ᐅᖃᓚᐅᑎᓯᐅᑏᑦ

You are here

ᐊᓯᔾᔨᖅᑕᐅᔪᑦ ᒐᕙᒪᒃᑯᑦ ᐊᖏᔪᖅᑲᐅᑎᖏᑦ ᐃᖅᑲᓇᐃᔭᖅᑏᑦ

ᒫᑦᓯ 24, 2014

ᐱᕙᓪᓕᐊᔪᑦ ᑐᓴᕋᑦᓴᑦ

ᓴᖅᑭᖅᑕᐅᑦᓴᐅᑎᒋᒋᐊᓕᒃ

ᐊᓯᔾᔨᖅᑕᐅᔪᑦ ᒐᕙᒪᒃᑯᑦ ᐊᖏᔪᖅᑲᐅᑎᖏᑦ ᐃᖅᑲᓇᐃᔭᖅᑏᑦ

ᐃᖃᓗᐃᑦ, ᓄᓇᕗᑦ (ᒫᑦᓯ 24, 2014) – ᓂᕆᐅᓇᙱᑦᑐᒥᒃ ᓄᖅᑲᖅᑐᖃᓚᐅᖅᑎᓪᓗᒍ, ᓯᕗᓕᖅᑎ ᐲᑕ ᑕᑉᑑᓇ ᐅᓪᓗᒥ ᓇᓗᓇᐃᖅᓯᖅᑲᐅᔪᖅ ᐊᓯᔾᔨᖅᑕᐅᔪᖃᕐᓂᖓᓂᒃ ᓄᓇᕗᑦ ᒐᕙᒪᒃᑯᖏᑕ ᐊᖏᔪᖅᑲᐅᑎᖏᓐᓂᒃ ᐃᖅᑲᓇᐃᔭᖅᑎᖏᓐᓂᒃ, ᒫᓐᓇᑲᐅᑎᒋ ᐱᒋᐊᕐᓗᓂ.

ᐊᓗᑭ ᕈᕼᐊᔅ, ᒥᓂᔅᑕᐅᑉ ᑐᒡᓕᐊ, ᐃᓄᓕᕆᔨᒃᑯᓐᓄᑦ ᓄᖅᑲᖅᓯᒪᓕᖅᑐᖅ ᐃᖅᑲᓇᐃᔭᓚᐅᖅᑐᓂ ᐊᕐᕌᒍᓂᒃ ᐱᖓᓲᔪᖅᑐᓂᒃ ᐅᖓᑖᓄᑦ ᒥᓂᔅᑕᓄᑦ ᑐᒡᓕᐅᓯᒪᓪᓗᓂ ᐊᕐᕌᒍᓂᓪᓗ ᖁᓕᓂᒃ ᐃᖅᑲᓇᐃᔭᖅᓯᒪᓪᓗᓂ ᓄᓇᕗᑦ ᒐᕙᒪᒃᑯᖏᓐᓂ.

ᓴᐃᒪᓐ ᐊᕙ, ᒥᓂᔅᑕᐅᑉ ᑐᒡᓕᐊ, ᐃᓕᖅᑯᓯᓕᕆᔨᒃᑯᓐᓄᑦ, ᑎᒃᑯᐊᖅᑕᐅᓯᒪᓕᖅᑐᖅ ᒥᓂᔅᑕᐅᑉ ᑐᒡᓕᐊᓄᑦ, ᐃᓄᓕᕆᔨᒃᑯᓐᓄᑦ.

"ᒥᔅ ᕈᕼᐊᔅ ᐃᖅᑲᓇᐃᔭᖅᓯᒪᔪᖅ ᒐᕙᒪᒃᑯᓐᓄᑦ ᐊᕐᕌᒍᕋᓴᕐᓂᒃ ᕿᐱᓗᒍᒪᒐᓗᐊᖅᑐᖓ ᑭᓯᐊᓂ ᐊᖏᕐᓗᒍ ᓄᖅᑲᕈᒪᒍᑎᖓ ᓇᒻᒥᓂᖅ ᐃᓅᓯᕐᒥᓂ ᐱᔾᔪᑎᖃᖅᑐᓂ," ᐅᖃᖅᓯᒪᔪᖅ ᓯᕗᓕᖅᑎ ᑕᑉᑑᓇ. "ᐃᓄᓕᕆᔨᒃᑯᑦ ᐱᒻᒪᕆᐅᓂᖃᖅᑐᑦ ᒐᕙᒪᒋᔭᑦᑎᓐᓄᑦ, ᐅᑉᐱᕈᓱᑦᑐᖓᓗ ᐊᕙ, ᐊᒥᓱᓂᒃ ᐊᑑᑎᖃᓪᓚᕆᑦᓯᒪᔪᖅ, ᓈᒻᒪᓈᕐᓂᐊᕆᐊᖓ ᓄᑖᒧᑦ ᐃᓂᒋᓂᐊᓕᖅᑕᒥᓄᑦ."

ᔫ ᐊᓪᓚ ᑯᓄᒃ, ᒥᓂᔅᑕᐅᑉ ᑐᒡᓕᑦᓴᖓ, ᒐᕙᒪᓕᕆᔨᒃᑯᓐᓄᑦ ᑎᒃᑯᐊᖅᑕᐅᓂᐊᖅᑐᖅ ᒥᓂᔅᑕᐅᑉ ᑐᒡᓕᐊᓄᑦ, ᐃᓕᖅᑯᓯᓕᕆᔨᒃᑯᑦ. ᐃᓕᖅᑯᓯᓕᕆᔨᒃᑯᓐᓂ ᐊᖏᔪᖅᑳᖑᓗᓂ, ᑯᓄᒃ ᓱᓕ ᐊᔩᖅᑎᓄᑦ ᐊᖏᔪᖅᑳᖑᓂᐊᖅᑐᖅ, ᓄᓇᕗᒻᒥ ᓄᓇᑖᖅᓯᒪᓂᕐᒧᑦ ᐊᖏᕈᑎᓂᒃ ᐊᑐᓕᖅᑎᑦᓯᓂᕐᒧᑦ ᑳᓐᑐᕌᒧᑦ ᓄᓇᕗᑦ ᒐᕙᒪᒃᑯᖏᓐᓄᑦ.

"ᑯᒃ ᐊᒥᓱᓂᒃ ᐃᖅᑲᓇᐃᔮᖃᖅᓯᒪᓂᖓ ᑲᓇᑕᐅᑉ ᒐᕙᒪᒃᑯᖏᓐᓂ ᓄᓇᕗᑦ ᑐᙵᕕᒃᑯᓐᓂᓗ ᓈᒻᒪᓈᑦᓯᐊᕐᓂᐊᖅᑐᖅ ᐃᓂᑖᑦᓯᐊᕈᑎᒋᓗᓂᒋᑦ ᓯᕗᓕᖅᑎᐅᓂᕐᒧᑦ ᐃᓕᖅᑯᓯᓕᕆᔨᒃᑯᓐᓂ," ᐅᖃᖅᓯᒪᔪᖅ ᓯᕗᓕᖅᑎ ᑕᑉᑑᓇ.

ᒪᓕᑦᑐᒋᑦ ᓯᕗᒧᑦ ᐊᑉᓗᖅᑕ ᓯᕗᓪᓕᐅᑎᔭᐅᒍᒪᓯᒪᔪᖅ ᓴᙱᓕᖅᐹᓪᓕᖅᑕᐅᖁᓪᓗᒍ ᓵᑕᒃᓴᐅᒍᑎᖃᕆᐊᖃᕐᓂᖅ, ᒪᑐᐃᖓᔪᒥᒃ ᐃᖅᑲᓇᐃᔭᖅᑎᑖᕋᓱᐊᕐᓂᐊᖅᑐᑦ ᐊᔾᔨᒌᙱᑦᑐᓄᑦ ᐃᓐᓄᑦᑕᐅᒋᐊᓕᓐᓄᑦ ᒥᓂᔅᑕᐅᑉ ᑐᒡᓕᑦᓴᖏᑦ ᒥᓂᔅᑕᐃᓪᓗ ᑐᒡᓕᖏᑕ ᐃᑲᔪᖅᑎᑦᓴᖏᓐᓂᒃ ᒐᕙᒪᒃᑯᓐᓂ ᓂᕆᐅᒋᔭᐅᔪᖅ ᐱᒋᐊᖅᑕᐅᓂᐊᕐᖓᑕ ᑭᖑᓂᐊᒍᑦ.

###

ᐱᕙᓪᓕᐊᔪᓕᕆᔨᓄᑦ ᖃᐅᔨᒋᐊᕐᕕᑦᓴᖅ:

ᓗᐊᕋᓐ ᓵᓪᔅᑭ

ᑐᓴᕋᑦᓴᓕᕆᔨ

ᒐᕙᒪᓕᕆᔨᒃᑯᑦ

ᓄᓇᕗᑦ ᒐᕙᒪᖓ

ᐅᖄᓚᐅᑎᖓ: 867-975-6004

ᖃᕆᓴᐅᔭᒃᑯᑦ: LSolski@GOV.NU.CA

 

ᑭᖑᓂᑦᑎᓐᓂ ᖃᓄᐃᓕᐅᕈᑕᐅᓯᒪᔪᑦ

ᓴᐃᒪ ᐊᕙ ᓇᓪᓕᐅᓂᖅᓯᐅᕈᑎᖃᕋᑖᓚᐅᖅᑐᖅ ᐊᕐᕌᒍᓂᒃ ᖁᓕᓂᒃ ᒥᓂᔅᑕᓄᑦ ᑐᒡᓕᐅᓯᒪᓪᓗᓂ ᒐᕙᒪᒃᑯᓐᓂ. 2010-ᖑᑎᓪᓗᒍ, ᑎᒃᑯᐊᖅᑕᐅᓚᐅᖅᑐᖅ ᒥᓂᔅᑕᒧᑦ ᑐᒡᓕᐅᓂᕐᒧᑦ ᐃᓕᖅᑯᓯᓕᕆᔨᒃᑯᓐᓄᑦ. ᒥᓂᔅᑕᒧᑦ ᑐᒡᓕᐅᓯᒪᒻᒥᔪᖅ ᐊᕙᑎᓕᕆᔨᒃᑯᓐᓄᑦ ᒐᕙᒪᓕᕆᔨᒃᑯᓄᓪᓗ. 2000-ᒥᓂᑦ, ᐊᕙ ᐃᖅᑲᓇᐃᔮᖃᖅᓯᒪᔪᖅ ᐊᔾᔨᒌᙱᑦᑐᓂ ᐊᖏᔪᖅᑳᖑᖃᑕᐅᓪᓗᓂ ᓄᓇᕗᑦ ᒐᕙᒪᒃᑯᖏᓐᓂ.

ᔫ ᐊᓪᓚ ᑯᓄᒃ ᑎᒃᑯᐊᖅᑕᐅᓚᐅᖅᑐᖅ ᒥᓂᔅᑕᒧᑦ ᑐᒡᓕᑦᓴᐅᓂᕐᒧᑦ ᒐᕙᒪᓕᕆᔨᒃᑯᓐᓄᑦ 2013-ᖑᑎᓪᓗᒍ. ᐊᔾᔨᒌᙱᑦᑐᓂᒃ ᐊᖏᔪᖅᑳᖑᖃᑕᐅᓪᓗᓂ ᐃᖅᑲᓇᐃᔮᖃᖅᓯᒪᔪᖅ ᒐᕙᒪᒃᑯᓐᓂ, ᒥᓂᔅᑕᒧᑦ ᑐᒡᓕᐅᓯᒪᓪᓗᓂ ᒐᕙᒪᒃᑯᑦ ᐱᓕᕆᕕᒋᓚᐅᖅᑕᖓᓄᑦ ᐃᖅᑲᓇᐃᔭᖅᑐᓕᕆᔨᒃᑯᓐᓄᑦ, ᓯᕗᓕᖅᑎᒧᑦ ᐃᑲᔪᖅᑎᐅᓯᒪᓪᓗᓂ ᑭᖑᓪᓕᖅᐹᒥ ᒐᕙᒪᐅᓚᐅᖅᑐᓄᑦ. ᓇᑦᓴᕐᓂᐊᖅᑐᖅ ᐊᕐᕌᒍᐃᑦ 30 ᐅᖓᑖᓄᑦ ᐃᖅᑲᓇᐃᔮᖃᖅᓯᒪᓂᕐᒥᓂᒃ ᒐᕙᒪᒃᑯᓐᓂ, ᐃᓄᐃᑦ ᑲᑐᔾᔨᖃᑎᒌᖏᓐᓂ ᓇᖕᒥᓂᖃᖅᑎᐅᔪᓂᓗ.

ᐊᓗᑭ ᕈᕼᐊᔅ ᐃᑲᔪᕐᓂᖃᓪᓚᕆᑦᓯᒪᔪᖅ ᓴᖅᑭᖅᑕᐅᕙᓪᓕᐊᑎᓪᓗᒋᑦ ᐃᓄᓕᕆᔨᒃᑯᑦ. ᒥᓂᔅᑕᒧᑦ ᑐᒡᓕᐅᓯᒪᒻᒥᔪᖅ ᒐᕙᒪᒃᑯᑦ ᐱᓕᕆᕕᖏᓐᓄᑦ ᐊᕙᑎᓕᕆᔨᒃᑯᑦ, ᐃᖅᑲᓇᐃᔭᖅᑐᓕᕆᔨᒃᑯᑦ, ᒐᕙᒪᓕᕆᔨᒃᑯᓄᓪᓗ. ᓯᓚᑦᑐᓴᕐᕕᔾᔪᐊᒥ ᖁᑦᑎᓂᖅᐹᒥᒃ ᐱᔭᕇᕈᑎᑖᖅᓯᒪᔪᖅ ᑲᓇᑕᒥ ᓄᓇᖃᖅᑳᖅᑐᒥᓂᓕᕆᓂᕐᒧᓪᓗ ᐃᓕᓐᓂᐊᕈᑎᓂᒃ.