ᐅᖃᓚᐅᑎᓯᐅᑏᑦ

You are here

ᓯᕗᓕᖅᑎ ᓴᕕᑲᑖᖅ ᖁᕕᐊᓲᑎᖃᕐᐳᖅ ᓄᓇᕗᑦ ᐅᓪᓗᖓᓂ

ᔪᓚᐃ 09, 2021

ᐅᖃᐅᓯᐅᔪᑦ

ᓯᕗᓕᖅᑎ ᓴᕕᑲᑖᖅ ᖁᕕᐊᓲᑎᖃᕐᐳᖅ ᓄᓇᕗᑦ ᐅᓪᓗᖓᓂ

ᓯᕗᓕᖅᑎ ᔫ ᓴᕕᑲᑖᖅ ᐅᓪᓗᒥ ᓴᖅᑭᑦᑎᖅᑲᐅᕗᖅ ᐅᑯᓂᖓ ᐅᖃᐅᓯᒃᓴᓂᑦ:

“ᐊᒃᓱᕈᕐᓇᕐᖢᓂ ᐊᕐᕌᒎᒃᑲᓐᓂᓚᐅᕐᐳᖅ, ᓄᓇᕐᔪᐊᒥ ᖃᓂᒪᓂᓕᕆᓪᓗᑕ ᐋᖅᑭᐅᒪᑦᑎᐊᕋᓱᒃᖢᑎᒍᓪᓗ ᐊᒥᓱᑦ ᓯᕗᓪᓕᐅᔾᔭᒃᓴᑦ. ᓄᕙᒡᔪᐊᕐᓇᖅ−19 ᓄᓇᕘᒦᓕᓚᐅᕋᓗᐊᕐᒪᑦ, ᖃᔅᓯᑲᓪᓚᑦ ᓄᓇᓖᑦ ᐊᐃᑦᑐᕐᓗᕋᐅᑎᓪᓗᑎᒃ, ᐊᒻᒪ ᓄᓇᕗᒥᐅᑦ ᓴᙱᓂᖅᑎᒃ ᑕᑯᒃᓴᐅᑦᑎᐊᓕᓚᐅᖅᐳᖅ, ᐱᓇᔪᖕᓂᑎᒃ ᐊᒻᒪ ᐱᑦᑎᐊᖃᑦᑕᐅᑎᓂᑎᒃ. ᐊᒃᓱᕈᖅᖢᓯ ᐱᓕᕆᓚᐅᕐᓂᔅᓯᓐᓄᑦ ᕿᓄᐃᓵᕈᓐᓇᓚᐅᕐᓂᔅᓯᓐᓄᓪᓗ, ᖁᔭᓕᒐᓗᐊᖅᖢᖓ ᖁᔭᓕᓗᐊᖅᑰᔨᙱᒻᒪᕆᒃᑲᒪ.

ᓄᓇᕗᑦ ᒐᕙᒪᒃᑯᖏᑦ ᓱᖏᐅᑎᓴᕋᐃᓐᓂᖓ ᓇᓗᓇᕈᓐᓃᓚᐅᕐᐳᖅ ᐋᖅᑭᐅᒪᑎᑦᑎᒋᐊᓪᓚᒃᖢᑎᒃᓗ ᐊᒥᓱᒃᑲᓐᓂᕐᓂ ᓯᕗᓪᓕᐅᔾᔭᒃᓴᓂ. ᑐᐊᕕᕐᓇᖅᑐᖅᑕᖃᐃᓐᓇᓚᐅᕋᓗᐊᖅᑎᓪᓗᒍ ᑭᐅᔭᕆᐊᖃᖅᐸᒃᖢᑎᒃ ᓄᕙᒡᔪᐊᕐᓇᖅ-19−ᒧᑦ ᑭᐅᔭᐅᑲᑕᒃᑐᑦ, ᐅᐱᒋᑦᑎᐊᖅᐸᒃᑲ ᒐᕙᒪᕗᑦ ᐱᓕᕆᑦᑎᐊᖅᑐᒻᒪᕆᐊᓘᓵᕐᒪᑕ. ᓱᓕ ᐱᓕᕆᐊᒃᓴᓕᕐᔪᐊᕌᓘᔪᒍᑦ, ᑭᓯᐊᓂᓕ ᖁᓱᔪᓐᓃᖅᐹᓪᓕᖅᑐᖓ ᒫᓐᓇ ᖃᓄᐃᙱᓐᓂᖅᓴᒻᒪᕆᐊᓘᓕᕋᑦᑕ ᐅᑭᐅᑦ ᑎᓴᒪᑦ ᐊᓂᒍᖅᑐᑦ ᓇᓃᓐᓂᕆᓚᐅᖅᑕᑦᑎᓐᓂ. ᐱᓕᕆᐊᕗᑦ ᐃᖏᕐᕋᑏᓐᓇᙳᐊᖦᖤᕐᓚᕗᑦ ᐱᓕᕆᑦᑎᐊᖏᓐᓇᕐᓗᑕ ᓴᙱᒃᑎᒋᐊᖅᑏᓐᓇᕐᓗᒍᓗ ᓄᓇᕗᑦ, ᑲᑐᑎᓗᑎᒍᑦ.

ᓄᓇᕗᑦ ᐱᐅᓂᕐᐹᑦᑎᐊᖅ ᓄᓇᕐᔪᐊᒥᑦ, ᐆᒻᒪᕆᒃᑐᑦ ᐃᓄᖏᑦ, ᐅᖃᐅᓯᖏᑦ ᐃᓕᖅᑯᓯᖏᓪᓗ. ᐱᒃᑯᒍᓱᑦᑎᐊᕐᐳᖓ ᐅᓪᓗᒥ ᖃᐅᑕᒫᓪᓗ, ᑲᒪᐃᓐᓇᐅᔭᕐᖢᖓᓗ ᓄᓇᕗᒻᒥᐅᓂ ᖃᓄᐃᓕᐅᕈᓐᓇᕐᓂᑦᑎᓐᓂᑦ.

ᖁᔭᓐᓇᒦᒃ ᐃᓚᒋᔭᐅᑎᑕᐅᒐᔅᓯᙵ ᐱᕈᖅᐸᓪᓕᐊᓂᖓᓂ ᐃᑲᔪᕐᓗᖓᓗ ᐱᐅᓂᕐᓴᒥ ᓄᓇᕗᒻᒥᑦ ᐅᕙᑦᑎᓐᓄᓕᒫᖅ. ᖁᕕᐊᓱᒋᑦᑎ ᓄᓇᕗᑦ ᐅᓪᓗᖓᓂᑦ!

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑲᐃᑦ ᒪᒡᓚᐅᑦ
ᐱᕙᓪᓕᐊᔪᓄᑦ ᑎᑎᕋᖅᑎ ᓯᕗᓕᖅᑎ ᓴᕕᑲᑖᕐᒧᑦ
867-975-5059
cmacleod@gov.nu.ca