ᐅᖃᓚᐅᑎᓯᐅᑏᑦ

You are here

ᓄᓇᕗᑦ ᒐᕙᒪᒃᑯᖏᑦ ᓇᓂᓯᔪᑦ ᕝᕌᓐᒃᓕᓐᒥᑦ ᐃᑦᑕᖕᓂᓴᕕᓂᖕᒥᑦ

ᓯᑎᐱᕆ 08, 2014

ᐱᕙᓪᓕᐊᔪᑦ ᓴᖅᑭᑕᑦ

ᓴᖅᑭᑕᐅᑲᐅᑎᒋᔭᒃᓴᖅ

ᓄᓇᕗᑦ ᒐᕙᒪᒃᑯᖏᑦ ᓇᓂᓯᔪᑦ ᕝᕌᓐᒃᓕᓐᒥᑦ ᐃᑦᑕᖕᓂᓴᕕᓂᖕᒥᑦ

ᐃᖃᓗᐃᑦ, ᓄᓇᕗᑦ (ᓯᑎᐱᕆ 8, 2014) - ᓄᓇᕗᑦ ᒐᕙᒪᒃᑯᖏᑦ ᐃᑦᑕᖕᓂᓴᓕᕆᔨᒃᑯᖏᑦ ᓇᓂᓯᔭᕆᐅᖅᑐᑦ 2014-ᒥᑦ ᕕᒃᑑᕆᐊᑉ ᐃᒪᖓᓂ ᕿᓂᖕᓂᐅᔪᒥᑦ ᓯᑎᐱᕆ 1-ᖑᑎᓪᓗᒍ.

ᓴᕕᕋᔭᖕᒥᑦ ᓱᓪᓗᓕᖕᒥᑦ ᕈᐃᐅᓪ ᓇᐃᕕ ᐅᒥᐊᕐᔪᐊᒥᑦ, ᓇᓗᓇᐃᖅᑕᐅᔪᖅ ᐃᓚᒋᔭᐅᓪᓗᓂ ᐃᒥᐊᖕᒧᑦ ᑭᕕᒃᓯᓯᒧᑦ, ᒪᕐᕉᖕᓂᒃ ᓇᓗᓇᐃᒃᑯᑕᖃᖅᖢᓂ ᓇᓂᔭᐅᓚᐅᖅᑐᖅ ᕿᑭᖅᑕᒥᑦ ᓂᒋᖅᐸᓯᐊᓂ ᕿᓂᕐᕕᐅᔪᒥᑦ. ᕿᔪᐊᕐᔪᒃᒥᒃ, ᐃᒻᒪᖄ ᓯᒥᒍᑎᐅᓪᓗᓂ, ᑖᓐᓇ ᓴᕕᕋᔭᒃ ᓱᓪᓗᓕᒃ ᐅᒥᐊᕐᔪᐊᑉ ᑭᓴᐅᑎᖓᓅᖓᓄᑦ ᐊᑐᖅᑕᐅᔪᕕᓂᖅ ᐊᑖᓄᐊᖓᓪᓗᓂ, ᓇᓂᔭᐅᓚᐅᕆᕗᖅ.

ᑖᒃᑯᐊ ᓇᓂᓯᓃᑦ ᐱᒻᒪᕆᐅᕗᑦ ᑖᒃᑯᐊ ᓴᕕᕋᔭᐃᑦ ᓱᓪᓗᓖᑦ ᓇᓗᓇᙱᒻᒪᑕ ᕝᕌᓐᒃᓕᓐ ᐅᒥᐊᕐᔪᐊᕕᓂᐅᓂᖓᓂ. ᑖᓐᓇ ᓯᕗᓪᓕᖅᐸᐅᕗᖅ ᑕᐃᒪᐃᑦᑐᓂ ᓇᓂᓯᓂᖕᓂᑦ ᐅᓪᓗᒥᐅᔪᒥ. ᑕᒪᓐᓇ ᓇᓂᓯᓃᑦ ᒪᓕᑦᑎᐊᖅᑐᑦ, ᐃᑲᔪᖅᑐᐃᓪᓗᓂᓗ, 1800-ᖏᓐᓂᑦ ᐃᓄᐃᑦ ᐅᖃᐅᓯᕆᕙᓚᐅᖅᑕᖏᓐᓂᑦ ᐅᒥᐊᕐᔪᐊᕕᓂᖃᖕᓂᕋᐃᕙᒃᖢᑎᒃ ᐆᖅᓱᖅᑑᑉ ᓂᒋᐊᓂᑦ.

"ᑖᓐᓇ ᓇᓂᓯᕝᕕᐅᔪᖅ ᐱᐅᔪᐊᓘᕗᖅ ᐅᒃᑑᑎᐅᓪᓗᓂ ᐱᓕᕆᖃᑎᒌᒃᑐᓂᒃ ᓄᓇᕘᒥ ᒐᕙᒪᒃᑯᑦ, ᑲᓇᑕᒥ ᒐᕙᒪᒃᑯᑦ ᐊᒻᒪᓗ ᓇᖕᒥᓂᖅ ᐱᓕᕆᖃᑎᒌᖑᔪᓪᓗ, ᐃᑲᔫᑎᒃᓴᓂᒃ ᖃᐅᔨᖃᑎᒌᒃᖢᑎᒃ ᐊᒻᒪᓗ ᐊᔪᙱᑕᐅᔪᓂᒃ ᕿᓂᖅᑎᓪᓗᒋᑦ Franklin ᐅᒥᐊᕐᔪᐊᕕᓂᐊᓂᒃ ᑕᐃᒪᙵᑦ 2008-ᒥᑦ," ᐅᖃᖅᑐᖅ ᐲᑕ ᑕᑉᑑᓇ, ᓯᕗᓕᖅᑎ ᓄᓇᕘᒧᑦ. "ᐱᒃᑯᒍᓱᖃᑎᒋᕙᕗᑦ ᓄᓇᕘᒥ ᐃᑦᑕᕐᓂᓴᓕᕆᔨᒃᑯᑦ ᐱᓕᕆᖃᑎᒌᖑᔪᑦ ᓇᓂᓯᓂᖏᓐᓂᒃ ᐱᒻᒪᕆᐅᔪᒥᒃ ᓄᓇᕘᒥ ᐅᓂᒃᑳᖑᕙᒃᑐᒥᒃ ᖃᐅᔨᒪᔭᐅᔪᒥᒃ."

"ᑭᒡᒐᖅᑐᖅᖢᒋᑦ ᒐᕙᒪᒋᔭᕗᑦ, ᐱᒃᑯᒍᓱᖃᑎᒋᕙᕗᑦ ᓄᓇᕗᑦ ᒐᕙᒪᒃᑯᑦ ᐃᑦᑕᕐᓂᓴᕐᓂᒃ ᓇᓂᓯᓂᖏᓐᓂᒃ ᐃᑲᔫᑎᓂᐊᕐᒪᑦ ᕿᓂᕐᓂᐅᓯᒪᔪᒧᑦ ᕿᓂᖅᑕᐅᕙᒃᑐᓂ ᐅᒥᐊᕐᔪᐊᓂ ᑲᓇᑕᒥ ᐅᓂᒃᑲᐅᓯᐅᕙᒃᑐᓂᑦ, ᓄᓇᕐᔪᐊᕐᒥᓗᖃᐃ," ᐅᖃᖅᑐᖅ ᑭᒡᒐᖅᑐᖅᑎ ᓕᐅᓇ ᐊᒡᓘᒃᑲᖅ, ᒥᓂᔅᑕ ᐊᕙᑎᓕᕆᔨᒃᑯᓐᓄᑦ ᑲᓇᑕᒥ ᒥᕐᖑᐃᖅᓯᕕᖕᓄᑦ. "ᑖᓐᓇ ᓇᓂᓯᓂᐅᔪᖅ ᐊᔾᔨᐅᙱᑦᑑᓗᓂ ᐱᓕᕆᖃᑎᒌᖕᓂᐅᔪᖅ, ᑐᓴᖅᑎᑦᑎᔾᔪᑕᐅᔪᖅ ᒐᕙᒪᒋᔭᑦᑎᓐᓂᑦ ᑕᒪᑐᒪᓂ ᐊᕐᕌᒎᔪᒥ, ᑖᒃᑯᐊ ᐊᒥᓲᔪᑦ ᒐᕙᒪᐅᔪᑦ ᐊᑯᓐᓂᖓᓐᓂ ᐊᒻᒪᓗ ᓇᖕᒥᓂᓖᑦ ᐱᓕᕆᖃᑎᒌᒃᑐᑦ ᐱᓕᕆᐊᖏᑦᑎᒍᑦ ᑕᐃᒪᐃᓕᖓᕗᖅ. ᑕᒪᓐᓇ ᐊᖏᓛᖑᔪᖅ ᕿᓂᕐᓂᐅᔪᖅ ᐊᒃᓱᕉᑕᐅᓯᒪᓪᓗᓂ ᐊᓯᐅᔨᔭᐅᓯᒪᔪᒧᑦ Franklin ᐅᒥᐊᕐᔪᐊᖁᑎᖏᓐᓄᑦ – ᕿᓂᕆᐊᖅᓯᒪᓂᑯᑦ ᐋᖅᑭᒃᓯᓯᒪᖕᒪᑕ ᑐᙵᕕᐅᓇᔭᖅᑐᒥᒃ ᑲᓇᑕ ᐃᓛᒃᑰᕈᓐᓇᕐᓂᐊᓂᒃ ᐊᕐᕌᒍᑦ 200-ᓚᐅᔪᑦ ᐊᓂᒍᖅᓯᒪᓕᖅᑎᓪᓗᒋᑦ."

ᑕᐃᑲᙵᓂᓂ 2008-ᒥᑦ, ᓄᓇᕗᑦ ᒐᕙᒪᒃᑯᖏᑦ ᕿᒥᕐᕈᓴᖃᑦᑕᓕᓚᐅᖕᒪᑕ ᓄᓇᓂᑦ ᐋᖅᑭᒃᑕᐅᓯᒪᔪᑦ, ᐃᓚᖓᒍᑦ, ᐃᑲᔪᖅᑐᐃᖁᓪᓗᒋᑦ ᑲᓇᑕᐅᑉ ᒥᕐᙳᐃᖅᓯᕐᕕᓕᕆᔨᖏᓐᓄᑦ ᕿᓂᖅᑎᓪᓗᒋᑦ ᐅᒥᐊᕐᔪᐊᕕᓂᖕᒥᑦ. ᓇᓂᔭᑎᒃ ᒪᓕᒃᖢᒍ, ᓄᓇᕗᑦ ᒐᕙᒪᒃᑯᖏᑦᑕ ᖃᐅᔨᓴᖅᑎᖏᑦ ᓄᓇᓂ ᖃᐅᔨᓴᒃᑲᓐᓂᖅᓯᒪᓕᖅᑐᑦ ᐅᓪᓗᓄᑦ ᑲᔅᓯᐊᕐᔪᖕᓅᓕᖅᑐᖅ ᕿᑭᖅᑕᒥᑦ ᐱᖓᖕᓇᖓᓂᖅᐸᓯ ᓂᒋᖅᐸᓯᐊᓂᒃᓗ ᖑᓛᓐᑦ ᐳᐃᓐᑕᒥᑦ. ᑖᒃᑯᐊ ᖃᐅᔨᓴᖕᓃᑦ ᓴᖅᑭᑦᑎᓯᒪᓕᖅᑐᑦ ᐊᒥᓱᒐᓚᖕᓂᑦ ᑎᑎᕋᖅᑕᐅᓯᒪᙱᑦᑐᓂᑦ ᐃᓄᐃᑦ ᐃᓂᕕᓂᖏᓐᓂᑦ, ᑎᑎᕋᖅᑕᐅᕙᓪᓕᐊᓕᖅᑐᑦᑕᐅᖅ.

ᑖᒃᑯᐊ ᓇᓂᓯᓃᑦ ᐊᓯᔾᔩᔾᔪᑕᐅᙱᑦᑐᑦ ᓄᓇᕗᑦ ᒐᕙᒪᒃᑯᖏᑦᑕ 2014ᕝᒧᑦ ᐱᓕᕆᐊᖏᓐᓂᑦ, ᐃᓚᓕᐅᑎᓪᓗᒋᑦ ᐱᒻᒪᕆᐅᒋᔭᑦ ᖃᐅᔨᓴᖕᓃᑦ ᓄᓇᙳᐊᒧᐊᖅᑎᕆᓃᓪᓗ ᓇᒦᕈᓘᔭᖅᑐᑦ ᐅᖅᓱᖅᑑᖅᒥᑦ, ᐃᓗᕕᖅᑕᐅᒃᑲᓐᓂᖅᑐᕕᓃᓪᓗ ᑎᒦᑦ ᐃᓚᒋᔭᐅᔪᕕᓂᖕᓂᑦ ᕝᕌᓐᒃᓕᓐᑯᑦ ᕿᓂᖅᓴᖅᑎᓪᓗᒋᑦ ᐊᕝᕗᖅᑕᐅᔪᕕᓃᑦ 2013-ᒥᑦ ᖃᐅᔨᓴᒐᒃᓴᐅᓪᓗᑎᖑᒃ.

###

ᐱᕙᓪᓕᐊᔪᓕᕆᓂᖕᓄᑦ ᖃᐅᔨᒋᐊᕐᕕᒃ:

ᑲᐃᑦ ᒪᒃᓚᐅᑦ

ᑐᑭᒧᐊᒃᑐᓕᕆᔨᒃ ᑐᓴᐅᒪᔪᓕᕆᓂᖕᓄᑦ ᒐᕙᒪᓕᕆᔨᒃᑯᑦ

867-975-6049

cmacleod@gov.nu.ca