ᓄᓇᕗᑦ ᒐᕙᓚᖓ ᑐᓴᖅᑎᑦᑎᓯᒪᕗᖅ ᐃᒫᒃ ᐅᑯᐊ ᐅᑭᐅᖅᑕᖅᑐᒥᑦ ᓄᓇᓖᑦ ᐊᑐᖅᐸᑦᑕᖏᑦ ᐊᐅᓚᔪᓐᓇᖁᓪᓗᒋᑦ ᑲᑐᔾᔨᖃᑎᒌᒃᑯᑦ ᓂᕈᐊᖅᑕᐅᓯᒪᓕᕐᓂᖏᓐᓂᒃ ᐱᔪᒪᔭᐅᓂᕐᐸᐅᓪᓗᑎᒃ ᐃᑲᔪᖅᑑᑎᐅᓂᐊᕐᓗᑎᒃ ᑎᑎᕋᐅᔭᖅᓯᓂᕐᒥᒃ, ᓴᓇᓂᕐᒥᒃ, ᑮᓇᐅᔭᖃᖅᑎᑦᓯᓂᕐᒥᒃ ᐊᒻᒪᓗ ᐋᕿᑦᑎᐊᖅᓯᒪᑎᑦᓯᔨᐅᓂᐊᕐᓗᑎᒃ ᐃᖃᓗᖕᓂᑦ ᓄᓇᕐᔪᐊᒥ ᒥᑦᑕᕐᕕᖓ ᐊᕿᒋᐊᖅᑕᐅᓕᖅᐸᑦ.
ᒪᓂᔨᒍᑎᓕᐅᖁᔨᓂᕐᒥᒃ ᑐᒃᓯᕋᐅᑎᓕᐅᖅᑐᖃᓚᐅᖅᑎᓪᓗᒍ ᐊᒻᒪ ᖃᐅᔨᓴᖅᑕᐅᓚᐅᖅᑎᓪᓗᒋᑦ ᐱᓕᐅᑎᔪᑦ ᓂᕈᐊᖅᓯᓚᐅᖅᑎᓪᓗᒋᓪᓗ, ᐅᑭᐅᖅᑕᖅᑐᒥᑦ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᑲᑐᔾᔨᖃᑎᒌᖏᑦ ᓂᕈᐊᕐᑕᐅᒻᒪᑕ ᐊᑎᓕᐅᕆᓚᐅᖅᑐᑦ ᑲᓐᑐᕌᒃᑕᖅᑎᑕᐅᔾᔪᑎᒥᓂᒃ ᓄᓇᕗᑦ ᒐᕙᒪᖓᓄᑦ ᓯᑎᐱᕆ 2013-ᖑᑎᓪᓗᒍ. ᓂᕆᐅᒋᔭᐅᕗᖅ ᓴᓇᓂᖅ ᐱᒋᐊᓚᕐᓂᖓᓂᒃ ᐅᐱᕐᖔᖅ 2014-ᒥᑦ. ᐱᓕᕆᐊᖑᔪᖅ ᐱᔭᕇᖅᑕᐅᓚᕋᓱᒋᔭᐅᕗᖅ 2017 ᓄᖑᐊᓂ.
ᐃᖃᓗᖕᓂᑦ ᓄᓇᕐᔪᐊᓕᒫᒧᑦ ᒥᕝᕕᒃᓴᐅᑉ ᐱᐅᓯᐅᒥᒋᐊᖅᑕᐅᓂᒃᓴᖓᓄᑦ ᐱᓕᕆᐊᖑᔪᖅ ᒪᑯᓂᖓ ᐃᓚᖃᖅᐳᖅ ᓄᑖᒥᒃ ᒥᑦᑕᕐᕕᒃ ᐃᒡᓗᕐᔪᐊᖅᑕᕐᓗᓂ; ᑎᖕᒥᓲᑦ ᑭᓴᕐᕕᒋᓲᖏᑦᑕ ᐃᓂᖏᑦ ᐊᖏᒡᓕᒋᐊᖅᑕᐅᓗᑎᒃ; ᓄᑖᓂᒃ ᐃᑯᒪᓕᖅᓱᖅᑕᐅᓗᑎᒃ; ᓄᑕᐅᓯᓕᕆᐊᖅᑕᐅᓗᓂ ᒥᕝᕕᐅᑉ ᐊᖁᑎᖓ; ᐊᒻᒪᓗ ᓄᑖᒥᒃ ᑲᑐᔾᔭᐅᔪᓂᒃ ᐱᒍᔾᔨᕕᒃᓴᒥᒃ ᐃᒡᓗᓕᐅᕐᓗᑎᒃ ᐃᒡᓗᒋᔭᐅᓚᕐᑐᒥᒃ ᖃᑦᑎᕆᔨᒃᑯᓐᓄᑦ ᓄᓇᒃᑰᕈᑎᖏᓐᓄᑦ/ᐱᓕᕆᔾᔪᑎᖏᓐᓄᑦ ᐱᖁᑎᓄᑦ ᐊᒻᒪᓗ ᐊᖏᔪᕐᓛᓗᖕᓄᑦ ᐳᐊᕐᕆᓯᓄᑦ ᐊᕿᒃᓯᒪᑎᑦᑎᐊᕈᑎᐅᖃᑦᑕᓚᕐᑐᓄᑦ ᒥᑦᑕᕐᕕᒃᒧᑦ ᐊᒻᒪᓗ ᑭᓴᕐᕕᖏᓐᓄᑦ. ᑖᓐᓇ ᐱᓇᓱᐊᖅᑕᐅᓂᖓ ᐃᓚᖓᒍᑦ ᑮᓇᐅᔭᖃᖅᑎᑕᐅᕗᖅ ᐅᑯᓇᖓᑦ PPP Canada Inc, ᒐᕙᒪᑐᖃᒃᑯᓐᓄᑦ ᑎᒥᖁᑎᒋᔭᐅᔪᖅ.
ᔭᐃᓐ ᓴᒃᑭᓪ QC ᐊᔾᔨᒌᒃᑎᑦᓯᓂᕐᒥᒃ ᐊᔪᖅᑮᒋᐊᖅᑎ, ᑎᓕᔭᐅᓚᐅᖅᑐᖅ ᓇᐅᑦᓯᖅᑐᖁᔭᐅᓪᓗᓂ ᐱᓕᐅᑎᔪᓂᒃ ᓂᕈᐊᖅᓯᓂᖃᖅᑎᓪᓗᒋᑦ— ᐃᓚᐅᓚᐅᕐᒥᔪᖅ ᑐᒃᓯᕋᐅᑎᓕᐅᖁᔨᓂᕐᒧᑦ ᒪᓂᔨᒍᑎᓕᐊᖑᓯᒪᔪᓂᒃ ᖃᐅᔨᓴᖃᑕᐅᓪᓗᓂ ᑭᐅᔾᔪᑎᖏᓐᓂᒃ—ᐊᒻᒪᓗ ᖃᐅᔨᓚᐅᖅᑐᖅ ᖃᐅᔨᓴᕐᓂᕆᔭᐅᔪᑦ ᐊᔾᔨᒌᒃᑎᑎᓂᖏᓐᓂᒃ ᐊᒻᒪᓗ ᐃᓚᐃᓐᓇᖅᓯᖏᓐᓂᖏᓐᓂᒃ. ᐊᔾᔨᒌᒃᑎᑦᓯᓂᕐᒥᒃ ᐊᔪᖅᑮᒋᐊᖅᑎᐅᑉ ᑐᓴᖅᑎᑦᑎᔾᔪᑎᓕᐊᕕᓂᖓ ᑕᑯᔭᐅᔪᓐᓇᖅᑐᖅ ᑕᓱᒪ ᒪᒃᐱᒐᐅᑉ ᐊᑖᓂᑦ.
ᐃᓂᓪᓚᖓᓂᓕᒫᑦ ᐊᕿᒃᓯᒪᓂᖏᑦ ᐱᓕᕆᐊᖑᔫᑉ ᐊᖏᖃᑎᒌᒍᑎᖏᓐᓃᑐᓂᒃ ᑕᑯᔪᒪᒍᕕᑦ ᖃᐅᔨᒋᐊᕐᕕᖃᕆᐊᖃᕐᐳᑎᑦ ᒪᑎᐅᓯ ᐃᓚᔅᕗᐃᒃᔅᒥᑦ ᐅᕙᓂ 867-975-7818 ᐅᕝᕙᓘᓐᓃᑦ millaszewicz@gov.nu.ca.
ᖃᐅᔨᒋᐊᑲᓐᓂᕈᒪᒍᕕᑦ ᕿᒥᕐᕈᔪᓐᓇᖅᑕᑎᑦ ᑎᑎᖃᖁᑏᑦ:
