ᐅᖃᓚᐅᑎᓯᐅᑏᑦ

You are here

ᐃᓕᓐᓂᐊᕈᑎᓕᐊᖑᕙᑦᑐᑦ ᐋᖅᑭᒋᐊᖅᑕᐅᔪᑦ ᖃᐅᔨᓴᕆᐊᖅᑕᐅᖃᑦᑕᕐᓂᐊᕐᓂᖏᓪᓗ ᐱᒋᐊᖅᑕᐅᓂᐊᖅᑐᑎᒃ ᓄᓇᕗᒻᒥ ᐃᓕᓐᓂᐊᕐᕕᖏᓐᓂ

ᒫᑦᓯ 21, 2014

ᐱᕙᓪᓕᐊᔪᑦ ᑐᓴᕋᑦᓴᑦ

ᓴᖅᑭᖅᑕᐅᑦᓴᐅᑎᒋᒋᐊᓕᒃ

ᐃᓕᓐᓂᐊᕈᑎᓕᐊᖑᕙᑦᑐᑦ ᐋᖅᑭᒋᐊᖅᑕᐅᔪᑦ ᖃᐅᔨᓴᕆᐊᖅᑕᐅᖃᑦᑕᕐᓂᐊᕐᓂᖏᓪᓗ ᐱᒋᐊᖅᑕᐅᓂᐊᖅᑐᑎᒃ ᓄᓇᕗᒻᒥ ᐃᓕᓐᓂᐊᕐᕕᖏᓐᓂ

ᐃᖃᓗᐃᑦ, ᓄᓇᕗᑦ (ᒫᑦᓯ 21, 2014) - ᓯᕗᓕᖅᑎ ᐲᑕ ᑕᑉᑑᓇ ᐃᓚᐅᖃᑕᐅᖅᑲᐅᔪᖅ ᐃᓕᓐᓂᐊᕐᓂᓕᕆᔨᒃᑯᑦ ᒥᓂᔅᑕᖓᓄᑦ ᐹᓪ ᖁᐊᓴ ᓇᓗᓇᐃᖅᓯᑎᓪᓗᒍ ᓴᖅᑭᖅᑕᐅᓂᖓᓂᒃ ᓄᑖᕐᖑᕆᐊᖅᑕᐅᓯᒪᔪᑦ, ᐊᔾᔨᒌᓕᖅᑎᓯᒪᔪᑦ ᐃᓕᓐᓂᐊᖅᑎᑦᓯᒍᑎᑦᓴᐃᑦ ᐱᓕᕆᔾᔪᑎᑦᓴᖏᓐᓂᓪᓗ ᓄᑖᓂᓪᓗ ᑎᑎᕋᕈᓐᓇᓂᕐᒧᑦ/ᐅᖃᓕᒫᕈᓐᓇᓂᕐᒧᑦ ᐃᓕᓐᓂᐊᕈᑎᓂᒃ ᖃᐅᔨᓴᕆᐊᖃᑦᑕᕈᓯᕐᓂᓪᓗ ᑐᕌᒐᖃᕐᓂᐊᖅᑐᓂᒃ ᐊᐅᓚᑦᓯᓂᐊᕐᓂᖅᓴᐅᓕᖁᓪᓗᒍ ᒫᓐᓇᐅᔪᖅ ᐃᓕᓐᓂᐊᖅᑐᓕᕆᔾᔪᓯᐅᔪᖅ.

"ᓄᑖᕐᖑᕆᐊᖅᑕᐅᔪᑦ ᐃᓕᓐᓂᐊᖅᑎᑦᓯᒍᑎᑦᓴᐃᑦ ᐊᑐᓕᖅᑎᑕᐅᓂᐊᕐᓂᖏᓪᓗ ᖃᐅᔨᓴᕈᑎᐅᖃᑦᑕᕐᓂᐊᖅᑐᑦ ᓯᕗᓪᓕᖅᐹᒥ ᐊᓪᓗᕈᑎᐅᔪᖅ ᐱᕚᓪᓕᖅᑕᐅᒋᐊᖁᓪᓗᒍ ᑐᙵᕕᖓᑦ ᐃᓕᓐᓂᐊᖅᑐᓕᕆᓂᕐᒧᑦ ᐋᖅᑭᐅᒪᔭᕗᑦ," ᐅᖃᖅᓯᒪᔪᖅ ᓯᕗᓕᖅᑎ ᑕᑉᑑᓇ. "ᐊᑦᓱᕉᑎᖃᕐᓂᐊᕐᓂᕋᖅᓯᒪᒐᑦᑕ ᓯᕗᒧᑦ ᐊᑉᓗᖅᑕ ᑐᕌᒐᑦᑎᓐᓂ ᑲᒪᒋᔭᐅᒋᐊᖁᓪᓗᒍ ᐃᓕᓐᓂᐊᖅᑐᓕᕆᓂᖅ ᐊᓯᔾᔨᖅᐸᓪᓕᐊᖏᓐᓇᕐᓂᐊᖅᑐᒍᓗ ᓯᕗᓂᑦᓴᑎᓐᓄᑦ ᐋᖅᑭᐅᒪᒍᑎᑦᓴᐅᓗᓂ."

ᐃᓕᓐᓂᐊᕐᓂᓕᕆᔨᒃᑯᑦ ᑮᓇᐅᔭᖃᖅᑎᑦᓯᓯᒪᔪᑦ $1 ᒥᓕᐊᓐᕈᔪᓐᓂᒃ ᓄᑖᕐᖑᕆᐊᖅᑕᐅᖁᓪᓗᒋᑦ ᐃᓕᓐᓂᐊᕐᕕᒻᒥ ᐱᓕᕆᔾᔪᑎᑦᓴᐃᑦ ᓂᐅᕕᖅᓯᒪᓪᓗᑎᒃ ᓈᓴᐅᓯᕆᓂᕐᒧᑦ ᖃᐅᔨᓴᖅᑐᓕᕆᓂᕐᒧᓪᓗ ᐃᓕᓐᓂᐊᕈᑎᓂᒃ ᐅᖃᓕᒫᒐᕐᓂᒃ, ᐃᓚᐅᑎᑦᓯᓂᕐᒧᑦ ᐱᓕᕆᔾᔪᑎᑦᓴᓂᒃ ᑎᑎᕋᕆᐅᖅᓴᓂᕐᒧᓪᓗ/ᐅᖃᓕᒫᕆᐅᖅᓴᓂᕐᒧᓪᓗ ᐃᓕᓐᓂᐊᕈᑎᓂᒃ ᖃᐅᔨᓴᕆᐊᕈᑎᐅᓂᐊᖅᑐᓂᓪᓗ ᐃᓕᓐᓂᐊᕐᕕᓕᒫᓄᑦ ᓄᓇᕗᒻᒥ. ᐱᓕᕆᕕᑦᑎᓐᓂ ᓱᓕ ᓴᓇᕙᓪᓕᐊᖏᓐᓇᖅᑐᑦ ᓄᓇᕗᒻᒧᑦ ᑐᕌᖓᔪᓂᒃ ᐃᓕᓐᓂᐊᖅᑎᑦᓯᒍᑎᑦᓴᓂᒃ.

"ᐊᑐᓕᖅᑎᑦᓯᓂᐊᖅᑐᒍᑦ ᓱᖏᐅᑎᓗᒍᓗ ᐃᓕᓐᓂᐊᖅᑎᑦᓯᒍᑎᑦᓴᐃᑦ ᓄᓇᑦᓯᐊᕐᒦᖔᖅᑐᑦ ᐃᐅᓪᐴᑕᒥᓗ ᓈᓴᐅᓯᕆᓂᕐᒧᑦ, ᖃᐅᔨᓴᖅᑐᓕᕆᓂᕐᒧᑦ ᖃᓪᓗᓈᑎᑐᓪᓗ ᐅᖃᐅᓯᓕᕆᓂᕐᒧᑦ ᐃᓕᓐᓂᐊᕈᑎᖏᑦ," ᐅᖃᖅᓯᒪᔪᖅ ᐹᓪ ᖁᐊᓴ, ᒥᓂᔅᑕ ᐃᓕᓐᓂᐊᕐᓂᓕᕆᔨᒃᑯᓐᓄᑦ. "ᒫᓐᓇ ᐃᓕᓐᓂᐊᕐᕕᑦᑎᓐᓂ ᐊᑐᖃᑦᑕᕋᑦᑕ ᐊᔾᔨᒌᙱᑦᑐᓂᒃ ᐃᓕᓐᓂᐊᖅᑎᑦᓯᒍᑎᓂᒃ ᐊᐅᓚᑦᓯᓪᓗᑕ ᐃᓕᓐᓂᐊᖅᑎᑦᓯᒍᑎᐅᔪᓂᒃ ᑖᒃᑯᐊᓗ ᐊᓯᔾᔨᖅᑕᐅᓂᖏᑦ ᓇᓗᓇᐃᖅᓯᒪᒍᑎᐅᓂᐊᖅᑐᑦ ᓄᑖᕐᖑᕆᐊᖅᓯᒪᔪᓂᒃ, ᓇᓕᒧᒌᓕᖅᑎᓯᒪᔪᓂᒃ ᐃᓕᓐᓂᐊᖅᑎᑦᓯᒍᑎᑦᓴᓂᒃ ᓱᕐᕋᑦᑕᓗᐊᙱᑦᑐᓂᒃ ᐊᑑᑎᖃᑦᓯᐊᖅᑐᓂᓪᓗ ᐃᓕᓐᓂᐊᕈᑎᖃᑦᓯᐊᕈᓐᓇᖁᓪᓗᒋᑦ ᓄᓇᕗᒻᒥ ᐃᓕᓐᓂᐊᖅᑎᓕᒫᑦ."

ᐃᓕᓐᓂᐊᖅᑐᓕᕆᓂᕐᒧᑦ ᐱᖁᔭᖅ ᒪᓕᑦᑕᐅᒋᐊᓕᒃ ᐃᓕᓐᓂᐊᕐᓂᓕᕆᔨᒃᑯᑦ ᐋᖅᑭᑦᓯᒋᐊᖃᖅᑐᑎᒃ ᐊᐅᓚᑦᓰᓐᓇᕆᐊᖃᖅᑐᓂᓪᓗ ᓄᓇᕗᓕᒫᒥ ᖃᐅᔨᓴᕆᐊᕈᑎᓂᒃ ᑎᑎᕋᕆᐅᖅᓴᓂᖏᓐᓂᒃ/ᐅᖃᓕᒫᕆᐅᖅᓴᓂᖏᓐᓂᒃ ᐃᓕᓐᓂᐊᖅᑎᕗᑦ, ᓇᒦᒃᑲᓗᐊᖅᑲᑕ ᓄᓇᓕᓐᓂ ᐃᓕᓐᓂᐊᕐᕕᖏᓐᓂ ᑕᐃᒪᐃᒋᐊᖃᖅᑐᐃᓐᓇᐅᒻᒪᑕ," ᐅᖃᖅᓯᒪᔪᖅ ᖁᐊᓴ.

ᐃᓕᓐᓂᐊᖅᑏᑦ ᐃᓕᓐᓂᐊᕈᑎᒋᓯᒪᔭᖏᑦ ᑐᖅᑯᖅᑕᐅᓯᒪᔪᑦ ᖃᕆᓴᐅᔭᒃᑯᑦ ᐊᑐᖅᑕᐅᖃᑦᑕᓂᐊᖅᑐᑦ ᑐᑭᓯᓇᕈᑎᐅᓗᑎᒃ ᐃᓕᓐᓂᐊᖅᑎᑦᓯᔨᓄᑦ, ᐃᓕᓐᓂᐊᖅᑎᓄᑦ ᐊᖏᔪᖅᑳᕆᔭᐅᔪᓄᓪᓗ ᖃᓄᕐᓗ ᐃᓕᓐᓂᐊᖅᑎ ᐃᓕᓐᓂᐊᑦᓯᐊᖅᐸᓪᓕᐊᒻᒪᖔᑦ ᐊᖑᒻᒪᑎᓗᓂ ᓂᕆᐅᒋᔭᐅᕕᐅᓂᕐᒥᓂᒃ ᐃᓕᓐᓂᐊᕈᑎᐅᓯᒪᒋᐊᓕᓐᓂᓪᓗ. ᓄᑖᑦ ᖃᐅᔨᓴᕆᐊᖃᑦᑕᓂᕐᒧᑦ ᐸᕐᓇᐅᑏᑦ ᐃᓚᒋᓕᐅᔾᔨᓯᒪᓂᐊᖅᑐᑦ ᓄᐊᑦᓯᖃᑦᑕᕐᓗᑎᒃ ᐱᖓᓲᓕᖓᔪᓂᒃ: ᓯᓚᑐᓂᕐᒧᑦ, ᓇᓗᓇᐃᒃᑯᑕᓄᑦ ᑎᑭᐅᑎᒍᓐᓇᓂᕐᒧᑦ ᑲᑎᓕᒫᖅᑐᒋᓪᓗ ᐃᓕᓐᓂᐊᕐᓂᕆᓯᒪᔭᖏᑦ.

ᐃᓕᓐᓂᐊᕐᓂᓕᕆᔨᒃᑯᑦ ᓴᖅᑮᓂᐊᖅᑐᑦ ᑎᑎᕋᕆᐅᖅᓴᓂᕐᒧᑦ/ᐅᖃᓕᒫᕆᐅᖅᓴᓂᕐᒧᓪᓗ ᐸᕐᓇᐅᑎᓂᒃ ᐊᑕᐅᑦᓯᒃᑰᕈᑕᐅᓂᐊᕐᓗᓂ ᖃᐅᔨᓴᕆᐊᖃᑦᑕᓂᕐᒧᑦ ᐸᕐᓇᐅᑎᖏᓐᓄᑦ. ᑖᒃᑯᐊ ᐋᖅᑭᐅᒪᓂᐅᓂᐊᖅᑐᑦ ᓱᕐᕋᖅᑕᓗᐊᙱᑦᑐᓂᒃ ᐃᓕᓐᓂᐊᖅᑎᑦᓯᒍᑎᐅᓂᐊᖅᑐᑦ ᖃᐅᔨᓴᕆᐊᕈᑕᐅᖃᑦᑕᕐᓗᑎᓪᓗ ᐃᓕᓐᓂᐊᖅᑏᑦ ᑎᑎᕋᕈᓐᓇᖅᓯᓂᖏᓐᓂᒃ/ᐅᖃᓕᒫᕈᓐᓇᖅᓯᓂᖏᓐᓂᒃ.

"ᑖᒃᑯᐊ ᐋᖅᑭᐅᒪᓂᐅᓂᐊᖅᑐᑦ ᓴᖅᑭᖅᑕᐅᕙᓪᓕᐊᓂᐊᖅᑐᑦ ᑐᓪᓕᕇᓪᓗᑎᒃ, ᐱᒋᐊᕈᑕᐅᓗᑎᒃ ᐃᓕᓐᓂᐊᓕᓵᖅᑐᓂᒃ ᐃᓕᓐᓂᐊᕐᓂᓖᑦ 4-ᒧᑦ ᑕᕝᕙᓂ ᐃᓕᓐᓂᐊᕐᓇᐅᑉ ᐊᕐᕌᒍᖓᓂ," ᐅᖃᖅᓯᒪᔪᖅ ᖁᐊᓴ. "ᐃᓕᓐᓂᐊᖅᑏᑦ ᐊᑑᑎᖃᖃᑦᑕᕈᓐᓇᕐᓂᐊᕐᖓᑕ ᐃᓕᓐᓂᐊᖅᑎᑕᐅᓪᓚᑦᑖᕐᓗᑎᒃ ᖁᕝᕙᕆᐊᕈᓐᓇᖅᓯᖃᑦᑕᕐᓗᑎᒃ ᐃᒻᒥᒃᑰᕈᓐᓇᖅᓯᓗᑎᒃ ᐃᓕᓐᓂᐊᕈᓐᓇᓂᕐᒧᑦ, ᐅᖃᓕᒫᕈᓐᓇᓂᕐᒧᑦ ᑎᑎᕋᕈᓐᓇᓂᕐᒧᓪᓗ."

ᓇᓕᒧᒌᑦᑐᒥᒃ ᑎᑎᕋᕈᓐᓇᕐᓂᕐᒧᑦ/ᐅᖃᓕᒫᕈᓐᓇᕐᓂᕐᒧᑦ ᐱᓕᕆᐊᖅ ᐊᑕᖏᖅᑐᒋᑦ ᑎᑎᕋᕆᐅᖅᓴᓂᕐᒨᖓᔪᑦ ᐃᓚᒋᔭᐅᓗᑎᒃ ᖃᓄᖅᑑᕈᑎᐅᓯᒪᔪᑦ ᖃᐅᔨᓴᕈᑎᑦᓴᐃᑦ ᐅᖃᓕᒫᕈᓐᓇᖅᓯᓂᖏᓐᓂᒃ ᑎᑎᕋᕈᓐᓇᖅᓯᓂᖏᓐᓂᒃ ᐃᓕᓐᓂᐊᕈᓐᓇᖅᓯᓂᖏᓐᓂᓪᓗ.

ᓯᕗᓪᓕᖅᐹᖓᓂ ᑎᑎᕋᕆᐅᖅᓴᓂᕐᒧᑦ/ᐅᖃᓕᒫᕆᐅᖅᓴᓂᕐᒧᑦ ᐸᕐᓇᐅᑎᖏᑦ ᐱᒋᐊᕈᑕᐅᓂᐊᖅᑐᑦ ᐱᒋᐊᓕᓵᖅᑐᓂᒃ ᐃᓕᓐᓂᐊᕐᓂᓕᓐᓄᑦ 4-ᒧᑦ 2014-2015 ᐃᓕᓐᓂᐊᕐᓇᐅᑉ ᐊᕐᕌᒍᖓᓂ ᖁᕝᕙᐸᓪᓕᐊᓗᑎᒃ ᐃᓕᓐᓂᐊᕐᓂᓖᑦ 5-ᒥᒃ 8-ᒧᑦ ᐊᒻᒪᓗ 9-ᒥᒃ 12-ᒧᑦ ᑭᖑᓂᐊᒍᑦ ᐊᕐᕌᒍᓂ.

ᐊᔭᐅᖅᑐᐃᒍᒪᓪᓗᑎᒃ ᐃᓅᓯᖃᑦᓯᐊᕐᓂᕐᒥᒃ ᖃᓄᐃᙱᑦᓯᐊᕐᓂᒥᓪᓗ ᐃᓕᓐᓂᐊᕐᕕᐊᓗᒻᒥ ᐃᖃᐃᓕᓴᕐᓂᕐᒧᑦ ᐃᓕᓐᓂᐊᖃᑦᑕᕆᐊᖃᕐᓂᓕᖅᑐᑦ ᐱᖓᓱᓂᒃ ᑕᓪᓕᒪᓄᖔᖅ ᓈᓴᐅᑎᑖᕆᐊᖃᕐᓗᑎᒃ.

ᒪᓕᑦᑕᐅᒋᐊᖃᕐᓂᖓ ᐱᔭᕇᖅᑕᐅᒋᐊᖃᕐᓂᖓᓄᑦ ᐃᓕᓐᓂᐊᕐᓂᓖᑦ 12-ᓄᑦ ᐊᐅᓚᔮᖅᑐᑦ ᐃᓕᓐᓂᐊᕈᑎ ᐲᖅᑕᐅᓯᒪᓕᖅᑐᖅ ᐃᓕᓐᓂᐊᖅᑏᑦ ᐊᓯᔾᔨᖅᓯᒍᓐᓇᖁᓪᓗᒋᑦ ᐃᓕᓐᓂᐊᕈᑎᒋᖔᕈᒪᔭᖏᓐᓂᒃ ᓇᓖᕌᕈᓐᓇᕐᓗᑎᒃ, ᓇᓖᕌᕈᑎᖃᕈᓐᓇᖅᓯᓗᑎᒃ ᓈᓴᐅᓯᕆᓂᕐᒥᒃ ᖃᐅᔨᓴᖅᑐᓕᕆᓂᕐᒧᓪᓗ ᐃᓕᓐᓂᐊᕈᑎᓂᒃ ᐅᕝᕙᓘᓐᓃᑦ ᖁᕕᐊᒋᔭᒥᓂᒃ ᐃᓕᓐᓂᐊᕈᑎᖃᖔᕈᓐᓇᕐᓗᑎᒃ ᐃᖅᑲᓇᐃᔮᕆᒍᒪᔭᖏᓐᓄᑦ ᑐᕌᖅᑐᓂᒃ.

###

ᐱᕙᓪᓕᐊᔪᓕᕆᔨᓄᑦ ᖃᐅᔨᒋᐊᕐᕕᑦᓴᖅ:

ᐅᐊᓐᑎ ᕼᐊᓗᓇᓐ

ᑐᓴᕋᑦᓴᓕᕆᓂᕐᒧᑦ ᐊᐅᓚᑦᓯᔨ

ᐅᖄᓚᐅᑎᖓ: 975-5667

ᖃᕆᓴᐅᔭᒃᑯᑦ: whalonenEDU2@gov.nu.ca