ᐅᖃᓚᐅᑎᓯᐅᑏᑦ

You are here

ᑲᓇᑕᒥ ᒐᕙᒪᐅᔪᑦ ᓄᓇᕘᒥᓗ ᑕᑯᒃᓴᐅᑎᑦᑎᕗᑦ ᐱᓕᕆᐊᕆᒻᒪᕆᒍᒪᔭᖏᓐᓂᒃ ᒐᕙᒪᒃᑯᑦ ᐊᐅᓚᑕᖏᑦ-ᐊᐅᓚᙱᑕᖏᑦ ᑲᑐᔾᔨᖃᑎᒌᒍᑕᐅᕙᒃᑐᑦ ᐃᑲᔫᑕᐅᔪᓐᓇᕐᓂᖏᓐᓄᑦ ᓄᓇᕘᒧᑦ

ᓯᑎᐱᕆ 20, 2012

ᐃᖃᓗᐃᑦ, ᓄᓇᕗᑦ (ᓯᑎᐱᕆ 20, 2012) -- ᔨᒻ ᕙᓚᐅᕆᑎ ᑭᒡᒐᖅᑐᖅᖢᒍ, ᒥᓂᔅᑕ ᑮᓇᐅᔭᓕᕆᔨᒃᑯᓐᓄᑦ, ᒪᓕᒐᓕᐅᖅᑎ ᓕᐅᓇ ᐊᒡᓘᒃᑲᖅ, ᒥᓂᔅᑕ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ, ᒥᓂᔅᑕ ᑲᓇᑕᒥ ᐅᑭᐅᖅᑕᖅᑐᒧᑦ ᐱᕙᓪᓕᐊᔪᓕᕆᔨᒃᑯᑦ ᑐᑦᑕᕐᕕᖕᓄᑦ ᐊᒻᒪ ᒥᓂᔅᑕ ᐅᑭᐅᖅᑕᖅᑐᒥ ᑲᑎᒪᔨᓄᑦ, ᐅᓪᓗᒥ ᓇᓗᓇᐃᖅᓯᖅᑲᐅᔪᑦ ᕼᐊᐳ ᒐᕙᒪᒃᑯᖏᑦ ᐃᑲᔪᖅᓱᐃᓂᖏᓐᓂᒃ ᒐᕙᒪᒃᑯᑦ-ᓇᖕᒥᓂᖃᖅᑎᐅᔪᓪᓗ ᑲᑐᔾᔨᖃᑎᒌᓐᓂᐊᕐᓂᖏᓐᓂᒃ P3 ᐃᖃᓗᓐᓂ ᓄᓇᕐᔪᐊᒥ ᖃᖓᑕᔫᒃᑯᕕᒻᒧᑦ ᐱᖃᑕᐅᓪᓗᑎᒃ ᓄᓇᕗᒻᒥ ᓯᕗᓕᖅᑎ ᐄᕙ ᐋᕆᐊᒃ ᐊᒻᒪ ᓄᓇᕗᒻᒥ ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ ᒥᓂᔅᑕ ᐲᑕ ᑕᑉᑑᓇ.



“ᓄᓇᕗᒥᐅᑦ ᐃᓄᒋᐊᒃᓯᕙᓪᓕᐊᖏᓐᓇᖅᑎᓪᓗᒋᑦ, ᐃᖃᓗᖕᓃᑦᑐᖅ ᓯᓚᕐᔪᐊᕐᒥᐅᓄᑦ ᖃᖓᑕᔫᖃᕐᕕᐊ ᑐᖅᑲᖅᑕᕐᕕᒋᔭᐅᓂᐊᕐᒪᑦ ᐃᑲᔫᑕᐅᓗᓂ ᓄᓇᑦᑎᓐᓂ ᒪᑭᒪᔾᔪᑎᒋᔪᓐᓇᖅᑕᑦᑎᓐᓄᑦ, ᑕᐅᖅᓰᑎᑦᑎᕙᒡᓗᑎᒃ ᑲᑎᑎᑕᐅᕙᒡᓗᑕᓗ ᑲᓇᑕᒥᐅᓄᑦ,”ᐅᖃᓚᐅᖅᐳᖅ ᒥᓂᔅᑕ ᐊᒡᓘᒃᑲᖅ. “ᑖᓐᓇ ᐱᓕᕆᐊᖅ ᖃᐅᔨᓴᖅᑕᐅᓗᓂ, ᑲᓇᑕᒥ ᒐᕙᒪᒃᑯᑦ ᓄᓇᕘᒥᓗ ᐱᓕᕆᐊᖑᔪᓐᓇᕐᓂᐊᖅᐳᖅ ᐃᓄᖕᓄᑦ ᑮᓇᐅᔭᕆᔭᐅᔪᓂᒃ ᒐᕙᒪᒃᑯᑦ ᓯᓚᑖᓃᑦᑐᓂᒃ ᐃᑲᔪᖅᑐᐃᓂᒃᑯᑦ ᖃᐅᔨᒪᑦᑎᐊᖅᑕᒥᒃᑎᒍᓪᓗ. ᑕᒪᓐᓇ ᐱᕚᓪᓕᕈᑕᐅᕐᔪᐊᕐᓂᐊᕐᒪᑦ ᓄᓇᕘᒥ ᐃᖏᕐᕋᔪᓕᕆᔨᒃᑯᓐᓄᑦ ᐱᓗᐊᖅᑐᒥᓗ ᑖᒃᓰᔭᕈᑎᓄᑦ ᐊᑭᓕᖅᓱᐃᔨᓄᑦ.”



ᕼᐊᐳ ᒐᕙᒪᒃᑯᖏᑦ ᑐᓂᓯᓂᐊᖅᑐᑦ $77.3 ᒥᓕᐊᓐᓂᒃ P3 ᑲᓇᑕᒥ ᑮᓇᐅᔭᖃᖅᑎᑦᓯᒍᑎᒃᑯᑦ ᐃᖃᓗᐃᑦ ᓄᓇᕐᔪᐊᒥ ᖃᖓᑕᔫᒃᑯᕕᖓ ᓴᓇᔭᐅᓂᐊᖅᑎᓪᓗᒍ. ᐱᓕᕆᐊᖅ ᒪᑯᓂᖓ ᓴᖅᑭᑦᑎᔾᔪᑕᐅᓂᐊᖅᐳᖅ ᓄᑖᕐᒥᒃ ᖃᖓᑕᔫᖃᕐᕕᐊᓂ ᐅᑕᖅᑭᕕᖕᒥ, ᐊᖏᒡᓕᒋᐊᖅᑕᐅᓗᑎᒃ ᖃᖓᑕᔫᑦ ᓄᖅᑲᖅᑕᕐᕕᖏᑦ, ᓄᑖᓂᒃ ᖃᐅᒻᒪᖅᑯᑦᑎᖅᑕᐅᓗᑎᒃ, ᐋᖅᑭᒋᐊᖅᑕᐅᑦᑎᐊᕐᓗᓂᓗ ᖃᖓᑕᔫᓄᑦ ᖃᖓᑦᑕᕆᐊᕐᕕᒃ, ᐊᒻᒪ ᑲᑎᙵᓕᖅᑎᑕᐅᓗᑎᒃ ᐱᔨᑦᑎᕋᕐᕖᑦ ᐅᑕᖅᑭᕕᖕᒥ ᐃᓂᒋᔭᐅᔪᓐᓇᕐᓗᓂ ᖃᑦᑎᕆᔨᑦ ᓄᓇᓯᐅᑎᖏᓐᓂᒃ, ᐃᑲᔪᖅᓱᕐᓗᒋᓪᓗ ᐱᖁᑎᖃᕐᕖᑦ ᐊᒻᒪ ᓄᓇᓯᐅᑎᕐᔪᐊᑦ ᐱᓕᕆᔾᔪᑕᐅᓲᑦ ᖃᖓᑕᔫᓄᑦ ᐊᖅᑯᑖᓄᑦ. ᐱᓕᕆᐊᖅ ᑐᑭᖃᕐᓂᐊᖅᐳᖅ ᐅᔾᔨᕐᓇᒻᒪᕆᒃᑐᒥᒃ ᖃᓄᐃᓕᐅᕆᐊᓕᖕᓄᑦ ᐊᑐᖅᑕᐅᔭᕆᐊᖃᙱᑦᑐᓄᓪᓗ ᐃᖅᑲᓇᐃᔮᓂᒃ ᓴᖅᑭᑎᕆᓂᕐᒥᒃ, ᐊᒻᒪᑦᑕᐅᖅ ᐊᔪᕈᓐᓃᖅᓴᖅᑎᓪᓗᒋᑦ ᐊᒻᒪ ᐱᕙᓪᓕᐊᔪᓕᕆᓂᕐᒧᑦ ᐊᑐᖅᑕᐅᖔᕈᓐᓇᖅᑐᓂᒃ ᐃᖃᓗᖕᒥᐅᓄᑦ ᐊᒻᒪ ᓄᓇᕗᒥᐅᓄᑦ ᐊᑕᖏᖅᑕᐅᓗᑎᒃ.



“ᐊᐅᓚᔪᓐᓇᐅᑎᓄᑦ ᐱᕙᓪᓕᐊᓂᐅᔪᖅ, ᐃᖅᑲᓇᐃᔮᑦ ᐊᒻᒪ ᐱᕙᓪᓕᐊᔭᐅᓂᖓ ᓄᓇᕘᒥ ᒪᑭᒪᔾᔪᑎᒃᓴᑦ ᑕᒪᕐᒥᒃ ᐱᓕᕆᐊᖑᔭᕆᐊᖃᕐᒪᑕ ᐊᑕᐅᑦᑎᒃᑯᑦ,” ᐅᖃᓚᐅᖅᐳᖅ ᓯᕗᓕᖅᑎ ᐋᕆᐊᒃ. “ᓄᓇᕘᒥ ᐱᔭᕆᐊᖃᕐᒪᑕ ᐃᖏᕐᕋᑦᑎᐊᖅᑐᒥᒃ ᐱᓇᔪᒃᑕᐅᓗᓂ ᓴᖅᑭᑦᑎᓇᓱᖕᓂᐊᖅᑎᓪᓗᒋᑦ ᐱᓕᕆᕝᕕᒡᔪᐊᕐᒥ ᖃᓄᐃᓕᐅᖅᐸᓪᓕᐊᔪᒪᓂᕐᒧᑦ ᐊᐅᓚᔪᓐᓇᐅᑎᓂᒃ ᓴᖅᑭᑕᐅᔪᓐᓇᖁᓪᓗᒍ ᒪᑭᒪᔾᔪᑎᒋᔪᓐᓇᖅᑕᑦᑎᓐᓂᒃ ᐊᔪᕐᓇᕈᓐᓃᖅᑎᓪᓗᑎᒍᓪᓗ ᓄᓇᕗᒥᐅᓄᑦ ᐃᑲᔫᑕᐅᔪᓐᓇᖁᓪᓗᒍ ᑲᓇᑕᒥᐅᓕᒫᑦ ᐊᔪᖅᓴᙱᓐᓂᕆᔭᖓᓄᑦ. ᓄᑖᖑᓪᓗᑎᒃ ᐱᓕᕆᖃᑎᒌᒍᓰᑦ ᐃᓚᐅᑎᑦᑎᔪᑦ ᑲᓇᑕᒥ ᒐᕙᒪᖓᓐᓂ, ᓄᓇᕗᑦ ᒐᕙᒪᖓᓐᓂ ᐊᒻᒪ ᒐᕙᒪᒃᑯᑦ ᓯᓚᑖᓃᑦᑐᓂᒃ ᑖᒃᑯᐊ ᐱᓪᓗᐊᑕᐅᖕᒪᑕ ᓴᖅᑭᑦᑎᓂᐊᖅᑎᓪᓗᑕ ᐊᐅᓚᔪᓐᓇᐅᑎᒃᓴᑦᑎᓐᓂ ᐱᐊᓂᒃᓯᓂᕐᒥᒡᓗ ᑲᓇᑕᒥ ᓄᓇᙳᐊᕐᒥ ᓯᒡᔭᕐᒥ, ᓯᒡᔭᕐᒧᑦ ᐊᑕᖏᖅᑕᐅᓗᓂ.”



“ᖃᖓᑕᔫᖃᕐᕖᑦ ᐱᕐᔪᐊᒻᒪᕆᐊᓗᖕᒥᒃ ᓄᒃᑕᕐᕕᐅᓲᖑᖕᒪᑕ ᓄᓇᕘᒥ ᑖᓐᓇᑐᐊᕐᓗ ᐊᑦᑕᕐᓇᙱᑦᑐᓐᓇᖅᖢᓂ ᐊᒻᒪ ᑕᑎᒋᔭᒃᓴᐅᔪᓐᓇᖅᖢᓂ ᐃᓄᖕᓂᒃ ᐱᖁᑎᓂᒡᓗ ᓄᒃᑕᖅᑎᑦᑎᔪᓐᓇᕐᒪᑕ ᐊᕐᕌᒍᓕᒫᖅ ᐊᑐᖅᑎᓪᓗᒍ ᑕᐅᓇᙵᑦ ᖃᓪᓗᓈᑦ ᓄᓈᓐᓂ ᐅᑭᐅᖅᑕᖅᑐᒥᓗ ᐊᒻᒪ ᓄᓇᕘᑉ ᓄᓇᓕᖏᑦᑕ ᐊᑯᓐᓂᖏᓐᓂ,” ᐅᖃᓚᐅᖅᐳᖅ ᒥᓂᔅᑕ ᑕᑉᑑᓇ. “ᑐᙵᓱᒃᑎᑉᐸᕗᑦ ᑲᓇᑕᒥ ᒐᕙᒪᒋᔭᐅᔫᑉ ᑮᓇᐅᔭᓕᐅᕋᓱᐊᕈᑎᖏᑦ ᐃᖃᓗᖕᓃᑦᑐᖅ ᓯᓚᕐᔪᐊᕐᒥᐅᓄᑦ ᖃᖓᑕᔫᖃᕐᕕᖕᒥ ᐱᐅᓯᒋᐊᕈᑕᐅᓇᓱᒃᑐᖅ ᐱᓕᕆᐊᖅ, ᐱᒻᒪᕆᐅᓗᓂ ᐱᐅᓯᒋᐊᕈᑕᐅᓂᐊᖅᑐᖅ ᓄᓇᕘᒥ ᐃᖏᕐᕋᔪᓕᕆᔾᔪᑎᖓᓄᑦ.”



ᑖᓐᓇ ᐱᓕᕆᐊᖑᔪᖅ ᖃᔅᓯᑲᓪᓚᖕᓂᒃ ᐃᑲᔫᑎᖃᕐᓂᐊᖅᐳᖅ ᑭᒃᑯᑐᐃᓐᓇᓄᑦ ᑮᓇᐅᔭᓕᐅᕈᑎᒃᓴᓄᓪᓗ ᐃᖃᓗᐃᑦ ᓄᓇᓕᐸᐅᔭᖓᓄᑦ ᓄᓇᕘᒧᓪᓗ. ᓄᓇᕗᒻᒥ ᓇᖕᒥᓂᖃᖅᑐᓂᒃ ᐃᑲᔫᑎᑦ ᐊᑐᐊᒐᖓᑕ ᑐᕌᒐᖏᓐᓂᒃ ᐃᑲᔪᖅᑐᐃᓂᐊᖅᐳᖅ ᐅᑯᓂᖓ: ᐃᓄᖕᓂᒃ ᐃᖅᑲᓇᐃᔭᖅᑎᑦᑎᓂᖅ, ᐃᓕᓐᓂᐊᖅᑎᑦᑎᓂᖅ ᐱᓕᒻᒪᒃᓴᖅᑎᑦᑎᓂᕐᓗ; ᐱᐅᓯᒋᐊᖅᑕᐅᓗᑎᒃ ᐊᑦᑕᕐᓇᖅᑕᐃᓕᒪᔾᔪᑏᑦ ᐱᔨᑦᑎᕋᐅᑎᓪᓗ ᒥᑦᑕᕐᕕᖕᒥ; ᐃᖏᕐᕋᕙᒃᑐᑦ ᐅᑭᐅᖅᑕᖅᑑᑉ ᓄᓇᓕᖏᓐᓂ ᐱᐅᓯᒋᐊᖅᑕᐅᓗᑎᒃ; ᐊᒻᒪ ᐃᑲᔪᖅᑐᖅᑕᐅᓂᖅᓴᐅᓗᑎᒃ ᐱᕙᓪᓕᐊᑎᑦᑎᔪᑦ ᐅᔭᕋᖕᓂᐊᒐᒃᓴᓂᒃ ᓄᓇᕗᒻᒥ ᓴᖅᑭᑎᑦᑎᒃᑲᓐᓂᖁᓪᓗᒋᑦ ᓇᖕᒥᓂᓕᖕᓂᒃ ᑮᓇᐅᔭᓕᐅᕈᑕᐅᔪᓐᓇᖅᑐᓂᒡᓗ.



ᒐᕙᒪᒃᑯᑦ ᐊᐅᓚᙱᑕᖏᓐᓂᒃ ᐱᓕᕆᖃᑎᒋᓂᐊᖅᑕᒥᓂᒃ ᓂᕈᐊᖅᑕᐅᔪᖃᕐᓂᐊᖅᐳᖅ ᓄᓇᕗᑦ ᒐᕙᒪᖓᓂ ᓂᕈᐊᖅᑕᐅᓇᓱᒃᑎᑦᑎᓗᑎᒃ ᐱᕙᓪᓕᐊᓂᐊᖅᑐᓂᒃ ᐋᖅᑭᐅᒪᓂᒃᓴᖓᓄᑦ, ᓴᓇᔭᕆᐊᓕᖕᓄᑦ, ᑮᓇᐅᔭᓕᕆᓂᕐᒧᑦ, ᐊᐅᓚᑦᑎᓂᕐᒧᑦ ᑲᔪᓯᑎᑦᑎᓂᕐᒧᓪᓗ ᐱᓕᕆᕝᕕᖓᓂ ᐊᑯᓂᐅᔪᒧᑦ ᐊᖏᕈᑎᒃᑯᑦ. ᐱᓕᕆᔪᓐᓇᕐᓂᕆᔭᐅᔪᓂᒃ ᑐᒃᓯᕋᐅᑎᑦ ᐋᒌᓯ 15, 2012-ᒥ ᒪᑐᓚᐅᖅᐳᖅ. ᑐᒃᓯᕋᐅᑎᓂᒃ ᐱᔪᒪᔾᔪᑎᓂᒃ ᓂᕆᐅᒃᐳᑦ ᑐᓂᓯᓛᕐᓂᖏᓐᓂᒃ ᐱᖓᓱᓄᑦ ᐱᔪᒥᓇᓛᓄᑦ ᐱᓇᔪᒃᑐᓂᑦ ᐅᑐᐱᕆ 2012-ᒥ.



ᑐᑭᓯᒋᐊᒃᑲᓐᓂᕈᒪᒍᕕᑦ ᐃᖃᓗᐃᑦ ᖃᖓᑕᔫᖃᕐᕕᖓᑕ ᐱᐅᓯᒋᐊᖅᑕᐅᔾᔪᑎᒃᓴᖓᑕ ᒥᒃᓵᓄᑦ, ᐅᕗᖓ ᑕᑯᒋᐊᕈᓐᓇᖅᐳᑎᑦwww.edt.gov.nu.ca.



ᑲᓇᑕᐅᑉ ᒐᕙᒪᒃᑯᖏᑦ P3 ᑲᓇᑕᒥ ᑮᓇᐅᔭᖁᑎᖏᑦ ᐱᒻᒪᕆᐅᓂᖏᓐᓂᒃ-ᑐᙵᕕᖃᖅᖢᑎᒃ ᐱᓕᕆᐊᖑᕙᒃᐳᖅ ᑐᕌᒐᖃᖅᖢᑎᒃ ᐃᑲᔪᖅᑐᐃᓂᕐᒥᑦ P3 ᐊᐅᓚᔪᓐᓇᐅᑎᖏᓐᓄᑦ ᐱᓕᕆᐊᒃᓴᓂᒃ ᐱᒻᒪᕆᐅᔪᓂᒃ ᐱᓕᕆᐊᖑᖃᑦᑕᖅᑐᓂᒃ ᑲᓇᑕᒥᐅᓄᑦ, ᐱᕙᓪᓕᐊᑎᑦᑎᓗᑎᒃ ᑲᓇᑕᒥ P3 ᓂᐅᕐᕈᑎᖃᖅᐸᒃᑐᓂᒃ ᓴᖅᑭᑎᑦᑎᓗᑎᒡᓗ ᐱᒻᒪᕆᐅᔪᓂᒃ ᑭᒃᑯᑐᐃᓐᓇᓄᑦ ᐃᑲᔫᑎᓂᒃ. PPP ᑲᓇᑕ ᑲᓇᑕᐅᑉ ᒐᕙᒪᒃᑯᖏᓐᓂ ᓴᖅᑭᑎᑕᐅᓚᐅᖅᐳᖅ ᐱᐅᓯᒋᐊᖅᑎᑦᑐᒪᓪᓗᒋᑦ ᑲᔪᓯᑎᑕᐅᕙᒃᑐᑦ ᑭᒃᑯᑐᐃᓐᓇᑦ ᐊᐅᓚᔪᓐᓇᐅᑎᖏᑦ ᑲᔪᓯᑎᑦᑎᓗᑎᒃ ᐱᒻᒪᕆᐅᓂᒃᓴᓂᒃ, ᖃᖓᒃᑰᕋᔭᕐᓂᖏᓐᓂᒃ ᑕᑎᒋᔭᐅᔪᓐᓇᖅᑐᓂᒡᓗ ᑖᒃᓰᔭᖅᐸᒃᑐᓄᑦ, ᑭᒃᑯᑐᐃᓐᓇᑦ/ᐃᒻᒥᒃᑰᖅᑐᑦ ᐱᓕᕆᖃᑎᒌᒃᑐᒃᑯᑦ.



PPP ᑲᓇᑕᐅᑉ ᒥᒃᓵᓄᑦ ᐊᒻᒪ ᑲᓇᑕᐅᑉ ᒐᕙᒪᒃᑯᑦ P3 ᑲᓇᑕᒥ ᑮᓇᐅᔭᖁᑎᖏᑕ ᑮᓇᐅᔭᓕᐅᕈᑕᐅᔪᓐᓇᖅᑐᑦ ᒥᒃᓵᓄᑦ ᖃᐅᔨᒋᐊᒃᑲᓐᓂᕈᒪᒍᕕᑦ, ᐅᕗᖓ ᑕᑯᒋᐊᕈᓐᓇᖅᐳᑎᑦ www.p3canada.ca.



___________________________________

ᐱᕙᓪᓕᐊᔪᑦ ᒥᒃᓵᓄᑦ ᖃᐅᔨᒋᐊᒃᑲᓐᓂᕈᒪᒍᕕᑦ ᐅᑯᓄᖓ ᖃᐅᔨᒋᐊᕈᓐᓇᖅᐳᑎᑦ:



ᒥᐊᓕ ᐋᓐ ᑐᕕ-ᐸᓚᓐᑦ 

ᐱᕙᓪᓕᐊᔪᓕᕆᔨᑦ ᑎᑎᕋᖅᑎᖓ

ᒥᓂᔅᑕ ᑮᓇᐅᔭᓕᕆᓂᕐᒧᑦ ᐊᒡᓚᕝᕕᐊ  

613-996-7861 



ᔮᒃ ᐊᐅᐳᕆ 

ᐱᕙᓪᓕᐊᔪᓕᕆᔨᑦ 

ᑮᓇᐅᔭᓕᕆᔨᒃᑯᑦ

613-996-8080



ᒫᑎᐅ ᐃᓪᓚᔅᔭᕕᑦ 

ᑐᓴᒐᒃᓴᓕᕆᓂᕐᒧᑦ ᐊᐅᓚᑦᑎᔨ 

ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ

ᓄᓇᕗᑦ ᒐᕙᒪᖓ 

867-975-7818 

millaszewicz@gov.nu.ca 



PPP ᑲᓇᑕᒥ ᐱᕙᓪᓕᐊᔪᓂᒃ 

ᐊᐱᕆᔭᐅᔪᓐᓇᖅᑐᑦ:   

media@p3canada.ca ᐅᕝᕙᓘᓐᓃᑦ 

613-947-9480/1-877-947-9480