ᐅᖃᓚᐅᑎᓯᐅᑏᑦ

You are here

ᓯᕗᓕᖅᑎ ᑕᑉᑑᓇ ᓴᖅᑭᑦᑎᕗᖅ ᓯᐊᒻᒪᒃᑎᕆᔨᓂᒃ ᐋᔩᖃᑎᒌᒃᑎᒃᓴᓂᒃ

ᐊᒃᑐᐸ 03, 2014

ᐱᕙᓪᓕᐊᔪᑦ ᓴᖅᑭᑕᐅᔪᑦ

ᐃᕐᖐᓐᓇᖅ ᓴᖅᑭᑦᑕᕆᐊᓕᒃ

ᓯᕗᓕᖅᑎ ᑕᑉᑑᓇ ᓴᖅᑭᑦᑎᕗᖅ ᓯᐊᒻᒪᒃᑎᕆᔨᓂᒃ ᐋᔩᖃᑎᒌᒃᑎᒃᓴᓂᒃ

ᐃᖃᓗᐃᑦ, ᓄᓇᕗᑦ (ᐅᑐᐱᕆ 3, 2014) – ᓯᕗᓕᖅᑎ ᐲᑕ ᑕᑉᑑᓇ ᐅᓪᓗᒥ ᑐᓴᖅᑎᑦᑎᖅᑲᐅᕗᖅ ᐱᓕᕆᔨᒋᓂᐊᓕᖅᑕᖏᓐᓂᒃ ᓯᕗᓕᖅᑎᒋᔭᐅᓗᑎᒃ ᐋᔩᖃᑎᒌᒃᑎᓄᑦ, ᓄᓇᕗᒻᒥ ᐱᒋᐊᖅᐸᓪᓕᐊᓕᖅᑎᓪᓗᒋᑦ ᓇᖕᒥᓂᖅᓱᕐᓗᑎᒃ ᐱᓕᕆᕙᓪᓕᐊᓂᐊᓕᖅᑎᓪᓗᒋᑦ. ᓴᐃᒪᓐ ᐊᕙ, ᒥᓂᔅᑕᐅᑉ ᑐᒡᓕᕆᔭᖓ ᐃᓄᓕᕆᔨᒃᑯᓐᓄᑦ ᐋᔩᖃᑎᒌᒃᑎᓂᒃ ᐊᖓᔪᖅᑳᕆᔭᐅᓂᐊᖅᐳᖅ, ᐱᓕᕆᖃᑎᖃᕐᓗᓂ ᓄᓇᕗᒻᒥ ᓇᖕᒥᓂᖃᖅᑎᐅᔪᒥᒃ ᐊᓕᒃᓯ ᐴᑲᓐ ᐊᑯᓐᓂᒻᒪᕆᐊᓗᒡᓗ ᓄᓇᕗᒻᒥ ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑎᒋᔭᐅᓚᐅᖅᑐᒥᒃ ᕌᐸᑦ ᑳᓴᓐ ᐋᔩᖃᑎᒌᒃᑎᑦᑎᔨᓄᑦ ᑐᒡᓕᕆᔭᐅᓗᓂ.

"ᑭᒡᒐᖅᑐᐃᕕᐅᔪᑦ ᓅᑕᐅᓂᖏᑦ ᑲᒪᒋᔭᒃᓴᖓᑦ ᐱᕐᔪᐊᒻᒪᕆᐊᓘᖃᑕᐅᖕᒪᑦ ᓄᓇᕘᒥ ᐊᑯᓂᐅᔪᒃᑯᑦ ᐱᕙᓪᓕᐊᓂᕆᔭᐅᔪᒧᑦ ᐊᒻᒪ ᐃᒻᒥᒃᑰᕈᓐᓇᖅᓯᔪᓐᓇᖅᓯᓗᑎᒃ ᓄᓇᕗᒥᐅᑦ," ᐅᖃᓚᐅᖅᐳᖅ ᓯᕗᓕᖅᑎ ᑕᑉᑑᓇ. "ᑖᒃᑯᐊ ᑲᑎᙵᓪᓗᑎᒃ ᐱᓕᕆᔨᒻᒪᕇᑦ ᐊᔪᙱᑦᑎᐊᖅᑐᑦ ᐊᐅᓚᑦᑎᓂᕐᒥᒃ, ᐋᔩᖃᑎᒌᖕᓂᕐᒥᒃ ᐊᒻᒪ ᓯᕗᓕᖅᑎᐅᓂᕐᒥᒃ. ᖁᓱᙱᑦᑎᐊᒻᒪᕆᒃᐳᖓ ᑖᒃᑯᐊ ᐱᓕᕆᔨᐅᓂᐊᖅᑎᓪᓗᒋᑦ ᖃᐅᔨᒪᓪᓗᖓᓗ ᓇᖕᒥᓂᖅᓱᕐᓂᖅ ᐃᖏᕐᕋᓯᕙᓪᓕᐊᑎᓪᓗᒍ ᐃᑲᔫᑕᐅᑦᑎᐊᕐᓂᐊᕋᓱᒋᓪᓗᒍ ᖃᐅᔨᒪᕐᔪᐊᕐᓂᖏᓐᓄᑦ."

ᑖᒃᑯᐊ ᑎᒃᑯᐊᖅᑕᐅᔪᑦ ᓄᓇᕗᒻᒥ ᓇᖕᒥᓂᖅᓱᕐᓂᕐᒧᑦ ᐱᓕᕆᔨᐅᓂᐊᖅᑐᑦ ᑐᑭᖃᕐᒪᑦ ᐱᓕᕆᕝᕕᐅᔪᓕᒫᑦ, ᒐᕙᒪᒃᑯᑦ ᑲᓇᑕᒥ, ᓄᓇᕗᑦ ᑐᙵᕕᒃᑯᑦ ᑎᒥᖓᑦ ᐊᒻᒪ ᒐᕙᒪᖓᒃᑯᑦ ᓄᓇᕗᒻᒥ, ᒫᓐᓇ ᐋᔩᖃᑎᒌᒃᑎᑖᑦᑎᐊᖅᑐᐊᓘᖕᒪᑕ. ᑖᓐᓇ ᑐᓴᒐᒃᓴᖅ ᓴᖅᑭᖦᖤᑕᐃᓐᓇᖅᐳᖅ ᐊᕐᕌᒍᒐᓴᕐᓄᑦ ᓯᕗᓪᓕᖅᐹᖅᓯᐅᑎᓂᒃ ᐅᖃᒪᔭᖃᑦᑖᓪᓚᓚᐅᖅᑎᓪᓗᑕ ᓇᖕᒥᓂᖅᓱᕐᓂᖅ ᐱᔾᔪᑎᒋᓪᓗᒍ, ᐊᑯᓂᐅᔪᒃᑯᑦ ᓯᕗᓪᓕᐅᔾᔭᐅᔪᒪᓯᒪᔪᖅ ᓄᓇᕗᒥᐅᓄᑦ. ᓯᕗᓂᒃᓴᑦᑎᓐᓂ ᐊᔪᖅᓴᙱᓐᓂᕆᔭᕗᑦ ᐊᓂᒍᖅᑎᑉᐸᓪᓕᐊᖃᑦᑕᖅᑕᕗᓪᓗ ᑐᓴᐅᒪᓇᖅᑐᑎᒍᑦ ᓇᖕᒥᓂᖃᕐᕕᐅᔪᒃᑯᑦ ᐃᑲᔫᑎᒃᓴᓂᒡᓗ ᐱᕙᓪᓕᐊᑎᑦᑎᓲᓄᑦ ᑐᕌᒐᑦᑎᐊᕙᒻᒪᕆᐊᓘᖕᒪᑦ ᓯᕗᒧᑦ ᐊᓪᓗᖅᑕ ᐱᓇᓱᐊᖅᑕᖓᑦᑎᒍᑦ, ᐊᒻᒪ ᓄᓇᕗᒻᒥ ᓇᖕᒥᓂᖅᓱᕐᓂᖅ ᐱᕐᔪᐊᖑᓪᓗᓂ ᐱᒋᐊᕐᓂᐅᖕᒪᑦ ᑖᔅᓱᒧᖓ ᐅᔾᔨᕆᔭᐅᓕᖅᓯᒪᔪᒧᑦ.

"ᓂᕆᐅᑦᑎᐊᖅᐳᖓ ᐱᓕᕆᖃᑎᖃᑦᑎᐊᕐᓂᐊᕋᓱᒋᓪᓗᖓ ᓇᖕᒥᓂᖅᓱᕐᓂᕐᒥᒃ ᐱᓕᕆᐊᖑᓂᐊᖅᑐᒥᒃ ᑲᓇᑕᒥ ᒐᕙᒪᒃᑯᓐᓂ ᐊᒻᒪ ᓄᓇᕗᑦ ᑐᙵᕕᒃᑯᓐᓂ," ᐅᖃᓚᐅᖅᐳᖅ ᓯᕗᓕᖅᑎ ᑕᑉᑑᓇ. "ᓇᓗᖅᑯᑎᙱᑦᑐᒍᑦ ᐱᓕᕆᕝᕕᓕᒫᑦ ᐃᓚᐅᔪᑦ ᓯᕗᒻᒧᑦ ᐃᖏᕐᕋᓯᓛᕐᓂᖏᓐᓂᒃ ᓇᓗᓇᐃᖅᓯᓗᑎᒡᓗ ᐊᖏᖃᑎᒌᕈᑎᕐᖓᐅᒥᒃ ᐱᕙᓪᓕᐊᔾᔪᑕᐅᔪᓐᓇᕋᔭᖅᑐᒥᒃ ᑭᖑᓪᓕᖅᐹᒥ ᐊᖏᖃᑎᒌᓕᕈᑦᑕ ᓇᖕᒥᓂᖅᓱᕐᓂᕐᒥᒃ ᐋᔩᖃᑎᒌᒃᑎᖃᓕᕈᑦᑕ."

###

ᑐᓴᐅᒪᔪᓕᕆᔨᒃᑯᓐᓄᑦ ᖃᐅᔨᒋᐊᕐᕕᒃᓴᖅ:

ᑮᑦ ᒪᒃᓚᐅᑦ

ᑐᓴᐅᒪᔪᓕᕆᔨᒃᑯᑦ ᑐᑭᒧᐊᒃᑎᑦᑎᔨᖓ

ᒐᕙᒪᓕᕆᔨᒃᑯᑦ

(867) 975-6049

cmacleod@gov.nu.ca

 

ᐱᓕᕆᖃᑦᑕᖅᓯᒪᓂᑯᖏᑦ

ᓴᐃᒪᓐ ᐊᕙ ᐃᓅᓚᐅᖅᓯᒪᕗᖅ ᐱᕈᖅᓴᓚᐅᖅᓯᒪᓪᓗᓂᓗ ᓄᓇᓕᕋᓛᖃᖅᐸᒃᑎᓪᓗᒋᑦ ᐃᒡᓗᓕᐅᑉ ᐅᖓᓯᒋᓗᐊᙱᑕᖓᓐᓂᒃ. ᐃᖅᑲᓇᐃᔭᖅᐸᓕᓚᐅᖅᓯᒪᖕᒪᑦ ᑕᐃᒪᙵᑦ, ᐊᔾᔨᒌᙱᑦᑐᓂᒃ ᐃᖅᑲᓇᐃᔭᖃᑦᑕᖅᓯᒪᓂᑰᔪᖅ ᓯᕗᓪᓕᖅᐹᒻᒪᕆᐅᓪᓗᓂᓗ ᒥᑦᑎᒪᑕᓕᖕᒥ ᕼᐋᒻᒪᓚᒃᑯᓐᓄᑦ ᐊᐅᓚᑦᑎᔨᒋᔭᐅᓚᐅᖅᓯᒪᓪᓗᓂ, ᐊᖓᔪᖅᑳᕆᔭᐅᓚᐅᖅᓯᒪᓪᓗᓂᓗ ᕿᑭᖅᑖᓗᖕᒥ ᐃᓄᐃᑦ ᑲᑐᔾᔨᖃᑎᒌᓄᑦ (ᒫᓐᓇ ᑕᐃᔭᐅᔪᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ), ᐊᒻᒪ ᓰᕖᓰᒃᑯᑦ ᓈᓚᐅᑎᖃᕐᕕᐊᓂ ᐅᖃᓪᓚᒃᑎᐅᓚᐅᖅᓯᒪᓪᓗᓂ/ᐊᐅᓚᑦᑎᔨᐅᓯᓐᓈᑦ, ᑭᖑᓂᐊᒍᓪᓗ ᐊᖓᔪᖅᑳᕆᔭᐅᓕᓚᐅᖅᓯᒪᓪᓗᓂ ᐊᐅᓚᑦᑎᔾᔪᑎᓄᑦ ᓰᕖᓰ ᓈᓚᐅᑎᖃᕐᕕᖕᒥ. ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑎ ᐊᑎᓕᐅᖅᑕᐅᓚᐅᖅᑎᓪᓗᒍ 1993-ᒥ, ᓴᐃᒪᓐ ᑎᒃᑯᐊᖅᑕᐅᓚᐅᖅᓯᒪᕗᖅ ᓯᕗᓕᖅᑎᓄᑦ ᑐᑭᒧᐊᒃᑎᒋᔭᐅᓕᖅᖢᓂ ᓄᓇᕗᒻᒥ ᐊᑐᓕᖅᑎᑦᑎᓂᕐᒧᑦ ᑲᑎᒪᔨᓄᑦ 1994-ᒥ. ᓯᕗᓕᖅᑎᒋᔭᐅᖏᓐᓇᓚᐅᖅᓯᒪᓪᓗᓂᓗ ᑭᓯᐊᓂ ᓄᓇᕘᑖᖅᑎᓪᓗᑕ 1999-ᒥ.

ᓴᐃᒪᓐ ᐊᔾᔨᒌᙱᑦᑐᓂᒃ ᒥᓂᔅᑕᓄᑦ ᑐᒡᓕᕆᔭᐅᖃᑦᑕᖅᓯᒪᖕᒥᔪᖅ ᓄᓇᕗᑦ ᒐᕙᒪᒃᑯᓐᓄᑦ. ᒥᓂᔅᑕᒧᓪᓗ ᑐᒡᓕᕆᔭᐅᓯᒪᓂᑰᒋᓪᓗᓂ ᖃᔅᓯᑲᓪᓛᓘᓪᓗᑎᒃ ᓄᓇᕗᑦ ᒐᕙᒪᒃᑯᓐᓄᑦ ᐅᑯᓄᖓ ᐱᓕᕆᕝᕕᐅᔪᓄᑦ: ᐊᕙᑎᓕᕆᔨᒃᑯᓐᓄᑦ (ᒫᔾᔨ 2004-ᒥ ᐊᒻᒪ ᐅᑐᐱᕆ 2008-ᒥ), ᒐᕙᒪᓕᕆᔨᒃᑯᓐᓄᑦ (ᔫᓂ 2008-ᒥ), ᐊᕙᑎᓕᕆᔨᒃᑯᓐᓄᑦ (2008-ᒥ-2010-ᒥ), ᑭᖑᓂᑦᑎᓐᓂ ᐃᓕᖅᑯᓯᓕᕆᔨᐅᓚᐅᖅᑐᓄᑦ (ᓯᑎᐱᕆ 2010-ᒥ), ᐊᒻᒪ ᐃᓄᓕᕆᔨᒃᑯᓐᓄᑦ (ᒫᔾᔨ 2014-ᒥ).

ᐊᓕᒃᓯ ᐴᑲᓐ ᑕᓗᕐᔪᐊᕐᒥᐅᑕᐅᒐᓗᐊᖅ ᒫᓐᓇ ᐃᖃᓗᒃᑑᑦᑎᐊᒥ ᓄᓇᖃᖅᑐᖅ. ᐱᓕᕆᖃᑕᐅᖃᑦᑕᖅᓯᒪᓂᑰᑦᑎᐊᖅᑐᖅ ᓄᓇᓕᖕᓂ ᐊᒻᒪ ᐃᓅᖃᑎᒌᓂᒃ ᕼᐆᑉ ᐸᐃᒥ ᐊᕐᕌᒍᑦ ᑕᓪᓕᒪᑦ ᐅᖓᑖᓄᑦ. ᑖᒃᑯᓄᖓ ᐃᓚᐅᓯᒋᐊᓚᐅᙱᓐᓂᖓᓂᒃ, ᐊᓕᒃᓯ ᐱᓕᕆᖃᑕᐅᖃᑦᑕᓚᐅᖅᐳᖅ ᖃᔅᓯᑲᓪᓛᓗᖕᓂᒃ ᓄᓇᓕᖕᓂ ᐱᕙᓪᓕᐊᔪᓕᕆᔨᓂᒃ ᐊᒻᒪ ᐆᒪᔪᓕᕆᔨᓂᒃ, ᐊᒻᒪ ᐊᕙᑎᓕᕆᓂᕐᒧᑦ ᐊᐅᓚᑦᑕᕆᐊᓕᖕᓄᑦ ᕿᑎᕐᒥᐅᓂ, ᑕᒪᐃᓐᓂᒃ ᓄᓇᕘᑉ ᐊᕕᒃᑐᖅᓯᒪᔭᖏᓐᓂᒃ ᐊᒻᒪ ᓄᓇᓕᖕᓂ ᒐᕙᒪᐅᔪᓂᒃ.

ᐊᓕᒃᓯ ᒫᓐᓇ ᑎᑎᕋᖅᑎᒋᔭᐅᔪᖅ ᑮᓇᐅᔭᓕᕆᔨᒃᑯᓐᓄᑦ ᓄᓇᑦᓯᐊᕐᒥ/ᓄᓇᕗᒻᒥ ᐅᔭᕋᖕᓂᐊᖅᑐᓕᕆᔨᒃᑯᑦ ᑲᑐᔾᔨᖃᑎᒌᓄᑦ, ᐱᓕᕆᖃᑕᐅᑦᑎᐊᖅᖢᓂᓗ ᓄᓇᕗᒻᒥ ᐅᔭᕋᖕᓂᐊᖅᑐᓕᕆᔨᑦ ᑲᑎᒪᔨᓄᑦ. ᐊᓕᒃᓯ ᑐᑭᒧᐊᒃᑎᒋᔭᐅᓕᖅᑐᖅ ᒫᓐᓇ ᓄᓇᓕᖕᓂ ᐱᔾᔪᑕᐅᕙᒃᑐᓂᒃ TMAC Resources Inc.-ᑯᓐᓄᑦ ᐱᓕᕆᐊᖑᔪᒥᒃ ᐱᓕᕆᐊᒃᓴᖃᕐᓇᖅᑐᒥᒃ ᐱᔾᔪᑎᓕᖕᓂᒃ ᐱᔪᓐᓇᐅᑎᑖᕋᓱᒃᐸᒃᑐᓂᒃ, ᐃᓄᖕᓂᒃ ᐊᒻᒪ ᓄᓇᓕᖕᓂ ᐱᓕᕆᐊᖑᕙᒃᑐᓂᒃ ᐊᒻᒪ ᓄᓇᒥᒃ ᑎᒍᒥᐊᖅᑕᐅᓂᖏᓐᓄᑦ ᐋᔩᖃᑎᒌᒃᑎᓄᑦ.

ᕌᐸᑦ ᑳᓴᓐ ᐃᓐᓇᕈᕐᓂᖓᓄᑦ ᓄᑲᖅᓯᒪᓕᖅᑐᖅ, ᑭᓯᐊᓂ ᒐᕙᒪᓕᕆᔨᒃᑯᓐᓄᑦ ᒥᓂᔅᑕᒧᑦ ᑐᒡᓕᕆᔭᐅᓚᐅᖅᑐᖅ ᓄᓇᕗᑦ ᒐᕙᒪᒃᑯᓐᓂ ᐋᑐᕚᒥᐅᑕᐅᓪᓗᓂ ᔫᓂ 2004-ᒥ ᐋᒡᒌᓯ 2011-ᒧᑦ ᑎᑭᖦᖢᒍ. ᓄᓇᕗᑦ ᒐᕙᒪᒃᑯᓐᓂ ᓯᕗᓕᖅᑎᒧᑦ ᑎᑎᕋᖅᑎᒋᔭᐅᓚᐅᖅᓯᒪᒋᕗᖅ ᓯᕗᓕᖅᑎᐅᑉ ᐊᒡᓚᕝᕕᐊᓂ, 2001-2002-ᒧᑦ ᑎᑭᖦᖢᒍ ᐊᒻᒪᒃᑲᓐᓂᖅ 2009-ᒥ ᓯᕗᓕᖅᑎᒧᑦ ᑎᑎᕋᖅᑎᐅᑲᐃᓐᓇᓚᐅᕆᓪᓗᓂ. ᐊᕐᕌᒍ 2000-ᖑᑎᓪᓗᒍ ᓄᓇᕗᒻᒥ ᐃᖅᑲᓇᐃᔭᓯᒋᐊᓚᐅᖅᓯᒪᔪᖅ, ᑐᑭᒧᐊᒃᑎᒋᔭᐅᓪᓗᓂ ᐊᑐᐊᒐᓕᕆᔨᒃᑯᓐᓄᑦ ᐸᕐᓇᐃᔨᒃᑯᓐᓄᓪᓗ, ᒐᕙᒪᓕᕆᔨᒃᑯᓐᓂ ᐃᖃᓗᖕᓂ.

ᖃᓄᐃᓕᐅᖅᑎᐅᓂᕆᔭᖓ ᓄᓇᕗᒻᒧᑦ ᐱᓕᕆᔨᓪᓚᕆᒋᔭᐅᑎᓪᓗᒍ ᐋᑐᕚᒥ, ᕌᐸᑦ ᓄᓇᕗᒻᒥ ᑭᒡᒐᖅᑐᖅᑎᐅᓚᐅᖅᐳᖅ ᑲᓇᑕᒥ ᑲᑐᔾᔨᖃᑎᒌᓄᑦ ᐅᑭᐅᖅᑕᖅᑐᒥ ᑲᑎᒪᔨᓄᑦ ᐅᑭᐅᖅᑕᖅᑐᒥ ᐱᓕᕆᔨᓪᓚᕇᑦ ᑲᑎᒪᑎᓪᓗᒋᑦ ᓄᐊᐅᐃ-ᒥ [2007-2009]-ᒥ ᐊᒻᒪ ᑎᐊᓐᒫᒃ-ᒥ [2010-2011]-ᒥ, ᐃᑲᔪᖅᓱᐃᓚᐅᖅᓯᒪᓪᓗᓂᓗ ᓯᕗᓕᖅᑎ ᐋᕆᐊᖕᒥ ᐃᓚᒋᔭᐅᓪᓗᓂ ᑲᓇᑕᒥ ᑭᒡᒐᖅᑐᖅᑎᓄᑦ ᐅᑭᐅᖅᑕᖅᑐᒥ ᑲᑎᒪᔨᑦ ᐊᖓᔪᖅᑲᐅᑎᑦ ᑲᑎᒪᑲᑕᒃᑎᓪᓗᒋᑦ 2009-ᒥ ᓅᒃ-ᒥ. ᓄᓇᕗᒻᒥ ᑭᒡᒐᖅᑐᖅᑎᒋᔭᐅᓚᐅᖅᓯᒪᖕᒥᔪᖅ ᑲᓇᑕᒥ-ᐊᕕᒃᑐᖅᓯᒪᔪᓂᒃ-ᓄᓇᕘᒥ ᐊᕕᒃᑐᖅᓯᒪᔪᓂᒃ ᑐᓴᕋᓱᒡᕕᐅᑎᓪᓗᒋᑦ ᑲᓇᑕᒥ-EU ᐊᑕᖏᖅᑕᐅᓪᓗᑎᒃ ᒪᑭᒪᔾᔪᑎᒃᓴᑦ ᐊᒻᒪ ᑕᐅᖅᓰᖃᑎᒌᒍᑎᓄᑦ ᐊᖏᕈᑎᑦ (CETA) ᐋᔩᖃᑎᒌᒍᑕᐅᑎᓪᓗᒋᑦ, ᐃᓚᐅᓚᐅᖅᓯᒪᓪᓗᓂᓗ CETA-ᑯᑦ ᐋᔩᖃᑎᒌᒃᑎᓪᓗᒋᑦ ᐋᑐᕚᒥ ᐊᒻᒪ ᐳᕋᓱᓪᔅ-ᒥ ᑲᑎᒪᑎᓪᓗᒋᑦ 6-8-ᒋᓕᖅᑕᖏᓐᓂᒃ 2010-2011-ᒥ.