ᐅᖃᓚᐅᑎᓯᐅᑏᑦ

You are here

ᓄᕙᒡᔪᐊᕐᓇᖅ-19 ᓄᓇᕗᑦ ᒐᕙᒪᖓᓂ ᓴᖅᑭᑕᐅᔪᑦ - ᐅᑐᐱᕆ 2, 2020

ᐊᒃᑐᐸ 02, 2020

ᓄᕙᒡᔪᐊᕐᓇᖅ-19 ᓄᓇᕗᑦ ᒐᕙᒪᖓᓂ ᓴᖅᑭᑕᐅᔪᑦ

ᓯᕗᓕᖅᑎᐅᑉ ᑐᓴᒐᒃᓴᖏᑦ ᓄᑖᑦ

ᐅᓪᓛᒃᑯᑦ. ᓱᓕ ᐅᑕᖅᑭᒐᑦᑕ ᓇᓗᓇᐃᖅᑕᐅᓂᐊᖅᑐᒥᒃ ᖃᐅᔨᓴᖅᑕᐅᔾᔪᑎᒥᒃ ᕼᐆᑉ ᐲ ᐅᔭᕋᖕᓂᐊᕐᕕᖕᒥ ᐃᓄᖕᒥᒃ ᖃᐅᔨᓴᖅᑕᐅᓚᐅᖅᑐᒥᒃ.

ᑲᑎᖦᖢᒋᑦ ᐃᓄᐃᑦ ᒫᓐᓇᒧᑦ ᑎᑭᖦᖢᒍ ᖃᐅᔨᓴᖅᑕᐅᓯᒪᓕᖅᑐᑦ 2981-ᖑᓕᖅᐳᑦ. 465-ᖑᓪᓗᑎᒃ ᐃᓄᐃᑦ ᒫᓐᓇ ᖃᐅᔨᓴᖅᑕᐅᔪᑦ.

ᓘᒃᑖᖅ ᐹᑕᓴᓐ ᕼᐆᑉ ᐲᒥᑦ ᐊᑐᖅᑕᐅᔪᒥᑦ ᐅᖃᐅᓯᖃᓚᐅᙱᓐᓂᖓᓂ, ᐅᖃᐅᓯᖄᕐᔪᒍᒪᔪᖓ ᓄᓇᕗᒻᒥᐅᓄᑦ ᐱᓕᕆᐊᒃᓴᑦᑎᓐᓂ; ᖃᐅᑕᒫᑦᑎᐊᖅ ᑕᒪᑦᑕᑦᑎᐊᖅ.

ᑕᑯᖃᑦᑕᕋᑦᑕ ᖃᓂᒻᒪᒃᑐᑦ ᐅᓄᖅᓯᕙᓪᓕᐊᑐᐃᓐᓇᕐᓂᖏᓐᓂᒃ ᖃᓪᓗᓈᓂ ᑲᓇᑕᐅᑉ ᐃᓚᖓᓂ, ᓇᓗᓇᙱᑦᑐᖅ ᐊᐃᑦᑐᕐᓗᐃᑲᑕᒃᑲᓐᓂᓕᖅᐳᑦ. ᓄᕙᕐᔪᐊᕐᓇᖅ-19 ᒫᓐᓇ ᐊᓂᒍᓕᒑᙱᑦᑎᐊᖅᑐᖅ. ᐃᓅᓯᑦᑎᓐᓄᑦ ᐃᓚᒋᔭᐅᓂᐊᓕᖅᐳᖅ ᓯᕗᓂᒃᓴᑦᑎᓐᓄᑦ ᖃᐅᔨᒪᙱᖦᖢᑕᓗ ᖃᖓ ᑲᐴᑎᑕᖃᓕᓛᕐᒪᖔᑦ ᐅᕝᕙᓘᓐᓃᑦ ᐃᓅᓕᓴᐅᑎᑦᑎᐊᕙᖕᒥᒃ.

ᑕᐃᒪᐃᒻᒪᑦ, ᑕᒪᑦᑕ ᐱᑦᑕᐃᓕᒪᖃᑦᑕᕆᐊᖃᓕᖅᐳᒍᑦ ᐃᓅᖃᑎᑦᑎᓐᓂᒃ ᐊᑦᑕᕐᓇᖅᑕᐃᓕᒪᑎᑦᑎᓗᑕ. ᐊᓯᔾᔩᔭᕆᐊᖃᓕᖅᐳᒍᑦ ᐃᓄᐃᑦ ᖃᓄᐃᓕᐅᕈᑎᖏᑦ ᐃᓕᖅᑯᓯᖏᓐᓂᒡᓗ ᑕᑯᒃᓴᐅᑎᑦᑎᓗᑕᓗ ᓯᓚᖅᑲᑎᑦᑎᓐᓂ ᐊᒻᒪ ᓄᓇᖅᑲᑎᑦᑎᓐᓂ ᐃᒃᐱᒍᓱᖕᓂᑦᑎᓐᓂᒃ.

ᐳᐃᒍᖅᑕᐃᓕᒋᑦᑎ ᖃᓄᐃᓕᐅᕐᓂᓯ ᑭᒃᑯᓕᒫᑦᑎᐊᑦ ᖃᓄᐃᙱᓐᓂᖏᓐᓂᒃ ᐊᒃᑐᐃᔪᓐᓇᕐᒪᑦ. ᑕᐃᒪᐃᒻᒪᑦ ᒪᓕᒋᐊᖃᓪᓚᕆᒃᐳᒍᑦ ᑭᒃᑯᑐᐃᓐᓇᐃᑦ ᖃᓄᐃᙱᖁᓪᓗᒋᑦ ᖃᓄᐃᓕᐅᕈᑕᐅᔪᓂᑦ − ᐊᒡᒐᕗᑦ ᐅᐊᓴᒐᔪᒡᓗᒋᑦ, ᖃᓂᒌᓗᐊᖃᑦᑕᙱᓪᓗᑕ, ᐊᒃᑐᖅᑕᐅᒐᔪᒃᑐᑦ ᐊᓪᓕᕋᐃᑦ ᐊᓪᓚᖅᑐᕋᔪᒡᓗᒋᑦ, ᑲᑎᙵᓂᐊᖅᑐᑦ ᐅᓄᕐᓂᕆᔭᕆᐊᓕᖏᓐᓂᒃ ᒪᓕᒃᐸᒡᓗᑎᒃ, ᐃᓄᑑᔭᕆᐊᖃᕈᑦᑕ ᐃᓄᑑᕙᒡᓗᑕ ᐊᒻᒪ ᒪᑐᐊᖅᓯᒪᕙᒡᓗᑕ ᐊᑐᕆᐊᖃᕈᑦᑕ.

ᓄᕙᕐᔪᐊᕐᓇᖅ-19 ᑐᑭᖃᖅᐳᖅ ᐊᓯᑦᑎᓐᓂᒃ ᐃᓱᒪᔭᕆᐊᖃᖅᐳᒍᑦ ᖃᓄᐃᙱᓐᓂᖏᓐᓂᒡᓗ ᐊᑦᑕᕐᓇᖅᑕᐃᓕᒪᑎᑦᑎᓂᕐᒥᓪᓗ ᐱᒋᐊᓪᓚᒃᑲᓐᓂᕐᓗᑕ. ᐃᓱᒪᖅᓲᑎᒋᕙᕗᑦ, ᓲᖃᐃᒻᒪ ᐃᓅᓪᓗᑕ ᖃᓄᐃᓕᐅᕐᓂᑦᑎᓐᓄᑦ ᐊᒃᑐᐃᔪᓐᓇᕋᑦᑕ ᑭᓇᓕᒫᑦᑎᐊᖅ

ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᐅᑉ ᑐᓴᒐᒃᓴᖏᑦ ᓄᑖᑦ

ᐅᓪᓛᒃᑯᑦ. ᓯᑎᐱᕆ 28-ᒥᑦ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᒋᐊᖅᑎᑦᑎᓚᐅᖅᐳᑦ ᑐᐊᕕᕐᓇᖅᑐᓕᕆᔨᓂᑦ ᐊᐃᑦᑐᕐᓗᐃᓐᓇᖅᑐᖃᖅᑐᒥᑦ ᓄᕙᕐᔪᐊᕐᓇᖅ-19−ᒥ TMAC Resources'−ᑯᓐᓂ ᕼᐆᑉ ᐲ ᐅᔭᕋᖕᓂᐊᕐᕕᖕᒥ.

TMAC Resources−ᑯᑦ ᑎᑎᕋᕐᕕᑦᑎᓐᓄᑦ ᑐᓴᖅᑎᑦᑎᓚᐅᖅᐳᑦ ᓯᑎᐱᕆ 26-ᖑᑎᓪᓗᒍ ᐃᖅᑲᓇᐃᔭᖅᑎᒥᒃ ᖃᓂᒻᒪᒃᐸᓪᓕᐊᔪᒥᒃ ᓄᕙᒡᔪᐊᕐᓇᖅ-19−ᒧᑦ ᖃᓂᒪᔾᔪᑕᐅᕙᒃᑐᓂᒃ. ᑕᐃᓐᓇ ᐃᓄᒃ ᓇᓗᓇᐃᖅᑕᐅᔪᓪᓗ ᖃᓂᒋᔭᐅᓚᐅᕐᓂᖏᓐᓂᒃ ᐲᖅᓯᕝᕕᐅᕌᕐᔪᓚᐅᖅᐳᑦ ᖃᐅᔨᓴᒐᒃᓴᐃᓪᓗ ᑲᖏᖅᖠᓂᕐᒧᑦ ᐊᐅᓪᓚᖅᑎᑕᐅᓚᐅᖅᖢᑎᒃ ᖃᐅᔨᓴᖅᑕᐅᓂᐊᖅᑐᑦ.

7 ᖃᐅᔨᓴᒐᒃᓴᐃᑦ ᐱᖃᕐᓂᕋᐃᓚᐅᖅᐳᑦ, ᑕᒪᕐᒥᒡᓗ ᖃᓪᓗᓈᓄᑦ ᖃᐅᔨᓴᕐᕕᖕᒧᑦ ᐊᐅᓪᓚᖅᑎᑕᐅᓚᐅᖅᖢᑎᒃ ᓇᓗᓇᐃᖅᑕᐅᓂᐊᕐᒪᑕ ᖃᐅᔨᓴᕈᑎᖏᑦ. ᖃᐅᔨᓴᖅᑕᐅᔪᓂᑦ ᒪᕐᕉᖕᓂᒃ ᓇᓗᓇᐃᖅᑕᐅᔪᖃᓚᐅᖅᐳᖅ.

ᖃᐅᔨᓴᕈᑕᐅᔪᓂᑦ ᓇᓗᓇᐃᖅᓯᓚᐅᕐᒪᑕ ᓄᕙᒡᔪᐊᕐᓇᖅ-19 ᓯᐊᒻᒪᒃᐸᓪᓕᐊᓂᖓᓂ ᐅᔭᕋᖕᓂᐊᕐᕕᖕᒥ, ᑐᐊᕕᕐᓇᖅᑐᓕᕆᓂᕐᒧᑦ ᐸᕐᓇᐅᑎᒥᒃ ᐱᒋᐊᖅᑎᑦᑎᓚᐅᖅᐳᒍᑦ ᐃᑲᔫᑕᐅᓂᐊᖅᑐᒥᒃ ᐊᐃᑦᑐᕐᓗᐃᓐᓇᖅᑐᓕᖕᓂᒃ.

ᐊᐅᓪᓚᕆᐊᖃᓪᓚᕆᙱᑦᑐᑦ ᑕᒪᕐᒥᑦᑎᐊᖅ ᓄᖅᑲᖅᑎᑕᐅᓚᐅᕆᕗᑦ ᐅᔭᕋᖕᓂᐊᕐᕕᓕᐊᕐᓂᐊᖅᑐᑦ ᐅᔭᕋᖕᓂᐊᕐᕕᖕᒥᙶᖅᑐᓪᓗ.

ᑐᐊᕕᕐᓇᖅᑐᓕᕆᔨᑦ ᐊᓯᒃᑲᓐᓂᖏᓐᓂᒃ ᖃᓂᒋᔭᐅᑐᐃᓐᓇᕆᐊᓕᖕᓂᒃ ᖃᐅᔨᓴᒃᑲᓐᓂᓕᓚᐅᖅᐳᑦ ᖃᐅᔨᓴᒐᒃᓴᓂᓪᓗ ᐲᖅᓯᕝᕕᐅᑲᑕᒃᖢᑎᒃ.

ᐅᓄᖕᓂᑦ, ᑕᓪᓕᒪᒃᑲᓐᓂᕐᓂᒃ ᐲᖅᓯᕝᕕᐅᔪᖃᓚᐅᖅᐳᖅ ᑲᖏᖅᖠᓂᕐᒧᓪᓗ ᐊᐅᓪᓚᖅᑎᑕᐅᓪᓗᑎᒃ ᖃᐅᔨᓴᖅᑕᐅᓂᐊᖅᑐᑦ GeneXpert−ᒧᑦ ᐅᕝᕙᓘᓐᓃᑦ BioFire ᖃᕆᓴᐅᔭᒨᖅᑐᒧᑦ, ᐊᑕᐅᓯᕐᒥᒃ ᐱᖃᕐᓂᕋᖅᑕᐅᔪᖃᖅᖢᓂ ᐊᐅᓪᓚᖅᑎᑕᐅᓂᐊᖅᖢᓂᓗ ᓇᓗᓇᐃᖅᑕᐅᓂᐊᕐᒪᑦ ᖃᐅᔨᓴᖅᑕᐅᔾᔪᑎᖓ. ᐊᑕᐅᓯᖅ ᓱᓕ ᖃᐅᔨᓴᖅᑕᐅᔾᔪᑎ ᐅᑕᖅᑭᔭᐅᔪᖅ. 8−ᑲᓐᓂᕐᓂᒃ ᐲᖅᓯᕝᕕᐅᔪᓂᑦ ᖃᐅᒃᐸᑦ ᑲᖏᖅᖠᓂᕐᒧᑦ ᐊᐅᓪᓚᖅᑎᑕᐅᔪᖃᕐᓂᐊᕆᕗᖅ.

ᐱᖃᕐᓂᕋᖅᑕᐅᓚᐅᖅᑐᓕᒫᑦ ᐊᒻᒪ ᐅᓗᕆᐊᓇᖅᑐᒦᓐᓂᕋᖅᑕᐅᔪᑦ, ᐱᔭᕆᐊᖃᓪᓚᕆᙱᑦᑐᑦ ᐃᖅᑲᓇᐃᔭᖅᑏᑦ ᖃᓂᒋᔭᐅᓚᐅᖅᑐᑦ ᐃᓄᑐᐊᒃᑯᕕᖕᒦᓕᖅᑐᑦ.

ᐱᔭᕆᐊᖃᓪᓚᕆᒃᑐᑦ ᐃᖅᑲᓇᐃᔭᖅᑎᑦ ᓱᓕ ᐱᓕᕆᔭᕆᐊᖃᖅᑐᑦ ᐃᖅᑲᓇᐃᔭᖅᑎᐅᖃᑎᖏᑦ ᐊᑦᑕᕐᓇᙱᑦᑐᒦᖁᓪᓗᒋᑦ, ᓱᓕ ᐃᖅᑲᓇᐃᔭᖅᑐᑦ ᐃᓇᖏᖅᑕᐅᒃᐸᑕ ᑭᓯᐊᓂ. ᑕᐃᒃᑯᐊ ᐃᖅᑲᓇᐃᔭᖅᑎᑦ ᐊᑐᖅᑕᐅᔭᕆᐊᖃᓪᓚᕆᒃᑐᓂᒃ ᒪᓕᒃᑐᑦ ᐅᐸᒃᑕᐅᔭᕆᐊᖃᙱᖦᖢᑎᒃ ᑕᐃᑲᓃᑦᑐᓂᒃ, ᒪᑐᐊᖅᓯᒪᔭᕆᐊᖃᖅᖢᑎᒡᓗ. ᐃᖅᑲᓇᐃᔭᖅᑏᑦ ᖃᓂᒪᑲᑕᓕᖅᑐᑦ ᐃᓄᑑᔭᕆᐊᖃᓯᑲᐅᑎᒋᖃᑦᑕᕐᓂᐊᖅᐳᑦ.

ᐃᑉᐸᒃᓴᖅ ᐱᒋᐊᖅᖢᓂ, ᒪᕐᕉᒃ ᐃᓅᒃ ᖃᓂᒪᑲᑕᓕᓚᐅᖅᑐᑦ ᖃᓄᐃᑦᑐᓐᓃᓚᐅᖅᐳᑦ.

ᑐᐊᕕᕐᓇᖅᑐᓕᕆᔨᑦ ᒫᓐᓇ ᖃᓂᒋᔭᐅᑲᑕᓚᐅᖅᑐᓂᒃ ᓱᓕ ᖃᐅᔨᓇᓱᑲᑕᒃᑐᑦ ᐅᓗᕆᐊᓇᖅᑎᑦᑎᑦᑕᐃᓕᒪᓪᓗᑎᒡᓗ ᑕᐃᑲᓃᖏᓐᓇᕐᓂᐊᕋᓱᒋᔭᐅᓪᓗᑎᒡᓗ ᐱᓇᓱᐊᕈᓯᐅᓂᐊᖅᑑᑉ ᕿᑎᐊᓄᑦ ᑎᑭᓪᓗᒍ.

ᓄᕙᒡᔪᐊᕐᓇᖅ-19 ᐊᐃᑦᑐᕐᓗᐃᔪᓐᓇᕐᓂᖓ ᐅᔭᕋᖕᓂᐊᕐᕕᖕᒥ ᐃᓱᒫᓗᖕᓇᖅᑎᓪᓗᒍ, ᓄᓇᕗᒻᒥᐅᑦ ᐊᐃᑦᑐᕐᓗᐃᑐᐃᓐᓇᕆᐊᖃᕐᓂᖏᑦ ᓱᓕ ᐊᑦᑎᒃᑐᒦᑉᐳᖅ. ᕼᐆᑉ ᐲ−ᒥ ᒫᓐᓇ ᓄᓇᕗᒻᒥᐅᓂᒃ ᐃᖅᑲᓇᐃᔭᖅᑎᖃᙱᑉᐳᑦ ᐊᒻᒪ ᖃᓂᒋᔭᐅᔪᖃᖅᓯᒪᙱᖦᖢᓂᓗ ᐅᔭᕋᖕᓂᐊᕐᕕᖕᒥᙶᖅᑐᒥᒃ ᓄᓇᕗᒻᒥᐅᑦ ᓄᓇᓕᖏᓐᓄᑦ ᓇᓕᐊᖕᓄᑐᐃᓐᓇᑦᑎᐊᖅ.

ᑐᐊᕕᕐᓇᖅᑐᓕᕆᔨᑦ ᐱᓕᕆᐊᕆᔭᒥᓂᒃ ᐱᐊᓂᒃᐸᑕ, ᑎᑎᕋᕐᕕᑦᑎᓐᓂ ᕿᒥᕐᕈᔪᖃᓕᕐᓂᐊᖅᐳᖅ ᖃᓄᐃᓐᓂᐅᓚᐅᖅᑐᒥᒃ ᐊᒻᒪ ᖃᐅᔨᒋᐊᕈᑎᒃᓴᑦ ᑲᑎᑕᐅᓚᐅᖅᑐᑦ ᑐᐊᕕᕐᓇᖅᑐᓕᕆᔨᓂᑦ. ᑕᐃᑲᙵᑦ, ᑐᑭᓯᓂᐊᖅᐳᒍᑦ ᖃᓄᐃᓕᐅᒃᑲᓐᓂᕆᐊᖃᕐᒪᖔᑦᑕ ᐊᐃᑦᑐᕐᓗᐃᔪᖃᒃᑲᓐᓂᖁᓇᒍ.

ᖁᔭᓐᓇᒦᒃ.

 

ᐃᓚᒋᔭᐅᓪᓗᓂ ᓄᓇᕗᑦ ᒐᕙᒪᖓᑕ ᐱᓇᔪᖕᓂᕆᔭᖓᓄᑦ ᓴᐳᔾᔨᓯᒪᔪᒪᓪᓗᑎᒃ ᓄᓇᕗᒻᒥᐅᓂᒃ ᖁᐋᖅᓵᕐᓇᖅᑐᒧᑦ ᓄᕙᒡᔪᐊᕐᓇᖅ-19−ᒧᑦ, ᓄᓇᕗᑦ ᒐᕙᒪᖓᑕ ᐱᓕᕆᕝᕕᒋᑦ ᐅᑯᓂᖓ ᐊᑐᓕᖅᑎᑦᑎᓯᒪᕗᑦ:

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᔨᑦᑎᕋᐅᑎᖏᑦ

ᑲᑎᖦᖢᒋᑦ (ᑕᒪᕐᒥᑦᑎᐊᖅ ᐃᓄᑐᐊᒃᑯᕕᖕᒦᑦᑐᑦ)  
ᐊᐅᓪᓚᖅᓯᒪᔫᑉ ᖃᓄᐃᑦᑑᓂᖓ ᑐᔪᕐᒥᑎᑕᐅᔪᑦ ᐊᓂᑦᑕᐃᓕᒪᔪᓂ ᐅᑐᐱᕆ 2-ᒥᑦ ᐱᒋᐊᖅᖢᓂ
ᐋᓐᓂᐊᕐᕕᓕᐊᖅᑐᑦ 366
ᑭᒃᑯᑐᐃᓐᓇᑦ 398
ᑲᑎᖦᖢᒋᑦ 764


ᐊᐅᓪᓚᖅᐸᒃᑐᑦ ᐅᑎᖅᑎᑕᐅᓂᖏᓐᓄᑦ ᖃᓄᐃᓕᖓᓂᖏᑦ:

ᐅᓪᓗᖅ ᐊᐅᓪᓚᕐᕕᒃᓴᖓ ᖃᔅᓯᐅᓂᖏᑦ ᐊᐅᓪᓚᕐᓂᐊᖅᑐᑦ ᐃᓄᑐᐊᒃᑯᕕᖕᒦᑦᑐᑦ
ᐅᑐᐱᕆ 1 64
ᐅᑐᐱᕆ 2 47
ᐅᑐᐱᕆ 3 0
ᐅᑐᐱᕆ 4 28
ᐅᑐᐱᕆ 5 127
ᑲᑎᖦᖢᒋᑦ 266

 

ᐃᖅᑲᓇᐃᔭᕆᐊᖃᓪᓚᕆᒃᑐᑦ ᑐᒃᓯᕋᖅᑕᐅᔪᑦ

ᐅᑐᐱᕆ 1−ᒥ ᐱᒋᐊᖅᖢᓂ, 6615−ᓂᒃ ᑐᒃᓯᕋᖅᓯᒪᔪᖃᖅᐳᖅ, 3174−ᖑᓪᓗᑎᒃ ᐃᖅᑲᓇᐃᔭᕆᐊᖃᓪᓚᕆᒃᑐᓂᒃ ᑐᒃᓯᕋᕈᑕᐅᔪᑦ.

ᑐᒃᓯᕋᕈᑕᐅᓯᒪᔪᑦ ᖃᓄᐃᓕᖓᓂᖏᑦ # %
ᐊᖏᖅᑕᐅᓯᒪᔪᑦ (ᐅᑯᐊᖑᕗᑦ ᐱᒻᒪᕆᐊᓗᐃᑦ ᐱᒻᒪᕆᐅᓗᐊᙱᑦᑐᓪᓗ) 4627 69.9%
ᐊᖏᕐᑕᐅᙱᑦᑐᑦ 264 4.0%
ᐅᑕᖅᑭᔪᑦ 117 1.8%
ᐊᐅᓪᓚᕐᕕᐅᔪᓐᓇᖅᑐᑦ ᐊᑐᖅᑕᐅᒐᔪᒃᑐᓄᑦ ᐊᖏᖅᑕᐅᔪᑦ 1607 24.3%
ᑲᑎᖦᖢᒋᑦ 6615 100%


ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ

ᑐᒃᓯᕋᐅᑎᑦ ᐅᑭᐅᖅᑕᖅᑐᒧᐊᕈᒪᔪᓄᑦ ᐃᒡᓗᓕᐅᕆᐊᖅᑐᖅᑐᓄᑦ ᐱᓕᕆᐊᒃᓴᓄᑦ ᐅᕝᕙᓘᓐᓃᑦ ᓄᓇᕗᒻᒧᑦ ᐊᐅᓪᓚᕈᒪᔪᓄᑦ ᐃᒡᓗᓕᐅᕆᐊᖅᑐᖅᑐᓄᑦ ᐱᓕᕆᐊᒃᓴᓄᑦ, ᐃᕐᙲᓐᓈᖅᑕᐅᒃᑯᑦ ᓇᓂᔭᐅᔪᓐᓇᖅᐳᖅ ᐅᕙᙵᑦ, CPHOconstructionrequests@gov.nu.ca

ᐃᒡᓗᓕᐅᖅᑏᑦ ᐊᓂᒍᐃᔪᑦ ᐃᓄᑐᐊᒃᑯᕕᖕᒥ ᒫᓐᓇᒧᑦ ᑎᑭᖦᖢᒍ: 1591

 

 

ᓄᓇᕗᒻᒥᐅᓂ ᖃᓄᐃᙱᑦᑎᐊᖅᑎᑦᑎᓇᓱᒡᓗᑕ ᑕᒪᑦᑕ ᑲᒪᒋᔭᒃᓴᕆᔭᕗᑦ! ᐳᐃᒍᖅᑕᐃᓕᒋᑦ: ᐊᒡᒐᑎᑦ ᐊᓪᓕᕋᐃᓪᓗ ᐅᐊᓴᖃᑦᑕᕐᓗᒋᑦ, ᖃᓂᒌᓗᐊᖅᑕᐃᓕᕙᒡᓗᓯ, ᐃᖢᐊᖅᓴᐃᔨᓄᑦ ᐅᖃᐅᔾᔪᐃᔾᔪᑕᐅᔪᓂᑦ ᓈᓚᒃᐸᒡᓗᓯ, ᐊᖏᕐᕋᖅᓯᒪᐃᓐᓇᕐᓗᑕᓗ ᖃᓂᒪᒍᑦᑕ.