ᐅᖃᓚᐅᑎᓯᐅᑏᑦ

You are here

ᐅᐊᓕᓂᕐᒥ ᓯᕗᓕᖅᑎᑦ ᑲᒪᒋᔭᖃᖅᐳᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑲᒪᒋᔭᐅᔾᔪᑎᓂᒃ ᐊᒻᒪ ᒪᑭᒪᔾᔪᑎᑦ ᐅᑎᖅᑎᑕᐅᓂᖏᑦ

ᔫᓂ 15, 2021

ᐃᕐᖐᓐᓇᖅ ᓴᖅᑭᑦᑕᕆᐊᓕᒃ

ᔫᓂ 15, 2021

ᐅᐊᓕᓂᕐᒥ ᓯᕗᓕᖅᑎᑦ ᑲᒪᒋᔭᖃᖅᐳᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑲᒪᒋᔭᐅᔾᔪᑎᓂᒃ ᐊᒻᒪ ᒪᑭᒪᔾᔪᑎᑦ ᐅᑎᖅᑎᑕᐅᓂᖏᑦ

ᐅᐊᓕᓂᕐᒥ ᓯᕗᓕᖅᑏᑦ ᑲᑎᒪᓚᐅᖅᐳᑦ ᖃᕆᑕᐅᔭᒃᑯᑦ ᐅᖃᐅᓯᖃᕈᒪᓪᓗᑎᒃ ᒪᒃᐱᒃᑲᓐᓂᕋᔭᖅᑐᑦ ᐸᕐᓇᒍᒪᓪᓗᒋᑦ, ᓴᙱᔫᓗᑎᒃ ᒪᑭᒪᔾᔪᑎᑦ ᐅᑎᖅᑎᓪᓗᒋᑦ, ᐊᒻᒪ ᐅᐊᓕᓂᕐᒥᐅᑦ ᐅᐊᖕᓇᕐᒥᐅᓪᓗ ᑲᓇᑕᒥ ᖃᓄᐃᙱᑦᑎᐊᕈᓯᖏᑦ.

ᐅᐊᓕᓂᕐᒥ ᓯᕗᓕᖅᑏᑦ ᐅᖃᓚᐅᖅᐳᑦ ᓱᓕ ᐱᓕᕆᕐᔪᐊᕆᐊᖃᕐᓂᖏᓐᓂᒃ ᐱᐅᓯᒋᐊᖅᑕᐅᓗᑎᒃ ᐋᖅᑭᒋᐊᕈᑎᒃᓴᑦ ᑲᓇᑕᓕᒫᒥ, ᓇᓗᓇᐃᖅᑕᐅᒃᑲᓐᓂᕐᓗᑎᒡᓗ ᐱᓕᕆᐊᒃᓴᖏᑦ ᐱᓕᕆᐊᕆᓗᒋᑦ ᐱᓕᕆᐊᒃᓴᖅ ᑲᑐᑎᓗᒍ ᓄᓇᖃᖅᑳᖅᓯᒪᔪᑦ ᐃᓄᐃᑦ ᐃᓚᐅᓗᑎᒃ ᑲᓇᑕᒥᐅᓕᒫᓪᓗ. ᓇᓗᓇᐃᖅᑕᐅᓚᐅᖅᑐᑦ ᑳᒻᓘᑉᔅ ᐃᖅᑭᓕᑦ ᐃᓕᓐᓂᐊᕆᐊᖅᐸᓚᐅᖅᓯᒪᔪᑦ ᑎᒥᖏᑦ ᐃᖅᑲᐃᓯᔾᔪᑎᕐᔪᐊᕌᓘᖕᒪᑦ ᐊᕐᕌᒍᖃᑎᒌᙱᑦᑐᑦ ᐊᒃᓱᕈᕐᓇᖅᑐᒃᑰᖅᑎᑕᐅᕐᔪᐊᖃᑦᑕᖅᓯᒪᔪᑦ ᓴᖅᑭᑉᐸᓪᓕᐊᔪᑦ ᐃᓕᓐᓂᐊᕐᕕᖕᓂ ᐃᓕᓐᓂᐊᕆᐊᕐᕕᐅᕙᓚᐅᖅᓯᒪᔪᓂᒃ ᑭᖑᓂᖔᑦᑎᓐᓃᙱᒻᒪᑦ: ᒫᓐᓇ ᓱᓕ ᐊᒃᑐᐃᔾᔪᑕᐅᕐᔪᐊᖃᑦᑕᖅᑐᖅ ᓄᓇᖃᖅᑳᖅᓯᒪᔪᑦ ᐃᓄᖕᓄᑦ.  ᓯᕗᓕᖅᑎᑦ ᐃᑲᔪᖅᓱᐃᑦᑎᐊᖅᐳᑦ ᑕᒪᐃᓐᓂᒃ ᓄᓇᖃᖅᑳᖅᓯᒪᔪᑦ ᐃᓄᓕᒫᓂᒃ.

ᐅᐊᓕᓂᕐᒥ ᓯᕗᓕᖅᑎᑦ ᐱᓕᕆᐊᒃᓴᖃᖅᐳᑦ ᓈᓚᖕᓂᕐᒥᒃ, ᐃᓕᓐᓂᐊᕐᓂᕐᒥᒃ, ᐊᒻᒪ ᑐᑭᖃᑦᑎᐊᖅᑐᒥᒃ ᐃᑲᔪᖅᑐᐃᓂᕐᒥᒃ ᓄᓇᖃᖅᑳᖅᓯᒪᔪᓂᒃ ᐊᐅᓚᑕᐅᔪᓂᒃ ᒪᒥᓴᕐᓂᕐᒧᑦ ᐱᓕᕆᐊᓂᒃ. ᓯᕗᓕᖅᑎᑦ ᐃᓕᑕᖅᓯᐅᒪᖕᒪᑕ ᒪᒥᓴᕐᓂᖅ ᓴᙱᔫᔪᓂᒃ ᑲᑐᔾᔨᖃᑎᒌᒍᑕᐅᒋᐊᖃᕐᒪᑦ ᓄᓇᖃᖅᑳᖅᓯᒪᔪᑦ ᓄᓇᓕᖕᓂ, ᐊᒻᒪ ᐊᕕᒃᑐᖅᓯᒪᓂᕐᒥ, ᓄᓇᕘᒥ ᐊᕕᒃᑐᖅᓯᒪᓂᕐᒥ, ᐊᒻᒪ ᑲᓇᑕᒥ ᒐᕙᒪᒃᑯᓐᓂ.

ᓯᕗᓕᖅᑎᑦ ᐊᒃᓱᐊᓗᒃ ᓄᒫᑦᑕᓚᐅᖅᐳᑦ ᖃᖓᑦᑎᐊᖅ ᐃᔅᓚᒧᕗᐱᒃ ᐱᒋᐊᖅᑕᐅᑎᓪᓗᒋᑦ ᓚᓐᑕᓐ, ᐋᓐᑎᐅᕆᐅᒥ, ᐅᖃᒃᑲᓐᓂᓚᐅᖅᐳᓪᓗ ᐃᓱᒪᒋᔭᐅᔪᓂᑦ ᖀᒥᒍᓱᖕᓂᖅ ᑲᓇᑕᒦᑦᑕᕆᐊᖃᙱᒻᒪᑦ.

ᐋᓐᓂᐊᖃᕐᓇᙱᑦᑐᓕᕆᓂᖅ

ᓄᕙᒡᔪᐊᕐᓇᖅ-19−ᒧᑦ ᖃᓂᒻᒪᒍᑕᐅᕙᓪᓕᐊᔪᖅ ᓇᓗᓇᐃᖅᓯᔾᔪᑕᐅᖕᒪᑦ ᐱᒻᒪᕆᐅᓂᖓᓂᒃ ᓴᙱᔫᓗᓂ ᐊᒻᒪ ᑲᔪᓯᑦᑎᐊᕐᓗᑎᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔾᔪᓰᑦ.  ᖃᓂᒻᒪᒍᑕᐅᕙᓪᓕᐊᔪᒧᑦ ᐊᒃᑐᐊᓂᓖᑦ ᐊᑕᐅᓯᐊᕐᓗᑎᒃ ᑲᓇᑕᒥ ᑮᓇᐅᔭᑦ ᐃᑲᔫᑎᖃᑦᑎᐊᓵᖅᑐᑦ, ᑭᓯᐊᓂ ᑲᔪᓯᑏᓐᓇᕆᐊᒃᓴᖅ ᓴᙱᓂᕆᔭᐃᑦ ᖃᓄᐃᙱᑦᑎᐊᕈᓯᕐᓄᑦ ᐊᑯᓂᐊᓗᒃ ᐊᒃᓱᕈᕐᓇᕐᓂᐊᕐᒪᑦ. ᕿᓚᒻᒥᐅᔪᒃᑯᑦ ᑮᓇᐅᔭᑦ ᐋᖅᑭᒍᑕᐅᙱᒻᒪᑦ ᐱᓕᕆᔾᔪᑎᑦᑎᓐᓄᑦ ᑲᔪᓯᑏᓐᓇᕈᓐᓇᙱᓐᓇᑦᑎᒍᑦ, ᐃᑲᔫᑕᐅᔪᓐᓇᕋᓂᓗ ᖃᓄᐃᓕᐅᕈᑎᒃᓴᓄᑦ ᑮᓇᐅᔭᓂᒃ ᐃᓱᒪᓕᐅᕈᑕᐅᒋᐊᓕᖕᓄᑦ ᐊᑐᖅᑕᐅᒋᐊᓕᖕᓂᒃ ᐊᑯᓂᐅᔪᒃᑯᑦ ᐊᐅᓚᑦᑎᓂᕐᒧᑦ ᐱᓕᕆᔾᔪᑎᑦᑎᓐᓄᑦ.

ᐅᐊᓕᓂᕐᒥ ᓯᕗᓕᖅᑏᑦ ᓱᓕ ᐊᐱᕆᕗᑦ ᑲᓇᑕᒥ ᒐᕙᒪᒃᑯᓐᓄᑦ ᓇᓕᒧᓕᖅᑎᒃᑲᓐᓂᖁᓗᒋᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑮᓇᐅᔭᑎᒍᑦ ᐱᓕᕆᖃᑎᒌᒍᓯᑦ ᐊᑐᐃᓐᓇᕈᖅᑎᓪᓗᒋᑦ ᑲᔪᓰᓐᓇᕈᑎᒃᓴᑦ, ᐊᑯᓂᐅᔪᒃᑯᑦ ᑮᓇᐅᔭᕆᔭᐅᔪᓐᓇᖅᑐᑦ ᑲᓇᑕᒥ ᐋᓐᓂᐊᖃᕐᓇᙱᑦᑐᓕᕆᔨᓄᑦ ᓅᑕᐅᔪᑦ ᐊᖅᑯᑎᒋᓗᒋᑦ. ᑕᖅᑭᑦ 6 ᐊᓂᒍᖅᑐᓂᒃ, ᑎᓯᐱᕆ 2020−ᐅᑎᓪᓗᒍ, ᑲᓇᑕᒧᑦ ᐊᖓᔪᖅᑳᕐᔪᐊᖅ ᓇᓗᓇᐃᖅᓯᓚᐅᖅᐳᖅ ᑲᓇᑕᒥ ᒐᕙᒪᒃᑯᑦ ᐅᓄᖅᓯᒋᐊᖅᑎᑦᑎᒋᐊᖃᕐᓂᖏᓐᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑮᓇᐅᔭᖏᓐᓂᒃ ᐋᓐᓂᐊᖃᕐᓇᙱᑦᑐᓕᕆᔨᓄᑦ ᓅᑕᐅᔪᑦ ᐊᖅᑯᑎᒋᓗᒋᑦ.  ᓯᕗᓕᖅᑎᓂᑦ ᐅᖃᖃᑎᖃᕈᒪᓯᒪᕗᖅ ᑕᒪᓐᓇ ᐱᔾᔪᑎᒋᓪᓗᒍ − ᒫᓐᓇ ᑕᕝᕙ ᐅᖃᐅᓯᕆᔭᕆᐊᖃᓕᖅᐸᕗᑦ. ᓈᒻᒪᖕᓂᖅᓴᐅᓕᖅᑐᖅ ᐊᒻᒪ ᐊᑯᓂᐅᔪᒃᑯᑦ ᐋᖅᑭᒃᑕᐅᓯᒪᔪᑦ ᑮᓇᐅᔭᓂᒃ ᐱᓕᕆᖃᑎᒌᒍᓯᑦ ᐱᔭᕆᐊᖃᓪᓚᕆᖕᓂᐊᓕᖅᑐᑦ ᐃᑲᔪᖅᓱᐃᔾᔪᑎᒋᓗᒋᑦ ᑲᔪᓯᑎᓪᓗᒍ ᖃᓂᒻᒪᒃᐸᓪᓕᐊᔪᑦ ᖃᓄᐃᑦᑐᓐᓃᖅᑎᓪᓗᒋᑦ, ᐅᑯᓂᖓᓗ ᐅᑕᖅᑭᔭᕆᐊᖃᕐᓃᑦ, ᐅᖃᐅᓯᕆᓗᒋᓪᓗ ᐅᔾᔨᕐᓇᕐᓂᖏᑦ ᑐᓗᖅᑕᕈᑕᐅᕙᒃᑐᑦ ᖃᐅᔨᓴᖅᑕᐅᒋᐊᓕᖕᓂᒃ ᐊᒻᒪ ᐱᓚᒃᑐᐃᕕᖕᒦᑎᓪᓗᒋᑦ, ᓈᒻᒪᒃᑐᒦᑎᓪᓗᒋᓪᓗ ᑲᓇᑕᒥᐅᑦ ᖃᓄᐃᙱᓐᓂᖏᓐᓄᑦ ᐱᔭᐅᒋᐊᓖᑦ ᓄᕙᒡᔪᐊᕐᓇᕐᒧᑦ ᖃᓂᒻᒪᒃᐸᓪᓕᐊᔪᓄᑐᐊᖑᙱᑦᑐᖅ, ᑭᓯᐊᓂᑦᑕᐅᖅ ᐊᕐᕌᒍᒐᓴᕐᓄᑦ ᐊᒡᒋᖅᑐᓄᑦ.  

ᐅᐊᓕᓂᕐᒥ ᓯᕗᓕᖅᑏᑦ ᐅᖃᒃᑲᓐᓂᖅᐳᑦ ᑕᒪᐃᓐᓄᑦ ᑲᓇᑕᒥ/ᓄᓇᕗᒻᒥ ᐊᕕᒃᑐᖅᓯᒪᔪᑦ ᑐᒃᓯᕋᕐᕕᒋᓪᓗᒋᑦ ᐃᕐᖐᓐᓇᖅ ᐱᓕᕆᐊᖑᐃᓐᓇᓕᕐᓗᓂᓗ ᐅᓄᖅᓯᒋᐊᖅᐸᒡᓗᒋᑦ ᑲᓇᑕᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᓅᑕᐅᔪᑦ ᐱᐊᓂᒃᑕᐅᔪᓐᓇᖁᓪᓗᒋᑦ ᐱᓕᕆᐊᖑᐃᓐᓇᓕᕐᓗᑎᒡᓗ ᑲᓇᑕᒥ ᐱᓕᕆᐊᕆᖃᑕᐅᔭᖏᑦ 35%−ᖑᓪᓗᑎᒃ ᑲᓇᑕᒥ/ᓄᓇᕗᒻᒥ ᐊᕕᒃᑐᖅᓯᒪᔪᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᑮᓇᐅᔭᑦ ᐊᑐᖅᑕᖏᑦ.   

ᐅᐊᓕᓂᕐᒥ ᓯᕗᓕᖅᑏ ᐅᖃᐅᓯᖃᓚᐅᖅᐳᑦ ᐱᕙᓪᓕᐊᑐᐃᓐᓇᖅᑐᓂᒃ ᐅᓄᖅᓯᕙᓪᓕᐊᓪᓗᑎᒃ ᐃᓱᒪᒥᒍᑦ ᐊᔪᕈᑎᓕᖕᓄᑦ ᐊᒻᒪ ᐅᐃᕆᓯᒪᔪᓄᑦ ᐱᔾᔪᑕᐅᓲᑦ ᐅᐊᓕᓂᕐᒥ ᑲᓇᑕᒥ ᑭᐅᔭᕆᐊᖃᖃᑦᑕᕐᓂᕐᓗ ᐊᒃᓱᕈᕐᓇᖅᑐᖃᖅᑎᓪᓗᒍ.  ᓄᕙᒡᔪᐊᕐᓇᖅ-19 ᖃᓂᒻᒪᒍᑕᐅᕙᓪᓕᐊᔪᖅ ᐱᐅᔪᓐᓃᖅᐹᓪᓕᕈᑎᓯᒪᔪᖅ ᑖᒃᑯᓄᖓ ᐱᔾᔪᑕᐅᔪᓄᑦ, ᓯᕗᓕᖅᑏᓪᓗ ᐊᖏᕆᐊᖃᓚᐅᖅᐳᑦ ᐊᒃᑐᐃᔾᔪᑕᐅᔪᓂᒃ ᖃᓂᒻᒪᒃᐸᓪᓕᐊᑎᓪᓗᒋᑦ ᐊᒃᑐᐃᓂᕆᓵᖅᑕᖓ ᑲᓇᑕᒥ ᐃᓱᒪᒥᒍᑦ ᐊᔪᕈᑎᓕᖕᓄᑦ, ᐱᓕᕆᔪᖃᒃᑲᓐᓂᕆᐊᖃᖅᖢᓂᓗ ᐅᔾᔨᕆᔭᐅᓕᖅᑎᒃᑲᓐᓂᕐᓗᒍ ᐱᔨᑦᑎᕋᐅᑎᑦ ᒥᒃᖠᒋᐊᕐᓗᒋᓪᓗ ᑲᙳᓇᖅᑐᑦ ᐊᒃᑐᐊᓂᓖᑦ ᐃᑲᔪᖅᑕᐅᔪᒪᔪᓄᑦ. ᓯᕗᓕᖅᑎᑦ ᓇᓗᓇᐃᖅᓯᓚᐅᖅᐳᑦ ᑲᑎᒪᔩᑦ ᐃᓚᒌᓴᓄᑦ ᑲᑎᒪᔾᔪᑎᒋᖃᑦᑕᖅᓯᒪᔭᖏᑦ, ᐊᔪᕈᓐᓃᖅᓴᖅᑕᐅᒋᐊᓕᑦ ᐊᔪᕈᓐᓃᖅᓴᖅᑕᐅᔪᓐᓇᓛᕐᓗᑎᒃ, ᑐᕌᖓᖕᒪᑕ ᖃᐅᔨᒪᔭᐅᑎᑉᐸᒡᓗᒋᑦ ᐃᓱᒪᒋᔭᐅᑦᑎᐊᖅᓯᒪᔪᑦ ᐃᓱᒪᒥᒍᑦ ᐊᔪᕈᑎᓕᖕᓄᑦ ᐊᒻᒪ ᐅᐃᕆᓯᒪᔪᓄᑦ ᒥᒃᖠᒋᐊᕐᓗᒍᓗ ᑲᙳᓇᖅᑐᖅᓯᐅᕐᓂᖅ ᐃᓱᒪᒥᒍᑦ ᐋᓐᓂᐊᕈᑎᓕᖕᓄᑦ ᑕᒪᐃᓐᓂᒃ ᑭᒡᒐᖅᑐᐃᕕᒋᔭᐅᔪᓂᒃ.

ᑮᓇᐅᔭᓕᐅᕋᓱᖕᓂᕐᒧᑦ ᐱᕙᓪᓕᐊᓂᕐᒧᓪᓗ ᐅᑎᖅᑎᑕᐅᔪᑦ

ᐅᐊᓕᓂᕐᒥ ᓯᕗᓕᖅᑎᑦ ᐅᖃᐅᓯᖃᓚᐅᖅᐳᑦ ᐱᒻᒪᕆᐅᓂᖓᓂᒃ ᐱᔭᐅᔾᔭᐃᕐᓗᒋᑦ ᐱᕐᔪᐊᖑᓂᖅᓴᑦ ᓂᐅᕕᐊᖑᔪᓐᓇᖅᑐᑦ ᑲᓇᑕᒥᙶᖅᑐᑦ ᐱᖁᑎᑦ, ᐱᔨᑦᑎᕋᐅᑎᑦ, ᐊᒻᒪ ᐃᑲᔫᑎᒃᓴᑦ, ᐃᓚᓕᐅᑎᓪᓗᒋᑦ ᐆᒻᒪᖅᑯᑎᑐᕈᓯᑦ, ᐱᕐᔪᐊᕌᓗᐃᓪᓗ ᐱᓕᕆᐊᒃᓴᕆᔭᐅᔪᑦ ᐆᒻᒪᖅᑯᑎᓕᕆᔨᒃᑯᓐᓂ ᐱᓕᕆᐊᖑᔪᒃᓴᑦ ᑮᓇᐅᔭᓕᐅᕋᓱᖕᓂᕐᒧᑦ ᐱᕙᓪᓕᐊᓂᕐᒧᓪᓗ ᐅᑎᖅᑎᑕᐅᔪᒃᓴᓄᑦ. ᐅᐊᓕᓂᕐᒥ ᓯᕗᓕᖅᑎᑦ ᐃᓱᒫᓘᑎᒥᖕᓂᒃ ᑐᓴᖅᑎᑦᑎᑲᑕᓚᐅᖅᐳᑦ ᐊᒃᓱᕈᕐᓇᖅᑐᐊᓗᖕᓂᒃ ᐱᓕᕆᐊᕆᓂᐊᕐᓗᒋᑦ ᐃᓚᒌᓄᑦ ᓄᓇᕐᔪᐊᕐᒥᓪᓗ ᓂᐅᕕᐊᒃᓴᐅᕙᒃᑐᑦ. ᐊᖏᖃᑎᒌᓚᐅᖅᐳᑦ ᐱᒻᒪᕆᐅᓂᖓᓐᓂᒃ ᐱᑎᑕᐅᓂᐊᕐᓗᓂ ᐱᕐᔪᐊᕌᓗᖕᓂᒃ ᐆᒻᒪᖅᑯᑎᒧᑦ ᐊᐅᓚᔪᓐᓇᐅᑎᓂᒃ, ᓅᑎᑦᑎᓂᕐᒧᑦ ᐱᓕᕆᐊᓂᒃ, ᐊᓯᖏᓐᓂᒡᓗ ᐊᐅᓚᔪᓐᓇᐅᑕᐅᕙᒃᑐᑦ ᐱᓕᕆᐊᓂᒃ ᐱᐊᓂᒃᑕᐅᓯᒪᔪᓂᒃ ᓈᒻᒪᖅᑰᑦᑎᓪᓗᑎᒃ ᓴᖅᑭᑕᐅᕙᓪᓕᐊᓪᓗᑎᒡᓗ ᐊᕙᑎᒧᑦ ᐊᒃᑐᐃᔾᔪᑕᐅᓲᑦ ᐊᒻᒪ ᑲᔪᓯᑏᓐᓇᕐᓗᒋᑦ ᒪᓕᒃᑕᐅᔭᕆᐊᖃᓪᓚᕆᒃᑐᑦ ᓄᓇᖃᖅᑳᖅᓯᒪᔪᑦ ᑐᓴᕋᓱᖃᑦᑕᓚᐅᖅᑕᖏᑦ ᐊᒻᒪ ᐃᓄᖕᓂᒃ ᑲᑎᑎᕈᓘᔭᖃᑦᑕᓚᐅᖅᑕᖏᑦ.

ᐅᐊᓕᓂᕐᒥ ᓯᕗᓕᖅᑎᑦ ᐃᓕᑕᖅᓯᐅᒪᖕᒪᑕ ᐱᒻᒪᕆᐅᓂᖓᓂᒃ ᒪᑭᒪᔾᔪᑎᓄᑦ ᐊᖅᑯᑎᒋᔭᐅᔪᑦ ᐱᓕᕆᐊᒃᓴᖏᓪᓗ ᐱᐅᓯᒋᐊᖅᑎᑦᑎᓪᓗᑎᒃ ᓂᐅᕕᖅᑕᐅᕙᒃᑐᑦ, ᐃᑲᔪᖅᓱᕐᓗᒋᑦ ᒪᑭᒪᔾᔪᑎᓄᑦ ᐅᑎᖅᑎᑕᐅᒋᐊᓕᑦ, ᖃᐅᔨᒪᑎᓪᓗᒋᓪᓗ ᑲᓇᑕᒥᐅᑦ ᐱᑎᑕᐅᔪᓐᓇᕐᒪᖔᑕ ᐊᑕᖏᕐᓗᒍ ᓇᓕᒧᒌᒡᓗᒋᓪᓗ ᐊᑭᖏᑦ ᓄᓇᒥᙶᖅᑐᑦ ᐊᐅᓚᔪᓐᓇᐅᑎᑦ. ᐅᖃᐅᓯᖃᓚᐅᖅᐳᑦ ᐱᔭᐅᔾᔭᐃᖅᑕᐅᒋᐊᖃᕐᓂᖏᓐᓂᒃ ᑲᔪᓯᑎᑕᐅᒋᐊᖃᕐᓂᖏᓐᓂᒡᓗ ᑲᓇᑕᓕᒫᒥ ᒪᑭᒪᔾᔪᑎᓄᑦ ᐊᖅᑯᑎᒋᔭᐅᔪᑦ, ᐊᒻᒪᓗ ᐃᓯᖃᑕᐅᔪᓐᓇᕐᓂᖅ ᑲᓇᑕᐅᑉ ᓯᓚᑖᓂᙶᖅᑐᑦ ᓂᐅᕕᐊᒃᓴᖃᓲᑦ ᐊᒻᒪ ᑐᓚᒃᑕᕐᕕᖕᓂ, ᐊᓂᒍᖅᑎᓪᓗᒋᓪᓗ ᐊᑐᓕᖁᔭᐅᓯᒪᔪᑦ ᐊᖏᖃᑎᒌᒍᑕᐅᓯᒪᙱᑦᑐᓂᒃ. ᓯᕗᓕᖅᑎᑦ ᐅᖃᒃᑲᓐᓂᓚᐅᖅᐳᑦ ᐃᑲᔪᖅᑐᐃᓂᖏᓐᓂᒃ ᐊᑖᓃᑦᑐᖅ 5−ᒥᑦ, ᐊᑦᑕᑕᕈᑕᐅᓪᓚᕆᒃᖢᓂ ᑲᓇᑕᒥ ᐊᒥᐊᓕᑲᒥᓪᓗ, ᐊᒻᒪ ᐃᑲᔫᑕᐅᓪᓗᓂ ᒥᓯᒐᓐᒥᐅᓄᑦ ᐱᓕᕆᖃᑎᖃᖁᓪᓗᒋᑦ ᐃᓐᐳᕆᔾᑯᓐᓂ ᐊᑲᐅᙱᓕᐅᕈᑎ 5 ᐊᑖᓃᑦᑐᖅ ᐋᖅᑭᒃᑕᐅᖁᓪᓗᒍ. 

ᐃᑲᔪᖅᑐᕐᓂᐊᕐᓗᒋᑦ ᒪᑭᒪᔾᔪᑎᓄᑦ ᐊᖅᑯᑎᒋᔭᐅᓲᑦ ᐱᔨᑦᑎᕋᕈᑕᐅᓂᐊᖅᑐᑦ ᑲᓇᑕᒥᐅᑦ ᐅᐊᓕᓂᕐᒧᑦ, ᓯᕗᓕᖅᑎᑦ ᐊᐱᕆᕗᑦ ᑲᓇᑕᒥ ᒐᕙᒪᒃᑯᓐᓄᑦ ᐱᓕᕆᖃᑎᖃᖁᓪᓗᒋᑦ ᐅᐊᓕᓂᕐᒥ ᑲᓇᑕᒥ/ᓄᓇᕘᒥ ᐊᕕᒃᑐᖅᓯᒪᔪᓂᒃ ᖃᐅᔨᒪᓗᒋᓪᓗ ᐊᔾᔨᒌᒥᒃ ᓴᓂᕐᕙᒡᕕᐅᖕᒪᖔᑕ ᓄᑖᕐᒥᒃ ᑲᓇᑕᒥ ᑮᓇᐅᔭᕆᔭᐅᔪᓂᒃ ᐊᖅᑯᑎᒋᔭᐅᓗᑎᒃ ᑮᓇᐅᔭᑦ, ᑮᓇᐅᔭᑦ ᐊᑐᖅᑐᒃᓴᑦ 2021−ᒥ ᐅᐊᓕᓂᕐᒥ ᓯᕗᓪᓕᐅᔾᔭᐅᔪᒪᔪᑦ ᐱᓕᕆᐊᓄᑦ. 

ᐅᐊᓕᓂᕐᒥ ᓯᕗᓕᖅᑎᑦ ᐊᖏᖅᓯᓚᐅᖅᐳᑦ ᖃᖓᑦᑎᐊᖅ ᐊᒻᒪ ᐱᓕᕆᐊᖑᐃᓐᓇᖅᑐᒥᒃ ᑲᓇᑕᒥ ᑮᓇᐅᔭᓕᐅᕈᑕᐅᓇᓱᐊᖅᑐᓂᒃ ᐊᐅᓚᔪᓐᓇᐅᑎᓕᕆᔪᓂᒃ. ᓯᕗᓕᖅᑎᑦ ᑎᓕᐅᕈᑎᖏᑦ ᑲᑐᔾᔨᖃᑎᒌᖁᔩᓐᓇᖅᖢᑎᒃ ᐱᓕᕆᖃᑎᒌᖏᓐᓇᖁᓪᓗᒋᓪᓗ ᓴᖅᑭᓐᓂᐊᕐᓗᒋᑦ ᓄᑕᐅᔪᓐᓃᖅᑐᑦ ᐱᑕᖃᙱᓐᓂᐅᔪᑦ. ᑲᓇᑕᒥ−ᐋᖅᑭᒃᓱᖅᑕᐅᔪᑦ ᐊᐅᓚᔪᓐᓇᐅᑎᑦ, ᓲᕐᓗ ᑐᓚᒃᑕᕐᕖᑦ, ᐊᖅᑯᑏᑦ, ᒥᑦᑕᕐᕖᑦ, ᐃᒡᓗᓕᕆᓃᑦ, ᐅᖃᓘᑎᒃᑯᑦ ᑐᓴᐅᒪᔪᓕᕆᓃᑦ, ᓄᑭᓪᓚᐅᑎᓕᕆᓂᖅ ᓄᑭᓪᓚᐅᑎᖃᖅᑎᑦᑎᓂᕐᓗ, ᓄᓇᓕᖕᓂᓪᓗ ᐊᐅᓚᔪᓐᓇᐅᑎᑦ, ᐊᑦᑕᑕᕐᕕᖃᑦᑎᐊᕐᓗᑎᒃ ᒪᑭᒪᔾᔪᑎᓄᑦ ᐱᕈᖅᐸᓪᓕᐊᔪᓄᑦ ᐊᒻᒪ ᐋᖅᑭᒋᐊᕈᑎᓄᑦ. ᐱᒻᒪᕆᐅᓂᐊᖅᐳᖅ ᓇᓗᓇᐃᖅᑕᐅᓗᓂ ᐃᑲᔫᑕᐅᔪᑦ ᐅᑯᐊ, ᐊᒻᒪ ᐃᓚᐅᔪᑦ ᐅᑯᓇᓂ, ᒪᑭᒪᔾᔪᑎᒃᓴᓂᒃ ᐅᑎᖅᑎᑦᑎᓂᕐᒧᑦ ᓇᓂᑐᐃᓐᓇᖅ ᐅᖃᐅᓯᐅᓗᑎᒃ, ᐱᓗᐊᖅᑐᒥ ᓄᓇᖃᖅᑳᖅᓯᒪᔪᓄᑦ.

ᐅᐊᓕᓂᕐᒥ ᓯᕗᓕᖅᑎᑦ ᐅᖃᒃᑲᓐᓂᓚᐅᖅᐳᑦ ᐱᔭᕆᐊᖃᕐᓂᖏᓐᓂᒃ ᐅᓄᖅᓯᕚᓪᓕᖅᓯᒪᔪᓂᒃ ᑲᓇᑕᒥ ᑮᓇᐅᔭᓕᐅᕋᓱᐊᕈᑎᑦ; ᐊᓯᔾᔨᒐᒃᓴᐅᓗᑎᒃ ᑲᓇᑕᒥ/ᓄᓇᕗᒻᒥ ᐊᕕᒃᑐᖅᓯᒪᔪᓂᒃ ᐃᓱᒪᒋᔭᐅᓗᑎᒃ ᓇᖕᒥᓂᖅ ᓯᕗᓪᓕᐅᑎᔪᒪᔭᖏᑦ; ᐋᖅᑭᑦᑎᐊᖅᓯᒪᓗᑎᒃ ᐊᖏᖅᑕᐅᔪᒃᓴᑦ; ᐊᔪᕐᓇᕈᓐᓃᖅᑎᓯᒪᓗᑎᒃ ᐊᒡᓚᕝᕕᓕᕆᔾᔪᑎᑦ ᐊᒻᒪ ᐅᓂᒃᑳᓕᐊᕆᔭᐅᒋᐊᓕᑦ; ᑐᑭᖃᑦᑎᐊᖅᑐᓪᓗ ᑲᑐᔾᔨᖃᑎᒌᒍᓯᑦ. ᐅᑯᐊ ᐱᐅᓯᒋᐊᖅᓯᒪᓪᓗᑎᒃ ᐱᔭᐅᔭᕆᐊᖃᓪᓚᕆᒃᐳᑦ ᓴᖅᑭᑕᐅᒃᑲᓐᓂᕈᓐᓇᖅᖢᑎᒃ ᒪᑭᒪᔾᔪᑎᓄᑦ, ᐃᖅᑲᓇᐃᔮᒃᓴᑦ ᓴᖅᑭᓪᓗᒋᑦ, ᐱᐅᓯᒋᐊᕐᓗᒋᑦ ᐋᖅᑭᒋᐊᕈᑎᒃᓴᑦ, ᖃᐅᔨᒪᓗᒋᓪᓗ ᑲᓇᑕᒥ/ᓄᓇᕗᒻᒥ ᐊᕕᒃᑐᖅᓯᒪᔪᑦ ᐊᙳᑎᔪᓐᓇᕐᒪᖔᑕ ᐊᐅᓚᔪᓐᓇᐅᑎᓄᑦ ᐱᔭᕆᐊᖃᖅᑕᖏᓐᓂᒃ ᓯᕗᓪᓕᐅᑎᒋᐊᖃᖅᑕᖏᓐᓂᒡᓗ. 

ᐅᐊᓕᓂᕐᒥ ᓯᕗᓕᖅᑏᑦ ᓄᑖᙳᕆᐊᖅᑎᑦᑎᕗᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐃᑲᔫᑕᐅᔪᓐᓇᖅᑐᓂᒃ ᐃᓯᐊᕿᔪᒧᑦ ᖁᕝᕙᕆᐊᕈᑎᓂᒃ ᑕᐅᖅᓰᖃᑦᑕᐅᑎᓂᕐᒥᒃ ᓄᓇᕐᔪᐊᓕᒫ ᑭᒡᓕᖏᓐᓂ ᐊᒻᒪ ᑲᓇᑕᒥ ᐅᑭᐅᖅᑕᖅᑐᒥᓗ ᐊᕕᒃᑐᖅᓯᒪᔪᑦ ᐱᓕᕆᖃᑎᒋᓗᒋᑦ ᖃᓄᖅᑑᕈᑎᒃᓴᓄᑦ ᑐᕌᖅᑕᐅᓇᓱᒃᑐᒥᑦ ᐱᐊᓂᒃᑕᐅᖁᓪᓗᒋᑦ ᒪᓕᒐᐃᑦ ᐃᓛᒃᑰᖅᑐᑦ 6−ᒥ ᐱᐅᕆᔅᒥᐅᑦ ᐊᖏᕈᑎᖓᓂ.    ᐅᑯᐊ ᐱᖃᓯᐅᔾᔭᐅᔪᑦ ᑲᓇᑕᒥ ᐅᑭᐅᖅᑕᖅᑐᒥᓗ ᐊᕕᒃᑐᖅᓯᒪᔪᑦ ᑕᒪᐃᓐᓂᒃ ᖁᕝᕙᕆᐊᕈᑎᓂᒃ ᐱᑎᑕᐅᓗᑎᒃ ᒥᒃᖠᒋᐊᖅᑕᐅᔪᓄᑦ ᖃᓄᐃᓕᐅᖅᑐᖃᓚᐅᖅᑎᓪᓗᒍ ᐱᔪᓐᓇᕐᓂᖃᕐᕕᖓᓂ, ᐅᑯᐊᓗ ᐃᓕᓴᕆᔭᐅᓪᓗᑎᒃ ᓄᓇᐅᑉ ᐊᓯᐊᓄᑦ ᐊᐅᓪᓚᖅᑎᑦᑎᓃᑦ ᐅᑯᓂᖓ, ᐊᒻᒪᓗ ᐊᐅᓚᐃᓐᓇᖅᑎᑕᐅᖁᓪᓗᒋᑦ ᐅᑯᐊ, ᑲᓇᑕᒥ ᓴᓇᕝᕖᑦᐊᑐᓕᖅᑎᑕᐅᓯᒫᓂᓕᖅᑐᑦ.

ᐅᐊᓕᓂᕐᒥ ᓯᕗᓕᖅᑎᑦ ᐅᖃᐅᓯᖃᓚᐅᖅᐳᑦ ᓯᕘᕋᓇᖅᑐᓂᒃ ᓯᓚ ᐊᓯᔾᔨᖅᐸᓪᓕᐊᔪᒧᑦ ᓴᖅᑭᔮᖅᑐᑦ ᓄᓇᒥᙶᖅᑐᑦ ᐊᕙᑎᑦᑎᓐᓂ, ᐃᓄᖕᓄᑦ ᖃᓄᐃᙱᑦᑎᐊᕈᓯᑦ ᐊᒻᒪ ᐊᑦᑕᕐᓇᖅᑕᐃᓕᒪᓂᖅ, ᐊᐅᓚᔪᓐᓇᐅᑎᑦ, ᐊᒻᒪ ᒪᑭᒪᔾᔪᑎᑦ. ᐅᖃᐅᓯᖃᓚᐅᖅᐳᑦ ᐱᓕᕆᐊᖑᖔᕈᓐᓇᖅᑐᓂᒃ ᐱᔪᓐᓇᕐᓂᖅᑖᖅᑎᓪᓗᒋᑦ ᑲᓇᑕᒥ ᓯᓚᐅᑉ ᐃᓕᖅᑯᓯᖓᓐᓂ ᐊᒻᒪ ᒪᑭᒪᔾᔪᑎᓄᑦ ᐅᑎᖅᑎᑕᐅᔪᒃᓴᓂᒃ ᑮᓇᐅᔭᓂᒃ ᓴᖅᑭᑦᑎᔪᒪᓪᓗᑎᒃ ᓴᙱᓂᖅᓴᒥᒃ, ᓴᓗᒪᓂᖅᓴᒥᒃ, ᐊᒻᒪ ᐊᑭᒻᒪᑎᓂᖅᓴᒥᒃ ᑲᓇᑕᒥ ᐅᐊᓕᓂᕐᒥᐅᓂᒃ ᒪᑭᒪᔾᔪᑎᓄᑦ. ᑲᓇᑕᒥ ᐊᒻᒪ ᓄᓇᕗᒻᒥ ᐊᕕᒃᑐᖅᓯᒪᔪᑦ ᐱᓕᕇᓐᓇᕐᓂᐊᖅᐳᑦ ᓯᓚ ᐊᓯᔾᔨᖅᐸᓪᓕᐊᔪᒧᑦ ᐸᕐᓇᐅᑎᓂᒃ ᓴᖅᑭᑦᑎᔪᓂᒃ ᓄᓇᓕᖏᓐᓂᒃ ᐱᔭᕆᐊᖃᖅᑕᖏᓐᓂᒃ ᐊᒻᒪ ᓯᕗᓪᓕᐅᑎᒋᐊᖃᖅᑕᖏᓐᓂᒃ, ᐃᑲᔫᑎᔪᓂᒃ ᑲᓇᑕᒥ ᓯᓚᒧᑦ ᐅᖅᑰᓯᕙᓪᓕᐊᓐᓇᖅᑐᒧᑦ ᐳᔪᕐᓗᖕᓄᑦ ᑐᕌᒐᕆᔭᐅᔪᓄᑦ.

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑲᐃᑦ ᒪᒃᓚᐅᑦ
ᐱᕙᓪᓕᐊᔪᓄᑦ ᑎᑎᕋᖅᑎ ᓯᕗᓕᖅᑎ ᓴᕕᑲᑖᕐᒧᑦ
867-975-5059
cmacleod@gov.nu.ca