ᐱᖁᑎᖃᕐᓂᕐᒧᑦ ᑖᒃᓰᔭᕈᑎᑦ

ᐊᑎᓕᐅᖅᓯᒪᔪᖃᓐᖏᑦᑐᖅ ᑕᑯᒃᓴᐅᔪᓐᓇᖅᑐᓂᒃ ᑕᕝᕘᓇ.

ᐊᑐᖅᑎᑕᐅᓂᖓ

ᓄᓇᕗᑦ ᒐᕙᒪᒃᑯᖏᑦ ᐊᐅᓚᑦᑎᔨᐅᒻᒪᑕ ᓇᒻᒥᓂᕆᔭᓄᑦ ᓄᓇᓄᑦ ᑖᒃᓰᔭᕈᑎᓂᑦ ᑭᓱᑐᐃᓐᓇᕐᓄᑦ ᑖᒃᓰᔭᕈᑎᓄᑦ, ᑖᒃᑯᐊ ᐃᖃᓗᖕᓂ ᓄᓇᓕᐸᐅᔭᒃᑯᑦ ᐱᖃᑕᐅᙱᑦᑐᑦ. ᐃᖃᓗᓐᓂ ᓇᒻᒥᓂᕆᔭᓄᑦ ᓄᓇᓄᑦ ᑖᒃᓰᔭᕈᑎᓄᑦ, ᔨᓃᕙ ᓯᔅᓚᑦ ᖃᐅᔨᒋᐊᕐᕕᐅᔪᓐᓇᖅᑐᖅ, ᑮᓇᐅᔭᓕᕆᔩᑦ ᑲᒪᔨᖓ ᐅᕗᖓ g.chislett@iqaluit.ca ᐅᕙᓗ ᐅᖄᓚᓗᑎᑦ 979-5610.

ᓄᓇᕗᑦ ᐊᑐᖅᑎᑦᑎᕙᒃᑐᖅ ᐱᖁᑎᒋᔭᐅᔪᓄᑦ ᑖᒃᓰᔭᖅᑎᑦᑎᓂᕐᒥᒃ ᐊᑐᕐᓗᑎᒃ ad-valorem-ᖑᓂᕋᖅᑕᐅᔪᒥᒃ, ᒪᓕᒃᖢᒍ ᖃᔅᓯᑐᕐᓂᕆᔭᖓ ᐱᖁᑎᒋᔭᐅᔫᑉ, ᑖᒃᑯᐊᓗ ᖃᐅᔨᒪᔭᐅᓕᖅᐸᒃᖢᑎᒃ ᖃᔅᓯᐅᓂᕆᔭᖏᑦ ᐳᓴᙳᖅᑎᑕᐅᓪᓗᑎᒃ ᑖᒃᓰᔭᕆᐊᖃᖅᑕᖓᑕ ᐊᑭᖓᑕ. ᑖᒃᓰᔭᕆᐊᖃᖅᑕᖓ ᐊᑭᖓ ᖃᐅᔨᒪᔭᐅᓕᖅᐸᒃᐳᖅ ᐱᖁᑎᒋᔭᐅᔪᑦ ᖃᐅᔨᓴᖅᑕᐅᓪᓗᑎᒃ.

ᖃᔅᓯᑐᖅᑎᑕᐅᓂᖏᑦ ᑖᒃᓰᑦ

ᐅᓇ, Mill rate ᐋᖅᑭᒃᓯᒪᓕᖅᑎᑕᐅᓲᖑᕗᖅ ᐊᕐᕌᒍᑕᒫᑦ ᒥᓂᔅᑕᕆᔭᐅᔪᒥᑦ. ᑖᓐᓇ ᒥᓂᔅᑕ ᐋᖅᑭᒃᓯᒪᓕᖅᑎᑦᑎᔭᕆᐊᖃᓲᖑᕗᖅ ᑭᒃᑯᑐᐃᓐᓇᓄᑦ ᑐᕌᒍᔪᒥᒃ mill rate-ᖑᓂᕋᖅᑕᐅᔪᒥᒃ ᑕᒪᐃᓐᓄᑦ ᐊᑐᓂᑦ ᐱᖁᑎᒋᔭᐅᔪᑦ ᓇᓃᑎᑕᐅᕙᖕᓂᖏᓐᓄᑦ ᑭᒃᑯᑐᐃᓐᓇᓄᑦ ᑖᒃᓰᔭᕐᕕᐅᔭᕆᐊᖃᖅᑐᒥᒃ ᐃᓕᓐᓂᐊᖅᑐᓕᕆᓂᕐᒧᓪᓗ mill rate-ᖑᓂᕋᖅᑕᐅᔪᖅ ᑕᒪᐃᓐᓄᑦ ᖃᐅᔨᓴᖅᑕᐅᓯᒪᔪᓄᑦ ᐱᖁᑎᒋᔭᐅᔪᓄᑦ ᑕᒫᓂ ᑭᒃᑯᑐᐃᓐᓇᓄᑦ ᑖᒃᓰᔭᕐᕕᐅᔭᕆᐊᖃᖅᑐᓄᑦ.

ᐅᑯᐊ  ᓄᓇᕗᒻᒥ ᑖᒃᓰᔭᖅᑎᑦᑎᕙᖕᓂᕐᒧᑦ ᖃᔅᓯᑐᕋᔭᕐᓂᖏᓐᓄᑦ ᑎᑎᕋᖅᓯᒪᔪᑦ ᖃᐅᔨᒋᐊᕐᕕᒋᓗᒋᑦ ᑕᒪᑐᒪᓂ ᐊᕐᕌᒍᒥ ᐱᖁᑎᒋᔭᐅᔪᓄᑦ ᑖᒃᓰᔭᖅᑎᑦᑎᓂᕐᒧᑦ mill rates-ᖑᓂᕋᖅᑕᐅᔪᓄᑦ.

ᖃᐅᔨᒪᔭᐅᓕᕐᓂᖓ ᖃᔅᓯᐅᓂᐊᕐᓂᕆᔭᖓ ᑖᒃᓰᔭᕐᓂᐅᑉ

ᐱᖁᑎᒋᔭᐅᔪᓄᑦ ᑖᒃᓰᔭᖅᑎᑦᑎᓂᖅ ᐊᕐᕌᒍᑕᒫᑦ ᐊᑐᖅᑎᑕᐅᓲᖑᕗᖅ ᐊᖏᕐᕋᒥᓂᒃ ᓇᖕᒥᓂᓕᖕᓄᑦ ᐱᖁᑎᒋᔭᐅᔪᓂᒡᓗ ᓇᖕᒥᓂᓕᖕᓄᑦ. ᐱᖁᑎᒋᔭᐅᔪᓄᑦ ᑖᒃᓰᔭᖅᑎᑦᑎᓂᖅ ᐊᑭᓕᒐᒃᓴᒥᒃ ᖃᐅᔨᒪᔭᐅᓕᖅᐸᒃᑐᖅ ᖃᔅᓯᐅᓂᐊᕐᓂᕆᔭᖓ ᐅᓄᖅᓯᑎᓪᓗᒍ mill rate-ᖓ ᑖᓐᓇᓗ ᐊᖅᑭᒃᓯᒪᓕᖅᑎᑕᐅᕙᒃᖢᓂ ᒥᓂᔅᑕᕆᔭᐅᔪᒧᑦ ᑮᓇᐅᔭᓕᕆᓂᕐᒧᑦ, ᐊᕐᕌᒍᒧᑦ ᖃᐅᔨᓴᖅᑕᐅᓂᖓᒍᑦ ᖃᔅᓯᑐᕐᓂᖓᒍᑦ ᐱᖁᑎᐅᑉ ᐃᓚᖃᖅᖢᓂ ᐱᐅᓯᒋᐊᖅᑕᐅᓂᖏᓐᓂᒃ.

ᑲᑎᑕᐅᕙᓪᓕᐊᓂᖏᑦ ᑖᒃᓰᔭᕈᑕᐅᓯᒪᔪᑦ

ᐱᖁᑎᒋᔭᐅᔪᓄᑦ ᑖᒃᓰᔭᖅᑎᑦᑎᓂᕐᒧᑦ ᐊᑭᓕᒐᒃᓴᐃᑦ ᓇᒃᓯᐅᔾᔭᐅᓲᖑᕗᑦ ᐊᕐᕌᒍᑕᒫᑦ ᐱᖁᑎᓂᒃ ᓇᖕᒥᓂᖃᖅᑎᐅᔪᓄᑦ ᑕᑯᒃᓴᐅᑎᑦᑎᓪᓗᑎᒃ ᑕᒪᑐᒪᓂ ᐊᕐᕌᒍᒥ ᐊᑭᓕᒐᒃᓴᙳᖅᑎᑕᐅᔪᓂᒃ ᑭᖑᓂᑦᑎᓐᓂᓗ ᐱᖁᑎᒋᔭᐅᔪᓄᑦ ᑖᒃᓰᔭᖅᑎᑦᑎᓂᕐᒧᑦ ᐊᑮᑦᑐᕆᔭᐅᔪᓂᒃ. 10,000-ᐸᓘᕗᑦ ᑖᒃᓰᔭᕐᕕᐅᔭᕆᐊᖃᖅᐸᒃᑐᑦ ᐱᖁᑎᒋᔭᐅᔪᑦ ᓄᓇᕗᒻᒥ.

ᐱᓕᕆᔾᔪᑕᐅᕙᒃᑐᑦ

Diamond Municipal Services-ᑯᑦ ᐱᓕᕆᔾᔪᑎᖓᑦ ᖃᕆᑕᐅᔭᒃᑯᑦ ᐊᑐᖅᑕᐅᕙᒃᐳᖅ ᐊᐅᓚᑦᑎᔾᔪᑕᐅᓪᓗᓂ ᓄᓇᕘᑉ ᐱᖁᑎᒋᔭᐅᔪᓄᑦ ᑖᒃᓰᔭᖅᑕᐅᕙᖕᓂᕆᔭᖓᓄᑦ. ᑖᓐᓇ ᐱᓕᕆᐊᒃᓴᖅ ᐱᓯᒪᔾᔪᑕᐅᕙᒃᐳᖅ ᑎᑎᕋᖅᓯᒪᔪᖁᑎᒋᔭᐅᔪᓂᒃ ᑐᓴᖅᑕᐅᔪᒃᓴᓂᒃ ᑕᒪᐃᓐᓄᑦ ᑖᒃᓰᔭᖅᑎᑦᑎᓂᕐᒧᑦ ᑎᑎᕋᕐᕕᐅᕙᓪᓕᐊᕝᕕᒋᕙᒃᑕᖏᓐᓄᑦ ᑕᒪᓐᓇ ᐃᓚᖃᖅᐸᒃᖢᓂ ᑕᒪᐃᓐᓂᒃ ᐱᖁᑎᒋᔭᐅᔪᓄᑦ ᑖᒃᓰᔭᖅᑎᑦᑎᓂᕐᒧᑦ ᐊᑭᓕᐅᑕᐅᕙᒃᑐᓕᒫᓂᒃ, ᖃᔅᓯᑐᕐᓂᐊᕐᓂᖏᓐᓂᒃ ᐊᕐᕌᒍᑕᒫᑦ ᐊᑭᓕᒐᒃᓴᙳᖅᑎᑕᐅᕙᒃᑐᑦ ᒪᓕᒐᑎᒍᓪᓗ ᐅᓂᒃᑲᐅᓯᐅᓯᒪᓂᖏᑦ. ᑖᓐᓇ ᐊᑐᖅᑕᐅᕙᒃᑐᖅ ᑕᕝᕙᑦᑎᐊᖑᒐᓗᐊᕐᒪᖔᑕ ᑕᒪᕐᒥᒃ ᖃᐅᔨᓴᖅᑕᐅᕙᒃᐳᑦ ᑕᖅᑭᑕᒫᑦ ᖃᐅᔨᓴᖅᑕᐅᕙᒃᖢᑎᒃ ᒐᕙᒪᒃᑯᑦ ᑮᓇᐅᔭᓕᕆᓂᕐᒧᑦ ᑐᓴᖅᑕᐅᔪᒃᓴᓄᑦ ᐊᑐᖅᐸᒃᑕᖏᓐᓄᑦ.

ᖃᐅᔨᓴᕐᓃᑦ

ᖃᐅᔨᓴᖅᓯᔪᖃᖅᐸᒃᐳᖅ ᖃᐅᔨᒪᓕᕈᒪᓂᕐᒧᑦ ᓄᓇ ᖃᓄᖅ ᐊᑭᑐᑎᒋᓇᔭᕐᒪᖔᑦ, ᖃᓄᖅ ᓄᓇ ᐱᐅᓯᒋᐊᖅᓯᒪᑎᑕᐅᖕᒪᖔᑦ, ᓅᑎᑕᒃᓴᐃᑦ ᐃᓂᒋᔭᐅᕙᒃᑐᑦ, ᓱᓪᓗᓖᑦ, ᐱᓕᕆᔭᐅᓂᑯᐃᑦ ᓴᕕᒐᐅᔭᐃᓪᓗ ᓴᕕᒐᐅᔭᖃᕐᕕᖏᓪᓗ. ᑕᒪᒃᑯᐊ ᖃᐅᔨᓴᕐᓃᑦ ᐊᑐᕈᓐᓇᖅᐸᒃᐳᑦ ᑭᓯᐊᓂ ᐊᑐᕈᓐᓇᐃᓪᓕᒑᖓᑕ 10 ᐊᕐᕌᒍᐃᑦ ᐊᓂᒍᕌᖓᑕ ᐅᑐᐱᕆ 31 ᑎᑭᐊᓪᓚᓚᐅᖅᑎᓪᓗᒍ ᐅᓪᓗᐊᑕ ᑭᖑᓪᓕᖅᐹᒥᒃ ᖃᐅᔨᓴᖅᑕᐅᕝᕕᒋᓚᐅᖅᑕᖓᑕ ᐅᕝᕙᓘᓐᓃᑦ ᐊᓯᐊᓂᒃ ᖃᐅᔨᓴᕐᓂᕐᒥᒃ ᐱᔭᕇᓯᔪᖄᓪᓚᓚᐅᖅᑎᓪᓗᒍ.

ᐊᑭᓕᐅᑕᐅᔪᑦ ᐃᓇᖏᖅᓯᓪᓗᑎᒃ ᑖᒃᓰᔭᕐᓂᕐᒥᒃ

ᒐᕙᒪᒋᔭᐅᔪᖅ ᑲᓇᑕᒥᐅᓄᑦ ᐱᓯᒪᔪᓐᓃᖅᑎᑦᑎᔪᒪᒃᐸᑕ ᐱᓯᒪᔪᒥᒃ ᒐᕙᒪᑐᖃᒃᑯᑦ ᓄᓇᖁᑖᓂᒃ ᐊᑭᓕᖅᓱᕿᐊᖃᖅᐸᒡᓗᒍ ᐊᑭᓖᖃᑦᑕᕈᓐᓃᖅᑎᑦᑐᒪᓗᒍ ᐱᖁᑎᒋᔭᐅᔪᓄᑦ ᑖᒃᓰᔭᕐᓂᕐᒥᒃ ᓴᖅᑭᑎᑕᐅᔪᕕᓂᕐᓂᒃ ᓇᓕᐊᖕᓂᑐᐃᓐᓇᖅ ᐊᕐᕌᒍᒋᔭᐅᔪᒥ ᐱᔾᔪᑎᖃᕐᓗᓂ ᑖᔅᓱᒥᖓ ᒐᕙᒪᑐᖃᒃᑯᑦ ᓄᓇᖁᑎᒋᔭᖓᓂᒃ, ᐊᑭᓕᐅᑕᐅᔪᒥᒃ ᐃᓇᖏᖅᓯᔪᒥᒃ ᑖᒃᓯᓂᒃ ᐊᖏᖅᑕᐅᔪᖃᑐᐃᓐᓇᕆᐊᖃᖅᐳᖅ ᒥᓂᔅᑕᕆᔭᐅᔪᒥᑦ ᑮᓇᐅᔭᓕᕆᔨᒃᑯᓐᓄᑦ, ᑖᓐᓇ ᒐᕙᒪᑐᖃᒃᑯᓐᓄᑦ ᓄᓇᖁᑎᒋᔭᐅᔪᖅ ᑭᒃᑯᑐᐃᓐᓇᓄᑦ ᑖᒃᓰᔭᖅᑎᑦᑎᔪᓐᓇᕐᓂᕐᒧᑦ ᐃᓂᒦᑉᐸᑦ. ᑖᓐᓇ ᒥᓂᔅᑕ ᑮᓇᐅᔭᓕᕆᔨᒃᑯᓐᓄᑦ ᐱᕙᓪᓕᐊᖃᑦᑕᔾᔮᙱᓚᖅ ᐱᖁᑎᒋᔭᐅᔪᓄᑦ ᑖᒃᓰᔭᕈᑎᓂᒃ ᐊᑭᓕᒐᒃᓴᙳᖅᑎᑕᐅᔪᓂᒃ ᓇᓕᐊᖕᓄᑐᐃᓐᓇᖅ ᐊᕐᕌᒍᒋᔭᐅᔪᓄᑦ ᐱᔾᔪᑎᖃᕐᓗᓂ ᒐᕙᒪᑐᖃᒃᑯᑦ ᓄᓇᖁᑎᖓᓐᓂᒃ ᐊᑭᓖᔾᔪᑎᒃᓴᓂᒃ ᐱᔭᐅᔪᖃᕐᓂᖅᐸᑦ ᐱᔾᔪᑎᖃᕐᓗᓂ ᑖᒃᑯᓂᖓ ᑖᒃᓯᓂᒃ.

ᕿᑐᕐᙱᐅᕐᓂᖓᓄᑦ

ᕿᑐᕐᙱᐅᕈᑕᐅᔪᑦ ᑖᒃᓯᓄᑦ ᐊᑭᓕᕆᐊᓕᖕᓄᑦ ᐃᓚᖓᑕ III ᐊᑖᒍᑦ ᐅᑯᓇ ᐱᖁᑎᒋᔭᐅᔪᓂᒃ ᖃᐅᔨᓴᕐᓂᕐᒧᑦ ᑖᒃᓯᓕᕆᓂᕐᒧᓪᓗ ᐱᖁᔭᕐᓂ ᐃᓚᔭᐅᕙᒃᐳᖅ ᑖᒃᑯᓄᖓ ᑖᒃᓯᓄᑦ ᐊᕐᕌᒍᑕᒫᑦ ᓇᓪᓕᐅᑎᒑᖓᑦ ᐅᓪᓗᐊ ᑖᔅᓱᒪ ᑖᒃᓯᐅᑉ ᐊᑭᓕᖅᑕᐅᔭᕆᐊᖃᕐᓂᖓᑕ.
ᐱᖁᑎᒋᔭᐅᔪᓄᑦ ᑖᒃᓰᑦ, ᕿᑐᕐᙱᐅᕐᓂᕆᔭᖓ ᐊᓯᖏᓪᓗ ᑮᓇᐅᔭᐃᑦ ᐊᑭᓕᖅᓱᖅᑕᐅᔭᕆᐊᓖᑦ ᓲᕐᓗ ᐱᖁᑎᒋᔭᐅᔪᓄᑦ ᑖᒃᓰᔭᕈᑕᐅᓯᒪᓗᑎᒃ ᐅᑯᐊ ᐱᖁᑎᒋᔭᐅᔪᓂᒃ ᖃᐅᔨᓴᕐᓂᕐᒧᑦ ᑖᒃᓯᓕᕆᓂᕐᒧᓪᓗ ᐱᖁᔭᕐᓂ ᕿᑐᕐᙱᐅᖅᑎᑕᐅᕙᒃᐳᑦ ᐋᖅᑭᒃᑕᐅᓯᒪᔪᒧᑦ ᐋᖅᑭᒃᓯᒪᓪᓗᓂ ᑎᑎᕋᖅᓯᒪᓂᖏᓐᓂ ᒪᓕᒋᐊᓕᖕᓂ. ᒫᓐᓇᒃᑯᑦ ᕿᑐᕐᙱᐅᕐᓂᐅᑎᑕᐅᕙᒃᑐᖅ ᐱᖁᔭᐃᑦ ᐊᑖᓃᑦᑐᖅ 18%-ᖑᕗᖅ.

ᐱᓂᕐᓗᖕᓂᕐᒧᑦ ᖃᓄᐃᓕᐅᖅᑕᐅᔭᕆᐊᖃᓕᖅᐸᒃᑐᑦ ᐊᑭᓕᕆᐊᖃᖅᑎᑕᐅᓕᖅᐸᒃᑐᓪᓗ

ᑭᓇᑐᐃᓐᓇᑦᑎᐊᖅ ᒪᓕᙱᑦᑐᖅ ᒪᓕᒋᐊᖃᕋᓗᐊᖅᖢᓂᓗ ᒪᓕᙱᑦᑐᖅ ᑖᔅᓱᒥᖓ ᐱᖁᔭᕐᒥᒃ ᒪᓕᒋᐊᖃᖅᑐᖁᑎᖏᓐᓂᒡᓘᓐᓃᑦ ᐸᓯᔭᒃᓴᐅᑎᑕᐅᓕᖅᐸᒃᐳᖅ ᐱᓂᕐᓗᖕᓂᖓᓄᑦ.

ᐱᓂᕐᓗᖕᓂᐅᕙᒃᑐᑦ

ᑭᓇᑐᐃᓐᓇᑦᑎᐊᖅ ᐸᓯᔭᒃᓴᐅᕙᒃᐳᖅ ᐱᓂᕐᓗᖕᓂᕐᒥᒃ ᐃᒪᓐᓇᐃᒃᑯᓂ:

• ᐱᔮᕆᓗᓂ ᓈᒻᒪᙱᑦᑐᒃᑯᓪᓗ ᐃᓕᓯᒍᓂ ᑲᔪᓯᑎᑦᑎᒍᓂᓘᓐᓃᑦ ᐃᓕᓯᓗᓂ ᐊᑎᕐᒥ ᐃᓅᑉ ᐊᑎᖓᓂᒃ ᖃᐅᔨᓴᖅᑕᐅᔭᕆᐊᓕᖕᓄᑦ ᑖᒃᓰᔭᕆᐊᓕᖕᓄᓪᓘᓐᓃᑦ;
• ᐱᔮᕆᓗᓂ ᐃᓕᓯᒍᓂ ᑲᔪᓯᑎᑦᑎᒍᓂᓘᓐᓃᑦ ᐃᓕᓯᓗᓂ ᐊᑎᕆᔭᐅᙱᑦᑎᐊᖅᑐᒥᒃ ᖃᐅᔨᓴᖅᑕᐅᔭᕆᐊᓕᖕᓄᑦ ᑖᒃᓰᔭᕆᐊᓕᖕᓄᓪᓘᓐᓃᑦ;
• ᐱᔮᕆᓗᓂ ᓈᒻᒪᙱᑦᑐᒃᑯᓪᓗ ᐱᑕᖃᖅᑎᑦᑎᙱᒃᑯᓂ ᑲᔪᓯᑎᑦᑎᒍᓂᓘᓐᓃᑦ ᐱᑕᖃᖅᑎᑦᑎᙱᓐᓂᕐᒥᒃ ᐃᓅᑉ ᐊᑎᐊᓂᒃ ᖃᐅᔨᓴᖅᑕᐅᔭᕆᐊᓕᖕᓂᑦ ᑖᒃᓰᔭᕆᐊᓕᖕᓂᓪᓘᓐᓃᑦ;
• ᐱᔮᕆᓗᓂ ᖃᐅᔨᓴᕐᓂᒃᑯᑦ ᐃᓕᓯᒍᓂᓘᓐᓃᑦ ᖃᐅᔨᓴᖅᑕᐅᔪᒃᓴᒥᒃ ᖃᐅᔨᓴᖅᑕᐅᓯᒫᓂᒃᑐᒧᑦ ᐱᖁᑎᒋᔭᐅᔪᒧᑦ ᑖᓐᓇᓗ ᐊᑭᑭᓗᐊᖅᑎᓪᓗᒍ;
• ᐱᔮᕆᓗᓂ ᐱᙱᒃᑯᓂ ᒪᓕᒍᒪᙱᒃᑯᓂᓘᓐᓃᑦ ᐱᔭᐅᔪᒪᔪᒧᑦ ᖃᓄᐃᓕᐅᖁᔭᐅᔪᒧᓪᓘᓐᓃᑦ ᖃᐅᔨᓴᖅᑎᒥᑦ, ᑲᑎᒪᔨᓂ ᐊᓯᔾᔨᕆᐊᖅᑎᑦᑎᓂᕐᒧᑦ ᑲᑎᒪᔨᙳᖅᑎᑕᐅᓯᒪᔪᓂᓪᓘᓐᓃᑦ; ᐃᒪᓐᓇᓘᓐᓃᑦ
• ᓈᒻᒪᒋᔭᐅᓇᔭᖅᑐᒥᒃ ᐱᔾᔪᑎᖃᑦᑎᐊᙱᓪᓗᓂ, ᒪᓕᒍᒪᙱᑉᐸᑦ ᒪᓕᙱᑉᐸᓪᓘᓐᓃᑦ ᖃᓄᐃᓕᐅᖁᔭᐅᓯᒪᔪᒧᑦ ᓴᖅᑭᑎᑕᐅᔪᕕᓂᕐᒧᑦ ᑲᑎᒪᔨᓂᑦ ᐊᓯᔾᔨᕆᐊᖅᑎᑦᑎᓂᕐᒧᑦ ᑲᑎᒪᔨᙳᖅᑎᑕᐅᓯᒪᔪᓂᓪᓘᓐᓃᑦ.

ᐊᑭᓕᒐᒃᓴᙳᖅᑎᑕᐅᓲᑦ

ᑭᓇᑐᐃᓐᓇᑦᑎᐊᖅ ᐸᓯᔭᒃᓴᕈᖅᑎᑕᐅᓯᒪᔪᖅ ᐱᓂᕐᓗᖕᓂᕐᒧᑦ ᐅᑯᐊ ᐱᖁᑎᒋᔭᐅᔪᓄᑦ ᑖᒃᓰᔭᖅᑎᑦᑎᕙᖕᓂᕐᒧᑦ ᐱᖁᔭᕐᓂ ᐅᑯᐊᓘᓐᓃᑦ ᐱᖁᑎᒋᔭᐅᔪᓄᑦ ᑖᒃᓰᔭᖅᑎᑦᑎᕙᖕᓂᕐᒧᑦ ᐱᖁᔭᕐᓂ ᒪᓕᒋᐊᓕᖕᓂ  ᐸᓯᔭᒃᓴᐅᕙᒃᐳᖅ ᐊᖏᓗᐊᙱᑦᑐᒥᒃ ᐸᓯᔭᒃᓴᓪᓚᑦᑖᙳᖅᑎᑕᐅᓗᓂ ᐊᑭᓕᒐᒃᓴᖅᑖᖅᑎᑕᐅᓗᓂ $1,000 ᐅᖓᑖᓅᑎᑦᑐᖅ ᐃᓄᑐᐃᓐᓇᕐᒧᑦ, $5,000-ᓂᒡᓗ ᑯᐊᐳᕇᓴᐅᒍᓂ, ᑎᒍᔭᐅᓯᒪᓗᓂᓘᓐᓃᑦ 6 ᐅᖓᑖᓅᙱᑦᑐᖅ, ᐊᑭᓖᓚᐅᙱᓐᓂᖓᓄᑦ ᐊᑭᓕᒐᒃᓴᙳᖅᑎᑕᐅᔫᒐᓗᐊᒥᒃ.

ᓇᖕᒥᓂᖁᑎᒋᔭᐅᔪᓄᑦ ᑖᒃᓰᔭᖅᑕᐅᓂᕐᒧᑦ ᐊᑭᓕᒃᓴᑐᖃᑦ ᑎᑎᕋᖅᓯᒪᔪᑦ

ᓇᖕᒥᓂᖁᑎᒋᔭᐅᔪᓄᑦ ᑖᒃᓰᔭᖅᑕᐅᓂᕐᒧᑦ ᐱᔭᐅᔭᕆᐊᖃᓲᑦ ᐊᕐᕌᒍᑕᒫᑦ ᐅᑭᐊᒃᓵᒃᑯᑦ. ᓇᖕᒥᓂᖁᑎᒋᔭᐅᔪᖅ ᐊᑮᑦᑐᖃᖅᑐᖅ ᐊᑭᓕᖅᑕᐅᙱᓐᓂᖅᐸᑕ ᑖᒃᓰᔭᖅᑎᑦᑎᔾᔪᑏᑦ ᔭᓄᐊᕆ 1−ᒥ.

ᓇᖕᒥᓂᖁᑎᒋᔭᐅᔪᓄᑦ ᖃᐅᔨᓴᕐᓂᖅ ᑖᒃᓰᔭᓕᕆᓂᕐᒧᓪᓗ ᐱᖁᔭᖅ ᐱᔭᕆᐊᖃᖅᑎᑦᑎᔪᖅ ᓄᓇᕗᒻᒥ ᒐᕙᒪᒃᑯᑦ ᓴᖅᑭᑎᑦᑎᓗᑎᒃ ᐊᑎᖏᓐᓂᒃ ᓇᖕᒥᓂᖁᑎᒋᔭᐅᔪᓄᑦ ᓇᖕᒥᓂᖃᖅᑎᐅᔪᓄᑦ ᐊᑮᑦᑐᖃᖅᑐᓄᑦ ᑎᑭᓚᐅᙱᑎᓪᓗᒍ ᔪᓚᐃ 31 ᐊᕐᕌᒍᑕᒫᑦ. ᐋᖅᑭᒃᓯᖃᑦᑕᖅᑐᒍᑦ ᓇᐃᒃᓕᒋᐊᖅᓯᒪᔪᒥᑦ ᐊᕕᒃᓯᒪᓂᖏᓐᓂᑦ ᑖᔅᓱᒪ ᑎᑎᕋᖅᓯᒪᔪᑦ ᓄᓇᓕᖕᒥ ᐱᕙᓪᓕᐊᔪᓄᑦ ᑎᑎᖅᑲᓄᑦ, ᐊᒻᒪᓗ ᐱᑎᓪᓗᒋᑦ ᑕᒪᒃᑭᖅᑐᑦ ᐊᑮᑦᑐᑦ ᑎᑎᕋᖅᓯᒪᔪᑦ ᐊᑐᐃᓐᓇᐅᔪᑦ ᐊᑖᓂ:  

ᓇᖕᒥᓂᖁᑎᒋᔭᐅᔪᓄᑦ ᑖᒃᓰᔭᖅᑕᐅᓂᕐᒧᑦ ᐊᑭᓕᒃᓴᑐᖃᑦ ᑎᑎᕋᖅᓯᒪᔪᑦ − ᔪᓚᐃ 2022

ᑖᓐᓇ ᑎᑎᖅᑲᖅ ᑎᑎᕋᖅᓯᒪᔪᖅ ᑕᒪᐃᓐᓂᒃ ᑖᒃᓰᔭᖅᑕᐅᔪᓐᓇᖅᑐᓂᒃ ᓇᖕᒥᓂᖁᑎᒋᔭᐅᔪᓂᑦ ᓯᓚᑖᓂ ᐃᖃᓗᐃᑦ ᐊᑮᑦᑐᖃᖅᑐᓄᑦ ᐊᖏᓂᖅᓴᐅᔪᓂᑦ $10 ᐅᓂᒃᑳᑦ ᐅᓪᓗᖓᓂ. ᑎᑎᕋᖃᑦᑕᙱᑦᑐᒍᑦ ᓇᖕᒥᓂᖁᑎᒋᔭᐅᔪᓄᑦ ᓇᖕᒥᓂᖃᖅᑏᑦ ᐱᒋᐊᕐᐸᑕ ᐊᑭᓖᓂᐊᕐᓂᕐᒧᑦ ᐸᕐᓇᐅᑎᒥᑦ ᓄᓇᕗᒻᒥ ᒐᕙᒪᒃᑯᓐᓄᑦ, ᓇᖕᒥᓂᖃᕐᓂᖅ ᐊᐱᖅᑯᑎᒃᓴᒦᑉᐸᑦ, ᓇᖕᒥᓂᖃᖅᑎᐅᔪᕐᓘᓐᓃᑦ ᐋᖅᑭᒃᓯᒃᐸᑦ ᐅᓐᓂᕐᓗᖕᓂᕐᒥᑦ ᑲᒪᒋᔭᐅᒃᑲᓐᓂᕆᐊᕈᑎᒥᒃᓘᓐᓃᑦ ᐱᔾᔪᑎᒋᓗᒋᑦ ᖃᐅᔨᓴᖅᑕᐅᓂᖏᑦ.

ᐃᓐᓇᕐᓄᑦ ᐃᓄᐃᓪᓗ ᑎᒥᒥᒍᑦ ᐊᔪᕈᑎᖃᖅᑐᑦ ᐱᖁᑎᖏᓄᑦ ᑖᒃᓰᔭᕈᑎᓄᑦ ᐃᑲᔫᑎᑦ

ᐃᓄᐃᑦ ᑎᒥᒥᒍᑦ ᐊᔪᕈᑎᓖᑦ ᐊᒻᒪ ᐃᓐᓇᐃᑦ ᐱᓇᔪᒍᓐᓇᖅᐳᑦ ᐱᖁᑎᓄᑦ ᑖᒃᓰᔭᕈᑎᓄᑦ ᐃᑲᔫᑎᓂᒃ ᑖᒃᓯᓕᕆᓐᓇᖅᓯᒑᖓᑦ ᐃᓚᓕᐅᔾᔭᐅᖁᔭᐅᙱᖦᖢᑎᒃ.

ᐃᓐᓇᐃᑦ 65-ᓂᒃ ᐅᑭᐅᖃᓕᖅᑐᑦ ᐅᖓᑖᓄᓪᓘᓐᓃᑦ ᖃᖓᑐᐃᓐᓇᑦᑎᐊᖅ ᑖᒃᓰᔭᕐᓇᐅᑎᓪᓗᒍ ᐱᓇᔪᒃᑎᓪᓗᒋᑦ ᐊᔪᙱᑎᑕᐅᕗᑦ ᐃᓐᓇᐃᑦ ᐱᖁᑎᖏᓐᓄᑦ ᑖᒃᓰᔭᕈᑎᓄᑦ ᐃᑲᔫᑎᓂᒃ.

ᒥᓂᔅᑕ ᑲᒪᒋᔭᓕᒃ ᑮᓇᐅᔭᓕᕆᓂᕐᒧᑦ ᐱᖃᑕᐅᖏᑎᑦᑎᑐᐃᓐᓇᕆᐊᓕᒃ ᐱᔪᓐᓇᖅᑐᓂ ᓇᖕᒥᓂᕆᔭᐅᔪᓂ ᐃᓐᓇᕐᒧᑦ ᐅᕝᕙᓘᓐᓃᑦ ᑎᒥᒥᒍᑦ ᐊᔪᕈᑎᖃᖅᑐᓂ ᑖᒃᓰᔭᕐᕕᐅᓲᓂ ᐃᓐᓇᐅᔪᖅ ᐅᕝᕙᓘᓐᓃᑦ ᐃᓄᐃᑦ ᑎᒥᒥᒍᑦ ᐊᔪᕈᑎᖃᖅᑐᑦ ᓇᖕᒥᓂᖃᖅᑎᐅᓗᓂ ᐅᕝᕙᓘᓐᓃᑦ ᐃᓚᖓᓂ ᓇᖕᒥᓂᖃᖅᑎᐅᓗᓂ ᐱᔪᓐᓇᖅᑎᑕᐅᔪᓂ ᓇᖕᒥᓂᕆᔭᐅᔪᓂ ᐊᒻᒪ ᓇᒥᒥᐅᑕᐅᓗᓂ.

ᐃᑦᑐᐃᑦ/ᓂᖏᐅᑦ ᐊᒻᒪ ᐃᓄᐃᑦ ᑎᒥᒥᒍᑦ ᐊᔪᕈᑎᓕᖕᓄᑦ ᐱᖁᑎᑦ ᑖᒃᓰᔭᕈᑎᖏᓐᓄᑦ ᐄᑲᔫᑎᓄᑦ ᐱᓇᔫᑎᑦ

ᐃᓐᓇᕐᓄᑦ ᐃᓄᐃᓪᓗ ᑎᒥᒥᑎᒍᑦ ᐊᔪᕈᑎᓕᓐᓄᑦ ᐱᖁᑎᖏᓄᑦ ᑖᒃᓰᔭᐅᑎᓄᑦ ᐃᑲᔫᑏᑦ ᓄᑖᕐᖑᕆᐊᖅᑕᐅᔪᒪᔾᔪᑎ

ᐊᑭᓕᖅᓱᐃᓂᖅ ᓇᖕᒥᓂᖃᕐᓂᕐᒧᑦ ᑖᒃᓰᔭᕈᑎᓂᒃ ᑮᓇᐅᔾᔭᒃᓵᖑᔪᓂᑦ