ᐅᖃᓚᐅᑎᓯᐅᑏᑦ

You are here

ᐊᖏᕈᑎᐅᔪᖅ ᓄᓇᕘᒧᑦ ᐊᒻᒪᓗ ᐱᖓᓐᓇᖓᓂ ᐊᕕᑦᑐᖅᓯᒪᓂᐊᓂ ᕚᓐᑰᕗᕐ-ᒃᑯᓐᓄᑦ ᐃᑲᔪᕈᑎᖃᕐᓂᐊᖅᑐᖅ

ᓄᕕᐱᕆ 17, 2009

ᐃᖃᓗᐃᑦ, ᓄᓇᕗᑦ (ᓄᕖᕝᕙ 16, 2009) ᐲᑕ ᑕᑉᑐᓇ, ᓄᓇᕗᑉ ᒥᓂᔅᑕᖓᑦ ᐱᕙᓪᓕᐊᔪᓕᕆᓂᕐᒧᑦ ᐃᖏᕐᕋᔪᓕᕆᓂᕐᒧᓪᓗ, ᐅᓪᓗᒥᐅᔪᖅ ᑐᓴᖅᑎᑦᑎᖅᑲᐅᕗᖅ ᐊᖏᕈᑎᓕᐅᖅᑐᒥᓂᐅᓂᖓᓄᑦ ᐊᖏᕈᑎᓕᐅᖃᑎᒋᓪᓗᓂᒋᑦ ᑯᐊᐳᕇᓴᓐ-ᖓᓄᑦ ᐊᕕᑦᑐᖅᓯᒪᔪᑦ ᐱᖓᓐᓇᖓᓄᑦ ᕚᓐᑰᕗᒧᑦ ᓴᖅᑭᔮᖅᑎᑕᐅᒋᐊᖁᓪᓗᒍ ᓄᓇᕗᑦ ᕚᓐᑰᕗᕐ-ᒥ 2010-ᖑᓕᖅᐸᑦ ᐱᙳᐊᕕᔾᔪᐊᖅᑐᖃᓕᖅᑎᓪᓗᒍ ᐊᒻᒪᓗ ᑎᒥᒥᒍᑦ ᐊᔪᕈᑎᓕᓐᓄᑦ ᐅᑭᐅᕐᒥ ᐱᙳᐊᕕᔾᔪᐊᖅᑐᖃᓕᕐᒥᑉᐸᑦ.



“ᐃᓚᖓᑦ ᒐᕙᒪᒃᑯᑦ ᐱᓕᕆᐊᕆᓇᓱᐊᖅᑕᖓᑦ ᐅᖃᐅᑕᐅᓯᒪᓪᓗᓂ ᐱᓇᓱᐊᖅᑕᑎᓐᓂ ᑕᒪᑉᑕ-ᒥ ᓄᓇᕗᑦ ᓴᖅᑭᔮᖅᑎᑕᐅᒋᐊᕐᔫᒥᒋᐊᖃᕐᒪᑦ ᑲᓇᑕᓕᒫᕐᒥ ᐊᒻᒪᓗ ᓄᓇᕐᔪᐊᕐᒥ,” ᐅᖃᖅᑐᓂ ᒥᓂᔅᑕ ᑕᑉᑐᓇ. “ᑖᓐᓇ ᑐᑭᓯᐅᒪᖃᑎᒌᓐᓂᕐᒧᑦ ᐊᖏᕈᑎᐅᔪᖅ ᐊᖏᕈᑎᓕᐊᕆᔭᐅᓯᒪᔪᖅ ᐅᕙᑦᑎᓐᓄᑦ ᐊᒻᒪᓗ ᐊᕕᑦᑐᖅᓯᒪᓂᐊᓄᑦ ᐱᖓᓐᓇᖓᓄᑦ ᕚᓐᑰᕗᕐ-ᒥ ᑕᑯᒃᓴᐅᑎᑦᑎᒍᑕᐅᓕᕋᔭᖅᑐᖅ ᓄᓇᕗᑉ ᐃᓕᖅᑯᓯᖓᓂᑦ, ᐱᖅᑯᓯᖓᓂᒃ ᐊᒻᒪᓗ ᐱᕙᓪᓕᐊᔪᓕᕆᓂᖓᓂᒃ ᐱᙳᐊᕕᔾᔪᐊᖅᑐᖃᖅᑎᓪᓗᒍ.”



ᓇᓗᓇᐃᔭᖅᓯᒪᓂᖏᑦ ᐊᖏᕈᑎᑉ ᐊᖏᖃᑎᒌᒍᑕᐅᓚᐅᖅᑐᑦ ᐱᓇᓱᐊᕈᓯᐅᓚᐅᖅᑐᒥ ᐱᖓᓐᓇᖓᓄᑦ ᕚᓐᑰᕗᕐ-ᑉ ᒪᐃᔭᖓᑦ ᐹᒥᓚ ᒍᓪᑦᓯᒥᑦ-ᔫᓐᔅ ᓂᐅᕐᕈᒻᒪᑦ ᐃᖃᓗᓐᓄᑦ ᐸᖕᓂᖅᑑᕐᒧᓗ.



“ᓄᓇᕗᒥ, ᑭᒃᑯᓕᒫᑦ ᑕᑯᔭᒃᑲ ᐱᙳᐊᕕᔾᔪᐊᖅᑐᓂ ᖁᕕᐊᓲᑎᖃᒻᒪᕆᓚᐅᖅᑐᑦ ᓂᕆᐅᓐᓂᖃᑦᑎᐊᖅᑐᑎᑦ ᐊᒻᒪᓗ ᐱᓕᕆᐊᖃᖃᑕᐅᔪᒪᓕᖅᑐᑎᑦ ᐱᓕᕆᖃᑎᒌᓕᕐᓂᕗᑦ ᐱᓪᓗᒍ,” ᐅᖃᖅᑐᓂ ᒪᐃᔭ ᒎᓪᑦᓯᒥᑦ-ᔫᓐᔅ. “ᓄᓇᖃᖅᑐᖁᑎᕗᑦ ᐊᒻᒪᓗ ᓂᐅᕐᕈᐊᑦᑎᓐᓄᑦ, ᑕᒪᓐᓇ ᐳᐃᒍᕐᓇᙱᑦᑑᓂᐊᖅᑐᖅ ᐃᓕᖅᑯᓯᕆᔭᐅᔪᑦ ᑕᑯᕋᓐᓈᖅᑕᐅᓗᑎᑦ ᐊᒻᒪᓗ ᐃᓕᓐᓂᐊᕈᑎᒋᔭᐅᓗᓂ ᐊᒻᒪᓗ ᐱᕕᖃᕈᑕᐅᑦᑎᐊᕐᓂᐊᖅᑐᓂ ᐱᕙᓪᓕᐊᒍᓐᓇᖅᓯᓗᑎᑦ ᓇᒻᒥᓂᖁᑎᒋᔭᐅᔪᓄᑦ.”



ᐊᖏᕈᑎᐅᔪᖅ ᒪᓕᑦᑐᒍ, ᐊᕕᑦᑐᖅᓯᒪᓂᐊ ᐱᖓᓐᓇᖓᑕ ᕚᓐᑰᕗᕐ-ᑉ ᑕᑯᒃᓴᐅᑎᑦᑎᒻᒪᕆᓐᓂᐊᕐᒪᑦ ᐊᖏᔪᒥᒃ ᐅᔭᕋᓐᓂᐊᕐᓂᓕᕆᓂᕐᒨᖓᔪᓂᒃ, “ᐅᔭᕋᓐᓂᐊᕐᓂᕐᒧᑦ ᐊᓯᔾᔨᕈᑎᒋᔭᐅᔪᖅ,” ᑕᐃᔭᐅᔪᖅ ᑕᑯᒃᓴᐅᑎᑦᑎᓛᖅᑐᑎᑦ ᕖᕝᕗᐊᕆ 17, 2010-ᓕᖅᐸᑦ. ᑕᐅᕙᓂᕐᒥᐅᑕᐅᓪᓗᑎᑦ ᐊᒥᓱᑦ ᐅᔭᕋᓐᓂᐊᖅᑐᓕᕆᔨᐅᔪᑦ ᑲᒻᐸᓃᑦ, ᐱᖓᓐᓇᖓᑦ ᕚᓐᑰᕗᕐ ᑕᑯᒃᓴᐅᑎᑦᑎᒐᔭᖅᑐᑦ ᓄᑖᕐᒥ ᐱᕙᓪᓕᐊᒍᑎᒃᓴᐅᒍᓐᓇᕋᔭᖅᑐᓂᒃ ᑲᒻᐸᓂᐅᔪᓄᑦ ᐊᒻᒪᓗ ᖃᐅᔨᓗᑎᑦ ᐅᔭᕋᓐᓂᐊᕐᓂᓕᕆᔨᐅᔪᑦ ᑲᔪᓯᓂᖃᑦᑎᐊᕐᓂᕆᓲᖏᑕ ᓄᓇᕗᒥ ᐅᓂᒃᑳᖅᑕᐅᒐᔭᖅᑐᑎᑦ.



ᐊᓯᖏᑦ ᑕᑯᒃᓴᐅᑎᑕᐅᔪᑦ ᐱᖃᓯᐅᑎᓛᖅᑐᑦ, “20 ᐅᓪᓗᐃᑦ ᑕᑯᓐᓇᒐᒃᓴᓕᐊᕆᔭᐅᔪᑦ,” ᓄᑖᖑᓛᖑᔪᑦ ᖃᓄᐃᑦᑑᓛᕐᓂᐊᖅᑐᒋᔭᐅᓂᖏᓐᓄᑦ ᑕᑯᒃᓴᐅᑎᑕᐅᓗᑎᑦ ᐊᒻᒪᓗ ᖃᓄᑐᐃᓐᓇᖅ ᐅᓂᒃᑲᐅᓯᕆᔭᐅᓗᐊᙳᐊᕋᔭᖅᑐᓂ ᐊᑦᑐᖅᑕᐅᓚᐅᖅᓯᒪᙱᑦᑐᖅ ᑲᔾᔮᕐᓇᕐᓂᖓᑦ ᓄᓇᕗᑉ. ᐊᖏᔫᑎᒻᒪᕆᐊᓗᐃᑦ ᑕᑯᒃᓴᒐᒃᓴᓕᐊᕆᔭᐅᓯᒪᔪᑦ ᓄᓇᕗᑉ ᓄᓇᖓᓂᒃ ᐊᒻᒪᓗ ᐃᓄᖏᓐᓂ ᑕᑯᒃᓴᐅᑎᑕᐅᓛᕆᓪᓗᑎᑦ ᖃᓄᐃᓕᐅᕈᓘᔭᖅᑐᖃᓕᖅᑎᓪᓗᒍ ᐱᖓᓐᓇᖓᓂ ᕚᓐᑰᕗᕐ-ᑉ ᓄᓇᖓᑕ ᐱᙳᐊᕐᕕᖓᓂ ᑐᑦᑕᕐᕕᓪᓗᐊᑕᕆᔭᐅᒐᔭᖅᑐᖅ 2010-ᒥ ᖁᕕᐊᓲᑎᖃᖅᑎᓪᓗᒋᑦ ᐱᙳᐊᕕᔾᔪᐊᖅᑐᓂᒃ.



ᐱᙳᐊᕕᔾᔪᐊᕐᓂᖏᓐᓂ, 2010 ᑕᒻᒫᖅᑐᑎᑦ ᐃᓕᓐᓂᐊᕐᓂᐊᖅᑐᑦ ᓱᕈᓯᕐᓄᑦ ᐱᓕᕆᐊᖅ ᐃᓕᓐᓂᐊᖅᑎᑦᑎᒍᑕᐅᒐᔭᖅᑐᑦ ᐱᐅᔪᓂᒃ ᑲᒪᒋᔭᖃᓪᓗᐊᕐᓗᑎᑦ ᓄᑖᕐᓂᒃ ᐱᓕᕆᔪᓐᓇᐅᑎᓂᒃ ᐃᓕᓐᓂᐊᖅᑎᑕᐅᓗᑎᑦ, ᐅᖃᐅᓯᕐᒥᒃ, ᐃᓅᓯᖃᕐᓂᕐᒥᒃ ᐊᔾᔨᒌᙱᑦᑐᓂᒃ ᐃᓕᓐᓂᐊᖅᑎᑦᑎᓗᑎᑦ, ᐅᑭᐅᖅᑕᖅᑐᑉ ᑕᑯᓐᓇᒐᒃᓴᓕᐊᕆᔭᐅᓯᒪᓂᖓᑦ ᑕᑯᒃᓴᐅᑎᑕᐅᓗᓂ ᐊᒻᒪᓗ ᐃᓄᐃᑦ ᐱᙳᐊᕈᓯᖏᓐᓂᒃ ᑕᑯᒃᓴᐅᑎᑦᑎᒻᒥᓗᑎᑦ. ᑖᒃᑯᐊ ᖃᓄᖅᑑᕈᑕᐅᓯᒪᔪᑦ ᐱᓕᕆᐊᑦ ᐱᖃᓯᐅᔾᔨᒐᔭᖅᑐᑦ ᑕᑯᒃᓴᐅᑎᑕᐅᓗᑎᑦ ᑲᓇᑕᒥ ᐊᓂᕐᓂᖃᕐᓇᙱᑦᑐᒧᑦ ᐱᓕᕆᕝᕕᖓᑕ ᐱᙳᐊᕐᓂᖅ ᐊᓂᕐᓂᖃᕐᓇᙱᑦᑐᒥ ᑕᑯᒃᓴᐅᑎᑦᑎᔪᖃᖅᑎᓪᓗᒍ - ᑐᕌᖓᔪᖅ ᑕᒪᓐᓇ ᑕᑯᒃᓴᐅᑎᑦᑎᓂᖅ 2010-ᒧᑦ ᐱᙳᐊᕕᔾᔪᐊᕐᓂᖓᓄᑦ.



ᓄᓇᕗᒥ ᐅᓂᒃᑲᐅᓯᖃᖅᑐᑎᑦ ᐅᓂᒃᑳᓕᐅᖅᓯᒪᒐᔭᖅᑐᑦ ᑕᐃᑲᓂ ᐱᓕᕆᐊᕆᔭᐅᓂᐊᖅᑐᓂ ᐱᖓᓐᓇᖓᓂ ᕚᓐᑰᕗᕐ-ᒥ.



“ᖁᕕᐊᓱᒻᒪᕆᑉᐳᖓ ᐱᕕᖃᖅᑎᑦᑎᔪᓐᓇᓛᕐᒪᑕ ᐊᕕᑦᑐᖅᓯᒪᓂᐊ ᐱᖓᓐᓇᖓᓄᑦ ᕚᓐᑰᕗᕐ ᓄᓇᕗᒥᐅᑕᓄᑦ ᐱᙳᐊᕕᔾᔪᐊᖅᑐᖃᖅᑎᓪᓗᒍ,” ᐅᖃᖅᑐᓂ ᒥᓂᔅᑕ ᑕᑉᑐᓇ. “ᖃᓄᖅᑑᕋᓱᐊᖏᓐᓇᓲᖑᒐᑦᑕ ᓄᓇᕗᑦ ᑲᑐᑎᓐᓇᓱᐊᕐᓗᒍ ᓄᓇᕐᔪᐊᕐᒥᐅᓄᑦ, ᐊᒻᒪᓗ ᐱᖓᓐᓇᖓᑦ ᕚᓐᑰᕗᕐ ᐱᙳᐊᕕᔾᔪᐊᖅᑐᖃᓕᖅᑎᓪᓗᒍ ᐱᐅᓛᖑᕗᖅ ᑕᑯᒃᓴᐅᑎᓪᓗᒍ ᓄᓇᕗᑦ ᑕᐃᑲᓂ.”



###



ᑐᓴᒐᒃᓴᓕᕆᔩᑦ ᖃᐅᔨᒋᐊᕐᕕᖃᕈᒪᔪᑦ, ᖃᐅᔨᒋᐊᕐᓕ:



ᒫᑎᐅ ᐃᓚᔪᕕᑦᔅ ᐊᓪᓚᑦᑐ, ᑐᓴᐅᒪᖃᑦᑕᐅᑎᓕᕆᓂᕐᒧᑦ

ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ

867-975-7818

millaszewicz@gov.nu.ca



ᓵᓖᓐ ᕚᕆᖕᑕᓐ

ᑐᑭᒧᐊᖅᑎᑦᑎᔨ

ᐱᖓᓐᓇᖓᓄᑦ ᕚᓐᑰᕗᕐ 2010

604-377-6429 ᐅᖄᓚᐅᑎᕋᓛᖅ

604-923-2012

cwarrington@westvancouver2010.ca