯᐅᑏᑦ

You are here

ᓄᓇᑦᓯᐊᒥ ᓄᓇᕗᒻᒥᓗ ᓯᕗᓕᖅᑏᑦ ᐱᓕᕆᖃᑎᒌᒃᐳᑦ ᓇᐹᖅᑐᖃᙱᑦᑐᒥ ᑐᒃᑐᓂᒃ ᐊᐅᓚᑦᑎᓪᓗᑎᒃ

ᔫᓂ 22, 2022

ᐱᕙᓪᓕᐊᔪᑦ ᓴᖅᑭᑕᐅᔪᑦ

ᓄᓇᑦᓯᐊᒥ ᓄᓇᕗᒻᒥᓗ ᓯᕗᓕᖅᑏᑦ ᐱᓕᕆᖃᑎᒌᒃᐳᑦ ᓇᐹᖅᑐᖃᙱᑦᑐᒥ ᑐᒃᑐᓂᒃ ᐊᐅᓚᑦᑎᓪᓗᑎᒃ

ᖁᕐᓗᖅᑐᖅ, ᓄᓇᕗᑦ (ᔫᓂ 22, 2022) − ᒥᓂᔅᑕ ᐊᕙᑎᓕᕆᓂᕐᒧᑦ ᑕᐃᕕᑦ ᐊᕿᐊᕈᖅ ᐊᒻᒪ ᒥᓂᔅᑕ ᐊᕙᑎᓕᕆᓂᕐᒧᑦ ᓄᓇᑦᓯᐊᒧᑦ, ᓴᐃᓐ ᑖᒻᑉᓴᓐ ᑲᑎᒪᑎᑦᑎᓚᐅᖅᐴᒃ ᓇᐹᖅᑐᖃᙱᑦᑐᒥᑦ ᑐᒃᑐᐃᑦ ᐊᐅᓚᑕᐅᓂᖏᑦᑕ ᒥᒃᓵᓄᑦ ᔫᓂ 16, 2022−ᖑᑎᓪᓗᒍ.

ᐃᓚᐅᓚᐅᕐᒥᔪᑦ ᓄᓇᕗᒻᒥ ᐊᐅᓚᑦᑎᖃᑎᒌᑦ ᓄᓇᕗᑦ ᑐᙵᕕᒃᑯᓐᓂᙶᖅᑐᑦ, ᕿᑎᕐᒥᐅᑦ ᐊᕕᒃᑐᖅᓯᒪᔪᓂ ᑲᑐᔾᔨᖃᑎᒌᓂᒃ, ᐃᖃᓗᒃᑑᑦᑎᐊᒥ ᐊᖑᓇᓱᒃᑐᓕᕆᔨᒃᑯᓐᓂ ᐊᒻᒪ ᖁᕐᓗᖅᑐᕐᒥ ᐊᖑᓐᓂᐊᖅᑎᒃᑯᓐᓂ. ᑲᑎᒪᖃᑕᐅᓚᐅᕐᒥᔪᑦ ᓄᓇᑦᓯᐊᒥᙶᖅᑐᑦ ᑭᒡᒐᖅᑐᐃᔩᑦ Tłı̨chǫ ᒐᕙᒪᖓᓂᙶᖅᑐᑦ, ᓄᓇᑦᓯᐊᒥ ᐊᓪᓚᐃᑦ ᓄᓇᖃᖅᑳᖅᓯᒪᔪᓂᑦ ᐊᒻᒪ North Slave ᐊᓪᓚᐃᑦ ᑲᑐᔾᔨᖃᑎᒌᓂᑦ.

ᐅᑯᐊ ᑲᑎᒪᓚᐅᖅᑐᑦ ᑭᖑᓪᓕᖅᐹᒥ ᑲᑎᒪᓂᓪᓚᑦᑖᕆᕙᒃᑕᖏᓐᓂᒃ ᐆᒪᔪᕐᓂᒃ ᐊᐅᓚᑦᑎᖃᑎᒌᓂᒃ ᐅᖃᐅᓯᖃᕈᒪᓪᓗᑎᒃ ᖃᐅᔨᓇᓱᖕᓂᕐᒥᒃ, ᖃᐅᔨᓴᕐᓂᕐᒥᒃ, ᐊᒻᒪ ᐊᐅᓚᑦᑎᓂᕐᒧᑦ ᐱᓕᕆᔾᔪᓯᕐᓂᒃ ᐃᑲᔪᖅᓱᕐᓗᒋᑦ ᓇᐹᖅᑐᖃᙱᑦᑐᒦᑦᑐᑦ ᑐᒃᑐᐃᑦ ᐊᐅᓚᑕᐅᔪᑦ ᐊᒻᒪ ᓴᐳᔾᔭᐅᓇᓱᒃᑐᑦ.

ᓯᕗᓕᖅᑏᑦ ᐱᓕᕆᔨᒻᒪᕇᓪᓗ ᐅᖃᐅᓯᖃᓚᐅᕆᕗᑦ ᖃᓄᖅ ᑐᓴᐅᒪᖃᑎᒌᑦᑎᐊᓕᒃᑲᓐᓂᕈᓐᓇᕐᒪᖔᑕ ᐊᐅᓚᑦᑎᓗᑎᒡᓗ ᐆᒪᔪᓂᒃ ᐊᐅᓚᑦᑎᖃᑎᒌᑦ ᐱᓕᕆᖃᑎᒌᓂᑦ ᓱᓕ ᐱᓕᕆᖃᑎᒌᖕᓂᐊᖅᑎᓪᓗᒋᑦ ᐃᑲᔪᖅᑐᐃᖃᑕᐅᓗᑎᒃ ᓄᖑᕋᐃᓗᐊᖅᑕᐃᓕᒪᓂᕐᒧᑦ ᐅᑎᖅᑎᑦᑎᕙᓪᓕᐊᓂᕐᒧᓪᓗ ᐊᑕᐅᓯᐅᙱᑦᑐᒧᑦ ᑭᒡᓕᒋᑎᑕᐅᔪᒧᑦ ᑐᒃᑐᖏᓐᓂᒃ, ᐱᓗᐊᖅᑐᒥ ᕿᖓᐅᑦ ᑐᒃᑑᔮᖅᑑᓪᓗ ᑐᒃᑐᖏᑦ.

ᐅᑯᐊ ᐅᖃᐅᓯᐅᓚᐅᖅᑐᑦ:

  • ᕿᒥᕐᕈᔭᐅᓪᓗᑎᒃ ᖃᖓᑦᑎᐊᓕᓴᐅᓛᑦ ᖃᐅᔨᓴᕈᑎᕕᓃᑦ ᖃᓄᐃᓕᖓᓕᕐᓂᖏᑦ ᕿᖓᐅᒻᒥ ᓇᐹᖅᑐᖃᙱᑦᑐᒥᒃ ᑐᒃᑐᓂᒃ.
  • ᕿᒥᕐᕈᔭᐅᔪᑦ ᒫᓐᓇ ᓄᓇᕗᒻᒥ ᓄᓇᑦᓯᐊᒥᓗ ᐊᐅᓚᑦᑎᖃᑎᒌᑦ ᑲᑎᒪᔨᖏᓐᓄᑦ ᑐᒃᓯᕋᐅᑎᑦ ᐊᑐᓕᖁᔭᐅᔪᓪᓗ ᑐᒃᑐᓂᑦ ᐊᐅᓚᑦᑎᓂᕐᒧᑦ.
  • ᖃᓄᐃᑉᐸᓪᓕᐊᓕᕐᓂᖏᑦ ᕿᖓᐅᒻᒥ ᑐᒃᑐᖏᓐᓂᒃ ᐊᐅᓚᑦᑎᖃᑎᒌᓄᑦ ᖃᓄᐃᓕᐅᕈᑕᐅᔪᓂᑦ, ᐅᑯᓂᖓᓗ ᕿᖓᐅᑦ ᑐᒃᑐᖏᓐᓂ ᐅᖃᐅᔾᔪᐃᔨᑦ ᑲᑎᒪᔨᕋᓛᖏᑦ ᐊᒻᒪ ᕿᖓᐅᑦ ᑐᒃᑐᐃᑦ ᓇᓃᓐᓂᖏᓐᓂᒃ ᐸᕐᓇᐅᑎᑦ.
  • ᐅᖃᐅᓯᐅᔪᑦ ᖃᓄᖅ ᖁᕝᕙᖅᑕᐅᔪᓐᓇᕐᒪᖔᑕ ᒪᓕᑦᑎᐊᖅᑐᑦ ᐊᒻᒪ ᒪᓕᒐᖅᑎᒍᑦ ᐊᖑᓇᓱᒍᑕᐅᓲᑦ, ᐃᓚᓕᐅᑎᓗᒋᑦ ᓴᖅᑭᓚᐅᖅᑐᑦ ᑲᑎᒪᓚᐅᖅᑎᓪᓗᒋᑦ ᓄᓇᑦᓯᐊᒥ ᐊᖑᓇᓱᒃᑎᑦ ᑎᓯᐱᕆ 2022−ᒥ.
  • ᐊᑐᓕᖅᑎᑕᐅᕙᓪᓕᐊᖏᓐᓇᓚᐅᖅᐳᓪᓗ ᓄᓇᑦᓯᐊᒥ−ᓄᓇᕗᑦ ᒐᕙᒪᒃᑯᓐᓂ ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᒃᑯᑦ ᐊᐅᓚᑦᑎᓂᐊᖅᑎᓪᓗᒋᑦ ᓇᐹᖅᑐᖃᙱᑦᑐᒥᒃ ᑐᒃᑐᓂᒃ.

ᑕᒪᕐᒥᒃ ᐊᕙᑎᓕᔨᒃᑯᑦ ᒥᓂᔅᑕᖏᑦ ᐃᓕᓴᖅᓯᓚᐅᖅᐳᑦ ᓇᐹᖅᑐᖃᙱᑦᑐᒥᑦ ᑐᒃᑐᐃᑦ ᓴᐳᔾᔭᐅᓯᒪᔪᑦ ᑲᑐᔾᔨᓗᑎᒃ ᑲᒪᒋᔭᐅᔭᕆᐊᖃᕐᒪᑕ ᐊᖏᖅᓯᒪᔭᕆᐊᖃᖅᖢᑎᒃ ᐊᒻᒪ ᖃᓄᐃᓕᐅᖅᑎᑦᑎᓗᑎᒃ ᐱᓕᕆᖃᑎᒌᒃᑐᑦ, ᐊᔾᔨᒌᙱᑦᑐᓂᑦ ᑭᒡᒐᖅᑐᐃᕕᐅᔪᓂᑦ.

ᐃᓚᐅᔪᓪᓗ ᑕᒪᑐᒪᓂ ᐱᓇᓱᐊᕈᓯᕐᒥ ᑲᑎᒪᔪᓂᒃ ᓇᓗᓇᐃᖅᓯᓚᐅᖅᐳᑦ ᑕᒪᐃᓐᓅᖓᔪᒥᒃ ᑐᕌᒐᕆᔪᒪᔭᒥᒃ ᐊᐅᓚᑦᑎᔾᔪᑎᒃᓴᑦᑎᐊᕙᖕᓂᒃ ᓇᐹᖅᑐᖃᙱᑦᑐᒥᒃ ᑐᒃᑐᓂᒃ ᖃᐅᔨᒪᔭᐅᖁᓪᓗᒋᑦ ᑖᒃᑯᐊ ᐱᒻᒪᕆᐅᓪᓗᑎᒃ ᐃᑲᔫᑎᒃᓴᑦ ᓴᐳᔾᔭᐅᓗᑎᒃ ᓯᕗᓂᒃᓴᑦᑎᓐᓂ ᐊᕐᕌᒍᒐᓵᓗᖕᓄᑦ.

ᐅᖃᐅᓯᐅᓯᒪᔪᑦ

"ᑐᒃᑐᐃᑦ ᐱᒻᒪᕆᐅᒋᔭᐅᓪᓚᕆᖕᒪᑕ ᐃᓄᐃᑦ ᐃᓅᓯᖏᓐᓄᑦ. ᐃᓕᖅᑯᓯᕆᔭᐅᔪᒃᑯᑦ ᓴᖅᑭᔮᕐᔪᐊᕐᒪᑦ ᓂᕿᒋᔭᐅᓪᓚᕆᒃᖢᑎᓪᓗ. ᑕᒪᐃᓐᓂᒃ ᓄᓇᑦᓯᐊᒥ ᓄᓇᕗᒻᒥᓗ ᓴᙱᑦᑎᐊᖅᑐᓂᒃ ᐊᒻᒪ ᑲᑐᔾᔨᖃᑎᒌᑦᑎᐊᖅᑐᓂᒃ ᐆᒪᔪᓕᕆᔨᒃᑯᓐᓂ ᐊᐅᓚᑦᑎᔨᖃᖅᑐᑦ ᐅᑯᓇᙶᖅᓯᒪᔪᓂᒃ ᓄᓇᖃᖅᑳᖅᓯᒪᔪᑦ ᐃᓄᖕᓂᒃ ᐊᒻᒪ ᐊᐅᓚᑦᑎᔨᐅᖃᑕᐅᔪᓂᒃ ᐱᓕᕆᔨᐅᖃᑕᐅᔪᓂᒃ.  ᐱᓕᕆᐊᒃᓴᖃᕋᑦᑕ ᑲᑐᔾᔨᖃᑎᒌᒋᐊᖃᖅᖢᑕ ᐱᓕᕆᐊᑦᑎᓐᓂ ᐋᖅᑭᒃᑕᐅᓯᒪᔪᓂᒃ ᐊᐅᓚᑦᑎᓂᐊᖅᖢᑕ ᑐᒃᑐᖁᑎᑦᑎᓐᓂ ᐃᑲᔫᑎᒃᓴᓄᑦ ᒫᓐᓇᓕᓴᕐᓄᑦ ᐊᒻᒪ ᓯᕗᕚᒃᓴᑦᑎᓐᓄᑦ.
ᑕᐃᕕᑦ ᐊᕿᐊᕈᖅ, ᓄᓇᕗᒻᒥ ᐊᕙᑎᓕᕆᔨᒃᑯᓐᓄᑦ ᒥᓂᔅᑕ

"ᓇᐹᖅᑐᖃᙱᑦᑐᒦᑦᑐᑦ ᑐᒃᑐᐃᑦ ᐃᑲᔫᑎᖃᑦᑎᐊᖅᑐᓂᒃ ᐃᑲᔫᑎᒃᓴᖃᖅᐳᑦ ᓄᓇᑦᓯᐊᕐᒥᐅᓄᑦ, ᐅᕙᒍᓪᓗ ᑕᒪᑦᑖᓗᒃ ᐱᓕᕆᒋᐊᖃᕋᑦᑕ ᐃᑲᔪᖅᓱᕐᓗᒋᑦ ᒫᓐᓇᐅᓂᖓᓂ ᑐᒃᑐᐃᑦ ᐅᓄᙱᓗᐊᕐᓂᖏᓐᓄᑦ. ᑲᑎᓪᓗᑕ ᐆᒪᔪᓂᑦ ᐊᐅᓚᑦᑎᖃᑎᒌᒡᓗᑕ, ᐱᕙᓪᓕᐊᑎᑦᑎᓂᐊᖅᐳᒍᑦ ᑲᑐᔾᔨᓗᑕ ᐊᔪᙱᓐᓂᑦᑎᓐᓂ ᓴᙱᒃᑎᒋᐊᖅᑎᑦᑎᓗᑕ ᐱᓕᕆᐊᕆᕙᒃᑕᑦᑎᓐᓂ ᐊᑕᐅᑦᑎᒃᑯᑦ ᓇᓗᓇᐃᖅᓯᓇᓱᒡᓗᑕ ᑐᒃᑐᑕᖃᐃᓐᓇᕐᓂᖓᓂᒃ ᓯᕗᕚᒃᓴᑦᑎᓐᓄᑦ."
ᓴᐃᓐ ᑖᒻᓴᓐ, ᓄᓇᑦᓯᐊᒥ ᒥᓂᔅᑕᕆᔭᐅᔪᖅ ᐊᕙᑎᓕᕆᔨᒃᑯᓐᓄᑦ ᐊᒻᒪ ᓄᓇᒥᐅᑕᓕᕆᔨᒃᑯᓐᓄᑦ

ᓱᓕᔪᑦ

  • ᐅᔾᔨᕐᓇᖅᑐᒥᒃ ᐅᓄᕈᓐᓃᖅᐹᓪᓕᖅᓯᒪᖕᒪᑕ ᓇᐹᖅᑐᖃᙱᑦᑐᒥᐅᑕᑦ ᑐᒃᑐᐃᑦ ᐅᑭᐅᑦ 30 ᐅᖓᑖᓄᑦ.
  • ᑲᑐᔾᔨᖃᑎᒌᒍᑕᐅᓪᓗᑎᒃ ᐋᖅᑭᒃᑕᐅᓯᒪᔪᑦ ᐊᐅᓚᑦᑎᓂᕐᒧᑦ ᐸᕐᓇᐅᑎᒧᑦ ᐋᖅᑭᒃᑕᐅᓯᒪᕗᑦ ᓇᐹᖅᑐᖃᙱᑦᑐᒥᐅᑕᓄᑦ ᑐᒃᑐᓄᑦ ᓄᓇᑦᓯᐊᒥ ᓄᓇᕗᒻᒥᓗ, ᕿᖓᐅᒻᒥᓗ ᐊᒻᒪ ᑐᒃᑑᔮᖅᑑᓪᓗ ᑐᒃᑐᖏᓐᓂᒃ.
  • ᐅᓄᖅᑐᓂᑦ ᐱᔾᔪᑎᖃᕈᓐᓇᖅᑐᑦ ᑐᒃᑑᖃᑎᒌᑦ ᐅᓄᕈᓐᓃᖅᐸᓪᓕᐊᔪᑦ, ᐅᑯᓄᖓᓗ ᓯᓚᒧᑦ, ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᓪᓗ, ᓂᕿᖏᓐᓄᑦ, ᖃᓂᒪᓐᓇᒧᑦ, ᓂᕿᒃᓴᖅᓯᐅᑕᐅᔪᓄᑦ, ᓂᕿᑐᖅᑎᓄᑦ ᐊᒻᒪ ᐱᓕᕆᕙᓪᓕᐊᔪᓄᑦ.
  • ᐅᓄᖅᑐᑦ ᖃᓄᐃᓕᐅᕈᑕᐅᔪᑦ ᐱᔾᔪᑎᖃᓪᓗᐊᑕᖅᐳᑦ ᐊᐅᓚᑦᑐᓇᙱᑕᑦᑎᓐᓂᒃ, ᐅᑯᓄᖓᓗ ᐃᓄᖕᓄᑦ ᐊᒃᑐᐃᔾᔪᑕᐅᓲᓄᑦ (ᓂᕿᒃᓴᖅᓯᐅᕐᓂᖅ, ᐱᓕᕆᐊᖑᕙᓪᓕᐊᔪᑦ ᐊᒻᒪ ᐃᑭᑦᑐᑦ ᐊᐅᓚᑕᐅᕙᒃᑐᑦ ᓂᕿᑐᖅᑎᓪᓗ.
  • ᖃᖓᑦᑎᐊᓕᓴᐅᓛᖅ ᑐᒃᑑᖃᑎᒌᓂᒃ ᒥᒃᓴᐅᓴᒃᑕᐅᓂᑯ ᕿᖓᐅᒻᒥ ᑐᒃᑐᖏᓐᓂᒃ ᓴᖅᑭᑕᐅᓚᐅᖅᓯᒪᕗᖅ 2021-ᖑᑎᓪᓗᒍ.

ᐊᒃᑐᐊᓂᓖᑦ ᐊᑦᑕᑕᕐᕖᑦ

ᐱᕙᓪᓕᐊᔪᑦ ᓴᖅᑭᑕᐅᔪᑦ: ᕿᖓᐅᒻᒥ ᑐᒃᑐᐃᑦ ᐊᐅᓚᑦᑎᓂᕐᒧᑦ ᐸᕐᓇᐅᑎᑦ.
ᓇᐹᖅᑐᖃᙱᑦᑐᒥᐅᑕᑦ ᑐᒃᑐᐃᑦ.

###

ᐱᕙᓪᓕᐊᔪᓂᒃ ᑐᓴᕆᐊᕐᕕᒃᓴᖅ

ᑮᓯ ᓚᓱᑦ
ᑐᓴᒐᒃᓴᓕᕆᓂᕐᒧᑦ ᐊᐅᓚᑦᑎᔨ, ᐃᓕᓐᓂᐊᖅᑐᓕᕆᓂᕐᒧᑦ ᐊᒻᒪ ᑐᓴᐅᒪᑎᑦᑎᓂᕐᒧᑦ
ᐊᕙᑎᓕᕆᔨᒃᑯᑦ
ᓄᓇᕗᑦ ᒐᕙᒪᒃᑯᓐᓂ
clessard3@gov.nu.ca

ᒪᐃᒃ ᐅᐃᔅᑦᐅᐃᒃ
ᐊᐅᓚᑦᑎᔨ, ᑐᓴᐅᒪᑎᑦᑎᓂᕐᒧᑦ ᑭᒃᑯᑐᐃᓐᓇᓂᒡᓗ ᖃᐅᔨᒪᑎᑦᑎᓂᕐᒧᑦ
ᐊᕙᑎᓕᕆᓂᕐᒧᑦ ᓄᓇᒥᐅᑕᓂᓪᓗ ᐊᑐᖅᑐᒃᓴᓂᑦ
ᓄᓇᑦᓯᐊ ᒐᕙᒪᒃᑯᑦ
ENR_Communications@gov.nt.ca