ᐅᖃᓚᐅᑎᓯᐅᑏᑦ

You are here

ᓄᕙᒡᔪᐊᕐᓇᖅ-19−ᒧᑦ ᓄᓇᕗᑦ ᒐᕙᒪᖓᑕ ᓄᑖᙳᕆᐊᖅᑎᑕᖏᑦ - ᐊᐃᕆᓕ 27, 2020

ᐄᐳᕈ 27, 2020

ᓯᕗᓕᖅᑎᒥᑦ ᑐᓴᒐᒃᓴᖅ:

ᐅᓐᓄᒃᓴᒃᑯᑦ. ᓱᓕ ᓇᓗᓇᐃᖅᓯᒪᓪᓚᕆᒃᑐᓂᒃ ᑕᐃᒪᐃᓐᓇᓱᒋᔭᐅᔪᓂᒡᓘᓪᓃᑦ ᓄᕙᒡᔪᐊᕐᓇᖅ-19−ᖃᕐᓂᕐᒥᒃ ᐱᑕᖃᕐᓂᖓᓂᒃ ᓇᓗᓇᐃᓪᓚᕆᒃᓯᒪᔪᖃᙱᓚᖅ ᓄᓇᕗᒻᒥ.  ᐅᓪᓗᒥ, ᑲᑎᖦᖢᒋᑦ ᐃᓄᐃᑦ ᖃᐅᔨᓴᖅᑕᐅᔪᑦ 550-ᖑᓕᖅᑐᑦ. 227 ᒫᓐᓇ ᖃᐅᔨᓴᖅᑕᐅᔪᑦ, 323−ᓗ ᐃᓄᐃᑦ ᖃᐅᔨᓴᖅᑕᐅᔪᓐᓃᖅᖢᑎᒃ.

ᒥᓂᔅᑕ ᐃᕼᐊᓪᓗᐊᖅ ᐊᒻᒪᓗ ᓘᒃᑖᖅ ᐹᑐᓴᓐ ᑕᒪᕐᒥᒃ ᐅᓪᓗᒥ ᐅᖃᓪᓚᖕᓂᐊᖅᐴᒃ, ᑕᐃᒪᐃᓐᓂᖓᓄᓪᓗ ᓈᒻᒪᒃᑐᒥᒃ ᐱᕕᒃᓴᖃᖅᑎᑦᑐᒪᕚᒃᑲᒃ ᐊᐱᖅᑯᑎᒃᓴᖃᖅᑐᖃᓕᓚᐅᙱᓐᓂᖓᓂ. ᑖᒃᑯᐊᒃ ᐱᒋᐊᓚᐅᙱᖕᓂᖏᓐᓂ, ᐱᕕᒃᓴᖃᕐᓂᓐᓂ ᖁᔭᓕᔪᒪᕙᒃᑲ ᓄᓇᕗᒻᒥᐅᑦ ᖃᓄᓕᒫᖅ ᐱᓇᔪᖕᓂᕆᓯᒪᔭᖏᓐᓄᑦ, ᑐᙵᓇᕐᓂᖏᓐᓄᑦ, ᐅᑕᖅᑭᔪᓐᓇᑦᑎᐊᕐᓂᖏᓐᓄ, ᓴᙱᔪᓐᓇᕐᓂᖏᓐᓄᓪᓗ ᐱᓇᓱᐊᕈᓯᐅᓵᖅᑐᓂ 6−ᓂ.

ᐅᓐᓄᑦ ᑕᐅᑐᓚᐅᖅᑐᒃᓴᐅᕗᓯ ᑕᓚᕖᓴᒃᑰᖅᑐᓂᒃ ᐊᑎᖃᖅᖢᓂ ᐃᒪᓐᓇ, ᓴᙱᓂᖅᓴᐅᓂᖅ ᑲᑐᔾᔨᓗᑕ, ᑕᐃᒃᑯᐊ ᐊᑭᓕᖅᓱᖅᑕᐅᙱᖦᖢᑎᒃ ᐱᓕᕆᕙᒃᑐᑦ ᑕᕝᕙᓂ ᐃᖃᓗᖕᓂ, ᑖᒃᑯᐊᓗ ᐱᑎᑦᑎᕙᒃᖢᑎᒃ ᐅᓪᓚᕈᒻᒥᓴᒃᓴᒥᒃ ᐴᕐᒦᑦᑐᒥᒃ ᓄᑕᖅᑲᓄᑦ ᓄᓇᓕᖕᒥᐅᓄᑦ, ᖃᐅᑕᒫᑦᑎᐊᖅ ᐱᓇᓱᐊᕈᓯᕐᒥ ᐃᖅᑲᓇᐃᔭᕐᓇᒥ ᐅᓪᓛᒃᑯᑦ. ᑕᐃᒪᐃᑦᑐᓂᒃ ᐱᒋᐊᖅᑕᐅᓯᒪᔪᓂᒃ ᐱᓕᕆᐊᖃᓪᓚᕆᒍᒪᓯᒪᔪᓂᒡᓗ ᑕᐃᒪᐃᓕᐅᖅᑐᖃᖅᐸᒃᐳᖅ ᑕᒫᓂᓕᒫᖅ ᐅᑭᐅᖅᑕᖅᑐᒥ ᐊᕕᒃᓯᒪᓂᕆᔭᐅᔪᒥ. ᑭᓱᑐᐃᓐᓇᓕᒫᑦᑎᐊᑦ ᐃᓄᐃᑦ ᐱᓕᕆᐊᕆᔭᖏᑦ ᖁᔭᒋᔾᔪᑎᒋᕙᒃᑲ ᐃᑲᔪᖃᑦᑕᐅᑎᔪᒪᓪᓗᑎᒃ ᑕᒪᓐᓇ ᓄᕙᒡᔪᐊᕐᓇᖅ-19 ᐱᑕᖃᕐᓂᖓᓂ.

ᑕᒪᒃᑯᐊ ᐱᓇᒃᑕᐅᔪᑦ ᑐᑭᒋᕙᐃᑦ ᐅᑯᐊᒃ, ᐱᔨᑦᑎᕐᓂᖅ ᐊᒪᓗ ᖃᓄᖅᑑᕐᓂᖅ, ᓄᓇᓕᖕᒥᐅᑦ ᐆᒻᒪᕆᒍᓐᓇᕐᓂᖏᓐᓂᒃ ᐊᑕᐅᑦᑎᒃᑰᕈᑎᖃᕈᓐᓇᕐᓂᖏᓐᓂᒡᓗ, ᐃᓱᒪᒃᓴᖅᓯᐅᕈᑎᖃᑦᑎᐊᕈᓐᓇᕐᓂᖏᓐᓂᒡᓗ ᓇᓗᓇᖅᑐᖅᓯᐅᑲᑕᖕᓇᖅᑎᓪᓗᒍ.

ᑕᒪᔅᓯᑦᑎᐊᖅ ᖁᔭᓐᓇᒦᖑᔪᓯ, ᐃᑲᔪᖃᑦᑕᖅᓯᒪᓂᔅᓯᓐᓄ ᐱᔪᒃᓯᑎᑦᑎᕚᓪᓕᖃᑦᑕᕐᓂᔅᓯᓐᓄᓪᓗ. ᐱᒃᑯᓕᔪᒻᒪᕆᐊᓘᕗᖓ ᐃᒃᐱᒋᔭᒻᒪᕆᐊᓗᒋᓪᓗᒋᓪᓗ ᖃᓄᓕᒫᖅ ᐱᐅᓃᑦ ᑕᑯᔭᓕᒫᒃᑲ.

 

ᒥᓂᔅᑕ ᑲᒪᒋᔭᓕᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ ᓄᑖᙳᕆᐊᖅᑎᑕᖏᑦ:

ᒥᓂᔅᑕᐅᓪᓗᖓ ᑲᒪᒋᔭᒃᓴᖃᖅᑎᑕᐅᓪᓗᖓ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓂᒃ, ᓇᓗᓇᐃᕐᕕᒋᑦᑎᐊᕈᒪᕙᒃᑲ ᐊᑐᖅᑎᐅᕙᒃᑐᑦ ᑖᒃᑯᐊ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᑕᒫᓃᑉᐳᑦ ᐃᑲᔪᕈᒪᓪᓗᑎᒃ ᐃᑲᔪᖅᑐᐃᖃᑦᑕᕈᒪᓪᓗᑎᒡᓗ, ᐃᑲᔪᕈᒪᓪᓗᒋᑦ ᐊᑐᖅᑎᐅᕙᒃᑐᑦ ᑕᒪᓐᓇ ᓄᕙᒡᔪᐊᕐᓇᖅ-19 ᐊᑐᖅᑎᓪᓗᒍ.

ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐊᓯᔾᔩᔪᓐᓇᖅᑎᑦᑎᓂᐊᖅᐳᑦ ᐊᑭᓕᐅᑕᐅᔪᓐᓇᖅᑐᓂᒃ ᐃᒡᓗᓂᒃ ᐊᒻᒪ ᑮᓇᐅᔭᓕᐅᕋᓱᒃᑎᓂᑦ ᐊᑭᓕᖅᓱᐃᕙᒃᑐᓂᑦ ᑕᒪᐃᓐᓂᒃ ᑕᖅᑭᑕᒫ ᖃᐅᒻᒪᖅᑯᑎᖓᓂᒃ ᐊᑭᓖᔪᓐᓇᙱᑦᑐᓂᒃ.   ᖄᖏᐅᑎᔪᑦ ᐊᑭᓕᕆᐊᓕᖕᒥᓂᒃ ᐊᑭᓕᕆᐊᓖᑦ ᖁᔭᓈᖅᑕᐅᓂᐊᕆᕗᑦ ᐊᑭᓕᖅᓱᐃᔨᓄᑦ ᑖᓐᓇ ᐊᑐᕐᓗᒍ. ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐆᒻᒪᖅᑯᑎᓂᒃ ᓇᑲᑎᕆᖃᑦᑕᔾᔮᙱᑦᑐᑦ ᐃᓕᐅᖅᑲᐃᖃᑦᑕᔾᔮᙱᖦᖢᑎᒡᓗ ᓄᑖᓂᒃ ᑭᒡᓕᓕᖕᓂᑦ ᐆᒻᒪᖅᑯᑎᖃᖅᑎᑕᐅᔪᓂᑦ ᑭᓯᐊᓂ ᐅᖃᐅᓯᐅᒃᑲᓐᓂᓚᐅᕐᓗᓂ.  ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦᑕᐅᖅ ᐲᖅᓯᓚᐅᕆᕗᑦ ᐃᓕᐅᖅᑲᖅᑕᐅᓵᓚᐅᖅᑐᓕᒫᓂᒃ ᑭᒡᓕᓕᖕᓂᑦ ᐆᒻᒪᖅᑯᑎᖃᖅᑎᑕᐅᔪᓂᑦ.

ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐃᓕᓴᖅᓯᕗᑦ ᑕᒪᓐᓇ ᐊᒃᓱᕈᕐᓇᖅᑐᖅᓯᐅᕈᑕᐅᖕᒪᑦ ᐅᓄᖅᑐᓄᑦ ᓄᓇᕗᒻᒥᐅᓄᑦ ᐊᒻᒪ ᐃᑲᔪᖅᑐᐃᔪᒪᓪᓚᑦᑖᖅᐳᑦ ᐊᑭᓕᖅᓱᐃᔨᓂᑦ ᐊᔪᕐᓇᙱᑦᑕᕌᖓᑦ.

ᑕᖅᑭᑕᒫ ᖃᐅᒻᒪᖅᑯᑎᓯᐅᑏᑦ ᐊᑭᓕᕈᓐᓇᙱᒃᑯᕕᐅᒃ, ᐆᒻᒪᖅᑯᑎᓕᕆᔨᒃᑯᑦ ᐱᔨᑦᑎᕋᖅᑕᐅᕝᕕᖏᑦ ᑐᓴᖅᑎᑦᑐᓐᓇᖅᐸᑎᑦ ᐅᖄᓚᕝᕕᒋᓗᒋᑦ ᐅᕗᖓ 1-866-710-4200 ᐃᕐᙲᓐᓈᖅᑕᐅᒃᑯᓪᓘᓐᓃᑦ ᐅᕗᖓ CustomerCare@qec.nu.ca ᐋᖅᑭᒃᓯᖃᑎᒋᓗᒋᑦ ᐊᑭᓕᐅᑎᖕᓂᑦ ᖃᓄᖅᑑᕈᑎᒃᓴᒥᒃ.

 

ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᐅᑉ ᓄᑖᙳᕆᐊᖅᑎᑕᖏᑦ

ᑖᓐᓇ ᓄᑖᖅ, ᐃᒃᐱᒍᓱᑦᑎᐊᕐᓂᖅ ᐃᓅᖃᑎᒥᒃ ᐅᖓᓯᒃᓴᕆᐊᖃᕐᓂᕐᒥᒃ ᐃᓄᒋᐊᓄᓪᓗ ᑲᑎᑦᑐᓄᑦ ᑎᓕᓯᔾᔪᑕᐅᓯᒪᔪᖅ, ᐊᑐᓕᕐᓂᐊᖅᖢᓂᓗ ᐅᓐᓄᐊᖅ 24−ᒧᐊᖅᐸᑦ, ᐃᓇᖏᖅᓯᕗᖅ ᐃᓄᒋᐊᓂ ᑲᑎᑦᑐᓂ ᑎᓕᓯᔾᔪᑕᐅᓯᒪᔪᒥᒃ ᓴᖅᑭᑎᑕᐅᓚᐅᖅᑐᒥᒃ ᒫᑦᓯ 23, 2020−ᐅᑎᓪᓗᒍ.

ᓄᑖᖅ ᑎᓕᓯᔾᔪᑕᐅᔪᖅ ᐃᓚᓯᕗᖅ ᑐᑭᓯᓇᖅᓯᑎᑦᑎᒃᑲᓐᓂᕐᓂᕐᒥᒃ ᐃᓄᒋᐊᓂ ᑲᑎᓐᓂᕆᔭᐅᕙᒃᑐᒥᒃ ᐃᓅᖃᑎᒥᒡᓗ ᐅᖓᓯᒃᓴᕆᐊᖃᖅᐸᖕᓂᕐᒥᒃ, ᐱᑎᑦᑎᓪᓗᓂᓗ ᑐᑭᓯᓴᕋᐃᓐᓇᖅᑐᓂᒃ ᖃᓄᐃᙳᐊᕐᓂᕆᔭᐅᔪᓂᒃ ᐃᑲᔪᕐᓂᐊᖅᑐᓂᒃ ᓄᓇᕗᒻᒥᐅᓂᒃ ᐊᔪᕐᓇᙱᓐᓂᖅᓴᒃᑯᑦ ᒪᓕᒍᓐᓇᕐᓂᕐᒥᒃ ᑖᔅᓱᒥᖓ ᑎᓕᓯᔾᔪᑕᐅᔪᒥᒃ. ᐃᑲᔪᕐᓂᐊᕆᓪᓗᓂᓗᑦᑕᐅᖅ ᓇᖕᒥᓂᕆᔭᐅᔪᓂᒃ ᑐᑭᓯᐅᒪᓂᕐᒥᒃ ᖃᓄᖅ ᐋᑭᒋᐊᖅᓯᒃᑲᓐᓂᕈᓐᓇᕐᒪᖔᑕ ᐊᐅᓚᓂᕆᔭᒥᓂᒃ ᖃᐅᔨᒪᑦᑎᐊᕈᒪᓂᕐᒧᑦ ᑭᒃᑯᑐᐃᓐᓇᐃᑦ ᖃᓄᐃᙱᑦᑎᐊᕈᓐᓇᕐᓂᖏᓐᓂᒃ ᖃᓄᕐᓗ ᐊᐅᓚᐃᓐᓇᕈᓐᓇᕐᓂᐊᕐᓂᕐᒥᓂᒃ. ᑭᖑᓪᓕᖅᐹᒥᒃ, ᑕᒪᒃᑯᐊ ᐊᓯᔨᕐᓂᕆᔭᐅᔪᑦ ᐃᑲᔪᕐᓂᐊᖅᐳᑦ ᒪᓕᒐᕐᓂᒃ ᑲᔪᓯᑎᑦᑎᔨᓂᒃ ᐸᓖᓯᓂᒡᓗ ᐊᔪᕐᓇᙱᓐᓂᖅᓴᒃᑯᑦ ᑐᑭᓯᔪᓐᓇᕐᓂᕐᒥᒃ ᑐᕌᕆᔭᖓᓂᒃ ᑎᓕᓯᔾᔪᑕᐅᓯᒪᔫᑉ, ᐊᑐᕋᔭᙱᑦᑐᒃᓴᐅᔫᒐᓗᐊᒥᒃ ᐊᑐᕆᐊᖃᓕᕐᓂᖅᐸᑕ ᐊᑐᖅᑎᑦᑎᓪᓚᑦᑖᓕᕐᓗᑎᒃ.

ᓇᓗᓇᐃᔭᐃᔪᒪᕗᖓ ᐃᓚᖏᓐᓂᒃ ᓄᑖᓂᒃ ᑐᑭᒋᔭᐅᓕᖅᑐᓂᒃ ᑐᓴᖅᑕᐅᔪᒃᓴᓂᒡᓗ ᓇᓗᓇᐃᔭᖅᑕᐅᓯᒪᔪᓂ ᑖᔅᓱᒪᓂ ᓄᑖᒥ ᑎᓕᓯᔾᔪᑎᒥ.

ᓂᕆᔭᖅᑐᕐᕖᑦ ᓚᐃᓴᖃᖅᑐᓪᓗ ᐅᐸᒃᑕᐅᔪᓐᓇᖅᐸᒃᑐᑦ ᓱᓕ ᒪᑐᓯᒪᕗᑦ. ᓂᕆᔭᖅᑐᕐᕖᑦ ᐱᑎᑦᑎᔪᓐᓇᖅᑐᑦ ᐊᓯᖔᖓᒍᑦ ᓲᕐᓗ ᐊᐃᔭᐅᔪᖃᖅᐸᒡᓗᓂ ᐊᒡᔭᖅᓯᔪᖃᖅᐸᒡᓗᓂᓘᓐᓃᑦ, ᒪᓕᑐᐊᕈᑎᒃ ᒪᓕᒋᐊᓕᖕᓂᒃ ᐃᓅᖃᑎᒥᓂᒃ ᐅᖓᓯᒃᓴᕆᐊᖃᖅᐸᖕᓂᕐᒥᒃ ᑕᐃᒪᐃᓕᐅᕐᓂᕐᒥᓂ.

ᑕᒪᕐᒥᑦᑎᐊᖅ ᓇᖕᒥᓂᕆᔭᐅᔪᑦ ᐃᓱᒪᒋᔭᐅᕙᒃᑐᑦ ᐃᓄᖕᒧᑦ ᐊᑕᐅᓯᕐᒧᑦ ᐱᔨᑦᑎᕋᖅᑎᒋᔭᐅᓪᓗᑎᒃ ᓱᓕ ᒪᑐᓯᒪᕗᑦ. ᑕᒪᒃᑯᐊ ᐃᓚᖃᖅᐳᑦ ᐅᑯᓂᖓ, ᓄᔭᓕᕆᔭᐅᓂᖅ, ᓄᔭᐅᔭᖅᑕᐅᓂᖅ, ᐃᖃᐃᓕᓴᖅᑕᐅᓂᖅ, ᐊᓯᖏᓗ ᐊᔾᔨᑲᓴᖏᓐᓂᒃ ᐱᓕᕆᐊᖃᖅᐸᒃᑐᑦ. ᐊᒻᒪᓗᒃᑲᓐᓂᖅᑕᐅᖅ, ᑭᒍᑎᓕᕆᔩᑦ, ᓂᕐᔪᑎᓄᑦ ᐃᓗᐊᖅᓴᐃᔩᑦ ᐃᓱᒪᓕᕆᔩᓪᓗ ᒪᑐᓯᒪᐃᓐᓇᕆᐊᖃᖅᐳᑦ, ᑭᓯᐊᓂ ᑐᐊᕕᕐᓇᖅᑐᖅᑕᖃᓕᕌᖓᑦ. ᓯᓚᒥ ᐱᙳᐊᕐᕕᓕᒫᑦ, ᓄᓇᓕᖕᓂᑦ ᒥᕐᖑᐃᖅᓯᕐᕕᑦ ᐊᒻᒪᓗ ᖃᐅᑕᒫᑦ ᐊᑐᖅᑕᐅᒐᔪᒃᑐᑦ ᓄᓇᕗᓕᒫᒥ ᒥᕐᖑᐃᖅᓯᕐᕕᑦ ᓱᓕᑦᑕᐅᖅ ᒪᑐᓯᒪᐃᓐᓇᕆᕗᑦ.

ᓱᓕ ᐊᑐᖅᑎᑕᐅᔪᓐᓇᕋᓗᐊᖅᖢᑎᒃ ᒪᑐᔭᐅᓂᕐᓂᒃ ᐃᓱᓕᑦᑕᕐᕕᖃᖅᑎᑕᐅᓂᕐᓂᒡᓗ, ᐅᑯᐊ ᓇᖕᒥᓂᕆᔭᐅᔪᑦ ᐱᔪᓐᓇᖅᑎᑕᐅᕗᑦ ᒪᑐᐃᙶᕈᓐᓇᖅᑎᑕᐅᓪᓗᑎᒃ: ᓇᓕᐊᑐᐃᓐᓇᖅ ᓇᖕᒥᓂᕆᔭᐅᔪᖅ ᐊᖏᓂᖓ ᓈᒻᒪᒡᓗᓂ ᑲᔪᓯᑎᑦᑎᔪᓐᓇᕐᓗᑎᒃ 2 ᒦᑕᓂᒃ ᐃᓅᖃᑎᒥᓂᒃ ᐅᖓᓯᒃᓴᕈᓐᓇᖅᐸᒡᓗᑎᒃ ᑕᕝᕙᓂ ᐃᖅᑲᓇᐃᔭᕐᕕᒋᔭᐅᔪᒥ, ᓇᖕᒥᓂᕆᔭᐅᔪᓂᓘᓐᓃᑦ ᐃᓱᓕᑦᑕᖅᑎᑦᑎᔪᓂᒃ ᑕᐃᑯᙵᖅᑐᓂᒃ ᑕᓪᓕᒪᐃᑦ ᐅᖓᑖᓅᖅᑎᑦᑕᐃᓕᒪᓪᓗᒋᑦ.  ᑖᓐᓇ ᑕᓪᓕᒪᐅᑦᑕᕆᐊᖃᕐᓂᖅ ᐊᑐᙱᓚᖅ ᓇᖕᒥᓂᕆᔭᐅᔪᓄᑦ ᐊᖏᓂᖃᖅᑐᓄᑦ
ᓇᒻᒪᒃᑐᒥᒃ ᑲᔪᓯᑎᑦᑎᔪᓐᓇᕐᓗᓂ ᐃᓅᖃᑎᒥᓂᒃ ᐅᖓᓯᒃᓴᕈᓐᓇᖅᑎᑦᑎᓗᓂ ᑕᕝᕙᓂᓕᒫᖅ ᐃᓂᒋᔭᐅᔪᓕᒫᒥ, ᓲᕐᓗ ᒪᑯᐊ, ᓂᕿᑖᕐᕖᑦ, ᐄᔭᒐᖅᑖᕐᕖᑦ, ᐊᔾᔨᑲᓴᖏᓪᓗ ᐃᓂᒋᔭᐅᔪᑦ.

ᑖᓐᓇ ᑎᓂᓯᔾᔪᑕᐅᓯᒪᔪᖅ ᐱᑎᑦᑎᕗᖅ ᑐᑭᖓᓂᒃ ᑲᑎᓐᓂᕆᔭᐅᕙᒃᑐᑦ. ᐋᖅᑭᒃᑕᐅᓯᒪᔪᓕᒫᑦ ᑭᒃᑯᑐᐃᓐᓇᓂᒃ ᑲᑎᙵᑎᑦᑎᕙᒃᑐᑦ ᑕᓪᓕᒪᑦ ᐅᖓᑖᓂ ᐃᓄᖕᓂᒃ ᓱᓕ ᐊᔪᖅᑎᑕᐅᕗᑦ. ᑕᒪᓐᓇ ᐃᓚᖃᖅᐳᖅ ᖁᙱᐊᕆᐊᖅᑐᕐᓂᕐᓂᒃ, ᓄᓇᓕᖕᓂ ᐱᓕᕆᐊᖑᕙᒃᑐᓂᒃ, ᐱᙳᐊᖅᑐᓂᒃ ᑕᑯᔭᖅᑐᕐᓂᐅᕙᒃᑐᓂᒃ ᖃᑎᖃᑎᒌᖕᓂᐅᕙᒃᑐᓂᓗ, ᓲᕐᓗ ᑲᑎᑎᑕᐅᔪᓂᒃ, ᐃᓗᕕᖅᓯᔪᓂ, ᐃᖅᑲᐅᒪᓂᕐᒧᓪᓗ ᐱᓕᕆᐊᖑᔪᓂ.

ᑕᒪᕐᒥᑦᑎᐊᖅ ᐃᓄᖕᓂᒃ ᑲᑎᙵᑎᑦᑎᕙᒃᑐᑦ, ᐅᑯᐊᓗ ᑭᒃᑯᑐᐃᓐᓇᓂᒃ ᑲᑎᑎᑦᑎᕙᒃᑐᑦ ᓇᖕᒥᓂᖅ ᐃᒡᓗᖁᑎᒋᔭᐅᔪᓂᑦ, ᑕᓪᓕᒪᑦ ᐅᖓᑖᓅᙱᑦᑐᖅ ᑐᖔᓂᓪᓘᓐᓃᑦ ᐃᓄᖃᕆᐊᖃᖅᐳᑦ. ᑕᒪᓐᓇ ᐃᓚᖃᖅᐳᖅ ᐱᙳᐊᖃᑎᒌᒃᐸᒃᑐᓂᒃ, ᐱᓕᕆᖃᑎᒌᑦ ᑲᑎᒪᓂᕆᔭᖏᓐᓂᒃ, ᓂᕆᖃᑎᒌᖕᓂᒡᓗ ᐃᓄᖕᓂᒃ ᐃᒡᓗᒥᐅᑕᐅᖃᑎᒌᙱᑦᑐᓂᒃ.

ᑖᓐᓇ ᓄᑖᖅ ᑎᓕᓯᔾᔪᑕᐅᔪᖅ ᑐᑭᖃᙱᓚᖅ ᐃᒪᓐᓇ, ᑕᒪᒃᑯᐊ ᐊᔪᓕᖅᑎᑦᑎᔾᔪᑕᐅᓯᒪᔪᑦ ᐊᑐᕈᓐᓃᖅᑎᑕᐅᕚᓪᓕᕐᓂᖏᓐᓂᒃ, ᐅᕝᕙᓘᓐᓃᑦ ᓄᓇᕗᒻᒧᑦ ᒐᕙᒪᒃᑯᑦ ᖃᐅᔨᓴᖅᓯᒃᑲᓐᓂᖅᓯᒪᓕᕐᓂᖏᓐᓂᒃ ᐊᕕᒃᓯᒪᓂᕆᔭᐅᔫᑦ ᖃᓄᐃᓕᖓᓕᕐᓂᖓᓄᑦ ᖃᓄᕐᓗ ᐊᖏᑎᒋᔪᒥᒃ ᖁᐊᖅᓵᕐᓇᖅᑐᒥᒃ ᐊᑐᖅᓯᔪᖃᕈᓐᓇᕐᒪᖔᑦ. ᐃᒪᓐᓇᐃᖔᖅᐳᕐᓕ, ᑐᑭᖏᑦ ᑖᔅᓱᒪ ᓄᑖᑉ ᑎᓕᓯᔾᔪᑕᐅᓯᒪᔫᑉ ᐋᖅᑭᒋᐊᖅᑕᐅᒃᑲᓐᓂᕐᓂᖏᓐᓂᒃ ᑐᑭᖏᑦ ᐊᑐᓕᖅᑎᑕᐅᓪᓗᑎᒃ ᐊᓯᖏᓐᓄᑦ ᐃᓂᓄᑦ ᐱᔪᓐᓇᕐᕕᖃᕐᕕᐅᔪᓄᑦ. ᑕᒪᓐᓇ ᑕᐃᒃᑯᓂᖓ ᐊᔪᓕᖅᑎᑦᑎᓯᒪᔪᓂᒃ ᐊᑐᖅᑕᐅᔭᕆᐊᓕᖕᓂᒃ ᑐᑭᓯᓇᖅᓯᑎᑦᑎᒡᕚᓪᓕᖅᖢᓂ ᐊᑕᐅᓰᓐᓇᒃᑰᓕᖅᑎᑦᑎᒃᑲᓐᓂᖅᖢᓂᓗ ᐊᑐᖅᑕᐅᓂᖏᓐᓄᑦ ᐊᑕᓪᓚᕆᒃᑎᑕᐅᓂᖏᓐᓄᓪᓗ. 

ᐃᒪᓐᓇᓪᓚᕆᐅᖁᔭᐅᕗᖅ ᓄᓇᕗᒻᒥᐅᑦ ᐃᓱᓕᑦᑕᖅᑎᑦᑎᓗᑎᒃ ᐊᐴᑎᓂᕆᕙᒃᑕᒥᓂᒃ ᐊᓯᒥᓂᒃ ᐃᓚᒋᙱᑕᒥᓂᒃ ᐃᒡᓗᒥᐅᑕᐅᖃᑎᒋᙱᓪᓗᒍᓗ.  ᓇᓕᐊᑐᐃᓐᓇᑦᑎᐊᖅ ᐃᒻᒥᑰᖅᑐᓄᑦᓄᖃᑎᒌᓂ ᑲᑎᓐᓂᕆᔭᐅᔪᖅ ᐊᑐᕐᓂᖃᕐᕕᐅᕙᒃᐳᖅ ᖁᐊᖅᓵᕐᓇᕐᓂᕐᒥᒃ, ᐱᓗᐊᙳᐊᖅᖢᓂ ᐃᓄᖕᓂᒃ ᑕᑯᒑᖓᑦᑕ ᐊᔾᔨᒌᙱᕈᓘᔭᖅᑐᓂᑦ ᐃᒡᓗᒥᐅᑕᐅᖃᑎᒌᙱᑦᑐᓂ ᑲᑎᑦᑐᖃᕌᖓᑦ. ᓄᓇᕗᒻᒥᐅᑦ ᐊᑐᐃᓐᓇᕆᐊᖃᖅᐳᑦ ᐅᔾᔨᖅᓱᕐᓂᕐᒥᒃ ᖃᖓᓕᒫᑦᑎᐊᒃᑯᑦ, ᐊᑐᖅᐸᒡᓗᑎᒃ ᐃᓅᖃᑎᒥᓂᒃ ᐅᖓᓯᒃᓴᕆᐊᖃᕐᓂᕐᒥᒃ ᐊᔪᕐᓇᙱᓐᓂᓕᒫᖓ ᒪᓕᒡᓗᒍ ᐊᒡᒐᐃᓪᓗ ᐊᒃᑐᖅᑕᐅᒐᔪᒃᑐᓪᓗ ᐊᒥᖅᑳᕈᑕᐅᓪᓗᑎᒃ ᐅᐊᓴᑦᑎᐊᖅᐸᒡᓗᒋᑦ, ᑕᐃᒪᐃᒐᔪᒡᓗᓯᓗ.

ᑕᐃᓐᓇ ᑭᖑᓂᑦᑎᓐᓂ ᑎᓕᓯᔾᔪᑕᐅᓚᐅᖅᑐᖅ ᐊᖑᒻᒪᑎᓚᐅᖅᐳᖅ ᑐᕌᕆᔭᒥᓄᑦ ᐱᔾᔪᑕᐅᔪᒧᑦ ᐱᑎᑦᑎᓂᐊᕐᓗᓂ ᐊᑐᖅᑕᐅᔭᕆᐊᓕᖕᓂᒃ ᐱᓕᕆᔾᔪᑎᓂᒃ ᐃᑲᔪᕐᓂᐊᕐᓗᓂ ᓴᐳᔾᔨᓯᒪᓂᕐᒥᒃ ᑭᒃᑯᑐᐃᓐᓇᓂᒃ ᖃᓄᐃᙱᑎᑦᑎᔪᓐᓇᕐᓂᕐᒥᒃ. ᑭᓯᐊᓂᓗᑦᑕᐅᖅ, ᓄᓇᕗᑦ ᒐᕙᒪᖓ ᐃᓕᓴᖅᓯᓚᐅᖅᐳᖅ ᐱᑎᑦᑎᔭᕆᐊᖃᕐᓂᕐᒥᓂ ᑐᑭᓯᓇᕐᓂᖅᓴᒥᒃ ᐅᖃᐅᓯᕐᓂᒃ ᑐᑭᖏᓐᓂᒡᓗ.

ᑕᒪᓐᓇ ᐱᔾᔪᑎᒋᓪᓗᒍ, ᒪᓕᒐᓕᕆᔨᒃᑯᑦ ᐱᓕᕆᖃᑎᖃᓚᐅᖅᐳᑦ ᐋᓐᓂᐊᖃᕐᓇᙱᑦᑐᓕᕆᔨᓪᓗᐊᑕᕐᒥᒃ ᐋᖅᑭᒃᓱᐃᓂᐊᖢᑎᒃ ᓄᑖᒥᒃ ᑎᓕᓯᔾᔪᑕᐅᔪᒥᒃ ᖃᐅᔨᒪᑦᑎᐊᕈᒪᓂᕐᒧᑦ ᐅᖃᐅᓯᖅᑕᖏᑦ ᓇᓗᓇᙱᑦᑎᐊᕋᓗᐊᕐᒪᖔᑕ ᑐᑭᓯᓇᕐᓗᑎᒡᓗ, ᑕᐃᒪᐃᒃᑲᓗᐊᕐᓗᑎᒃ ᑐᕌᖓᐃᓐᓇᕐᓗᑎᒃ ᐱᔾᔪᑎᒋᔭᒥᓄᑦ.

 

ᐃᓚᒋᔭᐅᓪᓗᓂ ᓄᓇᕗᑦ ᒐᕙᒪᖓᑕ ᐱᓇᔪᖕᓂᕆᔭᖏᑕ ᓴᐳᔾᔨᓯᒪᔪᒪᓪᓗᑎᒃ ᓄᓇᕗᒻᒥᐅᓂᒃ ᖁᐊᖅᓵᕐᓇᑐᐃᓐᓇᕆᐊᓕᖕᒧᑦ ᓄᕙᒡᔪᐊᕐᓇᖅ-19−ᒧᑦ, ᓄᓇᕗᒻᒥ ᒐᕙᒪᒃᑯᑦ ᐱᓕᕆᕝᕕᖏᑦ ᐊᑐᓕᖅᑎᑦᑎᕗᑦ ᐅᑯᓂᖓ:

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ

ᐃᑲᕐᕋᐃᑦ ᓄᑖᑦ: ᓄᕙᕐᔪᐊᕐᓇᐅᑉ ᒥᒃᓵᓄᑦ ᐅᖄᓚᕝᕕᒃᓴᖅ

ᐅᖃᓪᓚᖃᑎᖃᕆᐊᖃᖅᐲᑦ ᓄᕙᒡᔪᐊᕐᓇᖅ-19 ᐋᓐᓂᐊᕈᑕᐅᖃᑦᑕᖅᑐᒧᑦ ᐊᔾᔨᖏᓐᓂᑦ ᐃᒃᐱᓐᓂᐊᒍᕕᑦ, ᐅᕝᕙᓘᓐᓃᑦ ᐊᐅᓪᓚᖅᓯᒪᓚᐅᕈᕕᑦ ᓄᓇᒧᑦ ᑕᐃᑲᙶᕋᑖᖅᓯᒪᒍᕕᓪᓘᓐᓃᑦ ᐋᓐᓂᐊᔪᖅᑕᖃᐅᖅᑐᓄᑦ ᓄᓇᒥᑦ? ᐊᐱᖅᑯᑎᒃᓴᖃᖅᐲᑦ ᖃᖓᑕᓂᐅᑉ ᒥᒃᓵᓄᑦ ᓄᓇᕗᒻᒧᙵᐅᓂᐊᕐᓗᓃ, ᑕᒪᒃᑯᓄᖓᓘᓪᓃᑦ ᐅᐸᒃᑕᐅᑦᑕᐃᓕᒪᓂᕐᒧᑦ ᐃᓂᒋᔭᐅᔪᓅᑦ? ᐅᖄᓚᓗᑎᑦ 975-8601−ᒧᑦ ᐅᕝᕙᓘᓐᓃᑦ 1-888-975-8601−ᒧᑦ 10-ᒥᑦ ᐅᓪᓛᒃᑯᑦ 6-ᒧᑦ ᐅᓐᓄᒃᑯᑦ ᐅᖄᓚᕕᔅᓴᐅᔪᑦ ᐅᖃᕐᕕᖃᕈᒪᓗᓂ. ᐃᖅᑲᐅᒪᒋᔅᓯ ᑖᓐᓇ ᐅᖄᓚᕕᔅᓴᐅᑎᑕᐅᔪᖅ ᑐᕌᖓᒻᒪ ᑭᓯᐊᓂ ᐱᔭᕆᐊᖃᓪᓚᕆᑦᑐᓄᑦ − ᐊᑐᖅᑕᐅᔭᕆᐊᖃᙱᑦᑐᖅ ᑐᑭᓯᒋᐊᕈᒪᑐᐃᓐᓇᖅᑐᓄᑦ ᖃᓄᑐᐃᓐᓇᖅ.

ᐊᐱᖅᑯᑎᔅᓴᖃᕈᕕᑦ ᐅᕝᕙᓘᓐᓃᑦ ᑐᐊᕕᕐᓇᖅᑐᒃᑯᑦ ᐃᑲᔪᖅᑕᐅᔭᕆᐊᖃᕈᕕᑦ, ᐋᓐᓂᐊᕕᔅᓯᓐᓄᑦ ᐅᖄᓚᔪᓐᓇᖅᑐᑎᑦ.

ᑭᒍᑎᓕᕆᔩᑦ

ᑐᐊᕕᕐᓇᖅᑐᑐᐊᑦ ᑭᒍᑎᓕᕆᔨᒧᑦ ᐱᓕᕆᐊᖑᖃᑦᑕᕐᓂᐊᖅᐳᑦ ᓄᓇᕗᒻᒥ ᓄᓇᓕᓕᒫᓂᑦ ᐊᓯᐊᓂᒃ ᑐᓴᖅᑎᑦᑎᔪᖃᒃᑲᓐᓂᓚᐅᙱᓐᓂᖓᓂ.

ᐃᖃᓗᖕᒥᐅᑕᐅᒍᕕᑦ, ᑲᖏᖅᖠᓂᕐᒥᐅᑕᐅᒍᕕᑦ ᐃᖃᓗᑦᑑᑦᑎᐊᕐᒥᐅᑕᐅᒍᕕᓪᓘᓐᓃᑦ ᑭᒍᓯᕆᒻᒪᕆᒃᑯᕕᑦ ᐳᕕᓕᕐᓗᑎᓪᓘᓐᓃᑦ, ᖃᐅᔨᒋᐊᕈᓐᓇᖅᐳᑎᑦ ᑭᒍᑎᓕᕆᕝᕕᖕᓂᒃ ᐊᑖᓂ ᑎᑎᕋᖅᑕᐅᓯᒪᔪᓂᒃ ᐅᖃᐅᓯᕆᓗᒍᓗ ᐊᑲᐅᙱᓕᐅᕈᑎᒋᔭᐃᑦ.

  • ᐃᖃᓗᐃᑦ: ᐊᕕᒃᑐᖅᓯᒪᔪᓂ ᑭᒍᑎᓕᕆᓂᕐᒧᑦ ᐊᐅᓚᑦᑎᔨ ᕿᑭᖅᑕᓂ ᐋᓐᓂᐊᕕᖕᒥ ᐅᕙᓂ 867-975-8600 ᓇᕿᒃᑲᓐᓂᕐᓗᒍ 6206
  • ᑲᖏᖅᖠᓂᕐᒥ ᐅᕙᓂ, 867-645-2776
  • ᐃᖃᓗᒃᑑᑦᑎᐊᒥ ᐅᕙᓂ, 867-983-4171

ᐅᖄᓚᓗᑎᑦ ᑭᐅᔭᐅᙱᑉᐸᑦ, ᒪᓕᒡᓗᒋᑦ ᖃᓄᐃᓕᐅᖁᔨᔪᑦ ᓂᐱᓕᐅᖅᑕᐅᓯᒪᔪᒥ.

ᑕᐃᑯᙵᐅᑦᑕᐃᓕᒋᑦ ᑭᒍᑎᓕᕆᕝᕕᖕᒧᑦ ᐃᓂᒃᓴᓕᐅᖅᑕᐅᓯᒪᕙᒌᙱᒃᑯᕕᑦ. ᐃᓄᐃᑦ ᑕᐃᑯᙵᐅᔪᑦ ᑭᒍᑎᓕᕆᕝᕕᖕᓄᑦ ᐃᓂᒃᓴᓕᐅᖅᑕᐅᓯᒪᕙᒌᙱᑦᑐᑦ ᑕᑯᔭᐅᖃᑦᑕᔾᔮᙱᑦᑐᑦ.

ᐊᐱᕆᕙᑦᑎᒋᑦ ᑕᐃᑯᙵᐅᖃᑦᑕᖁᓪᓗᑎᑦ ᑕᑯᔭᐅᕝᕕᒃᓴᕐᓂ ᑭᖑᕙᙱᓪᓗᑎᑦ, ᑭᖑᕙᖅᑐᓂᒃ ᑲᒪᔪᓐᓇᙱᑐᐃᓐᓇᕆᐊᖃᕋᑦᑕ.

ᑕᐃᒃᑯᓄᖓ ᐃᖃᓗᖕᒥᐅᑕᐅᙱᑦᑐᓄᑦ, ᑲᖏᖅᖠᓂᕐᒥᐅᑕᐅᙱᑦᑐᓄᑦ ᐃᖃᓗᒃᑑᑦᑎᐊᒥᐅᑕᐅᙱᑦᑐᓄᓪᓘᓐᓃᑦ ᑭᒍᓯᕆᓪᓚᕆᒃᑐᓄᑦ ᐳᕕᓕᖅᓯᒪᔪᓄᓪᓘᓐᓃᑦ, ᓄᓇᔅᓯᓐᓂ ᐋᓐᓂᐊᕕᓕᐊᕐᕕᓯ ᐅᖄᓚᕝᕕᒋᓗᒍ.

ᓄᒃᑕᖅᑏᑦ

ᑲᑎᖦᖢᒋᑦ (ᑕᒪᕐᒥᑦᑎᐊᖅ ᐊᓂᑦᑕᐃᓕᔭᕆᐊᖃᖅᑐᓄᑦ ᐃᓂᖏᑦ)

ᐊᐅᓪᓚᖅᓯᒪᔫᑉ ᖃᓄᐃᑦᑑᓂᖓ

ᑐᔪᕐᒥᑎᑕᐅᔪᑦ ᐊᓂᑦᑕᐃᓕᒪᔪᓂ ᐄᐳᕈ 26-ᒥᑦ ᐱᒋᐊᖅᖢᓂ

ᐋᓐᓂᐊᕕᓕᐊᖅᑐᓄᑦ ᐊᐅᓪᓚᖅᓯᒪᔪᓄᑦ

221

ᑭᒃᑯᑐᐃᓐᓇᑦ

118

ᑲᑎᖦᖢᒋᑦ

339

 

ᐊᐅᓪᓚᖅᐸᒃᑐᑦ ᐅᑎᖅᑎᑕᐅᓂᖏᓐᓄᑦ ᖃᓄᐃᓕᖓᓂᖏᑦ:

ᐊᐅᓪᓚᕐᕕᒃᓴᖓᑕ ᐅᓪᓗᐊ

ᖃᔅᐅᓂᖏᑦ ᓄᑕᕐᓂᐊᖅᑐᑦ ᐅᐸᒃᑕᐅᑦᑕᐃᓕᒪᔪᓂᖔᕐᓗᑎᒃ

ᐊᐃᕆᓕ 24

3

ᐊᐃᕆᓕ 25

0

ᐊᐃᕆᓕ 26

14

ᐊᐃᕆᓕ 27

72

 

ᐱᕕᒡᔪᐊᓂᒃ ᐃᖅᑲᓇᐃᔭᖅᑎᓂᒃ ᐱᔪᒪᔾᔪᑕᐅᔪᑦ

ᐱᒋᐊᕐᖢᓂ ᐊᐃᐳᕈ 26−ᒥ, 743−ᓂᒃ ᑐᒃᓯᕋᖅᓯᒪᔪᖃᖅᐳᖅ, 560−ᖑᓂᖏᑦ ᐱᔭᕆᐊᖃᒻᒪᕆᒃᑐᓂᒃ ᐃᖅᑲᓇᐃᔭᖅᑎᒃ ᑐᒃᓯᕋᕈᑕᐅᓪᓗᑎᒃ.

ᑐᒃᓯᕋᕈᑕᐅᓯᒪᔪᑦ ᖃᓄᐃᓕᖓᓂᖏᑦ

#

%

ᐊᖏᖅᑕᐅᓯᒪᔪᑦ (ᐃᓚᖃᖅᐳᖅ ᐱᒻᒪᕆᐊᓗᖕᓂᑦ ᐱᒻᒪᕆᐅᓗᐊᙱᑦᑐᓂᒡᓗ)

613

82.5%

ᐊᖏᕐᑕᐅᙱᑦᑐᑦ

90

12.1%

ᐅᑕᖅᑭᔪᑦ

40

5.4%

ᑲᑎᖦᖢᒋᑦ

743

100%

 

ᒪᓕᒐᓕᕆᔨᒃᑯᓐᓂᑦ ᐱᔨᑦᑎᕋᐅᑎᑦ

ᒪᓕᒐᓕᕆᔨᒃᑯᑦ ᐱᓕᕆᖃᑎᖃᓚᐅᖅᐳᑦ ᐋᓐᓂᐊᖃᕐᓇᙱᑦᑐᓕᕆᔨᓪᓗᐊᑕᕐᒥᒃ ᐋᖅᑭᒃᓱᐃᓂᐊᖢᑎᒃ ᓄᑖᒥᒃ ᑎᓕᓯᔾᔪᑕᐅᔪᒥᒃ ᐱᔾᔪᑎᖃᕐᓗᓂ ᓄᑖᒥᒃ ᑎᓕᓯᔾᔪᑕᐅᔪᒥᒃ ᐃᓅᖃᑎᒌᓂ ᐅᖓᓯᒌᒋᐊᖃᕐᓂᕐᒥ ᐃᓄᒋᐊᓪᓗ ᑲᑎᑉᐸᖕᓂᕆᔭᖓᓐᓂᒃ, ᖃᐅᔨᒪᑦᑎᐊᕈᒪᓂᕐᒧᑦ ᐅᖃᐅᓯᖅᑕᖏᑦ ᓇᓗᓇᙱᑦᑎᐊᕋᓗᐊᕐᒪᖔᑕ ᑐᑭᓯᓇᕐᓗᑎᒡᓗ, ᑕᐃᒪᐃᓐᓂᕐᒥᓂᓗ ᑐᕌᕆᔭᒥᓄᑦ ᓱᓖᓐᓇᕐᓗᑎᒃ. ᑖᓐᓇ ᓄᑖᖅ ᑎᓕᓯᔾᔪᑕᐅᔪᖅ ᐊᓕᓕᕐᓂᐊᖅᐳᖅ ᐅᓪᓗᑐᐃᓐᓇᖅ, ᐊᐃᕆᓕ 24, 2020-ᒥ 11:59−ᒧᐊᖅᐸᑦ ᐅᓐᓄᐊᒃᑯᑦ.

ᐊᒻᒪᓗᒃᑲᓐᓂᖅᑕᐅᖅ, ᒪᓕᒐᓕᕆᔨᒃᑯᑦ ᐃᒪᓐᓇᐅᖁᔨᒐᓗᐊᖅᐳᑦ, ᐊᐱᖅᑯᑎᒃᓴᐃᑦ ᑭᐅᔾᔪᑕᐅᔪᓪᓗ ᐊᑖᓃᑦᑐᑦ ᑐᑭᓯᓇᖅᓯᑎᑦᑎᒃᑲᓐᓂᕐᓂᐊᖅᐳᑦ ᐃᑲᔪᕐᓗᑎᒡᓗ ᓄᓇᕗᒻᒥᐅᓂᒃ ᑐᑭᓯᐅᒪᑦᑎᐊᒃᑲᓐᓂᕐᓂᕐᒥᒃ ᐱᔾᔪᑎᒋᔭᖓᓂᒃ ᑕᒪᑐᒪ ᑎᓕᓯᔾᔪᑕᐅᓯᒪᔫᑉ.

ᖃᖓᕐᑯᓪᓕ ᒪᓕᒐᕐᓂᒃ ᐊᑐᖅᑎᑦᑎᔨᒻᒪᕆᒃ ᐃᒡᓗᖕᓄᑦ ᑭᒃᑯᑐᐃᓐᓇᓪᓘᓐᓃᑦ ᐃᓂᒋᕙᒃᑕᖓᓄᑦ ᐃᓯᕈᓐᓇᖅᐸ?

ᑎᓂᓯᔾᔪᑕᐅᔪᓂ ᓴᑭᖅᑭᑎᑕᐅᔪᓂᑦ ᐋᓐᓂᐊᖃᕐᓇᙱᑦᑐᓕᕆᔨᓪᓗᐊᑕᕐᒥᑦ, ᑐᑭᓯᓇᑦᑎᐊᖅᖢᓂ ᓇᓗᓇᐃᖅᓯᒪᕗᖅ ᐃᒡᓗᕐᔪᐊᕐᒧᑦ ᐊᖏᕐᕋᕆᔭᕐᓄᑦ, ᑖᓐᓇ ᐊᖏᕐᕋᕆᔭᐅᓪᓗᓂ",  ᐊᒻᒪᓗ ᑭᒃᑯᑐᐃᓐᓇᓄᑦ ᐅᐸᒃᑕᐅᔪᓐᓇᖅᐸᒃᑐᖅ, ᓲᕐᓗ ᓂᕿᓄᑦ ᓂᐅᕕᕆᐊᕐᕕᒃ.

ᑖᒃᑯᑎᒎᓇᖅ ᑎᓕᓯᓯᒪᔾᔪᑕᐅᔪᑎᒍᑦ, ᑖᓐᓇ ᐋᓐᓂᐊᖃᕐᓇᙱᑦᑐᓕᕆᔨᓪᓗᐊᑕᖅ ᐱᑎᑦᑎᓯᒪᕗᖅ ᐊᑐᖅᑎᑦᑎᓪᓚᕆᖕᓂᕐᒧᑦ ᐱᓕᕆᔨᓂᒃ ᐱᔪᓐᓇᐅᑎᖃᖅᑎᖦᖢᒋᑦ ᐃᓯᕈᓐᓇᖅᑎᖦᖢᒋᑦ ᑭᒃᑯᑐᐃᓐᓇᓄᑦ ᐃᓂᒋᔭᐅᕙᒃᑐᓂᒃ ᐱᔪᓐᓇᐅᑎᖃᙱᒃᑲᓗᐊᕐᓗᑎᒃ, ᐊᑐᖅᑎᑦᑎᓪᓚᕆᒍᒪᓂᕐᒧᓪᓗ ᑕᐃᒪᐃᓕᐅᕈᑎᖃᕐᓗᑎᒃ. 

ᑭᓯᐊᓂᓕ, ᐊᖏᕐᕋᕆᔭᕐᓄᑦ ᑕᒪᓐᓇ ᐱᔾᔪᑎᖃᖅᐸᑦ, ᒐᕙᒪᒃᑯᑦ ᐃᓕᓴᖅᓯᓯᒪᑦᑎᐊᖅᐳᑦ ᐱᔪᓐᓇᐅᑎᖕᓂᒃ, ᒪᓕᒋᐊᖃᓪᓚᕆᖕᓂᖏᓐᓂᒡᓗ ᐊᑐᖅᑎᑦᑎᓪᓚᕆᖕᓂᕐᒧᑦ ᐱᓕᕆᔩᑦ ᐊᔪᕐᓇᙱᓐᓂᓕᒫᖓᒍᑦ ᐃᒃᐱᒋᔭᖃᑦᑎᐊᕐᓂᐊᖅᖢᑎᒃ ᑖᒃᑯᓂᖓ ᐱᔪᓐᓇᐅᑎᒋᔭᐅᔪᓂᒃ. ᒪᓕᒐᕐᓂᑦ ᐊᑐᖅᑎᑦᑎᔨ ᐅᑉᐱᕆᔭᖃᖅᐸᑦ ᐱᔾᔪᑕᐅᔪᓐᓇᖅᑐᒥᒃ ᐱᑕᖃᕐᓂᖓᓂᒃ ᐃᓯᕆᐊᖃᕐᓂᐊᕐᓗᓂ ᐃᒡᓗᖕᔪᐊᕐᓄᑦ, ᑕᐃᒪᓂ ᐃᓕᖕᓂᑦ ᐊᖏᖅᑕᐅᔭᕆᐊᖃᕋᔭᖅᐳᑦ, ᐅᕝᕙᓘᓐᓃᑦ ᐱᔪᓐᓇᐅᑎᑖᕐᓗᑎᒃ ᐃᖅᑲᖅᑐᐃᕕᓕᕆᔨᒃᑯᓐᓂᑦ.

ᑭᒃᑯᑦ ᑕᒪᒃᑯᓂᖓ ᐊᑐᖅᑕᐅᓪᓚᕆᒋᐊᖃᖅᑐᓂᒃ ᐊᑐᖅᑎᑦᑎᓪᓚᕆᒍᓐᓇᖅᐸᑦ?

ᐸᓖᓯᒃᑯᑦ ᖄᒃᑲᓐᓂᐊᒍᑦ, ᖃᐅᔨᒪᑦᑎᐊᕈᒪᓂᕐᒧᓪᓗ ᐊᔪᙱᓐᓂᖃᕋᓗᐊᕐᒪᖔᑦᑕ ᐊᑐᖅᑎᑦᑎᓪᓚᕆᖕᓂᕐᒥᒃ ᑐᐊᕕᖕᓇᖅᑐᓄᑦ ᑎᓕᓯᔾᔪᑕᐅᔪᓄᑦ, ᐋᓐᓂᐊᖃᕐᓇᙱᑦᑐᓕᕆᔨᓪᓗᐊᑕᖅ ᐱᔪᓐᓇᐅᑎᑖᖅᑎᑦᑎᓯᒪᕗᖅ ᑕᒪᐃᓐᓂᑦᑎᐊᖅ ᒪᓕᒐᕐᓂᒃ, ᒪᓕᒃᑎᑦᑎᔨᓂᒃ ᑎᓕᔭᐅᓯᒪᔪᓂᒃ ᐊᕕᒃᓯᒪᓂᐅᑉ ᒪᓕᒐᖏᑎᒍᑦ ᐊᔪᙱᓐᓂᖃᕐᓂᕐᒥᒃ ᐊᑐᖅᑎᑦᑎᓪᓚᕆᖕᓂᕐᒥᒃ ᑕᒪᒃᑯᓂᖓ ᑎᓕᔭᐅᓯᒪᔾᔪᑕᐅᔪᓂᒃ. ᐅᑯᐊᖑᓪᓗᑎᓪᓗ, ᓄᓇᓕᖕᓂ ᒪᓕᒐᕐᓂᒃ ᐊᑐᖅᑎᑦᑎᔩᑦ, ᐸᓖᓯᒋᔭᐅᔪᑦ ᓄᓇᕗᒻᒥ ᐃᖅᑲᖅᑐᐃᕕᓕᕆᔨᓄᑦ, ᐊᕙᑎᓕᕆᓂᕐᒧᑦ, ᐆᒪᔪᕐᓂᐊᖅᑏᓪᓗ.

ᐃᒪᓐᓇᐅᒐᔪᒃᑑᒐᓗᐊᖅ, ᑖᒃᑯᐊ ᐱᓕᕆᔩᑦ ᐊᑐᖅᑎᑦᑎᓪᓚᕆᒍᓐᓇᖅᐸᒃᐳᑦ ᑭᓯᐊᓂ ᓇᖕᒥᓂᑦ ᐱᖁᔭᖁᑎᒥᓂᒃ. ᑭᓯᐊᓂᓕ, ᑕᒪᒃᑯᐊ ᑐᐊᕕᕐᓇᖅᑐᒧᑦ ᑎᓕᓯᔾᔪᑕᐅᔪᑦ ᐱᓕᑦᑎᕗᑦ ᑖᑦᑯᓂᖓ ᓴᙱᓂᒃᑲᓐᓂᕐᓂᒃ. ᖃᐅᔨᒪᑦᑎᐊᕈᒪᓂᕐᒧᑦ ᑕᐃᒃᑯᐊ ᐱᔭᒃᓴᖃᖅᑎᑕᐅᔪᑦ ᓴᐳᔾᔨᓯᒪᓂᕐᒥᒃ ᖃᓄᐃᙱᑦᑎᐊᕈᓐᓇᕐᓂᖏᓐᓂᒃ ᓄᓇᕗᒻᒥᐅᑦ ᐱᑐᐃᓐᓇᕆᐊᖃᕋᓗᐊᕐᒪᖔᑕ ᑕᒪᑐᒥᖓ ᐱᓕᕆᐊᒃᓴᒥᒃ, ᐱᑎᑕᐅᓂᐊᖅᑐᑦ ᑐᑭᓯᓇᑦᑎᐊᖅᑐᓂᒃ ᒪᓕᒋᐊᓕᖕᓂᒃ ᖃᓄᐃᓕᐅᖅᑎᐅᑎᑕᐅᓂᕐᒥᓄᑦ.

ᐋᓐᓂᐊᖃᕐᓇᙱᑦᑐᓕᕆᔨᓪᓗᐊᑕᖅ ᔪᓐᓇᐅᑎᑖᖅᑎᑦᑎᓯᒪᕗᖅ ᑖᒃᑯᓂᖓ ᒪᓕᒐᕐᓂᒃ ᐱᓕᕆᔨᓂᒃ ᖃᔅᓯᑲᓪᓚᖕᓂᒃ ᐱᔾᔪᑎᖃᖅᖢᑎᒃ:

  • ᐸᓖᓯᒃᑯᑦ ᐊᑐᑐᐃᓐᓇᕆᐊᓖᑦ ᐸᓖᓯᑭᒃᓴᕐᓂᕐᒥᒃ ᑕᒪᓐᓇ ᓇᒧᙵᕈᓘᔭᖅᓯᒪᔪᖅ ᐋᓐᓂᐊᕐᓇᖅ ᐊᑐᕐᓂᖓᓂ ᐊᔪᑐᐃᓐᓇᕆᐊᖃᖅᖢᑎᒡᓗ ᑕᒪᑐᒥᖓ ᐱᓕᕆᐊᒃᓴᒃᑲᓐᓂᕐᓂᕐᒥᒃ ᐱᓕᕆᐊᖃᕆᐊᒃᓴᖅ;
  • ᑖᒃᑯᐊ ᐱᔪᓐᓇᐅᑎᖃᖅᑎᑕᐅᔪᑦ ᒪᓕᒐᖕᓂᒃ ᒪᓕᒃᑎᑦᑎᔩᑦ ᖃᐅᔨᒪᕙᒌᖅᐳᑦ  ᐊᔪᕈᓐᓃᖅᓴᖅᓯᒪᓪᓗᑎᒡᓗ ᐊᑐᖅᑎᑦᑎᓪᓚᕆᖕᓂᕐᒥᒃ ᑲᔪᓯᔾᔪᑕᐅᕙᒃᑐᓂᒃ ᐊᕕᒃᓯᒪᓂᐅᑉ ᐅᑭᐅᖅᑕᖅᑐᒥ ᒪᓕᒐᖓᑎᒎᖓᔪᓂᒃ;
  • ᑕᒪᒃᑯᐊ ᑎᓕᓯᔾᔪᑕᐅᔪᑦ ᐊᒃᑐᖅᓯᕗᑦ ᐃᓯᕈᓐᓇᕐᓂᕐᒥᒃ ᐊᕕᒃᓯᓂᕐᒥ ᐅᑭᐅᖅᑕᖅᑐᒥ ᐃᓯᕈᓐᓇᕐᓂᕐᒧᑦ ᐊᓯᖏᓐᓄᓪᓗ ᓄᓇᒥ ᐱᓕᕆᐊᖑᕙᒃᑐᓄᑦ, ᑕᒪᒃᑯᓇᓂᓗ ᑕᒪᒃᑯᐊ ᐆᒪᔪᕐᓂᐊᖅᑏᑦ ᓯᕗᓪᓕᖅᐸᐅᒐᔪᒃᐸᒃᖢᑎᒃ ᖃᐅᔨᒋᐊᕐᕕᐅᖅᑳᖅᐸᒃᖢᑎᒃ; ᐊᒻᒪᓗ
  • ᓄᓇᓕᖕᓂ ᐱᖁᔭᕐᓂᑦ ᐱᓕᕆᕙᒃᑐᑦ ᐱᓕᕆᖃᑦᑕᖅᓯᒪᕗᑦ ᑐᓂᓯᕙᒃᖢᑎᒃ ᑐᓂᔭᐅᔭᕆᐊᖃᖅᐸᒃᑐᓂᒃ ᓄᓇᓖᑦ ᐱᖁᔭᕋᓛᖏᑎᒍᑦ , ᐃᓕᓴᕆᔭᐅᓪᓗᑎᒡᓗ ᑎᒥᐅᓂᖏᓐᓂᒃ ᐊᑐᖅᑎᑦᑎᓪᓚᕆᒍᓐᓇᖅᖢᑎᒃ ᓄᓇᕗᒻᒥ ᓄᓇᓕᖕᓂ.

ᐋᓐᓂᐊᖃᕐᓇᙱᑦᑐᓕᕆᔨᓪᓗᐊᑕᖅ ᐱᓕᕆᖃᑎᖃᖅᐳᖅ ᐱᓕᕆᔨᓂᒃ ᐸᒡᓕᓯᒃᑯᓐᓂ, ᓄᓇᕗᑦ ᒐᕙᒪᒃᑯᖏᓐᓂ ᓄᓇᓖᓪᓗ ᕼᐋᒻᓚᖏᓐᓂ ᖃᐅᔨᒪᑦᑎᐊᕈᒪᒧᑦ ᐊᔾᔨᒌᓂᒃ ᑐᓴᖅᑎᑕᐅᖃᑦᑕᕋᓗᐊᕐᒪᖔᑕ ᐊᑐᖅᑎᑕᐅᖃᑦᑕᕋᓗᐊᕐᒪᐋᑕᓗ ᑕᒫᓂᓕᒫᖅ ᐅᑭᐅᖅᑕᖅᑐᒥ ᐊᕕᒃᓯᒪᓂᕐᒥ.

ᖃᓄᐃᓕᐅᕆᐊᖃᖅᐳᖓ ᐃᓱᒫᓘᑎᖃᕈᒪ ᑕᒪᒃᑯᐊ ᑎᓕᓯᔾᔪᑕᐅᓯᒪᔪᑦ ᒪᓕᒃᑕᐅᙱᑉᐸᑕ?

ᓄᓇᔅᓯᓐᓂ ᐸᓖᓯᓯ ᐃᑲᔪᕈᓐᓇᖅᐳᑦ ᐊᑐᖅᑕᐅᓪᓗᐊᖅᖢᑎᒡᓗ ᓯᕗᓪᓕᖅᐸᐅᓗᑎᒃ ᖃᐅᔨᒋᐊᕐᕕᐅᔪᓐᓇᕐᓗᑎᒃ. ᐃᓱᒫᓘᑎᖃᕈᕕᑦ, ᖃᐅᔨᒋᐊᕐᕕᒋᓗᒋᑦ ᓄᓇᔅᓯᓐᓂ ᐸᓖᓯᓯ.

ᓯᕗᒻᒧᐊᖅᐸᓪᓕᐊᓂᑦᑎᓐᓂ, ᓇᐅᑦᑎᖅᓱᖅᓯᓐᓇᕐᓂᐊᖅᐳᒍᑦ, ᐊᓯᔾᔨᖅᓯᕙᒡᓗᑕᓗ, ᕿᒥᕐᕈᐊᖅᓯᒃᑲᓐᓂᖅᐸᒡᓗᑕᓗ ᑕᒪᒃᑯᓂᖓ ᑎᓕᓯᔾᔪᑕᐅᓯᒪᔪᓂᒃ ᑕᐃᒪᐃᑦᑕᕆᐊᖃᕌᖓᑦ.   ᐊᑐᖅᑕᕗᑦ ᓇᓕᒧᒃᓱᖅᑎᑕᐅᓂᐊᖅᐳᑦ ᐱᔭᕆᐊᓕᖕᒧᑦ ᐅᑖᕆᔭᕆᐊᖃᕐᓂᕐᒧᑦ ᓄᕙᒡᔪᐊᕐᓇᖅ-19−ᒥᒃ. ᐊᑐᕈᓐᓃᕈᑦᑕ ᑕᒪᑐᒪ ᐋᓐᓂᐊᕐᓇᖅᑑᑉ ᖁᐊᖅᓵᕐᓇᕐᓂᖓᓂᒃ, ᑕᐃᒪᐃᑦᑐᓂᒃ ᐊᑐᕆᐊᓕᖕᓂᒃ ᐊᑐᕆᐊᖃᔾᔭᔪᓐᓃᖅᐳᒍᑦ

 

ᓄᓇᕗᒻᒥᐅᑦ ᖃᓄᐃᙱᑦᑎᐊᕈᓐᓇᕐᓂᖏᑦ ᑕᒪᑦᑕᑦᑎᐊᖅ ᑲᒪᒋᔭᒃᓴᕆᕙᕗᑦ! ᐳᐃᒍᖅᑕᐃᓕᒋᑦ: ᐊᒡᒐᑎᑦ ᐅᐊᓴᖅᐸᒡᓗᒋᑦ ᖄᕆᔭᐅᔪᓪᓗ, ᐊᑐᖅᐸᒡᓗᑎᒃ ᑭᒃᑯᑐᐃᓐᓇᓂᒃ ᖃᓂᒃᓴᓗᐊᖅᑕᐃᓕᒪᓂᕐᒥᒃ, ᓈᓚᒃᐸᒡᓗᑎᓪᓗ ᐅᖃᐅᔾᔪᐃᔾᔪᑕᐅᔪᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᓂᑦ, ᐊᖏᕐᕋᖅᓯᒪᕙᒡᓗᑎᒡᓗ ᖃᓂᒪᔭᕌᖓᕕᑦ.