ᐅᖃᓚᐅᑎᓯᐅᑏᑦ

You are here

ᓄᕙᒡᔪᐊᕐᓇᖅ-19 ᓄᓇᕗᒻᒥ ᒐᕙᒪᒃᑯᑦ ᓄᑖᙳᕆᐊᖅᑎᑕᖏᑦ - ᔫᓂ 22, 2020

ᔫᓂ 22, 2020

 

ᓯᕗᓕᖅᑎᒥᑦ ᑐᓴᒐᒃᓴᖅ:

ᐅᓪᓛᒃᑯᑦ. ᓱᓕ ᓇᓗᓇᐃᖅᓯᒪᓪᓚᕆᒃᑐᓂᒃ ᑕᐃᒪᐃᓐᓇᓱᒋᔭᐅᔪᓂᒡᓘᓪᓃᑦ ᓄᕙᒡᔪᐊᕐᓇᖅ-19−ᒥᒃ ᐱᑕᖃᙱᓚᖅ ᓄᓇᕗᒻᒥ. 

ᑲᑎᖦᖢᒋᑦ ᐃᓄᐃᑦ ᖃᐅᔨᓴᖅᑕᐅᓯᒪᓕᖅᑐᑦ ᒫᓐᓇᒧᑦ ᑎᑭᖦᖢᒍ 1345.139−ᖑᓕᖅᐳᑦ.  139 ᒫᓐᓇ ᖃᐅᔨᓴᖅᑕᐅᔪᑦ.

ᐅᓪᓗᒥᑦ ᓯᕗᓪᓕᖅᐹᖑᕗᖅ ᓂᕆᕝᕖᑦ, ᐃᒥᕐᕖᑦ, ᓄᔭᓕᕆᕝᕖᑦ, ᐱᐅᓴᐃᔩᑦ, ᑐᒃᓯᐊᕐᕖᑦ ᑕᕐᕆᔭᕐᕖᓪᓗ ᐅᒃᑯᐃᕐᖢᑎᒃ. ᖃᐅᔨᒪᔪᖓ ᐊᓕᐊᓇᐃᒍᓱᒃᑲᑦᑕ ᑕᒪᑦᑕ ᐅᑎᕐᐸᓪᓕᐊᓕᕐᓗᑕ ᑕᖅᑭᑦ ᐱᖓᓱᑯᑖᕌᓘᓵᖅᑎᓪᓗᒍ.

ᖁᕕᐊᒋᓗᒍ ᓂᕆᔭᖅᑐᕈᕕᑦ, ᑭᐱᔭᐅᓗᑎᑦ, ᐱᖃᓐᓇᕆᔭᖕᓃᓪᓗᓯ ᐃᓚᔅᓯᓐᓂᓪᓗ ᐃᒡᓗᓯ ᓯᓚᑖᓂᑦ. ᑭᓯᐊᓂ ᐃᖅᑲᐅᒪᓂᐊᕐᐳᓯ – ᐃᓅᖃᑎᖕᓂᑦ ᐅᖓᓯᖕᓂᖅ, ᐊᒡᒐᑎᑦ ᐅᐊᓴᕐᐸᒡᓗᒋᑦ ᐊᐃᓯᒪᓗᑎᒡᓗ ᖃᓄᐃᕌᕐᔪᒃᑲᓗᐊᕈᕕᓪᓘᓐᓃᑦ.

ᖁᔭᓐᓇᒦᒃ ᓄᓇᕗᒻᒥᐅᓕᒫᑦ ᐊᒃᓱᕈᖅᖢᑎᒃ ᐱᓕᕆᓚᐅᖕᒪᑕ. ᖃᐅᔨᒪᔪᖓ ᐊᔪᕐᓇᓚᐅᙱᒻᒪᑦ. ᐊᑏ ᓈᓚᐃᓐᓇᕐᓂᐊᕐᐸᓯᐅᒃ ᐋᓐᓂᐊᖅᑕᐃᓕᒪᔪᓕᕆᓂᖅ ᑭᒃᑯᑐᐃᓐᓇᕐᓄᑦ ᐅᖃᐅᔾᔪᖅᑕᐅᓯᒪᔪᑦ ᖃᓄᐃᓕᐅᕆᐊᓕᓪᓗ, ᖁᕕᐊᒋᓗᑎᒍᓪᓗ ᐊᐅᔭᐅᔪᖅ, ᒫᓐᓇ ᐱᒋᐊᓪᓚᕆᖕᒪᑦ!

 

ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᐅᑉ ᓄᑖᙳᕆᐊᖅᑎᑕᖏᑦ

ᐅᓪᓛᒃᑯᑦ.

ᐅᓪᓗᒥ, ᓄᓇᕗᒻᒥᐅᑦ ᐋᓐᓂᐊᕕᓕᕈᓐᓇᕐᓯᔪᑦ ᑰᒡᔪᐊᖅ, ᒫᓂᑑᐸᒧᑦ. ᑰᒡᔪᐊᒥᑦ ᓇᓗᓇᐃᕐᓯᓯᒪᔪᖃᙱᒻᒪ ᓄᕙᒡᔪᐊᕐᓇᖅ-19−ᒥᑦ ᑕᐃᒪᙵ ᐱᒋᐊᓚᐅᕐᑎᓪᓗᒍ ᓄᓇᕐᔪᐊᒥᑦ ᖃᓂᒪᓂᖅ, ᐃᓱᒪᒐᑦᑕ ᐊᑦᑕᖕᓇᓗᐊᕈᓐᓃᖕᒪᑦ ᐋᓐᓂᐊᕕᓕᐊᕐᑎᑦᑎᓕᕐᓗᑕ, ᐊᑲᐅᓂᕐᓴᐅᓪᓗᓂᓗ ᓄᓇᕗᒻᒥᐅᑦ ᐋᓐᓂᐊᕕᓕᐊᕈᓐᓇᕐᓗᑎᒃ ᓄᓇᕗᑦ−ᓯᓚᑖᓄ ᐱᔭᕆᐊᓕᖏᓐᓂᑦ.

ᐋᓐᓂᐊᕕᓕᐊᕐᑐᑦ ᒪᓕᒃᑎᖏᓪᓗ ᑰᒃᔪᐊᓕᐊᓲᑦ ᐃᓅᓕᓴᖅᑕᐅᔭᕐᑐᕐᓗᑎᒃ ᓄᓇᓕᖕᓃᖏᓐᓇᕐᓗᑎᒃᓗ ᐊᐅᓪᓚᕐᓯᒪᓂᖏᓐᓂᑦ, ᐅᑎᕈᓐᓇᖕᓂᐊᓕᕐᑐᑦ ᓄᓇᕗᒻᒧᑦ ᐃᓄᑐᐊᒃᑯᕕᖕᒦᓚᐅᖏᓪᓗᑎᒃ ᓄᓇᕗᑦ ᒐᕙᒪᒃᑯᖏᑦᑕ ᐃᓄᑐᐊᒃᑯᕕᖁᑎᖏᓐᓄᑦ. ᐊᓯᔾᔨᖅᑐᖃᖅᐸᑦ, ᖃᐅᔨᓴᒃᑲᓐᓂᕋᔭᖅᐳᒍᑦ ᐱᕙᒌᖅᓯᒪᓗᑕᓗ ᖃᐅᔨᓴᖅᐸᓪᓕᐊᓂᖕᓂᑦ ᓄᖅᑲᖅᑎᑲᐅᕐᑐᕋᓱᒡᓗᒋᓪᓗ ᓯᐊᒻᒪᒐᔭᖕᓂᖓ.

ᐊᐱᕐᓱᖅᑕᐅᓚᐅᖕᒥᒐᑦᑕ ᑖᒃᓯᓕᕆᔨᓂᑦ ᐱᔾᔪᑎᒋᓪᓗᒍ ᐊᐅᓚᓐᓂᕆᔭᑎᒃ. ᓄᑖᒥ ᑎᓕᐅᕆᔾᔪᑎᒥᑦ ᐃᓄᒋᐊᓂᑦ ᐅᖓᓯᒐᓱᖕᓂᖕᓂᑦ ᑲᑎᑉᐸᖕᓂᖕᓂᓪᓗ, ᑖᒃᓯᓕᕆᔩᑦ ᑮᓇᐅᔭᓂᑦ ᐱᔪᓐᓇᕐᑐᑦ ᐊᒥᓱᓂᑦ ᐃᒡᓗᒥᐅᖃᑎᒌᓂᑦ ᐊᑕᐅᓯᐊᖅ, ᖃᓄᐃᓕᐅᕆᐊᖃᖅᑕᖃᕐᖢᑎᒃ.

  • ᐊᒥᓲᒑᖓᒥᒃ ᐃᑭᒪᔪᑦ ᑖᒃᓯᒥᑦ, ᑕᒪᖕᒥᒃ ᒪᑐᐊᕐᓯᒪᔭᕆᐊᖃᖅᑐᑦ.
  • ᑖᒃᓯᓂᑦ ᐊᖁᑎᑦ ᒪᑐᐊᓂᑦ ᑐᓂᓯᔭᕆᐊᖃᖅᑐᑦ ᐃᑭᒪᔪᓄᑦ ᐱᖃᙱᑦᑐᓄᑦ.
  • ᐱᓗᐊᕐᑐᒥᒡᓕ, ᐊᖁᑎᐅᔪᑦ ᐊᖏᕐᑕᐅᖅᑳᕆᐊᓕᑦ ᐃᑭᒪᔪᓂᑦ ᐊᒥᓱᓂ ᐅᓯᓚᐅᙱᓐᓂᖓᓂᑦ. ᑕᐃᒪᓕ ᐃᑭᒪᔪᖅ, ᐃᑭᒪᔪᓕᒫᓪᓗ, ᐅᖃᕆᐊᖃᖅᑐᑦ ᖃᓄᐃᒃᓴᙱᓐᓂᕋᕐᓗᑎᒃ ᐃᑭᒪᖃᑎᖃᕐᓗᑎᒃ ᐊᓯᖏᓐᓂᑦ.
  • ᐃᑭᒪᔪᓕᒫᑦ ᓱᓕ ᐅᖃᕈᓐᓇᕐᑐᑦ ᐃᑭᒪᖃᑎᖃᕈᒪᙱᓪᓗᑎᒃ, ᐊᒻᒪᓗ, ᒫᓐᓇᐅᔪᖅ, ᑖᒃᓯᓕᕆᔨᑦ ᒪᓕᒋᐊᖃᖅᑐᑦ ᐊᑐᕐᑕᐅᔪᒪᔪᒥᑦ ᐃᑭᒪᔨᒧᑦ.

ᖁᔭᓕᔪᒪᕙᕗᑦ ᑖᒃᓯᓕᕆᔨᓕᒫᑦ ᒪᓕᑦᑎᐊᕐᓂᖏᓐᓂᑦ ᐊᑐᖁᔭᓂᑦ ᐊᒥᓲᓗᐊᕐᑎᑦᑎᙱᓪᓗᑎᒃ ᐅᓯᔭᒥᓂᒃ ᓴᓗᒪᑎᐊᕐᓗᑎᒃᓗ ᓄᓇᕗᒻᒥᐅᑦ ᐊᑦᑕᖕᓇᖅᑐᒦᖁᓇᒋᑦ ᖃᓄᐃᙱᑦᑎᐊᕐᓗᑎᒃᓗ.

ᑭᖑᓪᓕᖅᐹᒥᑦ, ᓂᕆᕝᕕᑦ, ᐃᒥᕐᕕᑦ, ᐊᓯᖏᓪᓗ ᐃᓗᐊᓃᑦᓲᑦ ᐅᒃᑯᐃᕈᓐᓇᕐᓯᔪᑦ, ᐅᖃᐅᑎᒃᑲᓐᓂᕈᒪᕙᒃᑲ ᓄᓇᕗᒻᒥᐅᑦ ᐃᓅᖃᑎᓂᑦ ᐅᖓᓯᒋᐊᖃᖕᓂᖕᓂᑦ, ᐊᒡᒐᑎᑦ ᓴᓗᒪᑦᑎᐊᕐᓗᑎᒃ, ᐊᐃᓯᒪᓗᓯᓗ ᖃᓂᒍᕕᑦ. ᐃᖅᑲᐅᒪᔭᕆᐊᖃᖅᐳᒍᑦ, ᐅᑎᕐᐸᓪᓕᐊᓕᕋᓗᐊᕐᓗᑕ ᖁᕕᐊᒋᔭᑦᑎᓐᓄᑦ, ᑖᓐᓇ ᓄᓇᕐᔪᐊᒥᑦ ᖃᓂᒪᓂᖅ ᐊᓂᒍᙱᒻᒪ ᓱᓕ, ᖃᓄᐃᓕᐅᕐᓂᐊᕐᔪᒃᓯᑦᑕᐅ ᑭᒃᑯᑐᐃᓐᓇᖕᓂᑦ ᐅᓪᓗᒥ ᐊᖏᔪᒥᑦ ᐊᒃᑐᐃᔪᓐᓇᕐᐳᖅ ᖃᐅᒃᐸ.

ᖁᔭᓐᓇᒦᒃ.

ᐃᓚᒋᔭᐅᓪᓗᓂ ᓄᓇᕗᑦ ᒐᕙᒪᖓᑕ ᐱᓇᔪᒃᑕᖏᓐᓂ ᓴᐳᔾᔨᓯᒪᔪᒪᓪᓗᑎᒃ ᓄᓇᕗᒻᒥᐅᓂᒃ ᑕᒪᑐᒧᖓ ᓄᕙᒡᔪᐊᕐᓇᖅ-19−ᒧᑦ, ᓄᓇᕗᑦ ᒐᕙᒪᖓᑕ ᐱᓕᕆᕝᕕᒋᑦ ᐅᑯᓂᖓ ᐊᑐᓕᖅᑎᑦᑎᓯᒪᕗᑦ:

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᔨᑦᑎᕋᕐᓂᕆᕙᒃᑕᖏᓐᓄᑦ

ᐅᖃᓗᒃᐸᒌᖕᓂᖅ ᐋᓐᓂᐊᕕᖕᓄᑦ

ᑭᓯᐊᓂ ᑐᐊᕕᖕᓇᖅᑐᒃᑯᑦ ᐋᓐᓂᐊᓕᕈᕕᑦ, ᐅᖃᓗᖅᑳᕆᑦ ᐋᓐᓂᐊᕕᖕᒧᑦ ᐅᐸᓚᐅᙱᓐᓂᕐᓂᑦ. ᐅᖃᐅᓯᕆᓗᒋᑦ ᖃᓄᐃᓐᓂᕆᔭᑎᑦ, ᐋᓐᓂᐊᓯᐅᑎᓪᓗ ᐅᖃᓘᑎᒃᑯᑦ ᖃᐅᔨᓴᕈᓐᓇᖅᑐᑦ ᐃᓂᒃᓴᓕᐅᕆᔪᓐᓇᕐᖢᑎᒡᓗ ᐃᓅᓕᓴᐃᑦᑎᐊᕐᓂᐊᕐᓗᑎᒃ.

ᒪᑐᐊᕐᓯᒪᖃᑦᑕᖕᓂᖅ ᐋᓐᓂᐊᕕᖕᓂᑦ

ᐋᓐᓂᐊᕕᓕᐊᕈᕕᑦ ᐊᓂᕐᓂᖕᓄᑦ ᖃᓄᐃᔾᔪᑎᐅᔪᒥᑦ ᓲᕐᓗ ᖁᐃᖅᓱᑲᑕᒡᓗᑎᒃ, ᑕᒋᐅᒃᓴᑲᑕᒡᓗᑎᒃ, ᑲᒃᑭᓕᑲᑕᒡᓗᑎᓪᓘᓐᓃᑦ, ᒪᑐᐊᖅᓯᒪᔭᕆᐊᖃᖅᐳᑎᑦ. ᒪᑐᐊᒃᓴᖃᙱᒃᑯᕕᑦ, ᐅᖃᐅᑎᓂᐊᕐᐸᑦ ᑕᑯᔭᑦ ᐋᓐᓂᐊᕕᖕᒥᑦ ᖃᓄᐃᓐᓂᕆᔭᕐᓂᒃ, ᑐᓂᔭᐅᔪᓐᓇᕐᓂᐊᖅᐳᑎᓪᓗ.

ᓄᑖᖅ ᖃᕆᑕᐅᔭᒃᑯᑦ ᑎᑎᕋᕐᕕᐅᔪᓐᓇᖅᑐᖅ ᓄᒃᑕᖅᑎᓄᑦ

ᓄᑖᒥᒃ ᖃᕆᑕᐅᔭᒃᑯᑦ ᑐᕌᕈᑎᒥᒃ ᐋᖅᑭᒃᓯᔪᖃᖅᓯᒪᕗᖅ ᓄᓇᕗᒻᒥᐅᓄᑦ ᐊᐅᓪᓚᕈᒪᓂᐊᖅᑐᓄᑦ ᐊᕕᒃᓯᒪᓂᖓᑕ ᐅᑭᐅᖅᑕᖅᑐᒥ ᓯᓚᑕᓄᑦ. ᑕᒪᕐᒥᑦᑎᐊᖅ ᓄᒃᑕᖅᑐᑦ ᑐᓂᓯᔭᕆᐊᖃᖅᐳᑦ ᐅᐸᒃᑕᐅᑦᑕᐃᓕᒪᓂᕐᒧᑦ ᑕᑕᑎᕆᐊᓕᖕᒥᒃ ᐅᑯᓄᖓ, NUisolationreservations@nunavutcare.ca ᖃᐅᔨᒪᓕᑐᐊᕈᑎᒃ ᓄᒃᑕᕐᓂᕐᒧᑦ ᐱᕙᒌᔭᖅᑕᐅᓯᒪᓂᕐᒥᓂᒃ, ᓇᓗᙱᑦᑎᐊᕈᒪᓂᕐᒧᑦ ᑖᒃᑯᐊ ᓄᒃᑕᖅᑐᖃᖅᐸᖕᓂᖓᓄᑦ ᐱᓕᕆᔨᑦ ᓇᓗᓇᐃᖅᓯᔪᓐᓇᖁᓪᓗᒋᑦ ᐃᒡᓗᕈᓯᕐᒥᒃ ᒪᓂᒪᔪᖃᕐᒪᖔᑦ ᐃᓂᒃᓴᓕᐅᕐᓗᑎᒡᓗ ᐃᓂᒋᓂᐊᖅᑕᒥᓂᒃ ᓇᓗᓇᐃᖅᑕᐅᓯᒪᔪᓂ ᐅᐸᒃᑕᐅᑦᑕᐃᓕᒪᓂᕐᒧᑦ ᐃᓂᒋᔭᐅᔪᓂ. ᑐᓴᖅᑕᐅᔪᒃᓴᒃᑲᓐᓂᕐᓂᒃ ᓇᓂᓯᔪᖃᕈᓐᓇᖅᐳᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᑭᐊᖅᑭᕕᖓᓂ.

ᐅᐸᒃᑕᐅᑦᑕᐃᓕᒪᕝᕕᐅᔪᓂ ᐃᓱᒫᓘᑎᖃᕈᕕᑦ ᐴᖅᓯᕕᒃ

ᓄᑖᒥᒃ ᖃᕆᑕᐅᔭᒃᑯᑦ ᑐᕌᕈᑎᒥᒃ ᐋᖅᑭᒃᓯᓯᒪᔪᖃᓕᖅᐳᖅ ᐱᐅᓂᖅᓴᒃᑯᑦ ᑭᐅᓯᖃᑦᑕᕈᒪᓂᕐᒧᑦ ᐃᓱᒫᓘᑕᐅᔪᓂᒃ ᐅᖃᐅᓯᐅᓯᒪᔪᓂᒡᓗ ᐱᓕᕆᕝᕕᒋᔭᐅᓯᒪᔪᓂᑦ ᐱᔭᕇᖅᓯᔪᓂᑦ 14−ᓄᑦ ᐅᓪᓗᓄᑦ ᐅᐸᒃᑕᐅᑦᑕᐃᓕᒪᕖᖕᓃᑦᑐᓂᒃ ᖃᓪᓗᓈᓂ ᑲᓇᑕᒥ. ᑖᓐᓇ ᓄᑖᖅ ᖃᕆᑕᐅᔭᒃᑯᑦ ᑎᑎᕋᕐᕕᒃ ᐲᖅᓯᓂᐊᖅᐳᖅ ᐊᒃᓱᕈᓐᓇᖅᑎᑦᑎᔪᒥᒃ ᓄᕙᒡᔪᐊᕐᓇᒧᑦ ᐊᑭᖃᙱᑦᑐᒧᑦ ᐅᖄᓚᕝᕕᒃᓴᐅᕙᒃᑐᒧᑦ, ᐃᓗᐊᖅᓴᖅᑕᐅᔭᖅᑐᖅᓯᒪᔪᓂᒃ ᐃᓅᖃᑎᖃᖅᐸᖕᓂᕐᒥᒃ ᐊᒻᒪᓗ CPHOTravelRequests ᐃᓕᐅᖅᑲᐃᕝᕕᒋᑎᑉᐸᒃᑕᖓᓄᑦ. ᐅᕝᕙ ᓄᑖᖅ ᑐᕌᕈᑖ isolationrelations@gov.nu.ca.

 

 

ᐅᓄᕐᓂᖏᑦ

ᑲᑎᖦᖢᒋᑦ (ᑕᒪᕐᒥᑦᑎᐊᖅ ᐊᓂᑦᑕᐃᓕᔭᕆᐊᖃᖅᑐᓄᑦ ᐃᓃᑦ)

ᐊᐅᓪᓚᖅᓯᒪᔫᑉ ᖃᓄᐃᑦᑑᓂᖓ

ᑐᔪᕐᒥᑎᑕᐅᔪᑦ ᐊᓂᑦᑕᐃᓕᒪᔪᓂ ᔫᓂ 21-ᒥᑦ ᐱᒋᐊᖅᖢᓂ

ᐋᓐᓂᐊᕕᓕᐊᖅᑐᓄᑦ ᐊᐅᓪᓚᖅᓯᒪᔪᑦ

260

ᐃᓄᐃᑦ

174

ᐃᓕᓐᓂᐊᖅᑏᑦ

0

ᑲᑎᖦᖢᒋᑦ

434


 

ᐊᐅᓪᓚᖅᐸᒃᑐᑦ ᐅᑎᖅᑎᑕᐅᓂᖏᓐᓄᑦ ᖃᓄᐃᓕᖓᓂᖏᑦ:

ᐊᐅᓪᓚᕐᕕᒃᓴᖓᑕ ᐅᓪᓗᐊ

ᖃᔅᓯᐅᓂᖏᑦ ᐊᐅᓪᓚᕐᓂᐊᖅᑐᑦ ᐅᐸᒃᑕᐅᑦᑕᐃᓕᒪᔪᓂᖔᖅᑐᑦ

ᔫᓂ 22

50

ᔫᓂ 23

26

ᔫᓂ 24

25


ᐱᕕᒡᔪᐊᓂᒃ ᐃᖅᑲᓇᐃᔭᖅᑎᓂᒃ ᐱᔪᒪᔾᔪᑕᐅᔪᑦ

ᔫᓂ 21−ᒥ ᐱᒋᐊᖅᖢᓂ, 1,726−ᓂᒃ ᑐᒃᓯᕋᖅᑐᖃᓚᐅᖅᐳᖅ, 1,282−ᖑᓪᓗᑎᒃ ᐃᖅᑲᓇᐃᔭᕆᐊᖃᓪᓚᕆᒃᑐᓂᒃ ᑐᒃᓯᕋᕈᑕᐅᔪᑦ.

ᑐᒃᓯᕋᕈᑕᐅᓯᒪᔪᑦ ᖃᓄᐃᓕᖓᓂᖏᑦ

#

%

ᐊᖏᖅᑕᐅᓯᒪᔪᑦ (ᐅᑯᐊᖑᕗᑦ ᐱᒻᒪᕆᐊᓗᐃᑦ ᐱᒻᒪᕆᐅᓗᐊᙱᑦᑐᓪᓗ)

1511

87.5%

ᐊᖏᕐᑕᐅᙱᑦᑐᑦ

191

11.1%

ᐅᑕᖅᑭᔪᑦ

4

0.2%

ᐊᐅᓪᓚᕐᕕᐅᔪᓐᓇᕐᑐᑦ ᐊᖏᖅᑕᖅ

20

1.2%

ᑲᑎᖦᖢᒋᑦ

1726

100%


ᑲᔪᓰᓐᓇᖅᑐᑦ ᐱᔨᑦᑎᕋᐅᑕᐅᔪᑦ:

ᐋᓐᓂᐊᖃᕐᓇᙱᑦᑐᓕᔨᓄᑦ ᐱᔨᑦᑎᕋᕐᓂᕆᔭᐅᕙᒃᑐᓄᑦ ᐃᑲᔪᖅᑕᐅᓂᐅᖃᑦᑕᖅᑐᑦ ᓱᓕ ᐊᑐᐃᓐᓇᐅᔪᑦ ᑕᒪᐃᓐᓄᑦ ᓄᓇᓕᖕᓂ 7-ᓄᑦ ᐅᓪᓗᓄᑦ ᐱᓇᓱᐊᕈᓯᕐᒥ. ᑐᐊᕕᕐᓇᙱᑦᑐᓕᒫᑦ ᑲᒪᒋᔭᕆᐊᓖᑦ ᐱᓕᕆᐊᖑᖃᑦᑕᕐᓂᐊᖅᑐᑦ ᖃᐅᑕᒫᑦ ᑐᐊᕕᕐᓇᓂᖏᑦ ᒪᓕᓪᓗᒋᑦ. ᑐᐊᕕᕐᓇᖅᑐᓕᕆᔨᓄᑦ ᐋᓐᓂᐊᕕᖕᒥᑦ ᐱᔨᑎᕋᐅᑎᖏᑦ ᓱᓕ ᐊᑐᐃᓐᓇᖏᓐᓇᕐᓂᐊᖅᑐᑦ 24−ᓄᑦ ᐃᑲᕐᕋᓄᑦ, ᐱᓇᓱᐊᕈᓯᓕᒫᑦᑎᐊᖅ. ᐃᓗᐊᖅᓴᖅᑕᐅᔭᕆᐊᖃᖅᑐᓕᒫᑦ ᐅᖄᓚᖃᑦᑕᖁᔭᐅᕗᑦ ᓴᖅᑭᓚᐅᙱᓐᓂᕐᒥᓂ ᐋᓐᓂᐊᕐᕕᖕᒧᑦ.

ᐱᒋᐊᕐᖢᓂ ᔫᓂ 8−ᒥᑦ, ᐊᒥᓲᓂᕐᓴᓂ ᒪᓂᒪᓂᖅᑕᖃᖃᑦᑕᕐᓂᐊᓕᖅᐳᖅ ᐅᐸᒃᓯᓗᓂ ᖃᓄᐃᙱᓐᓂᕐᒧᑦ ᖃᐅᔨᓴᖅᑕᐅᓂᕐᓂᒃ ᐋᓐᓂᐊᕕᓕᐊᕐᕕᖕᓂ ᑕᒫᓂᓕᒫᖅ ᐅᑭᐅᖅᑕᖅᑐᒥ ᐊᕕᒃᓯᒪᓂᕐᒥ. 

  • ᐃᖃᓗᖕᓂ, ᐅᖁᒪᐃᓐᓂᕐᓂᐊᕐᕕᒃ, ᑐᐊᕕᕐᓇᖅᑐᓕᕆᕝᕕᒃ ᐃᒡᓗᕈᓯᖅ ᐅᓂᒃᓯᒪᕝᕕᐅᕙᒃᑐᕐᓗ ᒪᑐᐃᖓᐃᓐᓇᕐᓂᐊᖅᑐᑦ.
  • ᖃᓄᐃᙱᑦᑎᐊᖅᑐᓄᑦ ᓄᑕᕋᓛᕐᓄᑦ ᐱᓕᕆᐊᖑᕙᒃᑐᑦ, ᓯᖓᐃᔪᓄᑦ ᑕᑯᔭᐅᕙᒃᑐᑦ ᑲᐱᔭᐅᕙᒃᑐᓪᓗ ᑲᔪᓰᓐᓇᖅᐳᑦ ᓄᓇᕘᓕᒫᒥ.
  • ᓘᒃᑖᑦ ᑲᔪᓰᓐᓇᕐᓂᐊᖅᑐᑦ ᓄᓇᓕᖕᓄᑦ ᐳᓚᕋᖃᑦᑕᕐᓂᖏᑦ. ᑕᒪᓐᓇ ᐊᔪᕐᓇᕐᓂᖅᐸᑦ, ᑕᑯᔭᐅᖃᑦᑕᕐᓂᐊᖅᑐᑦ ᑕᓚᕖᓴᒃᑯᑦ ᐃᓗᐊᖅᓴᖅᑕᐅᓗᑎᒃ ᐅᖄᓚᐅᑎᒃᑯᓪᓘᓐᓃᑦ.
  • ᐊᐅᖏᖅᑕᐅᓯᒪᔪᓂᑦ ᖃᐅᔨᓴᕐᕕᖓ ᐊᒻᒪ ᑕᕐᕋᖅᑐᖅᑕᐅᕕᖓ ᕿᑭᖅᑕᓂ ᐋᓐᓂᐊᕕᖕᒥ ᐃᓚᐃᓐᓇᖏᓐᓂᑦ ᑲᒪᖃᑦᑕᕐᓂᐊᖅᑐᑦ.

ᐋᖅᑭᒋᐊᖅᑕᐅᓯᒪᓕᖅᑐᑦ ᐱᔨᑦᑎᕋᕈᑕᐅᕙᒃᑐᑦ:

ᐃᓂᒃᓴᓕᐅᖅᑐᑦ ᐋᓐᓂᐊᕕᖕᒧᑦ ᑐᐊᕕᕐᓇᕐᓂᕆᔭᖏᑦ ᒪᓕᒃᑕᐅᖃᑦᑕᕐᓂᐊᖅᐳᑦ; ᑕᐃᒪᐃᒻᒪᑦ ᐅᖃᓘᑎᒃᑯᑦ ᐃᓂᒃᓴᓕᐅᖃᑦᑕᕐᓂᐊᖅᐳᑦ ᐅᕝᕙᓘᓐᓃᑦ ᐅᐸᒡᓗᑎᒃ.

ᐋᓐᓂᐊᕕᓕᐊᖅᑐᓄᑦ ᐊᐅᓪᓚᖃᑦᑕᖅᑐᑦ ᐅᓄᕈᓐᓃᕆᐊᖅᑕᐅᔪᑦ ᑭᓯᐊᓂ ᑐᐊᕕᕐᓇᓐᑐᓄᑦ ᐋᓐᓂᐊᕕᓕᐊᕆᐊᓕᖕᓄᑐᐊᖅ ᐊᐅᓚᖅᑎᑕᐅᖃᑦᑕᕐᓂᐊᖅᑐᑦ. ᑲᒪᒋᔭᐅᕙᒃᑐᑦ ᐅᖃᐅᔾᔪᖅᑕᐅᓂᐊᖅᐳᑦ ᐊᓯᔾᔨᖅᑕᐅᔪᓂᑦ ᐅᖃᖃᑎᒌᖃᑕᐅᓗᑎᒡᓗ ᑐᓴᕆᐊᓕᖏᓐᓂᑦ.

ᐃᖃᓗᖕᓂ, ᐋᓂᐊᕐᕕᓕᐊᖃᑦᑕᖅᑐᓄᑦ ᐊᒻᒪ ᑎᒥᒃᑯᑦ ᐃᖃᐃᓕᓴᕆᐊᓖᑦ ᑕᑯᔭᐅᖃᑦᑕᖅᑐᑦ ᑐᐊᕕᕐᓇᕐᓂᖏᑦ ᒪᓕᓪᓗᒋᑦ ᑕᑯᔭᐅᖃᑦᑕᖅᑐᑦ ᐊᒻᒪ ᑕᑯᔭᒃᓴᓕᐊᖑᓯᒪᔪᓂ ᓱᓕ ᑕᑯᖃᑦᑕᖅᑐᑦ. ᑕᒪᕐᒥᑦᑎᐊᖅ ᑕᑯᔭᔅᓴᓕᐊᖑᓯᒪᔪᑦ ᐃᓂᔅᓴᓕᐅᖅᑕᐅᓯᒪᔪᑦ ᑐᐊᕕᕐᓇᓂᖏᑦᑎᒍᑦ ᒪᓕᓪᓗᒋᑦ ᐋᖅᑭᒃᒋᐊᖅᑕᐅᒃᑲᓐᓂᖅᐸᓪᓕᐊᕗᑦ.

ᐋᓐᐊᓂᕕᖕᒧᑦ ᐅᓂᒃᑐᑦ ᕿᑭᖅᑕᓂ ᐋᓐᓂᐊᕕᖕᒥ ᖃᔅᓰᓐᓇᕐᓂᒃ ᐳᓛᖅᑕᐅᑎᑦᑎᑲᑕᒃᑐᑦ ᐊᐱᖅᓱᖅᑕᐅᑲᑖᓪᓚᓚᐅᖅᖢᑎᒃ.

MHA−ᑯᑦ ᐅᖄᓚᐅᑎᒃᑯᖔᖅ ᖃᐅᔨᓴᖅᑕᐅᖃᑦᑕᕐᓂᐊᓕᖅᑐᑦ ᐃᑲᔪᖅᑕᐅᖃᕐᓗᑎᓪᓗ ᐃᓚᖏᓐᓄᑦ ᐃᓄᓕᕆᔭᐅᖃᑦᑕᖅᑐᓄᑦ. ᑕᑯᔭᔅᓴᓕᐊᖑᓯᒪᔪᑦ ᐃᔭᒐᖏᓐᓂᑦ ᐊᐃᔅᓯᕆᐊᓖᑦ ᐊᒻᒪ ᐱᓕᕆᖃᖅᑕᕐᓂᕆᕙᑦᑕᖏᑦ ᓱᓕ ᐊᓯᔾᔨᖏᑦᑐᑦ. ᑐᐅᕕᕐᓇᖅᑐᒦᓪᓚᕆᒃᑯᕕᑦ, ᐋᓐᓂᐊᕐᕕᖕᒧᐊᕐᓗᑎᑦ. ᐊᖏᕐᕋᕆᔭᐅᔪᓂ ᐅᐸᒃᓯᕙᖕᓃᑦ ᐃᓗᐊᖅᓴᐃᔭᖅᑐᕐᓗᓂ ᐱᓕᕆᐊᖑᓂᐊᖅᐳᑦ ᐊᑕᐅᓯᐅᓈᖅᑎᕐᓗᒋᑦ ᑕᐃᒪᐃᓕᐅᕆᐊᖃᖅᐸᑕ.

ᐱᒋᐊᕐᓗᓂ ᔫᓂ 15, ᑭᒍᑎᓕᕆᔨᒃᑯᑦ ᐅᒃᑯᐃᕈᓐᓇᕐᓯᓂᐊᓕᕐᑐᑦ, ᑕᒪᓐᓇ ᐱᔨᑦᑎᕋᐅᑎ ᐊᑐᐃᓐᓇᐅᙱᑐᐃᓐᓇᕆᐊᓖᑦ ᓄᓇᓕᓕᒫᓂ ᒫᓐᓇᑲᐅᑎᒋ. ᓄᓇᓕᖕᓄᑦ ᐱᔨᑦᑎᕋᐅᑎᑦ ᑭᖑᕙᓯᖕᓂᐊᕐᑐᓄᑦ, ᑐᐊᕕᖕᓇᖅᑐᒃᑰᕈᓐᓇᓛᖕᒥᔪᑦ.

ᒪᑐᔭᐅᔪᖅ/ᓄᖅᑲᖅᑎᑕᐅᔪᖅ/ᓄᖅᑲᖓᑎᑕᓚᐅᑲᒃᑐᖅ ᐱᔨᑦᑎᕋᐅᑏᑦ:

ᐱᑐᐃᓐᓇᐅᙱᑦᑐᔨᕆᕝᕖᑦ ᐃᓗᐊᖅᓴᖅᑕᐅᓃᑦ ᓄᖅᑲᖅᑎᑕᐅᓯᒪᓕᖅᐳᑦ. ᐱᓕᕆᔪᖃᖅᐸᓪᓕᐊᕗᖅ ᖃᐅᔨᒪᓕᕈᒪᓂᕐᒧᑦ ᓇᓕᐊᒃ ᐃᓗᐊᖅᓴᖅᑕᐅᔭᕆᐊᓖᑦ ᑲᒪᒋᔭᐅᔪᓐᓇᕐᒪᖔᑕ ᐅᖄᓚᐅᑎᒃᑯᑦ/ᖃᕆᓴᐅᔭᒃᑯᑦ ᑲᒪᒋᔭᐅᓗᑎᒃ.

ᐊᐅᓪᓚᕆᐊᓖᑦ ᐱᔭᕆᐊᖃᓪᓚᕆᖏᑦᑐᑦ ᐃᓱᒪᓕᕆᔨᒃᑯᑎᒍᑦ ᐱᓕᕆᕝᕕᐅᕙᒃᑐᓄᑦ ᐃᓚᒌᓐᓄᓪᓗ ᓄᖅᑲᖅᑎᑕᐅᕗᑦ. ᐊᐅᓪᓚᕆᐊᖃᖅᑐᓕᒫᑦ ᖃᑕᙳᑎᒥᓂᒃ ᐋᓐᓂᐊᕐᕕᖕᒦᑦᑐᒥᒃ ᑕᑯᔭᖅᑐᖅᐸᒃᑐᑦ ᓄᖅᑲᖅᑎᑕᐅᔪᑦ.

ᐳᓛᕆᐊᖅᑐᖃᖃᑦᑕᕈᓐᓇᔾᔮᙱᑦᑐᖅ ᐊᕗᖓᑲᓪᓚ ᑲᒪᒋᔭᖃᖅᐸᖕᓂᕐᒧᑦ ᐃᓂᒋᔭᐅᔪᐅᓂ ᓄᓇᕗᒻᒥ − ᑎᒥᒥᒍᑦ ᐃᓕᖅᑯᓯᖅᓱᙱᑦᑐᓄᑦ ᐃᓂᒋᔭᐅᔪᓂ ᐃᓐᓇᐃᓪᓗ ᐊᖏᕐᕋᕆᔭᖏᓐᓂ.

 

ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ

ᐱᔪᒪᔾᔪᑕᐅᔪᑦ ᐃᓯᕈᒪᓗᓂ ᐅᑭᐅᖅᑕᖅᑐᒥ ᐊᕕᒃᓯᒪᓂᕐᒧᑦ ᐃᒡᓗᓕᐅᕐᓂᕐᒧᑦ ᐊᒃᑐᐊᓂᓕᖕᓄᑦ ᐱᓕᕆᐊᒃᓴᓄᑦ, ᓄᒃᑕᕈᒪᓗᓂᓘᓐᓃᑦ ᐊᕕᒃᓯᓂᐅᑉ ᐃᓗᐊᓂ ᐃᒡᓗᓕᐅᕐᓂᕐᒧᑦ ᐊᒃᑐᐊᓂᓕᖕᓄᑦ ᐱᓕᕆᐊᒃᓴᓄᑦ, ᓇᒃᓯᐅᔾᔭᐅᔪᓐᓇᖅᐳᑦ ᐅᕗᖓ,  CPHOconstructionrequests@gov.nu.ca

ᐃᒡᓗᓕᐅᖅᑏᑦ ᐱᔭᕇᖅᓯᔪᑦ ᐅᐸᒃᑕᐅᑦᑕᐃᓕᒪᓂᕐᒥᒃ: 307

ᐃᒡᓗᓕᐅᖅᑏᑦ ᐱᔭᕇᖅᓯᔪᑦ ᐅᐸᒃᑕᐅᑦᑕᐃᓕᒪᓂᕐᒥᒃ ᔫᓂ 22, 2020 ᐱᒋᐊᖅᖢᒍ

ᐊᐅᓪᓚᕐᕕᒃᓴᖓᑕ ᐅᓪᓗᐊ

ᓈᓴᐅᑎᖓ

ᓇᒧᙵᐅᓂᐊᖅᐸᑦ

18-ᔫᓐ-20

7

ᐃᖃᓗᐃᑦ

18-ᔫᓐ-20

1

ᑲᖏᖅᑐᒑᐱᒃ

18-ᔫᓐ-20

1

ᒥᑦᑎᒪᑕᓕᒃ

18-ᔫᓐ-20

2

ᑲᖏᖅᖠᓂᖅ

18-ᔫᓐ-20

7

ᐊᕐᕕᐊᑦ

20-ᔫᓂ-20

5

ᐅᖅᓱᖅᑑᖅ

21-ᔫᓂ-20

1

ᑲᖏᖅᑐᒑᐱᒃ

21-ᔫᓂ-20

4

ᓴᓂᕋᔭᒃ

21-ᔫᓂ-20

1

ᖃᐅᓱᐃᑦᑐᖅ

22-ᔫᓂ-20

5

ᐊᕐᕕᐊᑦ

22-ᔫᓂ-20

4

ᑲᖏᖅᖠᓂᖅ


ᓄᓇᕗᑦ ᒐᕙᒪᖓᑕ ᑎᑎᕋᕐᕕᖏᑦ ᑕᒪᐃᓐᓂ ᓄᓇᓕᖕᓂ ᓱᓕ ᒫᓐᓇ ᒪᑐᓯᒪᕗᑦ ᑭᒃᑯᑐᐃᓐᓇᓄᑦ ᐅᐸᒃᑕᐅᔪᓐᓇᙱᖦᖢᑎᒃ ᒫᓐᓇᐅᔪᒃᑯᑦ. ᑭᓇᑐᐃᓐᓇᒥᒃ ᑕᖅᑳᙵᑐᐃᓐᓇᖅ ᑲᑎᖃᑎᖃᕆᐊᖃᖅᑐᖃᖅᐸᑦ ᓄᓇᕗᑦ ᒐᕙᒪᖓᑕ ᐊᑐᕆᐊᖃᓪᓚᕆᒃᑐᓂᒃ ᐱᔨᑦᑎᕋᕐᕕᖃᕐᓂᕐᒧᑦ ᐃᖅᑲᓇᐃᔭᖅᑎᒥᒃ, ᐊᓯᐊᒍᖔᖅ ᐋᖅᑭᒃᓱᖅᑕᐅᔪᓂᒃ ᐋᖅᑭᒃᓱᖅᑕᐅᔪᖃᕆᐊᖃᖅᐳᖅ.  ᐅᖄᓚᖅᑳᕐᓂᐊᖅᐳᑎᑦ ᓯᕗᓂᑲᓪᓚᖓᒍᑦ ᐃᓂᒃᓴᓕᐅᕐᓗᑎᓪᓗ.

 

ᓄᓇᕗᒻᒥᐅᓂᑦ ᖃᓄᐃᙱᑦᑎᐊᖅᑎᑦᑎᓇᓱᒡᓗᑕ ᑕᒪᑦᑕ ᑲᒪᒋᔭᒃᓴᕆᔭᕗᑦ! ᐳᐃᒍᖅᑕᐃᓕᒋᑦ: ᐊᒡᒐᑎᑦᓱᓕᑦᑕᕐᓃᑦ  ᐃᖅᑲᓇᐃᔭᖅᑎᓄᑦ ᐅᖃᐅᔾᔪᐃᔾᔪᑕᐅᔪᓂᑦ, ᐊᖏᕐᕋᖅᓯᒪᐃᓐᓇᕐᓗᑕᓗ ᖃᓂᒪᒍᕕᑦ.