ᐅᖃᓚᐅᑎᓯᐅᑏᑦ

You are here

ᓯᕗᓕᖅᑎ ᑕᑉᑑᓇ ᒪᑐᓯᔪᖅ ᐱᔭᑦᓴᓕᐹᓗᒻᒥᑦ ᐅᐱᕐᖔᖅᒥᑦ ᑲᑎᒪᓂᕐᓂᑦ

ᐊᒐᓯ 29, 2014

ᑐᓴᕋᑦᓴᖅ

ᓴᖅᑭᖅᑕᐅᑦᓴᐅᑎᒋᒋᐊᓕᒃ

ᓯᕗᓕᖅᑎ ᑕᑉᑑᓇ ᒪᑐᓯᔪᖅ ᐱᔭᑦᓴᓕᐹᓗᒻᒥᑦ ᐅᐱᕐᖔᖅᒥᑦ ᑲᑎᒪᓂᕐᓂᑦ

ᓵᓚᑦᑕᐅᓐ, PEI (ᐊᐅᒡᒍᓯ 29, 2014) - ᓯᕗᓕᖅᑎ ᐲᑕ ᑕᑉᑑᓇ, ᐃᓚᖃᖅᓱᓂ ᐅᑭᐅᖅᑕᖅᑐᒥᑦ ᓯᕗᓕᑦᑎᓂᑦ ᐊᕕᑦᑐᖅᓯᒪᔪᓂᓪᓗ ᐃᖅᑲᓇᐃᔮᓕᓐᓂᑦ, ᐱᔭᕇᖅᑐᖅ ᐅᖃᖃᑎᒌᓐᓂᕐᒥᑦ ᐊᕐᕌᒍᑕᒫᑦ ᑲᑎᒪᔨᓂᑦ ᒐᕙᒪᑐᖃᒃᑯᓐᓂᑦ ᑲᑎᒪᓂᕐᒥᑦ ᓵᓚᑦᑕᐅᓐᒥᑦ.

ᓯᕗᓕᖅᑎ ᑕᑉᑑᓇ ᒪᑐᓯᔪᖅ ᐱᔭᑦᓴᓕᐹᓗᒻᒥᑦ ᐅᐱᕐᖔᒥᑦ ᒐᕙᒪᐅᔪᓂᑦ ᐱᓕᕆᖃᑎᒌᑦᑐᓂᑦ ᒐᕙᒪᐅᖃᑎᒌᓐᓂᑦ ᑲᑎᒪᓂᕐᒥᑦ ᑐᙵᓱᑦᑎᑦᓯᓂᕐᒥᓪᓗ ᐅᑭᐅᖅᑕᖅᑐᒥᑦ ᑮᓇᐅᔭᓕᐅᕋᓱᐊᕐᓂᕐᒧᑦ ᑲᑎᒪᔨᖏᓐᓂᑦ, ᐊᐅᓚᑦᓯᖃᑕᐅᓂᐊᖅᑐᖅ ᓄᓇᕗᒻᒥᑦ ᐃᓚᒋᔭᐅᔪᖅ ᒪᓕᒐᓕᐅᕐᕕᔾᔪᐊᕐᒥᑦ, ᓕᐅᓇ ᐊᒡᓘᒃᑲᖅ ᓯᑦᑎᒻᕙ 1-ᒥ. ᐅᐸᓐᓂᐊᕐᒥᔪᖅ ᐊᕐᕌᒍᑕᒫᑦ ᐅᑭᐅᖅᑕᖅᑐᒥᑦ ᓯᕗᓕᖅᑏᑦ ᑲᑎᒪᓂᖓᓄᑦ ᔨᐊᓗᓇᐃᕝᒥᑦ ᐱᓇᓱᐊᕈᓯᖓᓂᑦ ᓯᑦᑎᒻᕙ 3.

"ᑖᒃᑯᐊ ᑲᑎᒪᓃᑦ ᐅᖃᖃᑎᒌᓐᓃᓪᓗ ᐊᑐᐃᓐᓇᐅᑎᑦᓯᕗᑦ ᐱᕕᖃᖅᑎᑦᓯᓂᕐᒥᑦ ᓄᓇᕗᑦ ᓴᖅᑭᔮᖁᓪᓗᒍ, ᑲᑐᔾᔨᓗᑎᑦ ᐱᓕᕆᖃᑎᖃᕐᓗᑎᑦ ᑕᕝᕙᓃᑦᑐᐃᓐᓇᐅᓗᑕ ᐃᖅᑲᓇᐃᔭᖃᑎᒃᑲ ᒐᕙᒪᑐᖃᒃᑯᑦ, ᐊᕕᑦᑐᓯᒪᔪᑦ, ᐅᑭᐅᖅᑕᖅᑐᒥᐅᓗ," ᑕᑉᑑᓇ ᐅᖃᖅᑐᖅ.

ᓯᕗᓕᖅᑎ ᑕᑉᑑᓇ ᑲᑎᒪᖃᑎᖃᓚᐅᖅᑐᖅ ᑲᓇᑕᐅᑉ ᓯᕗᓕᖅᑎᖓᓂᑦ ᓯᑏᕙᓐ ᕼᐋᐳᒥᑦ ᐃᖃᓗᑦᑑᑦᑎᐊᕐᒥᑦ ᐃᓚᒋᔭᐅᑦᓱᓂ ᖁᕕᐊᓲᑎᖃᖅᑎᓪᓗᒋᑦ ᑲᓇᑕᐅᑉ ᖁᑦᑎᑐᖓᓂᑦ ᐅᑭᐅᖅᑕᖅᑐᒥᑦ ᖃᐅᔨᓴᕐᕕᒻᒥᑦ. ᐅᖃᖃᑎᒌᓚᐅᕐᒥᔫᒃ ᐃᓕᓐᓂᐊᕐᑐᓕᕆᓂᕐᒥᑦ, ᐃᓪᓗᓕᕆᓂᕐᒥᑦ ᐋᖅᑭᐅᒪᔪᓕᕆᓂᕐᒧᑦ ᐊᑐᐊᒐᖃᕆᐊᖃᕐᓂᕐᒥᑦ ᓄᓇᕗᒻᒥᑦ.

ᑲᑎᒪᓂᕐᒥᑦ ᒐᕙᒪᑐᖃᒃᑯᑦ ᑲᑎᒪᔨᖏᑦ, ᓯᕗᓕᖅᑎ ᑕᑉᑑᓇ ᐅᖃᖃᑎᖃᓚᐅᖅᑐᖅ ᐱᓕᕆᖃᑎᒋᔭᒥᓐᓂᒃ ᐊᔾᔨᐅᖏᓐᓂᖓᓂᑦ ᐃᓅᓯᓕᕆᓂᖅ ᑮᓇᐅᔭᓕᐅᕈᓐᓇᓂᕐᒧᓪᓗ ᐊᑦᓱᕈᓐᓇᖅᑑᒋᐊᖓᓂᑦ, ᐊᒻᒪ ᐱᕕᖃᖅᑎᑦᓯᓂᖓᓂᑦ ᓄᓇᕗᑦ ᑲᓇᑕᐅᑉ ᒐᕙᒪᖏᓐᓂᑦ. ᓯᕗᓕᖅᑎᐅᖃᑎᖏᓐᓂᑦ, ᓯᕗᓕᖅᑎ ᑕᑉᑑᓇ ᐃᑲᔪᖅᑐᖅᑐᖅ ᑲᓇᑕᒥᑦ ᓄᓇᖃᖅᑳᖅᓯᒪᔪᑦ ᑲᑐᔾᔨᖃᑎᒌᖏᓐᓂᑦ ᑐᑦᓯᕋᐅᑎᖃᕐᓂᕐᒥᓪᓗ ᓯᕗᒧᐊᒋᐊᖃᕐᓂᕐᒥᑦ ᑲᑎᒪᔩᑦ ᓄᓇᖃᖅᑳᖅᑐᐃᑦ, ᐃᓄᐊᖅᑕᐅᓯᒪᔪᑦ ᐊᓯᐅᓯᒪᔪᓪᓗ ᐊᕐᓇᐃᑦ. ᑕᐅᓰᖃᑦᑕᐅᑎᓂᕐᒥᑦ ᓄᖅᑲᖓᓕᕈᑕᐅᕙᑦᑐᓂᑦ ᑲᓇᑕᒥ ᐅᖃᖃᑎᖃᕐᕕᐅᓪᓚᕆᓚᐅᖅᑐᖅ ᒐᕙᒪᑐᖃᒃᑯᑦ ᑲᑎᒪᓂᖏᓐᓂᑦ. ᓄᓇᕗᑦ ᐃᑲᔪᖅᑐᖅᑐᑦ ᒫᓐᓇᓕᓴᐅᔪᓂᑦ ᑕᐅᖅᓰᖃᑎᒌᖃᑦᑕᐅᑎᓂᕐᒧᑦ ᐊᖏᕈᑎᓂᑦ, ᐃᑲᔫᑎᓂᑦ ᑐᓂᓯᒐᔭᖅᑐᒥᑦ ᓄᓇᕗᒻᒧᑦ. ᓯᕗᓕᖅᑎ ᑕᑉᑑᓇ ᐱᔾᔪᑎᒋᓗᐊᑕᖅᑕᖏᓐᓂᑦ ᐊᔾᔨᐅᖏᑦᑐᑦ ᐃᓱᒪᒋᓗᐊᕆᐊᓗᓐᓄᑦ ᐱᔾᔪᑕᐅᔪᓂᑦ ᐱᔭᕆᐊᓕᓐᓄᓪᓗ ᑮᓇᐅᔭᓕᕆᕈᑎᐅᒋᐊᓕᒻᒪᕆᓐᓄᑦ ᐱᖁᑎᕐᔪᐊᓄᑦ ᓄᓇᕗᒻᒥᑦ.

"ᒪᒃᑐᑦᑑᓂᖅᐸᐅᒻᒪᑦ ᑭᒡᒐᖅᑐᐃᕕᐅᔪᖅ ᑲᓇᑕᐅᑉ ᒐᕙᒪᖃᐅᓯᐊᓂᑦ, ᖁᔭᒋᔭᕗᑦ ᐃᑲᔪᖅᑐᖅᑕᐅᓂᕗᑦ ᑎᓕᐅᕆᔾᔪᑕᐅᔪᓂᓪᓗ ᐊᕕᑦᑐᖅᓯᒪᔪᓂᑦ ᐅᑭᐅᖅᑕᖅᑐᒥᓗ ᐱᓕᕆᔨᐅᖃᑎᑦᑎᓐᓂᑦ," ᑕᑉᑑᓇ ᐅᖃᖅᑐᖅ. "ᓱᓕᔪᖅᓴᕐᓂᖃᓪᓚᕆᖅᑐᒍᑦ ᑲᒪᒋᔭᖃᕐᓂᕐᒥᑦ ᐃᓅᓯᓕᕆᓂᖅᒥᑦ ᑮᓇᐅᔭᓕᐅᕈᓐᓇᕐᓂᕐᒧᓪᓗ ᐱᔭᕆᐊᓕᖏᓐᓂᑦ ᓄᓇᕗᒻᒥᐅᑦ ᐊᖅᑯᑕᐅᓗᓂ ᐃᓕᓐᓂᐊᕐᓂᖅ, ᑲᔪᓯᖏᓐᓇᖅᑐᒥᑦ ᐃᓕᓐᓂᐊᕐᓂᕐᒥᑦ ᐱᓕᕆᐊᑦᓴᖅᑖᕐᓂᕐᒧᓪᓗ ᐱᕕᖃᖅᓂᐅᔪᓂᑦ, ᓴᖅᑭᑎᑦᓯᓂᕐᒥᓪᓗ ᐅᔭᕋᓐᓂᐊᕐᓂᕐᒧᑦ ᐊᓯᖏᓐᓂᓪᓗ ᐃᑲᔫᑎᑦᓴᓂᑦ ᐃᑲᔪᕐᓂᐊᖅᑐᓂᑦ ᓄᓇᕗᒻᒥᑦ ᑲᔪᓯᑎᑦᓯᓂᕐᒥᑦ ᐊᑐᖅᑕᐅᔪᓂᑦ ᐊᔾᔨᖏᓐᓂᑦ ᐱᐅᓂᖅᓴᓂᓪᓘᓐᓂᑦ ᑲᓇᑕᒥᑦ ᑕᐃᒪᐃᒐᔪᑦᑐᓂᑦ."

ᐅᐱᕐᖔᖑᓕᕋᑖᒥᑦ, ᓯᕗᓕᖅᑎ ᑕᑉᑑᓇ ᑲᑎᖃᑎᖃᓚᐅᖅᑐᖅ ᐊᑯᑭᑦᑐᕐᒥᑦ ᓯᕗᓕᖅᑎᖓᓂᑦ ᐊᓖᖃ ᕼᐋᒪᑦᒥᑦ ᓅᒃᒥᑦ, ᑲᑎᒪᑎᑦᓯᓚᐅᖅᑐᑦ ᐊᑭᓐᓇᖓᓂᑦ ᓯᕗᓕᖅᑏᑦ’ ᑲᑎᒪᓂᖓᓂᑦ ᐃᖃᓗᓐᓂᑦ, ᐅᐸᓚᐅᖅᑐᑦ ᐋᓐᑎᐅᓕᕉ ᒐᕙᒪᒃᑯᖏᑕ ᑲᑎᒪᓂᖓᓄᑦ ᐱᖁᑎᕐᔪᐊᓄᑦ ᖃᐃᖁᔨᓂᕐᒧᑦ ᓯᕗᓕᖅᑎᒥᑦ ᑳᑦᓖᓐ ᐅᐃᐊᓐ.

ᑖᒃᑯᐊ ᑲᑎᒪᓃᑦ ᐱᐅᓚᕆᑦᓯᒪᔪᑦ ᐅᖃᐅᓯᖃᕐᓂᕐᒥᑦ ᓄᓇᕗᑦ ᐃᓱᒫᓘᑎᖏᓐᓂᑦ ᐱᔾᔪᑎᖏᓐᓂᓪᓗ, ᑕᑯᑦᓴᐅᑎᑦᓯᓂᕐᒥᓪᓗ ᐊᔾᔨᐅᖏᓂᑦᑎᓐᓂᑦ ᓄᓇᕗᒻᒥᑦ," ᑕᑉᑑᓇ ᐅᖃᖅᑐᖅ.

###

ᑐᓴᒐᑦᓴᕐᓄᑦ ᐅᖃᕐᕕᐅᔪᓐᓇᖅᑐᖅ:

ᓗᐊᕋᓐ ᓲᔅᑭ

ᑐᓴᐅᒪᖃᑦᑕᐅᑎᓕᕆᔨ

ᒐᕙᒪᓕᕆᔨᒃᑯᑦ

867-975-6004

lsolski@gov.nu.ca