ᐅᖃᓚᐅᑎᓯᐅᑏᑦ

You are here

ᒐᕙᒪᒃᑯᑦ ᓄᓇᕗᒻᒥ ᐱᕙᓪᓕᐊᑎᑦᓯᓚᕆᑦᑐᑦ ᐊᑐᖅᑕᐅᖃᑦᑕᖅᑐᓂᑦ ᐅᑎᖅᑎᑦᓯᓂᕐᒧᑦ ᐱᓇᓱᐊᕐᓂᕐᒥᑦ

ᓄᕕᐱᕆ 22, 2019

ᒐᕙᒪᒃᑯᑦ ᓄᓇᕗᒻᒥ ᐱᕙᓪᓕᐊᑎᑦᓯᓚᕆᑦᑐᑦ ᐊᑐᖅᑕᐅᖃᑦᑕᖅᑐᓂᑦ ᐅᑎᖅᑎᑦᓯᓂᕐᒧᑦ ᐱᓇᓱᐊᕐᓂᕐᒥᑦ

ᐃᖃᓗᐃᑦ, ᓄᓇᕗᑦ (ᓅᕙᐃᒻᕙ 22, 2019) - ᒐᕙᒪᒃᑯᑦ ᓄᓇᕗᒻᒥ (GN) ᐅᓪᓗᒥ ᓇᓗᓇᐃᖅᓯᖅᑲᐅᔪᑦ ᖃᕆᑕᐅᔭᒃᑯᑦ ᐅᐊᔭᒨᖅᑐᓂᓪᓗ ᐊᑐᖅᑕᐅᖃᑦᑕᖅᑐᓂᑦ ᐊᑦᑐᖅᑕᐅᓂᖃᓚᐅᖅᑐᓂᑦ ᓅᕙᐃᒻᕙ 2-ᒥ  ᑮᓇᐅᔭᕐᓂᐊᕈᑕᐅᒐᓱᐊᖅᑐᓄᑦ ᖃᕆᑕᐅᔭᒃᑯᑦ ᐊᐅᓚᔪᓐᓇᖅᑐᑦ, ᐱᕙᓪᓕᐊᑎᑦᓯᓚᕆᓐᓂᕐᒧᑦ ᐱᓇᓱᐊᕈᓯᕐᓄᑦ ᖄᖏᑦᑐᓄᑦ. 

“ᐅᖃᕈᒪᔪᖓ ᐆᒻᒪᑎᓐᓃᖔᖅᑐᒥᑦ ᖁᔭᓐᓇᒦᕈᒪᑦᓱᖓ ᐊᒥᓱᓂᑦ ᐃᓄᓐᓂᒃ ᐃᖅᑲᓇᐃᔭᐃᓐᓇᓕᒫᖅᑐᓂᑦ ᓇᓗᓇᐃᖅᓯᓂᕐᒧᑦ ᒐᕙᒪᕗᑦ ᐊᑐᐃᓐᓇᐅᑎᑦᓯᖏᓐᓇᕐᓂᖓᓄᑦ ᐱᒻᒪᕆᐅᔪᒥᑦ ᐱᔨᑦᓯᕋᕐᓂᕐᒧᑦ ᐊᑐᖃᑦᑕᖅᑕᕗᓪᓗ ᐅᑎᖅᑎᑕᐅᓗᑎᒃ ᐊᑐᖅᑕᐅᒍᓐᓇᓕᕐᓗᑎᓪᓗ,” ᐅᖃᖅᑐᖅ ᓯᕗᓕᖅᑎ ᔫ ᓴᕕᑲᑖᖅ. “ᐱᓕᕆᖃᑎᒌᑦ ᐱᒐᓱᐊᕐᓚᕆᑦᓯᒪᔪᑦ, ᐱᓕᕆᐊᑦᓴᖃᑲᓐᓂᑦᑑᒐᓗᐊᑦ ᑲᔪᓯᖏᓐᓇᕈᓐᓇᖅᓯᒪᒐᑦᑕ ᐅᓚᕕᑎᑦᓯᓗᐊᖏᑦᓱᑕ ᓄᓇᕗᒻᒥᐅᓂᑦ ᐊᖏᖅᓯᒪᓂᖃᓪᓚᕆᓐᓂᖏᓐᓂᑦ ᐃᖅᑲᓇᐃᔭᖅᑎᕗᑦ, ᓴᙱᔪᒥᑦ ᐅᐸᓗᖓᐃᔭᖅᓯᒪᔾᔪᑎᓂᑦ ᐱᕙᒌᔭᕐᓂᕐᒧᑦ ᓱᖏᐅᑎᔪᓐᓇᓚᕆᓐᓂᑎᓐᓂᓪᓗ.”

ᐅᓄᖅᑐᐃᑦ ᒐᕙᒪᒃᑯᑦ ᓄᓇᕗᒻᒥ ᐱᓕᕆᕝᕕᖏᑦᑕ’ ᐃᖅᑲᓇᐃᔭᖅᑎᖏᑦ ᐃᖃᓗᓐᓂᑦ ᑲᓲᑎᒍᓐᓇᖅᓯᔪᑦ ᖃᕆᑕᐅᔭᒃᑯᑦ ᐱᔪᓐᓇᕐᓂᖃᓕᖅᓱᑎᓪᓗ ᐃᕿᐊᖅᑭᕕᒃᑯᑦ. ᓄᑖᖅ, ᓴᐳᒻᒥᔭᐅᑦᓯᐊᖅᑐᒥᑦ ᐃᕐᖐᓐᓈᖅᑕᐅᑦ ᐊᑐᖅᑕᐅᖃᑦᑕᖅᑐᑦ ᐋᖅᑭᑦᑕᐅᓯᒪᓕᖅᑐᖅ, ᒐᕙᒪᒃᑯᓪᓗ ᐃᕐᖐᓐᓈᖅᑕᐅᑎᖏᑦᑕ ᑐᕌᕈᑎᖏᑦ ᐊᑐᕈᓐᓇᖅᓯᑲᓐᓂᖅᑐᑦ.  

ᐃᓕᓐᓂᐊᖅᑏᑦ ᐃᓕᓐᓂᐊᕐᕕᓐᓂᑦ ᐱᔪᓐᓇᖅᓯᔪᑦ ᐃᑭᐊᖅᑭᕕᓐᓂᑦ ᐊᖅᑯᑎᖃᕐᓗᑎᒃ ᐃᓕᓐᓂᐊᕐᓂᓕᕆᓂᕐᒧᑦ ᐃᓕᓐᓂᐊᖅᑏᑦ ᖃᕆᑕᐅᔭᖏᑎᒍᑦ ᐱᔪᓐᓇᖅᓱᑎᓪᓗ ᖁᑦᓯᓂᖅᓴᓄᑦ ᐃᓕᓐᓂᐊᕐᕕᒻᒥ ᑎᑎᕋᖅᑕᐅᓯᒪᔪᓂᑦ. ᐃᓕᓐᓂᐊᖅᑏᑦ ᑐᑦᓯᕋᕈᓐᓇᖅᑐᑦ ᑎᑎᕋᖅᑕᐅᓯᒪᔪᓂᑦ ᐅᕙᖓᑦ studenttranscripts@gov.nu.ca ᐊᒻᒪᓗ ᑐᑭᓯᒋᐊᑲᓐᓂᕈᑎᓂᑦ ᐅᕙᖓᑦ https://www.gov.nu.ca/education/information/student-records. 

ᐃᓘᓐᓇᑎᒃ ᐊᑭᓕᐅᑕᐅᔪᑦ ᑐᓂᔭᐅᔪᓄᑦ ᑮᓇᐅᔭᐃᑦ ᐃᑲᔫᓯᐊᕈᑕᐅᓲᑦ ᓄᓇᕗᒻᒥ ᐃᓕᓐᓂᐊᖅᑎᓄᑦ, ᐃᓐᓇᕐᓄᑦ ᐃᓕᓐᓂᐊᖅᑐᓄᑦ ᐃᑲᔪᖅᑐᐃᑦᔪᑏᑦ ᐃᓄᓕᕆᔨᒃᑯᑎᒍᓪᓗ ᐊᖓᔪᖅᑳᕆᔭᐅᔪᓄᑦ ᐱᓕᕆᐊᑦ ᑮᓇᐅᔭᒃᑯᕕᒻᒨᖅᑕᐅᓚᐅᖅᑐᑦ ᓈᒻᒪᓈᖅᓱᑎᒃ.  ᐃᑲᔫᓯᐊᖃᑦᑕᖅᑐᑦ ᐃᖃᓗᓐᓂᑦ ᐱᖃᑦᑕᓕᖅᑐᑦ ᐊᑭᓕᖅᑕᐅᔾᔪᑎᒋᖃᑦᑕᖅᑕᖏᓐᓂᑦ. ᒫᓐᓇᐅᔪᖅ, ᐃᑲᔫᓯᐊᖃᑦᑕᖅᑐᑦ ᓄᓇᓕᓐᓂᑦ ᓯᓚᑖᓂᑦ ᐃᖃᓗᐃᑦ ᐱᖃᑦᑕᖏᓐᓇᕐᓂᐊᖅᑐᑦ ᓂᐅᕕᕈᓐᓇᐅᑎᓂᑦ ᐃᓘᓐᓇᖏᓐᓄᑦ ᐱᔭᕆᐊᖃᖅᑕᖏᓐᓄᑦ.  

ᐃᓘᓐᓇᑎᒃ ᒐᕙᒪᒃᑯᓐᓂᑦ ᓄᓇᕗᒻᒥ ᐃᖅᑲᓇᐃᔭᖅᑏᑦ ᐊᑭᓕᖅᑕᐅᓚᐅᖅᑐᑦ ᐱᓇᓱᐊᕈᓯᐅᓚᐅᖅᑐᒥ ᐱᕙᒌᔭᖅᑕᐅᓯᒪᓱᑎᒃ ᑐᐊᕕᕐᓇᖅᑐᑦ ᐊᑭᓕᖅᑕᐅᔾᔪᑏᑦ ᐊᖏᖃᑎᒌᒍᑎᒃᑯᑦ ᐃᖅᑲᓇᐃᔮᓕᓐᓄᑦ ᐱᖁᑎᖃᖅᑎᑦᓯᔨᓄᓪᓗ ᐊᑭᓕᖅᑕᐅᓯᒪᔪᑦ ᖃᐃᕙᓪᓕᐊᔪᓂᓪᓗ ᐊᖏᖃᑎᒌᒍᑎᒃᑯᑦ ᐃᖅᑲᓇᐃᔮᓕᓐᓄᑦ ᐊᑭᓕᐅᑏᑦ ᑲᔪᓯᖏᓐᓇᕐᓂᐊᖅᑐᑦ. ᒐᕙᒪᒃᑯᑦ ᓄᓇᕗᒻᒥ ᐊᖏᖃᑎᒌᒍᑎᒃᑯᑦ ᐃᖅᑲᓇᐃᔮᓖᑦ ᑐᑭᓯᒋᐊᑲᓐᓂᕈᓐᓇᖅᑐᑦ ᐅᕗᖓ: https://www.gov.nu.ca/finance/news

ᐱᔭᕆᐊᖃᖅᑐᑦ ᐱᔨᑦᓯᕋᕐᓂᕐᒧᑦ ᑲᔪᓯᑎᑕᐅᖃᑦᑕᖅᑐᑦ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓄᑦ ᑲᔪᓯᖏᓐᓇᖅᑐᑦ ᐸᕝᕕᓴᑦᑕᐅᒐᑎᒃ. ᑕᕐᕆᔭᐅᑎᒃᑯᑦ ᐋᓐᓂᐊᕐᕕᒻᒥ ᖃᕆᑕᐅᔭᒃᑯᑦ ᐋᓐᓂᐊᕐᕕᓕᕆᔪᓄᑦ ᐊᑐᖅᑕᐅᖃᑦᑕᖅᑐᑦ ᖃᐅᔨᓴᖅᑕᐅᖏᓐᓇᖅᑐᑦ, ᖃᕆᑕᐅᔭᒃᑰᖅᑎᑕᐅᓚᐅᖅᑎᓐᓇᒋᑦ ᓯᕗᓂᑦᓴᑎᓐᓂᑦ. 

ᓄᓇᓕᓐᓂᑦ ᒐᕙᒪᒃᑯᓐᓂᓪᓗ ᐱᔨᑦᓯᕋᖅᑎᒃᑯᑦ ᐱᓕᕆᐊᖃᖅᐸᓪᓕᐊᓂᐊᖅᑐᑦ ᐱᐅᓯᕚᓪᓕᑎᑦᓯᓂᕐᒥᓪᓗ ᐱᕙᒌᔭᕐᓂᕐᒥᑦ ᐃᓘᓐᓇᖏᓐᓂᑦ ᓄᓇᕗᑦ ᓄᓇᓕᖏᓐᓂᑦ ᐱᓇᓱᐊᕈᓯᐅᓛᖅᑐᒥᑦ, ᑲᓲᑎᑎᑦᓯᑲᓐᓂᕐᓂᕐᒥᑦ ᓄᑖᒧᑦ ᒐᕙᒪᒃᑯᑦ ᓄᓇᕗᒻᒥ ᖃᕆᑕᐅᔭᖓᑎᒍᑦ. ᐱᓕᕆᖃᑎᒌᑦ ᐊᐅᓚᖅᑎᑕᐅᓂᐊᖅᑐᑦ ᐃᓘᓐᓇᖏᓐᓄᑦ ᐱᖓᓱᓄᑦ ᐊᕕᑦᑐᖅᓯᒪᔪᓄᑦ ᑕᒪᒃᑮᓐᓂᑦ ᑕᒪᒃᑮᓐᓄᑦ ᐅᖓᓯᑦᑐᓂᑦ ᖃᐅᔨᓴᕐᕕᐅᔪᒥᓪᓗ ᐃᑲᔫᑎᓂᑦ. 

“ᑕᒪᓐᓇ ᐊᑲᐅᖏᓪᓕᐅᕈᑕᐅᓯᒪᔪᖅ ᐊᒥᓱᓄᑦ ᓄᓇᕗᒻᒥᐅᓄᑦ, ᖁᔭᓐᓇᒦᕈᒪᑦᓱᖓᓗ ᐃᓘᓐᓇᖏᓐᓂᑦ ᐅᑕᖅᑭᔪᓐᓇᑦᓯᐊᖅᑐᓂᑦ. ᐊᑦᑕᕐᓇᖏᑦᑐᒥᑦ ᑲᓲᑎᑲᓐᓂᕐᓂᕐᒧᑦ ᓄᓇᓕᑦᑎᓐᓄᑦ ᖃᕆᑕᐅᔭᒃᑯᑦ, ᒫᓐᓇᑦᓴᐅᑎᒋ, ᑐᕌᒐᕆᖏᓐᓇᓚᖓᔭᕗᑦ,” ᐅᖃᖅᑐᖅ ᓯᕗᓕᖅᑎ ᓴᕕᑲᑖᖅ.

ᐱᓕᕆᐊᖅ ᐱᔨᑦᓯᕋᕐᓂᕐᒧᓪᓗ ᓄᑖᙳᕆᐊᖅᓯᒪᔪᑦ ᑲᔪᓯᖏᓐᓇᓚᖓᔪᑦ ᐊᑐᐃᓐᓇᐅᓗᑎᒃ ᒐᕙᒪᒃᑯᑦ ᓄᓇᕗᒻᒥ ᐃᓄᓐᓄᑦ ᑐᓴᕋᑦᓴᐅᓂᐊᖅᑐᓂᑦ ᐅᕙᓂ www.gov.nu.ca. 

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ: 

ᐋᓐᔨᓚ ᐱᑦᕈ
ᑐᑭᒧᐊᒃᑎᑦᑎᔨ ᑐᓴᐅᒪᖃᑦᑕᐅᑎᓕᕆᓂᕐᒧᑦ
ᒐᕙᒪᓕᕆᔨᒃᑯᑦ
867-975-6004
apetru@gov.nu.ca