ᐅᖃᓚᐅᑎᓯᐅᑏᑦ

You are here

ᕙᓐᑰᕙ 2010 ᐱᙳᐊᕕᒡᔪᐊᕐᓂᐊᕐᑐᓂ ᐅᓕᒻᐱᒃᔅᓂ ᐃᑯᒪᑎᑕᐅᔪᖅ ᓇᒧᙵᐅᔾᔭᐅᕙᓪᓕᐊᓪᓗᓂ ᓄᓇᕘᒧᐊᕐᓂᐊᕐᑐᖅ

ᓄᕕᐱᕆ 05, 2009

ᐃᖃᓗᐃᑦ, ᓄᓇᕗᑦ (ᓄᕕᐱᕆ 4, 2009) - ᓗᐃ ᑕᐹᕐᔪᒃ, ᓄᓇᕗᒻᒥ ᒥᓂᔅᑕ ᐃᓕᖅᑯᓯᓕᕆᔨᒃᑯᓐᓄᑦ ᓇᓗᓇᐃᕈᒪᕗᖅ ᑎᑭᓐᓂᐊᕐᓂᖓᓂᒃ ᐱᙳᐊᕕᒡᔪᐊᕐᓂᐊᕐᑐᓂ ᐅᓕᒻᐱᒃᔅᓂ ᐃᑯᒪᑎᑕᐅᔪᖅ ᓇᒧᙵᐅᔾᔭᐅᕙᓪᓕᐊᓪᓗᓂ ᓄᓇᕗᒻᒧᑦ ᕿᑎᖅᑰᑕᐅᓕᕐᐸᑦ, ᓄᕕᐱᕆ 5-ᒥ ᖁᕕᐊᓱᒃᑎᑕᐅᓂᕐᒧᑦ ᐸᕐᓇᒃᐸᓪᓕᐊᓕᕐᑐᑦ ᑕᐅᕙᓂ ᐅᐊᓕᓂᕐᒥᐅᑦ ᓄᓇᓕᖓᓐᓂ, ᖁᕐᓗᕐᑑᒥ.



“ᑕᒪᓐᓇ ᐱᒻᒪᕆᐅᔪᖅ ᓄᓇᕗᒻᒥᐅᓄᑦ ᐱᔪᒥᒍᓱᓕᖁᓪᓗᒋᑦ ᑲᓇᑕᒥᐅᖑᖃᑎᕗᑦ ᓄᓇᕗᑦ ᑕᑯᒥᓇᕐᓂᖓᓂᒃ, ᐊᔾᔨᐅᖏᑦᑐᒥᒡᓗ ᐃᓕᖅᑯᓯᖃᕐᖢᑕ ᓴᖏᔫᓪᓗᓂ ᐊᒻᒪᓗ ᖁᕕᐊᓱᖕᓂᕐᒥᒃ ᐃᒃᐱᖕᓇᕐᑐᖃᕐᖢᓂ. ᑕᐃᓐᓇ ᓄᓇᕗᒻᒥ ᐃᖏᕐᕋᓂᐊᕐᑐᖅ ᐃᑯᒪᑎᑕᐅᔪᖅ ᐱᒃᑯᒍᓱᒃᑎᑦᑎᓂᐊᕐᒪᑦ ᑲᓇᑕᒥᐅᓂᒃ, ᐊᒻᒪᓗ ᐅᕙᑦᑎᓐᓂᒃ ᖁᕕᐊᓱᒃᑎᑦᑎᓗᓂ ᐃᓂᒋᔭᑦᑎᓐᓃᓐᓂᑦᑎᓐᓂᒃ ᑖᔅᓱᒪᓂ,” ᒥᓂᔅᑕ ᑕᐹᕐᔪᒃ ᐅᖃᕐᑐᖅ. 



ᑕᐃᓐᓇ ᐃᑯᒪᔪᖅ ᐃᖏᕐᕋᓯᒋᐊᕐᓂᐊᕐᑐᖅ ᓄᓇᕘᒃᑯᑦ ᖁᕕᐊᓱᓗᕿᓪᓗᑎᒃ ᖁᕐᓗᕐᑑᕐᒥ ᕿᑎᖅᑰᑕᐅᓕᕐᐸᑦ, ᓄᕕᐱᕆ 5-ᒥ ᐊᒻᒪᐃᓛᒃ ᐊᐅᓱᐃᑦᑐᒥ, ᖃᐅᓱᐃᑦᑐᒥ ᐊᒻᒪᓗ ᐃᖃᓗᖕᓂ ᓇᒡᒐᔾᔭᐅᓕᕐᐸᑦ ᓄᕕᐱᕆ 9-ᒥ. ᑕᒪᓐᓇ ᐃᓚᒋᕚ 45,000 ᑭᓚᒦᑕᒥᒃ ᑕᐃᓐᓇ ᐅᓕᒻᐱᒃᔅᒧᑦ ᐃᑯᒪᔪᖅ ᐃᖏᕐᕋᓂᐊᕐᓂᖓ, ᐱᐊᓂᒃᓯᓂᐊᕐᖢᑎᒃ ᐊᑯᓂᐅᓛᖑᔪᒥᒃ ᐅᓕᒻᐱᒃᒧᑦ ᐃᑯᒪᑎᑕᐅᔪᖅ ᓇᒧᙵᐅᔾᔪᔾᔭᐅᓂᐊᕐᓂᖓ ᑭᖑᓂᑦᑎᓐᓂ ᖃᓄᐃᓕᐅᕐᑕᐅᓂᒃᑯᑦ.



ᓄᓇᓕᖕᓂ ᖁᕕᐊᓱᕈᓘᔭᑲᑕᖕᓂᕐᒧᑦ ᐱᕚᓪᓕᕐᑎᑦᑎᓂᐊᕐᑐᖅ ᐊᒻᒪᓗ ᓈᒻᒪᒃᖢᓂ ᑖᔅᓱᒧᖓ ᕙᓐᑰᕙᒥ 2010 ᐅᓕᒻᐱᒃᔅ ᐅᑭᐅᒃᑯᑦ ᐱᙳᐊᕐᓃᑦ, ᖁᕕᐊᑦᑕᒃᑎᑦᑎᕙᓪᓕᐊᓪᓗᓂ ᐊᒻᒪᓗ ᐱᒃᑯᒍᓱᒃᑎᑦᑎᓪᓗᓂ ᑲᓇᑕ ᐊᐅᓚᑦᑎᑎᓪᓗᒍ ᑕᒪᑐᒥᖓ ᖃᓄᐃᓕᐅᕐᓂᐅᔪᒥᒃ. ᖁᕕᐊᓱᒃᑎᑦᑎᕈᓘᔭᖃᑦᑕᓛᕐᑐᑦ ᖁᖏᐊᕐᑎᑦᑎᕙᒡᓗᑎᒃ ᓄᓇᓖᑦ ᐊᔪᖏᑕᒥᖕᓂᒃ, ᒪᒃᑯᒃᑐᑦ, ᐃᓕᖅᑯᓯᒃᑯᑦ ᐊᒻᒪᓗ ᐱᙳᐊᕐᓂᒃᑯᑦ. 



ᐲᑕ ᑕᑉᑑᓇ, ᓄᓇᕗᒻᒧᑦ ᒥᓂᔅᑕᒋᔭᐅᔪᖅ ᐱᕙᓪᓕᐊᔪᓕᕆᔨᒃᑯᓐᓄᑦ ᐃᖏᕐᕋᔪᓕᕆᔨᒃᑯᓐᓄᓪᓗ ᐊᓕᐊᓇᐃᒍᓱᖃᑕᐅᖅᑲᐅᔪᖅ ᑕᒪᑐᒧᖓ ᐃᖏᕐᕋᓂᕆᔭᐅᔪᒧᑦ. “ᐱᒃᑯᓕᕗᖓ ᐊᒥᓱᑦ ᓄᓇᕗᒻᒥᐅᑦ ᐃᓚᐅᖃᑕᐅᖕᒪᑕ ᑖᔅᓱᒧᖓ ᖃᓄᐃᓕᐅᕐᓂᐅᔪᒧᑦ” ᐅᖃᕐᑐᖅ ᒥᓂᔅᑕ ᑕᑉᑑᓇ. “ᑕᐃᓐᓇ ᐅᓕᒻᐱᒃᒧᑦ ᐃᑯᒪᑎᑕᖅ ᓇᓗᓇᐃᒃᑯᑕᐅᖕᒪᑦ ᐃᓚᐅᖃᑕᐅᓂᕐᒧᑦ ᐱᙳᐊᕐᓂᕐᓄᑦ, ᐃᓚᒋᔭᐅᓂᕐᒧᑦ ᐊᒻᒪᓗ ᓂᕆᐅᖕᓂᕐᒧᑦ. ᐊᒡᔭᕐᓂᐊᕐᐸᕗᑦ ᐱᒃᑯᓕᓗᑕ ᓄᓇᕘᓗᒃᑖᒧᑦ.”



ᑖᒃᑯᐊ ᓄᓇᕗᑦ ᒐᕙᒪᒃᑯᖏᑦ, ᐃᑲᔪᖃᑕᐅᑎᓪᓗᑕ ᑕᕝᕗᖓ ᐱᙳᐊᕐᓂᕐᓄᑦ ᐱᓕᕆᖃᑎᒋᓪᓗᑎᒍ ᕙᓐᑰᕙᒥ ᐋᖅᑭᒃᓱᐃᓂᕐᒧᑦ ᑲᑎᒪᔩᑦ ᑖᔅᓱᒧᖓ 2010 ᐅᓕᒻᐱᒃᒧᑦ ᐊᒻᒪᓗ ᐱᒡᒐᓘᑎᓕᖕᓄᑦ ᐱᙳᐊᕐᑎᓄᑦ ᐅᑭᐅᒃᑯᑦ ᐱᙳᐊᕐᓂᐅᕙᒃᑐᓄᑦ ᑕᐃᓐᓇ ᐃᑯᒪᓪᓗᓂ ᐃᖏᕐᕋᓂᕆᔭᐅᔪᖅ ᖁᕕᐊᓲᑕᐅᑎᓪᓗᒍ ᓄᓇᑦᑎᓐᓂ ᓄᓇᕘᒥ. 75 ᐅᖓᑖᓃᑦᑐᑦ ᓄᓇᕗᒻᒥᐅᑦ ᓇᓗᓇᐃᕐᑕᐅᓯᒪᔪᑦ 2010-ᒥ ᐃᑯᒪᓕᖕᒥᒃ ᑎᒍᒥᐊᕐᑎᐅᖃᑕᐅᓂᐊᕐᓂᖏᓐᓂᒃ. 



ᑭᒃᑯᑐᐃᓐᓇᐃᑦ ᐃᓚᐅᖁᔭᐅᒐᓗᐊᕐᐳᑦ ᓄᓇᓕᔅᓯᓐᓂ ᖁᕕᐊᓱᓗᕿᑦᑐᓂ ᐊᒻᒪᓗ ᐃᑲᔪᕐᑐᕐᓗᒋᑦ ᑎᒍᒥᐊᕐᑎᐅᓂᐊᕐᑐᑦ ᓄᓇᓕᑦᑎᓐᓂ. ᐃᑲᔪᕆᑦᑎ ᑕᑯᒃᓴᐅᑎᑦᑎᖃᑕᐅᓂᕐᒥᒃ ᓄᓇᕘᑦᑎᓐᓂᒃ ᑕᖅᑲᐅᖓ ᑲᓇᑕᒥᐅᖑᖃᑎᑦᑎᓐᓄᑦ ᐊᒻᒪᓗ ᓄᓇᕐᔪᐊᕐᒧᑦ. 



###



ᑐᓴᒃᑲᓐᓂᕈᒪᒍᔅᓯ ᑕᒪᑐᒧᖓ, ᐅᓇ ᐅᖃᕐᕕᒋᔪᓐᓇᕐᐸᑦ:



ᓇᐸᑦᓯ ᑯᓗᓛᖅ

ᐋᔨᖃᑎᒌᒍᑎᓄᑦ ᐊᐅᓚᑦᑎᔨ

ᐃᓕᖅᑯᓯᓕᕆᔨᒃᑯᑦ

867-975-5526

nkolola@gov.nu.ca