ᐅᖃᓚᐅᑎᓯᐅᑏᑦ

You are here

ᐊᖏᔪᖅᑲᐅᑎᖏᑦ ᐃᖅᑲᓇᐃᔭᖅᑏᑦ ᐊᓯᔾᔨᖅᑕᐅᔪᑦ

ᔫᓂ 19, 2014

News Release

ᓴᖅᑭᖅᑕᐅᑦᓴᐅᑎᒋᒋᐊᓕᒃ

ᐊᖏᔪᖅᑲᐅᑎᖏᑦ ᐃᖅᑲᓇᐃᔭᖅᑏᑦ ᐊᓯᔾᔨᖅᑕᐅᔪᑦ

ᐃᖃᓗᐃᑦ, ᓄᓇᕗᑦ (ᔫᓂ 19, 2014) - ᓯᕗᓕᖅᑎ ᑕᑉᑑᓇ ᐅᓪᓗᒥ ᓇᓗᓇᐃᖅᓯᖅᑲᐅᔪᖅ ᐊᓯᔾᔨᖅᑕᐅᓂᖏᓐᓂᒃ ᓄᓇᕗᑦ ᒐᕙᒪᒃᑯᖏᑕ ᐊᖏᔪᖅᑲᐅᑎᖏᑦ ᐃᖅᑲᓇᐃᔭᖅᑎᖏᑦ, ᐃᓚᒋᔭᐅᓪᓗᑎᒃ ᑎᒃᑯᐊᖅᑕᐅᓂᖓ ᓄᑖᖅ ᓯᕗᓕᖅᑎᐅᑉ ᑎᑎᕋᖅᑎᖓ, ᓄᖅᑲᕕᓐᓂᖏᓪᓗ ᒥᓂᔅᑕᐅᑉ ᑐᒡᓕᖏᑦ ᒥᓂᔅᑕᐅᓪᓗ ᑐᒡᓕᖏᑕ ᐃᑲᔪᖅᑎᖏᑦ.

ᐱᒋᐊᕐᓗᓂ ᐱᖓᑦᓯᕐᒥ, ᔫᓂ 25, 2014, ᐄᑐᐊᖅ ᐱᑯ ᑎᒃᑯᐊᖅᑕᐅᔪᖅ ᓯᕗᓕᖅᑎᐅᑉ ᑎᑎᕋᖅᑎᖓᓄᑦ ᓯᕗᓕᖅᑎ ᑕᑉᑑᓇᒧᑦ. ᓇᑦᓴᕐᓂᐊᖅᑐᖅ ᐊᖏᔪᐊᓗᓐᓂᒃ ᒐᕙᒪᓕᕆᓂᕐᒧᑦ ᓇᖕᒥᓂᖃᖅᑐᓕᕆᓂᕐᒧᓪᓗ ᖃᐅᔨᒪᓂᕐᒥᓂᒃ ᐃᖅᑲᓇᐃᔮᒥᓄᑦ. ᐱᑯ ᑭᖑᕝᕖᓂᐊᖅᑐᖅ ᓄᖅᑲᓕᖅᑐᒥᒃ ᓯᕗᓕᖅᑎᐅᑉ ᑎᑎᕋᖅᑎᒋᓚᐅᖅᑕᖓᓂᒃ, ᐊᓚᐃ ᐱᐅᕆᐅ.

"ᑎᒃᑯᐊᖅᑕᐅᓂᖓ ᐱᑯ ᐃᓚᒋᐊᑦᓯᐊᕈᑎᒻᒪᕆᐅᔪᖅ ᒐᕙᒪᓕᕆᓂᕐᒧᑦ ᐱᓕᕆᖃᑎᒌᑦᑎᓐᓄᑦ, ᓇᓗᙱᑦᑐᖓᓗ ᐅᑎᕐᓂᖓ ᒐᕙᒪᒃᑯᓐᓄᑦ ᐊᕝᕕᐊᕈᑎᖃᔾᔮᙱᓐᓂᖓᓂᒃ ᒐᕙᒪᓕᕆᓂᕐᒧᑦ ᖃᐅᔨᒪᔭᖃᓪᓚᕆᓐᓂᖓᓄᑦ ᒥᓂᔅᑕᐅᖃᑕᐅᓚᐅᖅᓯᒪᒐᒥ ᓄᓇᕗᒻᒥ ᒪᓕᒐᓕᐅᖅᑎᐅᓯᒪᓪᓗᓂᓗ ᓄᓇᑦᓯᐊᕐᒥ," ᐅᖃᖅᓯᒪᔪᖅ ᓯᕗᓕᖅᑎ ᑕᑉᑑᓇ. "ᐱᐅᕆᐅ ᐃᑲᔪᕐᓂᖃᓪᓚᕆᑦᓯᒪᔪᖅ ᐊᓪᓚᕝᕕᑦᑎᓐᓂ, ᑲᔪᖏᖅᑐᖓᓗ ᐊᑑᑎᒋᒍᓐᓇᕐᓂᐊᕋᑦᑎᒍ ᐱᔨᑦᓯᕋᐅᑎᖏᑦ ᐊᓯᖏᓐᓂ ᐱᔭᑦᓴᖃᕐᓗᓂ ᒐᕙᒪᒃᑯᑦ ᐃᖅᑲᓇᐃᔭᕐᕕᖏᓐᓂ."

ᐱᐅᕆᐅ ᐃᑲᔪᕐᓂᖃᖅᓯᒪᔪᖅ ᑲᔪᓯᑦᓯᐊᖅᓯᒪᓂᖓᓄᑦ ᒐᕙᒪᑖᖅᑲᐅᕗᑦ ᓱᖏᐅᑎᕙᓪᓕᐊᑎᓪᓗᒋᑦ ᑲᔪᓯᑦᓯᐊᕈᑎᖃᖅᓯᒪᓂᖏᓐᓄᓪᓗ ᒐᕙᒪᒃᑯᓐᓂ. ᒐᕙᒪᒃᑯᓐᓂ ᐃᖅᑲᓇᐃᔭᖅᓯᒪᔪᖅ ᓄᓇᕗᒻᒥ, ᓄᓇᑦᓯᐊᕐᒥ ᓄᕙ ᓯᑯᓴᒥᓗ.

ᖄᒃᑲᓐᓂᖓᒍᑦ ᐊᓯᔾᔨᖅᑕᐅᔪᑦ:

• ᑎᒃᑯᐊᖅᑕᖅ ᓗᐊᕆ ᑭᒻᐸᓪ, ᐊᖏᔪᖅᑳᖅ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ, ᐱᒋᐊᑦᓴᐅᑎᒋᓗᓂ. ᒥᔅ ᑭᒻᐸᓪ ᐊᖏᔪᖅᑳᖑᑲᐃᓐᓇᖅᓯᒪᔪᖅ ᓄᕕᐱᕆ 25, 2013-ᒥᓂᑦ. ᐊᕐᕌᒎᓯᒪᔪᓂ ᓯᑕᒪᓂᒃ, ᐃᓂᖃᖅᓯᒪᔪᖅ ᑮᓇᐅᔭᓕᕆᓂᕐᒧᑦ ᐊᖏᔪᖅᑳᖑᓪᓗᓂ ᒫᓐᓇᒫᖑᓚᐅᖅᑐᕐᓗ ᐊᖏᔪᖅᑳᖑᑲᐃᓐᓇᖅᓯᒪᓚᐅᖅᑐᖅ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ. ᒥᔅ ᑭᒻᐸᓪ ᐃᑲᔪᕐᓂᖃᖅᓯᒪᔪᖅ ᕿᒥᕐᕈᐃᑎᓪᓗᒋᑦ ᐱᔭᕇᖅᑕᐅᓯᒪᒋᐊᓕᓐᓂᒃ ᐊᑐᓕᖅᑎᑦᓯᓪᓗᓂᓗ ᐊᓯᔾᔨᖅᑕᐅᔪᓂᒃ ᐊᑦᓱᖏᖅᑕᐅᒋᐊᖁᓪᓗᒋᑦ ᐅᓂᒃᑳᕆᐊᖃᑦᑕᕆᐊᖃᕐᓃᑦ ᑮᓇᐅᔭᓕᕆᓂᕐᒧᓪᓗ ᓵᑕᒃᓴᐅᒋᐊᖃᕐᓂᖏᓐᓂᒃ. ᓇᑦᓴᖅᑐᖅ ᐊᕐᕌᒍᐃᑦ 18 ᐅᖓᑖᓄᑦ ᑮᓇᐅᔭᓕᕆᓂᕐᒧᑦ ᓯᕗᓕᖅᑎᐅᒍᓐᓇᓂᕐᒧᑦ ᐃᖅᑲᓇᐃᔮᒥᓄᑦ.

• ᑎᒃᑯᐊᖅᑕᖅ ᒐᐃᐳᕆᐅᓪ ᓂᕐᓗᖓᔪᖅ, ᒥᓂᔅᑕᐅᑉ ᑐᒡᓕᐊ, ᐊᕙᑎᓕᕆᔨᒃᑯᓐᓄᑦ, ᐱᒋᐊᕐᓗᓂ ᔪᓚᐃ 21, 2014. ᐊᕐᕌᒎᓯᒪᔪᓂᒃ 15-ᓂᒃ, ᓂᕐᓗᖓᔪᖅ ᐃᖅᑲᓇᐃᔭᖅᓯᒪᔪᖅ ᓄᓇᕗᑦ ᑐᙵᕕᒃᑯᓐᓂ. ᐃᖅᑲᓇᐃᔮᕆᕋᑖᖅᓯᒪᔭᖓ ᑐᑭᒧᐊᖅᑎᑦᓯᔨᐅᓂᕐᒧᑦ ᐆᒪᔪᓕᕆᓂᕐᒧᑦ ᐊᕙᑎᓕᕆᓂᕐᒧᓪᓗ, ᓄᓇᕗᑦ ᑐᙵᕕᒃᑯᓐᓂ. ᓴᙱᔫᓪᓗᓂ ᐃᑲᔪᖅᓱᐃᔨᓪᓚᕆᒃ ᓇᓕᒧᒌᑦᑎᑦᓯᓂᕐᒧᑦ ᐊᕙᑎᓕᕆᓂᕐᒥᒃ ᐅᔭᕋᕐᓂᐊᖅᑐᓕᕆᓂᕐᒥᓪᓗ. ᐊᑯᓂᐊᓗᒃ ᐃᖅᑲᓇᐃᔮᖃᖅᓯᒪᔪᖅ ᐱᓕᕆᖃᑎᖃᕐᓂᕐᒧᑦ ᒐᕙᒪᒃᑯᓐᓂ ᐃᓚᐅᖃᑕᐅᒋᐊᓕᓐᓂᓪᓗ ᐊᕙᑎᓕᕆᓂᕐᒧᑦ ᐊᐅᓚᑦᓯᓂᕐᒥᒃ ᐃᖅᑲᓇᐃᔮᒥᑎᒍᑦ ᓄᓇᕗᑦ ᑐᙵᕕᒃᑯᓐᓂ ᐊᐅᓚᑦᓯᔨᒻᒪᕆᐅᓯᒪᓪᓗᓂᓗ ᕿᑎᕐᒥᐅᑦ ᐱᕙᓪᓕᐊᔪᓕᕆᔨᒃᑯᑦ ᑲᑎᒪᔨᖏᓐᓄᑦ.

• ᑎᒃᑯᐊᖅᑕᐅᓂᖓ ᐸᐅᓗᓯ ᓱᕕᒐ, ᒥᓂᔅᑕᐅᑉ ᑐᒡᓕᐊ ᐱᕙᓪᓕᐊᔪᓕᕆᔨᒃᑯᓐᓄᑦ ᐃᖏᕐᕋᔪᓕᕆᔨᒃᑯᓄᓪᓗ, ᐱᒋᐊᕐᓗᓂ ᔫᓂ 30, 2014. ᓱᕕᒐ ᒫᓐᓇᐅᔪᖅ ᒥᓂᔅᑕᒧᑦ ᑐᖏᓕᑦᓴᖅ ᐱᕙᓪᓕᐊᔪᓕᕆᔨᒃᑯᓐᓄᑦ ᐃᖏᕐᕋᔪᓕᕆᔨᒃᑯᓄᓪᓗ. ᓇᑦᓴᕐᓂᐊᖅᑐᖅ ᐊᔾᔨᒌᙱᑦᑐᓂᒃ ᒐᕙᒪᒃᑯᓐᓂ ᓇᖕᒥᓂᖃᖅᑎᐅᔪᓂᓪᓗ ᖃᐅᔨᒪᓂᕐᒥᓂᒃ ᐱᓕᕆᕕᖓᓄᑦ, ᐃᖅᑲᓇᐃᔭᖅᓯᒪᔪᖅ ᐊᖏᔪᖅᑲᐅᑎᐅᖃᑕᐅᓪᓗᓂ ᒐᕙᒪᒃᑯᓐᓂ 2004-ᒥᓂᑦ, ᐃᖅᑲᓇᐃᔭᖅᓯᒪᒻᒥᔪᖅ ᓇᖕᒥᓂᖃᖅᑎᐅᔪᓂ ᐊᕐᕌᒍᕋᓴᕐᓂᒃ. ᓱᕕᒐ ᑭᖑᕝᕖᓂᐊᖅᑐᖅ ᕌᐳᑦ ᓛᖕ, ᒫᓐᓇᐅᔪᖅ ᒥᓂᔅᑕᐅᑉ ᑐᒡᓕᐊ.

• ᔨᒻ ᔅᑏᕙᓐᔅ ᓇᓗᓇᐃᖅᑕᖅ ᒥᓂᔅᑕᐅᑉ ᑐᒡᓕᐊᑕ ᐃᑲᔪᖅᑎᒋᓂᐊᓕᖅᑕᖓ, ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓄᓪᓗ ᐱᒋᐊᕐᓗᓂ ᒪᐃ 12, 2014, ᐃᖅᑲᓇᐃᔭᖅᑎᑦᓴᖅᓯᐅᓚᐅᖅᑎᓪᓗᒋᑦ. ᐱᓕᕆᐊᑦᓴᖃᕐᓂᐊᖅᑐᖅ ᐃᖏᕐᕋᔪᓕᕆᓂᕐᒫᖓᔪᓂᒃ ᐱᓕᕆᕕᖓᓂ. ᑐᑭᒧᐊᖅᑎᑦᓯᔨᐅᓚᐅᖅᑐᖅ, ᒪᑲᓐᔨ ᕚᓕ ᐊᖅᑯᑎᑯᑖᖓᓄᑦ ᐃᖏᕐᕋᔪᓕᕆᔨᒃᑯᓐᓄᑦ, ᓄᓇᑦᓯᐊᕐᒥ. ᐃᖏᕐᕋᔪᓕᕆᓂᕐᒨᖓᔪᓂᒃ ᖃᐅᔨᒪᓂᖃᓪᓚᕆᑦᑐᖅ ᐃᖅᑲᓇᐃᔮᕆᓯᒪᔭᕐᒥᒍᑦ ᒐᕙᒪᒃᑯᓐᓂ ᓇᖕᒥᓂᖃᖅᑎᐅᔪᓂᓗ.

• ᐴᓂ ᒪᑲᐃᓴᒃ ᐃᖅᑲᓇᐃᔮᖅᑖᖅᑐᖅ ᒥᓂᔅᑕᐅᑉ ᑐᒡᓕᐊᑕ ᐃᑲᔪᖅᑎᖓ, ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓂᓪᓗ ᐱᒋᐊᕐᓗᓂ ᐊᒌᓯ 5, 2014, ᐃᖅᑲᓇᐃᔭᖅᑎᑦᓴᖅᓯᐅᓚᐅᖅᑎᓪᓗᒋᑦ. ᒪᑲᐃᓴᒃ ᐱᓕᕆᐊᑦᓴᖃᖅᑎᐅᓛᖅᑐᖅ ᐱᕙᓪᓕᐊᔪᓕᕆᓂᕐᒨᖓᔪᓂᒃ ᐱᓕᕆᕕᖓᓂ. ᒫᓐᓇᐅᔪᖅ ᑐᑭᒧᐊᖅᑎᑦᓯᔨ ᓄᓇᓕᕆᓂᕐᒧᑦ ᐱᕙᓪᓕᐊᔪᓕᕆᓂᕐᒧᓪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓂ ᐊᖏᔪᖅᑳᖑᖃᑕᐅᓯᒪᓪᓗᓂ ᓄᓇᕗᑦ ᒐᕙᒪᒃᑯᖏᓐᓂ ᐃᓄᓕᕆᔨᑐᖃᒃᑯᓐᓂᓗ ᐃᖅᑲᓇᐃᔮᖃᖅᓯᒪᓪᓗᓂᓗ ᐱᕙᓪᓕᐊᔪᓕᕆᓂᕐᒨᖓᔪᓂᒃ ᐊᕐᕌᒍᐃᑦ 30 ᐅᖓᑖᓄᑦ.

"ᓈᒻᒪᓈᖅᑐᓂᒃ ᐊᖏᔪᖅᑲᐅᑎᓂᒃ ᐃᖅᑲᓇᐃᔭᖅᑎᖃᕐᓂᖅ ᐱᒻᒪᕆᐅᓂᖃᖅᑐᖅ ᐊᐅᓚᑦᓯᓂᕐᒧᑦ ᐊᑦᓱᕉᑕᐅᒋᐊᓕᓐᓂᒃ ᑐᕌᒐᑦᑎᓐᓂ ᓯᕗᒧᑦ ᐊᑉᓗᖅᑕ," ᐅᖃᖅᓯᒪᔪᖅ ᓯᕗᓕᖅᑎ ᑕᑉᑑᓇ. "ᐅᒡᒍᐊᖅᑐᒍᑦ ᐊᓐᓇᐃᓂᐊᕋᑦᑕ ᐊᖏᔪᖅᑲᐅᑎᓂᒃ ᐃᖅᑲᓇᐃᔭᖅᑎᑦᑎᓐᓂᒃ ᒐᕙᒪᒃᑯᓐᓂ, ᐊᑯᓂᐊᓗᒃ ᐅᑭᐅᖅᑕᖅᑐᒥᐅᑕᐅᓯᒪᔪᓂᒃ, ᐃᑲᔪᕐᓂᖃᖅᓯᒪᔪᓂᒃ ᓄᓇᕗᒻᒥᒃ ᖃᐅᔨᒪᓂᖃᑦᓯᐊᖅᑐᓂᓪᓗ, ᑲᔪᓯᑦᓯᕈᔾᔭᐅᖁᔭᕗᑦ ᓄᖅᑲᕕᓐᓂᐊᓕᖅᑎᓪᓗᒋᑦ."

ᓄᖅᑲᕕᓐᓂᖏᓐᓂᒃ ᖃᐅᔨᒃᑲᐃᒍᑏᑦ:

• ᕌᐳᑦ ᓛᖕ, ᒥᓂᔅᑕᐅᑉ ᑐᒡᓕᐊ, ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ, ᓄᖅᑲᕕᓐᓂᐊᖅᑐᖅ ᔫᓂ 30, 2014. ᓛᖕ ᒥᓂᔅᑕᒧᑦ ᑐᒡᓕᐅᓯᒪᔪᖅ 2009-ᒥᓂᑦ, ᓄᖅᑲᕕᓐᓂᐊᖅᑐᓂᓗ ᐊᕐᕌᒍᐃᑦ 40 ᐅᖓᑖᓄᑦ ᐃᖅᑲᓇᐃᔮᖃᖅᓯᒪᓪᓗᓂ ᓇᖕᒥᓂᖃᖅᑐᓕᕆᓂᕐᒧᑦ ᐱᕙᓪᓕᐊᑎᑦᓯᓂᕐᒧᑦ ᓄᓇᓕᓐᓂᓗ ᐱᕙᓪᓕᐊᔪᓕᕆᓂᕐᒧᑦ. 

• ᑕᐃᕕᑦ ᓗᐃᑦ, ᒥᓂᔅᑕᐅᑉ ᑐᒡᓕᐊᑕ ᐃᑲᔪᖅᑎᖓ, ᐃᓕᓐᓂᐊᕐᓂᓕᕆᔨᒃᑯᑦ, ᐊᑐᓕᕐᓗᓂ ᔫᓂ 27, 2014. ᓗᐃᑦ ᐃᑲᔪᖃᑕᐅᓯᒪᓪᓚᕆᑦᑐᖅ ᓯᕗᒧᒋᐊᖅᑎᑦᓯᓂᕐᒥᒃ ᐊᖅᑯᑎ ᐃᓐᓇᕐᓄᑦ ᐃᓕᓐᓂᐊᖅᑐᓕᕆᓂᕐᒧᑦ ᐃᓕᓐᓂᐊᕐᕕᐊᓗᒻᒥᑎᑐᑦ ᐸᐃᑉᐹᑖᕈᑎᒧᑦ. ᕿᒪᐃᓂᐊᖅᑐᖅ ᒐᕙᒪᒃᑯᓐᓂᒃ ᐊᕐᕌᒍᐃᑦ 28 ᐃᖅᑲᓇᐃᔭᖅᓯᒪᓪᓗᓂ ᒐᕙᒪᒃᑯᓐᓄᑦ. ᐃᖅᑲᓇᐃᔭᕆᐊᓯᓚᐅᖅᓯᒪᔪᖅ ᐃᓕᓐᓂᐊᖅᑎᑦᓯᔨᐅᓪᓗᓂ ᐃᖅᑲᓇᐃᔮᖃᖃᑦᑕᖅᓯᒪᓪᓗᓂ ᐅᑭᐅᖅᑕᖅᑐᓗᑦᑖᒥ. ᐊᑯᓂᐊᓗᒃ ᐃᓕᓴᐃᔨᐅᓯᒪᔪᖅ ᓄᓇᓕᓐᓂᓗ ᐊᑭᓕᖅᓱᖅᑕᐅᒐᓂ ᐃᑲᔪᖅᑎᐅᓯᒪᓪᓗᓂ ᒪᒃᑯᑦᑐᓄᑦ.

• ᓵᓐᑏ ᑏᒪᓐ, ᒥᓂᔅᑕᐅᑉ ᑐᒡᓕᐊᑕ ᐃᑲᔪᖅᑎᖓ, ᐃᓄᓕᕆᔨᒃᑯᑦ, ᐊᑐᓕᕐᓗᓂ ᔫᓂ 27, 2014. ᒥᔅ ᑏᒪᓐ ᐊᕐᕌᒍᓂᒃ 33-ᓂᒃ ᐃᖅᑲᓇᐃᔭᖅᓯᒪᔪᖅ ᓄᓇᕗᑦ ᒐᕙᒪᒃᑯᖏᓐᓄᑦ. ᐱᓕᕆᖃᑕᐅᓯᒪᓪᓚᕆᑦᑐᖅ ᐱᒋᐊᖅᑎᑕᐅᕙᓪᓕᐊᑎᓪᓗᒍ ᐃᒻᒥᒃᑯᑦ ᐱᓕᕆᕕᖓᑦ ᐃᓄᓕᕆᔨᒃᑯᑦ, ᓯᕗᒧᒋᐊᖅᑎᑦᓯᓯᒪᓪᓗᓂ ᐊᔾᔨᒌᙱᑦᑐᓂᒃ ᐃᖅᑲᓇᐃᔭᖅᑐᓕᕆᓂᕐᒧᑦ ᐊᖏᖃᑎᒌᒍᑎᖏᓐᓂᒃ ᓄᓇᕗᑦ ᑲᓇᑕᓗ. ᑐᑭᒧᐊᖅᑎᑦᓯᔨᐅᓚᐅᖅᓯᒪᔪᖅ ᐃᑲᔫᓯᐊᖅᑐᓕᕆᓂᕐᒧᑦ ᐃᖅᑲᓇᐃᔭᖅᑐᓕᕆᓂᕐᒧᓪᓗ ᐱᓕᕆᐊᓄᑦ ᐊᑯᓂᐊᓗᓪᓗ ᐃᖅᑲᓇᐃᔮᖃᖅᓯᒪᓪᓗᓂ ᐃᓄᓕᕆᓂᕐᒨᖓᔪᓄᑦ.

ᓄᓇᕗᑦ ᒐᕙᒪᒃᑯᖏᑦ ᐃᖅᑲᓇᐃᔭᖅᑎᑦᓴᖅᓯᐅᖏᓐᓇᖅᑐᑦ ᒥᓂᔅᑕᐅᑉ ᑐᒡᓕᖏᓐᓂᒃ ᒥᓂᔅᑕᐃᓪᓗ ᑐᒡᓕᖏᑕ ᐃᑲᔪᖅᑎᖏᓐᓂᒃ. ᖄᒃᑲᓐᓂᖓᒍᑦ, ᒐᕙᒪᒃᑯᑦ ᓯᕗᒧᒋᐊᕈᑎᖃᖅᑐᑦ ᐃᖅᑲᓇᐃᔭᖅᑎᑦᓴᖅᓯᐅᖅᑐᑎᒃ ᐊᓯᖏᓐᓂᒃ ᐊᖏᔪᖅᑲᐅᑎᓂᒃ ᐃᖅᑲᓇᐃᔮᓂᒃ ᐊᑐᖅᑐᑎᒃ ᐃᓚᐃᓐᓈᖅᑕᐃᓕᒍᑎᓂᒃ ᑐᑭᓯᓇᑦᓯᐊᖅᑐᓂᓪᓗ ᐱᓕᕆᔾᔪᓯᖏᓐᓂᒃ.

###

ᐱᕙᓪᓕᐊᔪᓕᕆᔨᓄᑦ ᖃᐅᔨᒋᐊᕐᕕᑦᓴᖅ:

ᔮᔅᒦᓇ ᐱᐸ

ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎᖓ ᓯᕗᓕᖅᑎ ᑕᑉᑑᓇ

ᓄᓇᕗᑦ ᒐᕙᒪᖓ

ᐅᖄᓚᐅᑎᖓ: 867-975-5059

ᖃᕆᓴᐅᔭᒃᑯᑦ: ypepa@gov.nu.ca