ᐅᖃᓚᐅᑎᓯᐅᑏᑦ

You are here

ᒥᓂᔅᑕᒨᖓᔪᑦ

ᒪᓕᒐᓕᐅᖅᑎ ᑕᐃᕕᑎ ᐊᕿᐊᕈᖅ

ᑕᐃᕕᑎ ᐊᕿᐊᕈᖅ ᐅᑐᐱᕆ 30, 2017-ᒥᑦ ᓂᕈᐊᖅᑕᐅᓚᐅᖅᐳᖅ, ᓄᓇᕘᓕᒫᒥ ᓂᕈᐊᖅᑎᓪᓗᒋᑦ ᒪᓕᒐᓕᐅᖅᑎᐅᖃᑕᐅᔪᓄᑦ ᒪᓕᒐᓕᐅᕐᕕᖕᒥ ᓄᓇᕗᒻᒥ ᖁᑦᑎᒃᑐᕐᒧᑦ. ᓄᕕᐱᕆ 21, 2017-ᒥᑦ, ᑎᓕᔭᐅᓚᐅᖅᐳᖅ ᒥᓂᔅᑕᒧᑦ ᑮᓇᐅᔭᓕᕆᔨᒃᑯᓐᓄᑦ, ᒥᓂᔅᑕ ᑲᒪᒋᔭᓕᒃ ᐃᖅᑲᓇᐃᔭᖅᑎᑦ ᐊᑦᑕᕐᓇᖅᑐᓂᒃ ᓇᓪᓕᐅᒃᑯᒫᓂᒡᓗ ᖃᐅᔨᓴᖅᑎᓄᑦ, ᒥᓂᔅᑕ ᑲᒪᒋᔭᓕᒃ ᐃᒥᐊᓗᓕᕆᔨᕐᔪᐊᒃᑯᓐᓄᑦ ᐊᒻᒪ ᒥᓂᔅᑕ ᑲᒪᒋᔭᓕᒃ ᐃᒥᐊᓗᒃᑖᕈᓐᓇᐅᑎᓕᕆᔨᑦ ᑲᑎᒪᔨᖏᓐᓄᑦ.

ᐅᒃᐱᕈᓱᒃᐳᖅ ᐱᓕᕆᔭᕆᐊᖃᕐᓂᖏᓐᓂᒃ ᐃᓄᐃᑦ ᖃᐅᔨᒪᔭᖏᓐᓂᒃ ᐃᓕᖅᑯᓯᑐᖃᖏᓐᓂᒡᓗ ᑐᙵᕕᖃᖅᑐᓂᑦ, ᐊᒻᒪ ᐊᑐᖃᑦᑕᕐᓗᑎᒃ ᐃᓄᐃᑦ ᖃᐅᔨᒪᔭᖏᓐᓂᒃ ᐱᒻᒪᕆᐅᒋᔭᖏᓐᓂᒡᓗ ᐋᖅᑭᒋᐊᕈᑎᒃᓴᓂᒃ ᕿᓂᖅᑎᓪᓗᒋᑦ ᐅᓪᓗᒥ ᐃᓱᒫᓘᑕᐅᔪᓂᒃ ᐊᒃᓱᕈᕐᓇᖅᑐᓂᓪᓗ.

ᑕᐃᕕᑎ ᐃᖅᑲᓇᐃᔮᒥᓂᒃ ᐅᑯᓇᓂ ᐃᓂᖃᓪᓗᐊᑕᖃᑦᑕᖅᓯᒪᕗᖅ ᓄᓇᕗᑦ ᒐᕙᒪᖓᓂ, ᑎᑎᕋᖅᑎᐅᖃᑦᑕᖅᓯᒪᓪᓗᓂᓗ ᒪᓕᒐᓕᐅᖅᑎᑦ ᑲᑎᒪᔨᖏᓐᓄᑦ, ᒥᓂᔅᑕᐅᑉ ᑐᖏᓕᕆᓪᓗᓂᐅᒃ ᐊᕙᑎᓕᕆᓂᕐᒧᑦ, ᒥᓂᔅᑕᐅᑉ ᑐᖏᓕᕆᓪᓗᓂᐅᒃ ᒐᕙᒪᓕᕆᔨᒃᑯᓐᓄᑦ, ᒥᓂᔅᑕᐅᑉ ᑐᖏᓕᕆᓪᓗᓂᐅᒃ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᓐᓄᑦ, ᒥᓂᔅᑕᐅᑉ ᑐᖏᓕᕆᓪᓗᓂᐅᒃ ᐃᓕᖅᑯᓯᓕᕆᔨᒃᑯᓐᓄᑦ, ᐊᒻᒪ ᐊᔾᔨᒌᙱᑦᑐᓂᑦ ᒥᓂᔅᑕᒧᑦ ᑐᖏᓕᕆᔭᐅᒃᑲᓐᓂᖃᑦᑕᖅᓯᒪᓪᓗᓂ.

ᑕᐃᕕᑎ ᐋᔩᖃᑎᒌᒃᑎᓪᓗᐊᑕᐅᓚᐅᖅᐳᖅ ᓄᓇᕗᑦ ᒐᕙᒪᖓᓄᑦ ᓇᖕᒥᓂᖅᓱᕐᓂᕐᒧᑦ ᐋᔩᖃᑎᖃᖅᑎᓪᓗᒋᑦ ᒐᕙᒪᑐᖃᒃᑯᓐᓂ, ᐊᒻᒪ ᓄᓇᕗᑦ ᒐᕙᒪᖓᓄᑦ ᐊᑐᓕᖅᑎᑦᑎᕙᓪᓕᐊᓂᕐᒧᑦ ᑳᑦᑐᓛᒥᒃ ᓄᓇᕗᒻᒥ ᐊᖏᖃᑎᒌᖕᓂᕐᒧᑦ.
ᐃᓚᒋᔭᐅᓚᐅᖅᓯᒪᖕᒥᔪᖅ ᐃᓄᖕᓄᑦ ᐋᔩᖃᑎᒌᒃᑎᓄᑦ ᑲᓇᑕᒥ ᒥᕐᙳᐃᖅᓯᕐᕕᓕᕆᓂᕐᒧᑦ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᓄᓪᓗ ᐊᖏᖃᑎᒌᒍᑎᒧᑦ. ᓇᓗᓇᐃᖅᑕᐅᓯᒪᑦᑎᐊᖅᑐᖅ ᑲᔪᓯᑎᑦᑎᑦᑎᐊᖃᑦᑕᖅᓯᒪᓂᖓᓂᒃ ᐱᓕᕆᖃᑎᒌᒃᑎᑦᑎᓪᓗᓂ ᐊᒻᒪ ᑲᑐᔾᔨᖃᑎᒌᒃᑎᑦᑎᓪᓗᓂ, ᓄᓇᕗᑦ ᒐᕙᒪᒃᑯᓐᓂ ᐊᒻᒪ ᓯᓚᑖᓃᑦᑐᓂᑦ ᐱᓕᕆᖃᑎᒋᔭᖏᓐᓂᒃ.

ᑕᐃᕕᑎ ᓄᓕᐊᖓᓗ, ᑭᐅᕈᓪ, 7-ᓂᒃ ᕿᑐᕐᙵᖃᖅᑑᒃ. ᐊᖑᓇᓱᒃᑎᒻᒪᕆᐅᓪᓗᓂ ᐃᖃᓗᒐᒃᓱᒃᑎᐅᓪᓗᓂᓗ, ᓴᐳᔾᔨᓯᒪᔪᒪᓪᓚᑦᑖᖅᐳᖅ ᐊᕙᑎᑦᑎᓐᓂ, ᐃᒪᕐᒥᒃ ᐊᒻᒪ ᐆᒪᔪᓂᒃ, ᑭᖑᕚᒃᓴᑦᑎᓐᓄᑦ ᐃᑲᔫᑕᐅᖁᓪᓗᒋᑦ ᐊᒻᒪ ᖁᕕᐊᒋᔭᐅᖁᓪᓗᒋᑦ. ᑕᐃᕕᑎ ᐊᐅᓱᐃᑦᑐᒥ, ᓄᓇᕗᒻᒥ ᐱᕈᖅᓴᓚᐅᖅᓯᒪᔪᖅ, ᒫᓐᓇᓕ ᐃᓚᒌᑦ ᐃᖃᓗᖕᓂ ᓄᓇᖃᓕᖅᑐᑦ.