ᐅᖃᓚᐅᑎᓯᐅᑏᑦ

ᓄᑖᓂᒃ ᐱᕙᓪᓕᐊᔪᓂᒃ ᓄᓇᕗᑦ ᒐᕙᒪᒃᑯᓐᓂ ᓄᕙᒡᔪᐊᕐᓇᖅ−19 ᒥᒃᓵᓄᑦ ᑕᑯᔪᒪᒍᕕᑦ ᖃᓄᐃᑉᐸᓪᓕᐊᓕᕐᓂᖏᓐᓂᒡᓗ ᐃᑭᐊᖅᑭᕕᑦᑎᓐᓂ. ᓄᕙᒡᔪᐊᕐᓇᖅ-19−ᒧᑦ ᐃᑲᔫᑎᒃᓴᑦ ᖃᕆᑕᐅᔭᒃᑯᑦ ᐱᔭᐅᔪᓐᓇᖅᐳᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒪᒃᐱᖅᑐᒐᖓᓂ.

You are here

ᓄᓇᕗᑦ ᒐᕙᒪᒃᑯᖏᑦ ᐊᓯᔾᔨᖅᓯᕙᓪᓕᐊᓕᖅᑐᑦ ᐃᖅᑲᓇᐃᔭᖅᑎᑦᓯᓂᕐᒥᒃ ᐊᖏᕐᕋᖅᓯᒪᓗᑎᒃ ᒪᓕᑦᑕᐅᒋᐊᖃᕐᓂᐊᖅᑐᓂᒃ

ᒫᑦᓯ 18, 2020

ᐱᕙᓪᓕᐊᔪᑦ ᑐᓴᕋᑦᓴᑦ

ᐃᖃᓗᐃᑦ, ᓄᓇᕗᑦ (ᒫᑦᓯ 18, 2020) – ᓯᕗᓕᖅᑎ ᔫ ᓴᕕᑲᑖᖅ ᐅᓪᓗᒥ ᓇᓗᓇᐃᖅᓯᖅᑲᐅᔪᖅ ᓄᓇᕗᑦ ᒐᕙᒪᒃᑯᖏᑦ ᐊᓯᔾᔨᖅᓯᕙᓪᓕᐊᓂᐊᓕᖅᑐᑦ ᐱᒻᒪᕆᐅᙱᑦᑐᓂᒃ ᒐᕙᒪᒃᑯᓐᓂ ᐃᖅᑲᓇᐃᔭᖅᑎᖏᑦ ᐃᖅᑲᓇᐃᔭᖔᓕᕐᓗᑎᒃ ᐊᖏᕐᕋᒥᓐᓂ, ᓱᑲᑦᑐᐊᓗᒻᒥᒃ ᐊᓯᔾᔨᖅᐸᓪᓕᐊᒍᑕᐅᓂᖓᓄᑦ ᖃᓂᒪᓐᓇᖅ COVID-19. ᑕᒪᒃᑯᐊ ᖃᓄᐃᓕᒋᐊᕈᑕᐅᔪᑦ ᐊᑕᖏᖅᑐᒥᒃ ᐊᑐᓕᖅᑎᑕᐅᓛᖅᑐᑦ ᐃᖅᑲᓇᐃᔭᕐᓇᐅᑉ ᓄᙳᐊᓂ, ᑕᓪᓕᒻᒥᖅ, ᒫᑦᓯ 20.

“ᖃᓂᒻᒪᑦᑕᐃᓕᑎᑦᓯᓂᖅ ᖃᓄᐃᑦᑕᐃᓕᑎᑦᓯᓂᕐᓗ ᐃᖅᑲᓇᐃᔭᖅᑎᑦᑎᓐᓂᒃ ᐱᒻᒪᕆᐅᔪᖅ. ᒪᓕᑦᑐᒋᑦ ᐅᖃᐅᔾᔭᐅᒋᐊᖅᓯᒪᓂᕗᑦ ᐱᓕᕆᔾᔪᓯᖅᑖᖁᔭᐅᓪᓗᑕ ᐃᓅᖃᑎᒌᑦ ᐅᖓᓯᒌᖃᑦᑕᖁᔭᐅᓪᓗᑎᒃ, ᐊᓯᔾᔨᕐᓂᐊᖅᑕᕗᑦ ᒐᕙᒪᒃᑯᓐᓂ ᐃᖅᑲᓇᐃᔭᖅᑎᕗᑦ ᐃᖅᑲᓇᐃᔭᖔᕈᓐᓇᖁᓪᓗᒋᑦ ᐊᖏᕐᕋᖏᓐᓂ,” ᐅᖃᖅᓯᒪᔪᖅ ᓯᕗᓕᖅᑎ ᓴᕕᑲᑖᖅ. “ᑕᒪᓐᓇ ᐊᓯᔾᔨᖅᐸᓪᓕᐊᖏᓐᓇᖅᑐᖅ ᖃᓄᐃᒍᑕᐅᓂᖓ, ᑕᐃᒪᐃᒻᒪᑦ ᐃᖅᑲᓇᐃᔭᖅᑎᕗᑦ ᐅᐸᓗᖓᐃᔭᑦᓯᐊᖅᓯᒪᖁᒐᑦᑎᒍ ᐃᖅᑲᓇᐃᔭᕈᓐᓇᖁᓪᓗᒋᑦ ᐊᖏᕐᕋᖅᓯᒪᓗᑎᒃ, ᑕᐃᒪᐃᒍᓐᓇᕋᐃᑉᐸᑕ. ᐱᒻᒪᕆᐅᔪᓂᒃ ᐱᔨᑦᓯᕋᐅᑎᖃᕐᓂᕐᒧᑦ ᐃᖅᑲᓇᐃᔮᓖᑦ ᓱᓕ ᐃᖅᑲᓇᐃᔭᐃᓐᓇᕐᓂᐊᖅᑐᑦ ᐊᓪᓚᕝᕕᒻᒥᓂ, ᐱᔪᓐᓇᕐᓂᓕᒫᒥᓂ.”

ᓄᓇᕗᑦ ᒐᕙᒪᒃᑯᖏᓐᓂ ᐃᖅᑲᓇᐃᔭᖅᑎᖏᑦ ᐱᓕᕆᖃᑎᖃᕐᓂᐊᖅᑐᑦ ᐊᖏᔪᖅᑳᒥᓐᓂᒃ ᖃᐅᔨᒐᓱᐊᕐᓗᑎᒃ ᖃᓄᖅ ᐃᖅᑲᓇᐃᔮᖏᓐᓂ ᐱᓕᕆᒍᓐᓇᕐᒪᖔᑕ ᐃᖅᑲᓇᐃᔮᖏᑕᓗ ᖃᓄᐃᒍᑎᐅᓂᖏᓐᓂᒃ ᐊᓪᓚᕝᕕᒻᒥᓃᙱᓪᓗᑎᒃ.

“ᐅᑕᖅᑭᑦᓯᐊᖁᔨᔪᒍᑦ ᑐᑭᓯᐅᒪᑦᓯᐊᖁᔨᓪᓗᑕᓗ ᐊᑐᐃᓐᓇᐅᑎᑦᓯᒐᓱᐊᖅᑎᓪᓗᑕ ᐱᑕᖃᕆᐊᖃᓪᓚᕆᑦᑐᓂᒃ ᐱᓕᕆᐊᓂᒃ ᐱᔨᑦᓯᕋᐅᑎᓂᓪᓗ ᓄᓇᕗᒻᒥᐅᓄᑦ. ᑭᓱᑐᐃᓐᓇᐃᑦ ᑭᖑᕙᕆᐊᖅᓯᒪᖃᑦᑕᑐᐃᓐᓇᕆᐊᓖᑦ, ᐃᓚᖏᓪᓗ ᐱᒻᒪᕆᐅᙱᑦᑐᑦ ᐱᓕᕆᐊᑦ ᐱᔨᑦᓯᕋᐅᑏᓪᓗ ᓄᖅᑲᖓᑎᑕᐅᑲᐃᓐᓇᕆᐊᖃᕐᓂᐊᖅᑐᑦ. ᓇᓗᓇᐃᕐᕕᒋᕙᑦᓯ, ᐊᑦᓱᕉᑎᖃᖅᑐᒍᑦ ᓇᓗᓇᐃᖅᓯᓯᒪᒐᓱᐊᖅᑐᑕᓗ ᓄᓇᕗᒻᒥᐅᑦ ᐃᑉᐱᒋᔭᐅᑦᓯᐊᖁᓪᓗᒋᑦ ᒫᓐᓇᐅᓂᖓᓂ,” ᐅᖃᖅᓯᒪᔪᖅ ᓯᕗᓕᖅᑎ ᓴᕕᑲᑖᖅ.

ᑐᑭᓯᒋᐊᒃᑲᓐᓂᕈᒪᒍᕕᑦ ᖃᓂᒪᓐᓇᖅ COVID-19 ᐱᔾᔪᑎᒋᓪᓗᐳ, ᐅᕙᖓᕐᓗᑎᑦ: www.gov.nu.ca

###

ᐱᕙᓪᓕᐊᔪᓕᕆᔨᓄᑦ ᖃᐅᔨᒋᐊᕐᕕᑦᓴᖅ:

ᑲᐃᑦ ᒪᒃᓚᐅᑦ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ
ᓯᕗᓕᖅᑎ ᓴᕕᑲᑖᖅ ᐊᓪᓚᕝᕕᖓᓂ
867-975-5059/ 867-222-5763
cmacleod@gov.nu.ca