ᐅᖃᓚᐅᑎᓯᐅᑏᑦ

You are here

ᓄᓇᕗᑦ ᒥᒃᓵᓄᑦ ᐊᐱᖅᑯᑕᐅᒍᔪᑦ

ᓄᓇᕘᒥᓕ ᓯᓚᖓ ᖃᓄᐃᑦᑑᕙ?

ᓄᓇᕗᑦ ᓯᓚᖓ ᐊᔾᔨᒌᒃᐸᙱᒻᒪᑦ ᐊᕐᕌᒎᑉ ᐃᓚᖓᓂ ᐊᒻᒪᓗ ᓇᓃᓐᓂᕐᒧᑦ ᓄᓇᕘᒥ. ᐅᑭᐅᒃᑯᑦ ᐃᒃᑮᕌᓘᓲᖑᓪᓗᓂ, ᓂᒡᓚᓱᖕᓂᖃᖅᐸᒃᑐᖅ -32-ᒦᐸᒃᖢᓂ ᒥᑦᑎᒪᑕᓕᖕᒥ ᐊᒻᒪᓗ -27-ᒦᐸᒃᖢᓂ ᐃᖃᓗᖕᓂ. ᐊᐅᔭᒃᑯᑦ ᐅᖅᑰᔫᒥᓲᖅ ᐅᖅᑰᓂᖃᕈᓐᓇᖅᐸᒃᑐᖅ 11-ᒥᒃ ᖁᑦᑎᖕᓂᓕᖕᒥᒃ ᖃᒪᓂ'ᑐᐊᕐᒥ ᔪᓚᐃᒥ 6-ᒥᑉᐸᒃᑭᓪᓗᓂ ᓴᓂᕋᔭᖕᒥ. ᐱᕙᒌᔭᖅᓯᒪᕙᒡᓗᓂ ᐊᑲᐅᕗᖅ ᓯᓚ ᐊᓯᔾᔨᖅᓴᕋᐃᑎᓪᓗᒍ ᓄᓇᕘᒧᖓᐅᓂᐊᕐᓗᓂ ᐅᕝᕙᓘᓐᓃᑦ ᓄᓇᖃᕐᕕᒋᓂᐊᕐᓗᒍ.

                                                   ᐅᑯᓇᙵᑦ: ᐊᕙᑎᓕᕆᔨᒃᑯᑦ ᑲᓇᑕᒥ. ᑲᓇᑕᒥ ᓯᓚᒧᑦ ᓇᓗᓇᐃᖅᓯᔾᔪᑕᐅᕙᒃᑐᑦ ᐊᒻᒪᓗ ᖃᐅᔨᔭᐅᔪᒪᕙᒃᑐᑦ ᑐᖅᑯᖅᑕᐅᓯᒪᕗᑦ. ᑲᓇᑕᒥ ᓯᓚᐅᑉ ᖃᓄᐃᓐᓂᕆᕙᒃᑕᖏᑦ ᐅᕝᕙᓘᓐᓃᑦ ᑕᐃᒪᐃᒐᔪᒃᑐᑦ 1971-ᒥᑦ -2000-ᒧᑦ.

 

ᓄᓇᕘᒥ ᐃᓄᒋᐊᖕᓂᐅᔪᑦ ᐊᒻᒪ ᓇᒧᙵᖅᐸᓪᓕᐊᓂᕆᔭᐅᔪᑦ ᖃᓄᐃᓕᖓᕙᑦ?

ᐃᓄᒋᐊᖕᓂᐅᔪᑦ ᓄᓇᕘᒥ ᐊᐃᕆᓕ 1, 2013-ᒧᑦ ᑎᑭᖢᒍ, ᐃᒫᓇ ᐅᓄᖅᑎᒋᓚᐅᖅᑐᑦ 34,023-ᖑᖅᓯᒪᓪᓗᑎᒃ ᐃᓄᖏᑦ (ᑭᒡᓕᓯᓂᐊᖅᑏᑦ ᑲᓇᑕᒧᑦ). ᑖᑯᓇᓂ ᐃᓄᒋᐊᖕᓂᐅᔪᓂ, 84 ᐳᓴᓐ ᐃᓄᓪᓚᑦᑖᖑᓪᓗᑎᒃ. ᓄᓇᕗᑦᑕᐅᖅ ᓄᑲᖅᖠᕐᓂᒃ ᐃᓄᒋᐊᖕᓂᖃᕐᒥᔪᑦ-ᕿᑎᐊᓃᓐᓂᖅᓴᐅᔪᑦ ᐅᑭᐅᓖᑦ ᓄᓇᖃᖅᑐᑦ ᓄᓇᕘᒥ ᔪᓚᐃ 1, 2012-ᒥ 24.7-ᖑᕗᖅ ᑕᑯᙳᐊᖅᖢᒋᑦ ᑲᓇᑕᒥ ᐅᑭᐅᓖᑦ 40-ᓂᒃ.

 

ᐃᓕᑦᑎᒃᑲᓐᓂᕈᒪᒍᕕᑦ, ᓄᓇᕗᑦ ᑭᒡᓕᓯᓂᐊᖅᑎᒃᑯᑦ ᐃᑭᐊᖅᑭᕕᐊᓄᐊᕐᓗᑎᑦ: www.stats.gov.nu.ca

ᐅᑯᓇᙵᑦ: ᑭᒡᓕᓯᓂᐊᖅᑏᑦ ᑲᓇᑕᒧᑦ. ᓴᖅᑭᑕᐅᔪᑦ051-0005 – ᒥᒃᓴᐅᑕᐅᓯᒪᔪᑦ ᐃᓄᒋᐊᖕᓂᐅᔪᑦ, ᑲᓇᑕᒥ, ᐊᕕᒃᑐᖅᓯᒪᔪᓂ ᐊᒻᒪᓗ ᓄᓇᕘᒥ, ᐊᕐᕌᒎᑉ ᐃᓚᐃᓐᓇᖓᓂ (ᐃᓄᐃᑦ), CANSIM (ᑐᖅᑯᖅᓯᓯᒪᕝᕕᖓᑦ). (ᐱᕝᕕᐅᔪᑦ: 2013-07-30)

 

ᐅᑭᐅᒃᑯᑦ ᑖᖏᓐᓇᐅᔭᖅᐹ ᐊᒻᒪ ᐊᐅᔭᒃᑯᑦ ᖃᐅᒪᐃᓐᓇᐅᔭᖅᖢᓂ?

ᑭᐅᔾᔪᑎ ᑕᑎᖃᖅᐳᖅ ᓇᓂ ᓄᓇᖃᕐᓂᐅᔪᓂᒃ. ᐊᐅᓱᐃᑦᑐᒥ, ᓄᓇᕘᒥ ᖁᑦᑎᖕᓂᖅᐹᖅ ᓄᓇᓕᒃ, ᐃᑲᕐᕋᓂᒃ 24-ᓂᒃ ᖃᐅᒪᓲᑦ ᔫᓂᒥ ᐊᒻᒪᓗ 24-ᓂᒃ ᐃᑲᕐᕋᓂᒃ ᑖᓲᖑᓪᓗᑎᒃ ᑎᓯᐱᕆᐅᓕᕌᖓᑦ. ᓂᒋᖅᐸᓯᖕᓂᖅᓴᐅᔪᑦ ᓄᓇᓖᑦ ᖃᐅᒪᓂᖅᓴᐅᕙᒃᖢᑎᒃ ᐅᑭᐅᒃᑯᑦ ᐊᒻᒪᓗ ᑖᕐᓂᖅᓴᐅᕙᒃᖢᑎᒃ ᐊᐅᔭᒃᑯᑦ. ᐆᒃᑑᑎᒋᓗᒍ, ᑎᓯᐱᕆ 21-ᒥ ᓇᐃᓛᖑᕗᖅ ᐅᓪᓗᖅ ᐊᕐᕌᒍᒥ, ᓄᓇᓖᑦ ᓄᓇᓕᐸᐅᔭᕐᒥ ᐃᖃᓗᖕᓂ ᑕᐅᑐᒍᓐᓇᓲᑦ ᓯᕿᓂᖅ ᓴᖅᑭᓕᖅᑎᓪᓗᒍ ᐅᓪᓛᒃᑯᑦ 9:30-ᒥ ᐊᒻᒪᓗ ᓂᐱᓕᖅᐸᒃᐳᖅ ᐅᓐᓄᐊᒃᑯᑦ 1-ᒥ.

 

ᐃᓚᖏᓐᓄᑦ ᐃᓄᖕᓄᑦ ᓱᖏᐅᑎᔭᐅᓇᓱᒋᐊᖃᓲᖑᕗᑦ ᖃᐅᒻᒪᒃᑕᕐᓃᑦ ᑖᖅᓯᑦᑕᕐᓃᓗ ᐅᑭᐅᑉ ᐃᓚᖓᓂ. ᑭᓯᐊᓂᓕ, ᐃᑲᔫᑎᑕᖃᕈᓐᓇᖅᑐᖅ ᐃᓕᖕᓄᑦ ᑕᒪᑐᒧᖓ. ᕙᐃᑕᒥᓐᔅᓂᒃ ᐱᖃᑦᑕᕈᕕᑦ ᖃᓄᐃᖏᓐᓂᖅᓴᐅᔪᓐᓇᖅᐳᑎᑦ ᖃᐅᒪᓂᕐᒧᑦ ᐃᑲᕐᕋᐅᔪᓄᑦ ᑕᓗᓯᒪᕙᒡᓗᑎᑦ ᖃᐅᒪᓗᐊᕐᓂᐊᖏᒻᒪᑦ ᓯᓂᒋᐊᖃᓕᕌᖓᕕᑦ ᐊᐅᔭᒃᑯᑦ.

 

 

ᐃᒡᓗᖃᕆᐊᖃᕐᓂᕐᓕ ᖃᓄᐃᑦᑑᕙ ᓄᓇᕘᒥ? ᐃᓄᐃᑦ ᐃᒡᓗᒥᐅᑕᐅᖃᑦᑕᖅᐹᑦ?

ᒪᓕᖏᖔᖅᖢᓂ ᐅᒃᐱᕆᔭᐅᕙᒃᑐᒥᒃ, ᐃᓄᐃᑦ ᓄᓇᕘᒥ ᐃᒡᓗᓃᑉᐸᒍᓐᓂᖅᑐᑦ-ᑖᓐᓇ ᐃᒡᓗ ᐅᖃᐅᓯᖅᑕᖅ ᐅᕙᑦᑎᒋᔭᒧᑦ ᐱᒐᓗᐊᖅᑎᓪᓗᒍ. ᐃᓄᐃᑦ ᐃᒡᓗᕐᔪᐊᓂᕐᒥᐅᑕᐅᓕᖅᑐᑦ, ᐃᒡᓗᕐᔪᐊᓂ ᐊᖏᔪᓂ ᐊᒻᒪᓗ ᑲᑎᖕᒐᐅᖅᑐᓂ ᖁᓕᕇᓂ. ᐊᐅᔭᒃᑯᑦ, ᐊᒥᓱᑦ ᑐᐱᕐᓃᖓᕈᒪᕙᒃᑐᑦ ᓄᓇᒥ.

 

ᖃᓄᕐᓕ ᓄᓇᕘᒧᐊᕋᔭᕋᒪ ᑕᐅᕙᓂᓗ ᓇᒧᖓᐅᕙᒡᓗᖓᐅᓇᔭᕐᒪᑦ? ᐊᖁᑦᑐᓐᓇᖅᐳᖔ ᓄᓇᕘᒧᑦ?

 

ᐊᖅᑯᑎᑕᖃᐅᙱᑦᑐᖅ ᐊᑕᔪᓂᒃ ᓄᓇᓕᒐᓚᖕᓄᑦ ᓄᓇᕘᒥ. ᐊᑐᖅᑕᐅᒐᔪᓛᖅ ᓇᒧᙵᐅᔭᕆᐊᖃᖅᖢᓂ ᖃᖓᑕᓲᑦ. ᑎᓴᒪᐅᔪᑦ ᓄᓇᓕᐸᐅᔭᕐᒧᐊᖅᑕᖅᑐᑦ ᓄᓇᕘᒥ ᐅᑯᐊᖑᔪᑦ: ᒪᓐᑐᕆᐊ, ᐋᑐᕚ, ᐅᐃᓂᐲᒡ ᐊᒻᒪᓗ ᐃᐊᑦᒪᓐᑕᓐ. ᐊᒻᒪᑦᑕᐅᖅ ᖃᖓᑕᓲᖃᓲᖑᖕᒥᔪᖅ ᓅᒃᒧᑦ, ᐊᑯᑭᑦᑐᕐᒥᐅᓄᑦ ᐊᐅᔭᒃᑯᑦ.

 

ᖃᐅᔨᒃᑲᓐᓂᕈᒪᓗᓂ ᖃᖓᑕᔭᕆᐊᖃᕐᓂᕐᒧᑦ ᓄᓇᕘᒥ ᖃᐅᔨᒋᐊᕈᓐᓇᖅᐳᑦ ᓄᓇᕘᒥ ᐳᓚᕋᖅᑐᓕᕆᔨᒃᑯᑦ ᐃᑭᐊᖅᑭᕕᐊᒍᑦ:

 

http://www.nunavuttourism.com

 

 

ᓄᓇᕘᒥᓕ ᓇᓕᐊᖕᓂᒃ ᐅᖃᐅᓯᖅᑕᓂᒃ ᐊᑐᓲᖑᕙᑦ ᐅᖃᓪᓚᓕᕌᖓᒥᒃ?

ᓄᓇᕘᒥ ᐃᓕᓴᕆᔭᐅᓯᒪᔪᑦ ᐅᖃᓯᖅᑕᑦ ᐃᓄᒃᑑᖅᑐᑦ (ᐃᓄᒃᑐᑦ ᐊᒻᒪ ᐃᓄᐃᓐᓇᖅᑐᑦ), ᖃᓪᓗᓈᑎᑐᑦ ᐊᒻᒪᓗ ᐅᐃᕖᑎᑐᑦ. ᐃᓄᒃᑐᑦ ᐅᖃᓪᓚᒍᓯᖅ ᐅᖃᐅᓯᖅᑕᐅᔪᖅ 83 ᐳᓴᖏᓐᓂᑦ ᐃᓄᒋᐊᖕᓂᐅᔪᑦ ᓄᓇᕘᒥ (ᐅᖃᐅᓯᕐᓄᑦ ᑲᒥᓯᓇ ᐅᖃᐅᓯᓕᕆᔨᒃᑯᓐᓂ). ᐅᖃᓪᓚᒍᓐᓇᙱᒃᑯᕕᑦ ᐃᓄᒃᑐᑦ ᐅᕝᕙᓘᓐᓃᑦ ᐃᓄᐃᓐᓇᖅᑐᑦ, ᐅᖃᓪᓚᒍᓐᓇᕋᔭᕐᒥᔪᑎᑦ ᖃᓪᓗᓈᑎᑐᑦ; ᐅᖃᐅᓯᖅᑕᕆᔭᐅᔪᖅ ᐊᒥᓱᓂᑦ ᓄᓇᕘᒥ. ᐊᒻᒪᑦᑕᐅᖅ ᐅᐃᕖᑎᑐᑦ ᐅᖃᐅᓯᓖᑦ ᐊᒥᓲᖕᒥᔪᑦ ᓄᓇᕘᒥ ᓄᓇᓕᐸᐅᔭᕐᒥ, ᐃᖃᓗᖕᓂ.

 

ᐅᑯᓇᙵᑦ: ᓄᓇᕘᒥ ᐅᖃᐅᓯᕐᓄᑦ ᑲᒥᓯᓇᐅᑉ ᑎᑎᕋᕐᕕᐊᓂᑦ. ᓄᓇᕘᒥ ᐃᓕᓴᕆᔭᐅᓯᒪᔪᑦ ᐅᖃᐅᓯᖅᑕᑦ. n.d. 30 ᔪᓚᐃ 2013.

ᑭᒡᓕᓯᓂᐊᖅᑏᑦ, ᓄᓇᕘᒥ ᐊᐃᕆᓕ 1, 2013-ᒥᑦ ᐊᐅᒍᓯ 29, 2013-ᒧᑦ.

 

 

ᖃᓄᖅ ᐊᔾᔨᒌᙱᑎᒋᕙᒃ ᐊᕕᒃᑐᖅᓯᒪᐅᖅᑐᑦ ᓄᓇᐃᑦ ᐊᒻᒪᓗ ᓄᓇᕗᑦ?

 

ᓄᓇᑦ, ᓲᕐᓗ ᓄᓇᕗᑦ, ᐱᔪᓐᓇᐅᑎᖃᕐᒪᑕ ᑲᓇᑕᒥ ᒐᕙᒪᒃᑯᓐᓂᑦ, ᑕᐅᑐᒃᖢᒋᑦ ᐊᔾᔨᒌᙱᓐᓂᖏᑦ, ᐊᕕᒃᑐᖅᓯᒪᐅᖅᑐᑦ ᒐᕙᒪᐃᑦ ᐱᔪᓐᓇᐅᑎᖃᖅᑎᑕᐅᖕᒪᑕ ᐃᓕᓯᒪᕙᒌᖅᑐᓂᒃ ᑲᓇᑕᒥ ᐱᖁᔭᕐᔪᐊᒃᑯᑦ. ᓄᓇᕗᑦ ᐱᖃᑦᑕᕐᒥᔫᒐᓗᐊᑦ ᐃᓚᐃᓐᓇᖓᓂᒃ ᑮᓇᐅᔭᑎᒍᑦ ᐃᑲᔫᑕᐅᔪᓂᒃ ᑲᓇᑕᒥ ᒐᕙᒪᒃᑯᓐᓂᑦ.

 

ᐃᓕᑦᑎᒃᑲᓐᓂᕈᒪᓗᓂ ᑕᒪᑐᒪ ᐊᔾᔨᒌᖏᓐᓂᐅᔪᑦ ᓄᓇᐃᑦ ᒥᒃᓵᓄᑦ, ᑕᑯᒋᐊᕐᓗᒍ ᑲᓇᑕᒥ ᒐᕙᒪᒃᑯᑦ ᒐᕙᒪᐅᖃᑎᒌᙱᑦᑐᑦ ᐱᓕᕆᐊᖏᑦ ᓇᓗᓇᐃᖅᑕᐅᓯᒪᔪᑦ ᐅᕙᓂ:

 

http://www.pco-bcp.gc.ca /aia/index.asp?lang=eng&page=provterr&sub=difference&doc=difference-eng.htm

 

ᑭᓱᓪᓗᐊᑕᕐᓂᒡᓕ ᑮᓇᐅᔭᒃᓴᐅᑎᖃᕋᓱᒃᐸᒃᐸᑦ ᓄᓇᕘᒥ?

ᑮᓇᐅᔭᒃᓴᕋᓲᑎᓪᓗᐊᖑᕙᒃᑐᑦ ᓄᓇᕘᒥ ᓴᓇᐅᒃᑲᓂ ᓂᐅᕈᑎᖃᕐᓂᒃᑯᑦ, ᐃᖃᓗᒐᓱᖕᓂᖅᑎᒍᑦ ᐊᒻᒪ ᐊᖑᓇᓱᖕᓂᒃᑯᑦ ᐊᒻᒪᓗ ᒥᑭᒋᐊᕐᓂᐊᕐᓂᒃᑯᑦ. ᓄᓇᕗᑦ ᖃᐅᔨᒪᔭᐅᖕᒪᑦ ᓄᓇᕐᔪᐊᕐᒥ ᓴᓇᐅᒃᑲᓕᐅᖅᐸᒃᑐᑦ ᑎᑎᖅᑐᒐᕐᓂᒃᑯᑦ ᐊᒻᒪᓗ ᓴᓇᙳᐊᒐᕐᓄᑦ. ᐅᔭᕋᖕᓂᐊᒐᒃᓴᓂᒃ ᓄᓇᒥᙶᖅᑐᓂᒃ ᕿᓂᕐᓃᑦ ᐊᒻᒪᓗ ᐅᔭᕋᖕᓂᐊᕐᓂᐅᔪᑦ ᐱᕙᓪᓕᐊᖕᒪᑕ ᑮᓇᐅᔾᔭᓴᐅᑎᖃᕋᓱᖕᓂᕐᒧᑦ, ᑭᓯᐊᓂ ᐊᑭᑐᔪᒥ ᓇᒧᙵᐅᔭᕆᐊᖃᕐᓃᑦ ᓄᓇᕘᒥ, ᐊᒃᓱᕈᕐᓇᖅᑑᕗᑦ. ᓄᓇᕗᑦ ᐃᖃᓗᖃᓲᑦ ᓂᐅᕈᑎᒃᓴᐅᔪᓂᒃ, ᖃᓕᕋᓖᑦ ᐊᒻᒪᓗ ᑭᖑᒃᐸᖕᓄᑦ ᐱᓕᕆᕕᐅᔪᓂᒃ. ᐃᒪᖃᑦᑎᐊᖅᑎᓪᓗᒍ ᓄᓇᕗᑦ ᖃᐅᔨᓴᖅᑕᐅᓯᒪᐅᖏᑦᑐᓂᒃ, ᓄᓇᕘᒥ ᒐᕙᒪᒃᑯᑦ, ᑮᓇᐅᔭᖃᖅᑎᑕᐅᓪᓗᑎᒃ ᒐᕙᒪᑐᖃᒃᑯᓐᓂᑦ, ᖃᖓᑦᑎᐊᓵᖅ ᐅᒥᐊᕐᔪᐊᖅᑖᓚᐅᖅᑐᑦ ᑲᑎᖅᓱᐃᔪᒪᓪᓗᑎᒃ ᖃᐅᔨᔭᐅᔪᒃᓴᓂᒃ ᐃᒪᕐᒥᐅᑕᓂᒃ, ᐃᓂᒋᕙᒃᑕᖏᓐᓂᒃ, ᐊᒻᒪᓗ ᐅᓄᕐᓂᖏᓐᓂᒃ ᓄᓇᕗᑦ ᐃᒪᖁᑎᖏᓐᓂ. ᐊᖑᓇᓱᖕᓃᑦ ᐊᒻᒪᓗ ᒥᑭᒋᐊᕐᓃᑦ ᑮᓇᐅᔭᓕᐅᕈᑕᐅᓇᓱᒃᐸᒃᑐᑦ ᑮᓇᐅᔭᖃᕈᑕᐅᕙᒃᖢᑎᒃ $40,000,000-ᓂᒃ ᐊᕐᕌᒍᑕᒫᑦ. ᐳᓚᕋᖅᑐᓕᕆᓂᖅ ᐱᕈᖅᐸᓪᓕᐊᑐᐃᓐᓇᕐᒪᑦ ᓄᓇᕘᒥ ᐱᖃᓯᐅᑎᓪᓗᒋᑦ ᐳᓚᕋᖅᐸᒃᑐᑦ ᓇᑭᕈᓘᔭᖅ ᓄᓇᕐᔪᐊᕐᒥ ᓄᓇᕘᓕᐊᕈᒪᕙᒃᑐᑦ ᒥᕐᙳᐃᖅᓯᕐᕕᐅᔪᓄᑦ ᓄᓇᕘᒥ, ᑮᓇᐅᔾᔭᒃᓴᕋᓱᒃᑐᓪᓗ ᐊᖑᓇᓱᒃᑎᑦᑎᓪᓗᑎᒃ ᐊᒻᒪᓗ ᐃᖃᓗᒐᓱᒃᑎᑦᑎᓪᓗᑎᒃ, ᐃᓕᖅᑯᓯᕐᓄᑦ ᐊᒻᒪᓗ ᐱᐅᓂᐊᓗᐊᓄᑦ ᓄᓇᐅᑉ.

 

 

 

ᖃᓄᕆᑦᑐᓂᒡᓕ ᐊᓐᓄᕌᓂᒃ ᓇᒃᓴᕆᐊᖃᕋᔭᕋᒪ ᓄᓇᕘᒧᑦ?

ᐱᒻᒪᕆᐅᕗᖅ ᐅᖅᑰᔪᓂᒃ ᐅᑭᐅᖅᓯᐅᑎᓂᒃ ᐱᓯᒪᒍᕕᑦ ᐊᓃᑲᑕᖕᓂᐊᕈᕕᑦ ᐱᓗᐊᙳᐊᖅᖢᓂ ᔭᐸᖃᕆᐊᖃᕐᓂᐊᖅᐳᑎᑦ -40 ᓯᐅᑎᒥᒃ , ᑲᒫᓗᖕᓂᒃ, ᓇᓴᖅ ᐊᒻᒪᓗ ᖁᖓᓯᕈᖅ. ᐊᐅᔭᒥ, ᐊᑐᖃᑦᑕᕈᓐᓇᖅᑐᑎᑦ ᐅᕿᑦᑐᒥᒃ ᔭᐃᑲᖕᒥᒃ. ᐅᔅᓯᒃᑐᓂᒡᓗ ᐱᐅᓇᔭᖅᐳᖅ ᖃᖓᑐᐃᓐᓇᖅᓯᐅᑕᐅᔪᓐᓇᖅᑐᓂᒃ. ᐊᑐᖔᕐᓗᑎᑦ, ᐃᖢᐊᖅᑐᓂᒃ ᐃᓯᒐᐅᔭᖕᓂᒃ ᐊᑲᐅᓇᔭᖅᐳᖅ ᐱᓱᒡᕕᒃᑕᖃᐅᙱᒻᒪᑦ ᐊᖁᑎᑦ ᓴᓂᐊᓂ ᓄᓇᕘᒥ ᐊᒻᒪᓗ ᒪᓂᕋᖅ ᑐᑭᓕᐊᑐᐃᓐᓇᕋᓂ.

 

 

 ᑭᓱᓂᒃ ᓂᐅᕕᕐᓇᖅᑐᖅᑕᖃᐅᖅᐸ ᓄᓇᕘᒥ?

ᓄᓇᕘᒥ ᐊᖏᓂᖅᓴᐅᔪᓂ ᓄᓇᓕᖕᓂ ᓲᕐᓗ ᐃᖃᓗᖕᓂ ᐃᖃᓗᒃᑑᑦᑎᐊᕐᒥ ᐊᒻᒪᓗ ᑲᖏᕐᖠᓂᕐᒥ, ᓇᓕᐊᖕᓄᖓᐅᔪᓇᕐᓂᖅᓴᐅᔪᑦ ᓂᐅᕕᕐᕕᐅᔪᓄᑦ ᓂᕿᓂᒃ ᓂᐅᕕᕆᐊᕐᓂᐊᕐᓗᓂ, ᐃᒡᓗᓯᐅᑎᓂᒃ ᐊᒻᒪᓗ ᐊᓐᓄᕌᓂᒃ. ᒥᑭᓐᓂᖅᓴᐅᔪᓂ ᓄᓇᓕᖕᓂ, ᓂᕈᐊᕐᓇᙱᓐᓂᖅᓴᐅᔪᖅ, ᓂᐅᕕᕐᕕᒃᑕᖃᕋᓗᐊᖅᖢᑎᒃ ᓂᕿᑖᕐᓇᖅᑐᓂᒃ ᐊᒻᒪᓗ ᐊᑐᕆᐊᓕᖕᓂᒃ ᓱᓇᓂᒃ. ᐊᒥᓱᑦ ᓄᓇᕗᒻᒥᐅᑦ ᓂᕿᓂᒃ ᓇᒃᓴᓲᑦ ᐊᒻᒪᓗ ᓇᓂᔭᒃᓴᐅᓗᐊᖅᐸᙱᑦᑐᓂᒃ ᑕᐅᓇᙵᑦ ᖃᓪᓗᓈᓂᑦ ᑲᓇᑕᒥ ᐅᒥᐊᕐᔪᐊᒃᑰᖅᑎᑦᑎᓪᓗᑎᒃ ᓄᓇᓕᖕᓄᐊᓲᓄᑦ ᐊᕐᕌᒍᑕᒫᑦ ᐊᐅᔭᐅᓕᕌᖓᑦ. ᖃᕋᓴᐅᔭᒃᑯᑦᑕᐅᖅ ᑎᑭᓴᐃᔪᓐᓇᕐᒥᔪᑦ, ᐃᓚᖏᑦ ᐊᐅᓪᓚᖅᑎᑦᑎᔪᓐᓇᓲᖑᖕᒪᑕ ᐅᒥᐊᕐᔪᐊᒃᑯᑦ ᓄᓇᕘᒧᑦ.

 

 

ᖃᓄᐃᓕᐅᒐᒃᓴᖅᑕᖃᐅᖅᐹ ᓄᓇᕘᒥ?

ᓄᓇᕗᑦ ᓄᓇᑦᑎᐊᕆᒃᑐᐊᓗᒃ ᓯᓚᒥ ᖃᓄᐃᓕᐅᕈᒪᓗᓂ ᓲᕐᓗ ᐱᓱᔪᒃᓯᒪᓂᐊᕈᒪᓗᓂᒃ, ᖃᔭᖅᑐᕐᓂᐊᕈᒪᓗᓂ, ᓇᓂᓘᓐᓃᑦ ᑕᖕᒫᖅᓯᒪᓂᐊᕐᓗᓂ ᐊᓯᖏᓪᓗ! ᐃᓯᖅᓯᒪᓗᑎᐅᔪᒪᒍᕕᑦ ᑕᐃᒪᑦᑕᐅᖅ ᖃᓄᐃᓕᐅᒐᒃᓴᖅᑕᖃᐅᕈᓐᓇᕐᒥᔪᖅ. ᓄᓇᓖᑦ ᑕᒪᕐᒥᑲᓴᒃ ᓄᓇᕘᒥ ᓯᐊᕆᔮᕐᕕᖃᕐᒪᑕ ᐊᒻᒪᓗ ᐊᓐᓂᑭᑦᑐᕐᕖᑦ. ᐊᕿᔭᕐᓂᖅ ᐊᒻᒪᓗ ᐃᑳᖅᑎᑦᑎᑲᑕᒐᓱᖕᓂᖅ ᐊᖅᓴᕐᒥᒃ ᐱᙳᐊᖅᑕᐅᒍᔪᑦ ᑕᒪᒃᑯᐊ ᐱᙳᐊᕈᓰᑦ ᓄᓇᓕᐸᐅᔭᖅ, ᐃᖃᓗᐃᑦ ᑕᕐᕆᔭᕐᕕᖃᕐᒥᔪᖅ ᓄᑖᓂᒡᓗ ᑕᕐᕆᔭᖅᑎᑦᑎᑲᑕᒃᐸᒃᑐᑦ ᐱᓇᓱᐊᕈᓯᑕᒫᑦ.

 

ᖁᕕᐊᓲᑎᖃᕈᓘᔭᕐᓃᓪᓗ ᑕᐃᒪᐅᖕᒥᔪᑦ ᐊᑐᓂ ᓄᓇᓕᖕᓂ ᖃᓄᐃᓕᐅᕈᑕᐅᓱᑦ ᐊᕐᕌᒍᑕᒫᑦ, ᓲᕐᓗ ᑑᓂᒃ ᑕᐃᒻ ᐊᒻᒪᓗ ᐊᓕᐊᓇᐃᒃᑯᑦ ᖃᓄᐃᓕᐅᖅᑎᑦᑎᔪᑦ ᐃᖃᓗᖕᓂ, ᐊᒻᒪᓗ ᓇᑦᑎᖅ Frolic-ᖑᓂᕋᖅᑕᑦ ᖁᕐᓗᖅᑑᒥ. ᓇᓂᑐᐃᓐᓇᖅ ᓄᓇᓕᖕᓂ ᓄᓇᖃᕈᕕᑦ ᓄᓇᕘᒥ, ᖃᓄᐃᓕᐅᒐᒃᓴᖃᑐᐊᕐᓗᓂ ᑭᓱᓕᕆᔭᒃᓴᖅᑕᖃᐃᓐᓇᐅᔭᕐᓇᖅᑐᖅ.

 

 

ᓄᓇᕘᒥᓕ ᐃᓄᐃᑦ ᓇᓂ ᐃᖅᑲᓇᐃᔭᖃᑦᑕᕐᒪᑕ?

ᓄᓇᕘᒥ ᒐᕙᒪᒃᑯᑦ ᐊᖏᓛᖑᔪᑦ ᐃᖅᑲᓇᐃᔭᕐᕕᐅᓪᓗᑎᒃ. ᐊᒥᓱᑦ ᓄᓇᕘᒥᐅᑦ ᐃᖅᑲᓇᐃᔭᕐᒪᑕ ᐱᖓᓲᔪᓂᒃ ᓴᙱᓕᕇᒃᐸᓪᓕᐊᓗᑎᒃ ᒐᕙᒪᐅᔪᑦ: ᕼᐋᒻᒪᓚᒃᑯᑦ, ᓄᓇᕘᒥ ᒐᕙᒪᒃᑯᑦ ᐊᒻᒪᓗ ᒐᕙᒪᑐᖃᒃᑯᑦ. ᐃᖅᑲᓇᐃᔮᓂᒃ ᓴᖅᑭᑦᑐᖃᖅᐸᓪᓕᐊᕗᖅ ᐅᔭᕋᖕᓂᐊᕐᕕᖕᓂ ᐊᒻᒪᓗ ᐅᔭᕋᖕᓂᐊᒐᒃᓴᓂᒃ ᕿᓂᕐᓂᕐᒥ ᐱᓕᕆᓂᐅᔪᓂ. ᐳᓚᕋᖅᑐᓕᕆᓂᖅᑕᐅᖅ ᐱᕈᖅᐸᓪᓕᐊᕗᖅ, ᐃᓚᖏᑦ ᓄᓇᕗᒻᒥᐅᑦ ᐱᓕᕆᕙᖕᒥᔪᑦ ᖃᐅᔨᒪᔨᑕᐅᓪᓗᑎᒃ ᐊᐅᓚᕈᔾᔨᕙᒃᖢᑎᒃ ᑕᑯᓇᒃᑎᑦᑎᓪᓗᑎᒃ.

 

 

ᖃᓄᕐᓕ ᐊᑯᓂᐅᑎᒋᔪᖅ ᓄᓇᕘᒧᑦ ᐊᖁᓐᓇᕐᒪᑦ?

ᐊᖅᑯᑎᑕᖃᐅᙱᒻᒪᑦ ᓄᓇᓕᖕᓅᖓᐅᖅᑐᓂᒃ ᓄᓇᕘᒥ ᐅᕝᕙᓘᓐᓃᑦ ᖃᓪᓗᓈᓄᑦ ᑲᓇᑕᒥ. ᓄᓇᕘᒥ ᖃᖓᑕᓂᒃᑯᑦ ᑭᓯᐊᓂ ᐱᔪᓐᓇᕐᒪᑕ ᑕᖅᑮᑦ 12 ᐃᓗᐊᓂ ᐊᕐᕋᒍᒥ. ᐅᒥᐊᒃᑯᑦ ᑎᑭᑦᑐᖃᕈᓐᓇᕐᒥᔫᒐᓗᐊᖅ ᐊᐅᔭᒃᑯᑦ ᓇᑭᙶᖅᑐᓂᒃ. ᓄᓇᕗᑦ ᐊᖏᔪᒻᒪᕆᐊᓘᖕᒪᑦ (1.9 ᒥᓕᐊᓐ km2 ᐅᕝᕙᓘᓐᓃᑦ 20ᐳᓴᓐ ᑲᓇᑕᐅᑉ ᓄᓇᖁᑖᑕ ᐊᖏᓂᐊ) ᓄᓇᓕᖃᕐᕕᐅᔪᖅ ᐅᖓᓯᒌᒃᑕᖅᑑᑎᓂᒃ ᓄᓇᕘᒥ, ᐊᖅᑯᑎᑕᖃᐅᕋᓂ ᐅᕝᕙᓘᓐᓃᑦ ᓄᓇᓯᐅᑎᑯᑖᓄᑦ ᐊᖅᑯᑎᑕᖃᖏᑦᑐᖅ.

 

 

ᓇᑭᓪᓕ ᐆᒻᒪᖅᑯᑎᖃᖃᑦᑕᕋᔅᓯ?

 

ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐆᒻᒪᖅᑯᑎᖃᖅᑎᑦᑎᓲᑦ ᓄᓇᕘᒥ, ᓄᓇᕘᒥ ᑯᐊᐳᕇᓴᐅᔪᑦ ᓇᖕᒥᓂᕆᔭᐅᓪᓗᑎᒃ ᓄᓇᕗᑦ ᒐᕙᒪᒃᑯᓐᓂᑦ. ᐊᑐᓂ ᓄᓇᓖᑦ ᐆᒻᒪᖅᑯᑎᖃᐅᑎᖃᓲᑦ ᐅᖅᓱᒨᖅᑐᓄᑦ ᓄᓇᓕᐅᔪᓂ. ᐅᖅᓱᑦ ᐅᒥᐊᕐᔪᐊᒃᑯᑦ ᓄᓇᕗᒻᒧᐊᖅᑕᐅᓲᑦ ᐊᐅᔭᒃᑯᑦ ᐅᑭᐅᓗᒃᑖᒧᑦ ᓈᒪᒃᑎᑕᐅᓯᒪᔪᓂᒃ ᐱᒃᑲᓐᓂᕆᐊᖃᓕᑐᐃᓐᓇᕐᓗᑎᒃ ᐊᕐᕌᒍᒻᒥᒃᐸᑦ.

 

ᓄᓇᕗᑦ ᑕᑎᖃᕋᓗᐊᖅᑎᓪᓗᒍ ᑎᑭᐅᔾᔭᐅᕙᒃᑐᓂᒃ ᐅᖅᓱᓂᒃ, ᓄᓇᕘᒥ ᒐᕙᒪᒃᑯᑦ ᒫᓐᓇ ᕿᓂᖅᐸᓪᓕᐊᕗᑦ ᐊᑐᖔᕈᓐᓇᕋᔭᖅᑐᓂᒃ ᐆᒪᖅᑯᑎᖃᐅᑎᒃᓴᐅᓗᑎᒃ ᓲᕐᓗ ᐃᒪᕐᒨᑐᓄᑦ ᐊᒻᒪᓗ ᓯᕿᓂᒥᑦ ᐊᒻᒪ ᐊᓄᕆᑦᑎᐅᑎᑎᒍᑦ.

 

 

 

ᓇᑭᓪᓕ ᐃᒪᖃᖃᑦᑕᕋᔅᓯ ᓄᓇᕘᒥ?

ᐃᒥᖃᖅᑎᑕᐅᕙᒃᑐᑦ ᕼᐋᒻᒪᓚᐅᔪᑎᒍᑦ ᓄᓇᕘᒥ. ᐊᑐᓂ ᓄᓇᓖᑦ ᓇᖕᒥᓂᖅ ᐃᒥᖅᑕᕐᕕᖃᐅᕐᒪᑕ ᐊᒻᒪᓗ ᑲᒪᒋᔭᐅᕝᕕᖏᓐᓂᒃ ᐃᒪᑦᑎᐊᕙᐅᓕᖅᑎᑎᓂᕐᒧᑦ. ᐃᓚᖏᑦ ᐅᕙᑦᑎᒋᔭᐅᔪᑦ ᓄᓇᕘᒥ ᐃᒪᕐᒧᑦ ᐊᖅᑯᑎᓖᑦ, ᑭᓯᐊᓂ ᐊᒥᓱᑦ ᐃᒥᖅᑕᖅᑕᐅᓪᓗᑎᒃ ᑭᓯᐊᓂ ᐃᒥᖅᑖᖅᐸᒃᑐᑦ ᐃᒥᖅᑕᐅᒻᒧᑦ. ᑕᐃᒪᐃᓗᐊᙳᐊᖅᑐᑦ ᒥᑭᓐᓂᖅᓴᐅᔪᓂ ᓄᓇᓕᖕᓂ.