ᐅᖃᓚᐅᑎᓯᐅᑏᑦ

You are here

RFQ ᐱᒋᐊᖅᑎᑕᐅᕗᖅ ᐃᖃᓗᐃᑦ ᓯᓚᕐᔪᐊᒨᓕᖓᔪᑦ ᖃᖓᑕᔫᒃᑯᕕᐅᑉ ᓄᑖᖑᕆᐊᖅᑕᐅᓂᖓᑕ ᐱᓕᕆᐊᕆᔭᐅᓂᖓ

ᔫᓂ 29, 2012

ᐃᖃᓗᐃ, ᓄᓇᕗᑦ (ᔫᓂ 29, 2012) - ᐃᖃᓗᐃᑦ ᓯᓚᕐᔪᐊᒨᓕᖓᔪᑦ ᖃᖓᑕᔫᒃᑯᕕᐅᑉ ᓄᑖᖑᕆᐊᖅᑕᐅᓂᖓᑕ ᐱᓕᕆᐊᕆᔭᐅᓂᖓ ᖃᓂᓕᕙᓪᓕᐊᓕᖅᑐᖅ ᐱᒋᐊᖅᑕᐅᕙᓪᓕᐊᓂᖓ ᓴᓇᔭᐅᓂᕆᓛᖅᑕᖓ ᐅᓪᓗᒥ ᐱᒋᐊᖅᑎᑦᓯᓂᕐᒥᑦ ᑐᑦᓯᕋᖅᑐᖅ ᐱᔪᓐᓇᖅᓂᕆᔭᐅᔪᓂᑦ (RFQ) ᓄᑖᖅ ᖃᓄᐃᓐᓂᖓ-ᓄᑖᖑᕆᐊᓕᓐᓂᑦ ᖃᖓᑕᔫᒃᑯᕕᐅᑉ ᐃᖃᓗᓂᑦ.



“ᐱᒋᐊᖅᑎᑕᐅᓂᖓ ᑐᑦᓯᕋᖅᑐᖅ ᐱᔪᓐᓇᖅᓂᕆᔭᐅᔪᓂᑦ ᐃᖃᓗᐃᑦ ᓯᓚᕐᔪᐊᒨᓕᖓᔪᑦ ᖃᖓᑕᔫᒃᑯᕕᐅᑉ ᓄᑖᖑᕆᐊᖅᑕᐅᓂᖓᑕ ᐱᓕᕆᐊᕆᔭᐅᓂᖓ ᖁᕕᐊᓇᖅᑐᖅ ᐱᕙᓪᓕᐊᔪᖅ ᑐᓴᕆᐊᖓ ᐃᓘᓐᓇᖏᓐᓄᑦ ᓄᓇᕘᒥᐅᓄᑦ,” ᐅᖃᖅᑐᖅ ᒥᓂᔅᑕ ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ, ᐲᑕ ᑕᑉᑐᓇ. “ᐊᖏᔪᒻᒪᕆᐅᕗᖅ ᐱᓕᕆᐊᕆᔭᐅᓂᖓ ᐱᒍᔾᔨᒋᐊᖃᕐᓂᖅᒥᑦ ᖃᖓᑕᔫᒃᑯᑦ ᐃᖏᕐᕋᐅᑎᓕᕆᓂᕐᒥᑦ ᐱᒋᐊᖃᕐᓂᖏᓐᓂᑦ ᓄᓇᕗᒻᒥᐅᑦ ᐃᖃᓗᓂᑦ, ᐊᒻᒪᓗ ᑕᐅᓴᐃᑦ ᐃᖃᓗᒃᑎᒎᖃᑦᑕᕐᓂᖏᓐᓂᑦ ᐊᒥᓱᓄᑦ ᐊᕐᕌᒍᓐᓄᑦ ᖃᐃᔪᓂᑦ.”



ᑐᑦᓯᕋᖅᑐᖅ ᐱᔪᓐᓇᓂᕆᔭᐅᔪᓂᑦ ᓯᕗᓪᓕᖅᐸᐅᕗᖅ ᐱᒋᐊᕈᑎᒋᑦᓱᒍ ᐊᑭᑦᑐᕋᐅᑎᐅᓂᐊᖅᓱᓂ ᓂᕈᐊᓂᕐᒥᑦ ᐱᓕᕆᔾᔪᓯᖅᒥᒃ ᖃᐃᖁᔨᑦᓱᑎᑦ ᐱᒍᒪᖃᑕᐅᔪᓂᑦ, ᑲᒻᐸᓂᔅᓂᑦ ᐅᕝᕙᓘᓐᓃᑦ ᐊᔾᔨᒌᖏᑦᑐᓂᑦ ᑎᒥᐅᔪᓂᑦ ᑐᓂᓯᓂᐊᖅᑎᓪᓗᒋᑦ ᑭᐅᔾᔪᑎᓂᑦ ᓇᓗᓇᐃᖅᓯᓗᑎᒃ ᐱᒍᒪᓂᕐᒥᓂᑦ, ᐊᒻᒪᓗ ᐱᔪᓐᓇᖅᓂᕆᔭᒥᓂᒃ, ᐱᓕᕆᐊᕆᔭᐅᓂᖓᓄᑦ. ᑭᖑᓂᖓᒍᑦ ᐱᒋᐊᕈᑎᒋᓂᐊᖅᑕᖓ ᓇᓗᓇᐃᖅᓯᓂᕐᒥᑦ ᐱᖓᓱᓂᑦ ᑎᒥᐅᔪᓂᑦ ᖃᐃᖁᔭᐅᓂᐊᖅᑐᓂᑦ ᓴᓇᒻᒪᓂᖓ, ᓴᓇᔭᐅᒐᔭᕐᓂᖓ, ᑮᓇᐅᔭᑎᒍᑦ, ᑲᔪᓯᑎᑦᓯᓂᕐᒥᑦ ᐊᒻᒪᓗ ᐊᐅᓚᑦᓯᓂᕐᒥᑦ ᓄᑖᒥᑦ ᖃᖓᑕᔫᒃᑯᕕᒻᒥᑦ.



“ᒐᕙᒪᒃᑯᑦ ᓄᓇᕘᒥ ᖁᕕᐊᒋᔭᖃᖅᑯᑦ ᑲᔪᓯᑎᑦᓯᒋᐊᕐᓂᕐᒥᑦ ᐱᒋᐊᖅᑕᐅᓂᖓᓂᑦ ᐃᖃᓗᐃᑦ ᓯᓚᕐᔪᐊᒨᓕᖓᔪᑦ ᖃᖓᑕᔫᒃᑯᕕᐅᑉ ᓄᑖᖑᕆᐊᖅᑕᐅᓂᖓᑕ ᐱᓕᕆᐊᕆᔭᐅᓂᖓ, ᐱᒋᐊᖅᑎᑕᐅᓂᖓᓂᑦ ᐃᖅᑲᓇᐃᔮᖑᓂᐊᑐᖅ ᓴᓇᒻᒪᓂᖓᓂᑦ ᐊᒻᒪᓗ ᓴᓇᔭᐅᓂᕆᓂᐊᖅᑕᖓ ᓄᑖᖅ ᖃᖓᑕᔫᒃᑯᕕᐅᑉ,” ᐅᖃᖅᑐᖅ ᒥᓂᔅᑕ ᓄᓇᓕᓐᓂᑦ ᒐᕙᒪᒃᑯᓂᓪᓗ ᐱᔨᑦᓯᕋᖅᑎᒃᑯᑦ, ᓗᐊᓂ ᑯᓱᒐᖅ, “ᓄᑖᖅ ᖃᖓᑕᔫᒃᑯᕕᒃ ᐱᐅᓯᕚᓪᓕᑎᑦᓯᓂᐅᕗᖅ ᐃᖏᕐᕋᔪᓕᕆᓂᕐᒥᑦ ᓄᓇᓖᑦ ᐊᑐᖅᐸᑦᑕᖏᑦ ᐊᐅᓚᔪᓐᓇᖁᓪᓗᒋᑦ ᓄᓇᕘᒥ ᐊᒻᒪᓗ ᐊᑐᐃᓐᓇᐅᑎᑦᓯᓂᐊᖅᑐᖅ ᓄᑖᖑᓂᖓ ᓴᓇᒻᒪᓂᖓ ᐊᒻᒪᓗ ᐊᐅᓚᓂᖓᓄᑦ.”



ᐃᖃᓗᐃᑦ ᓯᓚᕐᔪᐊᒨᓕᖓᔪᑦ ᖃᖓᑕᔫᒃᑯᕕᐅᑉ ᓄᑖᖑᕆᐊᖅᑕᐅᓂᖓᑕ ᐱᓕᕆᐊᕆᔭᐅᓂᖓ ᐃᓚᒋᔭᖃᖅᑯᖅ ᓄᑖᒥᑦ ᖃᖓᑕᔫᒃᑯᕕᑖᖅᓂᖅ ᐃᓪᓗᒥᑦ; ᐊᖏᓂᖅᓴᒥᑦ ᖃᖓᑕᔫᑦ ᕿᑲᕐᕕᒋᒍᓐᓇᖅᑕᖏᓐᓂᑦ;ᓄᑖᑦ ᖃᐅᒻᒪᖅᑯᑎᖃᕐᓃᑦ;ᒥᕝᕕᒃ ᐱᐅᓯᒋᐊᖅᑕᐅᓂᖓ;ᐊᒻᒪᓗ ᓄᑖᖅ ᐊᔾᔨᒌᖏᑦᑐᓂᑦ ᐱᔨᑦᓯᕋᖅᕕᒃ ᐃᓪᓗ ᐊᖏᕐᕋᕆᔭᐅᒐᔭᖅᑐᖅ ᖃᑦᑎᕆᔨᒃᑯᑦ ᐃᖏᕐᕋᔾᔪᑎᖏᓐᓂᑦ/ᐃᑲᔪᖅᑐᓲᓂᓪᓗ ᓴᓇᕐᕈᑏᑦ ᐊᒻᒪᓗ ᐅᖁᒪᐃᑦᑐᖅᓂᐅᑏᑦ ᐊᐅᓚᑦᓯᔾᔪᑎᓂᑦ ᒥᕝᕕᒻᒥᑦ ᐊᒻᒪᓗ ᕿᑲᕐᕕᐅᖃᑦᑕᖅᑐᓄᑦ.



ᐊᑭᑐᔫᑏᑦ ᐊᑭᒋᓂᐊᖅᑕᖏᑦ ᓇᓗᓇᐃᖅᑕᐅᓛᖅᑐᑦ ᐱᓕᕆᐊᕆᔭᐅᓂᖓᓄᑦ ᐊᖏᖃᑎᒌᒍᑏᑦ ᐱᔭᕇᖅᐸᑕ. ᓴᓇᔭᐅᕙᓪᓕᐊᓂᖓ ᓂᕆᐅᒋᔭᖅ ᐱᒋᐊᕋᔭᖅᑎᓪᓗᒍ 2014-ᒥ ᐱᔭᕇᖅᑕᐅᒐᔭᖅᑎᓪᓗᒍ 2017-ᒥ. ᐱᓕᕆᐊᕆᔭᐅᓂᖓ ᐊᖏᔪᒻᒪᕆᒻᒥᑦ ᓴᖅᑭᖅᓯᓂᐊᖅᑐᖅ ᐃᖅᑲᓇᐃᔮᓂᑦ, ᑕᕝᕘᓇ ᐊᒻᒪᓗ ᐊᓯᐊᒍᑦ, ᐃᓕᓐᓂᐊᑎᑦᓯᓂᕐᒥᓪᓗ ᐊᒻᒪᓗ ᑮᓇᐅᔭᓕᐅᕈᑎᑦᓴᑲᓐᓃᑦ ᐱᕚᓪᓕᐸᓪᓕᐊᓂᖏᓐᓂᑦ ᐱᒋᖃᖅᑎᑦᓯᓂᕐᒥᑦ ᐃᖃᓗᓐᓂᑦ ᐊᒻᒪᓗ ᓄᓇᕗᑦ ᐃᓗᐃᑦᑑᑎᓪᓗᒍ.



ᑐᑦᓯᕋᖅᑐᑦ ᐱᔪᓐᓇᖅᓂᕆᔭᐅᔪᓂᑦ ᕿᒥᕐᕈᔭᐅᒍᓐᓇᖅᑐᖅ ᓄᓇᕗᑦ ᐊᑭᑦᑐᕋᐅᑎᓂᒃᑯᑦ ᐃᑭᐊᖅᑭᕖᑦ: http://www.nunavuttenders.ca

 

ᑐᑭᓯᒋᐊᑲᓐᓂᕈᒪᒍᕕᑦ ᐃᖃᓗᐃᑦ ᓯᓚᕐᔪᐊᒨᓕᖓᔪᑦ ᖃᖓᑕᔫᒃᑯᕕᐅᑉ ᓄᑖᖑᕆᐊᖅᑕᐅᓂᖓᑕ ᐱᓕᕆᐊᕆᔭᐅᓂᖓ, ᐅᕗᖓᕈᓐᓇᖅᑐᑎᑦ: http://www.gov.nu.ca 



###



ᐱᕙᓪᓕᐊᔪᓄᑦ ᑐᑭᓯᒋᐊᕐᕕᒃ

ᐸᐋᒻ ᑳᑐ

ᑐᑭᒧᐊᑦᑎᑦᓯᔨ ᑐᓴᐅᒪᖃᑦᑕᐅᑎᔨᒃᑯᓐᓄᑦ

ᒐᕙᒪᓕᕆᔨᒃᑯᑦ

ᐅᖄᓚᐅᑎᖓ: 867-975-6049

ᖃᕆᑕᐅᔭᒃᑯᑦ: pcoulter2@gov.nu.ca