ᐅᖃᓚᐅᑎᓯᐅᑏᑦ

You are here

ᓄᕙᒡᔪᐊᕐᓇᖅ-19 ᓄᓇᕗᑦ ᒐᕙᒪᖓᓂ ᑐᓴᒐᒃᓴᑦ - ᓄᕕᐱᕆ 16, 2020

ᓄᕕᐱᕆ 16, 2020

ᓄᕙᒡᔪᐊᕐᓇᖅ-19 ᓄᓇᕗᑦ ᒐᕙᒪᖓᓂ ᑐᓴᒐᒃᓴᑦ - ᓄᕕᐱᕆ 16, 2020

ᓯᕗᓕᖅᑎᐅᑉ ᑐᓴᒐᒃᓴᖏᑦ ᓄᑖᑦ

ᐅᓐᓄᓴᒃᑯᑦ. ᐊᒃᓱᕈᕐᓇᖅᓯᒪᓵᖅᐳᖅ ᐱᓇᓱᐊᕈᓯᐅᑉ ᓄᙳᒋᓵᖅᑕᖓ, ᑕᒪᔅᓯ ᑕᒪᑐᒥᖓ ᖃᐅᔨᒪᔪᐃᓐᓇᐅᑎᓪᓗᓯ, 26−ᓂᒃ ᖃᐅᔨᒪᔭᐅᓪᓚᑦᑖᖅᑐᓂᒃ ᓄᕙᒡᔪᐊᕐᓇᖅ-19−ᑕᖃᕐᓂᖓᓂᒃ ᓄᓇᕗᒻᒥ−6-ᓂᒃ ᓄᑖᓂᒃ ᐱᑕᖃᖅᖢᓂ ᐊᕐᕕᐊᓂ ᐊᒻᒪᓗ ᒪᕐᒡᕈᖕᓂᒃ ᓄᑖᖕᓂᑦ ᐱᑕᖃᖅᖢᓂ ᑲᖏᖅᖠᓂᕐᒥ. ᐃᓱᒪᒥᐅᑕᕆᕙᒃᑲ ᑭᒃᑯᓕᒫᑦᑎᐊᑦ ᐱᔪᓐᓃᖅᐸᓪᓕᐊᔪᑦ ᑕᐃᒃᑯᐊᓗ ᐅᐸᒃᑕᐅᑦᑕᐃᓕᒪᔪᒦᑦᑐᑦ.

ᑲᑎᖦᖢᒋᑦ ᐃᓄᐃᑦ ᒫᓐᓇᒧᑦ ᑎᑭᖦᖢᒍ ᖃᐅᔨᓴᖅᑕᐅᓯᒪᓕᖅᑐᑦ 4089−ᖑᓕᖅᑐᑦ. 768 ᐃᓄᐃᑦ ᒫᓐᓇ ᖃᐅᔨᓴᖅᑕᐅᔪᑦ.

ᓘᒃᑖᖅ ᐹᑐᓴᓐ ᐅᐊᑦᑎᐊᕈᑦᑎᐊᑯᓗᒃ ᐅᖃᐅᓯᖃᕐᓂᐊᖅᑐᖅ ᓄᑖᓂᒃ, ᐅᑭᐅᖅᑕᖅᑐᒥᓕᒫᒥ ᐊᑐᖅᑕᐅᓂᐊᖅᑐᓂᒃ ᐃᓕᐅᖅᑲᖅᐸᓪᓕᐊᔭᑦᑎᓐᓂᒃ.

ᑕᐃᒪᐃᓕᐅᖅᑎᓚᐅᙱᓐᓂᓐᓂ, ᐃᒪᓐᓇ ᐅᖃᕈᒪᕗᖓ, ᖃᐅᔨᒪᕗᖓ ᑕᒪᓐᓇ ᐊᒃᓱᕈᕐᓇᕐᓂᐊᕐᓂᖓᓂᒃ. ᐅᑎᕈᒪᓚᐅᙱᑉᐳᒍᑦ ᐊᔪᖅᑎᓯᒪᑎᑦᑎᔾᔪᑎᒋᓚᐅᖅᑕᑦᑎᓐᓄᑦ ᐅᐱᕐᙵᒃᓵᖑᓵᓚᐅᖅᑐᖅ. ᑭᑎᕝᓯᐊᓂᓕ ᖃᓄᐃᙱᑦᑎᐊᖁᓪᓗᒋᑦ ᖁᐊᖅᓵᕐᓇᖅᑐᒦᖁᓇᒋᓪᓗ ᓄᓇᕗᒻᒥᐅᑦ, ᑕᒪᓐᓇ ᑕᐃᒪᐃᑦᑕᕆᐊᖃᖅᐳᖅ.

ᐃᒪᓐᓇ ᐃᓱᒪᒋᔭᐅᓂᐊᖅᐳᖅ, ᓄᖅᑲᖓᑎᑦᑎᔾᔪᑕᐅᓗᓂ ᓲᕐᓗ ᓇᕿᑕᕙᒃᑐᑎᑐᑦ, ᐱᒋᐊᕐᕕᒃᓴᐅᓗᓂ ᐱᒋᐊᑦᑎᐊᒃᑲᓂᕋᔭᕐᓂᕐᒥᒃ. ᑭᓇᑐᐃᓐᓇᑦᑎᐊᖅ ᒫᓐᓇ ᒪᒋᐊᓕᖕᓄ ᑖᒃᑯᓄᖓ ᑭᑭᑕᐅᔪᓐᓇᙱᓚᖅ.  ᑐᑭᓯᓇᖅᓯᑎᑦᑎᐊᓚᐅᕐᓚᒍ ᑕᒪᓐᓇ, ᑐᑭᓯᓂᕐᓗᒃᑐᖃᔾᕚᙱᒻᒪᑦ: ᐳᓛᕆᐊᖃᑦᑕᙱᓪᓗᑎᑦ. ᐃᓅᖃᑎᖃᖃᑦᑕᙱᓪᓗᑎᑦ ᐃᒡᓗᒥᐅᑕᐅᖃᑎᕕᑦ ᐊᓯᖏᓐᓂᒃ. ᒪᓐᓇ ᐊᒃᓱᕈᒃᑲᓐᓂᕐᓗᖓ ᐅᖃᐅᓯᕆᔪᓐᓇᙱᓚᕋ− ᐊᖏᕐᕋᖅᓯᒪᒋᑦ ᒥᑭᑦᑐᒻᒪᕆᑯᓘᒐᓗᐊᒥᒡᓘᓐᓃᑦ ᖃᓂᒪᖅᑰᔨᒍᕕᑦ.

ᐱᒻᒪᕆᐅᓂᖅᓴᒻᒪᕆᐅᓕᖅᐳᖅ ᖃᖓᐅᓚᐅᕐᓂᖓᓂᑦ ᖃᓄᐃᓕᐅᕆᐊᖃᖅᑕᓕᒫᕗᑦ ᖃᓄᐃᓕᐅᕐᓗᑎᒍ ᐃᑲᔪᕈᒪᓂᕐᒧᑦ ᓄᓇᓕᑦᑎᓐᓂᒃ. ᑕᐃᒫᒃ ᐱᓕᕆᔪᓐᓇᖅᑐᒍᑦ,

ᐊᑐᖅᑕᐅᔭᕆᐊᖃᒻᒪᕆᑐᓂᒃ ᐱᒻᒪᕆᐊᓗᖕᓂᒡᓗ ᐃᖅᑲᓇᐃᔭᖅᑎᑕᖃᖅᐳᖅ ᐃᖅᑲᓇᐃᔭᓯᒋᐊᖅᑳᖅᐸᒃᑐᓂ, ᐃᖅᑲᓇᐃᔭᖅᖢᑎᒡᓗ ᐅᓪᓗᓕᒫᖅ ᐅᓐᓄᐊᓕᒫᕐᓗ, ᓄᓇᕗᒻᒥᐅᓂᒃ ᖁᐊᖅᓵᓇᖅᑐᙶᑎᑦᑎᔪᒪᙱᖦᖢᑎᒃ ᖃᓄᐃᙱᑦᑎᐊᖁᔨᓂᕐᒥᓄᓪᓗ − ᐊᑏ, ᐊᒃᓱᕈᖅᖢᑎᒃ ᐱᓕᕆᕐᔪᐊᕐᓂᕆᔭᖓᑦ, ᐊᑐᕈᒪᔭᕋᓗᐊᒥᓂᒡᓗ ᐊᑐᙱᓐᓂᕆᕙᒃᑕᖓᑦ ᑕᒪᐅᖓᑐᐃᓐᓈᖅᑎᙱᓚᐅᕐᓚᕗᑦ.

ᑕᒪᑦᑕᑦᑎᐊᖅ ᐱᔭᒃᓴᑦᑎᓐᓂᒃ ᐱᓕᕆᒍᑦᑕ, ᐱᐅᓂᖅᓴᒻᒪᕆᖕᒥᒃ ᐃᓂᒦᓛᖅᐳᒍᑦ ᑎᓯᐱᕆ ᐱᒋᐊᓕᓵᖅᐸᑦ. ᐊᑏ, ᑕᐃᒪᐃᔾᔮᙱᑦᑐᖔᖃᑦᑕᖅᑕᐃᓕᑕ. ᑭᓯᐊᓂ ᑕᐃᒪᐃᑦᑕᕆᐊᖃᓪᓚᕆᒃᑳᖓᓯ, ᐊᖏᕐᕋᖅᓯᒪᕙᒡᓗᓯ ᖁᐊᖅᓵᕐᓇᖅᑐᒦᙱᓪᓗᓯᓗ.

 

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᖓᑕ ᑐᓴᖅᑎᑦᑎᔾᔪᑎᖏᑦ ᓄᑖᑦ

ᐅᓐᓄᒃᓴᒃᑯᑦ. ᐅᓐᓄᐊᖅ ᐊᑐᕐᓂᖓᓂ ᓇᓗᓇᐃᖅᓯᓚᐅᖅᐳᒍᑦ 6−ᓂᒃ ᓄᑖᓂᒃ ᑕᐃᒪᐃᓪᓚᕆᖕᓂᕋᖅᑕᐅᔪᓂᒃ ᓄᕙᒡᔪᐊᕐᓇᖅ-19−ᖃᖅᖢᑎᒃ ᐊᒃᕕᐊᓂ ᒪᕐᕉᖕᓂᒡᓗ ᑲᖏᖅᖠᓂᕐᒥ, ᑲᑎᖦᖢᒋᑦ 26−ᖑᓕᖅᖢᑎᒃ ᐱᖃᓪᓚᕆᖕᓂᕋᖅᑕᐅᔪᑦ ᓄᓇᕗᒻᒥ.

ᐋᓐᓂᐊᖃᕐᓇᙱᑦᑐᓕᕆᔨᕗᑦ ᑐᐊᕕᕐᓇᖅᑐᓄᓪᓗ ᑭᐅᓯᓂᕐᒧᑦ ᐱᓕᕆᔩᑦ ᐅᓪᓗᓕᒫᖅ ᐅᓐᓄᐊᓕᒫᕐᓗ ᐱᓕᕆᕗᑦ ᑐᔾᔭᖅᓯᕙᓪᓕᐊᓪᓗᑎᒃ ᖃᐅᔨᓴᖅᓯᕙᒃᖢᑎᒡᓗ ᐱᓇᔪᖕᓂᕐᒥᓂ ᑐᔾᔭᖅᓯᓇᓱᖕᓂᕐᒥᒃ ᓄᖅᑲᖅᑎᑦᑎᓱᕐᓂᕐᒥᓂᒡᓗ ᑕᒪᑐᒥᖓ ᖃᓂᒪᓐᓇᒥᒃ.

ᖃᐅᔨᓴᕐᓂᓕᒫᑦᑎᓐᓂ, ᐃᓱᒫᓘᑎᖃᖅᐸᓪᓕᐊᕗᒍᑦ ᑕᒪᓐᓇ ᓄᕙᒡᔪᐊᕐᓇᖅ-19 ᓯᐊᒻᒪᒐᔭᕐᓂᖓᓂᒃ ᓄᓇᓕᒃᑲᓐᓂᕐᓄᑦ, ᑕᐃᒪᐃᓐᓂᖓᓄᓪᓗ ᑕᕝᕙ ᐱᒋᐊᖅᑎᑦᑎᕗᒍᑦ ᐅᑭᐅᖅᑕᑎᑐᒥᓕᒫᖅ ᐊᕕᒃᓯᒪᓂᑦᑎᓐᓂᓕᒫᖅ ᒪᑐᓯᒪᐅᖅᑎᑦᑎᓕᕐᓂᑦᑎᓐᓂᒃ ᐊᔪᕐᓇᖅᑎᑦᑎᓪᓗᑕ ᓲᕐᓗ ᑕᑯᓚᐅᖅᑕᑦᑎᑐᑦ ᒫᑦᓯᐅᖅᑐᒥ ᐊᐃᕐᕆᓕᐅᓚᐅᖅᑐᒥᓗ.

ᑕᒪᒃᑯᐊ ᐊᑐᕐᓂᐊᖅᐸᕗᑦ ᐱᓇᓱᐊᕈᓯᓪᓗᐊᑕᐅᓂᐊᓕᖅᑑᖕᓄᑦ ᒪᕐᕉᖕᓄᑦ ᓯᐊᒻᒪᒃᑎᑦᑎᑦᑕᐃᓕᒪᒃᑕᕝᑲᓐᓂᕈᒪᓂᒧᑦ ᑕᒪᑐᒥᖓ ᓄᕙᒡᔪᐊᕐᓇᖅ-19−ᒥᒃ.

ᐱᒋᐊᓗᓂ ᐱᖓᔪᐊᓐᓂ ᑕᒫᓂᓕᒫᖅ ᐅᑭᐅᖅᑕᖅᑐᒥ ᐊᕕᒃᓯᒪᓂᓕᒫᒥ:

  • ᑕᒪᕐᒥᑦᑎᐊᖅ ᑲᑎᓐᓂᕆᔭᐅᕙᒃᑐᑦ ᐃᓱᓕᑦᑕᖅᑎᑕᐅᓕᖅᐳᑦ ᑕᓪᓕᒪᓄᑦ ᐃᓄᖕᓄᑦ, ᑲᑎᑦᑐᖃᖃᑦᑕᔾᔮᙱᓚᕐᓗ ᐊᖏᕐᕋᕆᔭᐅᔪᓂ.
  • ᑕᒪᕐᒥᑦᑎᐊᖅ ᑮᓇᐅᔭᓕᐅᕋᓱᒃᑏᑦ ᑮᖕᓇᐅᔭᓕᐅᕋᓱᒃᑎᐅᙱᑦᑐᓪᓗ ᓇᖕᒥᓂᕆᔭᐅᔪᑦ ᒪᑐᔭᕆᐊᖃᖅᐳᑦ, ᑭᑭᑕᐅᓗᑎᒃ ᓂᕿᑖᕐᕖᑦ ᓂᐅᕕᕐᕖᑦ; ᐅᖅᓱᐊᓗᖕᒧᑦ ᓄᓇᓯᐅᑎᓄᓪᓗ ᐱᔨᑦᑎᕋᕐᕕᖃᕐᓂᕐᒧᑦ ᐃᓂᓄᑦ, ᑲᓇᑕᒥ ᑎᑎᖃᕐᓂᐊᕐᕕᒃ; ᑮᓇᐅᔭᓄᑦ ᐃᓂᒋᔭᐅᕙᒃᑐᑦ.
  • ᓂᕆᔭᖅᑐᕐᕖᑦ ᒪᑐᐃᙶᕐᓗᑎᒃ ᐊᐃᔭᐅᓂᐊᖅᑐᓄᑦ ᑭᓯᐊᓂ.
  • ᐊᒻᒪᓗᒃᑲᓐᓂᖅᑕᐅᖅ, ᑕᒪᕐᒥᑦᑎᐊᖅ ᐃᓕᓐᓂᐊᕐᕖᑦ, ᐃᓚᒋᔭᐅᓪᓗᓂ ᓄᓇᕗᒻᒥ ᓯᓚᑦᑐᖅᓴᕐᕕᒃ, ᒐᕙᒪᑐᖃᒃᑯᑦ, ᐊᕕᒃᓯᒪᓂᕐᒥᒃ ᒐᕙᒪᒃᑯᑦ, ᓄᓇᓕᖕᓂᓗ ᒐᕙᒪᐃᑦ ᑎᑎᕋᕐᕕᖏᑦ ᒪᑐᔭᕆᐊᖃᖅᐳᑦ ᑭᓯᐊᓂ ᑕᒪᒃᑯᓄᖓ ᐱᓕᕆᐊᖑᓪᓚᕆᒋᐊᓕᖕᓄᑦ ᐱᓕᕆᐊᒃᓴᓄᑦ.
  • ᐃᓕᓐᓂᐊᕐᕖᑦ ᐱᑎᑦᑎᓂᐊᖅᐳᑦ ᐅᐸᒃᓯᒪᙱᒃᑲᓗᐊᕐᓗᒍ ᐃᓕᑦᑎᕙᓪᓕᐊᓂᕐᒧᑦ ᐊᑐᖅᑕᐅᖔᕈᓐᓇᖅᑐᓂᒃ.
  • ᓇᖕᒥᓂᕐᒧᑦ ᐱᔨᑦᑎᕋᖅᑕᐅᕝᕖᑦ, ᓲᕐᓗ ᓄᔭᓕᕆᔩᑦ, ᐃᖃᐃᓕᓴᐃᔩᑦ, ᐊᔾᔨᑲᓴᖏᓐᓂᒡᓗ ᐱᓕᕆᕙᒃᑐᑦ ᒪᑐᔭᕆᐊᖃᖅᐳᑦ.
  • ᑕᒪᕐᒥᑦᑎᐊᖅ ᐱᙳᐊᕐᓂᕐᒧᑦ ᐱᓕᕆᐊᖑᕙᒃᑐᑦ ᐱᓕᕆᓃᓪᓗ ᓄᖃᖓᑎᑕᐅᓕᖅᐳᑦ.
  • ᐃᖃᕈᓐᓃᖅᓴᕐᕖᑦ, ᐃᖃᐃᓕᓴᕐᕖᑦ, ᐳᐃᔾᔪᕌᕐᕖᑦ ᒪᑐᔭᐅᕗᑦ.
  • ᕿᒥᕐᕈᐊᒐᖃᕐᕖᑦ, ᑕᑯᓐᓇᒐᖃᕐᕖᑦ ᑕᑯᔭᖅᑐᐃᕝᕖᓪᓗ ᒪᑐᕗᑦ.

ᐃᓐᓇᕆᔭᕗᑦ ᓴᐳᑎᓯᒪᔪᒪᓪᓗᒋᑦ, ᑕᒪᕐᒥᑦᑎᐊᖅ ᐳᓛᕆᐊᖅᐸᖕᓃᑦ ᐃᓐᓇᐃᑦ ᐃᓂᒋᓕᖅᐸᒃᑕᖏᓐᓄᑦ ᐊᑯᓂᑲᓪᓚᒡᓗ ᑲᒪᒋᔭᐅᕕᖕᓄᑦ ᓄᖅᑲᖓᑎᑕᐅᕗᑦ ᐱᓇᓱᐊᕈᓰᖕᓄᑦ ᒪᕈᓪᓗᐊᑖᖕᓄᑦ, ᑭᓯᐊᓂ ᑕᐃᒪᐃᙱᑦᑐᓐᓇᖅᑐᖅ ᐊᖏᖅᑕᐅᓯᒪᓗᓂ ᓘᒃᑖᒥᑦ ᑕᐃᔅᓱᒥᖓ ᑲᒪᔪᒥᑦ. ᐊᐱᕆᕙᕗᑦᑕᐅᖅ ᐃᓐᓇᐃᑦ ᓇᖕᒥᓂᖅ ᓇᐅᑦᑎᕐᓱᑦᑎᐊᓪᓚᕆᖁᓪᓗᒋᑦ ᖃᓄᑐᐃᓐᓇᖅ ᖃᐅᔨᔾᔪᑕᐅᔪᓐᓇᖅᑐᓄᑦ ᑕᒪᑐᒧᖓ ᖃᓂᒪᓐᓇᒧᑦ, ᐅᖄᓚᓯᑲᐅᑎᒋᖃᑦᑕᖁᓪᓗᑎᒍᓪᓗᖃᓂᒪᕈᔪᓕᑐᐊᕌᖓᒥᒃ. ᓄᓇᓕᖕᒥᐅᓂᒃ ᖃᐅᔨᒋᖅᑐᖃᖃᑦᑕᖅᐸᑦ ᐃᓐᓇᕐᓂᒃ, ᐊᑐᖃᑦᑕᕐᓂᐊᖅᐳᓯ ᐊᑐᓪᓚᕆᖕᓂᕐᒥᒃ ᐅᖓᓯᒌᒡᓗᓯ, ᐃᒡᓗᖏᓐᓄᓪᓗ ᐃᓯᖅᑕᐃᓕᓗᓯ.

ᐋᓐᓂᐊᕕᓕᐊᕐᕖᑦ ᒪᑐᕗᑦ ᑭᓯᐊᓂ ᑐᐊᕕᕐᓇᖅᑐᓄᑦ. ᕿᑭᖅᑕᓂ ᐋᓐᓂᐊᕕᒃ ᑕᐃᑯᙵᐅᑐᐃᓐᓇᖅᑐᓂᒃ ᑲᒪᒋᔭᐅᔭᖅᑐᕐᓗᑎᒃ ᐊᖏᖅᓯᖃᑦᑕᔾᔮᔪᓐᓃᖅᑐᑦ. ᐅᖄᓚᖅᑳᖃᑦᑕᕆᑦ ᖃᐅᔨᓴᖅᑕᐅᓂᐊᖅᐳᑎ. ᐋᓐᓂᐊᕕᓕᐊᖅᑕᐃᓕᒋᑦ ᑭᓯᐊᓂ ᑕᐃᑯᙵᐅᖁᔭᐅᒍᕕᑦ. ᑭᓇᑐᐃᓐᓇᑦᑎᐊᖅ ᓄᓇᓕᖕᓂ ᐋᓐᓂᐊᖃᕐᓇᙱᑦᑐᓕᕆᕝᕕᖕᒧᙵᐅᔪᖅ ᐋᓐᓂᐊᕕᓕᐊᖅᑐᕐᓘᓐᓃᑦ ᒪᑐᐊᖅᓯᒪᔭᕆᐊᖃᖅᐳᖅ.

ᐊᐱᖅᑯᑎᒃᓴᖃᕈᕕᑦ ᐱᔾᔪᑎᖃᕐᓗᑎᑦ ᓄᕙᕐᔪᐊᕐᓇᖅ-19-ᒥᒃ, ᖃᐅᔨᔪᒪᓗᑎᓪᓘᓐᓃᑦ ᖃᐅᔨᓴᖅᑕᐅᔭᕆᐊᖃᕐᒪᖔᖅᐱᑦ, ᐅᖄᓚᕝᕕᒋᓗᒍ ᓄᕙᒡᔪᐊᕐᓇᖅ-19−ᒧᑦ ᐅᖄᓚᕝᕕᐅᔪᓐᓇᖅᑐᖅ ᐅᓇ,1-888-975-8601. ᐅᖄᓚᕝᕕᒋᓗᒍ ᑖᓐᓇ ᐅᖄᓚᕝᕕᔪᓐᓇᖅᑐᖅ ᐱᕕᒃᓴᖃᖅᑎᑦᑎᓂᐊᖅᑐᖅ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᑦᑎᓐᓂᒃ, ᐱᓕᕆᐊᖃᓪᓗᐊᑕᕈᓐᓇᕐᓗᑎᒃ ᐊᐅᓚᑦᑎᕝᕕᖃᕐᓂᕐᒥᒃ ᑕᒪᑐᒪ ᓯᐊᒻᒪᕈᓘᔭᓕᕋᔭᕐᓂᖓᓂᒃ. ᐅᖄᓚᓃᑦ ᐋᓐᓂᐊᕕᓕᐊᕐᕕᖕᓄᑦ ᑐᐊᕕᕐᓇᖅᑐᓄᑐᐊᖑᓪᓗᐊᖅᐳᑦ.
 

ᒥᓂᔅᑕ ᐋᓐᓂᐊᖃᖕᓇᙱᑦᑐᓕᕆᔨᒃᑯᑦ ᓄᑖᙳᕆᐊᖅᑎᑕᖏᑦ

ᖃᐅᔨᒪᐃᓐᓇᓚᐅᖅᐳᒍᑦ ᑕᒪᓐᓇ ᓄᕙᒡᔪᐊᕐᓇᖅ-19 ᖃᖓᙳᖅᐸᑦ ᓄᓇᕗᒻᒧᐊᓛᕐᓂᖓᓂᒃ. ᑕᐃᒪᓕ ᑕᒫᓃᓕᕐᓂᖓᓄᑦ, ᑕᐃᒪᓕ ᑕᒪᑦᑕ ᐱᔭᒃᓴᖃᓕᖅᐳᒍᑦ ᓄᖅᑲᖅᑎᑦᑎᓂᕐᒥᒃ ᓯᐊᒻᒪᒃᐸᓪᓕᐊᓇᔭᕐᓂᖓᓂᒃ.

ᐱᓕᕆᔪᓐᓇᓪᓚᕆᒃᑐᓂᒃ ᐱᓕᕆᔨᖃᖅᐳᒍᑦ ᐊᐴᑎᖃᑦᑕᐅᑎᓚᐅᖅᑐᓄᑦ ᑐᔾᔭᖅᓯᔪᒪᓪᓗᑎᒃ, ᖃᐅᔨᒋᐊᕐᕕᖃᖃᑦᑕᕈᒪᓪᓗᑎᒡᓗ ᐃᓄᖕᓂᒃ ᖃᐅᔨᒋᐊᕐᕕᒋᒃᑲᓐᓂᖅᐸᒡᓗᒋᑦ. ᒫᓐᓇᓕ ᑕᕝᕙ ᐱᕕᒃᓴᐅᙱᓚᖅ ᑭᓇᑐᐃᓐᓇᑦᑎᐊᖅ ᓄᓇᕗᒻᒥ ᖃᐅᔨᓴᖅᑎᐅᓂᐊᕐᓗᓂ. ᐃᓱᒫᓗᒃᑐᖃᙱᓪᓗᓂ ᑭᓇ, ᖃᓄᖅ, ᖃᓄᕐᓗ ᑕᒪᐅᙵᕐᒪᖔᑦ. ᐃᓱᒫᓗᒋᐊᖃᖅᐳᒍᑦ ᖃᓄᖅ ᓄᖅᑲᖅᑎᑦᑎᔪᓐᓇᕐᒪᖔᑦᑕ ᓯᐊᒻᒪᒃᐸᓪᓕᐊᓂᕆᔭᖓᓂᒃ. ᑕᒪᓐᓇᓗ ᐃᓕᖕᓂᑦ ᐱᒋᐊᕐᕕᖃᕋᔭᖅᖢᓂ.

ᑕᒪᓐᓇ ᑕᒪᐅᙵᕈᓘᔭᕐᓂᖓ ᑕᑯᒃᓴᕈᖅᑎᑦᑎᕗᖅ ᖃᓄᖅ ᐱᒻᒪᕆᐊᓘᑎᒋᖕᒪᖔᑦ ᒪᓕᒋᐊᒃᓴ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᑐᖁᔭᐅᔪᓂᒃ, ᐅᕙᑦᑎᓐᓂᒡᓗ ᐃᖅᑲᐃᑎᑦᑎᓪᓗᓂ ᖃᔅᓯᓪᓚᖕᓂᒃ ᐊᑐᖅᑕᐅᔭᕆᐊᓕᖕᓂᒃ ᐋᖅᑭᒃᑕᐅᓯᒪᔪᖃᕐᓂᖓᓂᒃ ᐱᔾᔪᑎᖃᖅᖢᑎᓪᓗ.

ᐅᕙᑦᑎᓐᓂᒃ, ᐃᓚᑦᑎᓐᓂᒃ, ᓄᓇᓕᑦᑎᓐᓂᒡᓗ ᖁᐊᖅᓵᕐᓇᓯᖅᑐᒦᑎᑦᑎᔪᒪᙱᑯᑦᑕ, ᓂᕈᐊᕆᔭᖃᕈᓐᓇᒋᓚᒍᑦ ᓇᓕᐊᖕᓂᒃ ᐊᑐᖅᑕᐅᔭᕆᐊᓕᖕᓂᒃ ᒪᓕᖕᓂᐊᕆᐊᒃᓴᑦᑎᓐᓂᒃ. ᑕᐃᒃᑯᐊ ᑕᒪᕐᒥᑦᑎᐊᖅ ᒪᓕᒋᐊᖃᖅᐸᕗᑦ, ᐅᖃᐅᓯᐅᓯᒪᑎᓗᒋᑦ ᓘᑖᖁᑎᑦᑎᐊᕙᑦᑎᓐᓂᑦ.

ᑕᒪᓐᓇ ᓇᒧᙵᕈᓘᔭᓂᖓ ᐃᓄᖕᓂᒃ ᐊᐱᖅᑯᑎᒃᓴᒃᑖᖅᑎᑦᑎᕗᖅ ᐅᐸᒃᑕᐅᑦᑕᓕᒪᑎᑕᐅᕙᖕᓂᖅ ᑲᔪᓯᐊᑎᑦᑎᑦᑎᐊᕋᓗᐊᕐᒪᖓᑦ. ᑕᖅᑭᓄᑦ 8−ᓄᑦ ᑲᔪᓯᓂᖃᑦᑎᐊᓚᐅᖅᐳᖅ. ᑕᖅᑭᓄᑦ 8−ᓄᑦ ᐃᑲᔪᓚᐅᖅᐳᖅ ᑕᒪᓐᓇ ᖃᓂᒪᓐᓇᖅᑐᖅ ᑕᒪᐅᙵᖅᑎᙱᖦᖢᒍ.

ᐅᐸᒃᑕᐅᑦᑕᐃᓕᒪᓂᖅ ᑲᔪᓯᓂᖃᑦᑎᐊᕈᓐᓇᑐᐃᓐᓇᖅᐳᖅ ᑕᐃᒃᑯᐊ ᐃᓄᐃᑦ ᒪᓕᖃᑦᑕᖅᐸᑕ ᒪᓕᒋᐊᓕᖕᓂᒃ ᐅᐸᑦᑕᐅᑦᑕᐃᓕᒪᔪᒦᓐᓂᕐᒥᓂ. ᐃᒪᓐᓇ ᓘᒃᑖᖅ ᐹᑐᓴᓐ ᐅᖃᖅᓯᒪᑎᓪᓗᒍ, ᑕᒪᓐᓇ ᐱᐅᔪᓪᓚᕆᑯᓘᙱᓐᓂᖓᓂᒃ, ᑕᐃᒪᐃᓐᓂᖓᓄᓪᓗ ᑕᕝᕙ ᒪᓕᒋᐊᖃᖅᐳᒍᑦ ᑕᒪᐃᓐᓂᑦᑎᐊᖅ ᒪᓕᒋᐊᓕᖕᓂᒃ.

ᑕᐃᒪᓕ ᒫᓐᓇ ᓇᒧᙵᕈᓘᔭᖅᑎᑦᑎᑦᑕᐃᓕᒪᒃᑲᓐᓂᓕᕐᓂᑦᑎᓐᓂ, ᑭᒃᑯᓕᒫᑦᑎᐊᑦ ᑎᓕᐊᖅᐸᒃᑲ ᒪᓕᖁᓪᓗᒋᑦ ᒪᓕᒋᐊᓕᖕᓂᒃ.

  • ᐳᓛᕆᐊᖃᑦᑕᙱᓪᓗᓯ.
  • 6−ᓂᒃ ᐃᓯᒃᑲᓂᒃ ᐅᖓᓯᒌᒃᑎᒋᕙᒡᓗᓯ.
  • ᐅᐸᒃᑕᐅᑦᑕᐃᓕᒪᔪᒦᒃᑯᔅᓯ, ᐅᐸᒃᑕᐅᑦᑕᐅᓕᒪᔪᒦᖏᓐᓇᕐᓗᓯ.
  • ᖃᓂᒪᒍᕕᑦ ᐊᖏᕐᕋᖅᓯᒪᓗᑎᑦ ᐅᖄᓚᕝᕕᒋᓗᒍᓗ ᓄᕙᒡᔪᐊᕐᓇᖅᑐᒧᑦ ᐅᖄᓚᕝᕕᐅᕙᒃᑐᖅ.
  • ᑭᓱᑐᐃᓐᓇᓂᒃ ᐊᒥᖅᑳᕈᑎᖃᖃᑦᑕᙱᓪᓗᑎᑦ. ᐃᓅᖃᑎᒌᓪᓚᕆᒃᐸᒃᖢᑕ ᐃᓅᖃᑎᒌᒃᐳᒍᑦ, ᖃᐅᔨᒪᓪᓗᖓᓗ ᐊᔪᕐᓇᖅᑐᒻᒪᕆᐅᓂᖓᓂᒃ, ᐃᒪᓐᓇᑐᐃᓐᓇᕐᓘᓐᓃᑦ, ᓂᑯᑭᑦᑕᐹᓂᒃ ᐊᑐᖃᑦᑕᐅᑎᓂᖅ, ᓱᐴᒐᕐᓂᒃ, ᑭᓱᑐᐃᓐᓇᓂᒡᓗ ᓯᐊᒻᒪᒃᑎᕆᔪᓐᓇᖅᐳᖅ ᑕᒪᑐᒥᖓ ᖃᓂᒪᓐᓇᒥᒃ.

ᒪᕐᕉᓂᐊᓕᖅᑑᒃ ᐱᓇᓱᐊᕈᓰᒃ ᐊᔪᕐᓇᕐᓂᐊᖅᑑᒃ ᖃᐅᔨᒪᔪᖓ ᐃᓄᖕᓄᑦ, ᑭᓯᐊᓂᓕ, ᓈᓚᖕᓂᐊᖅᐳᓯ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑎᓕᓯᔾᔪᑎᒋᓯᒪᔭᖏᓐᓂᒃ.

ᑕᒪᑦᑕᑦᑎᐊᖅ ᐱᕕᒃᓴᖃᖅᐳᒍᑦ ᓯᐊᒻᒪᒃᑎᕆᑦᑕᐃᓕᒪᒃᑲᓐᓂᕐᓂᕐᒥᒃ ᑕᒪᑐᒥᖓ ᖃᓂᒪᓐᓇᖅᑐᒥᒃ, ᐱᓕᕆᖃᑎᒌᒡᓗᑕ ᐅᖓᓯᒌᖃᑦᑕᕐᓂᕐᒥᒃ. ᐊᔪᙱᑕᕗᑦ.

ᖁᕕᐊᓱᒡᕕᒃ ᐊᒡᒋᖅᐸᓪᓕᐊᕌᓚᓴᖅᑐᒻᒪᕆᐅᓕᕐᒪᑦ, ᐊᒃᓱᕈᕐᓗᓂᓗ ᐱᓕᕆᖃᕐᓂᖅ ᒫᓐᓇ ᓄᖅᑲᖅᑎᑦᑎᔪᒪᓗᓂ ᓯᐊᒻᒪᒃᐸᓪᓕᐊᓂᖓᓂᒃ ᑕᒪᑐᒪ ᖃᓂᒪᓐᓇᐅᑉ ᐱᕕᒃᓴᑐᐊᑦᑎᐊᖑᕗᖅ, ᑕᐃᒪᑑᖅᓯᒪᓂᐊᓗᑕ ᑕᒪᒃᑯᐊ ᓄᖅᑲᖅᑎᑦᑎᓯᒪᔾᔪᑎᕗᑦ ᐊᔪᕐᓇᕈᓐᓃᖅᐹᓪᓕᑎᑦᑐᒪᒐᓗᐊᖅᖢᑎᒍ ᑕᐃᑯᙵᓚᐅᙱᓐᓂᑦᑎᓐᓂ.   ᑕᒪᓐᓇᓗ ᑕᒪᑦᑕ ᐊᑐᓂᑦ ᑕᒪᑦᑕᑦᑎᐊᕐᓗ ᑕᐃᒪᐃᑎᑦᑐᒪᒍᑦᑎᒍ ᑕᐃᒪᐃᑎᑦᑐᓐᓇᖅᖢᑎᒍ.

ᐱᓕᕆᖃᑎᒌᒡᓗᑕ, ᐃᑲᔪᕈᓐᓇᖅᐳᒍᑦ ᓄᓇᕗᒻᒥᐅᓕᒫᓂᒃ ᐱᕕᒃᓴᖃᕈᓐᓇᖁᓪᓗᑕ ᖁᕕᐊᓱᒡᕕᒃᓯᐅᖃᑎᖃᕈᓐᓇᕐᓗᑕ ᐃᓚᑦᑎᓐᓂᒃ, ᓂᕆᖃᑎᒌᒡᓗᑕᓗ ᓂᕆᔭᐅᕙᒃᑐᑐᖃᕐᓂᒃ.

ᑕᒪᓐᓇ ᑕᐃᒪᐃᑦᑐᓐᓇᔾᔮᙱᓚᖅ ᓈᓚᙱᒃᑯᑦᑕ  ᐅᖃᐅᔾᔪᓯᐊᕆᓯᒪᔭᑦᑎᓐᓂᒃ ᑎᓕᓯᔾᔪᑕᐅᓯᒪᔪᓂᒡᓗ ᓘᒃᑖᒧᑦ ᐹᑐᓴᓐ−ᒧᑦ.

ᖁᐊᖅᓵᕐᓇᖅᑐᒦᙱᓪᓗᑎᑦ ᖃᓄᐃᙱᑦᑎᐊᕐᓗᑎᓪᓗ.

ᐃᓚᒋᔭᐅᓪᓗᓂ ᓄᓇᕗᑦ ᒐᕙᒪᖓᑦ ᐱᓇᔪᒃᑕᖏᑕ ᓴᐳᔾᔨᓯᒪᔪᒪᓪᓗᑎᒃ ᓄᓇᕗᒻᒥᐅᓂᒃ ᖁᐊᖅᓴᕐᓇᖅᑐᒧᑦ ᐱᑐᐃᓐᓇᕆᐊᖃᕐᓂᕐᒧᑦ ᓄᕙᒡᔪᐊᕐᓇᖅ-19−ᒥᒃ, ᓄᓇᕗᑦ ᒐᕙᒪᖓᑕ ᐱᓕᕆᕝᕕᖏᑦ ᐊᑐᓕᖅᑎᑦᑎᓂᐊᖅᐳᑦ ᐅᑯᓂᖓ:

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᔨᑦᑎᕋᐅᑎᖏᑦ

ᑲᑎᖦᖢᒋᑦ (ᑕᒪᕐᒥᑦᑎᐊᖅ ᐃᓄᑐᐊᒃᑯᕕᖕᒦᑦᑐᑦ)

 

ᐊᐅᓪᓚᖅᓯᒪᔫᑉ ᖃᓄᐃᑦᑑᓂᖓ

ᑐᔪᕐᒥᕕᖕᒦᑦᑐᑦ ᐊᓂᑦᑕᐃᓕᑎᑕᐅᔪᑦ ᓄᕕᐱᕆ 16−ᒥ ᐱᒋᐊᖅᖢᒍ

ᐋᓐᓂᐊᕐᕕᓕᐊᖅᑐᑦ 520
ᑭᒃᑯᑐᐃᓐᓇᑦ 283
ᑲᑎᖦᖢᒋᑦ 803

ᐊᐅᓪᓚᖅᐸᒃᑐᑦ ᐅᑎᖅᑎᑕᐅᓯᒪᓕᖅᑐᑦ ᖃᓄᐃᓕᖓᓂᖏᑦ:

ᐅᓪᓗᖅ ᐊᐅᓪᓚᕐᕕᒃᓴᖓ  ᖃᔅᓯᐅᓂᖏᑦ ᐊᐅᓪᓚᕐᓂᐊᖅᑐᑦ ᐃᓄᑐᐊᒃᑯᕕᖕᒦᑦᑐᑦ

ᓄᕕᐱᕆ 13

44
ᓄᕕᐱᕆ 14 0
ᓄᕕᐱᕆ 15 20
ᓄᕕᐱᕆ 16 113
ᑲᑎᖦᖢᒋᑦ 177

ᐱᑕᖃᕆᐊᖃᓪᓚᕆᒃᑐᑦ ᐃᖅᑲᓇᐃᔭᖅᑏᑦ ᑐᒃᓯᕋᖅᑕᐅᔪᑦ

ᓄᕕᐱᕆ 14−ᒥ ᐱᒋᐊᖅᖢᒍ, 8815−ᓂᒃ ᑐᒃᓯᕋᖅᑐᖃᓚᐅᖅᐳᖅ, 4121−ᖑᓪᓗᑎᒃ ᐃᖅᑲᓇᐃᔭᕆᐊᖃᓪᓚᕆᒃᑐᓄᑦ ᑐᒃᓯᕋᖅᑕᐅᔪᑦ.

ᑐᒃᓯᕋᖅᑕᐅᓯᒪᔪᑦ ᖃᓄᐃᓕᖓᓂᖏᑦ # %

ᐊᖏᖅᑕᐅᓯᒪᔪᑦ (ᐅᑯᐊᖑᕗᑦ ᐱᔭᕆᐊᖃᓪᓚᕆᒃᑐᑦ ᐊᒻᒪ ᐱᔭᕆᐊᖃᓪᓚᕆᙱᑦᑐᑦ)

5945 67.4%

ᐊᖏᖅᑕᐅᙱᑦᑐᑦ

280 3.2%
ᐅᑕᖅᑭᔪᑦ  172 2.0%
ᐊᐅᓪᓚᕐᕕᐅᔪᓐᓇᕐᑐᑦ ᐊᑐᖅᑕᐅᒐᔪᒃᑐᓄᑦ ᐊᖏᖅᑕᑦ   2418 27.4
ᑲᑎᖦᖢᒋᑦ 8815 100%

ᒪᑐᓯᒪᔪᖅ/ᖁᔭᓈᖅᑕᐅᔪᑦ/ᓄᖅᑲᖓᑎᑕᐅᑲᐃᓐᓇᖅᑐᑦ ᐱᔨᑦᑎᕈᑏᑦ (ᑭᕙᓪᓕᕐᒥ):

  • ᑕᒪᕐᒥᑦᑎᐊᖅ ᐱᑐᐃᓐᓇᐅᙱᑦᑐᓕᕆᓂᕐᒧᒃ ᐃᓗᐊᖅᓴᖅᑕᐅᓂᐊᕙᒃᑐᑦ ᓄᖅᑲᖅᑎᑕᐅᕗᑦ ᑐᓴᖅᑎᑦᑎᔪᖃᒃᑲᓐᓂᓚᐅᙱᓐᓂᖓᓂ.
  • ᑭᒍᑎᓕᕆᓂᐅᕙᒃᑐᑦ ᐱᔨᑦᑎᕋᕐᓃᑦ ᓄᖅᑲᖅᑎᑕᐅᕗᑦ ᑭᓯᐊᓂ ᑐᐊᕕᖅᓇᖅᑐᓄᑐᐊᖅ.
  • ᑕᓚᕖᓴᒃᑯᑦ ᐃᓂᒃᓴᓕᐅᖅᑕᐅᓯᒪᕙᒃᑐᑦ ᓄᖅᑲᖅᑎᑕᐅᕗᑦ ᑐᓴᖅᑎᑦᑎᔪᖃᒃᑲᓐᓂᓚᐅᙱᓐᓂᖓᓂ.
  • ᐱᔭᕆᐊᖃᓪᓚᕆᙱᑦᑐᑦ ᐋᓐᓂᐊᕕᓕᐊᕐᓗᓂ ᐊᐅᓪᓚᖅᐸᖕᓃᑦ ᐃᖃᓗᖕᓄᑦ ᐅᖓᕙᕙᕆᐊᖅᑕᐅᕗᑦ. ᐃᓂᒃᓴᓕᐅᖅᑕᐅᓯᒪᔪᑦ ᐋᖅᑭᒃᓱᖅᑕᐅᒃᑲᓐᓂᕐᓂᐊᖅᐳᑦ ᖃᖓᙳᒃᑲᓐᓂᖅᐸᑦ.
  • ᐊᖏᕐᕋᕆᔭᐅᔪᓂ ᑲᒪᒋᔭᖃᖅᐸᖕᓂᕐᒧᑦ ᐅᒡᓚᖅᐸᖕᓃᑦ ᒫᓐᓇᒃᑯᑦ ᓄᖅᑲᖓᑎᑕᐅᕗᑦ.

ᐋᖅᑭᒋᐊᖅᑕᐅᔪᑦ ᐱᔨᑦᑎᕈᑏᑦ (ᑲᖏᖅᖠᓂᖅ):

  • ᑕᒪᕐᒥᑦᑎᐊᖅ ᓯᖓᐃᔪᓂᕆᓂᕐᒧᑦ ᐃᓂᒃᓴᓕᐅᖅᑕᐅᔪᑦ ᐃᓂᒃᓴᓕᐅᖅᑕᐅᓗᑎᒃ ᑭᓯᐊᓂᑐᐊᖑᔭᕆᐊᖃᖅᐳᖅ, ᐃᖅᓂᓱᒃᓰᕝᕕᒃᑯᑦ.

ᐋᖅᑭᒋᐊᖅᑕᐅᓯᒪᓕᖅᑐᑦ ᐱᔨᑦᑎᕋᕈᑕᐅᕙᒃᑐᑦ (ᐃᖃᓗᖕᓂ):

  • ᑕᒪᕐᒥᑦᑎᐊᖅ ᐃᓗᐊᖅᓴᖅᑕᐅᓃᑦ ᐅᐸᒃᓯᒪᒻᒪᕆᙱᒃᑲᓗᐊᒃᑰᖅᑎᑕᐅᓂᐊᖅᐳᑦ. ᐃᓗᐊᖅᓴᖅᑕᐅᔪᒪᔪ ᐅᖄᓚᖃᑎᖃᓪᓗᐊᖅᐳᑦ ᖃᐅᔨᒋᐊᖅᑕᐅᔪᒪᓗᑎᒃ, ᐋᓐᓂᐊᕕᓕᐊᙱᓪᓗᑎᒡᓗ ᑭᓯᐊᓂ ᑐᐊᕕᕐᓇᖅᐸᑦ.
  • Antenatal−ᒧᑦ ᐃᓗᐊᖅᓴᖅᑕᐅᓃᑦ ᑲᔪᓯᓂᐊᖅᐳᑦ ᐊᑐᖅᐸᑦᑕᒥᑎᑐᑦ.
  • ᑐᐊᕕᕐᓇᑐᓄᑦ ᐱᓕᕆᕝᕕᒃ ᒪᑐᐃᙶᖏᓐᓇᕐᓂᐊᖅᐳᖅ ᑐᐊᕕᕐᓇᖅᑐᓄᑐᐊᖅ.
  • ᐱᓕᕆᔪᖃᖃᑦᑕᔾᔮᙱᑦᑐᖅ ᖃᐅᔨᓴᖅᓯᓂᕐᒥᒃ ᑎᒥᒃᑯᓪᓘᓐᓃᑦ ᖃᐅᔨᓴᖅᓯᓂᕐᒥᒃ ᑕᕐᕋᖅᑐᖅᑕᐅᕕᒃᑯᑦ.
  • ᐱᑐᐃᓐᓇᐅᙱᑦᑐᓕᕆᓂᕐᓄᑦ ᐃᓗᐊᖅᓴᐃᔪᖃᖃᑦᑕᔾᔮᙱᑦᑐᖅ.
  • ᐳᓛᐊᖅᑐᖃᕆᐊᖃᙱᑦᑐᖅ ᐅᓂᒃᓯᒪᕝᕕᖕᓄᑦ, ᑭᑭᑕᐅᓪᓗᓂ ᐊᑕᐅᓯᖅ ᐃᓄᑦ ᐳᓛᕆᐊᖅᑐᖅ ᖃᓂᒪᐃᓐᓇᖃᓕᖅᑐᓄᑦ, ᐊᕐᕌᒍᑭᓗᐊᖅᑐᓄᑦ, ᒪᕐᕉᖕᓂᒡᓗ ᐳᓛᕆᐊᕈᓐᓇᖅᖢᑎᒃ ᐊᑕᐅᓯᕐᒧᑦ OBS−ᒧᑦ ᐃᓗᐊᖅᓴᖅᑕᐅᔪᒧᑦ.
  • ᑭᓇᑐᐃᓐᓇᑦᑎᐊᖅ ᐃᓗᐊᖅᓴᖅᑕᐅᔭᖅᑐᖅᑐᖅ ᐊᑐᕆᐊᖃᖅᑎᑕᐅᕗᖅ ᐃᓗᐊᖅᓴᐅᑎᓯᐅᑕᐅᙱᑦᑐᒥᒃ ᒪᑐᐊᖅᓯᒪᔾᔪᑎᒥᒃ. ᒪᑐᐊᖅᓯᒪᔾᔪᑎᖃᙱᑉᐸᑕ., ᐱᑎᑕᐅᓂᐊᖅᐳᑦ ᒪᑐᐊᖅᓯᒪᔾᔪᑎᒥᒃ ᑕᐃᑯᙵᑐᐊᖁᑎᒃ, ᑖᓐᓇᓗ ᐊᑐᕆᐊᖃᖅᖢᓂᔾᔪᒃ
  • ᐅᐸᒐᒃᓴᓕᐅᕐᕕᓪᓗᐊᑕᐅᑉ ᓈᓴᐅᑖ ᐅᓇᐅᕗᖅ: 975 8600 ᓇᕿᒃᑲᓐᓂᕐᓗᒋᑦ ᐅᑯᐊ 5425
    • ᐊᑐᖅᑕᐅᖔᕈᓐᓇᕐᒥᔪᑦ ᓇᕿᒃᑲᓐᓂᒐᒃᓴᐃᑦ ᐅᑯᐊᖑᒋᕗᑦ: 5430, 5431 ᐊᒻᒪᓗ 5433


ᐋᖅᑭᒋᐊᖅᑕᐅᓯᒪᓕᖅᑐᑦ ᐱᔨᑦᑎᕋᕈᑕᐅᕙᒃᑐᑦ

  • ᑭᒍᑎᓕᕆᔨᒃᑯᑦ ᑐᐊᕕᕐᓇᖅᑐᓄᑐᐊᖅ ᐱᔨᑦᑎᕋᕈᓐᓇᖅᐳᑦ
  • ᑐᐅᕕᕐᓇᖅᑐᓄᑦ ᑭᒍᑎᓕᕆᔭᐅᓂᕐᒧᑦ ᒪᓂᒪᑎᑕᐅᖏᓐᓇᖅᐳᖅ ᐃᖃᓗᒃᑑᑦᑎᐊᒥ, ᑲᖏᖅᖠᓂᕐᒥ, ᐃᖃᓗᖕᓂᓗ.
  • ᑕᒪᕐᒥᑦᑎᐊᖅ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᕝᕕᐅᓃᑦ ᑐᐊᕕᕐᓇᖅᑐᑐᐊᓅᖓᕗᑦ.
  • ᐃᓗᐊᖅᓴᖅᑕᐅᔪᒪᔪᑦ ᐋᓐᓂᐊᕕᓕᐊᕐᕕᖕᒧᑦ ᐅᖄᒪᓪᓗᐊᖅᐳᑦ ᖃᐅᔨᒋᐊᕐᑯᐅᔪᒪᓗᑎᒃ, ᐋᓐᓂᐊᕕᓕᐊᕐᕕᖕᒧᙵᐅᙱᓪᓗᑎᒡᓗ, ᑭᓯᐊᓂ ᑐᐊᕕᕐᓇᖅᐸᑦ.
  • ᑭᓇᑐᐃᓐᓇᑦᑎᐊᖅ ᐃᓗᐊᖅᓴᖅᑕᐅᔭᖅᑐᖅᑐᖅ ᐊᑐᕆᐊᖃᖅᑎᑕᐅᕗᖅ ᐃᓗᐊᖅᓴᐅᑎᓯᐅᑕᐅᙱᑦᑐᒥᒃ ᒪᑐᐊᖅᓯᒪᔾᔪᑎᒥᒃ.

 

ᐃᓄᓕᕆᔨᒃᑯᑦ

ᓂᖃᐃᓱᖅᑐᓕᕆᓂᕐᒧᑦ ᑎᑎᕋᕐᕖᑦ ᐅᐸᖕᓂᐊᕐᓗᒋᑦ ᐃᓂᒃᓕᐅᕐᓂᐊᕐᓗᓂ ᒪᑐᓯᒪᕗᑦ. ᑕᒪᓐᓇ ᒪᑐᓯᓂᖅ ᑕᐃᒪᐃᔾᔪᑎᖃᖅᐳᖅ ᒥᑭᒡᓕᒋᐊᖅᑎᑦᑎᔪᒪᓪᓗᓂ ᓯᐊᒻᒪᒃᐸᓪᓕᐊᓇᔭᕐᓂᖓᓂᒃ ᓄᕙᒡᔪᐊᕐᓇᖅ-19 ᓄᓇᓕᑦᑎᓐᓂ, ᑭᒃᑯᑐᐃᓐᓇᓕᒫᑦᑎᐊᓂᒡᓗ ᖁᐊᖅᓵᕐᓇᖅᑐᒦᖁᔨᙱᒧᑦ. 

ᓂᖃᓲᑏᑦ ᑐᓐᓂᖅᑯᑕᐅᖃᑦᑕᕐᓂᐊᖅᐳᑦ ᐅᐸᒍᑎᓯᒪᙱᒃᑲᓗᐊᕐᓗᓂ. ᐃᓂᒃᓴᓕᐅᖅᓯᒪᒍᕕᑦ ᐃᓂᒃᓴᓕᐅᕈᒪᓇᔭᕈᕕᓪᓘᓐᓃᑦ ᓂᖃᐃᓱᕈᒪᓂᕐᒧᑦ, ᓄᓇᔅᓯᓐᓂ ᑎᑎᕋᕐᕕᒃ ᐅᖄᓚᕝᕕᒋᓗᒍ ᐅᑭᐅᖅᑕᖅᑐᒥᓘᓐᓃᑦ ᐊᕕᒃᓯᒪᓂᕐᒥ ᑎᑎᕋᕐᕕᖕᒧᒃ ᐃᓂᒃᓴᓕᐅᖅᑕᐅᔪᒪᓗᑎᑦ. ᓂᐱᓕᐅᕐᓂᐊᖅᐳᑎᑦ ᑭᐅᔭᐅᙱᒃᑯᕕᑦ, ᐅᖄᓚᕝᕕᐅᓂᐊᖅᐳᑎᓪᓗ.

ᐊᕐᕕᐊᕐᒥᐅᑦ ᖃᐅᔨᒋᐊᕈᒪᓂᓕᒫᒥᓂᒃ ᓂᖃᐃᓱᕐᓂᕐᒧᑦ ᐱᔾᔪᑎᖃᕐᓗᑎᑦ ᖃᐅᔨᒋᐊᕐᓂᓕᒫᑎᒃ ᓂᖃᐃᓱᖅᑐᓕᕆᓂᕐᒥᒃ ᐱᔾᔪᑎᖃᕐᓗᑎᒃ ᑐᕌᖅᑎᓪᓗᐊᖃᑦᑕᖅᐸᔾᔪᒃ ᑲᖏᖅᖠᓂᕐᒧᑦ ᐅᕗᖓ 1-800-953-8516 ᓇᕿᑦᑕᒃᑲᓐᓂᕐᓗᒋᑦ 1602 ᐅᕝᕙᓘᓐᓃᑦ ᐅᖃᓗᒡᓗᑎᒃ ᑭᕙᓪᓕᕐᒥᐅᓄᑦ ᑎᑎᕋᕐᕕᒋᔭᐅᔪᒧᑦ ᐅᕗᖓ: 1-867-645-5040 ᓇᕿᒃᑲᓐᓂᕐᓗᒋᑦ 1602 ᐅᓇᓘᓐᓃᑦ 1600

ᓂᖃᐃᓱᖅᑐᓕᕆᓂᕐᒧᑦ ᐱᓕᕆᔩᑦ ᐃᓕᖕᓄᑦ ᐅᖃᓗᓕᕐᓂᐊᖅᑐᖅ ᐃᓂᒃᓴᓕᐅᕐᕕᒋᔭᒃᑯᑦ ᖃᐅᔨᓴᖅᓯᔪᒪᓪᓗᓂ ᐅᖃᓘᑎᒃᑯᑦ ᖃᐅᔨᓴᖅᓯᓂᕐᒥᒃ. ᐱᖃᑕᕈᕕᑦ EI-ᒥᒃ, CRB−ᒥᒃ ᐅᕝᕙᓘᓐᓃᑦ CRCB-ᒥᒃ ᖃᔅᓯᐅᓂᕆᔭᖓ ᑭᖑᓪᓕᖅᐹᕐᒥᒡᓗ ᐊᑭᓕᖅᑕᐅᓂᕐᒧᑦ ᐅᓪᓗᕆᓚᐅᖅᑕᖓ ᒪᓂᒪᑎᓪᓗᒍ ᐅᐸᑦᒃᓯᒪᓂᐊᕐᓂᕆᔭᕐᓄᑦ.

.ᑮᓇᐅᔭᒃᓴᓂᒃ ᓴᓇᔭᐅᓯᒪᔪᓂᒃ ᑐᓂᓯᔪᖃᖃᑦᑕᔾᔮᙱᑦᑐᖅ ᑕᒪᑐᒪᓂ ᑭᒃᑯᑐᐃᓐᓇᓄᑦ ᖃᓄᐃᙱᑎᑦᑎᓂᕐᒧᑦ ᑐᐊᕕᕐᓇᖅᑐᖅᑕᖃᕐᓂᖓᓂ ᓄᓇᓕᔅᓯᓐᓂ. ᓂᖃᐃᓱᖅᑐᓕᕆᔩᑦ ᐃᓕᖕᓂᒃ ᐊᐱᕆᓂᐊᖅᐳᖅ ᓂᕈᐊᖁᓗᓂᑎᑦ ᓂᐅᕕᕐᕕᖕᒥᒃ, ᓂᐅᕕᕐᕕᖕᓂᒡᓘᓐᓃᑦ, ᑕᐃᑲᓂᓗ ᐊᑭᓕᖅᑕᐅᓂᕆᔭᐃᑦ ᐃᓕᔭᐅᖁᓗᒍ, ᑭᒡᒐᖅᑐᖅᑕᐅᓗᑎᑦ ᓄᓇᓕᔅᓯᓐᓂ

ᑕᐃᓐᓇ ᐊᑭᓕᐅᑕᐅᔪᖅ ᐃᓕᖕᓄᑦ ᒪᓂᒪᑎᑕᐅᓕᕐᓂᐊᖅᐳᖅ ᑕᐃᑲᓂ ᓂᐅᓂᕕᕐᕕᖕᒥ 11:00 ᐅᓪᓛᒃᑯᑦ ᖄᖏᖅᐸᑦ ᖃᐅᒃᐸᙳᑐᐊᖅᐸᑦ.

ᓂᐅᕕᕐᕕᐅᑉ ᒪᓕᒋᐊᖃᖅᑐᖁᑎᖏᑦ ᒪᓕᑦᑎᐊᕐᓂᐊᖅᐸᑎᑦ ᐃᓅᖃᑎᒥᒃ ᐅᖓᓯᒃᓴᕆᐊᖃᕐᓂᕐᒧᑦ ᖃᔅᓯᐅᔭᕆᐊᖃᕐᓂᖏᓐᓄᓪᓗ ᐊᔪᖅᑎᑕᐅᙱᑦᑐᑦ ᐊᑕᐅᑦᑎᒃᑰᖅᑎᑕᐅᓗᑎᒃ.

 

ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᔨᑦᑎᕋᐅᑎᖏᑦ

ᒪᑐᔭᐅᔪᑦ/ᓄᖅᑲᖅᑎᑕᐅᔪᑦ/ᐊᑐᕈᓐᓃᖅᑎᑕᐅᔪᑦ ᐱᔨᑦᑎᕋᕐᓂᕆᔭᐅᔪᑦ

ᐃᓕᓐᓂᐊᓕᓵᖅᑐᓂᒃ ᖁᕝᕙᓯᖕᓂᓕᖕᓄᑦ 12−ᒧᑦ ᐃᓕᓐᓂᐊᕐᕖᑦ

  • ᒪᓕᒃᖢᒍ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᒃ, ᐱᖓᔪᐊᖑᓂᐊᖅᑐᒥ, ᓄᕕᐱᕆ 18, 2020−ᒥ, ᑕᒪᕐᒥᑦᑎᐊᖅ ᐃᓕᓐᓂᐊᕐᕖᑦ ᓅᓐᓂᐊᓕᖅᑐᑦ ᐊᑐᖅᑎᑕᐅᔪᒧᑦ 4−ᒧᑦ: ᓇᓗᓇᐃᖅᑕᐅᓯᒪᔪᑦ ᐋᓐᓂᐊᔪᑦ ᓄᓇᓕᖕᓂ ᓯᐊᒻᒪᒃᐸᓕᐊᓂᖓ ᓄᕙᒡᔪᐊᕐᓇᖅ-19, ᑐᓴᖅᑎᑕᐅᒃᑲᓐᓂᓚᐅᙱᓐᓂᕐᒥᓂ.
  • ᐱᖓᔪᐊᓐᓂ, ᓄᕕᐱᕆ 18, 2020−ᒥ, ᑕᒪᕐᒥᑦᑎᐊᖅ ᓄᓇᕗᒻᒥ ᐃᓕᓐᓂᐊᕐᕖᑦ ᐊᑐᓕᖅᑎᑦᑎᓂᐊᖅᐳᑦ ᐊᑐᖅᑎᑕᐅᔪᒥᒃ 4−ᒧᑦ ᐱᓕᕆᐊᖃᕐᓂᕐᒧᑦ ᐱᕙᒌᔭᖅᑕᐅᓯᒪᔪᓂᒃ, ᐃᑲᔪᖅᑐᐃᓂᐊᖅᖢᑎᒡᓗ ᐅᐸᒃᓯᒪᙱᒃᑲᓗᐊᕐᓗᒍ ᐃᓕᑎᑕᐅᕙᓪᓕᐊᓂᖏᓐᓂᒃ ᐃᓕᓐᓂᐊᖅᑎᓕᒫᑦ 
  • ᐱᒋᐊᕐᓗᓂ ᐱᖓᔪᐊᓐᓂ, ᓄᕕᐱᕆ 18−ᒥ, ᑕᒪᕐᒥᑦᑎᐊᖅ ᐃᓕᓐᓂᐊᕐᕖᑦ ᓄᓇᕗᒻᒥ ᒪᑐᕗᑦ ᐃᓕᓐᓂᐊᖅᑎᓄᑦ, ᐃᖅᑲᓇᐃᔭᖅᑎᓄᑦ, ᑭᒃᑯᑐᐃᓐᓇᓄᓪᓗ ᑐᓴᖅᑎᑦᑎᔪᖃᒃᑲᓐᓂᓚᐅᙱᓐᓂᖓᓂ ᑕᐃᑲᙵᑦ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᖕᒥᑦ.
  • ᖃᕆᓴᐅᔭᒃᑯᑦ ᑕᒪᕐᒥᑦᑎᐊᖅ ᐃᓕᓴᖅᑕᐅᑲᑕᖕᓂᐊᖅᐳᑦ.
  • ᐅᐸᒃᓯᒪᙱᒃᑲᓗᐊᕐᓗᒍ ᐃᓕᑦᑎᕙᓪᓕᐊᓂᖅ ᐊᑐᖅᑕᐅᓂᐊᖅᐳᖅ ᒪᓕᒃᑐᖃᕐᓗᓂ ᐱᓕᕆᐊᖃᕐᓂᕐᒧᑦ ᐱᕙᒌᔭᖅᑕᐅᓯᒪᔪᓂᒃ ᐊᑐᓕᖅᑎᑕᐅᓯᒪᔪᓂᒃ ᐃᓕᓐᓂᐊᕐᕕᖕᒥ ᐃᖅᑲᓇᐃᔭᖅᑎᓄᑦ, ᐊᔾᔨᒌᙱᓐᓂᖃᑐᐃᓐᓇᕆᐊᖃᖅᖢᑎᒡᓗ ᑐᙵᕕᖃᕐᓗᑎᒃ ᐱᔭᐅᔭᕆᐊᓕᖕᓄᑦ ᐃᓕᓐᓂᐊᖅᑎᓂᑦ.
  • ᐃᓕᓴᐃᔩᑦ/ᐃᓕᓐᓂᐊᕐᕕᖕᒥ ᐃᖅᑲᓇᐃᔭᖅᑏᑦ ᖃᐅᔨᒋᐊᓛᖅᐳᑦ ᐃᓕᓐᓂᐊᖅᑎᓄᑦ ᐃᓚᖏᓐᓄᓪᓗ ᐊᔪᕐᓇᕈᓐᓃᑐᐊᖅᐸᑦ.
  • ᓄᑖᙳᕆᐊᖅᓯᒪᔪᓂᒃ ᓄᓇᓕᖕᒥᐅᑦ ᖃᓄᐃᓕᕙᓪᓕᐊᓂᖏᓐᓄᑦ ᑕᑯᒃᓴᕈᖅᑎᑕᐅᓂᐊᖅᐳᑦ ᐃᓕᓐᓂᐊᕐᓂᓕᕆᔨᒃᑯᑦ ᐃᑭᐊᖅᑭᕕᖓᓂ ᐅᕙᓂ: https://gov.nu.ca/education/information/2020-21-opening-plan-nunavut-sch...
  • ᒪᑐᓯᒪᒐᓗᐊᖅᑎᓪᓗᒍ ᐊᒃᑐᐃᔾᔪᑕᐅᔾᔮᙱᑦᑐᖅ ᐃᖅᑲᓇᐃᔭᖅᑎᓄᑦ ᐊᑭᓕᖅᓱᐃᔾᔪᑎᓄᑦ.
  • ᐃᓕᓐᓂᖅᑐᓕᕆᔨᒃᑯᑦ ᐃᖅᑲᓇᐃᔭᖅᑎᖏᑦ ᒪᓕᓪᓗᐊᖅᐳᑦ ᖃᓄᐃᓕᐅᖁᔭᐅᓂᕐᒥᒃ CPHO-ᑯᓐᓂᑦ ᑕᒪᓐᓇ ᐊᒃᑐᐊᓂᖃᕐᓂᖓᓄᑦ ᐅᐸᖃᑦᑕᕐᓂᕆᔭᖏᓐᓄᑦ ᐃᖅᑲᓇᐃᔭᕐᕕᒋᔭᒥᓄᑦ.
  • ᑮᓇᐅᔭᖃᖅᑎᑕᐅᓂᖏᑦ ᐃᓕᓐᓂᐊᖅᑐᓕᕆᔨᒃᑯᑦ ᐊᒃᑐᖅᑕᐅᔾᔮᙱᓚᑦ,  ᐃᓕᓐᓂᐊᖅᑐᓕᕆᔨᒃᑯᓪᓗ ᑎᓕᐅᖅᑕᐅᕗᑦ ᑲᔪᓯᐊᖏᓐᓇᖁᔭᐅᓪᓗᑎᒃ ᐊᑭᓕᖅᓱᐃᓂᕐᒥᒃ ᐃᖅᑲᓇᐃᔭᖅᑎᒥᓂᒃ ᐊᑐᖅᐸᒃᑕᒥᑎᑐᑦ.

ᐃᓕᓐᓂᐊᕆᐅᖅᓴᔪᑦ ᐸᐃᕆᕕᓪᓗ

  • ᒪᓕᒃᖢᒍ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᒃ, ᐱᖓᔪᐊᖑᓂᐊᖅᑐᒥ, ᓄᕕᐱᕆ 18, 2020−ᒥ, ᑕᒪᕐᒥᑦᑎᐊᖅ ᓄᓇᕗᒻᒥ ᐸᐃᕆᕝᕖᑦ ᒪᑐᓯᒪᓪᓗᐊᖅᐳᑦ.
  • ᓄᓇᕗᑦ ᒐᕙᒪᖓᑕ ᑮᓇᔭᖃᖅᑎᑕᖓ ᓚᐃᓴᓕᖕᓄ ᐸᐃᕆᕝᕕᖕᓄᑦ ᐃᓂᓄᑦ ᑲᔪᓰᓐᓇᕐᓂᐊᖅᐳᖅ ᐊᑐᖅᑕᐅᕙᒃᑐᑎᑐᑦ.

 

ᓄᓇᕗᒻᒥ ᓯᓚᑦᑐᖅᓴᕐᕕᒃ

ᒪᑐᔭᐅᔪᑦ/ᓄᖅᑲᖅᑎᑕᐅᔪᑦ/ᐊᑐᕈᓐᓃᖅᑎᑕᐅᔪᑦ ᐱᔨᑦᑎᕋᕐᓂᕆᔭᐅᔪᑦ:

  • ᓄᓇᕗᒻᒥ ᓯᓚᑦᑐᖅᓴᕐᕕᒃ ᓅᓯᒪᓕᖅᐳᖅ ᐊᑐᖅᑕᐅᓂᐊᖅᑐᒧᑦ 4−ᒧᑦ ᐊᐅᐸᖅᓯᓯᑕᐅᓯᒪᔪᒧᑦ ᒪᑐᐃᕐᓂᐊᕐᓂᕐᒧᑦ ᐱᕙᒌᔭᖅᓯᒪᔭᒥᓂ ᑕᒫᓂᓕᒫᖅ ᐅᑭᐊᖅᑕᖅᑐᒥ ᐊᕕᒃᓯᒪᓂᓕᒫᒥ.
  • ᓄᓇᕗᒻᒥ ᓯᓚᑦᑐᖅᓴᕐᕕᐅᑉ ᐱᖁᑎᖏᑦ ᒪᑐᓯᒪᔪᑦ ᐃᓄᓕᒫᓄᑦ ᐃᓕᓐᓂᐊᕐᑎᓄᓪᓗ.
  • ᐱᓕᕆᐊᒃᓴᐃ ᓅᓐᓂᐊᓕᖅᐳᑦ ᐅᐸᒃᓯᒪᙱᒃᑲᓗᐊᕐᓗᒍᑦ ᐃᓕᑕᐅᔪᓐᓇᕐᓂᖏᓐᓄᑦ, ᑕᐃᒪᐃᑦᑕᕆᐊᖃᕌᖓᑕ.
  • ᓄᓇᕗᒻᒥ ᓯᓚᑦᑐᖅᓴᕐᕕᖕᒧᑦ ᐃᓂᖁᑎᒋᔭᐅᔪᑦ ᒪᓂᒪᓂᐊᖅᐳᑦ ᐊᑐᖅᑕᐅᓪᓚᕆᒋᐊᖃᖅᑐᓄᑐᐊᖅ ᐃᖅᑲᓇᐃᔭᖅᑎᓄᑐᐊᖅ. ᒪᑐᐊᖅᓯᒪᔾᔪᑏᑦ ᐊᑐᖅᑕᐅᔭᕆᐊᖃᖅᐳᑦ ᑕᒪᒃᑯᓇᓂ ᐃᓂᓂ.
  • ᐊᓂᒍᐃᔪᖃᕐᓂᖓᓄᑦ ᐱᕙᒌᔭᖅᑕᐅᓯᒪᔪᑦ ᐃᓕᓐᓂᐊᖃᑎᒌᒃᓯᒪᔪᓄᑦ 2020−ᒥ ᓄᖅᑲᖅᑎᑕᐅᕗᑦ ᑲᔪᓯᑎᑕᐅᓛᖅᖢᑎᒡᓗ ᖃᖓᙳᒃᑲᓐᓂᖅᐸᑦ ᐅᓪᓗᒥ.
  • ᐱᓪᓚᕆᒋᐊᖃᙱᑦᑐᒥᒃ ᓄᒃᑕᕐᓂᖅ ᐊᑐᖁᔭᐅᙱᓚᖅ, ᓇᓕᐊᑐᐃᓐᓇᕐᓗ ᓄᓇᕗᒻᒥ ᓯᓚᑦᑐᖅᓴᕐᕕᖕᒧᑦ ᐃᓚᒋᔭᐅᔪᑦ ᓄᒃᑕᕆᐊᓖᑦ ᖃᐅᔨᑎᑦᑎᓪᓗᐊᖅᐳᑦ ᑲᒪᔨᒋᔭᒥᓂᒃ.
  • ᐃᓕᓐᓂᐊᖅᑏᑦ ᑎᓕᐅᖅᑕᐅᕗᑦ ᐃᓂᒥᓃᖁᔭᐅᓪᓗᑎᒃ ᒫᓐᓇᐅᔪᒃᑯᑦ.

 

ᐃᓕᖅᑯᓯᓕᕆᔨᒃᑯᓐᓂ ᐱᓕᕆᕝᕕᖓᓐᓂᑦ ᐱᔨᑦᑎᕈᑎᖏᑦ

ᒪᑐᓯᒪᔪᑦ ᐱᔨᑦᑎᕈᑏᑦ

  • ᕿᒥᕐᕈᐊᒐᖃᕐᕕᒃ ᐃᖃᓗᖕᓂ ᑭᒃᑯᑐᐃᓐᓇᓄᑦ ᒪᑐᓂᐊᖅᐳᖅ, ᑕᒪᓐᓇ ᒪᑐᓯᒪᓂᖓ ᐱᒋᐊᕐᓗᓂ ᐱᖓᔪᐊᓐᓂ, ᓄᕕᐱᕆ 16−ᒥ.
  • ᐅᖃᓕᒫᒐᖃᕐᕕᒃ ᖃᒪᓂ'ᑐᐊᕐᒥᑦ ᒪᑐᓯᒪᓂᐊᓕᖅᑐᖅ ᓇᓗᓇᐃᖅᑕᐅᓛᖅᑐᖅ ᒪᑐᐃᒃᑲᓐᓂᕈᓐᓇᖅᓯᑉᐸᑦ.

 

ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ

  • ᐱᒋᐊᕐᓗᓂ ᐱᖓᔪᐊᓐᓂ, ᓄᕕᐱᕆ 18, 2020−ᒥ, ᑕᒪᕐᒥᑦᑎᐊᖅ ᓄᓇᕗᑦ ᒐᕙᒪᖓᑕ ᑎᑎᕋᕐᕕᖃᕐᕕᖏᑦ ᐃᒡᓗᕐᔪᐊᑦ ᑭᒃᑯᑐᐃᓐᓇᓄᑦ ᒪᑐᓯᒪᓂᐊᓂᖅᐳᑦ. ᑭᓇᑐᐃᓐᓇᑦᑎᐊᖅ ᑕᖅᑳᙵᑐᐃᓐᓇᑦᑎᐊᖅ ᐃᓅᖃᑎᖃᕐᓗᓂ ᐅᐸᒃᓯᔭᕆᐊᓕᒃ ᓇᓕᐊᖕᓄᑐᐃᓐᓇᖅ ᓄᓇᕗᑦ ᒐᕙᒪᖓᑕ ᐊᑐᓪᓚᕆᒋᐊᖃᖅᑐᓄᑦ ᐱᔨᑦᑎᕋᖅᑎᒋᔭᐅᔪᓄᑦ ᓄᓇᕗᑦ ᒐᕙᒪᖓᑕ ᑎᑎᕋᕐᕕᐊᓄᑦ ᐃᒡᓗᕐᔪᐊᒦᑦᑐᒧᑦ, ᑕᐃᔅᓱᒧᖓᒻᒪᕆᒃ ᐃᓄᖕᒧᑦ ᖃᐅᔨᒋᐊᕆᐊᖃᖅᐳᖅ ᐋᖅᑭᒃᓯᖃᑎᒋᓗᒍᓗ ᓈᒻᒪᒃᑐᓂᒃ ᐋᖅᑭᐅᒪᓕᕈᑎᓂᒃ.  
  • ᑐᒃᓯᕋᐅᑎᑦ ᐅᑭᐅᖅᑕᖅᑐᒧᐊᕈᒪᔪᓄᑦ ᐃᒡᓗᓕᐅᕆᐊᖅᑐᖅᑐᓄᑦ ᐱᓕᕆᐊᒃᓴᓄᑦ ᐅᕝᕙᓘᓐᓃᑦ ᓄᓇᕗᒻᒧᑦ ᐊᐅᓪᓚᕈᒪᔪᓄᑦ ᐃᒡᓗᓕᐅᕆᐊᖅᑐᖅᑐᓄᑦ ᐱᓕᕆᐊᒃᓴᓄᑦ, ᐃᕐᙲᓐᓈᖅᑕᐅᒃᑯᑦ ᓇᓂᔭᐅᔪᓐᓇᖅᐳᖅ ᐅᕙᙵᑦ,  CPHOconstructionrequests@gov.nu.ca
  • ᐃᒡᓗᓕᐅᖅᑏᑦ ᐊᓂᒍᐃᔪᑦ ᐃᓄᑐᐊᒃᑯᕕᖕᒥ ᒫᓐᓇᒧᑦ ᑎᑭᖦᖢᒍ: 2147

 

ᒪᓕᒐᓕᕆᔨᒃᑯᓐᓂᑦ ᐱᔨᑦᑎᕋᐅᑎᑦ

ᓄᓇᓕᖕᓂ ᒪᓕᒐᓕᕆᔨᑦ

ᐊᐴᑎᓯᒪᓗᑎᒃ ᑲᑎᒪᓃᑦ ᑕᒪᒃᑯᓄᖓ ᑭᓯᐊᓂ ᑐᐊᕕᕐᓇᖅᑐᓄᑦ ᐊᔪᕐᓇᙱᑎᑕᐅᕗᑦ, ᑕᐃᓐᓇ ᐱᓕᕆᖃᑎᒋᔭᐅᔪᖅ ᐅᖄᓚᐅᑎᖃᕈᓐᓇᙱᑉᐸᑦ ᑯᐊᖅᓵᕐᓇᙱᑦᑐᒥᓘᓐᓃᑦ ᐃᓂᒥᒃ ᐊᑐᕈᓐᓇᙱᓪᓗᓂ ᐱᓕᕆᔨᑦᑎᓐᓄᑦ ᖃᐅᔨᒋᐊᕆᐊᒃᓴᖅ ᐅᖄᓚᐅᑎᒃᑯᑦ. ᐃᓄᐃᑦ ᐊᐱᕆᔭᐅᕗᑦ ᖃᐅᔨᒋᐊᕐᕕᖃᖁᔭᐅᓪᓗᑎᒃ ᐃᓚᒌᓂ ᐋᓐᓂᖅᓯᔪᖃᖅᐸᖕᓂᖓᓄᑦ ᐱᓕᕆᕝᕕᖃᖔᓕᕐᓂᕐᒧᑦ ᐱᖁᔭᕐᒧᑦ (FAIA) ᐅᖄᓚᕝᕕᐅᔪᓐᓇᖅᑐᒧᑦ ᐊᐱᖅᑯᑎᒃᓴᖃᕐᓂᕈᑎᒃ ᐃᑲᔪᖅᑕᐅᔭᕆᐊᖃᕈᑎᒡᓘᓐᓃᑦᐆᒥᖓ ᓈᓴᐅᒻᒥᒃ ᐊᑐᕐᓗᑎᒃ, 1-844-534-1038. ᑕᒪᓐᓇ ᐅᖄᓚᓂᖅ ᖃᐅᔨᓴᖅᑕᐅᓂᐊᖅᐳᖅ ᖃᐅᔨᒪᓕᕈᒪᓂᕐᒧᑦ ᐃᑲᔪᖅᑕᐅᔭᕆᐊᖃᕐᓂᕐᒧᑦ ᐱᔭᐅᔭᕆᐊᓕᖕᒧᑦ ᑐᕌᖅᑎᑕᐅᓗᓂ ᓄᓇᓕᖕᓂ ᐱᑐᐃᓐᓇᐅᙱᑦᑐᓕᕆᓂᕐᒧᑦ ᑖᓐᓇᓗ ᐃᑲᔪᕈᓐᓇᖅᖢᓂ ᐱᓇᔫᑎᒋᔭᐅᔪᓄᑦ ᐊᑐᖅᑕᐅᔪᓐᓇᖅᑐᓂᒡᓗ ᓇᓗᓇᐃᖅᓯᔪᓐᓇᖅᖢᓂ.

ᓄᓇᓕᖕᓂ ᐃᑲᔪᖅᑕᐅᕕᑦ

ᓄᓇᓕᖕᓂ ᑎᒍᔭᐅᓯᒪᔪᓕᕆᔨᑦ ᐊᒡᓚᕝᕕᖏᑦ ᑭᒃᑯᑐᐃᓐᓇᓄᑦ ᒪᑐᓯᒪᔪᑦ ᑭᓯᐊᓂ ᑐᓴᖅᑎᑦᑎᔾᔪᑕᐅᒃᑲᓐᓂᖅᐸᑦ. ᑕᒪᕐᒥᑦᑎᐊᖅ ᓄᓇᓕᖕᓂ ᑎᒍᔭᐅᓯᒪᔪᓕᕆᓂᕐᒧᑦ ᐱᓕᕆᕝᕕᐅᕙᒃᑐᑦ ᐅᖃᖃᑦᑕᕆᐊᖃᖅᐳᑦ ᐅᖄᓚᐅᑎᒃᑯᑦ ᐊᕕᑦᑐᖅᓯᒪᔪᓂᑦ ᐊᖓᔪᖅᑳᕆᔭᐅᔪᑦ ᑎᒍᔭᐅᓯᒪᔪᓕᕆᓂᕐᒧᑦ ᐱᓕᕆᔨᒧᑦ ᐊᑐᕐᓗᑎᒃ ᐆᒥᖓ ᓈᓴᐅᒻᒥᒃ:

ᐃᑲᔪᖅᑕᐅᕝᕕᓕᕆᕝᕖᑦ

ᐃᑲᔪᖅᑕᐅᕝᕕᓕᕆᔩᑦ ᒪᓖᓐᓇᖅᐳᑦ ᖁᐊᖅᓵᕐᓇᖅᑕᐃᓕᒪᓂᕐᒧᑦ ᐊᑐᖅᑕᐅᕙᒃᑐᓂᒃ ᐱᑕᖃᖅᑎᑦᑎᑦᑕᐃᓕᒪᔪᒪᓂᕐᒥᓄᑦ ᓄᕙᒡᔪᐊᕐᓇᖅ-19 ᐃᓂᒋᔭᑦᑎᓐᓄᐊᕋᔭᕐᓂᖓᓂᒃ, ᒥᑭᒡᓕᒋᐊᖅᑎᑦᑎᔪᒪᓪᓗᑎᒡᓗ ᖁᐊᖅᓵᕐᓇᕐᓂᖓᓂᒃ ᓯᐊᒻᒪᒃᑎᕋᔭᕐᓂᖓᑕ ᑕᐃᒪᐃᑳᓪᓚᖕᓂᖅᐸᑦ. ᐊᑐᖅᑕᐅᓕᖅᑐᑦ ᐃᓕᔭᐅᓯᒪᕙᖐᖅᑐᑦ ᐃᓚᖃᖅᐳᑦ ᓄᖅᑲᖅᑎᑦᑎᓂᕐᒥᒃ ᑕᒪᐃᓐᓂᒃ ᑕᕝᕙᓂᕐᒥᐅᑕᐅᙱᑦᑐᓂᒃ ᐳᓛᕆᐊᖅᑎᑦᑎᕙᖕᓂᕐᒥᒃ ᐊᑐᓪᓚᕆᒋᐊᖃᙱᑦᑐᓂᒡᓗ ᓇᒧᙵᐅᖃᑦᑕᕐᓂᕆᔭᐅᕙᒃᑐᓂᒃ. ᖁᔭᓕᕗᒍᑦ ᐅᑕᖅᑭᒃᑦᑎᐊᖃᑦᑕᕐᓂᖏᓐᓄᑦ ᐃᑲᔪᖅᑐᐃᖃᑦᑕᕐᓂᖏᓐᓄᓪᓗ ᐱᓯᒪᔭᑦᑎᓐᓂᒃ ᑎᒍᔭᐅᓯᒪᔪᓂᑦᓴᐃᓚᖏᓐᓂᓪᓗ ᑕᐃᒪᐃᓕᐅᓕᕐᓂᖏᓐᓄᑦ, ᖃᐅᔨᒪᓪᓗᑕᓗ ᑕᒪᓐᓇ ᐊᔪᕐᓇᙱᑦᑐᑯᓘᙱᓐᓂᖓᓂᒃ.

ᖁᕝᕙᕆᐊᖅᓯᒪᓕᕐᓂᖏᓐᓄᑦ ᖁᐊᖅᓵᓇᖅᑕᐃᓕᒪᓂᕐᒧᑦ ᖁᐊᖅᓵᕐᓇᑐᐃᓐᓇᕆᐊᓖᑦ ᐊᒃᑐᐊᓂᓖᑦ ᑎᒍᔭᐅᓯᒪᔪᓕᕆᓂᕐᒧᑦ, ᐱᑎᑦᑎᔪᓐᓇᙱᓚᒍᑦ ᐃᓗᓕᒃᑲᓐᓂᖏᓐᓂᒃ ᐱᔾᔪᑎᖃᕐᓗᑕ ᐃᓛᒃᑰᖅᑐᓂᒃ ᐃᓂᒋᔭᐅᔪᒧᑦ ᐱᕙᒌᔭᖅᓯᒪᔭᕗᑦ. ᑭᓯᐊᓂᓗᑦᑕᐅᖅ, ᐱᑎᑦᑎᔪᓐᓇᖅᐳᒍᑦ ᐅᑯᓂᖓ ᑐᓴᖅᑕᐅᔪᒃᓴᓂᒃ ᐱᔾᔪᑎᓕᖕᓂᒃ ᖃᓄᐃᓕᐅᖅᑕᐅᕙᓪᓕᐊᓕᖅᑐᓂᒃ:

  • ᑕᒪᕐᒥᑦᑎᐊᖅ ᑕᐃᑯᙵᖅᑎᑕᐅᔪᑦ ᐅᐸᒃᑕᐅᑦᑕᐃᓕᒪᔪᒦᑎᑕᐅᕙᒃᐳᑦ 14−ᓄᑦ ᐅᓪᓗᓄᑦ ᑕᐃᑯᙵᕌᖓᒥᒃ.
  • ᑎᒍᔭᐅᓯᒪᕖᑦ ᐃᓕᐅᖅᑲᐃᓯᒪᕗᑦ ᐊᒡᒐᓄᑦ ᖁᐱᕐᕈᐃᔭᐃᔾᔪᑎᒃᑲᓐᓂᕐᓂᒃ ᐃᓂᓂᒃ ᑕᒪᒃᑯᓇᓂ ᐊᖅᑯᓵᖅᑕᐅᒐᔪᖕᓂᕆᔭᖏᓐᓂ.
  • ᑭᐅᓯᓂᕐᒧᑦ/ᐊᑕᐅᓰᓐᓇᕐᒦᑎᑦᑎᓂᕐᒧᑦ ᐊᑐᖅᑕᐅᔪᓐᓇᖅᑐᑦ ᐃᓪᓕᖅᓱᖅᑕᐅᕗᑦ ᐊᒡᒑᖕᓂᒃ, ᒪᑐᐊᕈᑎᓂᒃ, ᑮᓇᒧᑦ ᓴᐴᓗᑕᕐᓂᒃ, ᐊᓐᓄᕌᑯᑖᖕᓂᒃ ᖃᓄᐃᓕᐅᖁᔨᓯᒪᔪᓂᒡᓗ ᑖᒃᑯᐊ ᐊᑐᕐᓂᐊᕐᓗᒋᑦ.
  • ᐃᓗᐊᖅᓴᐃᔩᑦ ᐱᓕᕆᓪᓚᕆᒃᖢᑎᒃ ᖃᐅᔨᓴᖅᓯᕗᑦ ᑎᒍᔭᐅᓯᒪᔪᓂᒃ ᑎᒍᔭᐅᒑᖓᑕ ᖃᐅᔨᔾᔪᑕᐅᔪᓐᓇᖅᑐᓄᑦ ᓄᕙᒡᔪᐊᖅᑐᑦ-19-ᒥᒃ
  • ᐊᖏᒡᓕᒋᐊᖅᓯᒪᔪᓂᒃ ᓴᓗᒻᒪᖅᓴᐃᓂᐅᕙᒃᑐᓂᒃ ᖃᐅᔨᒪᑦᑎᐊᕈᒪᓂᕐᒧᑦ ᖄᕆᔭᐅᔪᑦ ᑭᓇᑐᐃᓐᓇᖅᓯᐅᑏᑦ ᓴᓗᒪᒐᓗᐊᕐᒪᖔᑕ ᐊᖏᔨᓕᒋᐊᖅᓯᒪᔪᒃᑯᑦ ᓴᓗᒻᒪᖅᓴᐃᓂᕆᔭᐅᕙᒃᑐᒃᑯᑦ ᐅᓪᓗᓕᒫᒥ.

ᐃᖅᑲᓇᐃᔭᕐᕕᖕᓂ ᒪᓕᒃᑕᐅᔭᕆᐊᓖᑦ

ᐃᖅᑲᓇᐃᔭᖅᐸᖕᓂᕐᒧᑦ ᐊᑐᖅᑕᐅᕙᒃᑐᓄᑦ ᑎᑎᕋᕐᕕᒃ ᐅᖄᓚᕝᕕᐅᔪᓐᓇᖅᐳᖅ ᐅᑯᓄᖓ ᓈᓴᐅᑎᓄᑦ:

  • ᐅᖄᓚᐅᑦ: 1-867-975-6322  
  • ᐊᑭᖃᙱᑦᑐᖅ: 1-877-806-8402    
  • ᓱᒃᑲᔪᒃᑯᑦ: 1-867-975-6367

ᑖᒃᑯᓇᓂ ᑎᑎᕋᕐᕕᒻᒥᑦ ᓱᓕ ᐊᑐᐃᓐᓇᐅᔪᑦ ᐊᐱᖅᑯᑎᓂᑦ ᑭᐅᔪᓐᓇᖅᑐᑦ ᓄᓇᕗᒻᒥᐅᓄᑦ ᐊᐱᖅᑯᑎᔅᓴᖃᖅᐸᑕ ᐃᖅᑲᓇᐃᔭᖅᑐᓕᕆᓂᕐᒧᑦ ᐱᖁᔭᕐᒥᑦ ᐊᒻᒪ ᒪᓕᒐᖏᑦ.

ᐃᖅᑲᖅᑐᐃᕕᓕᕆᓂᕐᒧᑦ ᐱᔨᑦᑎᕋᕐᓂᕆᔭᐅᕙᒃᑐᑦ

ᐃᖅᑲᖅᑐᐃᓂᕐᒧᑦ ᐃᒡᓗᕐᔪᐊᕆᔭᐅᔪᖅ ᒪᑐᓯᒪᓂᐊᓕᖅᐳᖅ ᑭᒃᑯᑐᐃᓐᓇᓄᑦ.

ᐃᖅᑲᖅᑐᐅᕕᓕᕆᓂᕐᒧᑦ ᓇᓗᓇᐃᔭᕐᓂᖅ ᒪᓂᒪᑎᑕᐅᓂᐊᖅᐳᖅ ᐃᑲᔪᖅᑐᐃᓂᐊᕐᓗᓂ ᑭᒃᑯᑐᐃᓐᓇᓂᒃ ᐅᖄᓚᐅᑎᒃᑯᑦ ᖃᕆᑕᐅᔭᒃᑯᓪᓗ ᑎᑎᕋᖃᑦᑕᐅᑎᕝᕕᒃᑯᑦ. ᐅᑯᐊ ᐊᑐᕐᓗᒋᑦ ᖃᐅᔨᒋᐊᕐᕕᐅᔪᓐᓇᖅᑐᑦ ᐱᔨᑦᑎᕋᕐᕕᐅᓂᐊᕐᓗᓂ.

  • ᐱᔾᔪᑎᒋᔭᐃᑦ ᐱᖃᓯᐅᑎᒃᐸᑦ ᐱᕋᔭᖕᓂᕐᒥᒃ ᒪᒃᑯᒃᑐᒥᓪᓘᓐᓃᑦ ᐃᖅᑲᖅᑐᖅᑕᐅᔪᒥᒃ, ᐱᕋᔭᒃᑐᑦ ᑎᑎᖅᑭᕆᔨᖓᓄᑦ ᖃᐅᔨᒋᐊᕈᓐᓇᖅᐳᑎᑦ ᐅᕗᖓ; 867-975-6101; ncj.criminal@gov.nu.ca..
  • ᐱᔾᔪᑎᒋᔭᐃᑦ ᐱᖃᓯᐅᑎᒃᐸᑦ ᐃᓅᖃᑎᒥᒃ, ᐃᓚᒌᓂᑦ ᓄᑕᖅᑲᓂᓪᓘᓐᓃᑦ ᒪᓕᒐᖅᑎᒍᑦ ᐃᖅᑲᖅᑐᖅᑕᐅᔾᔪᑎᒥᒃ ᐃᓅᖃᑎᒌᓄᑦ ᑎᑎᖅᑭᕆᔨ ᖃᐅᔨᒋᐊᕐᕕᒋᓗᒍ ᐅᕗᖓ 867-975-6102; ncj.civil@gov.nu.ca..
  • ᐊᒻᒪᓗᑦᑕᐅᖅ, ᐱᔾᔪᑎᒋᔭᐃᑦ ᐱᔾᔪᑎᖃᖅᐸᑦ ᐃᓅᖃᑎᒥᒃ ᐊᑐᖅᑎᑦᑎᓪᓚᕆᖕᓂᕐᒥᒃ, ᖃᐅᔨᒋᐊᕐᕕᒋᓗᒍ ᐃᖅᑲᖅᑐᐃᕕᖕᒥ ᐸᓖᓯᙳᐊᕆᔭᐅᔪᖅ ᐅᕙᓂ 867-975-6103; ncj.sheriff@gov.nu.ca..

ᒪᓕᒐᑎᒍᑦ ᑎᒍᒥᐊᖅᑎᐅᓂᕐᒥᒃ ᓇᓗᓇᐃᖅᓯᕕᒃ

ᐃᖅᑲᖅᑐᐃᓂᕐᒧᑦ ᐃᒡᓗᕐᔪᐊᕆᔭᐅᔪᖅ ᒪᑐᓯᒪᓂᐊᓕᖅᐳᖅ ᑭᒃᑯᑐᐃᓐᓇᓄᑦ.

ᐃᓄᐃᑦ ᓱᓕ ᐱᔨᑦᑎᕈᑎᐅᔪᓂᑦ ᐱᔪᓐᓇᖅᑐᑦ ᐅᖄᓚᓗᑎᑦ 867-975-6590 ᐅᕙᓗ ᐃᕐᖐᓈᖅᑕᐅᑎᖓᓐᓄ corporate.Registries@gov.nu.ca.

ᐱᓂᕐᓗᒡᕕᐅᓯᒪᔪᑦ ᐱᔨᑦᑎᕋᕐᕕᐅᓂᖏᑦ

ᐱᓂᕐᓗᒡᕕᐅᓯᒪᔪᑦ ᐱᔨᑦᑎᕋᕐᕕᐅᕙᖕᓂᖏᓐᓄᑦ ᑎᑎᕋᕐᕕᒃ ᒫᓐᓇ ᑭᒃᑯᑐᐃᓐᓇᓄᑦ ᒪᑐᓯᒪᑲᓚᐅᖅᐳᖅ. ᑭᓯᐊᓂᓗᑦᑕᐅᖅ, ᓄᓇᕗᒻᒥᐊᑦ ᑎᑎᕋᕐᕕᖕᒧᑦ ᐅᖄᓚᔭᕆᐊᓖᑦ ᐅᖄᓚᔪᓐᓇᖅᐳᑦ ᐅᕗᖓ ᐊᑭᓕᕆᐊᖃᙱᑦᑐᒧᑦ, 1-866-456-5216-ᒧᑦ ᐅᕗᖓᓘᓐᓃᑦ ᖃᕆᑕᐅᔭᒃᑯᑦ ᑎᑎᕋᕐᓗᑎᒃ, victimservices@gov.nu.ca.

ᐱᔨᑦᑎᕋᕐᓂᕆᔭᐅᔪᑦ ᐱᑎᑕᐅᖃᑦᑕᕐᓂᐊᖅᐳᑦ ᐊᑕᐅᓯᐅᓈᖅᑎᕐᓗᒋᑦ.

ᐊᑐᖅᑐᐊᖅᑎᓄᑦ ᑎᑎᕋᕐᕕᐊ

ᑎᑎᕋᕐᕕᒃ ᒪᑐᓯᒪᓂᐊᖅᑐᖅ ᑭᒃᑯᑐᐃᓐᓇᓄᑦ. ᖃᐅᔨᒋᐊᕐᕕᒋᔪᒪᓗᒍ, ᐅᕗᖓ ᐅᖄᓚᔪᖃᕐᓗᓂ, 867-975-6314 ᐅᕗᖓᓘᓐᓃᑦ Rentaloffice@gov.nu.ca.

ᑎᑎᕋᕐᕕᖓ ᑭᒃᑯᑐᐃᓐᓇᕐᓄᑦ ᐸᖅᑭᔨᐅᑉ ᕿᒪᐃᔪᓄᓪᓗ ᐃᓅᔪᓐᓃᕐᓂᕐᒧᑦ ᐸᐸᑦᑎᔨᐅᑉ

ᑎᑎᕋᕐᕕᖓ ᑭᒃᑯᑐᐃᓐᓇᓄᑦ ᐸᖅᑭᔨᐅᑉ ᒪᑐᓯᒪᓂᐊᖅᑐᖅ ᑭᒃᑯᓕᒫᓄᑦ.

ᑎᑎᕋᕐᕕᒃ ᖃᐅᔨᒋᐊᕐᕕᒋᓂᐊᕐᓗᒍ, ᐅᑯᐊ ᐊᑐᕐᓗᒋᑦ ᖃᐅᔨᒋᐊᕐᕕᐅᔪᓐᓇᖅᑐᑦ ᐱᔨᑦᑎᕋᕐᕕᐅᓂᐊᕐᓗᓂ.

  • ᕿᒪᒃᑕᐅᔪᓄᑦ ᐱᔾᔪᑎᖃᕐᓗᓂ, ᐅᕗᖓ ᖃᐅᔨᒋᐊᕈᓐᓇᖅᑐᑦ 1-866-294-2127 or Public.Trustee@gov.nu.ca
  • ᑲᒪᔨᐅᓂᕐᒧᑦ ᐱᔾᔪᑕᐅᔪᓄᑦ ᐅᕗᖓ ᖃᐅᔨᒋᐊᖅᑐᖃᕐᓗᓂ, 867 222-1805 ᐅᕗᖓᓘᓐᓃᑦ  Publicguardian@gov.nu.ca

ᖃᑕᙳᑎᒌᓂᒃ ᐃᑲᔪᖅᑐᐃᕙᖕᓂᕐᒧᑦ

ᖃᑕᙳᑎᒌᓂ  ᐃᑲᔪᖅᑐᐃᕙᖕᓂᕐᒧᑦ ᐱᔨᑦᑎᕋᕐᓂᕆᔭᐅᕙᒃᑐᑦ ᑲᔪᓯᕗᑦ. ᑎᑎᕋᕐᕕᒃ ᒪᑐᓯᒪᓂᐊᖅᑐᖅ ᑭᒃᑯᑐᐃᓐᓇᓄᑦ.

ᑐᓴᖅᑕᖃᕈᒪᒍᕕᑦ ᐱᔾᔪᑎᖃᕐᓗᑎᑦ ᑎᑎᖅᑲᖁᑎᒋᔭᕐᓂᒃ, ᐅᕗᖓ ᖃᐅᔨᒋᐊᕐᓗᑎᑦ,  867-975-6112 ᐅᕗᖓᓘᓐᓃᑦ  ᐊᑭᖃᙱᑦᑐᒧᑦ 1-800-792-4183, ᖃᕆᑕᐅᔭᒃᑯᓪᓘᓐᓃᑦ ᑎᑎᕋᖃᑦᑕᐅᑎᕝᕕᒃᑯᑦl fsp@gov.nu.ca.

 

ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ ᐱᓕᕆᕝᕕᖓᑕ ᐱᔨᑦᑎᕈᑎᖏᑦ

ᐱᔨᑦᑎᕋᖅᑕᐅᖏᓐᓇᖅᑐᑦ:

  • ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ ᑎᑎᕋᕐᕕᖏᑦ ᓄᓇᕘᓕᒫᒥ ᓅᑉᐸᓪᓕᐊᓂᐊᖅᐳᑦ ᐃᖅᑲᓇᐃᔭᕐᓂᕐᒥᒃ−ᐊᖏᕐᕋᕆᔭᒥᓄᑦ ᓄᕕᐱᕆ 17−ᖑᓂᖅᐸᑦ, ᑕᒪᕐᑦᑎᐊᕐᓗ ᐊᑐᖅᑕᐅᓪᓚᕆᒋᐊᖃᙱᑦᑐᑦ ᐃᖅᑲᓇᐃᔭᖅᑏᑦ ᐃᖅᑲᓇᐃᔭᓕᕐᓗᑎᒃ ᐊᖏᕐᕋᕆᔭᒥᓂ ᓄᕕᐱᕆ 18−ᒥ.
  • ᒥᑦᑕᕐᕕᖕᒥ ᐊᐅᓚᓂᕆᔭᐅᕙᒃᑐᑦ ᑲᒪᒋᔭᐅᕙᖕᓂᖏᓪᓗ ᑲᔪᓰᓐᓇᕐᓂᐊᖅᐳᑦ.
  • ᐊᑐᕈᓐᓇᕐᓂᖅ ᑭᕙᓪᓕᕐᒥᑦ ᒥᑦᑕᕐᕕᐅᑉ ᐅᑕᖅᑭᕕᖓᓂᒃ ᐃᒡᓗᕐᔪᐊᒥᒃ ᐃᓱᓕᑦᑕᖅᑎᑕᐅᕗᖅ ᐃᖅᑲᓇᐃᔭᖅᑎᓄᑐᐊᖅ, ᖃᖓᑕᓂᐊᖅᑐᓄᑦ, ᐃᓄᖕᓄᓪᓗ ᐃᑲᔪᖅᑐᓄᑦ ᐃᑭᒪᕙᒃᑐᓂᒃ.
  • ᒪᑐᐊᑦ ᖃᖓᓕᒫᑦᑎᐊᒃᑯᑦ ᐊᑐᖅᑕᐅᔭᕆᐊᖃᖅᐳᑦ ᑕᒪᐃᓐᓂᒃ ᓄᓇᕗᒻᒥ ᒥᑦᑕᕐᕕᐅᑉ ᐅᑕᖅᑭᕕᖏᓐᓂᒃ.

ᐋᖅᑭᒋᐊᖅᑕᐅᓯᒪᓕᖅᑐᑦ ᐱᔨᑦᑎᕋᕈᑕᐅᕙᒃᑐᑦ:

  • ᑕᒪᕐᒥᑦᑎᐊᖅ ᐱᓕᕆᕝᕕᒋᔭᐅᔪᓂ ᐱᔨᑦᑎᕋᕐᓃᑦ ᓅᑎᑦᑎᓕᖅᐳᑦ ᐃᖅᑲᓇᐃᔭᖃᑦᑕᕐᓂᐊᓕᖅᖢᑎᒃ ᐊᖏᕐᕋᕆᔭᒥᓂ, ᑐᑭᒧᐊᖅᑎᑦᑎᔩᑦ ᐊᓯᖏᓪᓗ ᐊᑐᖅᑕᐅᓪᓚᕆᒋᐊᓖᑦ ᐃᖅᑲᓇᐃᔭᖅᑏᑦ ᑎᑎᕋᕐᕕᖕᒦᖦᖢᑎᒃ.
  • ᓄᓇᒃᑰᕈᑎᓕᕆᔨᒃᑯᑦᓇᓗᓇᐃᔭᕐᕕᐅᕙᖕᓂᖏᑦ ᑕᒪᕐᒥᑲᓴᓘ ᓚᐃᓴᓂᒃ ᓄᑖᑕᙳᕆᐊᖅᑎᑦᑎᓃᑦ ᓱᓕ ᐱᓕᕆᐊᖑᖃᑦᑕᖅᐳᑦ.
  • ᑭᒃᑯᑐᐃᓐᓇᓄᑦ ᓇᓗᓇᐃᒃᑯᑕᖅᑖᖅᑎᑦᑎᕙᖕᓂᖅ ᐱᓕᕆᕝᕕᐅᔪᓐᓴᖅᐳᖅ ᑭᓯᐊᓂ ᑐᐊᕕᕐᓇᖅᑐᑎᒍᑦ.
  • ᓄᑖᓂᒃ ᐊᖁᑦᑐᓐᓇᐅᑎᓂᒃ ᐱᓕᕆᔪᖃᔾᔮᙱᓚᖅ ᑭᓯᐊᓂ ᑐᓴᖅᑎᑦᑎᔪᖃᒃᑲᓐᓂᖅᐸᑦ.
  • ᑐᒃᓯᕋᐅᑏᑦ ᐱᔨᑦᑎᕋᕈᑎᓄᑦ ᓇᓂᔭᐅᔪᓐᓇᕐᑐᑦ ᐃᑭᐊᕿᕕᒃᑯᑦ ᐅᕙᓂ https://www.gov.nu.ca/motor_vehicles :
    • ᐊᖁᑦᑐᓐᓇᐅᑎᓄᑦ ᓄᑖᙳᕆᐊᖅᑎᑦᑎᓂᖅ
    • ᓄᓇᕗᒻᒥᑦ ᓇᓗᓇᐃᒃᑯᑕᕐᓄᑦ ᓄᑖᙳᕆᐊᖅᑎᑦᑎᓂᖅ
    • ᓄᓇᒃᑰᕈᑎᓄᑦ ᐊᑎᓕᐅᕐᕕᖕᒧᑦ ᓄᑖᙳᕆᐊᖅᑎᑦᑎᓂᖅ
    • ᑐᒃᓯᕋᐅᑏᑦ ᐊᖁᑦᑐᓐᓇᐅᑎᓂᑦ, ᓄᓇᑰᕈᑎᓯᐅᕐᓂᖅ, ᐊᒻᒪᓗ ᐱᕐᕈᓗᐊᕿᔪᓂ ᐅᓂᑳᕐᓂᖅ

ᒪᑐᔭᐅᔪᑦ/ᓄᖅᑲᖅᑎᑕᐅᔪᑦ/ᐊᑐᕈᓐᓃᖅᑎᑕᐅᔪᑦ ᐱᔨᑦᑎᕋᕐᓂᕆᔭᐅᔪᑦ:

  • ᑕᒪᕐᒥᑦᑎᐊᖅ ᑐᐊᕕᕐᓇᙱᑦᑐᑦ ᐃᖏᕐᕋᔾᔪᑎᓄᑦ ᐱᔨᑦᑎᕋᕐᓂᐅᕙᒃᑐᑦ ᐃᓚᒋᔭᐅᓪᓗᓂ ᐊᖁᑎᒥᒃ ᖃᐅᔨᓴᖅᓯᕙᖕᓃᑦ, ᑕᒪᕐᒥᑦᑎᐊᖅ ᑎᑭᑉᐸᒃᑐᓄᑦ ᐃᓂᒥ ᐱᓕᕆᐊᖑᕙᒃᑐᑦ, ᑕᒪᕐᒥᑦᑎᐊᖅ ᐱᓕᕆᕝᕕᒋᔭᐅᔪᒥᑦ ᑲᔪᓯᑎᑕᐅᔪᑦ ᑲᑎᒪᕐᔪᐊᕐᓃᑦ ᐅᐸᒃᓯᒪᓗᒋᓪᓗ ᐊᔪᕈᓐᓃᖅᓴᖅᑎᑕᐅᕙᖕᓃᑦ.  

 

ᐊᕙᑎᓕᕆᔨᒃᑯᑦ ᐱᔨᑦᑎᕋᕐᓂᖏᑦ

ᐱᔨᑦᑎᕋᖅᑕᐅᖏᓐᓇᖅᑐᑦ:

ᐱᓕᕆᕝᕕᒋᔭᐅᔪᖅ ᑭᐅᓯᖃᑦᑕᐃᓐᓇᕐᓂᐊᖅᐳᖅ ᐊᑲᐅᙱᓕᐅᕈᑎᒋᐅᔪᓄᑦ ᓂᕐᔪᑎᓄᑦ ᑯᕕᔪᓄᓪᓗ. ᑕᒪᕐᒥᑦᑎᐊᖅ ᑯᕕᔪᑦ ᐅᖃᐅᓯᐅᔭᕆᐊᖃᖅᐳᑦ ᓄᓇᕗᒻᒥ ᑯᕕᔪᓄ ᐅᖄᓚᕝᕕᐅᕙᒃᑐᒧᑦ ᐅᕗᖓ, 867-920-8130, 24−ᓄᑦ ᐃᑲᕐᕋᓄᑦ ᐅᓪᓗᒥ: https://www.gov.nu.ca/environment/documents/spill-response  

ᓇᓄᕐᓂᑦ ᖃᐅᔨᓴᖅᑏᑦ ᓱᓕ ᑲᔪᓯᓂᐊᖅᑐᑦ ᓄᓇᓕᓐᓂᑦ ᑖᒃᑯᓇᓂ ᓇᓄᖃᖃᑦᑕᕐᓂᖅᓴᐅᔪᓂᑦ (ᐱᓗᐊᖅᑐᒥᑦ. ᐊᕐᕕᐊᑦ ᐊᒻᒪ ᑎᑭᕋᔪᐊᕐᒥᑦ), ᐊᔪᕆᖅᓱᖅᑕᐅᓯᒪᓗᑎᑦ ᑖᒃᑯᐊ ᐃᓄᓐᓂᑦ ᑭᓇᒃᑯᑐᐃᓐᓇᕐᓂᑦ ᑲᑎᓯᔭᕆᐊᖃᙱᑦᑐᑦ ᐊᒻᒪ ᒪᓕᓪᓗᒋᑦ ᒪᓕᒋᐊᓖᑦ ᓇᓗᓇᐃᖅᑕᐅᓯᒪᔪᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓘᑦᑖᖅ ᐊᖓᔪᖅᑳᖓᑕ.

ᒪᑐᔭᐅᔪᑦ/ᓄᖅᑲᖅᑎᑕᐅᔪᑦ/ᐊᑐᕈᓐᓃᖅᑎᑕᐅᔪᑦ ᐱᔨᑦᑎᕋᕐᓂᕆᔭᐅᔪᑦ

  • ᑕᒪᕐᒥᒃ ᐆᒪᔪᕐᓂᐊᖅᑏᑦ ᐊᒡᓚᕝᕕᖏᑦ ᒥᕐᙳᐃᖅᓯᕐᕕᖕᒧᓪᓗ ᑎᑎᕋᕕᖏᑦ ᑭᕙᓪᓕᕐᒥᑦ ᒪᑐᓯᒪᔪᑦ ᑭᒃᑯᑐᐃᓐᓇᓄᑦ ᑭᓯᐊᓂ ᑐᓴᖅᑎᑦᑎᔾᔪᑕᐅᒃᑲᓐᓂᖅᐸᑦ. ᐆᒻᒪᔪᕐᓂᐊᖅᑎᓄᑦ ᐱᓕᕆᐊᔅᓴᖅᑕᖃᖅᐸᑦ ᒪᑐᐃᖓᐃᓐᓇᕐᓂᐊᖅᑐᑦ ᐊᑐᐃᓐᓇᐅᖏᓐᓇᕐᓂᐊᖅᑐᑦ ᖃᖓᓕᒫᒃᑯᑦ, ᐅᖃᓛᓗᑎᑦ ᐅᑯᓄᖓ:

  • (* ᓈᓴᐅᑎᑦ ᓅᑎᑕᐅᔪᑦ ᐊᕕᒃᓯᒪᓂᕐᒥ ᑎᑎᕋᕐᕕᖕᒧᑦ)

 

ᒐᕙᒪᓕᕆᔨᒃᑯᑦ

ᐱᔨᑦᑎᕋᖅᑕᐅᖏᓐᓇᖅᑐᑦ:

 ᓄᓇᕗᑦ ᒐᕙᒪᒃᑯᖏᑦ ᐊᖑᒻᒪᑏᓐᓇᖅᐳᑦ ᖃᐅᔨᔭᐅᔭᕆᐊᖃᙱᑦᑐᓄᑦ ᐊᑐᕆᐊᖃᖅᐸᒃᑕᒥᓂᒃ ᐅᑯᑎᒎᓇᖅ, ᐊᑐᕈᓐᓇᕐᓂᖅ ᑐᓴᖅᑕᐅᔪᒃᓴᓂᒃ ᓴᐳᔾᔨᓯᒪᓂᕐᓗ ᖃᐅᔨᔭᐅᔭᕆᐊᖃᙱᑦᑐᓂᒃ ᐱᖁᔭᖅ. ATIPP−ᒧᑦ ᐊᐅᓚᑦᑎᔩᑦ ᑲᔪᒡᓯᓐᓇᖅᐳᑦ ᐱᓕᕆᐊᖃᖅᐸᓪᓕᐊᓪᓗᑎᒃ ᓄᑖᓂᒃ ᐱᑕᖃᖅᐸᒌᖅᑐᓂᒡᓗ ᐱᔪᒪᔾᔪᑕᐅᔪᓂᒃ ᑐᓴᖅᑕᐅᔪᒃᓴᓂᒃ ᑭᐅᓯᓂᐊᖅᖢᑎᒡᓗ 25ᓂᒃ-ᐱᓕᕆᕝᕕᒋᔭᐅᔪᓂᒃ-ᐅᓪᓗᒃᑯᑦ ᖃᖓᒃᑰᕐᓂᖏᓐᓂᒃ, ᑭᓯᐊᓂ ᑕᐃᒪᐃᓐᓇᔭᙱᓚᑦ ᐱᔪᓐᓇᐅᑎᓕᒃᑯᑦ ᐅᖓᕙᕆᐊᖅᑕᐅᓂᖓ ᐊᑐᖅᐸᑦ ᐱᖁᔭᐅᑉ ᐊᑖᒍᑦ. ᖃᐅᔨᒋᐊᕐᕕᖃᕐᓂᐊᕐᓂᕐᒧᑦ ᑐᓴᖅᑕᐅᔪᒃᓴᓂᒃ ᑭᓇᒧᑦ ᐅᖃᖃᑎᖃᕈᓐᓇᕋᔭᕐᒪᖔᖅᐱᑦ ᑎᑎᕋᖅᓯᓂᐊᕐᓗᑎᒃ ATIPP−ᒧᑦ ᐱᔪᒪᔾᔪᑕᐅᔪᒧᑦ, ᐊᑕᓕᕐᕕᐅᔪᓐᓇᖅᑐᖅ ᐊᑖᓃᑦᑐᖅ ᑕᑯᒋᐊᕐᓗᒍ https://www.gov.nu.ca/executive-and-intergovernmental-affairs/informatio...

ᐋᖅᑭᒋᐊᖅᑕᐅᓯᒪᓕᖅᑐᑦ ᐱᔨᑦᑎᕋᕈᑕᐅᕙᒃᑐᑦ:

ᒐᕙᒪᒃᑯᓐᓂᒃ ᑐᓴᐅᒪᔪᓕᕆᔨᐅᑉ ᑎᑎᕋᕐᕕᖏᑦ ᒪᑐᓯᒪᕗᑦ ᑭᒃᑯᑐᐃᓐᓇᓄᑦ. ᒐᕙᒪᒃᑯᓐᓂᒃ ᑐᓴᐅᒪᔪᓕᕆᔨᐅᑉ ᑎᑎᕋᕐᕕᖓ ᑖᒃᑯᐊ ᐱᓕᕆᐊᖏᓐᓂᑦ ᑲᔪᓯᔪᑦ ᐊᖏᕐᕋᖏᓐᓂᑦ ᐅᖃᕐᕕᔅᓴᐅᔪᑦ ᐅᑯᐊ: ᖃᐅᔨᒋᐊᐃᕕᒃᓴᓄᑦ ᑐᓴᖅᑕᐅᔪᒃᓴᓄᑦ, ᐅᕗᙵᐅᓗᑎᑦ https://gov.nu.ca/executive-and-intergovernmental-affairs/information/gl....

 

ᓄᓇᕗᒻᒥᐅᓂ ᖃᓄᐃᙱᑦᑎᐊᖅᑎᑦᑎᓇᓱᒡᓗᑕ ᑕᒪᑦᑕ ᑲᒪᒋᔭᒃᓴᖃᖅᐳᒍᑦ! ᐳᐃᒍᖅᑕᐃᓕᒋᑦ: ᐊᒡᒐᑎᑦ ᐋᓪᓕᕋᐃᓪᓗ ᐅᐊᓴᖃᑦᑕᕐᓗᒋᑦ, ᖃᓂᒌᓗᐊᖅᑕᐃᓕᕙᒡᓗᓯ, ᐃᖢᐊᖅᓴᐃᔨᓄᑦ ᐅᖃᐅᔾᔪᐃᔾᔪᑕᐅᔪᓂᑦ ᓈᓚᒃᐸᒡᓗᓯ, ᐊᖏᕐᕋᖅᓯᒪᐃᓐᓇᕐᓗᑕᓗ ᖃᓂᒪᒍᑦᑕ.