ᐅᖃᓚᐅᑎᓯᐅᑏᑦ

You are here

ᓄᑖᖑᔪᖅ ᑮᓇᐅᔭᖅᑖᕈᑕᐅᔪᓐᓇᖅᑐᖅ ᑕᕐᕆᔮᒃᓴᓕᕆᓂᕐᒧᑦ, ᑕᓚᕖᓴᓕᕆᓂᕐᒧᑦ ᖃᕋᓴᐅᔭᒃᑯᓪᓗ ᓂᐱᓕᐅᕆᓂᕐᒧᑦ ᐃᓄᒃᑑᖅᑐᓂᒃ

ᑎᓯᐱᕆ 19, 2013

ᐃᖃᓗᐃᑦ, ᓄᓇᕗᑦ (ᑎᓯᐱᕆ 19, 2013) – ᓄᓇᕗᑦ ᒐᕙᒪᖓ ᐅᐱᑦᑐᖅ ᓇᓗᓇᐃᖅᓯᓂᕐᒥᑦ $200,000ᓂᒃ ᖄᒃᑲᓐᓂᐊᒍᑦ ᑮᓇᐅᔭᖅᑖᕈᑕᐅᔪᓐᓇᖅᑐᓂᑦ ᐃᑲᔫᑕᐅᓇᓱᓪᓗᓂ ᐃᓄᐃᑦ ᐅᖃᐅᓯᖓᓐᓂᒃ ᐊᑐᓐᓂᕐᒥᑦ (ᐃᓄᒃᑐᑦ) ᑕᕐᕆᔮᒃᓴᒃᑯᑦ, ᑕᓚᕖᓴᒃᑯᑦ ᖃᕋᓴᐅᔭᒃᑯᓪᓗ ᓂᐱᓕᐅᕆᓂᒃᑯᑦ.

ᑖᓐᓇ $200,000 ᓄᓇᕗᑦ ᒐᕙᒪᒃᑯᑦ ᐃᓕᖅᑯᓯᓕᕆᔨᒃᑯᑦ ᐱᓕᕆᕝᕕᖓᓃᙶᖅᑐᖅ. ᑕᒪᓐᓇ ᐃᑲᔪᖅᓱᕐᓂᐅᔪᖅ ᐊᑐᓕᖅᑎᑦᑎᖕᒪᑦ ᓄᓇᕗᑦ ᒐᕙᒪᖓᑕ ᐊᖏᖅᓯᒪᓂᖓ ᐅᖃᐅᓯᕗᑦ ᐸᕐᓇᐅᑎᖓᑕ ᐊᑖᒍᑦ, ᒐᕙᒪᒃᑯᑦ ᐊᖅᑯᓯᐅᖅᓯᒪᔭᖓᓂ ᐊᑐᓕᖅᑎᑦᑎᓂᕐᒥᑦ ᑖᔅᓱᒥᖓ ᐅᖃᐅᓰᑦ ᐃᓕᓴᕆᔭᐅᓯᒪᔪᑦ ᐱᖁᔭᖓᓂ ᐊᒻᒪᓗ ᐃᓄᐃᑦ ᐅᖃᐅᓯᖏᑦ ᓴᐳᔾᔭᐅᓇᓱᖕᓂᖏᓐᓄᑦ ᐱᖁᔭᖓᓂ.

“ᓄᓇᕘᑉ ᑕᕐᕆᔮᒃᓴᓕᐊᕆᓯᒪᔭᖏᑦ ᑕᓚᕖᓵᒃᑯᓪᓗ ᖁᙱᐊᖅᑕᐅᓂᖏᑦ ᐱᒻᒪᕆᐅᖃᑕᐅᖕᒪᑕ ᓴᐳᔾᔨᓂᕐᒥᑦ ᓴᖅᑭᔮᖅᑎᑦᑎᓂᕐᒥᓗ ᐃᓅᓪᓗᑕ ᐃᓕᖅᑯᓯᑦᑎᓐᓂ, ᑭᓇᐅᓂᑦᑎᓐᓂ ᐅᖃᐅᓯᑦᑎᓂᓪᓗ, ᐱᓗᐊᖅᑐᒥᑦ ᐅᓪᓗᒥᒨᖓᔪᓂᑦ ᒪᓕᑉᐸᓪᓕᐊᓂᖃᖅᑎᓪᓗᓂ,” ᐅᖃᖅᑐᖅ ᐹᓪ ᐅᑲᓕᖅ, ᒪᓂᔅᑕᐅᔪᖅ ᐅᖃᐅᓯᕐᓄᑦ. “ᓄᓇᕗᑦ ᒐᕙᒪᖓ ᐊᓕᐊᓇᐃᒍᓱᑦᑐᖅ ᐱᓕᕆᖃᑎᖃᕐᓂᕐᒥᑦ ᓄᓇᕗᒻᒥ ᑕᑯᓐᓇᒐᒃᓴᓕᐅᖅᑏᑦ ᑎᒥᖓᓂ ᐃᑲᔪᖅᓱᕐᓂᒃᑯᑦ ᑕᕐᕆᔮᒃᓴᓕᐅᕆᓂᕐᒥᑦ ᐊᒻᒪᓗ ᓴᖅᑭᑦᑎᕆᒃᑲᓐᓂᓂᕐᒥᑦ ᑕᓚᕖᓴᒃᑰᖅᑐᓂᑦ ᐃᓄᒃᑑᖅᑐᓂᑦ ᐊᖏᕐᕋᕆᔭᑦᑎᓐᓄᑦ.”

ᑮᓇᐅᔭᐃᑦ ᐱᔭᐅᔪᓐᓇᖅᑐᑦ ᑕᕐᕆᔮᒃᓴᓂᑦ, ᑕᓚᕖᓴᒃᑰᖅᑐᓂᑦ, ᖃᕋᓴᐅᔭᒃᑯᓪᓗ ᓂᐱᓕᐅᕆᓂᕐᒥᑦ ᓴᓇᔪᒪᔪᓂᑦ ᑕᕝᕘᓇ ᓄᓇᕗᒻᒥ ᑕᑯᓐᓇᒐᒃᓴᓕᐅᖅᑏᑦ ᑎᒥᖓ ᓄᓇᕗᒻᒥ ᖃᓄᐃᓕᐅᕈᑎᖃᕈᒪᓂᕐᒧᑦ ᐱᓕᕆᐊᒃᓴᐅᔪᖅ, ᓇᐃᑦᑐᒥᑦ ᑕᕐᕆᔮᒃᓴᓕᐅᕐᓂᕐᒧᑦ ᑮᓇᐅᔭᑦ, ᐊᒻᒪᓗ ᓄᑖᖑᔪᖅ ᐃᓄᒃᑑᓕᖅᑎᑦᑎᓂᕐᒥᑦ ᑮᓇᐅᔭᑦ ᓴᖅᑭᔮᕙᒋᖅᑐᓄᑦ.

“ᓇᓗᓇᙱᑦᑐᖅ ᑕᒪᓐᓇ ᐃᑲᔪᕈᑕᐅᔪᖅ ᓄᓇᕗᑦ ᒐᕙᒪᒃᑯᖏᓐᓂ ᖁᕝᕙᕆᐊᖅᑎᕆᓂᐊᖅᑐᖅ ᑕᕐᕆᔮᒃᓴᓕᐅᑦᑎᐊᖅᓯᒪᓂᕐᒥᑦ, ᑕᓚᕖᓴᒃᑯᑦ ᐊᒻᒪᓗ ᖃᕋᓴᐅᔭᒃᑯᑦ ᓂᐱᓕᐅᕆᓂᕐᒥᑦ ᐊᑐᐃᓐᓇᐅᓂᐊᖅᑐᑦ ᐃᓄᒃᑐᑦ ᑕᓚᕖᓴᒃᑯᑦ, ᓂᐅᕐᕈᑎᖃᕐᓂᒃᑯᑦ, ᐃᓕᓐᓂᐊᕐᕕᓂ ᖃᕋᓴᐅᔭᒃᑯᓪᓗ,” ᐅᖃᖅᑐᖅ ᑎᐅᕆᒃ ᒪᔫᕐ, ᓄᓇᕗᒻᒥ ᑕᑯᓐᓇᒐᒃᓴᓕᕆᔨᒃᑯᑦ ᐊᐅᓚᑦᑎᔨᒻᒪᕆᖓ. “ᑖᓐᓇ ᐱᓕᕆᐊᒃᓴᐅᔪᖅ ᐱᒻᒪᕆᐅᔪᖅ ᐃᓕᖅᑯᓯᒃᑯᑦ ᑮᓇᐅᔭᓕᐅᕐᓂᒃᑯᓪᓗ ᓄᓇᕗᒻᒧ.” 

ᓄᓇᕗᑦ ᒐᕙᒪᖓᑕ ᐱᓕᕆᕝᕕᖓ ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ ᐱᓕᕆᖃᑎᖃᖅᑐᑦ ᓄᓇᕗᒻᒥ ᑕᑯᓐᓇᒐᒃᓴᓕᕆᔨᒃᑯᑦ ᑎᒥᖓᓂ ᑖᔅᓱᒥᖓ ᐊᑐᖅᑕᐅᓂᐊᖅᑐᒥᑦ.

“ᑕᕐᕆᔮᒃᓴᓕᐅᖅᑏᑦ ᐊᑐᖃᑦᑕᖅᑐᑦ $13 ᒥᓕᐊᓐᓂ ᐊᕐᕌᒍᑕᒫᑦ ᓄᓇᕗᒻᒥ,” ᐅᖃᖅᑐᖅ ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ ᒥᓂᔅᑕᖓ ᔪᐊᔾ ᖁᒃᓱᒃ. “ᑖᓐᓇ ᑐᕌᖓᖁᔭᕗᑦ ᐊᒥᓲᓂᖅᓴᐅᔪᓄᑦ ᐅᖃᐅᓯᕆᔭᐅᔪᒧᑦ ᓄᓇᕗᒻᒥ. ᓄᑖᖑᓕᖅᑐᖅ ᒐᕙᒪᕗᑦ ᐊᖏᖅᓯᒪᓪᓚᕆᑦᑐᖅ ᐊᖏᓪᓕᑎᕆᓂᕐᒥᑦ ᓴᙱᒃᑎᒋᐊᖅᑎᑦᑎᓂᕐᒥᓗ ᐃᓄᒃᑑᕐᒥᑦ.”

ᑐᑭᓯᒋᐊᒃᑲᓐᓂᓂᕐᒥᑦ ᖃᓄᖅ ᐱᓇᓱᖃᑕᐅᓂᕐᒥᑦ ᐃᓄᒃᑐᑦ ᑕᕐᕆᔮᒃᓴᓕᐅᓂᕐᒧᑦ ᑮᓇᐅᔭᕐᓂᑦ ᐅᕙᓂ ᐊᑐᐃᓐᓇᐅᔪᖅwww.nunavutfilm.ca. 

###

ᐱᕙᓪᓕᐊᔪᓄᑦ ᖃᐅᔨᒋᐊᕐᕕᒃᓴᖅ:

ᓖᕕᑎ ᐊᑕᒍᔪᒃ

ᐊᐅᓚᑦᑎᔨ, ᑐᓴᒐᒃᓴᓕᕆᓂᕐᒧᑦ

ᐃᓕᖅᑯᓯᓕᕆᔨᒃᑯᑦ

ᓄᓇᕗᑦ ᒐᕙᒪᖓ

ᐅᖄᓚᐅᑎᖓ: (867) 975-5526

ᐃᕐᖐᓐᓇᒃᑰᕈᑖ: latagoyuk@gov.nu.ca 

ᑎᐅᕆᒃ ᒪᔫᕐ

ᐊᐅᓚᑦᑎᔨᒻᒪᕆᒃ

ᓄᓇᕗᒻᒥ ᑕᑯᓐᓇᒐᒃᓴᓕᕆᔨᒃᑯᑦ ᑎᒥᖓ

ᐅᖄᓚᐅᑎᖓ: (867) 979-3012

ᐃᕐᖐᓐᓇᒃᑰᕈᑖ: info@nunavutfilm.ca ᐅᕝᕙᓘᓐᓃᑦ derek@nunavutfilm.ca

ᒫᑎᐅ ᐃᓚᓴᕕᑦᔅ

ᐊᐅᓚᑦᑎᔨ, ᑐᓴᒐᒃᓴᓕᕆᓂᕐᒧᑦ ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ

ᓄᓇᕗᑦ ᒐᕙᒪᖓ

ᐅᖄᓚᐅᑎᖓ: (867) 975-7818

ᐃᕐᖐᓐᓇᒃᑰᕈᑖ: millaszewicz@gov.nu.ca