ᑐᒃᓯᕋᕐᓂᖅ ᐃᓄᐃᑦ ᐳᓚᕋᖅᑐᓕᕆᓂᕐᒧᑦ ᓇᖕᒥᓂᖃᕐᓂᕐᒧᑦ ᑲᔪᖏᖅᓴᐃᔪᓕᕆᓂᕐᒧᑦ ᐱᓕᕆᐊᒧᑦ

ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ ᐱᔪᓐᓇᖅᓯᖕᒪᑕ ᐱᓇᔫᑎᓂᒃ ᐃᓄᐃᑦ ᐳᓚᕋᖅᑐᓕᕆᓂᕐᒧᑦ ᓇᖕᒥᓂᖃᕐᓂᕐᒧᑦ ᑲᔪᖏᖅᓴᐃᓂᕐᒧᑦ ᐱᓕᕆᐊᒃᓴᖓᓄᑦ. ᑖᓐᓇ ᐱᓕᕆᐊᖑᔪᖅ ᐃᑲᔪᖅᑐᐃᕗᖅ ᐳᓚᕋᖅᑐᓕᕆᓂᕐᒧᑦ ᓇᖕᒥᓂᖃᖅᑎᐅᔪᓂᒃ ᓄᓇᕗᒻᒥ ᐋᖅᑭᒃᓱᐃᖁᓪᓗᒋᑦ ᐊᔪᕈᓐᓃᖅᓯᒪᔭᒥᓂᒃ, ᖃᐅᔨᒪᓂᕆᔭᒥᓂᒃ, ᐱᓕᕆᔨᓪᓚᕆᐅᓂᕐᒧᓪᓗ ᐊᔪᙱᓐᓂᕆᔭᒥᓂᒃ ᓇᖕᒥᓂᕆᔭᒥᓂᒃ ᐊᖏᒡᓕᕙᓪᓕᐊᑎᑦᑎᓂᐊᕐᓗᑎᒃ.

ᐃᓄᐃᑦ ᐳᓚᕋᖅᑐᓕᕆᓂᕐᒧᑦ ᓇᖕᒥᓂᖃᕐᓂᕐᒧᑦ ᑲᔪᖏᖅᓴᐃᓂᕐᒧᑦ ᐱᓕᕆᐊᖅ ᐃᓕᓐᓂᐊᖅᑎᑦᑎᖃᑦᑕᖅᐳᑦ ᑕᓪᓕᒪᓂᒃ ᐃᓄᖕᓂᒃ ᐳᓚᕋᖅᑐᓕᕆᓂᕐᒧᑦ ᓇᖕᒥᓂᖃᖅᑎᓂᒃ ᐊᒻᒪ ᐊᐅᓚᑦᑎᔨᓂᒃ ᓄᓇᕗᒻᒥ. ᐊᑐᓂ ᑲᔪᖏᖅᓴᐃᔪᓕᕆᓂᖅ ᐃᓚᖃᖅᐳᖅ ᐅᓪᓗᓄᑦ ᖁᓕᓄᑦ ᑎᑭᓪᓗᒍ ᐱᓕᕆᓪᓚᕆᒍᒪᓗᓂ ᐱᓕᕆᐊᒃᓴᒥᒃ ᐃᓚᖃᕐᓗᓂᓗ ᑲᑎᓯᒪᔪᓂᒃ ᐅᐸᒍᑎᓗᑎᒃ ᐊᒻᒪ ᖃᕋᓴᐅᔭᒃᑯᑦ ᐃᓕᓐᓂᐊᕐᓇᓂᒃ. ᐊᑐᓂ ᑲᔪᖏᖅᓴᐃᔪᓕᕆᓂᖅ ᐊᑯᓂᐅᓂᖃᕐᓂᐊᖅᑐᖅ ᑕᖅᑭᓄᑦ ᑎᓴᒪᓄᑦ ᐊᕐᕕᓂᓕᖕᓄᑦ ᑎᑭᓪᓗᒍ.

ᐱᔪᓐᓇᕐᓂᐊᕐᓗᓂ, ᐱᓇᔪᒃᑐᑦ ᓄᓇᕗᒻᒥ ᐃᓅᔭᕆᐊᓖᑦ ᓇᖕᒥᓂᖃᕐᓗᑎᒡᓗ ᐳᓚᕋᖅᑐᓕᕆᓂᕐᒧᑦ ᓇᖕᒥᓂᕆᔭᐅᔪᒥᑦ ᓄᓇᕗᒻᒥ.

ᐱᓇᔪᖃᑕᐅᔪᒪᒍᕕᑦ, ᓇᒃᓯᐅᔾᔨᓂᐊᖅᐳᑎᑦ ᑎᑎᖅᑲᒥᒃ ᐱᔪᒪᔪᓂᒃ dperezcasas@gov.nu.ca ᑐᑭᓯᒋᐊᕈᑎᒃᓴᓂᒃ ᐃᒡᕕᑦ ᒥᒃᓵᓄᑦ, ᓇᖕᒥᓂᕆᔭᕕᑦ ᒥᒃᓵᓄᑦ, ᑭᓱᓂᒃ ᐳᓚᕋᖅᑐᓕᕆᓂᕐᒧᑦ ᐱᔨᑦᑎᕋᐅᑎᓂᒃ ᒪᓂᒪᑎᑦᑎᖕᒪᖔᖅᐱᑦ, ᖃᓄᐃᒻᒪᑦ ᓂᕈᐊᒐᒃᓴᑦᑎᐊᕙᐅᖕᒪᖔᖅᐱᑦ, ᑭᓱᓂᒡᓗ ᐃᓕᑦᑎᔪᒪᖕᒪᖔᖅᐱᑦ.

ᐱᓇᔪᒍᒪᔪᓄᑦ ᐃᓱᓕᕝᕕᒃᓴᖃᖅᑐᖅ ᔫᓂ 10, 2023-ᒥ.

ᑐᑭᓯᒋᐊᒃᑲᓐᓂᕈᒪᒍᕕᑦ, ᖃᐅᔨᒋᐊᕐᕕᒋᓗᒍ ᑕᐃᓕᓐ ᐱᕇᔅ ᑳᔅ, ᐅᖃᐅᔾᔨᒋᐊᖅᑎᒻᒪᕆᒃ, ᐳᓚᕋᖅᑐᓕᕆᓂᕐᒧᑦ ᐱᕙᓪᓕᐊᑎᑦᑎᓂᕐᒧᑦ, ᐅᕗᖓ dperezcasas@gov.nu.ca ᐅᕝᕙᓘᓐᓃᑦ 1-888-975-5999. ###

ᑐᓴᒐᒃᓴᓂᑦ ᖃᐅᔨᒋᐊᕐᕕᒃᓴᖅ:

ᐅᐃᑦᓰᓐ ᑦᓵᓐ

ᐊᐅᓚᑦᑎᔨ, ᑐᓴᒐᒃᓴᓕᕆᔨᒃᑯᓐᓄᑦ

ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ

867-975-7818

EDT@gov.nu.ca