ᐅᖃᓚᐅᑎᓯᐅᑏᑦ

You are here

ᓄᓇᕗᑦ ᒐᕙᒪᖓᑦ ᑐᙵᓱᒃᑎᑦᑎᕗᖅ ᕿᒥᕐᕈᔨᙳᖅᑎᑕᐅᓯᒪᔫᑉ ᐅᓂᒃᑳᖓᓂᒃ ᓂᕿᖃᕆᐊᖃᕐᓂᕐᒧᑦ

ᒫᑦᓯ 05, 2013

ᐃᖃᓗᐃᑦ, ᓄᓇᕗᑦ (ᒫᔾᔨ 5, 2013) – ᒪᓕᒐᓕᐅᖅᑎ ᐲᑕ ᑕᑉᑑᓇ, ᒥᓂᔅᑕᐅᔪᖅ ᑲᒪᒋᔭᒃᓴᐅᑎᓕᒃ ᓄᓇᕗᒻᒥ ᐊᔪᖅᓴᓗᐊᖅᑕᐃᓕᒪᑎᑦᑎᓂᕐᒧᑦ ᐊᒡᓚᒡᕕᖕᒥ, ᑐᙵᓱᒃᑎᑦᑎᕗᑦ ᓯᓚᕐᔪᐊᒥ ᑲᑎᒪᔨᒌᖏᓐᓄᑦ ᕿᒥᕐᕈᔨᙳᖅᑎᑕᐅᓯᒪᔫᑉ ᓂᕿᖃᕆᐊᖃᕐᓂᕐᒧᑦ ᐅᓂᒃᑳᖓᓂᒃ, ᐃᑉᐸᒃᓴᖅ ᓴᖅᑭᑕᐅᓚᐅᖅᑐᖅ ᔭᓃᕙᒥ ᓯᓚᕐᔪᐊᕐᒥ ᑲᑐᔾᔨᖃᑎᒌᑦ ᐃᓅᔪᓕᒫᑦ ᐱᔪᓐᓇᐅᑎᖏᓐᓂᒃ ᑲᑎᒪᔾᔪᑎᖃᖅᑎᓪᓗᒋᑦ.

“ᓄᓇᕗᑦ ᒐᕙᒪᖓᓂ, ᑐᙵᓱᒃᑎᑉᐸᕋ ᐋᓕᕗ ᑎ ᓴᑑᑉ ᐅᓂᒃᑳᖓ, ᓄᓇᕐᔪᐊᒥ ᑲᑐᔾᔨᖃᑎᒌᓄᑦ ᕿᒥᕐᕈᔨᙳᖅᑎᑕᐅᓯᒪᔫᑉ ᓂᕿᖃᕈᓐᓇᕐᓂᕐᒧᑦ ᐅᓂᒃᑳᖓ,” ᐅᖃᖅᑐᖅ ᒥᓂᔅᑕ ᑕᑉᑑᓇ. “ᐅᓂᒃᑳᖅ ᑖᓐᓇ ᓴᙱᔪᓂᒃ ᑎᓕᐅᕈᑎᖃᕐᒪᑦ ᖃᓄᖅ ᓂᕿᒃᓴᖃᙱᓗᐊᖃᑦᑕᕐᓂᖅ ᑲᒪᒋᓪᓗᐊᕐᒪᖔᑦ, ᐊᒥᓱᑦ ᐃᑲᔪᕋᔭᖅᖢᑎᒃ ᓄᓇᕗᑦ ᒐᕙᒪᖓᑕᓗ ᐱᓕᕆᖃᑎᒋᔭᑦᑕᓗ ᓄᓇᕗᒻᒥ ᓂᕿᖃᖅᑎᑦᑎᓂᕐᒧᑦ ᑲᑐᔾᔨᖃᑎᒌᑦ ᐱᓕᕆᐊᖏᓐᓂᒃ.”

ᓄᓇᕗᑦ ᒐᕙᒪᖓᑦ ᓂᕿᒃᓴᖃᑦᑎᐊᕐᓂᖅ ᓯᕗᓪᓕᐅᑎᓯᒪᔮ. ᐊᕐᕌᒎᓵᖅᑐᒥ ᒐᕙᒪᒃᑯᑦ ᐱᒋᐊᖅᑎᑦᑎᓚᐅᖅᑐᑦ ᐱᓕᕆᖃᑎᑦᑎᓐᓄᑦ ᑲᒪᖃᑎᖃᐃᓐᓇᕈᑎᒥᒃ, ᐱᖃᑕᐅᓪᓗᓂ ᐃᓄᐃᑦ ᑎᒥᖏᑦ ᑲᑐᔾᔨᖃᑎᒋᓗᒋᑦ ᓄᓇᕗᒻᒥ ᓂᕿᖃᕈᓐᓇᕐᓂᕐᒧᑦ ᑲᑐᔾᔨᖃᑎᒌᑦ ᓴᖅᑭᑕᐅᓗᓂ, ᑲᑎᓚᐅᖅᑐᑦ ᓄᓇᕗᒻᒥ ᓂᕿᖃᕈᓐᓇᕐᓂᕐᒧᑦ ᑲᑎᒪᓂᕐᒥ ᔭᓄᐊᕆᐅᑎᓪᓗᒍ, ᐊᒻᒪ ᓄᓇᕗᒻᒥ ᓂᕿᖃᕈᓐᓇᕐᓂᕐᒧᑦ ᑐᑭᒧᐊᒍᑎᒃᓴᖅ ᐸᕐᓇᒃᑕᐅᓪᓗᓂ, ᐅᐱᕐᖔᖅ ᓴᖅᑭᑎᑕᐅᓂᐊᖅᑐᖅ.

2013-ᒥ ᑮᓇᐅᔭᐃᑦ ᐊᑐᕈᒫᕐᓂᐊᖅᑐᓂ, ᓄᓇᕗᑦ ᒐᕙᒪᖓᑦ $900,000-ᓂᒃ ᐃᑲᔫᑎᒃᑲᓐᓂᐅᓂᐊᖅᑐᓂᒃ ᓂᕿᓪᓚᑦᑖᑦ ᐊᕕᒃᑐᖅᑕᐅᕙᖕᓂᖏᓐᓄᑦ ᐱᓕᕆᐊᑉ ᖄᒃᑲᓐᓂᐊᒍᑦ. ᑖᓐᓇ ᐃᓚᓕᐅᔾᔭᐅᔪᖅ $1.7 ᒥᓕᐊᓐ ᑐᕌᖓᔪᑦ ᐊᔪᖅᓴᓗᐊᖃᑦᑕᕐᓂᕐᒥᒃ ᐊᒻᒪ ᐊᖏᕐᕋᖃᙱᓐᓂᕐᒥᒃ ᐱᑕᖃᕈᓐᓃᖅᑎᑦᑎᕚᓪᓕᕈᑎᒃᓴᖅ.

ᐅᓂᒃᑳᖓᓂ, ᕿᒥᕐᕈᔨᙳᖅᑎᑕᐅᓯᒪᔪᖅ ᑎᑎᕋᓚᐅᕐᒪᑦ ᐃᓄᐃᑦ ᖃᓄᐃᙱᑦᑎᐊᕐᓂᖏᓐᓂ ᖃᐅᔨᓴᕈᑎᒥ ᐅᖃᖅᓯᒪᖕᒪᑦ 70% ᐃᓐᓇᐃᑦ ᓄᓇᕗᒻᒥ ᓂᕿᒃᓴᖃᑦᑎᐊᙱᑦᑐᑦ. ᑖᓐᓇ ᑲᓇᑕᓕᒫᕐᒥ ᐱᖓᓲᔪᖅᑐᓂᒃ ᐅᓄᕐᓂᖅᓴᐅᖕᒪᑦ ᐊᒻᒪ ᓂᕿᒃᓴᖃᙱᓐᓂᖅᐹᑦᑎᐊᖑᓪᓗᑎᒃ ᓄᓇᖃᖅᑳᖅᓯᒪᔪᓂ ᓇᓂᑐᐃᓐᓇ ᐊᒃᖢᙱᑦᑐᕐᒥᐅᓂ ᓄᓇᓕᒡᔪᐊᓂ.

“ᑐᑭᓯᐅᒪᔭᕗᑦ ᑖᔅᓱᒪ ᐱᕕᒡᔪᐊᖑᓂᖓ, ᐊᒻᒪ ᐃᓱᒪᒃᓴᖅᓯᐅᑦᑎᐊᕈᑎᒋᓂᐊᖅᖢᑎᒍᑦ ᑎᓕᐅᕈᑏᑦ ᑕᕝᕙᓃᑦᑐᑦ ᐅᓂᒃᑳᒥ,” ᐅᖃᖅᑐᖅ ᒥᓂᔅᑕ ᑕᑉᑑᓇ. “ᐱᓕᕆᕙᓪᓕᐊᔪᒍᑦ ᓄᓇᕗᒻᒥ ᑲᑐᔾᔨᖃᑎᒋᔭᕗᑦ ᐱᓕᕆᔾᔪᑎᒃᓴᐃᓪᓗ ᐱᒋᐊᖅᑎᓐᓇᓱᓕᖅᖢᒋᑦ ᐊᒻᒪ ᑐᙵᓱᒃᑎᓐᓂᐊᖅᖢᑎᒍᑦ ᒐᕙᒪᑐᖃᒃᑯᑦ ᑲᑐᔾᔨᖃᑕᐅᓂᖓ ᐊᒻᒪ ᐃᑲᔪᖅᓱᐃᓂᖓ.”

###

ᑐᓴᒐᒃᓴᓂᒃ ᖃᐅᔨᒋᐊᕐᕕᒃ:

ᒫᑎᐅ ᐃᓛᓯᐅᐃᔾ

ᑲᒪᔨ, ᑐᓴᐅᑎᓕᕆᓂᕐᒧᑦ

ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ

867-975-7818

888-975-5999 toll-free

millaszewicz@gov.nu.ca