ᐅᖃᓚᐅᑎᓯᐅᑏᑦ

You are here

ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ ᐊᕙᑎᓕᕆᔨᒃᑯᓪᓗ ᕿᓂᖅᐳᑦ ᑲᔪᓯᐊᖏᓐᓇᕈᓐᓇᖅᑐᒥᒃ ᐊᑐᕈᓐᓇᕐᓂᕐᒥᒃ ᓂᕿᓪᓚᑦᑖᕆᔭᐅᔪᓂᒃ

ᔪᓚᐃ 10, 2012

ᐃᖃᓗᐃᑦ, ᓄᓇᕗᑦ (ᔪᓚᐃ 10, 2012) – ᓄᓇᕗᑦ ᒐᕙᒪᖓᑕ ᐊᕙᑎᓕᕆᔨᒃᑯᖏᑦ (DOE-ᖑᓂᕋᖅᑕᐅᕙᒃᑭᓪᓗᑎᒃ) ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ (ED&T-ᖑᓂᕋᖅᑕᐅᕙᒃᑭᓪᓗᑎᒃ) ᕿᓂᕐᒪᑎᒃ ᐊᑐᖅᑕᐅᔪᓐᓇᖅᑐᓂᒃ ᐊᖏᒡᓕᒋᐊᖅᑎᑦᑎᔪᒪᓂᕐᒧᑦ ᑲᔪᓯᐊᔪᓐᓇᖅᑐᒥᒃ ᐊᕗᖓᑲᓪᓚᒡᓗ ᐊᑐᖅᑕᐅᔪᓐᓇᖅᑐᒥᒃ ᓂᕿᓪᓚᑦᑖᕆᔭᐅᔪᓄᑦ.



DOE-ᑯᒃ ᐆᒪᔪᓂᒃ ᖃᐅᔨᓴᖅᐸᖕᓂᕐᒧᑦ ᐱᓕᕆᕝᕕᖓᑦ ᓴᖅᑭᑎᑦᑎᓚᐅᖅᐳᑦ ᐅᓂᒃᑲᐅᓯᕐᒥᒃ ᐅᐱᕐᙶᖑᓵᖅᑐᒥ ᖃᐅᔨᓴᕐᓂᐅᓚᐅᖅᑐᒥᒃ ᒪᓂᒪᕙᖕᓂᖏᓐᓂᒃ ᐊᔾᔨᒌᙱᑦᑐᑦ ᓂᕐᔪᑏᑦ ᐊᖑᔭᐅᕙᒃᑐᑦ, ᓂᕿᒋᔭᐅᓪᓚᑦᑖᑐᐃᓐᓇᕆᐊᖃᕐᓂᖏᓐᓄᓪᓗ ᓄᓇᕗᒻᒥᐅᓄᑦ. ᑖᓐᓇ ᐅᓂᒃᑲᐅᓯᖅ ᓇᓗᓇᐃᖅᓯᓚᐅᖅᐳᖅ ᑕᓪᓕᒪᓂᒃ ᐅᒥᖕᒪᐅᖃᑎᒌᒃᐸᒃᑐᓂᒃ ᕿᑎᕐᒥᐅᓂ ᑲᔪᓯᐊᖏᓐᓇᖅᑎᑕᐅᓗᑎᒃ ᐱᕝᕕᐅᖃᑦᑕᕈᓐᓇᑐᐃᓐᓇᕆᐊᓕᖕᓂᒃ ᐃᑲᔪᖅᑐᖅᑕᐅᓗᑎᒃ ᓂᕿᓪᓚᑦᑖᕆᔭᐅᔪᓄᑦ ᑐᓂᐅᖅᑲᐃᕙᖕᓂᕐᒧᑦ ᐱᓕᕆᐊᖑᖃᑦᑕᖅᑐᒧᑦ ᑲᔪᓯᑎᑕᐅᕙᒃᖢᓂ ᓄᓇᕗᒻᒥ ᐊᒃᖢᓗᐊᖅᑎᑦᑎᑦᑕᐃᓕᒪᓂᕐᒧᑦ ᑎᑎᕋᕐᕕᖕᒥᑦ ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕿᔨᒃᑯᓪᓗ ᐃᓗᐊᓂ. ᑖᓐᓇ ᐅᓂᒃᑲᐅᓯᖅ ᐅᖃᖅᓯᒪᕗᖅ ᐱᒻᒪᕆᐊᓘᓇᔭᕐᓂᖓᓂᒃ ᑐᕌᖅᑎᑦᑎᓂᐊᕐᓗᓂ ᐊᑐᖅᑕᐅᔪᓐᓇᖅᑐᓂᒃ ᓇᐅᑦᑎᖅᓱᕐᓂᕐᒧᑦ ᐅᒥᖕᒪᐃᑦ ᖃᔅᓯᐅᓂᕆᔭᖏᓐᓂᒃ ᖃᔅᓯᕌᖅᑐᖃᖃᑦᑕᕈᓐᓇᕐᓂᖓᓂᒡᓗ ᑕᒪᓐᓇ ᐱᓕᕆᐊᖑᔪᖅ ᑲᔪᓯᐊᖏᓐᓇᖁᓗᒍ ᐊᕗᖓᑲᓪᓚᖕᒧᑦ.



“ᐊᒥᓱᑦ ᓂᕐᔪᑏᑦ ᐱᕐᔪᐊᒻᒪᕆᐊᓘᕗᑦ ᓂᕿᒋᔭᐅᑦᑎᐊᖅᐸᒃᖢᑎᒃ ᓄᓇᕗᒻᒥᐅᓄᑦ,” ᑕᐃᒪᓐᓇ ᒪᓕᒐᓕᐅᖅᑎ ᔭᐃᒥᓯ ᐋᕆᐊᒃ, ᒥᓂᔅᑕᕆᔭᐅᔪᖅ ᐊᕙᑎᓕᕆᓂᕐᒧᑦ ᐅᖃᖅᖢᓂ. “ᐊᓕᐊᓇᐃᒍᓱᒃᐳᖓ ᐱᓕᕆᖃᑎᖃᕈᓐᓇᕋᒪ ᓄᓇᕗᒻᒥ ᐊᒃᖢᓗᐊᖅᑎᑦᑎᑦᑕᐃᓕᒪᓂᕐᒧᑦ ᑎᑎᕋᕐᕕᒋᔭᐅᔪᒥᒃ ᕿᓂᕐᓗᑕ ᓇᓗᙱᑦᑎᐊᕈᒪᓂᕐᒧᑦ ᐊᕗᖓᑲᓪᓚᒃ ᒪᓂᒪᓇᔭᕐᓂᖓᓂᒃ ᓂᕿᓪᓚᑦᑖᕆᔭᐅᔪᖅ. ᑕᒪᓐᓇ ᐱᓕᕆᖃᑎᒌᖕᓂᖅ ᓴᖅᑭᑎᑦᑎᒋᕗᖅᑕᐅᖅ ᐅᔾᔨᕆᔭᖃᕐᓂᕐᒥᒃ ᐱᔭᐅᔭᕆᐊᖃᖅᑐᒥᒃ ᑲᔪᓯᐊᖏᓐᓇᖅᑐᒥᒃ ᓇᐅᑦᑎᖅᓱᖅᓯᓂᕐᒥᒃ ᐅᔾᔨᖅᓱᑦᑎᐊᕐᓗᓂᓗ ᐊᐅᓚᑦᑎᓇᔭᕐᓂᕐᒥᒃ ᓂᕐᔪᑎᑦᑎᓐᓂᒃ ᓯᕗᓂᒃᓴᒥ ᐃᓅᓛᖅᑐᓄᑦ.”



ᐊᓯᐊᑦᑕᐅᖅ ᐱᓪᓗᐊᑕᖅ ᖃᓄᐃᓕᐅᖁᔭᐅᓂᖅ ᑕᕝᕙᓂ ᐅᓂᒃᑲᐅᓯᕐᒥ ᕿᓂᕐᓂᐅᕗᖅ ᓇᑭᑐᐃᓐᓈᖅᑎᑦᑎᔪᓐᓇᕐᓂᕐᒥᒃ ᓂᕿᓪᓚᑦᑖᕆᔭᐅᔪᓄᑦ ᐱᕝᕕᐅᖃᑦᑕᕋᔭᖅᑐᓂᒃ ᐊᖏᒡᓕᒋᐊᖅᑎᑦᑎᔪᒪᓂᕐᒧᑦ ᒪᓂᒪᑎᑕᐅᕙᖕᓂᖏᓐᓂᒃ ᐊᖏᒡᓕᒋᐊᖅᑎᑦᑎᙱᓪᓗᓂ ᐊᒃᓱᕈᕐᓇᖅᑐᒥᒃ ᑐᒃᑐᓄᑦ ᐊᓯᖏᓐᓄᓪᓗ ᐊᒃᑐᖅᑕᐅᓕᕋᔭᕐᒥᔪᓄᑦ ᐆᒪᔪᓄᑦ. ᐱᓕᕆᕝᕕᒋᔭᐅᔪᑦ ᕿᓂᖅᐳᑦ ᐱᓕᕆᖃᑎᒌᖕᓂᐅᑐᐃᓐᓇᕆᐊᓕᖕᓂᒃ ᓄᑖᓄᑦ, ᐱᓕᕆᖃᑎᒌᒡᓗᓂ ᖃᐅᓴᕐᓂᐅᓇᔭᖅᑐᓄᑦ ᓇᐅᑦᑎᖅᓱᕐᓂᕐᒧᓪᓗ ᐱᓕᕆᐊᖑᓇᔭᖅᑐᒧᑦ ᓄᓇᕗᒻᒥ ᐆᒪᔪᕆᔭᐅᔪᓄᑦ ᑐᓴᖅᑎᑦᑎᔪᒪᓇᔭᕐᓂᕐᒧᑦ ᓯᕗᓂᒃᓴᒥ ᐱᕙᓪᓕᐊᓂᐅᓇᔭᖅᑐᒧᑦ ᓂᕿᓪᓚᑦᑖᕆᔭᐅᔪᓄᑦ ᐱᓕᕆᐊᖑᕙᒃᑐᓄᑦ.



”ᓂᕿᓪᓚᑦᑖᕆᔭᐅᔪᑦ, ᓄᓇᓕᖕᒥᐅᓂᑦ ᐊᖑᔭᐅᔪᑦ, ᐱᔪᒪᔭᐅᓂᖅᓴᐅᕙᒃᐳᑦ ᐊᒥᓱᓂᑦ ᓄᓇᕗᒻᒥᐅᓂᑦ ᐱᔪᒪᕙᒃᑐᓂᒃ ᐊᑭᑐᓗᐊᙱᑦᑐᓂᒃ ᓂᕿᑦᑎᐊᕙᖕᓂᒡᓗ,” ᑕᐃᒪᓐᓇ ᐲᑕ ᑕᑉᑑᓇ, ᒥᓂᔅᑕᕆᔭᐅᔪᖅ ᐱᕙᓪᓕᐊᔪᓕᕆᓂᕐᒧᑦ ᐃᖏᕐᕋᔪᓕᕆᓂᕐᒧᓪᓗ ᐅᖃᖅᖢᓂ. “ᐱᓕᕆᖃᑎᖃᕆᐊᖃᖅᑐᒍᑦ ᐊᕙᑎᓕᕆᔨᒃᑯᓐᓂᒃ ᓇᓗᙱᑦᑎᐊᕈᒪᓂᕐᒧᑦ ᐱᕝᕕᐅᕙᒃᑐᑦ ᓂᕿᓪᓚᑦᑖᕆᔭᐅᔪᓂᒃ ᐱᔭᐅᖃᑦᑕᖅᑐᓂᒃ ᐅᓪᓗᒥ ᒪᓂᒪᐃᓐᓇᓛᕐᒪᖔᖏᓐᓂᒃ ᓯᕗᓂᒃᓴᑦᑎᓐᓂ.”



ᕿᓂᕐᓂᕐᒧᑦ ᐊᖏᒡᓕᒋᐊᖅᑎᑦᑎᔪᒪᓂᕐᒧᑦ ᑕᒪᒃᑯᓂᖓ ᐱᓕᕆᖃᑎᒌᖕᓂᐅᕙᒃᑐᓂᒃ ᐊᖏᒡᓕᕙᓪᓕᐊᑎᑦᑏᓐᓇᕐᓂᕐᒥᒃ ᑲᔪᓯᐊᖏᓐᓇᕈᓐᓇᖅᑐᓂᒃ ᐊᑐᕈᓐᓇᕐᓂᕐᒥᒃ ᓂᕿᓪᓚᑦᑖᕆᔭᐅᔪᓂᒃ ᓄᓇᕗᒻᒥᐅᓄᑦ, ᑭᒡᒐᖅᑐᐃᔪᑦ ᐊᕙᑎᓕᕆᔨᒃᑯᓐᓂᒃ ᐃᓚᐅᓚᐅᖅᐳᑦ ᓄᓇᕗᒻᒥ ᓂᕿᖃᑦᑎᐊᖅᐸᖕᓂᕐᒧᑦ ᐱᓕᕆᖃᑎᒌᖕᓂᕐᒧᑦ ᑲᑎᒪᓂᕆᔭᐅᔪᒥ ᑲᑎᒪᓂᐅᓚᐅᖅᑐᒥ ᐃᖃᓗᖕᓂ ᔫᓂ 26, 2012-ᒥ, ᑖᓐᓇᓗ ᑲᔪᓯᑎᑕᐅᓚᐅᖅᖢᓂ ᓄᓇᕗᒻᒥ ᐊᒃᖢᓗᐊᖅᑎᑦᑎᑦᑕᐃᓕᒪᓂᕐᒧᑦ ᑎᑎᕋᕐᕕᒋᔭᐅᔪᒥᑦ.



###



ᑐᓴᖅᑕᖃᒃᑲᓐᓂᕈᒪᒍᕕᑦ ᐅᑯᐊᒃ ᖃᐅᔨᒋᐊᕐᕕᒃᓵᒃ:



ᔮᑭ ᐸᐳ

ᐊᐅᓚᑦᑎᔨ ᑐᓴᐅᒪᑎᑦᑎᓂᕐᒧᑦ

ᐊᕙᑎᓕᕆᔨᒃᑯᑦ

ᐅᖄᓚᐅᑖ: 867-975-7721

ᖃᕆᑕᐅᔭᒃᑯᑦ: jpepper@gov.nu.ca 



ᒫᑎᐅ ᐃᓚᓯᕗᐃᑦᔅ

ᐊᐅᓚᑦᑎᔨ ᑐᓴᐅᒪᑎᑦᑎᓂᕐᒧᑦ

ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ

ᐅᖄᓚᐅᑖ: 867-975-7818

ᖃᕆᑕᐅᔭᒃᑯᑦ: millaszewicz@gov.nu.ca