ᐅᖃᓚᐅᑎᓯᐅᑏᑦ

You are here

ᓄᓇᕗᑦ ᒐᕙᒪᒃᑯᖏᑦ ᑐᙵᓱᑦᑎᑦᓯᔪᑦ ᒐᕙᒪᑐᖃᒃᑯᑦ ᐃᓱᒪᓕᐅᕈᑎᖓᓂᒃ ᓄᓘᔮᓂ Baffinland-ᑯᑦ

ᑎᓯᐱᕆ 04, 2012

ᐃᖃᓗᐃᑦ, ᓄᓇᕗᑦ (ᑎᓯᐱᕆ 4, 2012) - ᓯᕗᓕᖅᑎ ᐄᕙ ᐋᕆᐊᒃ ᐊᒻᒪᓗ ᒥᓂᔅᑕ ᑲᒪᒋᔭᓕᒃ ᐅᔭᕋᕐᓂᐊᖅᑐᓕᕆᓂᕐᒧᑦ, ᐲᑕ ᑕᑉᑑᓇ, ᑐᙵᓱᑦᑎᑦᓯᔫᒃ ᐃᑉᐸᑦᓴᖅ ᐊᖏᖅᑕᐅᓚᐅᖅᑎᓪᓗᒍ Baffinland ᓴᕕᕋᔭᑦᓴᓂᒃ ᐅᔭᕋᕐᓂᐊᖅᑎᒃᑯᑦ ᐅᔭᕋᕐᓂᐊᕐᕕᑦᓴᖓ ᓄᓘᔮᓂ ᑲᓇᑕᐅᑉ ᒐᕙᒪᒃᑯᖏᓐᓄᑦ.



“ᓄᓘᔮᓂ ᐅᔭᕋᕐᓂᐊᕐᕕᑦᓴᖅ ᐱᒻᒪᕆᐅᓂᖃᓪᓚᕆᓐᓂᐊᖅᑐᖅ ᓄᓇᕗᑦ ᓯᕗᓂᑦᓴᖓᓄᑦ,” ᐅᖃᖅᓯᒪᔪᖅ ᓯᕗᓕᖅᑎ ᐄᕙ ᐋᕆᐊᒃ. “ᒐᕙᒪᒋᔭᕗᑦ ᓱᓕᔪᖅᓴᕐᖓᑕ ᑖᓐᓇ ᐅᔭᕋᕐᓂᐊᕐᕕᑦᓴᖅ ᓯᕗᒧᒋᐊᕈᑕᐅᓂᐊᕐᖓᑦ ᒪᑭᑕᔪᓐᓇᕐᓂᖏᓐᓂᒃ ᐅᔭᕋᕐᓂᐊᕐᕖᑦ

ᐊᑦᑐᐃᓂᕐᓗᓗᐊᑦᑕᐃᓕᓗᑎᒃ ᐊᕙᑎᑦᑎᓐᓂᒃ ᐱᕚᓪᓕᕈᑕᐅᓂᐊᖅᑐᓂᓗ ᓄᓇᕗᒻᒥᐅᓕᒫᓄᑦ.’



Baffinland ᓴᕕᕋᔭᑦᓴᓂᒃ ᐅᔭᕋᕐᓂᐊᖅᑎᒃᑯᑦ ᑭᖑᓪᓕᖅᐹᖅᓯᐅᑎᖓᓂ ᐅᔭᕋᕐᓂᐊᕈᓐᓇᓂᕐᒧᑦ ᐱᔪᓐᓇᐅᑎᑖᖅᐸᓪᓕᐊᓂᐊᓕᖅᑐᑦ.



ᓄᓘᔮᓂ ᐅᔭᕋᕐᓂᐊᕐᕕᑦᓴᖅ ᓂᕆᐅᒋᔭᐅᔪᖅ ᒪᑐᐃᖓᒐᔭᕐᓂᖓᓂᒃ 21-ᓂᒃ ᐊᕐᕌᒍᓂᒃ. Baffinland-ᑯᑦ ᐸᕐᓇᓯᒪᔪᑦ

ᐅᔭᕋᕐᓂᐊᓛᕐᓂᕐᒥᓂᒃ 18 ᒥᓕᐊᓐ ᑕᓐᓯᓂᒃ ᐅᖁᒪᐃᓐᓂᓕᓐᓂᒃ ᓴᕕᕋᔭᑦᓴᓂᒃ ᐊᕐᕌᒍᑕᒫᑦ ᐊᑐᕆᐊᓕᐅᕐᓗᑎᓪᓗ, ᓄᓇᓯᐅᑎᑯᑖᓄᑦ ᐊᖅᑯᑎᓕᐅᕐᓗᑎᒃ, ᐃᑎᔪᒥ ᑐᓚᑦᑕᕐᕕᓕᐅᕐᓗᑎᒃ ᐊᓯᖏᓐᓂᓪᓗ ᐅᔭᕋᕐᓂᐊᕐᕕᒻᒥ ᐊᑭᑐᔫᑎᓂᒃ ᕿᑭᖅᑖᓘᑉ ᐅᐊᓐᓇᖓᓂ, ᓂᒋᐊᑕ ᐱᖓᓐᓇᖓᓂ ᒥᑦᑎᒪᑕᓕᒻᒥ.



“ᑖᓐᓇ ᐅᔭᕋᕐᓂᐊᕐᕕᑦᓴᖅ ᐊᓯᔾᔨᕈᑕᐅᓂᐊᖅᑐᖅ ᐊᒥᓱᓄᑦ ᓄᓇᕗᒻᒥᐅᑦ ᐃᓅᓯᖏᓐᓄᑦ,” ᐅᖃᖅᓯᒪᔪᖅ ᐲᑕ ᑕᑉᑑᓇ, ᓄᓇᕗᒻᒥ ᒥᓂᔅᑕ ᐱᕙᓪᓕᐊᔪᓕᕆᔨᒃᑯᓐᓄᑦ ᐃᖏᕐᕋᔪᓕᕆᔨᒃᑯᓄᓪᓗ. “ᑕᒪᓐᓇ ᐊᓯᔾᔨᕐᓂᐅᓂᐊᖅᑐᖅ ᑐᓴᕈᒥᓇᖅᑑᖁᔭᕗᑦ, ᐊᑑᑎᖃᖅᑐᓂᒃ ᐃᖅᑲᓇᐃᔭᕐᕕᐅᒍᓐᓇᕐᓗᓂ ᑮᓇᐅᔾᔭᑦᓴᒍᑕᐅᒍᓐᓇᕐᓗᓂᓗ ᓄᓇᕗᒻᒥᐅᓄᑦ."



ᓄᓇᕗᑦ ᒐᕙᒪᒃᑯᖏᑦ ᐱᓕᕆᖃᑎᖃᐃᓐᓇᕐᓂᐊᖅᑐᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓂᒃ ᐊᓯᖏᓐᓂᓪᓗ ᐃᓚᐅᖃᑕᐅᔪᓂᒃ ᐱᖁᔭᓕᕆᓂᕐᒧᑦ ᑲᒪᒋᔭᐅᕙᓪᓕᐊᑎᓪᓗᒍ.



###



ᐱᕙᓪᓕᐊᔪᓕᕆᔨᓄᑦ ᖃᐅᔨᒋᐊᕐᕕᐅᒍᓐᓇᖅᑑᒃ:



ᐄᒪᓕ ᕗᑦᔅ

ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ

ᓯᕗᓕᖅᑎᐅᑉ ᐊᓪᓚᕝᕕᖓᓂ

ᓄᓇᕗᑦ ᒐᕙᒪᖓ

867-975-5059

ewoods@gov.nu.ca 



ᒫᑎᐅᓯ ᐃᓕᓴᕕᑦᔅ

ᐊᐅᓚᑦᓯᔨ, ᑐᓴᕋᑦᓴᓕᕆᓂᕐᒧᑦ

ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ

ᓄᓇᕗᑦ ᒐᕙᒪᖓ

867-975-7818

millaszewicz@gov.nu.ca