ᐋᑕᒻ ᐋᕆᐊᒃ ᓚᐃᑦᔅᑑᓐ ᓂᕈᐊᖅᑕᐅᓕᖅᑭᔪᔪᖅ ᓂᕈᐊᕕᔾᔪᐊᕐᓇᐅᑎᓪᓗᒍ ᐊᑯᑑᕝᕙ 25, 2021-ᒥ, ᑭᒡᒐᖅᑐᐃᓂᐊᕐᓗᓂ ᓂᕈᐊᖅᑕᐅᓯᒪᕕᐅᔪᒥᒃ ᐃᖃᓗᐃᑦ−ᒪᓂᕋᔭᒻᒥᑦ 6-ᒋᔭᖓᓂ ᓄᓇᕗᑦ ᒪᓕᒐᓕᐅᖅᕕᖓᓂ. ᒥᔅᑕ ᓚᐃᑦᔅᑑᓐ ᓂᕈᐊᖅᑕᐅᔪᔪᖅ ᐱᔨᑦᑎᓂᐊᕐᓗᓂ ᓯᕗᓕᖅᑎᑦ ᑲᑎᒪᔨᖏᓐᓂ ᓄᕕᐱᕆ 17, 2021-ᒥ ᓯᕗᓕᖅᑎᒃᓴᓂᑦ ᑲᑎᒪᐅᑎᖃᖅᑎᓪᓗᒋᑦ. ᒥᓂᔅᑕ ᓚᐃᑦᔅᑑᓐ ᑲᑎᒪᓂᕐᒥ ᐊᖏᖅᑎᑕᐅᔪᔪᖅ ᐊᓪᓚᒃᕕᖓᓄᑦ ᓄᕕᐱᕆ 19, 2021-ᒥ. ᐱᔨᑦᑎᓂᐊᖅᑐᖅ ᒥᓂᔅᑕᐅᓗᓂ ᑮᓇᐅᔭᓕᕆᓂᕐᒧᑦ, ᒥᓂᔅᑕᐅᓗᓂ ᐃᖅᑲᓇᐃᔭᖅᑎᓕᕆᓂᕐᒧᑦ, ᐊᒻᒪᓗ ᒥᓂᔅᑕᐅᓗᓂ ᑲᒪᔨᐅᓗᓂ ᐃᖅᑲᓇᐃᔭᖅᑏᑦ ᐊᑦᑕᓇᖅᑐᓕᕆᔨᖏᑕ ᑲᑎᒪᔨᖏᓐᓂᑦ. ᒥᔅᑕ ᓚᐃᑦᔅᑑᓐ ᐃᒃᓯᕙᔪᔪᖅ ᒪᓕᒐᓕᐅᖅᑎᐅᖃᑕᐅᓪᓗᓂ ᑕᓪᓕᒪᒋᔭᖓᓂ ᒪᓕᒐᓕᐅᖅᕕᒻᒥ, ᐱᔨᑦᑎᕋᔪᓪᓗᓂ ᐃᒃᓯᕙᐅᑕᐅᖃᑕᐅᓪᓗᓂ ᑲᑎᒪᔨᕋᓛᖑᔪᓄᑦ ᐃᓅᓯᕐᒥ ᖃᓄᐃᓐᖏᑦᑎᐊᕆᓱᐊᕐᓂᕐᒧᑦ ᐊᒻᒪᓗ ᐃᓚᒋᔭᐅᓪᓗᓂ ᑲᑎᒪᔨᓕᕆᔩᑦ ᑲᑎᒪᔨᖏᓐᓄᑦ.