ᐅᖃᓚᐅᑎᓯᐅᑏᑦ

You are here

ᓄᕙᒡᔪᐊᕐᓇᖅ-19 ᓄᓇᕗᑦ ᒐᕙᒪᖓᓂ ᑐᓴᒐᒃᓴᑦ - ᓄᕕᐱᕆ 23, 2020

ᓄᕕᐱᕆ 23, 2020

ᓄᕙᒡᔪᐊᕐᓇᖅ-19 ᓄᓇᕗᑦ ᒐᕙᒪᖓᓂ ᑐᓴᒐᒃᓴᑦ - ᓄᕕᐱᕆ 23, 2020

ᓯᕗᓕᖅᑎᒥᑦ ᑐᓴᒐᒃᓴᖅ:

ᐅᓪᓛᒃᑯᑦ. ᐅᓪᓗᒥ, ᓄᓇᕗᒻᒥ ᑎᓴᒪᓂᒃ (04) ᓄᕙᒡᔪᐊᕐᓇᖅ-19−ᑖᖅᑐᖃᖅᓯᒪᓕᕐᒥᔪᖅ. ᐱᖓᓱᓂᒃ ᖃᓂᒻᒪᒃᑐᖃᖅᖢᓂ ᑲᖏᖅᖠᓂᕐᒥ ᐊᒻᒪ ᐊᑕᐅᓯᕐᒥᒃ ᑎᑭᕋᕐᔪᐊᕐᒥ.

ᓄᓇᕗᒻᒥ ᒫᓐᓇ ᑲᑎᖦᖢᒋᑦ 132−ᖑᓕᖅᑐᑦ ᓄᕙᒡᔪᐊᕐᓇᖅ-19−ᒧᑦ ᖃᓂᒻᒪᒃᑐᑦ. ᑲᑎᖦᖢᒋᑦ ᐃᓄᐃᑦ ᒫᓐᓇᒧᑦ ᑎᑭᖦᖢᒍ ᖃᐅᔨᓴᖅᑕᐅᓯᒪᓕᖅᑐᑦ 4644−ᖑᓕᖅᑐᑦ. 933 ᐃᓄᐃᑦ ᒫᓐᓇ ᖃᐅᔨᓴᖅᑕᐅᔪᑦ.

ᐊᕐᕕᐊᑦ, ᑎᑭᕋᕐᔪᐊᖅ ᐊᒻᒪ ᑲᖏᖅᖠᓂᖅ, ᓄᓇᕗᒥᐅᓕᒫᑦᑎᐊᓂᒃ ᐃᑲᔪᖅᓱᖅᑕᐅᑦᑎᐊᖅᑐᓯ.

ᓄᓇᕗᒥᐅᑦ, ᖁᔭᓐᓇᒦ ᐊᒃᓱᕈᖃᑕᐅᒐᔅᓯ ᐱᓇᓱᐊᕈᓯᐅᑉ ᓄᕐᖑᐊᓂᒪᓕᒃᖢᓯ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᑎᓕᐅᕆᔾᔪᑕᐅᔪᓂᒃ. ᒪᓕᑦᑎᐊᖏᓐᓇᕐᓂᐊᖅᐸᓯᐅᒃ ᐅᔾᔨᖅᓱᑦᑎᐊᖏᓐᓇᕐᓗᓯᓗ.

ᖃᐅᔨᒪᔪᖓ ᐊᔪᕐᓇᖅᑐᐊᓘᖕᒪᑦ, ᑭᓯᐊᓂ ᐅᖓᓯᒌᒃᑕᐃᓐᓇᕆᐊᖃᕋᑦᑕ, ᖃᓄᐃᙱᑦᑎᐊᕐᓂᐊᕋᑦᑕ ᐃᓅᑦᑎᐊᕐᓂᐊᕋᑦᑕᓗ. ᑭᒃᑯᓕᒫᑦᑎᐊᑦ ᐃᓱᒪᒋᒋᐊᖃᕋᑦᑎᒍᑦ; ᓄᓇᖅᑲᑎ[ᒋᓕᒫᖅᑎᒍᑦ, ᐅᕙᑦᑎᓐᓂᑐᐊᖅ ᐃᓱᒪᒋᙱᓪᓗᑕ. ᖃᓂᒪᓐᓇᐅᑎᓪᓗᒍ ᑕᑯᒋᐊᖁᔭᐅᕐᔪᐊᖅᑐᐊᓘᔪᒍᑦ ᓄᓇᕐᔪᐊᕐᒥ ᐱᕙᓪᓕᐊᓂᕆᔭᐅᔪᐊᓗᖕᒥ ᑕᒪᑦᑖᓗᒃ ᑲᒪᒋᔭᒃᓴᖃᖅᑐᐃᓐᓈᓘᔪᒍᑦ.  ᐅᕙᒍᑦ ᐃᓐᓇ ᐃᓄᑑᓪᓗᑕ ᐱᓕᕆᐊᕆᓲᕗᑦ ᑲᑦᑐᕈᑕᐅᓂᐊᖅᐳᖅ ᓄᖅᑲᕈᑕᐅᓂᐊᖅᐳᕐᓗ ᖃᓂᒪᓐᓇᒥᒃ.

ᐃᒡᓗᔅᓯ ᓯᓚᑖᓂ ᓱᓕ ᐃᓄᖕᓂᒃ ᑲᑎᖃᑎᖃᑲᑕᒃᑯᔅᓯ, ᑕᐃᒫᓗᒃ, ᑲᑎᑲᑕᒍᓐᓃᕆᔅᓯ. ᐊᔪᕈᓐᓃᖅᓴᕆᐊᖃᓕᕋᑦᑕ ᓄᓇᖅᑲᑎ[ᒋᖑᑎᓪᓗᑕ ᑲᒪᒌᖃᑦᑕᐅᑎᒋᐊᖃᕐᓂᕐᒥᒃ ᐊᒻᒪ ᐃᓱᒪ[ᒋᖃᑦᑕᐅᑎᑦᑎᐊᕆᐊᖃᕐᓂᕐᒥᒃ. ᑕᒪᑦᑖᓗᒃ ᖃᐅᔨᒪᓚᐅᖅᑐᒍᑦ ᑕᒪᓐᓇ ᐊᔪᕐᓇᕐᓂᐊᖅᑐᒻᒪᕆᐊᓘᓂᖓᓐᓂᒃ, ᑭᓯᐊᓂᓕ ᑕᒪᑦᑖᓗᒃ ᐱᓕᕆᔭᕆᐊᖃᖅᑕᑦᑎᓐᓂ ᐱᓕᕆᔭᕆᐊᖃᕋᑦᑕ. ᖃᐅᔨᒫᓂᒃᑐᒍᑦ ᖃᓄᐃᓕᐅᕆᐊᖃᕐᒪᖔᑦᑕ, ᖃᐅᔨᒪᓪᓗᑕᓗ ᖃᓄᐃᓕᔪᓐᓇᕐᒪᖔᑦᑕ ᓈᓚᙱᐅᔭᕈᓗᒃᑯᑦᑕ.

ᐃᒡᓗᔅᓯᓐᓂ ᐊᓂᔭᕆᐊᖃᙱᒃᑯᕕᑦ ᐊᓂᙱᒃᑲᓗᐊᕈᕕᑦ ᓱᖁᑕᐅᙱᑦᑐᖅ. ᐱᔭᕆᐊᖃᓪᓚᕆᙱᒃᑯᕕᑦ ᖃᖓᑕᓲᒃᑯᑦ ᐊᐅᓪᓚᖅᑕᐃᓕᒋᑦ. ᐅᔾᔨᖅᑐᖅᑎᐊᖏᓐᓇᕐᓗᓯ ᐊᒻᒪ ᐋᓐᓂᐊᓕᖅᑕᐃᓕᒪᐃᓐᓇᑦᑎᐊᕐᓗᓯ ᐊᓯᔅᓯᓐᓂᓗ ᐋᓐᓂᐊᓕᖅᑎᑦᑎᑦᑕᐃᓕᒪᓗᓯ.

ᖃᓄᐃᙱᑦᑎᐊᕆᔅᓯ. ᐊᑦᑕᕐᓇᖅᑐᒧᐊᖅᑕᐃᓕᒋᔅᓯ. ᐊᐃᓯᒪᓗᓯ.

 

ᒥᓂᔅᑕ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᑐᓴᒐᒃᓴᖏᑦ:

ᐅᓪᓛᒃᑯᑦ. ᖃᐅᔨᒫᓂᒃᑐᖓ ᓄᕙᕐᔪᐊᕐᓇᖅ-19−ᒧᑦ ᖃᓂᒻᒪᒃᐸᓪᓕᐊᔪᑦ ᐅᓄᖅᓯᕙᓪᓕᐊᑐᐃᓐᓇᕐᒪᑕ ᖃᐅᔨᔭᕗᑦ ᐱᓇᓱᐊᕈᓯᐅᓵᖅᑐᒥᒃ ᐃᓄᒐᓴᒡᔪᐊᓄᑦ ᐃᓱᒫᓘᑕᐅᑦᑎᐊᕐᒪᑦ.

ᓘᒃᑖᖅ ᐹᑐᓴᓐᒧᑦ ᐅᖃᐅᔾᔭᐅᓯᒪᒐᑦᑕ, ᒪᓐᓇᒎᖅ ᓂᕆᐅᓇᙱᑦᑐᒃᑰᕐᒪᑦ, ᑕᑯᒃᓴᐅᑎᑦᑎᓪᓗᓂᓗ ᐋᓐᓂᐊᕕᖕᒥᐅᑕᑦ ᐊᒃᓱᕈᖅᑐᐊᓘᓕᕐᒪᑕ ᖃᐅᔨᓇᓱᒃᖢᑎᒃ ᑭᒃᑯᓕᒫᑦᑎᐊᓂᒃ ᖃᓂᒻᒪᒃᐸᓪᓕᐊᔪᓂᒃ. 

ᑕᑯᒃᓴᐅᑎᑦᑎᖕᒪᑦ ᖃᓂᒻᒪᓯᕐᒧᑦ ᐊᒃᑐᖅᑕᐅᕙᓪᓕᐊᔪᑦ ᖃᐅᔨᔭᐅᕙᓪᓕᐊᔪᑦ ᖃᐅᔨᔭᐅᕙᓪᓕᐊᓂᖏᓐᓂᒃ ᐊᒻᒪ ᐄ ᒫᓐᓇᑲᐅᑎᒋ ᐱᓕᕆᐊᖑᐊᓂᒍᓐᓇᔾᔮᙱᒻᒪᑕ ᐃᓄᓕᒫᑦᑎᐊᑦ ᖃᐅᔨᓴᖅᑕᐅᔭᕆᐊᓕᑦ, ᖃᐅᔨᓴᖅᑕᐅᓗᑎᒃ.  ᐃᓄᐃᑦ ᐃᖅᑲᐃᓯᔪᒪᖕᒥᔭᒃᑲ ᐱᒻᒪᕆᐅᓂᖓᓂᒃ ᑕᒻᒪᖅᓯᒪᙱᑦᑐᓂᒃ ᑐᓴᖅᑎᑕᐅᖃᑦᑕᖅᐸᑕ. ᐅᖃᐅᓯᖃᕈᓘᔭᖅᑐᓂᒃ ᓈᓚᒃᐸᙱᓪᓗᓯ ᐊᒻᒪ ᐃᓄᖕᓄᑦ ᐱᕙᓪᓕᐊᔪᓂᒃ ᐅᖃᐅᓯᒃᓴᕆᔭᐅᔪᓂᒃ. ᐅᖃᐅᓯᖃᕈᓘᔭᕐᓂᖅ ᑲᑉᐱᐊᓵᕆᔾᔪᑎᑐᐃᓐᓇᐅᖕᒪᑦ.

ᑐᓴᐅᒪᑎᑦᑎᖃᑦᑕᖅᑐᒍᑦ ᐃᓄᖕᓂᒃ ᖃᐅᑕᒫᑦ ᑲᑎᒪᖃᑎᒋᕙᒃᖢᑎᒍᓪᓗ ᕼᐋᒻᒪᓚᒃᑯᓐᓄᑦ ᓯᕗᓕᖅᑎᓂᒃ ᑲᑎᒪᖃᑎᒋᒐᔪᒃᖢᑎᒍᑦ ᖃᐅᔨᒪᖃᑎᒌᒍᒪᓪᓗᑕ ᑕᒻᒪᖅᑕᖅᓯᒪᙱᑦᑐᓂᒃ ᒫᓐᓇᓕᓴᐅᓛᓂᒡᓗ ᑐᓴᒐᒃᓴᓂᒃ ᑐᓴᐅᒪᖃᑕᐅᒐᓗᐊᕐᒪᖔᖅᐱᑦ. 

ᑭᓯᐊᓂ ᐃᓕᔅᓯᓐᓄᑦ ᐃᑲᔪᖅᑕᐅᒋᐊᖃᕋᑦᑕ. ᖃᐅᔨᒫᓂᒃᑐᖓ ᐊᐃᓯᒪᐃᓐᓈᓗᒋᐊᒃᓴᖅ ᐊᔪᕐᓇᐸᓗᒃᑐᐊᓘᖕᒪᑦ, ᑕᐃᒪᐃᒃᑲᓗᐊᖅᑎᓪᓗᒍ ᑕᒪᑦᑖᓗᒃ ᐱᓕᕆᐊᒃᓴᖃᖅᑐᐃᓐᓇᐅᕗᒍᑦ ᖃᓂᒻᒪᒍᑕᐅᕙᓪᓕᐊᔪᒥᒃ ᓯᐊᒻᒪᒃᑎᖅᑎᑦᑕᐃᓕᒪᓗᑕ. ᑐᓴᕐᕕᒋᒪᓕᖅᑕᕗᑦ ᓘᒃᑖᖅ ᐹᑐᓴᓐ ᐅᖃᓚᐅᕐᒪᑦ ᖃᓂᒻᒪᓯᕉᖅ ᓯᐊᒻᒪᒍᓐᓇᕋᑦᑎᒍᑦ ᓱᓕ ᖃᐅᔨᓇᖅᓯᓚᐅᙱᑎᓪᓗᒍ ᐃᓕᖕᓃᕌᓂᒃᑐᖅ. ᖃᓂᒪᖕᒪᖔᖅᐱᑦ ᖃᐅᔨᔭᐅᓚᐅᙱᓐᓂᕐᓂᒃ. ᑕᐃᒪᓕ ᐱᒻᒪᕆᐅᓘᕗᖅ ᒪᓕᒐᓕᐊᖑᓯᒪᔪᑦ ᒪᓕᒋᐊᖃᖅᖢᑎᒍᑦ ᐋᓐᓂᐊᖅᑰᔨᙱᒃᑲᓗᐊᕈᕕᓪᓘᓐᓃᑦ ᐊᒻᒪ ᐱᓗᐊᖅᑐᒥᒃ ᐊᐃᓯᒪᑎᓪᓗᑎᑦ.

ᐃᓄᐃᑦ ᐊᐱᕆᔪᒪᖕᒥᔭᒃᑲ ᐃᓄᑐᐊᒃᑯᕕᖕᒦᑎᑕᐅᔪᑦ ᖃᓪᓗᓈᓂ ᖃᐅᔨᒫᓂᒃᑲᓗᐊᕈᑦᑕ ᐊᔪᕐᓇᖅᑐᒻᒪᕆᐊᓘᓂᖓᓂᒃ ᐃᓄᑐᐊᒃᑯᕕᖕᒦᔅᓲᔭᕆᐊᒃᓴᖅ, ᐱᓕᕆᐊᓯ ᐊᓯᔾᔨᕈᑕᐅᔪᓐᓇᑦᑎᐊᖅᑐᑦ. ᒪᓕᒐᙳᖅᑎᑕᐅᓯᒪᔪᑦ ᒪᓕᙱᒃᑯᓯᐅᒃ, ᐃᓄᐃᑦ ᐊᑦᑕᕐᓇᖅᑐᒧᐊᖅᑎᑉᐸᓪᓕᐊᕙᑎᑦ. 

ᖃᓪᓗᓈᓂ ᐃᓄᑐᐊᒃᑯᕕᖕᒦᑦᑐᑦ ᕿᑲᕆᐊᖅᓯᒪᙱᑦᑐᑦ. ᒪᓕᒐᕆᔭᐅᔪᑦ. ᒪᓕᒐᕆᔭᐅᔪᓂᒃ ᓯᖁᒥᑦᑎᑲᑕᒃᑯᔅᓯ ᓄᓇᖅᑲᑎᓯ ᐊᑦᑕᕐᓇᖅᑐᒦᑎᓐᓂᐊᖅᐸᓯᐅᒃ ᓇᒡᓕᒋᔭᓯᓗ ᐊᑦᑕᕐᓇᖅᑐᒧᐊᕐᓗᒋᑦ. ᑕᐃᒪᐃᓐᓂᖓᓄᑦ, ᐃᓅᖃᑎᒌᒃᓯᒍᑦ ᐅᖓᓯᒌᒃᑕᐃᓐᓇᕐᓗᓯ, ᐊᒡᒐᓯ ᐅᐊᓴᑦᑎᐊᖏᓐᓇᕐᓗᓯᐅᒃ, ᐳᓚᕋᙱᓪᓗᓯ, ᓱ[ᐳᖅᑐᖅᑕᓯ ᐊᓯᔅᓯᓐᓄᑦ ᑐᓐᓂᖅᑯᑎᒋᕙᙱᓪᓗᒋᑦ ᐅᕝᕙᓘᓐᓃᑦ ᓂᐅᖅᑲᖅᑕᓯ. 

ᓱᖏᐅᙵᔫᑎᐊᓘᒐᑦᑕ ᑕᒪᒃᑯᐊ ᖃᐅᑕᒫᐸᓗᒃ ᐊᑐᖅᐸᒃᑕᑦᑎᓐᓂ, ᑭᓯᐊᓂᓕ ᓄᖅᑲᕆᐊᖃᕋᑦᑕ ᐅᔾᔨᖅᓱᕆᐊᖃᕋᑦᑕᓗ ᐱᓕᕆᐊᕆᕙᒃᑕᑦᑎᓐᓂᒃ. ᑕᒪᒃᑯᐊ ᐅᐃᕆᙵᔭᕗᑦ ᓄᖅᑲᐅᑎᒋᐊᖃᓕᖅᑕᕗᑦ ᑭᒃᑯᓕᒫᑦᑎᐊᑦ ᖃᓄᐃᙱᑦᑎᐊᖁᒍᑦᑎᒍᑦ. 

ᑲᑐᔾᔨᖃᑎᒌᒡᓗᑕ ᐱᓕᕆᔭᕆᐊᖃᕋᑦᑕ ᓄᕙᕐᔪᐊᕐᓇᖅ-19 ᓯᐊᒻᒪᒃᑎᖅᑕᐃᓕᒪᓗᒍ. ᐃᓱᒪᖅᓱᖅᑐᐃᓐᓇᐅᔪᒍᑦ ᓴᐳᔾᔨᓂᕐᒥᑦ ᐅᕙᑦᑎᓐᓂᑦ, ᐃᓚᑦᑎᓐᓂᑦ ᓄᓇᓕᑦᑎᓐᓂᓗ.  ᐱᓕᕆᐊᕗᑦ ᒫᓐᓇ ᐊᒃᑐᐃᔾᔪᑕᐅᖕᒪᑕ ᑭᒃᑯᓕᒫᑦᑎᐊᑦ ᖃᓄᐃᙱᑦᑎᐊᕈᓯᖏᓐᓄᑦ, ᖃᖓᓕᒫᑦᑎᐊᖅ.

 

ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᐅᑉ ᑐᓴᖅᑎᑦᑎᔾᔪᑎᖏᑦ:

ᐅᓪᓛᒃᑯᑦ. ᐅᓪᓗᒥ ᐅᖃᐅᓯᖃᕈᒪᕗᖓ ᖃᓄᖅ ᖃᓂᒻᒪᓯᖅ ᓯᐊᒻᒪᒃᐸᓪᓕᐊᓲᖑᖕᒪᖔᑦ ᐊᒻᒪ ᐃᓄᑐᐊᒃᑯᕕᖕᒦᑦᑕᕆᐊᖃᕐᓂᖅ ᐱᒻᒪᕆᐅᓂᖓᓂᒃ.

ᐃᓄᑐᐊᒃᑯᕕᖕᒦᑦᑕᕆᐊᒃᓴᖅ ᐊᔪᕐᓇᖅᑑᒐᓗᐊᖅ ᐱᓗᐊᖅᑐᒥᒃ ᑕᐃᒃᑯᓄᖓ ᖃᓂᒪᙱᑦᑐᓄᑦ, ᑭᓯᐊᓂᓕ ᓴᐳᔾᔨᔾᔪᑎᒋᔪᓐᓇᕋᑦᑎᒍᑦ ᓄᕙᒡᔪᐊᕐᓇᖅ-19−ᒧᑦ. ᑕᐃᒃᑯᐊ ᐃᓄᐃᑦ ᖃᓂᒪᙱᑦᑐᑦ ᑭᓯᐊᓂ ᐊᑦᑕᕐᓇᖅᑐᒧᐊᔭᑦᑐᑦ, ᓄᕙᒡᔪᐊᕐᓇᖅ-19−ᖃᖅᑐᓂᒃ ᒪᓂᒪᖃᑕᐅᔪᓄᑦ, ᐃᓄᑐᐊᒃᑯᕕᖕᒦᑦᑕᕆᐊᖃᓪᓚᕆᖃᑦᑕᖅᐳᑦ. 

ᐃᓄᐃᑦ ᓱᓕ ᓯᐊᒻᒪᒃᑎᕆᔪᓐᓇᖅᐳᑦ ᖃᓂᒻᒪᓯᕐᒥᒃ ᖃᓂᒪᙱᒃᑲᓗᐊᖅᐸᑕᓘᓐᓃᑦ, ᖃᓂᒪᖅᑰᔨᙱᒃᑲᓗᐊᕐᓗᑎᒃ ᓯᐊᒻᒪᒃᑎᕆᔪᓐᓇᕐᒪᑕ, ᑖᓐᓇᓗ ᐱᔾᔪᑎᒋᔭᐅᖃᑕᐅᔪᖅ ᓄᕙᒡᔪᐊᕐᓇᖅ-19 ᓱᒃᑲᔪᒻᒪᕆᐊᓗᖕᒥᒃ ᓯᐊᒻᒪᒍᓐᓇᕐᒪᑦ.  ᐃᓚᖏᑦ ᓄᕙᒡᔪᐊᕐᓇᖅ-19−ᑖᖅᓯᒪᔪᑦ ᓯᐊᒻᒪᒃᑎᕆᔪᓐᓇᖅᐳᑦ ᖃᓂᒻᒪᓯᕐᒥᒃ ᐃᒻᒪᖄ ᐅᓪᓘᒃ ᒪᕐᕉᖕᓂ ᖃᓂᒪᖕᒪᖔᑦ ᐃᑉᐱᖕᓂᓚᐅᙱᑎᓪᓗᒍ ᓱᓕ. ᐊᓯᖏᑦ ᓯᐊᒻᒪᒃᑎᕆᔪᓐᓇᖅᖢᑎᒃ ᖃᓂᒻᒪᓯᕐᒥᒃ ᐅᓪᓗᑦ ᖁᓕᓄᑦ ᖃᓂᒻᒪᓯᖃᕐᒪᖔᑦ ᓱᓕ ᖃᐅᔨᓇᓚᐅᙱᑎᓪᓗᒋᑦ.

ᑕᐅᑐᙳᐊᙳᐊᖦᖤᖅᑕ ᐅᓪᓗᕐᒥᒃ ᐃᓄᐃᑦ ᑕᑰᑎᕙᒃᑕᕗᑦ, ᑲᑎᖅᓱᕈᓘᔭᕐᓗᒋᓪᓗ ᐅᓪᓘᒃ ᒪᕐᕉᓗᑎᒃ ᐅᕝᕙᓘᓐᓃᑦ ᖁᓕᐅᓗᑎᒃ. ᖃᓂᒻᒪᓯᕐᒥᒃ ᓯᐊᒻᒪᒃᑎᕆᒍᕕᑦ ᑖᒃᑯᐊ ᐅᓪᓗᐃᑦ ᐊᑐᖅᑎᓪᓗᒋᑦ, ᐊᓯᖕᓄᑦ ᓯᐊᒻᒪᒃᑎᖅᑐᓐᓇᖅᑕᑦ ᓯᐊᒻᒪᒃᑎᕐᕕᒋᔭᑎᓪᓗ ᐊᓯᒥᓄᑦ ᓯᐊᒻᒪᒃᑎᕆᔪᓐᓇᖅᑐᑦ. ᐃᓄᐃᑦ ᖃᐅᔨᓕᑕᐃᓐᓇᖅᐸᑕ ᖃᓂᒪᔪᑦ, ᖃᓂᒻᒪᒃᑎᑦᑎᑐᐃᓐᓇᕆᐊᖃᕐᒥᔪᑦ ᐊᓯᖏᓐᓂᒃ, ᑕᐃᒃᑯᐊᓗ ᓯᐊᒻᒪᒃᑎᕆᖃᑕᐅᓂᐊᕆᓪᓗᑎᒃ.

ᖃᓂᒻᒪᓯᖅ ᓄᖅᑲᖅᑎᓐᓂᐊᕐᓗᒍ ᓯᐊᒻᒪᒃᑎᖅᐸᓪᓕᐊᓂᖓ ᐃᓄᑑᔭᕆᐊᖃᖅᐳᒍᑦ. ᐃᓄᐃᑦ ᓅᓪᓗᒋᑦ ᖃᓂᒪᔪᑦ ᐅᕝᕙᓘᓐᓃᑦ ᐊᑦᑕᕐᓇᖅᑐᒦᑦᑐᑦ ᐃᒡᓗᒥᒃ ᐃᒡᓗᒧᑦ, ᓯᐊᒻᒪᒍᑕᐅᕙᓪᓕᓪᐊᑐᐃᓐᓇᕐᓂᐊᖅᐳᖅ ᖃᓂᒻᒪᓯᕐᒥᒃ.

ᐃᓄᑑᔭᕆᐊᖃᕐᓂᖅ ᒪᓕᒃᑕᐅᑦᑎᐊᕆᐊᖃᖅᐳᖅ ᐊᒻᒪ ᒪᓕᒐᖏᑦ ᐃᓄᑐᐊᒃᑯᕕᖕᒦᑦᑕᕆᐊᖃᖅᑎᓪᓗᒋᑦ ᒪᓕᒐᕆᔭᐅᕗᑦ ᓄᓇᖅᑲᑎᓯ ᓴᐳᔾᔭᐅᖁᓪᓗᒋᑦ. ᐃᓄᑐᐊᒃᑯᕕᖕᒦᑦᑕᕆᐊᖃᕈᕕᑦ ᓄᕙᒡᔪᐊᕐᓇᖅ-19−ᖃᕐᓂᕐᓄᑦ ᐅᕝᕙᓘᓐᓃᑦ ᐊᑦᑕᕐᓇᖅᑐᒦᔭᓐᓂᕐᓄᑦ, ᐃᒪᐃᓕᐅᕆᐊᖃᖅᐳᑎᑦ:

  • ᐊᐃᓯᒪᐃᓐᓇᕐᓗᑎᑦ.
  • ᓂᕆᔭᒃᓴᖅᑖᕆᐊᖃᕈᕕᑦ ᑎᓕᓯᔪᓐᓇᖅᐳᓯ ᐃᓄᑐᐊᒃᑯᕕᖕᒦᑦᑕᕆᐊᖃᙱᑦᑐᒥᒃ ᐊᒡᔭᖅᓯᕝᕕᐅᔪᒪᓗᑎᑦ ᐹᔅᓯᓐᓄᑦ ᐃᓯᖅᑕᐅᙱᒃᑲᓗᐊᕐᓗᑎᒃ.
  • ᐊᓯᑎᑦ ᐳᓛᕆᐊᑲᑕᙱᓪᓗᒋᑦ.
  • ᐳᓛᖅᑐᑦ ᑐᙵᓱᒃᑎᑲᑕᙱᓪᓗᒋᑦ.
  • ᐅᖓᓯᒌᒃᑕᐃᓐᓇᖅᐸᒡᓗᓯ ᐃᒡᓗᒥᒃ ᐊᔪᕐᓇᙱᓐᓂᓕᒫᖓᓂᒃ.
  • ᒪᑐᐊᖅᓯᒪᓗᑎᑦ.
  • ᓂᕆᔭᑎᑦ ᐊᓯᖕᓄᑦ ᓂᕆᔭᐅᑎᙱᓪᓗᒋᑦ ᑲᑭᐊᒃᓯᓗ ᐊᓘᑎᓯᓗ.
  • ᐊᒃᑐᖅᑕᐅᒐᔪᒃᑐᑦ ᐊᓪᓚᖅᑎᕋᔪᒡᓗᒋᑦ ᓲᕐᓗ ᐊᓇᕐᕕᒃ, ᐃᒐᕝᕕᒃ ᐊᒻᒪ ᐃᓄᒃᑯᕕᒃ.

ᐅᔾᔨᕈᓱᒃᑐᖓ ᐃᓄᑐᐊᒃᑯᕕᖕᒦᖦᖢᓂ ᐊᔪᕐᓇᐸᓗᒃᑐᐊᓘᖕᒪᑦ ᐊᒃᓱᕈᓗᐊᓕᕐᓇᕐᒪᑦ, ᑭᓯᐊᓂ ᑭᒃᑯᓕᒫᑦᑎᐊᑦ ᒪᓕᒐᓕᐊᕆᔭᐅᔪᓂᒃ ᒪᓕᑦᑎᐊᖏᓐᓇᖅᐸᑕ ᐃᑲᔫᑎᒋᔪᓐᓇᕋᑦᑎᒍᑦ ᖃᓂᒻᒪᓯᖅ ᓄᖅᑲᐅᒪᑎᓪᓗᒍ ᑕᒪᒃᑯᐊᓗ ᐃᓱᒪᖅᓲᑎᒋᔪᓐᓃᖅᑕᕗᑦ ᐅᑎᕐᕕᒋᔾᔫᒥᔪᓐᓇᖅᓯᓇᔭᖅᑕᕗᑦ. ᖁᔭᓐᓇᒦᒃ.

ᐃᓚᒋᔭᐅᓪᓗᓂ ᓄᓇᕗᑦ ᒐᕙᒪᖓᑕ ᐱᓇᔪᒃᑕᖏᓐᓂ ᓴᐳᔾᔨᓯᒪᔪᒪᓪᓗᑎᒃ ᓄᓇᕗᒻᒥᐅᓂᒃ ᑕᒪᑐᒧᖓ ᓄᕙᒡᔪᐊᕐᓇᖅ-19−ᒧᑦ, ᓄᓇᕗᑦ ᒐᕙᒪᖓᑕ ᐱᓕᕆᕝᕕᒋᑦ ᐅᑯᓂᖓ ᐊᑐᓕᖅᑎᑦᑎᓯᒪᕗᑦ:

 

ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᐱᓕᕆᕝᕕᖓ

ᑭᖑᓪᓕᕐᒥ ᑐᓴᒐᒃᓴᐅᓚᐅᖅᑐᓂᒃ ᑕᑯᔪᒪᒍᕕᑦ ᐊᒻᒪ ᐃᑲᔫᑎᒃᓴᓂᒃ ᓄᕙᒡᔪᐊᕐᓇᖅ-19 ᐱᔾᔪᑎᒋᓪᓗᒍ ᓄᓇᕗᒻᒥ, ᐅᕗᙵᕈᓐᓇᖅᐳᑎᑦ:

https://www.gov.nu.ca/health/information/covid-19-novel-coronavirus

ᑭᖑᓪᓕᕐᒥ ᑐᓴᒐᒃᓴᐅᓚᐅᖅᑐᓂᒃ ᒫᓐᓇᓕᓴᕐᓂᒃ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᑭᒡᓕᖃᖅᑎᑕᐅᔪᓂᒃ, ᐅᕗᙵᕈᓐᓇᖅᐳᓯ: https://www.gov.nu.ca/health/information/nunavuts-path

ᓄᕙᒡᔪᐊᕐᓇᖅ-19−ᖃᖅᑐᑦ ᖃᓄᐃᓕᖓᓂᖏ ᓄᕕᐱᕆ 23

ᑲᑎᖦᖢᒋᑦ ᓇᓗᓇᐃᖅᑕᐅᓯᒪᔪᑦ ᐱᖃᕐᓂᖏᓐᓂᒃ ᑲᑎᖦᖢᒋᑦ ᐆᒪᔪᒥᒃ ᐱᖃᕐᓂᖏᑦ ᑲᑎᖦᖢᒋᑦ ᐊᓂᒍᐃᓯᒪᔪᑦ ᑲᑎᖦᖢᒋᑦ ᐃᓄᐃᑦ ᒪᓕᒃᑕᐅᔪᑦ ᒫᓐᓇ ᐃᓄᐃᑦ ᖃᐅᔨᓴᖅᑕᐅᔪᑦ
134 132 2 4644 933

ᓄᕙᒡᔪᐊᕐᓇᖅ-19−ᖃᖅᑐᑦ ᓄᓇᓖᑦ ᒪᓕᒡᓗᒋᑦ: ᓄᕕᐱᕆ 23

ᓄᓇᓕᒃ ᐃᑉᐸᒃᓴᖅ ᓇᓗᓇᐃᖅᑕᐅᓚᐅᖅᑐᑦ ᓄᕙᒡᔪᐊᕐᓇᖅ-19 −ᖃᕐᓂᖏᓐᓂᒃ    ᐅᓪᓗᒥ ᓇᓗᓇᐃᖅᑕᐅᔪᑦ ᓄᕙᒡᔪᐊᕐᓇᖅ-19 −ᖃᕐᓂᖏᓐᓂᒃ ᐊᓯᔾᔨᕐᓂᕆᔭᖓ ᐱᑕᖃᓪᓚᑦᑖᕐᓂᕋᖅᑕᐅᓯᒪᔪᓂᑦ ᓈᓴᖅᑕᐅᓯᒪᓂᖏᑕ (+/-) ᐃᑉᐸᒃᓴᖓᓂᑦ
ᐊᕐᕕᐊᑦ 98 98 0
ᑎᑭᕋᕐᔪᐊᖅ 15 16 1
ᑲᖏᖅᖠᓂᖅ 15 18 3
ᓴᓂᑭᓗᐊᖅ  2 2 0
ᑲᑎᖦᖢᒋᑦ   130 134 4

ᖃᐅᔨᓴᖅᓯᓂᒧᑦ ᑭᒡᓕᓯᓂᐊᖅᑕᐅᓯᒪᔪᑦ ᐅᓪᓗᒥᒧᑦ ᑎᑭᖦᖢᒍ: ᓄᕕᐱᕆ 23

ᓄᓇᓕᒃ  

ᖃᐅᔨᓴᖅᑕᐅᒐᒥ ᐱᖃᓪᓚᕆᖕᓂᕋᖅᑕᐅᕗᖅ

ᖃᐅᔨᓴᖅᑕᐅᒐᒥ ᐱᖃᙱᓐᓂᕋᕐᑕᐅᕗᖅ 
ᐊᕐᕕᐊᑦ  98 353
ᑎᑭᕋᕐᔪᐊᖅ  16 47
ᑲᖏᖅᖠᓂᖅ  18 150
ᓴᓂᑭᓗᐊᖅ 2 168
ᑲᑎᖦᖢᒋᑦ  134 718

ᐃᓄᑐᐊᒃᑯᕕᖕᒦᑦᑐᑦ ᐃᓄᐃᑦ:

ᑲᑎᖦᖢᒋᑦ (ᑕᒪᕐᒥᑦᑎᐊᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐃᓄᑐᐊᒃᑯᕖᑦ)  
ᖃᓄᐃᑦᑕᖅᑐᖅᖢᑎᒃ ᐊᐅᓪᓚᖅᓯᒪᖕᒪᖔᑕ  ᑐᔪᕐᒥᕕᖕᒦᑦᑐᑦ ᐊᓂᑦᑕᐃᓕᑎᑕᐅᔪᑦ ᓄᕕᐱᕆ 23−ᒥ ᐱᒋᐊᖅᖢᒍ
ᐋᓐᓂᐊᕐᕕᓕᐊᖅᑐᑦ 346
ᑭᒃᑯᑐᐃᓐᓇᑦ 161
ᑲᑎᖦᖢᒋᑦ 507

ᐊᐅᓪᓚᖅᐸᒃᑐᑦ ᐅᑎᖅᑎᑕᐅᓯᒪᓕᖅᑐᑦ ᖃᓄᐃᓕᖓᓂᖏᑦ:

ᐅᓪᓗᖅ ᐊᐅᓪᓚᕐᕕᒃᓴᖓ  ᖃᔅᓯᐅᓂᖏᑦ ᐊᐅᓪᓚᕐᓂᐊᖅᑐᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᐸᒃᑕᐅᑦᑕᐃᓕᕕᖕᓂᒃ
ᓄᕕᐱᕆ 21 5
ᓄᕕᐱᕆ 22 10
ᓄᕕᐱᕆ 23 64
ᓄᕕᐱᕆ 24 17
ᓄᕕᐱᕆ 25 70
ᑲᑎᖦᖢᒋᑦ 166

ᐱᑕᖃᕆᐊᖃᓪᓚᕆᒃᑐᓂᒃ ᐃᖅᑲᓇᐃᔭᖅᑎᓂᒃ ᑐᒃᓯᕋᐅᑏᑦ

ᓄᕕᐱᕆ 22−ᒥ ᐱᒋᐊᖅᖢᒍ, 9218−ᓂᒃ ᑐᒃᓯᕋᖅᑐᖃᓚᐅᖅᐳᖅ, 4311−ᖑᓪᓗᑎᒃ ᐃᖅᑲᓇᐃᔭᕆᐊᖃᓪᓚᕆᒃᑐᓄᑦ ᑐᒃᓯᕋᖅᑕᐅᔪᑦ.

ᑐᒃᓯᕋᖅᑕᐅᓯᒪᔪᑦ ᖃᓄᐃᓕᖓᓂᖏᑦ # %
ᐊᖏᖅᑕᐅᓯᒪᔪᑦ (ᐅᑯᐊᖑᕗᑦ ᐱᔭᕆᐊᖃᓪᓚᕆᒃᑐᑦ ᐊᒻᒪ ᐱᔭᕆᐊᖃᓪᓚᕆᙱᑦᑐᑦ) 6137 66.6%
ᐊᖏᖅᑕᐅᙱᑦᑐᑦ 281 3.0%
ᐅᑕᖅᑭᔪᑦ 249 2.7%
ᐊᐅᓪᓚᕐᕕᐅᔪᓐᓇᖅᑐᑦ ᐊᑐᖅᑕᐅᒐᔪᒃᑐᓄᑦ ᐊᖏᖅᑕᑦ   2551 27.7%
ᑲᑎᖦᖢᒋᑦ 9218 100%

 

 

ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ

ᑐᒃᓯᕋᐅᑎᑦ ᐅᑭᐅᖅᑕᖅᑐᒧᐊᕈᒪᔪᓄᑦ ᐃᒡᓗᓕᐅᕆᐊᖅᑐᖅᑐᓄᑦ ᐱᓕᕆᐊᒃᓴᓄᑦ ᐅᕝᕙᓘᓐᓃᑦ ᓄᓇᕗᒻᒧᑦ ᐊᐅᓪᓚᕈᒪᔪᓄᑦ ᐃᒡᓗᓕᐅᕆᐊᖅᑐᖅᑐᓄᑦ ᐱᓕᕆᐊᒃᓴᓄᑦ, ᐃᕐᙲᓐᓈᖅᑕᐅᒃᑯᑦ ᓇᓂᔭᐅᔪᓐᓇᖅᐳᖅ ᐅᕙᓂ,  CPHOconstructionrequests@gov.nu.ca

ᐃᒡᓗᓕᐅᖅᑏᑦ ᐊᓂᒍᐃᔪᑦ ᐃᓄᑐᐊᒃᑯᕕᖕᒥ ᒫᓐᓇᒧᑦ ᑎᑭᖦᖢᒍ: 2,207.

 

ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᔨᑦᑎᕋᐅᑎᖏᑦ

ᓄᑖᑦ ᐱᓕᕆᐊᒃᓴᓂᒃ ᐱᕙᓪᓕᐊᑎᑕᐅᔪᑦ/ᐱᔨᑦᑎᕋᐅᑎᓂᒃ:

Edsby ᖃᕆᑕᐅᔭᒃᑯᑦ ᐃᓕᓐᓂᐊᖅᑕᐅᔪᒃᓴᑦ ᓄᑖᙳᕆᐊᖅᓯᒪᔪᑦ:

  • ᐃᖅᑲᓇᐃᔭᖅᑎᓕᒫᑦ ᐃᓕᓐᓂᐊᖅᑎᑕᐅᒋᐊᓕᑦ ᐃᓕᓐᓂᐊᕌᓂᒃᑐᐃᓐᓇᑦ.
  • ᐃᖅᑲᓇᐃᔭᖅᑎᓕᒫᑦ ᐃᓯᕈᓐᓇᐅᑎᖏᑦ ᐊᑐᓕᖅᑎᑕᐅᕗᑦ.
  • ᐃᓕᓐᓂᐊᖅᑎᓕᒫᑦ ᐃᓯᕈᓐᓇᐅᑎᖏᑦ ᐊᐅᓪᓚᖅᑎᑕᐅᓯᒪᔪᐃᓐᓇᐅᓕᖅᑐᑦ.
  • ᐃᓕᓐᓂᐊᖅᑎᑦ ᐃᓯᕈᓐᓇᐃᑎᖏᑦ ᐱᓕᕆᐊᖑᕙᓪᓕᐊᓕᖅᑐᑦ ᐊᑐᕈᓐᓇᖅᓯᑎᑕᐅᕙᓪᓕᐊᓪᓗᑎᒃ.
  • ᐃᓕᓐᓂᐊᖅᒧᑦ ᐃᓯᕈᓐᓇᐅᑖ ᐊᑐᕈᓐᓇᖅᓯᑎᑕᐅᒃᐸᑦ, ᑭᖑᓂᐊᒍᑦ ᐊᖓᔪᖅᑳᕆᔭᐅᔫᑉ ᐃᓯᕈᓐᓇᐅᑖ ᐊᑐᓕᖅᑎᑕᐅᓇᔭᖅᖢᑎᒃ.
    • ᐊᖓᔪᖅᑳᕆᔭᐅᔪᑦ ᐊᑐᐃᓐᓇᕈᖅᑎᑦᑎᓯᒪᔪᑦ ᐃᓕᓐᓂᐊᕐᕕᖕᓄᑦ ᐃᕐᖐᓐᓈᖅᑕᐅᒃᑯᑦ ᑐᕌᕈᑎᖏᓐᓂᒃ ᐱᑎᑕᐅᔪᑑᓂᐊᖅᑐᑦ Edsby ᐃᓯᕈᓐᓇᐅᑎᒥᒃ ᐊᑐᓕᖅᑎᑕᐅᔪᒥᒃ.

 

ᓄᓇᕗᒻᒥᐅᑕᖅᑎᒍᑦ ᖃᓄᐃᙱᑦᑎᐊᕈᓯᑦᑎᓐᓄᑦ ᐅᕙᑦᑎᓐᓄᑦ ᑕᒪᐃᓐᓄᑦ ᑲᒪᒋᔭᒃᓴᕆᒐᑦᑎᒍᑦ! ᐳᐃᒍᖅᑕᐃᓕᒋᑦ: ᐊᒡᒐᑎᑦ ᐋᓪᓕᕋᐃᓪᓗ ᐅᐊᓴᖃᑦᑕᕐᓗᒋᑦ, ᖃᓂᒌᓗᐊᖅᑕᐃᓕᕙᒡᓗᓯ, ᐃᖢᐊᖅᓴᐃᔨᓄᑦ ᐅᖃᐅᔾᔪᐃᔾᔪᑕᐅᔪᓂᑦ ᓈᓚᒃᐸᒡᓗᓯ, ᐊᖏᕐᕋᖅᓯᒪᐃᓐᓇᕐᓗᑕᓗ ᖃᓂᒪᒍᑦᑕ.