ᐅᖃᓚᐅᑎᓯᐅᑏᑦ

You are here

ᓄᕙᒡᔪᐊᕐᓇᖅ-19 ᓄᓇᕗᒻᒥ ᒐᕙᒪᒃᑯᑦ ᓄᑖᙳᕆᐊᖅᑎᑕᖏᑦ - ᒪᐃ 28, 2020

ᒪᐃ 28, 2020

 

ᓯᕗᓕᖅᑎᒥᑦ ᑐᓴᒐᒃᓴᖅ:

ᐅᓪᓛᒃᑯᑦ. ᓱᓕ ᓇᓗᓇᐃᖅᓯᒪᓪᓚᕆᒃᑐᓂᒃ ᑕᐃᒪᐃᓐᓇᓱᒋᔭᐅᔪᓂᒡᓘᓪᓃᑦ ᓄᕙᒡᔪᐊᕐᓇᖅ-19−ᒥᒃ ᐱᑕᖃᙱᓚᖅ ᓄᓇᕗᒻᒥ. 

ᐅᓪᓗᒥᒧᑦ ᑎᑭᖦᖢᒍ, ᑲᑎᖦᖢᒋᑦ ᐃᓄᐃᑦ ᖃᐅᔨᓴᖅᑕᐅᕝᕕᐅᓯᒪᔪᑦ 1044−ᖑᕗᑦ. 124 ᐃᓄᐃᑦ ᒫᓐᓇ ᖃᐅᔨᓴᖅᑕᐅᕙᓪᓕᐊᖏᓐᓇᖅᐳᑦ.

ᐅᖓᕙᕆᐊᖅᓯᕗᒍᑦ ᓄᓇᕗᒻᒥᐅᑦ ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᑭᒃᑯᑐᐃᓐᓇᓂᒃ ᑐᐊᕕᕐᓇᖅᑐᖁᑎᖓᓂᒃ, ᓱᓕ ᐱᓇᓱᐊᕈᓯᒃᑲᓐᓃᖕᓄᑦ ᒪᕐᕉᖕᓄᑦ, ᔫᓂ 11−ᖑᕋᓱᖕᓂᖓᓂ.

ᐊᑏ ᖁᐊᖅᓵᕐᓇᖅᑐᒦᙱᓪᓗᑕ ᐅᔾᔨᖅᓱᑦᑎᐊᖏᓐᓇᕐᓗᑕᓗ ᐱᓇᓱᐊᕈᓯᐅᑉ ᓄᙳᒋᓂᐊᖅᑕᖓᓄᐊᓕᕐᒥᑎᓪᓗᑕ. ᓄᕙᒡᔪᐊᕐᓇᖅ-19 ᓱᓕ ᐊᑦᑕᕐᓇᕐᒪᑦ, ᐃᒪᐃᒃᑲᓗᐊᖅᑎᓪᓗᑕ, ᐊᔪᕐᓇᕈᓐᓃᖅᓯᑦᑎᕙᓪᓕᐊᒐᓗᐊᖅᑎᓪᓗᑕ ᐊᔪᕐᓇᖅᑎᑦᑎᔾᔪᑕᐅᓯᒪᔪᓂᒃ, ᓱᒃᑲᐃᖦᖢᑕᓗ ᐱᓕᕆᐊᖃᖅᐸᓪᓕᐊᑎᓪᓗᑕ ᓄᑖᒧᑦ ᐊᑐᖃᑦᑕᕐᓂᐊᓕᖅᑕᑦᑎᓐᓄᑦ. ᐊᒡᒐᑎᑦ ᐅᐊᓴᕋᔪᒃᐸᒡᓗᒋᑦ, ᒪᕐᕉᖕᓂᒃ ᒦᑖᖕᓂᒃ ᐅᖓᓯᒌᖃᑦᑕᐅᑎᕙᒡᓗᓯ, ᐊᑐᖅᐸᒡᓗᓯᓗ ᑎᒥᒃᑯᑦ ᐅᖓᓯᒌᖃᑦᑕᐅᑎᓂᕐᒥᒃ, ᐊᖏᕐᕋᖅᓯᒪᕙᒡᓗᓯᓗ ᖃᓄᑐᐃᓐᓇᑦᑎᐊᖅ ᖃᓂᒪᖅᑰᔨᒍᔅᓯ.

ᐱᓕᕆᖃᑎᒌᒋᐊᖃᖅᐳᒍᑦ ᑕᐃᒪᐃᓪᓚᕆᒍᒪᒍᑦᑕ, ᖃᐅᔨᒪᑦᑎᐊᕐᓗᑕᓗ ᑲᔪᓰᓐᓇᕐᓂᑦᑎᓐᓂᒃ ᓄᓇᕗᑦ ᐊᑐᕐᓂᐊᖅᑕᖓᓄᑦ.

ᖃᔅᓯᑲᓪᓚᖕᓂᒃ ᓄᑖᙳᕆᐊᖅᓯᒪᔪᓂᒃ ᐱᑕᖃᖅᐳᖅ ᓘᒃᑖᖅ ᐹᑐᓴᓐ−ᒥᑦ ᐱᓕᕆᖃᑎᒋᕙᒃᑕᓐᓂᓪᓗ ᐅᓪᓛᖅ ᑕᒪᑐᒪᓂ, ᑕᐃᒪᓕ ᐱᒋᐊᖅᑎᓯᑲᐅᑎᒋᓂᐊᖅᐸᒃᑲ.

 

ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᐅᑉ ᓄᑖᙳᕆᐊᖅᑎᑕᖏᑦ

ᐅᓪᓛᒃᑯᑦ. ᐱᕕᒃᓴᖃᖅᑎᑕᐅᓂᓐᓂ ᑐᑭᓯᓇᖅᓯᑎᑦᑎᒃᑲᓐᓂᕈᒪᕗᖓ ᖃᓄᐃᓕᖓᔭᕆᐊᖃᕐᓂᕐᓂᒃ ᐃᓱᒪᒃᓴᖅᓯᐅᕈᑎᖃᕐᓂᐊᕈᑦᑕ ᐊᓯᔾᔨᖅᓯᓇᔭᕐᓂᕐᒥᒃ ᒪᓐᓇ ᑭᒡᓕᒋᔭᐅᔪᓄᑦ ᐊᑐᖅᑕᐅᔭᕆᐊᓕᖕᓂᒃ. ᑭᖑᓂᑦᑎᓐᓂ ᓇᓗᓇᐃᖅᓯᓯᒪᕗᖓ ᑕᒪᒃᑯᐊ ᑭᒡᓕᒋᔭᐅᔪᓂ ᐊᔪᓕᖅᑕᖅᑎᑦᑎᔾᔪᑏᑦ ᒫᓐᓇ ᐊᑐᖅᑕᐅᔭᕆᐊᓖᑦ ᑭᖑᓪᓕᖅᐸᐅᑐᐃᓐᓇᕆᐊᖃᕐᓂᖏᓐᓂᒃ ᐊᑐᕈᓐᓃᖅᑎᑕᐅᓗᑎᒃ ᐋᓐᓂᐊᖅᑕᐃᓕᒪᔪᓕᕆᓂᕐᒥ ᑭᒃᑯᑐᐃᓐᓇᕐᓄᑦ ᐊᑐᖅᑕᐅᔭᕆᐊᓕᖕᓂ. 

ᑕᒪᓐᓇ ᑕᐃᒪᐃᔾᔪᑎᖃᖅᐳᖅ ᑕᒪᓐᓇ ᓄᒃᑕᕐᓂᖅ ᓄᓇᕗᒻᒧᑦ ᓯᓚᑖᓕᑦ ᐊᕕᒃᓯᒪᓂᕆᔭᐅᔫᑉ ᖁᐊᖅᓵᕐᓇᖅᑐᒦᑎᑦᑎᓛᖑᔪᓐᓇᕐᒪᑦ. ᑲᔪᓰᓐᓇᕈᒪᒍᑦᑕ ᓄᓇᕗᑦ ᐊᑐᕐᓂᐊᖅᑕᖓᓄᑦ, ᐲᔭᐃᓗᑕᓗ ᑭᒃᑯᑐᐃᓐᓇᓂᒃ ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᐊᑐᖅᑕᐅᒃᑲᓐᓂᕆᐊᓕᖕᓂᒃ ᐊᕕᒃᓯᒪᓂᐅᑉ ᐅᑭᐅᖅᑕᖅᑐᒥ ᐃᓗᐊᓂ, ᑕᐃᒪᓕ ᑲᔪᓯᑎᑦᑏᓐᓇᕆᐊᖃᖅᐳᒍᑦ ᓲᖑᔪᓂᒃ ᓄᒃᑕᕐᓂᕐᒧᑦ ᐊᑐᖅᑎᓯᒪᔭᑦᑎᓐᓂᒃ. ᒫᓐᓇ ᑕᕝᕙ ᐱᕕᒃᓴᑦᑎᐊᕙᐅᓂᖅᐹᖑᕗᖅ ᑕᒪᐃᓐᓄᑦ ᐅᑎᕐᓂᐊᕐᓗᑕ ᐱᓕᕆᐊᕆᕙᒃᑕᑦᑎᓐᓄᑦ ᖁᕕᐊᒋᔭᑦᑎᓐᓄᑦ ᐱᓕᕆᐊᖑᕙᒃᑐᓄᓪᓗ ᐊᑐᓪᓚᕆᒋᐊᖃᖅᐸᒃᑕᑦᑎᓐᓄᑦ, ᑕᐃᒪᐃᓕᐅᕐᓂᑦᑎᓐᓂᓗ ᓴᐳᔾᔨᓯᒪᓗᑕ ᖃᓄᐃᙱᑦᑎᐊᕈᓐᓇᕐᓂᖏᓐᓂᒃᖁᐊᖅᓵᕐᓇᖅᑐᒦᙱᑦᑐᓐᓇᕐᓂᖏᓐᓂᒡᓗ ᓄᓇᕗᒻᒥᐅᑦ.

ᑕᐃᒪᓐᓇ ᐅᖄᓪᓚᓚᐅᕐᓗᖓ, ᑲᔪᓯᑎᑦᑎᑦᑎᕐᓂᖅ ᐅᑯᓂᖓ ᖃᓄᐃᓕᖓᓕᕆᐊᖃᕐᓂᕐᓂᒃ ᐋᖅᑭᒃᓯᒪᓕᖅᑎᑦᑎᑐᐃᓐᓇᕆᐊᓕᒃ ᐋᖅᑭᒃᑕᐅᓇᔭᖅᑐᓂᒃ ᐊᓯᔾᔨᖅᓯᓂᐊᕐᓗᓂ ᑭᒡᓕᒋᔭᑦᑎᓐᓄᑦ ᐊᑐᕆᐊᖃᖅᑕᑦᑎᓐᓂᒃ.

  • ᐋᖅᑭᒃᓯᔪᖃᕐᓂᖅᐸᑦ ᑲᐴᑕᐅᔪᓐᓇᖅᑐᒥᒃ ᓄᕙᒡᔪᐊᕐᓇᖅ-19−ᒧᑦ. ᑕᒪᓐᓇ ᐅᖃᐅᓯᕆᓯᒫᓂᓕᖅᐸᕗᑦ, ᐃᒪᐃᒃᑲᓗᐊᖅᑎᓪᓗᒍ, ᑲᐱᔭᐅᔾᔪᑎᒃᓴᒥᒃ ᐋᖅᑭᑕᐅᔪᖃᔾᔮᖅᑰᔨᙱᑎᓪᓗᒍᒪᓂᒪᑎᑕᐅᓕᕐᓗᓂᓗ ᖃᖓᑦᑎᐊᒃᑯᑦ, ᓱᓕ ᑕᒪᓐᓇ ᐱᔾᔪᑕᐅᕗᖅ  ᐊᒃᑐᖅᓯᕐᔪᐊᕋᔭᖅᖢᓂ ᖃᓄᐃᓕᐅᕐᓂᕆᔭᐅᓕᖅᑐᒥᒃ ᑕᒪᐃᓐᓄᑦ ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᑭᒃᑯᑐᐃᓐᓇᕐᓄᑦ ᐊᑐᖅᑕᐅᔭᕆᐊᓕᖕᓄᑦ;
  • ᐱᕙᓪᓕᐊᑎᑦᑎᔪᖃᕐᓗᓂ ᖃᐅᔨᔪᖃᕐᓗᓂᓘᓐᓃᑦ ᑲᔪᓯᓂᖃᑦᑎᐊᕈᓐᓇᖅᑐᒥᒃ ᐃᓗᐊᖅᓴᐅᑕᐅᔪᓐᓇᖅᑐᒥᒃ ᓄᕙᒡᔪᐊᕐᓇᖅ-19−ᒧᑦ;
  • ᓇᓗᓇᕈᓐᓃᖅᑎᑦᑎᔪᖃᖅᐸᑦ ᑕᒪᓐᓇ ᓄᕙᒡᔪᐊᕐᓇᖅ-19 ᐊᐅᓚᑕᐅᕝᕕᐅᔪᓐᓇᖅᓯᓂᖓᓂᒃᖃᓂᒋᔭᑦᑎᓐᓂ ᐃᓂᒋᔭᐅᖕᒥᔪᓂ ᐱᔪᓐᓇᕐᕕᖃᕐᕕᐅᓪᓗᑎᒃ. ᑕᒪᓐᓇ ᐃᒪᓐᓇ ᑐᑭᖃᖅᐳᖅ, ᐅᓄᕈᓐᓃᖅᑎᑦᑎᑐᐃᓐᓇᙱᓪᓗᑕ ᖃᔅᓯᐅᓂᖏᓐᓂᒃ ᑕᐃᒪᐃᑦᑐᓖᑦ, ᑕᑯᔭᕆᐊᖃᕋᔭᖅᐳᒍᑦ ᖃᐅᔨᔾᔪᑕᐅᔪᓐᓇᖅᑐᓂᒃ ᑕᒪᓐᓇ ᓄᓇᓕᖕᓂ ᓯᐊᒻᒪᒃᑎᕆᕙᓪᓕᐊᓂᖅ ᖃᓂᒋᔭᐅᔪᓂ ᐃᓂᒋᔭᐅᖕᒥᔪᓂ ᒥᑭᓐᓂᖓᓂᒃ ᓄᖅᑲᖓᑎᑕᐅᓇᓱᒃᖢᓂᓗ;
  • ᐊᒻᒪᐃᓛᒃ ᑭᖑᓪᓕᕐᒥᒃ, ᐊᓂᒍᐃᑎᑦᑎᓂᖅ ᑲᔪᓰᓐᓇᕈᓐᓇᖅᑐᒥᒃ ᑲᔪᓯᑎᑕᐅᖏᓐᓇᖅᑐᒥᒡᓗ ᖃᐅᔨᓴᖅᓯᓂᕐᒧᑦ ᐊᔪᙱᓐᓂᖃᕐᓂᕐᒥᒃ ᑕᒪᐃᓐᓂ ᐊᑐᓂᑦ ᓄᓇᓕᖕᓂ ᓄᓇᕗᒻᒥ.

ᐊᐃᑦᑖᖑᒐᓗᐊᖅ, ᐊᒥᓲᓂᖏᑦ ᑕᒪᒃᑯᐊ ᐱᔪᑕᐅᔪᑦ ᐊᐅᓚᑦᑎᕝᕕᒋᔪᓐᓇᙱᓐᓇᑦᑎᒍ,ᓄᓇᕐᔪᐊᕐᒥᓗ ᐊᓯᔾᔨᖅᐸᓪᓕᐊᖏᓐᓇᖅᑐᖅ ᖃᓄᐃᓕᕙᓪᓕᖓᓂᕆᔭᐅᔪᖅ ᓇᐅᑦᑎᖅᓱᐃᓐᓇᕐᓂᐊᖅᖢᑎᒍ. ᑕᐃᒪᐃᖏᓐᓇᐅᔭᖅᑐᑎᑐᑦ, ᐋᖅᑭᒃᓯᒪᓕᖅᑎᑕᕗᑦ ᐱᔾᔪᑎᓖᑦ ᑭᒡᓕᒋᔭᐅᔪᒥᒃ ᐊᑐᖅᑕᐅᔭᕆᐊᓕᖕᓄᑦ ᑕᓯᐅᖅᑕᐅᓂᐊᖅᐳᑦ ᖃᐅᔨᔾᔪᑕᐅᓯᒪᔪᓂᑦ, ᐋᖅᑭᒃᓱᖅᓯᒪᓂᖃᕐᓂᐊᖅᖢᑎᒡᓗᓴᐳᔾᔨᓯᒪᔪᒪᓗᑎᒃ ᑕᐃᒪᐃᙱᓐᓇᖅᑎᑦᑎᔪᒪᓪᓗᑎᒡᓗ ᖃᓄᐃᙱᑦᑎᐊᕐᓂᖏᓐᓂᒃ ᖁᐊᖅᓵᕐᓇᖅᑐᒦᙱᓐᓂᖏᓐᓂᒡᓗ ᓄᓇᕗᒻᒥᐅᑦ, ᑕᒪᓐᓇ ᓄᓇᕐᔪᐊᓕᒫᒥ ᖃᓂᒪᓐᓇᖅ ᐱᑕᖃᕐᓂᓕᒫᖓᓂ. 

ᐃᖅᑲᐃᑎᑦᑐᒪᕙᒃᑲ ᓄᓇᕗᒻᒥᐅᑦ ᓇᒡᒐᔾᔭ, ᔫᓂ 1 ᐱᒋᐊᕐᓗᓂ, ᓯᓚᒥ ᐱᙳᐊᕆᐊᖅᑐᕐᕖᑦ, ᐊᕕᒃᓯᒪᓂᕐᒥ ᒥᕐᙳᐃᖅᓯᕐᕖᑦ, ᐸᐃᕆᕝᕖᓪᓗ ᐊᔪᕐᑎᑕᐅᔾᔮᔪᓐᓃᖅᐳᑦ ᒪᑐᐃᕈᓐᓇᖅᓯᑎᑕᐅᓗᑎᒃ, ᖃᔅᓯᐅᓂᕆᔭᖏᓪᓗ ᓯᓚᒥ ᑲᑎᓐᓂᕆᔭᐅᔪᑦ 25−ᒧᑦ ᐊᒥᓲᓂᖃᕈᓐᓇᓕᖅᖢᑎᒃ. ᔫᓂ 1−ᒥᑦᑕᐅᖅ, ᒪᕐᕈᐃᖅᓱᕐᓗᒍ ᐱᓇᓱᐊᕈᓯᕐᒥ ᐅᖃᐅᓯᖃᖃᑦᑕᕐᓂᐊᓕᖅᐳᒍᑦ ᖃᐅᔨᓴᕐᓂᕐᓄᑦ, ᒥᑭᒡᓕᒋᐊᖅᑎᑦᑎᑐᐃᓐᓇᕆᐊᖃᕐᓂᕐᒧᓪᓗ ᑕᒪᒃᑯᓂᖓ ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᑭᒃᑯᑐᐃᓐᓇᕐᓄᑦ ᐊᑐᖅᑕᐅᔭᕆᐊᖃᖅᑎᑕᑦᑎᓐᓂᒃ. ᐱᔾᔪᑎᒋᔭᖓ ᖃᓄᐃᒻᒪᑦ ᓂᕈᐊᕆᔭᖃᕐᒪᖔᑦᑕ ᒪᕐᕉᖕᓂᒃ ᐱᓇᓱᐊᕈᓰᖕᓂᒃ ᐊᑐᖃᑦᑕᕐᓂᐊᕐᓂᕆᔭᑦᑎᓐᓂᒃ ᑐᑭᓯᓇᑦᑎᐊᖅᐳᖅ. ᑕᒪᕐᒥᑦᑎᐊᖅ ᖃᐅᔨᔾᔪᑕᐅᓯᒪᔪᑦ ᓇᓗᓇᐃᖅᓯᖅᑰᔨᕗᑦ ᐃᒪᓐᓇ, 14 ᐅᓪᓗᐃᑦ ᐅᓄᓛᖑᓂᖏᓐᓂᒃ ᑕᒪᓐᓇ ᓄᕙᒡᔪᐊᖕᓇᖅ−19 ᓴᖅᑭᓐᓂᐊᖅᑎᓪᓗᒍ. ᑕᐃᒪᐃᓐᓂᖓᓄᑦ, ᑖᓐᓇ 14−ᓄᑦ ᐅᓪᓗᓄᑦ ᐱᕕᒃᓴᖅ ᐅᕙᑦᑎᓐᓂᒃ ᐱᕕᒃᓴᖃᖅᑎᑦᑎᓂᐊᖅᖢᓂ ᖃᐅᔨᓇᓱᒡᕕᖃᕐᓂᕐᒥᒃ ᐊᕙᑎᑦᑎᓐᓂᒃ, ᑐᓴᐅᒪᑦᑎᐊᕐᓂᒃᑯᓪᓗ ᐋᖅᑭᒃᓯᒪᓕᖅᑎᑦᑎᕙᒡᓗᑕ, ᒫᓐᓇᒨᖓᓛᓂᒃ ᐱᔭᐅᔪᓂᒃ ᑐᓴᖅᑕᐅᔪᒃᓴᓂᒃ ᐊᑐᕐᓗᑕ.  

ᐳᐃᒍᖅᑕᐃᓕᒋᔅᓯ, ᖁᐊᖅᓵᕐᓇᖅᑐᒥᒃ ᖃᐅᔨᔭᐅᔪᖃᖅᐸᑦ, ᐱᓕᕆᓯᑲᐅᑎᒋᔭᕆᐊᖃᑐᐃᓐᓇᕆᐊᖃᖅᑐᒍᑦ. ᐱᑎᑦᑎᓂᐊᖅᐳᒍᑦ ᐊᔪᕐᓇᙱᓐᓂᓕᒫᖓᓄᑦ ᐅᖃᐅᔾᔨᕙᒌᕐᓂᕐᒥᒃ, ᑭᓯᐊᓂᓗᑦᑕᐅᖅ ᓴᖅᑭᑎᑦᑎᑐᐃᓐᓇᕆᐊᖃᖅᐳᒍᑦ ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᑭᒃᑯᑐᐃᓐᓇᕐᓄᑦ ᐊᑐᖅᑕᐅᓯᑲᐅᑎᒋᔭᕆᐊᖃᕋᔭᖅᑐᓂᒃ.

ᑭᖑᓪᓕᖅᐹᒥᒃ, ᐋᓐᓂᐅᖃᕐᓇᙱᑦᑐᓕᕆᔨᒃᑯᑦ ᓴᖅᑭᑎᑦᑎᕗᑦ ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᑭᒃᑯᑐᐃᓐᓇᕐᓄᑦ ᐅᖃᐅᔾᔪᐃᓂᕐᒥᒃ ᓴᓂᑭᓗᐊᒥᐅᓄᑦ, ᑕᐃᑲᓂ ᖃᐅᔨᔪᖃᕐᓂᖓᓂᒃ ᖁᐃᖅᓱᑯᑖᖕᓴᖅᑐᖃᕐᓂᖓᓂ, ᑕᒪᓐᓇ ᖃᐅᔨᒪᔭᐅᒋᓪᓗᓂ ᐃᒪᓐᓇ, ᖁᐃᖅᓱᕐᔪᐊᕐᓇᖅᑐᖅ.  ᖁᐃᖅᓱᕐᔪᐊᕐᓇᖅᑐ ᓄᕙᖕᓇᖅ ᐃᒡᒋᐊᕐᓗᓕᕐᓇᖅᑐᖅ ᐳᕙᒃᑯᓪᓗ ᐋᓐᓂᐊᕐᓇᖅᖢᓂ ᐊᒻᒪ ᐊᐃᑦᑐᕐᓘᑕᐅᓴᕋᐃᓐᓇᖅᖢᓂ ᐃᓄᖕᒧᑦ. ᑭᓇᑐᐃᓐᓇᖅ ᖁᐃᖅᓱᕐᔪᐊᕐᓇᖅᑐᒥᑦ ᓄᕙᓕᕈᓐᓇᖅᑐᖅ, ᑭᓯᐊᓂ ᓄᕙᓕᕐᓂᖅᐹᖑᖃᑦᑕᖅᑐᑦ ᓄᑕᕋᐃᑦ ᐅᑭᐅᖅᑖᖅᓯᒪᓐᖏᑦᑐᑦ ᓱᓕ. ᑕᐃᒪᐃᓐᓂᖓᓄᓪᓗ, ᐸᐃᕆᕝᕕᒃ ᓴᓂᑭᓗᐊᒥ ᒪᑐᓯᒪᔭᕆᐊᖃᖅᐳᖅ ᒫᓐᓇᐅᔪᒃᑯᑦ.

ᖁᔭᓐᓇᒦᒃ.

 

ᒥᓂᔅᑕ ᓄᓇᓕᖕᓂ ᒐᕙᒪᒃᑯᓐᓂᓗ ᐱᔨᑦᑎᕋᖅᑎᒃᑯᑦ ᓄᑖᙳᕆᐊᖅᑎᑕᖏᓐᓄᑦ

ᐅᓪᓛᑯᑦ,

ᐃᒡᓗᕐᔪᐊᓕᐅᕐᓇᐅᓂᐊᓕᕐᒥᑎᓪᓗᒍ, ᓄᓇᕗᑦ ᒐᕙᒪᖓ ᐱᓕᕆᓯᒋᐊᖅᓯᒪᓕᖅᐳᖅ ᐊᑐᕆᐊᓕᖕᓂᒃ ᐱᕙᒌᔭᕈᑎᓂᒃ ᐃᒡᓗᓕᐅᕐᓂᐅᓂᐊᖅᑐᓄᑦ ᑲᔪᓯᖁᓪᓗᒋᑦ ᐊᐅᔭᐅᓂᐊᖅᑐᒥ ᐅᑭᐊᒃᓵᖑᓂᐊᖅᑐᒥᓗ 2020−ᒥ 19−ᓂ ᓄᓇᕗᒻᒥ ᓄᓇᓕᖕᓂ.

ᑕᒪᓐᓇ ᐃᓚᖃᖅᐳᖅ 50 ᐅᖓᑖᓂᑦᑐᓂᒃ ᐊᑭᑐᔪᓂᒃ ᐱᓕᕆᐊᒃᓴᓂᒃ ᐊᑭᖃᓪᓗᐊᖅᖢᑎᒃ $600ᒥᓕᐊᓐ−ᐸᓗᖕᓂᒃ. ᖃᓄᖅ ᐊᖏᑎᒋᓂᖓ ᐃᒡᓗᓕᐅᕐᓂᐊᕐᓂᕐᒧᑦ ᐱᓕᕆᑎᓐᓂᐊᖅᑕᕗᑦ ᑕᐅᑐᒃᖢᒍ ᐊᑐᕆᐊᖃᖅᐸᒃᐳᒍᑦ ᖃᔅᓯᑲᓪᓚᖕᓂᒃ ᐊᔪᙱᓐᓂᓕᖕᓂᒃ ᐃᖅᑲᓇᐃᔭᖅᑎᓂᒃ ᖃᓪᓗᓈᓂᑦ ᑲᓇᑕᒥᑦ, ᑕᒪᒃᑯᓂᖓ ᓴᓇᖁᓪᓗᒋᑦ ᐱᓕᕆᖃᑎᖃᕐᓗᑎᒃ ᐃᓄᖕᓄᒃ ᐅᑭᐅᖅᑕᖅᑐᒥᐅᓂᒡᓗ ᐃᖅᑲᓇᐃᔭᖅᑐᓂᒃ.

ᐅᖃᖃᑎᒋᓯᒪᓪᓗᒍ ᓘᒃᑖᖅ ᐹᑐᓴᓐ, ᐋᖅᑭᒃᓱᐃᓯᒪᔪᖃᖅᐳᖅ ᖃᐅᔨᒪᑦᑎᐊᕈᒪᓂᒧᑦ ᑕᒪᕐᒥᑦᑎᐊᖅ ᖃᓪᓗᓈᓂᙶᖅᑐᑦ ᐃᖅᑲᓇᐃᔭᖅᑏᑦ ᒪᓕᑦᑎᐊᕋᓗᐊᕐᒪᖔᑕ ᓲᖑᔪᒥᒃ ᐊᑐᕆᐊᖃᓪᓚᕆᒃᑐᒥᒃ 14−ᓄᑦ ᐅᓪᓗᓄᑦ ᐅᐸᒃᑕᐅᔭᕆᐊᖃᙱᓐᓂᕐᒥᒃ ᓄᓇᕗᒻᒧᑦ ᐊᐅᓪᓚᓚᐅᙱᓐᓂᕐᒥᓂ. ᓄᓇᕗᑦ ᒐᕙᒪᖓ ᐊᐅᓚᑦᑎᓂᐊᖅᐳᖅ ᓇᐅᑦᑎᖅᓱᖅᓯᓗᓂᓗ ᑕᒪᒃᑯᓂᖓ ᐊᑐᕆᐊᓕᖕᓂᒃ ᑕᒪᒃᑯᓇᓂ ᐅᐸᒃᑕᐅᔭᕆᐊᖃᙱᓐᓂᕐᒧᑦ ᐃᓂᒋᔭᐅᔪᓂ ᖃᓪᖢᓈᓂ 14−ᓄᑦ ᐅᓪᓗᓄᑦ ᐃᑭᓚᐅᙱᓐᓂᕐᒥᓂ ᖃᖓᑕᕝᕕᒋᓂᐊᖅᑕᒥᓄᑦ.

ᑕᒪᓐᓇ ᒪᓕᒃᐳᖅ ᐊᑐᖅᑕᐅᔭᕆᐊᓕᖕᓂᒃ ᓄᓇᖃᖅᑐᓄᑦ ᐋᓐᓂᐊᕕᓕᐊᖅᓯᒪᔪᓄᓪᓗ ᐊᐅᓪᓚᖅᓯᒪᔪᓄᑦ, ᐊᑐᖅᑕᐅᖃᑦᑕᕇᖅᖢᓂᓗ.

ᓇᓕᒧᒃᓱᖅᑎᑦᑎᔭᕆᐊᖃᖅᐳᒍᑦ ᐊᕗᖓᑲᓪᓚᒃ ᐊᑐᕐᓂᐊᖅᑐᓂᒃ ᓇᑉᐸᖅᑎᖅᑕᐅᔭᕆᐊᓕᖕᓂᒃ ᓄᓇᓕᖕᓄᑦ ᒫᓐᓇ ᓄᕙᒡᔪᐊᕐᓇᖅ-19−ᒧᑦ ᐊᔪᓕᖅᑕᕈᑎᓕᖕᓄᑦ, ᐱᕕᒃᓴᖃᕐᓂᕐᓂᓗ ᖁᔭᓕᔪᒪᕙᒃᑲ ᑕᒪᕐᒥᑦᑎᐊᖅ ᕼᐋᒻᓚᒋᔭᐅᔪᑦ, ᐱᓗᐊᙳᓯᐊᖅᖢᓂ ᒪᐃᔭᕗᑦ ᑲᑎᒪᔩᓪᓗ, ᐱᓕᕆᐊᖃᓯᒪᓂᖏᓐᓄᑦ ᐋᖅᑭᒃᓯᓂᕐᒥᒃ ᑲᔪᓯᑎᑦᑎᔪᒪᓪᓗᑎᒃ ᑕᒪᒃᑯᓂᖓ ᐱᓕᕆᐊᒃᓴᓂᒃ 2020-ᒥ ᐃᒡᓗᓕᐅᕐᓇᓛᓕᕐᒥᔪᒧᑦ.

ᓇᓗᓇᐃᖅᓯᔪᒪᒋᕗᖓᑦᑕᐅᖅ ᐃᒡᓗᓕᐅᖅᑎᑦ ᑲᒻᐸᓂᖏᓐᓂᒃ ᑐᑭᓯᐅᒪᓂᖏᓐᓄᑦ, ᐃᐱᒋᔭᖃᑦᑎᐊᕆᐊᖃᕐᓂᖏᓐᓄᓪᓗ, ᖃᓄᐃᓕᐅᖁᔭᐅᓯᒪᓪᓚᕆᒃᑐᓂᒃᓘᒃᑖ ᐹᑐᓴᓐ−ᒧᑦ ᖃᐅᔨᒪᑦᑎᐊᕈᒪᓂᕐᒧᑦ ᑕᒪᒃᑯᐊ ᐃᒡᓗᓕᐅᕐᓃᑦ ᑲᔪᓯᓂᖃᕋᓗᐊᕐᒪᖔᑕ ᑐᑭᓯᐅᒪᓂᖅᑕᖃᕐᓗᓂ ᑲᔪᓯᑎᑦᑎᔭᕆᐊᖃᕐᓂᕐᒥᒃ ᖃᓄᐃᙱᑦᑎᐊᕈᓐᓇᕐᓂᖏᓐᓄᑦᐃᖅᑲᓇᐃᔭᖅᑏᑦ ᓄᓇᕗᒻᒥᐅᓕᒫᓪᓗ.

ᐊᓂᒍᖅᑎᓐᓇᓱᒋᐊᖃᖅᑕᖃᕋᓗᐊᖅᓪᓗᒍ ᓴᖅᑭᑎᑕᐅᓪᓗᓂ ᓄᕙᒡᔪᐊᕐᓇᖅ-19−ᒧᑦ ᖃᓂᒪᓐᓇᒧᑦ ᓇᒧᙵᕈᒡᓗᔭᖅᑐᒧᑦ, ᓂᕆᐅᒋᔭᖃᑦᑎᐊᖅᐳᒍᑦ ᖁᐊᖅᓵᕐᓇᙱᑦᑐᒥᒃ ᓴᓇᑦᑎᐊᕐᓇᖅᑐᒥᒡᓗ ᐊᐅᔭᖃᕐᓂᐊᕐᓂᑦᑎᓐᓂᒃ.

ᖁᔭᓐᓇᒦᒃ.

 

ᑮᓇᐅᔭᓕᕆᔨᒃᑯᓐᓄᑦ ᒥᓂᔅᑕᖓᑕ ᒥᓂᔅᑕᐅᓪᓗᓂᓗ ᑲᒪᒋᔭᒃᓴᖃᖅᑎᑕᐅᓪᓗᓂ ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᑦ ᐊᒻᒪ ᓇᓪᓕᐅᒃᑯᒫᓂᑦ ᖃᐅᔨᓴᖅᑎᓄᑦ ᓄᑖᙳᕆᐊᖅᑎᑕᖏᑦ

ᐅᓪᓛᒃᑯᑦ ᑕᒪᔅᓯ.

ᖁᕕᐊᓱᒃᐳᖓ ᐅᖃᕈᓐᓇᕋᒪ ᓄᓇᕗᑦ ᒐᕙᒪᖓ ᓴᖅᑭᑎᑦᑎᓂᐊᓕᕐᓂᖓᓂᒃ ᓄᑖᒥᒃ ᐱᓕᕆᐊᒃᓴᒥᒃ, ᐆᒥᖓ, ᓄᓇᕗᒻᒥ ᐊᑐᖅᑕᐅᔭᕆᐊᖃᒻᒪᕆᒃᑐᑦ ᐃᖅᑲᓇᐃᔭᖅᑏᑦ ᐊᑭᓕᖅᓱᖅᑕᐅᓂᖏᓐᓄᑦ ᐊᑭᓕᖅᓲᑎᒃᑲᓐᓂᖅ. ᑕᕝᕘᓇ, ᓄᓇᕗᑦ ᒐᕙᒪᖓ ᑮᓇᐅᔭᖃᖅᑎᑦᑎᓂᐊᖅᐳᖅ ᐊᔪᖅᑎᑕᐅᙱᑦᑐᓂᒃ ᐃᖅᑲᓇᐃᔭᕐᕕᖕᓂᒃ ᐊᑭᓕᖅᓱᕈᓐᓇᓕᕐᓗᒋᑦ ᐊᑭᑭᓐᓂᖅᓴᒥᒃ ᐊᑭᓕᖅᑕᐅᕙᒃᑐᑦ ᐃᑲᕐᕋᒃᑲᓐᓂᕐᓄᑦ ᐃᖅᑲᓇᐃᔭᖅᑕᒥᓄᑦ.

ᐃᖅᑲᓇᐃᔭᖅᑏᑦ ᐊᑭᓕᖅᑕᐅᕙᒃᑐᑦ $20−ᓂᒃ ᑐᖔᓂᓘᓐᓃᑦ ᐱᑎᑕᐅᖃᑦᑕᕈᓐᓇᕐᓂᐊᓕᖅᑐᑦ $5−ᑲᓐᓂᕐᓂᒃ ᐃᑲᕐᕋᒧᑦ ᐊᑕᐅᓯᕐᒧᑦ ᐃᖅᑲᓇᐃᔭᖅᑕᖏᓐᓄᑦ. ᐃᖅᑲᓇᐃᔭᖅᑏᑦ ᑮᓇᐅᔭᓕᐅᖅᐸᒃᑐᑦ $20−ᓗ $25−ᓗ ᐊᑯᓐᓂᖏᓐᓂ ᐃᑲᕐᕋᒧᑦ ᐱᓂᐊᖅᐳᑦ ᓈᒻᒪᒃᓯᓕᕈᑎᓂᒃ ᐊᑭᓕᖅᓱᖅᑕᐅᓂᖏᑦ $25−ᖑᖅᑎᑕᐅᓗᑎᒃ ᐃᑲᕐᕋᒧᑦ ᐊᑕᐅᓯᕐᒧᑦ. ᑮᓇᐅᔭᖁᑎᒋᔭᐅᓂᐊᖅᑐᓂᒃ ᒪᓂᒪᔪᖃᕐᓂᐊᖅᐳᖅ ᐃᖅᑲᓇᐃᔭᖅᑎᓄᑦ ᐃᑲᔪᖅᑐᐃᔪᒪᓪᓗᑎᒃ ᑕᒪᑐᒥᖓ ᐊᑭᓕᖅᓱᖅᑕᐅᒃᑲᓐᓂᓂᕐᒥᒃ 16−ᓄᑦ ᐱᓇᓱᐊᕈᓯᕐᓄᑦ ᑎᑭᓪᓗᒍ.

ᐱᒋᐊᕈᒪᓪᓗᑎᒃ, ᒐᕙᒪᕗᑦ ᑐᕋᕆᔭᖃᖅᐳᖅ ᐃᖅᑲᓇᐃᔭᖅᑎᓂᒃ ᐱᑎᑦᑎᕙᒃᑐᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒥᒃ ᐃᓄᓕᕆᓂᕐᒥᒡᓗ ᐊᒃᑐᖅᑕᐅᓴᕋᐃᑦᑐᓄᑦ ᓄᓇᕗᒻᒥᐅᓄᑦ. ᑕᒪᒃᑯᐊ ᐃᓚᖃᖅᐳᑦ ᕿᒫᕝᕕᖕᓂᒃ, ᑭᒃᑯᒐᓴᖕᓄᑦ ᐊᖏᕐᕋᕆᔭᐅᕙᒃᑐᓄᑦ, ᓂᕿᑖᕐᕕᖕᓄᑦ, ᐋᓐᓂᐊᕕᓕᐊᖅᓯᒪᔪᓄᑦ ᐃᓂᓄᑦ, ᐊᔾᔨᑲᓴᖏᓐᓄᓪᓗ ᑲᑐᔨᖃᑎᒌᓄᑦ. ᐊᒻᒪᑦᑕᐅᖅ ᑕᒪᓐᓇ ᐱᓕᕆᐊᒃᓴᖅ ᒪᑐᐃᕆᕙᕗᑦ ᓚᐃᓴᓕᖕᓄᑦ ᐸᐃᕆᕝᕕᖕᓄᑦ.

ᓄᓇᕗᑦ ᒐᕙᒪᒃᑯᖏᑦ ᐃᓱᒪᒃᓴᖅᓯᐅᕈᑎᖃᕐᓂᐊᖅᑐᑦ ᐊᖏᒡᓕᒋᐊᖅᑎᑦᑎᓇᔭᕐᓂᕐᒥᒃ ᐊᔪᖅᑎᑦᑎᙱᓐᓂᕐᒥᒃ ᐃᖅᑲᓇᐃᔭᖅᑎᓂᒃ ᐊᓯᖏᓐᓂ ᐃᖅᑲᓇᐃᔭᕐᕕᐅᔪᓂ ᖃᖓᙳᖅᐸᓪᓕᐊᓂᖓ ᒪᓕᒡᓗᒍ, ᑕᐃᒪᐃᔾᔪᑎᖃᕋᔭᕆᓪᓗᓂᓗ ᐱᓕᕆᐊᒃᓴᐃᑦ ᐱᔭᐅᕙᓪᓕᐊᓂᖏᓐᓂᒃ ᑮᓇᐅᔭᓂᒡᓗ ᒪᓂᒪᔪᖃᕐᓂᖓᓂᒃ.

ᓄᓇᕗᑦ ᒐᕙᒪᖓᑕ ᑮᓇᐅᔭᓕᕆᔨᒃᑯᖏᑦ ᐊᐅᓚᑦᑎᓂᐊᖅᐳᑦ ᐱᓕᕆᐊᒃᓴᒥᒃ ᑭᓇᐅᔭᖃᖅᑎᑕᐅᓗᑎᒃ ᑲᓇᑕᐅᑉ ᒐᕙᒪᒃᑯᖏᓐᓂᑦ. ᐱᔪᓐᓇᖅᓯᓂᐊᖅᐳᒍᑦ ᐱᓇᔪᒍᑎᒋᔭᐅᔪᓂᒃ ᐃᖅᑲᓇᐃᔭᕐᕕᒋᔭᐅᔪᓂᑦ ᓇᒡᒐᔾᔭᒥ, ᔫᓂ 1−ᒥ.

ᐱᓇᔪᒍᑕᐅᔪᓐᓇᖅᑐᑦ ᑎᑎᕋᕆᐊᓖᑦ ᑐᓴᖅᑕᐅᔪᒃᓴᒃᑲᓐᓃᓪᓗ ᑕᒪᑐᒧᖓ ᐱᓕᕆᐊᖑᔪᒧᑦ ᒪᓂᒪᓂᐊᖅᑐᑦ ᑮᓇᐅᔭᓕᕆᔨᒃᑯᑦ ᐃᑭᐊᖅᑭᕕᐊᓂ ᓇᒡᒐᔾᔭᒥ ᐱᒋᐊᕐᓗᓂ.

ᑎᓕᐅᓪᓚᕆᒍᒪᕙᒃᑲ ᐃᖅᑲᓇᐃᔭᕐᕕᐅᔪᑦ ᐃᖅᑲᓇᐃᔭᕐᕕᖕᓃᑦᑐᑦ ᐅᖃᐅᓯᕆᖅᑲᐅᔭᓐᓂ ᐱᓇᔪᖁᓪᓗᒋᑦ ᑕᒪᑐᒧᖓ ᓄᓇᕗᒻᒥ ᐊᑐᖅᑕᐅᔭᕆᐊᖃᓪᓚᕆᒃᑐᑦ ᐃᑲᓇᐃᔭᖅᑎᑦ ᐊᑭᓕᖅᓱᖅᑕᐅᓂᖏᓐᓄᑦ ᐊᑭᓖᔾᔪᑎᒃᑲᓐᓂᕐᒧᑦ.

ᑕᒪᒃᑯᐊ ᓄᕙᒡᔪᐊᕐᓇᖅ-19−ᒧᑦ ᐊᔪᓕᖅᑕᕈᑏᑦ ᖃᓱᕙᓪᓕᐊᓕᖅᑎᓪᓗᒋᑦ, ᐃᖅᑲᓇᐃᔭᕐᕖᓪᓗ ᒪᑐᐃᖅᐸᓪᓕᐊᓕᖅᑎᓪᓗᒋᑦ, ᑎᓕᐅᖅᐸᒃᑲ ᐃᖅᑲᓇᐃᔭᕐᕕᐅᔪᑦ ᐱᓇᔪᒍᓐᓇᕐᓂᕐᒥᒍᑦ ᐱᓇᔪᑦᑎᐊᖁᓪᓗᒋᑦ ᑎᓕᐅᖅᑕᐅᙱᒃᑲᓗᐊᕐᓗᑎᒃ, ᐱᓇᔪᓕᕌᖓᒥᒃ ᐃᖅᑲᓇᐃᔭᕐᕕᒋᔭᑎᒃ ᖁᐊᖅᓵᕐᓇᙱᒃᑲᓗᐊᕐᒪᖔᑕ ᐋᓐᓂᐊᓕᕐᓇᙱᒃᑲᓗᐊᒪᖔᑕᓗᐃᖅᑲᓇᐃᔭᖅᑎᓄᑦ ᑭᒃᑯᑐᐃᓐᓇᓄᓪᓗ, ᒪᓕᒃᑲᓗᐊᕐᒪᖔᑕ ᑭᒃᑯᑐᐃᓐᓇᓂᒃ ᐋᓐᓂᐊᖃᕐᑕᐃᓕᑎᑦᑎᓂᕐᒧᑦ ᐅᖃᐅᔾᔪᖅᑕᐅᔾᔪᓯᐊᖑᓯᒪᔪᓂᒃ ᓄᕙᒡᔪᐊᕐᓇᖅ-19−ᒧᑦ.

ᑭᓇᑐᐃᓐᓇᑦᑎᐊᖅ ᐃᖅᑲᓇᐃᔭᖅᑎ ᐃᖅᑲᓇᐃᔭᕐᕕᐅᔪᕐᓘᓐᓃᑦ ᑐᙵᓵᖅᐸᕋ ᑕᑯᔭᖅᑐᖁᓪᓗᒍ ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᑦ ᐊᒻᒪ ᓇᓪᓕᐅᒃᑯᒫᓂᑦ ᖃᐅᔨᓴᖅᑏᑦ ᐃᑭᐊᖅᑭᕕᖓᑦ ᐅᕙᓂ, www.wscc.nu.ca ᖃᐅᔨᒋᐊᖁᓪᓗᒋᑦ ᓄᕙᒡᔪᐊᕐᓇᖅ-19−ᒧᑦ ᐊᑐᕈᓐᓇᖅᑕᖏᓐᓂᒃ ᑐᓴᒐᒃᓴᒃᑲᓐᓂᕐᓄᓪᓗ ᖃᓄᖅ ᐱᕙᒌᔭᖅᑐᖃᕈᓐᓴᕐᒪᖔᑦ ᖁᐊᖅᓵᕐᓇᙱᑦᑐᒃᑯᑦ ᒪᑐᐃᖅᓯᒃᑲᓐᓂᕐᓂᐊᕐᓗᓂ ᓇᖕᒥᓂᕆᔭᒥᓂᒃ ᖃᓄᕐᓘᓐᓂᑦ ᐃᖅᑲᓇᐃᔭᕐᕕᖕᓄᑦ ᐅᑎᖅᑐᖃᖅᐸᓪᓕᐊᓇᔭᕐᒪᖔᑦ.

ᑖᓐᓇ ᐊᑐᖅᑕᐅᔪᓐᓇᖅᑐᖅ ᐊᑐᒐᒃᓴᐅᑦᑎᐊᖅᑐᓂᒃ ᐃᓗᓕᖃᐅᖅᖢᓂ, ᐃᑲᔪᖅᑐᕈᑎᑕᖃᖅᖢᓂ ᑐᓴᒐᒃᓴᖃᖅᖢᓂᓗ ᓄᓇᕗᒻᒥ ᐃᖅᑲᓇᐃᔭᖅᑎᓄᑦ ᐃᖅᑲᓇᐃᔭᕐᕕᐅᔪᓄᓪᓗ, ᑐᙵᕕᖃᖅᑎᑕᐅᕗᖅ ᒫᓐᓴᓯᐅᑎᓂᒃ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑐᓴᖅᓴᑕᔪᒃᓴᓄᑦ ᐊᒃᑐᐊᓂᓕᖕᓄᑦ ᓄᕙᒡᔪᐊᕐᓇᖅ-19−ᒧᑦ, ᑕᓯᐅᖅᓯᓪᓗᓂᓗ ᖃᓄᖅ ᖃᐅᔨᓴᖅᓯᔪᖃᕈᓐᓇᕐᒪᖔᑦ ᐃᖅᑲᓇᐃᔭᕐᕕᒋᔭᕐᓂ ᖁᐊᖅᓵᕐᓇᖅᑐᓂᒃ, ᖃᐅᔨᒪᑦᑎᐊᕈᒪᓂᕐᒧᑦ ᒪᓕᑦᑎᐊᕋᓗᐊᕐᒪᖔᖅᐱᑦ ᐃᖅᑲᓇᐃᔭᕐᕕᖕᒥ ᖁᐊᖅᓵᕐᓇᖅᑕᐃᓕᒪᓂᕐᒧᑦ ᐊᑐᖅᑕᐅᕙᒃᑐᓂᒃ ᒪᒐᕐᓂᒡᓗ.

ᐃᖅᑲᓇᐃᔭᖅᑏᑦ ᐊᐱᖅᑯᑎᒃᓴᖃᖅᑐᑦ ᐃᑲᔪᖅᑕᐅᔭᕆᐊᓖᓪᓘᓐᓃᑦ ᐱᔭᕇᖅᓯᓂᐊᕐᓗᑎᒃ ᐃᖅᑲᓇᐃᔭᕐᕕᖕᒥᓂ ᖁᐊᖅᓵᕐᓇᕈᓐᓇᖅᑐᓄᑦ ᖃᐅᔨᓴᖅᓯᓂᕐᒥᒃ ᑐᙵ)ᒃᑎᑕᐅᕗᑦ ᖃᐅᔨᒋᐊᖁᔭᐅᓪᓗᑎᒃ ᐅᑯᓄᖓ, ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᑦ ᐊᒻᒪ ᓇᓪᓕᐅᒃᑯᒫᓂᑦ ᖃᐅᔨᓴᖅᑏᑦ ᐅᕗᖓ, 1-877-404-4407 ᖃᕆᑕᐅᔭᒃᑯᓪᓘᓐᓃᑦ ᐅᕗᖓ
Covid-19@wscc.nu.ca

ᖁᔭᓐᓇᒦᒃ.

 

ᐃᓚᒋᔭᐅᓪᓗᓂ ᓄᓇᕗᑦ ᒐᕙᒪᖓᑕ ᐱᓇᔪᒃᑕᖏᓐᓂ ᓴᐳᔾᔨᓯᒪᔪᒪᓪᓗᑎᒃ ᓄᓇᕗᒻᒥᐅᓂᒃ ᑕᒪᑐᒧᖓ ᓄᕙᒡᔪᐊᕐᓇᖅ-19−ᒧᑦ, ᓄᓇᕗᑦ ᒐᕙᒪᖓᑕ ᐱᓕᕆᕝᕕᒋᑦ ᐅᑯᓂᖓ ᐊᑐᓕᖅᑎᑦᑎᓯᒪᕗᑦ:

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ

ᓄᕙᒡᔪᐊᕐᓇᖅ-19−ᒧᑦ ᐅᖄᓚᕝᕕᒃᓴᖅ, ᓇᖕᒥᓂᕐᓗ ᖃᐅᔨᓴᕐᓂᕐᒧᑦ ᐊᑐᖅᑕᐅᔪᓐᓇᖅᑐᖅ

ᑭᓇᑐᐃᓐᓇᑦᑎᐊᖅ ᐃᓱᒪᒋᔭᖃᕈᓂ ᐊᐴᑎᓯᒪᓚᐅᕋᓱᒋᓗᓂ ᓄᕙᒡᔪᐊᕐᓇᖅ-19−ᒧᑦ ᐅᖄᓚᖁᔭᐅᕗᖅ ᓄᕙᒡᔪᐊᕐᓇᒧᑦ ᐅᖄᓚᕝᕕᐅᔪᓐᓇᖅᑐᒧᑦ ᐅᕗᖓ, 1-888-975-8601  10−ᒥᑦ ᐅᓪᓛᒃᑯᑦ 6−ᓗ ᐅᓐᓄᒃᑯᑦ ᐊᑯᓐᓂᖓᓂ, ᐅᕝᕙᓘᓐᓃᑦ ᖃᐅᔨᑎᑲᐅᑎᒋᓗᒋᑦ ᓄᓇᓕᖕᓂ ᐋᓐᓂᐊᕕᖓᑦ,  ᐅᐸᒃᑕᐅᑦᑕᐃᓕᒪᓯᑲᐅᑎᒋᓗᑎᓪᓗ ᐊᖏᕐᕋᖅᓯᒪᓗᑎᓪᓗ ᐅᓪᓗᓄᑦ 14-ᓄᑦ.

ᑭᓇᑐᐃᓐᓇᑦᑎᐊᖅ ᖃᕆᑕᐅᔭᒃᑰᕈᓐᓇᐅᑎᖃᖅᑐᖅ ᐱᓕᕆᔪᓐᓇᕆᕗᖅ ᐃᑭᐊᖅᑭᕕᒃᑯᑦ ᓇᖕᒥᓂᖅ−ᖃᐅᔨᓴᕈᒪᔪᑦ ᐅᕙᓂ, nu.thrive.health

ᐅᓄᕐᓂᖏᑦ

ᑲᑎᖦᖢᒋᑦ (ᑕᒪᕐᒥᑦᑎᐊᖅ ᐊᓂᑦᑕᐃᓕᔭᕆᐊᖃᖅᑐᓄᑦ ᐃᓃᑦ)

ᐊᐅᓪᓚᖅᓯᒪᔫᑉ ᖃᓄᐃᑦᑑᓂᖓ

ᑐᔪᕐᒥᑎᑕᐅᔪᑦ ᐊᓂᑦᑕᐃᓕᒪᔪᓂ ᒪᐃ 27-ᒥᑦ ᐱᒋᐊᖅᖢᓂ

ᐋᓐᓂᐊᕕᓕᐊᖅᑐᓄᑦ ᐊᐅᓪᓚᖅᓯᒪᔪᑦ

149

ᑭᒃᑯᑐᐃᓐᓇᑦ

96

ᐃᓕᓐᓂᐊᖅᑏᑦ

0

ᑲᑎᖦᖢᒋᑦ

245


ᐊᐅᓪᓚᖅᐸᒃᑐᑦ ᐅᑎᖅᑎᑕᐅᓂᖏᓐᓄᑦ ᖃᓄᐃᓕᖓᓂᖏᑦ:

ᐊᐅᓪᓚᕐᕕᒃᓴᖓᑕ ᐅᓪᓗᐊ

ᖃᔅᓯᐅᓂᖏᑦ ᐊᐅᓪᓚᕐᓂᐊᖅᑐᑦ ᐅᐸᒃᑕᐅᑦᑕᐃᓕᒪᔪᓂᖔᖅᑐᑦ

ᒪᐃ 28

24

ᒪᐃ 29

6

ᒪᐃ 30

0

ᒪᐃ 31

9

ᔫᓂ 1

35


ᐱᕕᒡᔪᐊᓂᒃ ᐃᖅᑲᓇᐃᔭᖅᑎᓂᒃ ᐱᔪᒪᔾᔪᑕᐅᔪᑦ

ᒪᐃ 24−ᒥ ᐱᒋᐊᖅᖢᓂ, 1,192−ᓂᒃ ᑐᒃᓯᕋᖅᓯᒪᔪᖃᖅᐳᖅ, 913−ᖑᓪᓗᑎᒃ ᐃᖅᑲᓇᐃᔭᕆᐊᖃᓪᓚᕆᒃᑐᓂᒃᑐᒃᓯᕋᕈᑕᐅᔪᑦ.

ᑐᒃᓯᕋᕈᑕᐅᓯᒪᔪᑦ ᖃᓄᐃᓕᖓᓂᖏᑦ

#

%

ᐊᖏᖅᑕᐅᓯᒪᔪᑦ (ᐅᑯᐊᖑᕗᑦ ᐱᒻᒪᕆᐊᓗᖕᓂᑦ ᐱᒻᒪᕆᐅᓗᐊᙱᑦᑐᓂᒡᓗ)

1018

85.9%

ᐊᖏᕐᑕᐅᙱᑦᑐᑦ

135

11.3%

ᐅᑕᖅᑭᔪᑦ

39

3.3%

ᑲᑎᖦᖢᒋᑦ

1192

100%


ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᔨᑦᑎᕋᐅᑎᖏᑦ

ᐃᓕᓐᓂᐊᕐᓂᓕᕆᔨᒃᑯᑦ ᐋᖅᑭᒃᓯᓯᒪᕗᑦ ᐊᑐᖅᑕᐅᔪᓐᓇᖅᑐᓂᒃ ᐸᐃᕆᕝᕕᑦ ᒪᑐᐃᖅᑕᐅᒃᑲᓐᓂᕋᔭᕐᓂᖏᓐᓄᑦ,ᐃᓚᖃᐊᖃᖅᖢᓂ ᑕᒪᓐᓇ ᑐᓴᖅᑕᐅᔪᒃᓴᓂᒃ ᐱᐅᓯᒋᐊᖅᓯᒪᔪᓂᒃ ᓴᓗᒻᒪᖅᓴᐃᓇᔭᕐᓂᕐᒥᒃ ᓴᓗᒪᓇᔭᕐᓂᕐᒥᒡᓗ, ᑎᒥᒃᑯᓪᓗ ᐅᖓᓯᒌᒋᐊᖃᖅᐸᖕᓂᕐᒥᒃ ᐊᔾᔭᖅᓯᔪᖃᕌᖓᑦ ᐊᐃᒃᖠᖅᑐᖃᕌᖓᓪᓘᓐᓃᑦ.  ᑐᑭᓯᒋᐊᒃᑲᓐᓂᕈᒪᒍᕕᑦ ᐅᕗᙵᐅᓗᑎᑦ:

English - https://gov.nu.ca/education/information/child-care-facility-guidelines-re-opening-june-1-2020

Inuktitut - https://gov.nu.ca/iu/education/information/pairivvinnut-atuagait-matuikanniqpata-juuni-1-2020mit

Inuinnaqtun - https://gov.nu.ca/in/ilinniaqtuliqiyikkut/information/nutaqqiqiviit-igluqpaini-maligahat-angmaffaaqata-imaruqtirviani-1

French - https://gov.nu.ca/fr/education/information/directives-pour-la-reouverture-des-etablissements-de-garde-denfants-le-1er

 

ᐊᕙᑎᓕᕆᔨᒃᑯᓐᓂᑦ ᓄᑖᙳᕆᐊᖅᑎᑕᐅᔪᑦ

ᐅᑭᐅᖅᑕᖅᑐᒥ ᐊᕕᒃᓯᒪᓂᕐᒥ ᒥᕐᙳᐃᖅᓯᕐᕖᑦ ᓄᓇᕗᒻᒥ ᒪᑐᐃᒃᑲᓐᓂᓛᖅᑐᑦ ᔫᓂ 1, 2020−ᒥ. ᑕᒪᕐᑎᐊᖅ ᒥᕐᙳᐃᖅᓯᕐᕖᑦ ᐃᒡᓗᕐᔪᐊᖁᑎᖏᑦ ᒪᑐᓯᒪᐃᓐᓇᕐᓂᐊᖅᑐᑦ, ᒥᕐᙳᐃᕐᓯᕐᕖᓪᓗ ᒪᓂᒪᓂᐊᖅᐳᑦ ᑭᓯᐊᓂ ᓯᓚᒥ ᐱᙳᐊᖅᑕᐅᔪᓐᓇᖅᑐᑐᐊᓄᑦ. ᓄᓇᕗᒻᒥ ᐃᓱᖃᖅᑎᑦᑎᓃᑦ 25-ᓄᑦ ᐃᓄᖕᓄᒃ ᓯᓚᒥ ᑲᑎᑉᐸᒃᑐᓄᑦ ᐊᑐᕐᓂᐊᕆᕗᑦ ᐊᕕᒃᓯᒪᓂᕐᓂ ᒥᕐᙳᐃᖅᓯᕐᕕᖕᓂᑦᑕᐅᖅ.

 

ᓄᓇᕗᒻᒥᐅᓂᑦ ᖃᓄᐃᙱᑦᑎᐊᖅᑎᑦᑎᓇᓱᒡᓗᑕ ᑕᒪᑦᑕ ᑲᒪᒋᔭᒃᓴᕆᔭᕗᑦ! ᐳᐃᒍᖅᑕᐃᓕᒋᑦ: ᐊᒡᒐᑎᑦᓱᓕᑦᑕᕐᓃᑦ  ᐃᖅᑲᓇᐃᔭᖅᑎᓄᑦ ᐅᖃᐅᔾᔪᐃᔾᔪᑕᐅᔪᓂᑦ, ᐊᖏᕐᕋᖅᓯᒪᐃᓐᓇᕐᓗᑕᓗ ᖃᓂᒪᒍᕕᑦ.