ᐅᖃᓚᐅᑎᓯᐅᑏᑦ
LogoHome

You are here

ᐹᓪ ᖁᐊᓴ

ᓯᕗᓕᖅᑎ ᓄᓇᕗᒻᒥ

ᓯᕗᓕᖅᑎ ᐹᓪ ᖁᐊᓴ ᒪᓕᒐᓕᐅᖅᑎᐅᖃᑎᒥᓂᒃ ᓂᕈᐊᖅᑕᐅᓚᐅᖅᐳᖅ ᓄᕕᐱᕆ 17, 2017-ᒥ ᑕᓪᓕᒪᖓᓂ ᒪᓕᒐᓕᐅᕐᕕᖕᒥ ᓄᓇᕗᒻᒥ ᐅᑭᐅᖅᑕᖅᑑᑉ ᐊᕕᒃᑐᖅᓯᒪᓂᖓᓂ ᓯᕗᓕᖅᑎᐅᓂᕐᒧᑦ. ᐊᖏᖅᑎᑕᐅᓚᐅᖅᐳᖅ ᓄᓇᕗᒻᒥ ᑎᓴᒪᒋᔭᐅᓪᓗᓂ ᓯᕗᓕᖅᑎᐅᓂᕐᒧᑦ ᓄᕕᐱᕆ 21, 2017-ᒥᑦ.

ᓯᕗᓕᖅᑎ ᖁᐊᓴ ᓯᕗᓪᓕᖅᐹᒥ ᓂᕈᐊᖅᑕᐅᓚᐅᖅᐳᖅ ᑭᒃᑯᑐᐃᓐᓇᑦ ᓂᕈᐊᖅᑎᓪᓗᒋᑦ ᐅᑐᐱᕆ 28, 2013-ᒥᑦ, ᑭᒡᒐᖅᑐᐃᖁᔭᐅᓪᓗᓂ ᒪᓕᒐᓕᐅᖅᑎᐅᓗᓂ ᐊᒡᒍᕐᒧᑦ. ᓂᕈᐊᖅᑕᐅᓚᐅᖅᐳᖅ ᒥᓂᔅᑕᓄᑦ ᑲᑎᒪᔨᐅᓂᕐᒧᑦ ᑎᓴᒪᖓᓐᓂ ᒪᓕᒐᓕᐅᕐᕕᖕᒥ ᑲᑎᒪᑎᓪᓗᒋᑦ ᒥᓂᔅᑕᐅᓕᖅᖢᓂ ᐃᓕᓐᓂᐊᕐᓂᓕᕆᓂᕐᒧᑦ, ᒥᓂᔅᑕ ᑲᒪᒋᔭᒃᓴᓕᒃ ᓄᓇᕗᒻᒥ ᓯᓚᑦᑐᖅᓴᕐᕕᖕᒧᑦ ᐊᒻᒪ ᒐᕙᒪᒃᑯᑦ ᐊᐅᓚᑦᑎᔩᑦ ᓯᕗᓕᖅᑎᖓᓄᑦ.

ᓯᕗᓕᖅᑎ ᖁᐊᓴ ᖃᔅᓯᑲᓪᓚᖕᓂᒃ ᐱᓕᕆᕝᕕᖃᖃᑦᑕᖅᓯᒪᔪᖅ ᐃᖅᑲᓇᐃᔮᕆᔭᒥᓂ. 1980−ᖏᓐᓃᑎᓪᓗᒍ, ᐹᓪ ᖁᐊᓴ ᑐᙵᕕᒃ ᐃᓚᒌᓴᒃᑯᓐᓄᑦ ᑭᒡᒐᖅᑐᐃᔨᐅᓚᐅᖅᓯᒪᔪᖅ ᓄᓇᑖᕐᓂᕐᒧᑦ ᐋᔩᖃᑎᖃᖅᑎᓪᓗᒋᑦ ᑲᓇᑕᐅᑉ ᒐᕙᒪᖓᓂ. ᑕᒪᓐᓇ ᑲᔪᓯᕙᓪᓕᐊᑎᓪᓗᒍ ᐊᑐᖅᑕᐅᓚᐅᖅᓯᒪᙱᑦᑐᒥᑦ ᐊᑐᓕᓚᐅᖅᐳᑦ 1993-ᒥ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᒥ ᐊᑎᓕᐅᖅᑕᐅᓪᓗᓂ. ᓯᕗᓕᖅᑎ ᖁᐊᓴ ᐊᖓᔪᖅᑳᖑᖃᑕᐅᔪᓂᑦ ᐊᑎᓕᐅᖅᑎᐅᖃᑕᐅᓚᐅᖅᐳᖅ ᐊᖏᖃᑎᒌᒍᑎᒧᑦ ᐱᔪᓐᓇᕐᓂᕆᔭᒥᓂ ᐋᔩᖃᑎᒌᒃᑎᒻᒪᕆᐅᓪᓗᓂ ᐊᒻᒪ ᐊᖓᔪᖅᑳᖑᓪᓗᓂ ᑐᙵᕕᒃ ᐃᓚᒌᓴᓄᑦ ᓄᓇᕗᒻᒧᑦ, ᑭᖑᓂᐊᒍᓪᓗ ᓄᓇᕗᑦ ᑐᙵᕕᒃᑰᓕᖅᖢᑎᒃ.

ᓯᕗᓕᖅᑎ ᖁᐊᓴ ᓄᓇᕗᑦ ᑐᙵᕕᒃᑯᓐᓄᑦ ᐊᖓᔪᖅᑳᕆᔭᐅᓚᐅᖅᐳᖅ 2000-ᒥᑦ 2002-ᒧᑦ ᐊᒻᒪ ᑭᒡᒐᖅᑐᐃᔨᐅᓪᓗᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᖅᑖᕐᓂᖏᓐᓄᓪᓗ ᐊᖏᕈᑎᒥ ᐋᔩᖃᑎᖃᖅᑎᓪᓗᒋᑦ ᐅᔭᕋᖕᓂᐊᕐᕕᖕᓂ ᓄᓘᔮᒡᓂ ᓴᕕᕋᔭᒃᓴᓕᕆᓂᖅ ᐱᔾᔪᑎᒋᓪᓗᒍ. ᐃᒡᓗᓕᖕᒥᑦᑕᐅᖅ ᒪᐃᔭᐅᓚᐅᖅᓯᒪᖕᒥᔪᖅ ᐊᒻᒪ ᐊᖓᔪᖅᑳᕆᔭᐅᓪᓗᓂ ᓄᓇᕗᒻᒥ ᕼᐋᒪᓚᐃᑦ ᑲᑐᔾᔨᖃᑎᒌᖏᓐᓄᑦ.

ᓯᕗᓕᖅᑎ ᖁᐊᓴ ᐃᖅᑲᓇᐃᔮᖃᖃᑦᑕᖅᓯᒪᖕᒥᔪᖅ ᐅᑯᓂᖓ ᐊᖓᔪᖅᑳᕆᔭᐅᓪᓗᓂ ᐃᓄᐃᑦ ᑕᑯᓐᓇᒐᒃᓴᓕᕆᔨᓄᑦ, ᐃᒡᓗᓕᒃ ᐃᓱᒪ ᑕᕐᕆᔭᐅᓯᐅᖅᑎᒃᑯᓐᓄᑦ, ᓄᓇᕗᒻᒥ ᑕᕐᕆᔭᐅᓯᐅᖅᑐᓕᕆᔨᑦ ᑲᑐᔾᔨᖃᑎᒌᓄᑦ, ᓰᐲᓰ ᐅᑭᐅᖅᑕᖅᑐᒥ ᐊᒻᒪ ᐊᔾᔩᑦ ᑐᓴᐅᒪᔪᓕᕆᔨᑦ ᑲᑐᔾᔨᖃᑎᒌᓄᑦ. ᒪᓕᒐᓕᐅᕐᕕᖕᒧᑦ ᓂᕈᐊᖅᑕᐅᓚᐅᙱᑎᓪᓗᒍ, ᐹᓪ ᖁᐊᓴ ᐃᒃᓯᕙᐅᑕᐅᓚᐅᖅᓯᒪᔪᖅ ᓄᓇᕗᒻᒥ ᐸᕐᓇᐃᔨᑦ ᑲᑎᒪᔨᖏᓐᓄᑦ, ᐱᓕᕆᕝᕕᒋᔭᐅᔪᖅ ᑭᒃᑯᑐᐃᓐᓇᑦ ᒐᕙᒪᖓᓄᑦ ᓴᖅᑭᑕᐅᓚᐅᖅᓯᒪᔪᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑎ ᒪᓕᒃᖢᒍ. ᐹᓪ ᖁᐊᓴ ᑲᑎᒪᔨᐅᖃᑕᐅᓚᐅᖅᓯᒪᖕᒥᔪᖅ ᓄᓇᕗᒻᒥ ᓇᖕᒥᓂᖃᖅᑐᓄᑦ ᐊᑐᖅᑐᐊᕐᕕᖕᒥ ᐊᒻᒪ ᓄᓇᕗᒻᒥ ᐱᓕᒻᒪᒃᓴᖅᑐᓕᕆᔨᑦ ᑲᑎᒪᔨᖏᓐᓄᑦ.

ᓯᕗᓕᖅᑎ ᖁᐊᓴ ᐃᓕᓴᐱ−ᒥᑦ ᓄᓕᐊᖃᖅᑐᖅ ᐊᕐᕕᓂᓕᖕᓂᒃ ᕿᑐᕐᙵᖃᖅᖢᑎᒃ ᐊᒻᒪ ᖁᓕᓪᓗ ᒪᕐᕉᖕᓂᒃ ᐃᕐᙳᑕᖃᖅᖢᑎᒃ. ᐹᓪ ᖁᐊᓴ ᐅᑯᓂᖓ ᐊᓕᐊᓇᐃᒋᔭᖃᖅᑐᖅ ᐊᖑᓇᓱᖕᓂᖅ, ᐃᖃᓪᓕᐊᕐᓂᖅ ᐊᒻᒪ ᑐᓴᕐᓈᕐᓂᖅ.