ᐅᖃᓚᐅᑎᓯᐅᑏᑦ

You are here

ᒥᓂᔅᑕᐅᑉ ᑐᒡᓕᖏᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᒪᓕᒐᓕᕆᓂᕐᒧᓪᓗ ᐃᓂᑖᖅᑎᑕᐅᕗᒃ

ᔪᓚᐃ 29, 2014

ᐱᕙᓪᓕᐊᔪᖅ ᓴᖅᑭᑎᑕᐅᔪᖅ

ᓴᖅᑭᑎᑕᐅᓯᑲᐅᑎᒋᔭᕆᐊᓕᒃ

ᒥᓂᔅᑕᐅᑉ ᑐᒡᓕᖏᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᒪᓕᒐᓕᕆᓂᕐᒧᓪᓗ ᐃᓂᑖᖅᑎᑕᐅᕗᒃ

ᐃᖃᓗᐃᑦ, ᓄᓇᕗᑦ (ᔪᓚᐃ 29, 2014) – ᓯᕗᓕᖅᑎ ᐲᑕ ᑕᑉᑑᓇ ᐅᓪᓗᒥ ᐃᓂᑖᖅᑎᑦᑎᖅᑲᐅᔪᖅ ᒥᓂᔅᑕᐅᑉ ᑐᒡᓕᕆᓂᐊᖅᑕᖏᖕᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᒪᓕᒐᓕᕆᓂᕐᒧᓪᓗ ᐃᑲᔪᕈᒪᓪᓗᓂ ᒐᕙᒪᒃᑯᑦ ᓯᕗᓪᓕᖅᐸᐅᑦᑎᐅᑎᓯᒪᔭᖏᓐᓂᒃ.

ᒥᔅ ᑳᓖᓐ ᔅᑖᒃᓕ ᐃᓂᑖᖅᑎᑕᐅᕗᖅ ᒥᓂᔅᑕᐅᑉ ᑐᒡᓕᕆᓂᐊᖅᖢᓂᐅᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ, ᑖᓐᓇ ᐱᒋᐊᕐᕕᒃᓴᐅᑎᖃᖅᖢᓂ ᓯᑎᐱᕆ 2, 2014-ᒥ. ᑖᓐᓇ ᖃᖓᑦᑎᐊᓵᖅ ᐃᓂᖃᓚᐅᖅᑐᖅ ᒥᓂᔅᑕᐅᑉ ᑐᒡᓕᐊᑕ ᐃᑲᔪᖅᑎᒋᓪᓗᓂᐅᒃ (ᐃᓇᖏᖅᓯᓯᒪᓚᐅᑲᒃᖢᓂ) ᐱᓕᕆᔨᓪᓚᕇᑦ ᐱᔨᑦᑎᕋᖅᐸᖕᓂᖏᓐᓄᑦ ᐱᓕᕆᕝᕕᖏᔭᐅᔪᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᓄᓇᓕᖕᓂᓗ ᐱᔨᑦᑎᕋᖅᑎᒃᑯᓐᓂ, ᒐᕙᒪᒋᔭᐅᔪᒥ ᓂᐅᕙᐅᓐᓛᓐᑦᒥᐅᓄᑦ ᓛᐸᑐᐊᒥᐅᓄᓪᓗ. ᐃᖅᑲᓇᐃᔭᕐᓂᕆᔭᓂ ᐱᒋᐊᓚᐅᖅᓯᒪᔭᖓ 1988-ᖑᑎᓪᓗᒍ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐃᓂᖃᖃᑦᑕᖅᓯᒪᓪᓗᓂᓗ ᖃᔅᓯᑲᓪᓚᖕᓂ ᖁᑦᑎᒃᑐᒦᓐᓂᖅᓴᓂ ᐃᓂᓂ ᓂᐅᕙᐅᓐᓛᓐᑦᒥ. ᒥᔅ ᔅᑖᒃᓕ ᐱᓯᒪᕗᖅ ᐃᓗᐊᖅᓴᐃᔨᐅᔪᓐᓇᕐᓂᕐᒧᑦ ᓇᓗᓇᐃᒃᑯᑕᕐᒥᒃ, bachelor-ᖃᖅᖢᓂ ᐃᓄᓕᕆᓂᕐᒥᒃ ᐱᓕᕆᐊᖃᖅᐸᖕᓂᕐᒥᒃ master-ᖃᖅᖢᓂᓗ ᓇᓗᓇᐃᒃᑯᑕᕐᒥᒃ ᓇᖕᒥᓂᕆᔭᐅᔪᓂᒃ ᐊᐅᓚᑦᑎᕝᕕᖃᖅᐸᖕᓂᕐᒥᒃ ᐅᕙᙵᑦ, Memorial ᓯᓚᑦᑐᖅᓴᕐᕕᒡᔪᐊᒥᑦ ᓂᐅᕙᐅᓐᓛᓐᑦᒥᐅᓄᑦ. ᑖᓐᓇ ᓇᓗᓇᐃᔭᖅᓯᒪᖃᑕᐅᕗᖅ ᑕᒪᐃᓐᓄᑦ ᑲᑐᔾᔨᖃᑎᒌᓄᑦ ᓇᓗᓇᐃᔭᖅᓯᒪᓪᓗᑎᒃ ᐃᓗᐊᖅᓴᐃᔨᓄᑦ ᓂᐅᕙᐅᓐᓛᓐᑦᒥᐅᓄᑦ ᓛᐸᑐᐊᒥᐅᓄᓪᓗ (ARNNL) ᐊᒻᒪᓗ ᓂᐅᕙᐅᓐᓛᓐᑦᒥᐅᓄᑦ ᓛᐸᑐᐊᒥᐅᓄᓪᓗ ᑲᑐᔾᔨᖃᑎᒌᑦ ᐃᓄᓕᕆᔨᓄᑦ (NLASW).

ᒥᔅ ᐃᓕᓴᐱ A. L. ᓵᓐᑐᓴᓐ ᐃᓂᑖᖅᑎᑕᐅᕗᖅ ᒥᓂᔅᑕᐅᑉ ᑐᒡᓕᕆᓂᐊᖅᖢᓂᐅᒃ ᒪᓕᒐᓕᕆᓂᕐᒧᑦ ᑖᔅᓱᒥᖓᓗ ᐱᓕᕆᓯᒋᐊᕈᒫᖅᖢᓂ ᓯᑎᐱᕆ 29, 2014-ᒥ. ᑖᓐᓇ ᐱᓕᕆᐊᖃᖃᑦᑕᓪᓚᕆᖕᓂᑰᕗᖅ ᖁᑦᑎᒃᑐᒦᓐᓂᖅᓴᐅᓪᓗᓂ ᒪᓕᒐᓕᕆᔨᐅᓪᓗᓂ ᑭᒃᑯᑐᐃᓐᓇᓄᓪᓗ ᐱᔨᑦᑎᕋᖅᐸᖕᓂᑰᓪᓗᓂ ᓯᕗᓪᓕᖅᐹᑦᑎᐊᖑᓯᒪᓪᓗᓂᓗ ᒪᓕᒐᓕᕆᔨᒃᑯᓐᓂ ᐃᓚᐅᓯᒪᓪᓗᓂ ᑭᒃᑯᑐᐃᓐᓇᓄᑦ ᐱᔨᑦᑎᕋᖅᐸᖕᓂᕐᒧᑦ-ᐃᓂᒋᔭᐅᔪᒥ ᐱᓕᕆᐊᖑᖃᑦᑕᖅᑐᒥ ᑲᓇᑕᒥ ᐃᓕᓐᓂᐊᕐᓂᕆᔭᐅᔪᒥ ᑭᒃᑯᑐᐃᓐᓇᓄᑦ ᐱᔨᑦᑎᕋᕐᕕᖃᖅᐸᖕᓂᕐᒧᑦ ᐃᓂᑖᖅᑎᑕᐅᓯᒪᓪᓗᓂ ᒪᓕᒐᓕᕆᓂᕐᒧᑦ ᐃᓂᒋᔭᐅᕙᒃᑐᒥ, ᓯᓚᑦᑐᖅᓴᕐᕕᒡᔪᐊᒥ ᐋᑐᕚᒥᐅᓄᑦ. ᑕᒪᓐᓇ ᐱᓕᕆᐊᕆᓚᐅᙱᓐᓂᕐᒥᓂ, ᒥᔅ ᓵᓐᑐᓴᓐ ᐊᕐᕌᒍᒐᓴᖕᓄᑦ ᐱᓕᕆᐊᖃᖃᑦᑕᓚᐅᖅᓯᒪᔪᖅ ᐃᑲᔪᖅᑎᒋᔭᐅᓪᓗᓂ ᒪᓕᒐᓕᕆᔨᕐᔪᐊᒧᑦ, ᓄᓇᖃᖅᑳᖅᑐᓄᑦ ᐱᓕᕆᐊᒃᓴᕆᔭᐅᕙᒃᑐᓄᑦ ᒐᕙᒪᒋᔭᐅᔪᒥ ᑲᓇᑕᒥᐅᓄᑦ ᒪᓕᒐᓕᕆᔨᒃᑯᖏᓐᓄᑦ. ᓵᓐᑐᓴᓐ ᐱᓯᒪᔪᖅ bachelor-ᒥᒃ ᒪᓕᒐᕐᓄᑦ ᓇᓗᓇᐃᒃᑯᑕᕐᒥᒃ ᓯᓚᑦᑐᖅᓴᕐᕕᒡᔪᐊᒥᑦ ᐋᑐᕚᒥᐅᓄᑦ master-ᖃᖅᖢᓂᓗ arts-ᓄᑦ ᓇᓗᓇᐃᒃᑯᑕᕐᒥᒃ ᑲᓇᑕᒥᐅᓄᑦ ᖃᐅᔨᓴᕐᕕᖃᖅᐸᖕᓂᕐᒥᒃ.

"ᒥᔅ ᓵᓐᑐᓴᓐ ᐊᒻᒪᓗ ᒥᔅ ᔅᑖᒃᓕ ᖁᑦᑎᒃᑐᒦᓐᓂᖅᓴᒥᒃ ᐱᓕᕆᖃᑦᑕᕐᓂᑰᓂᕐᒥᒃ ᑖᒃᑯᓄᖓᖅᓯᕗᒃ ᒥᓂᔅᑕᐅᑉ ᑐᒡᓕᖏᑕ ᐃᓂᖏᖕᓄᑦ, ᓇᓗᙱᑦᑎᐊᖅᖢᖓᓗ ᐃᓂᑖᖅᑎᑕᐅᓂᖏᒃ ᐃᑲᔪᕐᓂᖃᑦᑎᐊᕐᓗᑎᒃ ᐃᓚᓕᐅᑎᔭᐅᓂᐊᕐᓂᖏᓐᓂᒃ ᒐᕙᒪᒋᔭᑦᑎᓐᓄᑦ," ᑕᐃᒪᓐᓇ ᓯᕗᓕᖅᑎ ᐲᑕ ᑕᑉᑑᓇ ᐅᖃᖅᖢᓂ. "ᖁᕕᐊᓱᖃᑎᒋᕚᒃᑲᒃ ᑕᒪᕐᒥᒃ ᑖᒃᑯᐊᒃ ᑲᔪᓯᓂᖃᑦᑎᐊᖅᖢᑎᒃ ᐱᓇᔪᓚᐅᕐᓂᖏᖕᓄᑦ, ᓂᕆᐅᒋᔭᖃᑦᑎᐊᖅᖢᖓᓗ ᖃᓄᐃᓕᐅᖅᐸᓪᓕᐊᓗᑎᒃ ᐃᑲᔪᕐᓂᖃᖃᑦᑕᕐᓂᐊᕐᓂᖏᖕᓂᒃ ᒐᕙᒪᒋᔭᐅᔪᒧᑦ ᓄᓇᕘᒥᐅᓄᑦ."

ᐊᑐᓯᒋᐊᕐᓗᓂ ᐊᐅᒍᒡᑦ 1, 2014-ᒥ, ᒥᔅ ᒪᓃᑕ ᐅ’ᑳᓄ ᓄᖅᑲᓛᓕᕐᒪᑦ ᐃᑲᔪᖅᑎᒋᔭᐅᓂᕐᒥᓄᑦ ᒥᓂᔅᑕᐅᑉ ᑐᒡᓕᕆᓪᓗᓂᐅᒃ ᐊᐅᓚᓂᕆᔭᐅᕙᒃᑐᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐊᕐᕌᒍᓄᑦ ᐱᖓᓱᓄᑦ ᑕᕝᕙᓂ ᐃᓂᒦᕌᓪᓚᓚᐅᖅᖢᓂ.

ᓄᓇᕗᑦ ᒐᕙᒪᖓ ᐱᓇᔪᓪᓚᕆᒃᐳᖅ ᑕᑯᒃᓴᐅᑦᑎᐊᖅᑐᒃᑯᑦ ᐃᖅᑲᓇᐃᔮᖃᓕᖅᐸᖕᓂᕐᒧᑦ ᐊᑭᑦᑐᕋᐅᑎᓂᕐᓂᒃ ᐃᑲᔪᖅᑎᒋᔭᐅᕙᒃᑐᓄᑦ ᑐᒡᓕᕆᔭᐅᕙᒃᑐᓄᑦ ᐃᓂᒋᔭᐅᕙᒃᑐᓄᑦ. ᐊᒻᒪᓗᒃᑲᓐᓂᖅᑕᐅᖅ, ᒐᕙᒪᒋᔭᐅᔪᖅ ᓯᕗᒻᒧᐊᖅᐸᓪᓕᐊᕗᖅ ᑲᔪᓯᕙᓪᓕᐊᑎᑦᑎᔪᒪᓪᓗᓂ ᐊᑭᑦᑐᕋᐅᑎᓂᕆᔭᐅᕙᒃᑐᓂᒃ ᐊᓯᖏᓐᓄᑦ ᖁᑦᑎᒃᑐᒦᓐᓂᖅᓴᓄᑦ ᐊᑐᖅᖢᑎᒃ ᓇᓕᒧᒃᓱᖅᑎᑦᑎᔪᓂᒃ ᑕᑯᔭᐅᑦᑎᐊᕈᓐᓇᖅᑐᓂᒡᓗ ᐊᑐᖅᑕᐅᕙᒃᑐᓂᒃ ᐱᓕᕆᔪᖃᓕᕌᖓᑦ.

###

ᐱᕙᓪᓕᐊᔪᓄᑦ ᖃᐅᔨᒋᐊᕐᕕᒃᓴᖅ:

ᔭᓯᒪ ᐱᐸ

ᐱᕙᓪᓕᐊᔪᓄᑦ ᑎᑎᕋᖅᑎᒋᔭᐅᔪᖅ ᓯᕗᓕᖅᑎᒧᑦ ᐲᑕ ᑕᑉᑑᓇᒧᑦ

ᓄᓇᕗᑦ ᒐᕙᒪᖓ

ᐅᖄᓚᐅᑖ: 867-975-5059

ᖃᕆᑕᐅᔭᒃᑯᑦ: ypepa@gov.nu.ca