ᓯᕗᓕᖅᑏᑦ ᐊᖏᖅᓯᒪᓂᖃᖅᑐᑦ ᐱᓕᕆᖃᑎᒌᓐᓂᕐᒥᑦ ᐱᕈᖅᐸᓪᓕᐊᑦᓯᐊᕐᓂᕐᒧᑦ, ᖃᓄᐃᖏᑦᓯᐊᕐᓂᕐᒧᑦ, ᓴᙱᔪᒥᓪᓗ ᐅᑭᐅᖅᑕᖅᑐᒥᑦ

ᓯᕗᓕᖅᑎ ᑳᒃᕋᓐ ᑐᙵᓱᒃᑎᑦᑎᓚᐅᖅᐳᖅ ᓯᕗᓕᖅᑎ ᐱᓚᐃ ᐊᒻᒪ ᓯᕗᓕᖅᑎ ᐊᕿᐊᕈᖅ ᐃᓅᕕᒃ, ᓄᓇᑦᓯᐊᕐᒧᑦ ᐊᕐᕌᒍᓕᒫᖅᓯᐅᒻᒥᒃ ᑲᑎᒪᓂᖏᓐᓄᑦ ᐅᑭᐅᖅᑕᖅᑐᒥ ᓯᕗᓕᖅᑏᑦ. ᓯᕗᓕᖅᑏᑦ ᖁᔭᓕᓚᐅᖅᑐᑦ ᐱᕕᖃᖅᑎᑕᐅᓂᖏᓐᓄᑦ ᐃᓅᕕᖕᒥᑦ. ᑖᓐᓇ ᓯᕗᓪᓕᖅᐹᑦᑎᐊᖑᕗᖅ ᓄᓇᑦᑎᐊᕐᒥᐅᑦ ᑲᑎᒪᑎᑦᑎᓪᓗᑎᒃ ᔭᓗᓇᐃᐅᑉ ᓯᓚᑖᓂ 2011-ᒥᓂᑦ. ᓯᕗᓕᖅᑏᑦ ᐅᖃᐅᓯᖃᓚᐅᖅᑐᑦ ᓯᕗᓪᓕᖅᐸᐅᑎᔭᐅᔪᒪᔪᓂᒃ, ᐃᓚᐅᓪᓗᑎᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ, ᐅᑭᐅᖅᑕᖅᑐᒥᑦ ᒥᐊᓂᖅᓯᓂᖅ ᐊᒻᒪᓗ ᐱᒋᔭᐅᓂᖅ, ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐱᕕᖃᕐᓂᐅᔪᑦ, ᐊᑭᑐᓗᐊᙱᖦᖢᑎᒃ, ᐱᕈᖅᐸᓪᓕᐊᓂᕐᒧᑦ ᐱᕙᓪᓕᐊᓂᖅ, ᐊᒻᒪᓗ ᐋᓐᓂᐊᖃᖅᑕᐃᓕᒪᓂᖅ ᐊᒻᒪᓗ ᖃᓄᐃᖏᑦᑎᐊᕐᓂᖅ ᐃᓄᐃᑦ ᐊᒻᒪᓗ ᓄᓇᓖᑦ.

ᐅᑭᐅᖅᑕᖅᑐᒥ ᓇᖕᒥᓂᖃᕐᓂᖅ ᐊᒻᒪ ᓴᐳᔾᔨᓂᖅ

ᓴᐳᒻᒥᓗᒋᑦ ᐅᑭᐅᖅᑕᖅᑐᑦ ᐃᑲᔪᖅᓱᕐᓗᒋᓪᓗ ᐃᓄᐃᑦ ᓄᓇᖃᖅᑐᑦ ᐱᔭᕆᐊᖃᒻᒪᕆᒃᑐᑦ ᓴᐳᒻᒥᓗᒋᑦ ᑲᓇᑕᒥᐅᓕᒫᑦ. ᑲᓇᑕᐅᑉ ᓄᓇᕐᔪᐊᓕᒫᒥ ᑭᒡᓕᒋᔭᖓ ᐅᑭᐅᖅᑕᖅᑐᒦᑉᐳᖅ.  2023−ᒥ ᖃᖓᑕᓲᒃᑯᑦ ᐊᒻᒪ ᐃᒪᕐᒥᐅᑕᑦ ᓇᓗᓇᐃᖅᑕᐅᓚᐅᖅᐳᑦ ᑲᓇᑕᒥ ᖃᖓᑕᓲᓕᕆᔨᒃᑯᓐᓂ ᐊᒻᒪ ᐃᒪᖏᓐᓂᒃ, ᐃᓚᓕᐅᔾᔭᐅᓪᓗᑎᒃ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᑦ.  ᓄᓇᕐᔪᐊᕐᒥ ᐅᔾᔨᕆᔭᐅᕙᓪᓕᐊᑎᓪᓗᒍ ᐅᑭᐅᖅᑕᖅᑐᒥ, ᐊᒻᒪᓗ ᖃᖓᑦᑎᐊᖅ ᖃᓄᐃᓐᓂᕆᔭᐅᓚᐅᖅᑐᑦ ᓇᓗᓇᐃᖅᓯᓯᒪᕗᑦ ᐊᑦᑕᕐᓇᕐᓂᖓᓂᒃ ᐊᒻᒪ ᐱᔭᕆᐊᖃᕐᓂᖏᓐᓂᒃ ᐅᓄᖅᓯᕚᓪᓕᖅᓯᒪᔪᓂᒃ ᑮᓇᐅᔭᓕᐅᕈᑕᐅᓇᓱᒃᑐᓂᒃ ᑲᓇᑕᒥ. ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᓂ ᓯᕗᓕᖅᑏᑦ ᐃᑲᔪᖅᓱᐃᖏᓐᓇᕐᓂᐊᖅᐳᑦ ᒪᕐᕉᖕᓂᒃ ᐊᑐᖃᑦᑕᕐᓂᕐᒧᑦ ᒪᑭᒪᔾᔪᑎᓂᒃ ᐊᒻᒪ ᓴᓗᒪᔪᓂᒃ ᐆᒻᒪᖅᑯᑎᓄᑦ ᐱᓕᕆᐊᖑᕙᓪᓕᐊᔪᒪᔪᓂᒃ, ᐅᑯᓂᖓᓗ ᑮᓇᐅᔭᓕᐅᕋᓱᐊᕐᓂᖅ ᑲᓇᑕᒥ ᐊᒻᒪ ᐃᓛᒃᑰᖅᑐᓂᒃ ᐱᓕᕆᔨᐅᖃᑎᖏᓐᓂᒃ.

ᓯᕗᓕᖅᑏᑦ ᑐᓴᖅᑎᑕᐅᓚᐅᖅᑐᑦ NORAD-ᑯᓐᓂᑦ ᓄᑖᕈᕆᐊᖅᑕᐅᓂᖏᓐᓂᒃ ᑲᓇᑕᐅᑉ ᐅᓇᑕᖅᑐᔅᓴᓕᕆᔨᖏᓐᓂᒃ. ᓯᕗᓕᖅᑏᑦ ᓂᕆᐅᒋᔭᖃᖅᐳᑦ ᐊᖏᔪᒻᒪᕆᖕᒥᒃ ᐃᓚᐅᑎᑦᑎᓂᕐᒥᒃ ᐱᓕᕆᖃᑎᖃᕐᓂᕐᒥᒡᓗ ᐅᑭᐅᖅᑕᖅᑐᒥ ᐊᕕᒃᓯᒪᓂᕐᓂ ᓯᕗᓕᖅᑎᒋᔭᐅᔪᓂᒃ ᓄᓇᖃᖅᑳᖅᑐᓂᒡᓗ ᒐᕙᒪᒋᔭᐅᔪᓂᒃ ᓄᑖᙳᕆᐊᖅᑎᑕᐅᓂᖓᓄᑦ ᑲᓇᑕᒥ ᓴᐳᔾᔭᐅᔾᔪᑎᓄᑦ ᐊᑐᐊᒐᕆᔭᐅᔪᖅ. ᓯᕗᓕᖅᑏᑦ ᑎᓕᐅᕆᒃᑲᓐᓂᓚᐅᖅᐳᑦ NORAD−ᑯᑦ ᓄᑖᙳᕆᐊᖅᑎᑦᑎᓂᖏᑦ ᐊᑐᖅᑕᐅᔪᓐᓇᕐᓂᖏᓐᓂᒃ ᐊᑑᑎᖃᕐᓗᑎᒃ ᐱᓕᕆᔾᔪᑕᐅᓗᑎᒃ ᒪᑭᒪᔾᔪᑎᓄᑦ ᐋᖅᑭᒋᐊᕈᑎᓄᑦ ᓄᓇᖃᖅᑳᖅᓯᒪᔪᑦ ᐃᓄᖏᓐᓄᑦ.

ᒪᑭᒪᔾᔪᑎᑦ ᐊᒻᒪ ᓱᓪᓗᑯᑖᖏᑦ

ᓄᓇᕐᔪᐊᕐᒥ ᒐᕙᒪᓕᕆᓂᖅ ᐊᓯᔾᔨᖅᐸᓪᓕᐊᑎᓪᓗᒍ ᐊᒻᒪ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᓄᑖᓂᒃ ᐊᒃᓱᕈᕐᓇᖅᑐᓂᒃ ᓴᖅᑭᑦᑎᖃᑦᑕᖅᐳᑦ ᐊᒻᒪ ᐱᕕᒃᓴᐅᔪᓐᓇᖅᑐᓂᒃ ᐅᑭᐅᖅᑕᖅᑐᒧᑦ, ᑲᓇᑕᒥ ᑕᑯᒃᓴᐅᑎᑦᑎᔭᕆᐊᖃᖅᐳᑦ ᓄᓇᕐᔪᐊᕐᒥ ᐊᖏᖅᓯᒪᓂᖏᓐᓂᒃ ᑕᒫᓂ ᐊᕕᒃᑐᖅᓯᒪᔪᓂ. ᑮᓇᐅᔭᓕᐅᕈᑕᒃᑲᓂᕋᓱᒃᑐᑦ ᒪᕐᕈᐃᓕᖅᑲᖓᔪᓂᒃ ᐊᐅᓚᔪᓐᓇᐅᑎᓂᒃ ᐊᒻᒪ ᓴᓗᒪᔪᒥᒃ ᐆᒻᒪᖅᑯᑎᑐᕐᓂᖅ ᑲᓇᑕᒥ ᐊᑦᑕᕐᓇᙱᑎᑦᑎᓂᐊᖅᐳᖅ ᐊᒻᒪ ᐊᑦᑕᕐᓇᙱᑦᑐᒦᑎᑦᑎᓗᓂ ᐃᑲᔪᖅᑐᐃᓯᓐᓈᕐᓗᑎᒃ ᓄᓇᓕᖕᓂ ᐊᒻᒪ ᓴᖅᑭᔮᖅᑎᑦᑎᓗᑎᒃ ᑮᓇᐅᔭᓕᐅᕈᑎᒃᓴᓂᒃ ᐱᕈᖅᐸᓪᓕᐊᑎᑦᑎᓂᕐᒥᒃ. ᐃᖏᕐᕋᖃᑦᑕᖅᑐᓕᕆᓂᖅ, ᐆᒻᒪᖅᑯᑎᓕᕆᓂᖅ, ᐊᒻᒪᓗ ᑐᓴᐅᒪᖃᑦᑕᐅᑎᓕᕆᓂᕐᒧᑦ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐊᒃᑐᐊᖃᑦᑕᐅᑎᔪᑦ ᑲᓇᑕᓕᒫᒧᑦ ᐱᔭᕆᐊᖃᕐᒪᑕ ᐱᕕᖃᖅᑎᑦᑎᓗᑎᒃ ᐱᕈᖅᐸᓪᓕᐊᓂᕐᒧᑦ ᐊᔾᔨᒌᙱᕈᓘᔭᖅᑐᓄᑦ ᐊᒻᒪᓗ ᖁᕝᕙᕆᐊᖅᑎᑦᑎᓂᕐᒧᑦ ᐃᓅᖃᑎᒌᓄᑦ ᐱᕙᓪᓕᐊᓂᐅᔪᓂᒃ ᐅᑭᐅᖅᑕᖅᑐᒥ.

ᒐᕙᒪᑐᖃᒃᑯᑦ ᐃᓱᒪᖕᒪᑕ ᑭᖑᓪᓕᕐᒥ ᐱᕐᔪᐊᖑᓪᓗᓂ ᑲᓇᑕᒥ ᐊᐅᓚᔪᓐᓇᐅᑎᓄᑦ ᑮᓇᐅᔭᑦ ᐊᓂᒍᖅᑕᐅᖁᓪᓗᒋᑦ ᑲᓇᑕᒥ ᒪᑭᒪᔾᔪᑎᓄᑦ ᐱᓕᕆᐊᑦ, ᓯᕗᓕᖅᑏᑦ ᓄᓇᕘᒥ ᓴᓂᕐᕙᒃᑕᐅᔪᓂᒃ ᓴᖅᑭᑦᑎᖁᔨᓚᐅᖅᐳᑦ ᐃᓕᑕᕆᔭᐅᓯᒪᔪᓂᒃ ᑮᓇᐅᔭᑎᒍᑦ ᐱᔪᓐᓇᕐᓂᕆᔭᐅᔪᓂᒃ ᐊᒻᒪ ᓯᕗᓪᓕᐅᔾᔭᐅᔪᒪᔪᓂᒃ ᐅᑭᐅᖅᑕᖅᑐᒥ ᒐᕙᒪᒋᔭᐅᔪᓂᒃ, ᐊᒻᒪ ᐊᓯᔾᔨᒐᒃᓴᐅᔪᑦ ᓴᖅᑭᓪᓗᒋᑦ ᐊᔾᔨᒋᔭᐅᙱᑦᑐᑦ ᐱᓕᕆᐊᖑᓲᑦ ᑕᒪᐃᓐᓂᒃ ᑭᒡᒐᖅᑐᐃᕕᐅᔪᓂᒃ.

ᐅᔭᕋᖕᓂᐊᒐᒃᓴᑦ ᐱᕕᒡᔪᐊᑦ

ᐅᑭᐅᖅᑕᖅᑐᖅ ᑎᒍᒥᐊᖅᑐᖅ ᐊᒥᓱᓂᒃ ᐱᒻᒪᕆᐅᔪᓂᒃ ᐅᔭᕋᕐᓂᒃ ᐱᔭᕆᐊᓕᓐᓂᒃ ᐃᑲᔪᖅᓯᕈᑕᐅᓂᐊᕐᓗᑎᒃ ᐳᔪᕐᓗᖃᑦᓯᐊᖏᑦᑐᓄᑦ ᓯᕗᓂᑦᓴᖓᓄᑦ ᑲᓇᑕᐅᑉ ᓄᓇᕐᔪᐊᓕᒫᒧᓪᓗ. ᖃᓄᖅᑑᕈᑎᓄᑦ ᑮᓇᐅᔭᓕᐅᕈᑕᐅᓇᓱᒃᑐᑦ ᓄᓇᓖᑦ ᐊᐅᓚᔪᓐᓇᐅᑎᖏᓐᓄᑦ ᐃᑲᔪᖅᑐᐃᓂᐊᕆᕗᖅᑕᐅᖅ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᓂ ᑖᒃᑯᓂᖓ ᐱᒻᒪᕆᐅᔪᓂᒃ ᐃᑲᔫᑎᒃᓴᓂᒃ ᐱᖁᓪᓗᒋᑦ ᓂᐅᕐᕈᑎᖃᕐᓂᕐᒧᑦ. ᑎᓕᐅᕆᔪᑦ ᒐᕙᒪᑐᖃᒃᑯᓐᓂ ᐱᓕᕆᖃᑎᖃᕐᓗᑎᒃ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᓂᐅᔪᓂ ᓄᓇᖃᖅᑳᖅᓯᒪᔪᓂᒃᓗ ᒐᕙᒪᓂᑦ ᐱᐅᓯᒋᐊᕐᓗᒍ ᐊᑐᐊᒐᓕᐊᑦ ᖃᐅᔨᓴᕐᓂᕐᓗ ᐊᑑᑎᖃᑦᑎᐊᕐᓂᖅ ᐅᑭᐅᖅᑕᖅᑐᒥ ᐱᖁᓪᓗᒍ ᓄᓇᓕᖕᓂ ᐊᕕᒃᑐᖅᓯᒪᓂᐅᔪᓂ ᐃᓚᐅᖃᑕᐅᔪᓐᓇᕐᓗᑎᒃ ᐱᔭᕆᐊᖃᒻᒪᕆᒃᑐᓂᒃ ᐅᔭᕋᑦᑎᐊᕙᖕᓄᑦ ᐱᕕᒃᓴᓂᑦ. ᓯᕗᓕᖅᑏᑦ ᒐᕙᒪᑐᖃᒃᑯᓐᓂᑦ ᓴᖅᑭᑦᑎᖁᔨᕗᑦ ᐅᑭᐅᖅᑕᖅᑐᒥᑦ−ᑐᕌᖓᔪᒥᑦ ᐅᔭᕋᒃᓯᐅᕐᓂᕐᒧᑦ ᑖᒃᓰᔭᕈᑕᐅᔪᓄᑦ ᐃᓚᙵᖅᓯᒋᐊᕈᑎᓂᑦ ᐃᑲᔫᑎᓂᐊᕐᓗᑎᒃ ᑖᒃᓰᔭᕈᑕᐅᔪᓄᑦ ᐊᔭᐅᕆᒋᐊᕈᑎᓄᑦ ᐅᔭᕋᖕᓂᐊᖕᓂᖕᒧᑦ, ᐊᑭᑐᓂᖏᓐᓄᑦ ᐊᐅᓚᔾᔪᑎᓄᑦ ᐊᑭᖏᑦ ᐊᕕᒃᑐᖅᓯᒪᔪᓂᑦ. ᓯᕗᓕᖅᑏᑦ ᐃᓕᓴᖅᓯᒋᕗᑦ ᐱᒻᒪᕆᐅᓂᖓᓂᒃ ᓴᐳᔾᔨᓯᒪᔭᕆᐊᖃᕐᓂᖅ ᓄᓇᖃᖅᑳᖅᑐᑦ ᐃᓅᓯᖏᓐᓂᒃ ᓇᓗᙱᑦᑎᐊᕈᒪᓂᕐᒧᓪᓗ ᐃᓕᖅᑯᓯᑐᖃᕐᓄᑦ ᐱᓕᕆᐊᖑᕙᒃᑐᑦ ᓄᖅᑲᖓᑎᑕᐅᙱᒃᑲᓗᐊᕐᒪᖔᑕ.

ᐊᑭᓕᖅᓱᒐᕐᓂᖅᑐᑦ ᐊᒻᒪ ᐃᒡᓗᐃᑦ

ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᓕᒫᑦ ᐊᑭᑦᑐᖅᐸᓪᓕᐊᕗᑦ ᐃᒡᓗᐃᑦ ᐊᑭᖏᑦ ᐊᒻᒪ ᐅᖅᓱᐊᓗᐃᑦ ᐊᑭᖏᑦ ᐱᔾᔪᑎᒋᓪᓗᒋᑦ, ᐊᕕᒃᑐᖅᓯᒪᔪᓂ ᐃᓄᒋᐊᒃᑎᒋᓂᖏᑦ ᐊᒃᓱᕈᕈᑕᐅᓕᕇᖅᖢᑎᒃ ᐃᓅᓇᓱᐊᕐᓂᕐᒧᑦ ᐊᑭᖏᓐᓄᑦ. ᓯᕗᓕᖅᑏᑦ ᐅᖃᐅᓯᖃᓚᐅᖅᑐᑦ ᖃᓄᐃᓕᐅᖅᓯᒪᓂᖏᓐᓂᑦ ᐅᖃᐅᓯᖃᕐᓂᕐᒥᑦ ᐊᑭᑐᓗᐊᖏᑦᑐᓂᑦ ᐊᑦᓱᕉᑕᐅᔪᓂᑦ ᐊᑐᖅᑕᐅᓯᒪᔪᓂᑦ ᐊᕕᑦᑐᖅᓯᒪᔪᓂᑦ, ᐃᓚᒋᔭᐅᑦᓱᓂ ᒥᑭᓪᓕᕚᓪᓕᑎᑦᓯᓂᕐᒥᑦ ᐸᐃᕆᕕᓐᓂᑦ ᐊᑭᖏᓐᓂᑦ, ᐅᓄᖅᓯᑎᑦᓯᓂᕐᒥᑦ ᐱᔪᓐᓇᕐᓂᕐᒥᑦ ᐃᓪᓗᖃᕐᓂᕐᒥᑦ ᐱᐅᓯᕚᓪᓕᑎᑦᓯᓂᕐᒥᓪᓗ ᑮᓇᐅᔭᓕᐊᓄᑦ ᐊᑦᑕᕐᓇᖅᑐᒦᑎᑦᑕᐃᓕᓂᕐᒧᑦ ᐃᑲᔫᑎᓂᑦ. ᐃᑲᔪᖅᑐᖅᑕᐅᓂᖅ ᑲᓇᑕᐅᑉ ᒐᕙᒪᒃᑯᖏᓐᓂᑦ ᐱᒻᒪᕆᐅᓯᒪᕗᖅ ᑕᒪᒃᑯᓄᖓ. ᓯᕗᓕᖅᑏᑦ ᖃᐅᔨᑎᑦᑎᓪᓗᑎᒃ ᐊᑭᑦᑐᖅᐸᓪᓕᐊᑐᐃᓐᓇᖅᑐᑦ ᐊᑭᖏᑦ ᐃᓚᖏᓐᓂ ᓄᓇᓕᖕᓂ ᐊᕕᒃᑐᖅᓯᒪᓂᐅᔪᓂ ᖃᖓᑕᓲᒃᑯᑦ ᐃᖏᕐᕋᓂᕐᒥ ᐊᒃᑐᐃᑲᐅᑎᒋᖕᒪᑕ, ᐱᓗᐊᖅᑐᒥᒃ ᓄᓇᓕᕋᓛᖑᓂᖅᓴᓂ.

ᐃᒡᓗᐃᑦ ᐊᑭᓕᖅᓱᒐᕐᓂᖅᑐᑦ ᐊᒻᒪ ᐊᑐᐃᓐᓇᐅᓂᖏᑦ ᑲᒪᒋᔭᐅᕐᔪᐊᖅᐳᑦ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᓂ.  ᓯᕗᓕᖅᑏᑦ ᐃᓚᐅᖁᔨᓚᐅᖅᑐᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ ᑲᔪᓯᑎᑦᑎᓂᕐᒧᑦ ᐊᒻᒪᓗ ᑎᑎᕋᐅᔭᕐᓂᕐᒧᑦ ᑲᓇᑕᒥ ᐃᒡᓗᓕᕆᓂᕐᒧᑦ ᖃᓄᖅᑑᕈᑎᒥᒃ ᐊᒻᒪᓗ ᐊᓯᖏᓐᓂᒃ ᑐᕌᒐᐅᔪᓂᒃ ᐱᓕᕆᐊᓂᒃ ᐅᑭᐅᖅᑕᖅᑐᕐᒥᐅᑦ ᐊᑐᐃᓐᓇᖃᖁᓪᓗᒋᑦ ᓈᒻᒪᒃᑐᓂᒃ ᐊᒻᒪᓗ ᐊᑭᑐᓗᐊᖏᑦᑐᓂᒃ ᐃᒡᓗᒃᓴᑦᑎᐊᕙᖕᓂᒃ. ᓯᕗᓕᖅᑏᑦ ᐅᖃᐅᓯᖃᓚᐅᖅᑐᑦ ᐱᔭᕆᐊᖃᕐᓂᕐᒥᑦ ᓄᓇᕗᒻᒥ ᓇᓗᓇᐃᖅᑕᐅᓯᒪᔪᓂᑦ ᑮᓇᐅᔭᖃᖅᑎᑕᐅᓂᕐᒧᑦ ᐊᑖᓂᑦ ᓄᓇᓕᕐᔪᐊᑦ, ᓄᓇᓕᕋᓛᖑᓂᖅᓴᑦ ᐅᑭᐅᖅᑕᖅᑐᒥᓪᓗ ᓄᓇᖃᖅᑳᖅᓯᒪᔪᑦ ᖃᓄᖅᑑᕈᑎᖏᓐᓂᑦ.

ᖃᓄᐃᙱᑦᑎᐊᖅᑐᑦ ᐃᓄᐃᑦ ᓄᓇᓖᓪᓗ

ᓯᕗᓕᖅᑏᑦ ᓂᕆᐅᒋᔭᖃᖅᐳᑦ ᐱᓕᕆᖃᑎᖃᕐᓂᐊᕐᓂᕐᒥᒃ ᒐᕙᒪᑐᖃᒃᑯᓐᓂᒃ ᐱᐅᓯᒋᐊᖅᑎᑦᑎᔪᒪᓪᓗᑎᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑲᒪᒋᔭᐅᓂᕐᒥᒃ ᑕᒫᓂ ᐊᕕᒃᓯᒪᓂᕆᔭᐅᔪᓂ. ᑲᓇᑕᐅᑉ ᒐᕙᒪᒃᑯᖏᓐᓂᑦ ᐃᓕᓴᖅᓯᖁᔨᕗᑦ ᐊᔾᔨᐅᖏᑦᑐᓂᒃ ᑭᓐᖒᒪᔭᐅᔪᓂᒃ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᓂᐅᔪᓄᑦ ᐊᒻᒪᓗ ᐊᑐᐃᓐᓇᐅᑎᑦᑎᓗᑎᒃ ᐊᓯᔾᔨᒐᒃᓴᐅᔪᓂᒃ ᐊᒻᒪᓗ ᓈᒻᒪᒃᑐᓂᒃ ᑮᓇᐅᔭᓂᒃ ᐱᑕᖃᕆᐊᖃᖅᑐᓂᒃ ᓯᕗᒧᐊᖁᓪᓗᒋᑦ ᐋᓐᓂᐊᖅᑐᓕᕆᓂᐅᔪᑦ ᐅᑭᐅᖅᑕᖅᑐᒥ.

ᓯᕗᓕᖅᑏᑦ ᐃᓕᓴᖅᓯᓪᓗᑎᒃ ᐱᐅᙱᑦᑐᓂᒃ ᐊᒃᑑᑎᔪᓂᒃ ᐋᖓᔮᕐᓇᖅᑐᖅᑐᖃᑦᑕᕐᓂᕐᓂ ᐅᑭᐅᖅᑕᖅᑐᒥ ᓄᓇᓕᖕᓂ, ᐅᖃᖃᑎᒌᒍᑎᓪᓗᒋᓪᓗ ᐱᓇᓱᒃᑕᑦ ᐊᑐᓂᑦ ᓄᓇᓕᐅᔪᓂᑦ ᐱᐅᓯᒋᐊᕐᓗᒍ ᐃᑲᔪᕈᑎᑦ ᐃᓱᒪᓕᕆᓂᕐᒧᑦ, ᐊᖏᒃᓕᒋᐊᕐᓗᒍ ᒪᒥᓴᐃᓂᖅ ᐋᓐᓂᖅᑎᑦᑎᑦᑕᐃᓕᓂᕐᓗ ᐱᕕᒃᓴᓂᑦ, ᐱᓕᕆᐊᕆᓗᒋᓪᓗ ᑭᒃᑯᑐᐃᓐᓇᕐᓄᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᐊᒃᑑᑎᔪᑦ ᐋᖓᔮᕐᓇᖅᑐᓄᑦ ᑕᐅᖅᓰᓂᕐᓂ. ᐊᖏᖃᑎᒌᓚᐅᖅᑐᑦ ᐃᓕᖅᑯᓯᕐᒨᖓᔪᑦ ᐱᓕᕆᐊᑦ ᐱᔨᑦᓯᕋᐅᓯᓪᓗ, ᐱᖃᓯᐅᑎᑦᓱᓂ ᐊᐅᓪᓛᕐᓗᓂ ᒪᒥᓴᕐᓂᖅ ᐱᒻᒪᕆᐅᓂᖃᕐᒪᑦ ᒪᒥᓴᕐᓂᕐᒥᑦ ᖃᓄᐃᒍᓐᓃᐸᓪᓕᐊᓂᕐᒥᓪᓗ.

ᐃᖅᑲᓇᐃᔭᖅᑐᓕᕆᓂᖅ

ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᑦ, ᐊᓯᖏᑎᑐᑦ ᑲᓇᑕᒥ, ᐃᖅᑲᓇᐃᔭᖅᑎᑭᔅᓴᑐᒻᒪᕆᐅᒻᒪᑕ.  ᐊᒃᓱᕈᕐᓇᖅᑐᑦ ᐱᓗᐊᖅᖢᑎᒃ ᐃᓚᖏᓐᓂ ᐃᖅᑲᓇᐃᔭᕐᕕᖕᓂ, ᐃᓚᐅᓪᓗᑎᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑲᒪᓂᖅ, ᐱᓗᐊᖅᑐᒥᒃ ᐃᓗᐊᖅᓴᐃᔨᑦ. ᐃᓕᑕᖅᓯᓂᕐᒥᑦ ᑮᓇᐅᔭᓕᐅᕋᓱᐊᕐᓂᕐᒧᑦ ᐱᕈᖅᐸᓪᓕᐊᓂᖅ ᑐᙵᕕᖃᖅᑐᖅ ᓴᙱᔪᒥᑦ ᐃᖅᑲᓇᐃᔮᖃᕈᓐᓇᖅᑐᓂᑦ, ᓯᕗᓕᖅᑏᑦ ᐅᖃᖃᑎᒌᓚᐅᖅᑐᑦ ᖃᓄᖅ ᐅᖃᐅᓯᖃᕐᓂᕐᒥᑦ ᑖᒃᑯᓇᖓᑦ ᐊᑦᓱᕉᑕᐅᔪᓂᑦ ᐱᓗᐊᖅᑐᒥᑦ ᐱᓕᕆᖃᑎᖃᕐᓂᒃᑯᑦ ᐊᓯᖏᓐᓂᑦ ᐊᐅᓚᑦᓯᕕᐅᔪᓂᑦ.

ᐃᓕᓐᓂᐊᕐᓂᖅ ᐊᒻᒪ ᐊᔪᕈᓐᓃᖅᓴᕐᓂᖅ

ᓴᓇᕙᓪᓕᐊᖁᓪᓗᒋᑦ ᐃᖅᑲᓇᐃᔮᒃᓴᓂᒃ ᐊᐃᓯᒪᓗᑎᒃ, ᓯᕗᓕᖅᑏᑦ ᐅᖃᐅᓯᖃᓚᐅᖅᐳᑦ ᐱᓕᒻᒪᒃᓴᕐᓂᕐᒥᒃ ᐊᒻᒪ ᐊᔪᕈᓐᓃᖅᓴᖅᐸᓪᓕᐊᓂᕐᒥᒃ ᐋᖅᑭᒃᓱᖅᑕᐅᓯᒪᔪᓂᒃ ᓄᓇᕗᒻᒥᐅᓂᒃ ᐱᔭᕆᐊᖃᖅᑕᖏᓐᓂᒃ. ᐃᓕᓐᓂᐊᕐᓂᕐᒧᑦ ᐱᕕᒃᓴᐃᑦ ᖃᓂᑦᑐᑦ ᐊᖏᕐᕋᒧᑦ ᐊᒃᑐᐊᓂᖃᖅᑐᑦ ᐊᔾᔨᒌᙱᕈᓘᔭᖅᑐᓄᑦ ᐃᓕᑦᑎᓂᕐᒧᑦ ᐱᔭᕆᐊᓕᖕᓂᑦ ᐅᑭᐅᖅᑕᖅᑐᒥ ᐃᑲᔪᖅᓱᐃᔪᓐᓇᖅᑐᑦ ᐱᕙᓪᓕᐊᑦᑎᐊᖅᑐᓄᑦ ᐃᖅᑲᓇᐃᔭᕐᕕᖕᓄᑦ. ᓯᕗᓕᖅᑏᑦ ᐅᖃᐅᓯᖃᓚᐅᖅᑐᑦ ᐱᒻᒪᕆᐅᓂᖓᓂᒃ ᐃᑲᔪᖅᑕᐅᑦᑎᐊᕈᓐᓇᖅᑐᑦ ᓯᓚᑦᑐᖅᓴᕐᕕᖕᓂᑦ ᕿᒥᕐᕈᓪᓗᑎᒡᓗ ᐱᕕᒃᓴᐅᔪᓂᑦ ᐱᓕᕆᖃᑎᒌᖕᓂᖕᒥᑦ ᐊᑐᓂᑦ ᐊᕕᒃᑐᖅᓯᒪᔪᓂᑦ.

ᓯᓚᐅᑉ ᐊᓯᔾᔨᖅᐸᓪᓕᐊᓂᖓ

ᓯᕗᓕᖅᑏᑦ ᐃᓱᒫᓘᑎᖃᕐᔪᐊᓚᐅᖅᑐᑦ ᐱᔾᔪᑎᒋᓪᓗᒍ ᓄᓇᒥ ᐃᑭᕐᔪᐊᖅᑐᑦ ᕼᐊᐃ ᕆᕗᒥ ᐊᒻᒪ Kátł'odeeche First Nation ᐊᒻᒪ ᐅᓕᕕᒡᔪᐊᕐᓂᖏᓐᓄᑦ ᕗᐊᑦ ᒪᒃᕘᓴᓐᒥ. ᐅᐱᒍᓱᓚᐅᖅᐳᑦ ᑐᐊᕕᕐᓇᖅᑐᓕᕆᔩᑦ ᐊᒻᒪ ᐊᑭᓕᖅᓱᖅᑕᐅᙱᖦᖢᑎᒃ ᐱᓕᕆᖃᑦᑕᖅᑐᑦ ᑕᒪᒃᑯᓂᖓ ᐱᕐᕈᓗᐊᕿᔪᓂᒃ ᐊᒻᒪ ᐱᔨᑦᑎᕋᖃᑦᑕᖅᓯᒪᓂᖏᓐᓄᑦ ᕿᒫᑎᑕᐅᔪᓂ.

ᐅᑭᐅᖅᑕᖅᑐᖅ ᑕᑯᕙᓪᓕᐊᕗᖅ ᐊᒃᑐᖅᓯᓂᕆᔭᐅᔪᓂᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐊᖏᒡᓕᕙᓪᓕᐊᑐᐃᓐᓇᖅᖢᓂ ᐊᖏᒡᓕᕙᓪᓕᐊᑐᐃᓐᓇᖅᖢᓂ ᐱᑕᖃᓕᖅᐸᖕᓂᖓᓗ ᓯᓚᒥ ᐱᕐᕈᓗᐊᕿᓂᕆᔭᐅᕙᒃᑐᓂᒃ. ᑖᒃᑯᐊ ᐃᓚᖃᖅᐳᑦ ᐊᑐᖅᑕᐅᓚᐅᖅᓯᒪᙱᑦᑐᒥᒃ ᐃᓕᕕᒡᔪᐊᓂ ᐃᓅᓯᕐᒧᑦ ᐊᒃᓱᕈᕐᓇᖅᑐᖅᓯᐅᕈᑕᐅᓕᖅᐸᒃᖢᓂ ᐊᒥᓱᓄᑦ ᓄᓇᓕᖕᒥᐅᓄᑦ, ᓇᖕᒥᓂᖃᕐᕕᐅᔪᓄᑦ, ᐊᒻᒪ ᓄᓇᓕᖕᓄᑦ.

ᓯᕗᓕᖅᑏᑦ ᐅᖃᐅᓯᖃᓚᐅᖅᑐᑦ ᐱᔭᕆᐊᖃᕐᓂᕐᒥᑦ ᑲᓇᑕᒥ ᐱᕈᖅᓴᐃᓂᕐᒧᑦ ᖁᑦᓯᓂᖏᓐᓂᑦ ᑮᓇᐅᔭᓕᐅᕋᓱᐊᕐᓂᕐᒧᑦ ᓇᓗᓇᐃᖅᓯᓂᕐᒧᑦ ᓴᓗᒪᔪᒥᑦ ᐆᒻᒪᖅᑯᑎᖃᕐᓂᕐᒥᑦ. ᑕᒪᓐᓇ ᐅᕙᑦᑎᓐᓂᒃ ᐱᕕᒃᓴᖃᖅᑎᑦᑎᕗᖅ ᓯᕗᓕᖅᑎᐅᔪᓐᓇᕐᓂᕐᒥᒃ ᐊᖑᒻᒪᑎᔪᒪᓂᕐᒧᑦ ᑲᓇᑕᐅᑉ ᐃᓯᐊᕿᓂᕐᒧᑦ ᑐᕌᕆᔭᖏᓐᓄᑦ, ᐊᑕᖐᑦᑎᐊᖅᖢᓂᓗ ᐱᑕᖃᓕᑐᐃᓐᓇᕆᐊᓕᖕᓂᒃ ᐱᔭᐅᔭᕆᐊᓕᖕᓂᒃ ᐊᑦᑎᒃᑐᒧᑦ ᐃᓯᐊᕿᑎᑕᐅᔪᒧᑦ ᓅᑉᐸᓪᓕᐊᓂᕆᔭᐅᔪᒧᑦ.

ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᐅᔾᔨᕐᓇᖅᑐᒻᒪᕆᒃᑯᑦ ᐊᒃᑐᖅᓯᕙᒃᐳᖅ ᓄᓇᓕᖕᓂᒃ, ᓄᓇᒥᒃ ᐃᒪᕐᒥᒡᓗ ᑕᒫᓂᓕᒫᖅ ᐅᑭᐅᖅᑕᖅᑐᒥ ᐊᕕᒃᓯᒪᓂᕆᔭᐅᔪᒥ. ᓯᕗᓕᖅᑏᑦ ᐅᖃᐅᓯᖃᓚᐅᖅᑐᑦ ᐱᒻᒪᕆᐅᖏᓐᓇᕐᓂᖏᓐᓂᑦ ᐱᔪᒪᓂᕆᔭᐅᔪᑦ ᐋᖅᑭᑦᑕᐅᓯᒪᔪᓂᑦ ᐅᑭᐅᖅᑕᖅᑐᓕᒫᒥᑦ ᓯᕗᓕᖅᑏᑦ ᐅᖃᐅᓯᑦᓴᖏᓐᓂᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ, ᐱᔭᕆᐊᖃᕐᓂᕐᒥᑦ ᒐᕙᒪᑐᖃᒃᑯᓐᓂᑦ ᑮᓇᐅᔭᓕᐅᕈᑕᐅᒐᓱᐊᖅᑐᓂᑦ ᐋᖅᑭᑦᓯᓂᕐᒥᑦ ᖃᓄᐃᓐᓂᐅᔪᓄᑦ ᐅᑭᐅᖅᑕᖅᑐᒥᑦ, ᑲᑐᔾᔨᖃᑎᒌᓐᓂᕐᒥᓪᓗ ᐃᓘᓐᓇᖏᓐᓂᑦ ᖁᑦᓯᓕᕇᑦᑐᓕᒫᓂᑦ ᒐᕙᒪᓂᑦ ᓱᖏᐅᑎᓂᕐᒧᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ.

ᓯᕗᓕᖅᑏᑦ ᐊᖏᕐᓯᒪᔪᑦ ᐱᓕᕆᖃᑎᒌᓐᓂᕐᒥᑦ ᓴᖅᑭᑎᑦᓯᓂᕐᒥᑦ ᐱᕈᖅᐸᓪᓕᐊᓂᖃᑦᓯᐊᖅᑐᒥᑦ ᑲᔪᓯᖏᓐᓇᖅᑐᒥᓪᓗ ᓯᕗᓂᑦᓴᕐᒥᑦ ᐃᓘᓐᓇᖏᓐᓄᑦ ᐅᑭᐅᖅᑕᖅᑐᒥᐅᓄᑦ ᑲᓇᑕᒥᓪᓗ.

ᓄᓇᕗᑦ ᓇᓗᓇᐃᖅᑕᐅᓚᐅᖅᐳᖅ ᐃᒃᓯᕙᐅᑕᐅᓂᐊᕐᓂᖓᓂᒃ ᐅᑭᐅᖅᑕᖅᑐᒥ ᓯᕗᓕᖅᑏᑦ ᑲᑎᒪᑎᓪᓗᒋᑦ 2024-ᒥ ᐅᓪᓗᖅᓯᐅᑎᓕᕆᓐᓇᒥ ᐊᕐᕌᒍᒥ.

 

ᑐᓴᒐᒃᓴᓕᕆᔨᑦ ᖃᐅᔨᒋᐊᕐᕕᒃᓴᑦ:

ᑲᓇ ᒑᓯᓕᓐ

ᐱᕙᓪᓕᐊᔪᓂᒃ ᑎᑎᕋᖅᑎ

ᓄᓇᑦᓯᐊᕐᒥ ᒐᕙᒪᒃᑯᑦ

(867) 767-9140 ᓇᕿᒃᑲᓐᓂᕐᓗᒍ. 11082

Kenna_Gosselin@gov.nt.ca

 

ᔪᐊᑕᓐ ᐆᕕᓐᔅ (ᐊᕐᓇᖅ)

ᑐᑭᒧᐊᑦᑎᑦᓯᔨ ᑐᓴᐅᒪᖃᑦᑕᐅᑎᓕᕆᓂᕐᒧᑦ, ᒥᓂᔅᑕᐃᑦ ᐊᓪᓚᕝᕕᖓᓂ

ᔫᑳᓐ ᒐᕙᒪᖓ 

867.332.0615

 

ᐃᓕᓴᐱ ᐳᕋᐅᓐ
ᐱᕙᓪᓕᐊᔪᓂᒃ ᑎᑎᕋᖅᑎ
ᑎᑎᕋᕐᕕᐊᓂᑦ ᓯᕗᓕᖅᑎ ᐲᔾᔭᐃ ᐊᕿᐊᕈᖅ
867-975-5059
bbrown6@gov.nu.ca