ᐅᖃᓚᐅᑎᓯᐅᑏᑦ

You are here

ᐊᓂᖅᓵᖅᑐᕐᓂᒃᑯᑦ ᖃᓂᒪᓐᓇᖅ-19 ᐃᓕᓐᓂᐊᕐᓂᓕᕆᔨᒃᑯᓐᓄᑦ ᓄᑖᙳᕆᐊᖅᓯᒪᔪᑦ

ᔪᓚᐃ 27, 2020

ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᓕᕆᕝᕕᖓ - ᔪᓚᐃ 27, 2020

ᐅᓪᓗᑐᐃᓐᓇᐅᑎᓪᓗᒍ, ᔪᓚᐃ 24−ᒥᑦ ᐃᓕᓐᓂᐊᕐᓂᓕᕆᔨᒃᑯᑦ ᓴᖅᑭᑦᑎᓚᐅᕐᐳᑦ 24-21ᒧᑦ ᓄᓇᕗᒻᒥᑦ ᐃᓕᓐᓂᐊᕐᕖᑦ ᒪᑐᐃᕐᓂᕆᓛᖅᑕᖏᓐᓄᑦ ᐸᕐᓇᐅᑎᒥᑦ: ᐋᓐᓂᐊᖃᕐᓇᙱᑦᑐᓕᕆᓂᖅ ᐊᑦᑕᕐᓇᖅᑕᐃᓕᒪᓂᕐᓗ.

ᓲᖃᐃᒻᒪ ᓇᓗᓇᐃᕐᑕᐅᓯᒪᔪᖃᙱᒻᒪᑦ ᐸᓴᒋᔭᐅᔪᖃᕋᓂᓗ ᓄᕙᒡᔪᐊᕐᓇᖅ-19−ᒥᑦ ᓄᓇᕗᒻᒥᑦ, ᐃᓕᓐᓂᐊᕐᕕᓕᒫᑦ ᐅᒃᑯᐃᓛᕐᑐᑦ, ᐋᖅᑭᒃᓱᖅᑕᐃᓯᒪᓂᒃᑯᑦ, ᓄᑖᒧᑦ ᐃᓕᓐᓂᐊᕐᓇᐅᑉ ᐊᕐᕌᒍᐊᓂᑦ, ᑭᓯᐊᓂ ᐅᖃᕐᐸᑦ ᐋᓐᓂᖃᕐᓇᙱᑦᑐᓕᕆᔨᒻᒪᕆᒃ.

ᖃᐅᔨᓇᓱᒡᓗᑎᒃ ᖃᖓ ᐃᓕᓐᓂᐊᕐᕕᔅᓯ ᐅᒃᑯᐃᓛᕐᒪᖔᑦ ᐃᓕᓐᓂᐊᕐᓂᓕᕆᔨᒃᑯᓪᓗ 2020-21 ᓄᓇᕗᒻᒥᑦ ᐃᓕᓐᓂᐊᕐᕖᑦ ᒪᑐᐃᕐᓂᕆᓛᖅᑕᖏᓐᓄᑦ ᐸᕐᓇᐅᑎ, ᐅᕗᙵᐅᓗᑎᑦ: https://gov.nu.ca/education/information/2020-21-opening-plan-nunavut-schools

ᐸᕐᓇᐃᓂᖅ 2020-21 ᐃᓕᓐᓂᐊᕐᓇᒧᑦ ᐊᕐᕌᒍᒧᑦ

  • ᐃᓕᓐᓂᐊᕐᕕᓕᒫᑦ ᐊᖅᑭᒃᑕᐅᓯᒪᕗᑦ ᐅᒃᑯᐃᕐᕕᒋᓂᐊᖅᑕᖏᑦ, ᐊᑐᕆᐊᓕᒃ 1 ᒪᓕᒡᓗᒍ, 2020-21−ᒥ ᐃᓕᓐᓂᐊᕐᓇ ᐊᕐᕌᒍᒥ, ᑭᓯᐊᓂ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᖕᒧᑦ ᑎᓕᔭᐅᒃᐸᑕ. 
  • ᐸᕐᓇᐅᑎᒥᑦ ᑎᓴᒪᓂᒃ ᐊᑐᕆᐊᓕᖕᓂᑦ ᓇᓗᓇᐃᖅᓯᒪᕗᖅ ᑐᑭᒧᐊᒃᑎᑦᑎᓂᐊᖅᑐᓂᒃ ᐃᓕᓐᓂᐊᕐᕖᑦ ᐊᐅᓚᓂᕆᔭᖏᓐᓂᒃ, ᐊᒃᑐᖅᑕᐅᓯᒪᓂᖏᑦ ᒪᓕᒡᓗᒋᑦ ᓄᕙᕐᔪᐊᕐᓇᖅ-4−ᒧᑦ ᐊᑐᓂ ᓄᓇᓕᖕᓂ.
  • ᐋᓐᓂᐊᖃᖕᓇᙱᑦᑐᓕᕆᔨᒻᒪᕆᒃ ᖃᐅᔨᓇᓱᓛᕐᐳᖅ ᓄᓇᓖᑦ ᐊᑐᕐᐸᓪᓕᐊᔭᖏᓐᓄᐊᕐᐸᓪᓕᐊᓂᒃᓴᖏᓐᓂᑦ.
  • ᑐᓴᒃᑲᓐᓂᒐᒃᓴᓄᑦ, ᖃᐅᔨᒋᐊᕐᓗᒍ ᐃᓕᓐᓂᐊᕐᓂᓕᕆᔨᒃᑯᑦ ᐃᑭᐊᖅᑭᕕᐊ ᓈᓚᒃᐸᒡᓗᓯᓗ ᓄᓇᕗᑦ ᒐᕙᒪᒃᑯᖏᑦᑕ ᐱᕙᓪᓕᐊᔪᓂᒃ ᑐᓴᒐᒃᓴᓕᐅᓕᕌᖓᒥᒃ.

ᐃᓕᓴᐃᔨᑦ/ᐃᓕᓐᓂᐊᕐᕕᖕᓂᑦ ᐃᖅᑲᓇᐃᔭᖅᑎᑦ

  • ᐃᓕᓴᐃᔨᑖᕐᑐᕐᓂᖅ ᐊᖑᒻᒪᑎᔪᐃᑦ 2020-21 ᐃᓕᓐᓂᐊᕐᓂᐅᑉ ᐊᕐᕌᒍᐊᓄᑦ.
    • ᒫᓐᓇ 30−ᓂᑦ ᐅᒃᑯᐃᖓᔪᓕᑦ ᐃᓕᓴᐃᔨᒃᓴᓄᑦ ᐃᖅᑲᓇᐃᔮᒃᓴᓕᑦ ᓄᓇᕗᒥᑦ.
  • ᐃᓕᓴᐃᔩᑦ ᐃᓕᓐᓂᐊᕐᕕᖕᒥᓪᓗ ᐃᖅᑲᓇᐃᔭᖅᑎᑦ ᓇᓗᓇᐃᕐᑕᐅᓯᒪᙱᒻᒪᑕ ᐱᕕᔾᔪᐊᑎᑐᑦ ᐊᒻᒪᓗ ᒪᓕᒋᐊᖃᕆᓪᓗᑎᒃ ᐊᔾᔨᑐᐃᓐᓇᖏᓐᓂᑦ ᐃᓄᑑᓂᕐᓂᑦ ᐊᓯᖏᑎᑐᑦ ᓄᓇᕗᒻᒥᐅᑎᑐᑦ ᐅᑎᕐᐸᓪᓕᐊᔪᑦ ᓄᓇᕗᒻᒧᑦ.
  • ᐱᓕᕆᕝᕕᐅᔪᖅ ᐱᓕᕆᖃᑎᖃᓚᐅᕐᑐᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂᑦ ᐃᓂᒃᓴᓕᐅᕐᖢᑎᒃ ᑐᔪᕐᒥᕕᖕᓂᑦ ᐅᑎᕐᕕᒃᓴᖏᓐᓂᒡᓗ ᑖᒃᑯᐊᓗ ᓄᓇᕗᑦ ᓯᓚᑖᓂᕐᒥᐅᑦ ᐃᓕᓐᓂᐊᕐᕕᖕᓂᑦ ᐃᖅᑲᓇᐃᔭᖅᑎᑦ ᐅᑎᖁᓪᓗᒋᑦ ᐱᒋᐊᖕᓂᖓᓂᑦ ᐃᓕᓐᓂᐊᕐᓇᐅᑉ ᐊᕐᕌᒍᐊᓂᑦ.
 

 

ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐊᒻᒪ ᐊᑦᑕᕐᓇᖅᑕᐃᓕᒪᓂᕐᒧᑦ ᐊᔪᖅᑎᑦᑎᒍᑕᐅᓂᐊᖅᑐᑦ

  • ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐊᒻᒪ ᐊᑦᑕᕐᓇᖅᑕᐃᓕᒪᓂᕐᒧᑦ ᐊᔪᖅᑎᑦᑎᒍᑕᐅᔪᑦ ᐊᔾᔨᒌᙱᑦᑑᑕᐅᖕᒪᑕ ᐊᒥᓱᓂᑦ ᐱᔾᔪᑎᓕᖕᓄᑦ:
    • ᐋᖅᑭᒃᓯᒪᑦᑎᐊᕆᐊᖃᖅᐳᖅ ᐅᓗᕆᐊᓇᕐᓂᖓ ᐊᐃᑦᑐᕐᓗᐃᑐᐃᓐᓇᕆᐊᓖᑦ ᓯᐊᒻᒪᒃᐸᓪᓕᐊᑐᐃᓐᓇᕆᐊᓕᒡᓗ ᓄᕙᒡᔪᐊᕐᓇᖅ-19 ᓄᑕᖅᑲᓂᑦ ᐃᓕᓐᓂᐊᕐᕖᑦ ᒪᑐᔭᐅᑐᐃᓐᓇᕆᐊᖃᓕᕐᓗᑎᒃ ᑎᒥᒃᑯᑦ ᐃᓱᒪᒃᑯᓪᓗ ᖃᓄᐃᙱᑦᑎᐊᖁᓪᓗᒋᑦ.   
    • ᒫᓐᓇ ᖃᐅᔨᔾᔪᑕᐅᔪᑦ ᓇᓗᓇᐃᖅᓯᕗᑦ ᓄᑕᖅᑲᑦ ᐊᑦᑕᕐᓇᙱᓐᓂᖅᓴᒦᑐᐃᓐᓇᕆᐊᓖᑦ ᓄᕙᒡᔪᐊᕐᓇᖅ-19−ᒧᑦ ᐋᓐᓂᐊᕐᓇᖅᑐᒧᑦ ᐊᒻᒪ ᐊᐃᑦᑐᕐᓗᐃᖏᓐᓂᖅᓴᐅᔪᓐᓇᖅᖢᑎᒃ ᐊᓯᒥᖕᓄᑦ. 
    • ᐃᓕᓐᓂᐊᕐᕖᑦ ᐊᐅᓚᑕᐅᖕᒪᑕ, ᐊᐃᑦᑐᕐᑐᖃᕈᓂ ᖁᐱᕐᕈᐊᕐᔪᖕᒥᑦ ᐊᐅᓚᑕᐅᔪᓐᓇᕐᐳᑦ ᖃᐅᔨᓴᑲᐅᕐᑐᕐᓵᓕᔪᓐᓇᕐᓗᑎᒃᓗ.
  • ᐃᓕᓐᓂᐊᕐᓂᓕᕆᔨᒃᑯᑦ, ᐋᓐᓂᐊᖃᖅᑕᐃᓕᒪᔪᓕᕆᔨᒻᒪᕆᒃ, ᐃᓕᓐᓂᐊᕐᑐᓕᕆᔨᒃᑯᑦ/ᐅᐃᕖᑦ ᐃᓕᓐᓂᐊᕐᑐᓕᕆᓂᕐᒧᑦ ᑲᑐᔾᔨᖃᑎᒌᖏᑦ ᓄᓇᕗᒻᒥ ᐃᓚᐅᓚᐅᕐᑐᑦ ᐋᖅᑭᒃᓱᐃᑎᓪᓗᒋᑦ ᐋᓐᓂᐊᖅᑕᐃᓕᒪᓂᖕᒧᑦ ᐊᑦᑕᕐᓇᖅᑕᐃᓕᒪᓂᖕᒧᓪᓗ ᐸᖕᓇᐅᓯᐅᕐᑎᓪᓗᒋᑦ.
  • ᓴᓗᒻᒪᕐᓴᐃᒋᐊᓪᓚᒃᑕᐅᖃᑦᑕᕐᓂᐊᕐᑐᑦ ᐃᓕᓐᓂᐊᕐᕕᓕᒫᑦ, ᓴᓗᒻᒪᕐᓴᐃᔩᓪᓗ ᑐᓂᔭᐅᓂᐊᕐᖢᑎᒃ ᒪᓕᒐᒃᓴᓂᑦ ᐱᓕᒻᒪᒃᓴᕐᑕᐅᓗᑎᒃᓗ.

ᐃᓕᑦᑎᕙᓪᓕᐊᓕᖅ ᐃᓕᓐᓂᐊᕐᑎᑦᑎᓂᕐᓗ

  • ᐱᓕᕆᐊᖑᓪᓗᐊᑕᓛᕐᑐᑦ ᓯᕗᓪᓕᕐᓂᑦ ᑕᖅᑭᐅᔪᓂᑦ ᐃᓕᓐᓂᐊᕐᓂᖅ ᐅᑎᕐᓂᖕᒧᑦ, ᖃᐅᔨᓴᕐᓂᖕᒧᑦ, ᐃᓕᓐᓂᐊᕐᑎᑦᑎᓂᖕᒧᓪᓗ.
  • ᐃᓕᓐᓂᐊᕐᕕᖕᒥᑦ ᐃᖅᑲᓇᐃᔭᖅᑎᑦ ᑐᓂᔭᐅᓛᕐᑐᑦ ᒪᓕᒐᒃᓴᓂᑦ ᐃᓕᓐᓂᐊᕈᑎᒃᓴᓂᒡᓗ, ᐃᓕᓐᓂᐊᕐᑎᑦᑎᓂᖕᒧᑦ, ᖃᐅᔨᓴᕐᓂᖕᒧᓪᓗ, ᐃᓚᐅᓪᓗᓂ ᑐᓴᐅᒪᔭᒃᓴᑦ ᐅᖓᓯᒃᑐᒥᑦ ᐃᓕᓐᓂᐊᕐᑎᑦᑎᓂᖕᒧᑦ, ᓂᕆᐅᒋᔭᓪᓗ ᑐᓴᐅᒪᖃᑎᒌᖕᓂᖕᒧᑦ ᐃᓕᓐᓂᐊᕐᑎᓂᑦ.

ᐃᓅᖃᑎᒥᑦ ᐅᖓᓯᒌᖃᑦᑕᐅᑎᓂᖅ ᒪᑐᐊᖅᓯᒪᔾᔪᑏᓪᓗ

  • ᐃᓅᖃᑎᒥᑦ ᐅᖓᓯᒌᖃᑦᑕᐅᑎᔭᕆᐊᖃᕐᓂᐅᔪᖅ ᐊᑐᖅᑕᐅᓂᐊᖅᑐᖅ ᐸᕐᓇᐅᑎᐅᔪᒥᑦ ᓇᓪᓕᐊᓐᓃᓐᓂᖏᑦ ᓄᓇᓕᒃ ᒪᓕᓪᓗᒍ.
  • ᑭᓯᐊᓂᓕ, ᐃᓕᓐᓂᐊᖅᑏᑦ ᐃᓚᐃᓐᓇᖏᑦ ᐃᓕᓐᓂᐊᕆᐊᖅᑎᑕᐅᓗᑎᑦ ᐃᑲᔫᑎᖃᕐᓂᐊᖅᑐᖅ ᑲᑎᙵᖃᑦᑕᐅᑎᖏᓐᓂᖅᓴᐅᖁᓪᓗᒋᑦ, ᐱᔭᕆᐊᖃᑐᐊᖅᐸ ᑕᐃᒫᒃ.
  • ᐱᓕᕆᕝᕕᐅᔪᖅ ᐱᓕᕆᖃᑎᖃᖕᓂᐊᕐᑐᑦ ᐃᓕᓐᓂᐊᕐᕕᖕᓂᑦ ᐃᓕᓐᓂᐊᕐᑐᓕᕆᔨᒃᑯᓐᓂᒡᓗ ᐊᑐᕆᐊᓕᖕᒦᓕᕈᑎᒃ 2−ᓗ 3−ᓗ ᐱᔾᔪᑎᓖᒃ ᐅᖓᓯᒋᐊᖃᖕᓂᖕᓂᑦ, ᐃᓚᐅᓪᓗᑎᒃ ᐋᖅᑭᒃᓱᐃᓂᕐ ᐃᓕᓐᓂᐊᕐᑎᑦ ᐃᑲᔪᕐᑎᖏᑎᒍᑦ.
  • ᖃᖓᑐᐃᓐᓇᒃᑯᑦ, ᓱᕈᓰᑦ ᒪᑐᐊᖅᓯᒪᖁᔭᐅᙱᓚᑦ.
    • ᑭᓯᐊᓂ ᐱᖁᔭᐅᓂᖏᓐᓄᑦ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᖕᒧᑦ, ᐃᓛᓐᓂᒃᑯᑦ ᐃᓕᓐᓂᐊᕐᑎᑦ ᒪᑐᐊᕐᓯᒪᓪᓗᐊᕋᔭᕐᑐᑦ.
    • ᐃᓚᖏᑦ ᐃᓕᓐᓂᐊᕐᕕᖕᒥᑦ ᐃᖅᑲᓇᐃᔭᕐᑎᑦ ᒪᑐᐊᕐᓯᒪᑐᐃᓐᓇᕆᐊᓕᑦ, ᐅᖓᓯᒍᓐᓇᙱᒃᑯᑎᒃ ᐱᔭᕆᐊᖃᕐᑎᑕᐅᓗᓂ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᖕᒧᑦ.
  • ᐃᓕᓐᓂᐊᕐᕕᖕᓂᑦ ᑲᑎᖃᑦᑕᔾᔮᙱᓚᑦ ᑲᑎᙵᐅᖁᓇᒋᑦ ᐃᓕᓐᓂᐊᕐᑎᑦ.

 


ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᓕᕆᕝᕕᖓ - ᔪᓚᐃ 20, 2020

ᐃᓕᓐᓂᐊᕐᓂᓕᕆᔨᒃᑯᑦ ᓴᖅᑭᑦᑎᓂᐅᓕᖅᐳᑦ 2020-21−ᒥ ᐅᒃᑯᐃᖅᑕᐅᕝᕕᒃᓴᖓᓄᑦ ᐸᕐᓇᐅᑎᒥᒃ ᓄᓇᕗᒻᒥ ᐃᓕᓐᓂᐊᕐᕕᖕᓄᑦ ᑐᕌᖓᔪᒥᒃ ᔪᓚᐃ ᓄᙳᐊᓂ.

ᐃᖅᑲᓇᐃᔭᖅᑎᕗᑦ ᐃᓕᓐᓂᐊᖅᑎᕗᓪᓗ ᐊᑦᑕᕐᓇᖅᑕᐃᓕᒪᓂᖏᑦ ᐃᓕᓐᓂᐊᕐᓂᓕᕆᔨᒃᑯᓐᓄᑦ ᓯᕗᓪᓕᐅᔾᔭᐅᕗᖅ. ᐱᓕᕆᖃᑎᒌᑦᑎᐊᕐᓂᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᒃ, ᑐᑭᓯᓇᑦᑎᐊᖅᑐᓂᒡᓗ ᐊᑐᖅᑕᐅᔭᕆᐊᖃᕐᓗᓂ ᐋᓐᓂᐊᖅᑕᐃᓕᒪᓂᕐᒧᑦ ᐊᑦᑕᕐᓇᖅᑕᐃᓕᒪᓂᕐᒧᓪᓗ, ᐃᓕᓐᓂᐊᕐᓂᓕᕆᔨᒃᑯᑦ ᐃᓕᓐᓂᐊᖅᑎᖁᑎᑦᑎᓐᓂ ᐃᓕᓐᓂᐊᖁᔨᕗᑦ ᐊᑦᑕᕐᓇᙱᑦᑐᒥᑦ, ᐃᑲᔪᖅᑐᐃᔪᒥᓪᓗ.

 


ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᓕᕆᕝᕕᖓ - ᔪᓚᐃ 13, 2020

ᒫᑦᓯ 17−ᒥᓂᓂᑦ, ᐃᓕᓐᓂᐊᕐᕖᑦ ᒪᑐᓚᐅᖅᐳᑦ ᐃᓕᓐᓂᐊᕐᑎᓄᑦ, ᐃᓕᓐᓂᐊᕐᓂᓕᕆᔨᒃᑯᑦ ᐱᓕᕆᖃᑎᖃᑦᑎᐊᕐᓯᒪᐃᓐᓇᕐᑐᑦ ᐱᕙᒌᔭᐅᓪᓗᑎᒃ ᐊᒡᒋᖅᑐᒧᑦ 2020-21 ᐃᓕᓐᓂᐊᕐᓇᐅᑉ ᐊᕐᕌᒍᐊᓄᑦ, ᐱᓕᕆᐊᖃᓗᐊᕐᓗᑎᒃ ᓄᕙᒡᔪᐊᕐᓇᖅ-19 ᓄᓇᕐᔪᐊᒥᑦ ᖃᓂᒪᓐᓇᖅ.

ᑐᓴᒐᒃᓴᒃᑲᓐᓃᑦ ᐸᕐᓇᐅᑎᓄᑦ ᐊᑐᖅᑕᐅᔭᕆᐊᓕᖕᓄᓪᓗ ᐅᒃᑯᐃᕐᓂᐊᓕᕐᓗᓂ ᐃᓕᓐᓂᐊᕐᕖᑦ ᐊᑐᐃᓐᓇᐅᓛᖅᑐᑦ ᐃᓄᓕᒫᓄᑦ ᐱᐊᓂᒃᑕᐅᒃᐸᑕ. ᐃᓚᖃᕐᓂᐊᖅᑐᖅ ᓇᓗᓇᐃᔭᑦᑎᐊᕐᓯᒪᔪᓂᑦ ᐊᑐᖅᑕᐅᔭᕆᐊᓕᖕᓂᑦ ᐋᓐᓂᐊᖅᑕᐃᓕᒪᑎᑦᑎᓂᕐᒧᑦ ᐊᑦᑕᕐᓇᖅᑕᐃᓕᒪᓂᕐᒧᓪᓗ, ᐃᓕᓐᓂᐊᕐᓂᕐᓗ ᖃᐅᔨᓴᕐᓂᕐᓗ, ᐃᓕᓐᓂᐊᖅᑎᑦ ᐃᖅᑲᓇᐃᔭᖅᑎᓪᓗ ᖃᓄᐃᙱᑦᑎᐊᕐᓂᖏᑦ.

ᐃᓕᓐᓂᐊᕐᓂᓕᕆᔨᒃᑯᑦ ᓴᖅᑭᑦᑎᓂᐊᕐᑐᑦ ᓯᕗᓪᓕᖅᐹᒥᑦ ᑎᑎᖅᑲᒥᑦ ᐃᓕᓐᓂᐊᕐᕕᑦ ᐅᒃᑯᐃᓛᖕᓂᖓᑕ ᐸᕐᓇᐅᑖᓂ ᑕᖅᑭᐅᑉ ᓄᙳᐊᓂᑦ, ᕿᒥᕐᕈᔭᐅᓚᐅᕐᓗᓂ ᐋᓐᓂᐊᖃᖕᓇᙱᑦᑐᓕᕆᔨᒻᒪᕆᖕᒧᑦ ᐱᓕᕆᕝᕕᐅᔪᓪᓗ ᑐᓴᖅᓯᒪᓕᕐᓗᑎᒃ ᐃᓕᓐᓂᐊᕐᓂᕐᒧᑦ ᐱᖃᖃᑕᐅᔪᓂᑦ.

ᐃᖅᑲᓇᐃᔭᖅᑎᕗᑦ ᐃᓕᓐᓂᐊᖅᑎᕗᓪᓗ ᐊᑦᑕᕐᓇᖅᑕᐃᓕᒪᓂᖏᑦ ᐃᓕᓐᓂᐊᕐᓂᓕᕆᔨᒃᑯᓐᓄᑦ ᓯᓯᕗᓪᓕᐅᔾᔭᐅᕗᖅ. ᐱᓕᕆᖃᑎᒌᑦᑎᐊᕐᓂᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᒃ, ᑐᑭᓯᓇᑦᑎᐊᖅᑐᓂᒡᓗ ᐊᑐᖅᑕᐅᔭᕆᐊᖃᕐᓗᓂ ᐋᓐᓂᐊᖅᑕᐃᓕᒪᓂᕐᒧᑦ ᐊᑦᑕᕐᓇᖅᑕᐃᓕᒪᓂᕐᒧᓪᓗ, ᐃᓕᓐᓂᐊᕐᓂᓕᕆᔨᒃᑯᑦ ᐃᓕᓐᓂᐊᖅᑎᖁᑎᑦᑎᓐᓂ ᐃᓕᓐᓂᐊᖁᔨᕗᑦ ᐊᑦᑕᕐᓇᙱᑦᑐᒥᑦ, ᐃᑲᔪᖅᑐᐃᔪᒥᓪᓗ.

ᐱᖓᔪᐊᓂ ᔪᓚᐃ 15, ᑕᐃᕕᑦ ᔪᐊᓇᓯ, ᒥᓂᔅᑕ ᐃᓕᓐᓂᐊᕐᓂᓕᕆᓂᕐᒧᑦ, ᐊᒻᒪ ᓘᒃᑖᖅ ᒪᐃᑯᓪ ᐸᑕᓴᓐ, ᐊᓐᓂᐊᖃᕐᓇᙱᑦᑐᓕᕆᔨᒻᒪᕆᒃ, ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓂᒃ ᐅᖃᓘᑎᒃᑯᑦ ᑲᑎᒪᖃᑎᑲᕐᓂᐊᖅᑐᑦ, ᐅᐃᕖᑦ ᐃᓕᓐᓂᐊᖅᑐᓕᕆᓂᕐᒧᑦ ᑲᑎᒪᔨᖏᓐᓂᒃ ᓄᓇᕗᒻᒥ, ᐊᒻᒪ ᑲᑐᔾᔨᖃᑎᒌᑦ ᓄᓇᕗᒻᒥ ᐃᓕᓐᓂᐊᖅᑐᓕᕆᔨᒃᑯᓐᓂ ᐅᖃᐅᓯᖃᕐᓗᑎᒃ ᖃᓄᐃᙱᑦᑎᐊᕐᓂᕐᒧᑦ ᐊᑦᑕᕐᓇᖅᑕᐃᓕᒪᓂᕐᒧᓪᓗ ᐃᓱᒪᒋᔭᕆᐊᓕᖕᓂᒃ ᐃᓕᓐᓂᐊᖅᑐᓕᕆᔨᒃᑯᑦ ᐃᓕᓐᓂᐊᕐᕕᖕᓂ ᐅᒃᑯᐃᖅᓯᔪᒪᓂᕐᒧᑦ ᐸᕐᓇᐅᑎᒧᑦ ᐊᒃᑐᐊᓂᓕᖕᓂᒃ.

 


ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᓕᕆᕝᕕᖓ - ᔪᓚᐃ 6, 2020

ᒫᑦᓯ 17−ᒥᓂᓂᑦ, ᐃᓕᓐᓂᐊᕐᕖᑦ ᒪᑐᓚᐅᕐᐳᑦ ᐃᓕᓐᓂᐊᕐᑎᓄᑦ, ᐃᓕᓐᓂᐊᕐᓂᓕᕆᔨᒃᑯᑦ ᐱᓕᕆᖃᑎᖃᑦᑎᐊᕐᓯᒪᐃᓐᓇᕐᑐᑦ ᐱᕙᒌᔭᐅᓪᓗᑎᒃ ᐊᒡᒋᖅᑐᒧᑦ 2020-21 ᐃᓕᓐᓂᐊᕐᓇᐅᑉ ᐊᕐᕌᒍᐊᓄᑦ, ᐱᓕᕆᐊᖃᓗᐊᕐᓗᑎᒃ ᓄᕙᒡᔪᐊᕐᓇᖅ-19 ᓄᓇᕐᔪᐊᒥᑦ ᖃᓂᒪᓐᓇᖅ.

ᑐᓴᒐᒃᓴᒃᑲᓐᓃᑦ ᐸᖕᓇᐅᑎᓄᑦ ᐊᑐᕐᑕᐅᔭᕆᐊᓕᖕᓄᓪᓗ ᐅᒃᑯᐃᕐᓂᐊᓕᕐᓗᓂ ᐃᓕᓐᓂᐊᕐᕖᑦ ᐊᑐᐃᓐᓇᐅᓛᖅᑐᑦ ᐃᓄᓕᒫᓄᑦ ᐱᐊᓂᒃᑕᐅᒃᐸᑕ. ᐃᓚᖃᕐᓂᐊᖅᑐᖅ ᓇᓗᓇᐃᔭᑦᑎᐊᕐᓯᒪᔪᓂᑦ ᐊᑐᕐᑕᐅᔭᕆᐊᓕᖕᓂᑦ ᐋᓐᓂᐊᖅᑕᐃᓕᒪᑎᑦᑎᓂᖕᒧᑦ ᐊᑦᑕᖕᓇᖅᑕᐃᓕᒪᓂᖕᒧᓪᓗ, ᐃᓕᓐᓂᐊᕐᓂᖕᓗ ᖃᐅᔨᓴᖕᓂᕐᓗ, ᐃᓕᓐᓂᐊᕐᑎᑦ ᐃᖅᑲᓇᐃᔭᖅᑎᓪᓗ ᖃᓄᐃᙱᑦᑎᐊᖕᓂᖏᑦ.

ᐃᓕᓐᓂᐊᕐᓂᓕᕆᔨᒃᑯᑦ ᓴᖅᑭᑦᑎᓂᐊᕐᑐᑦ ᓯᕗᓪᓕᖅᐹᒥᑦ ᑎᑎᖅᑲᒥᑦ ᐃᓕᓐᓂᐊᕐᕕᑦ ᐅᒃᑯᐃᓛᖕᓂᖓᑕ ᐸᖕᓇᐅᑖᓂ ᑕᖅᑭᐅᑉ ᓄᙳᐊᓂᑦ, ᕿᒥᕐᕈᔭᐅᓚᐅᕐᓗᓂ ᐋᓐᓂᐊᖃᖕᓇᙱᑦᑐᓕᕆᔨᒻᒪᕆᖕᒧᑦ ᐱᓕᕆᕝᕕᐅᔪᓪᓗ ᑐᓴᖅᓯᒪᓕᕐᓗᑎᒃ ᐃᓕᓐᓂᐊᕐᓂᖕᒧᑦ ᐱᖃᖃᑕᐅᔪᓂᑦ.

ᐃᖅᑲᓇᐃᔭᖅᑎᕗᑦ ᐃᓕᓐᓂᐊᕐᑎᕗᓪᓗ ᐊᑦᑕᖕᓇᖅᑕᐃᓕᒪᓂᖏᑦ ᐃᓕᓐᓂᐊᕐᓂᓕᕆᔨᒃᑯᑦ ᓯᕗᓪᓕᐅᔾᔭᕆᕙᔾᔪᒃ. ᐱᓕᕆᖃᑎᒋᑦᑎᐊᖕᓂᒃᑯᑦ ᐋᓐᓂᐊᖃᖕᓇᙱᑦᑐᓕᕆᔨᒻᒪᕆᒃ, ᑐᑭᓯᓇᑦᑎᐊᕐᑐᓂᒡᓗ ᐊᑐᕐᑕᐅᔭᕆᐊᖃᕐᓗᓂ ᐋᓐᓂᐊᖅᑕᐃᓕᒪᓂᖕᒧᑦ ᐊᑦᑕᖕᓇᖅᑕᐃᓕᒪᓂᖕᒧᓪᓗ, ᐃᓕᓐᓂᐊᕐᓂᓕᕆᔨᒃᑯᑦ ᐃᓕᓐᓂᐊᕐᑎᖁᑎᑦᑎᓐᓂ ᐃᓕᓐᓂᐊᖁᔨᕗᑦ ᐊᑦᑕᖕᓇᙱᑦᑐᒥᑦ, ᐃᑲᔪᖅᑐᐃᔪᒥᓪᓗ.

 


ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᓕᕆᕝᕕᖓ - ᒪᐃ 28, 2020

ᐃᓕᓐᓂᐊᕐᓂᓕᕆᔨᒃᑯᑦ ᐋᖅᑭᒃᓯᓯᒪᕗᑦ ᐊᑐᖅᑕᐅᔪᓐᓇᖅᑐᓂᒃ ᐸᐃᕆᕝᕕᑦ ᒪᑐᐃᖅᑕᐅᒃᑲᓐᓂᕋᔭᕐᓂᖏᓐᓄᑦ,ᐃᓚᖃᐊᖃᖅᖢᓂ ᑕᒪᓐᓇ ᑐᓴᖅᑕᐅᔪᒃᓴᓂᒃ ᐱᐅᓯᒋᐊᖅᓯᒪᔪᓂᒃ ᓴᓗᒻᒪᖅᓴᐃᓇᔭᕐᓂᕐᒥᒃ ᓴᓗᒪᓇᔭᕐᓂᕐᒥᒡᓗ, ᑎᒥᒃᑯᓪᓗ ᐅᖓᓯᒌᒋᐊᖃᖅᐸᖕᓂᕐᒥᒃ ᐊᔾᔭᖅᓯᔪᖃᕌᖓᑦ ᐊᐃᒃᖠᖅᑐᖃᕌᖓᓪᓘᓐᓃᑦ.  ᑐᑭᓯᒋᐊᒃᑲᓐᓂᕈᒪᒍᕕᑦ ᐅᕗᙵᐅᓗᑎᑦ:

English - https://gov.nu.ca/education/information/child-care-facility-guidelines-re-opening-june-1-2020

Inuktitut - https://gov.nu.ca/iu/education/information/pairivvinnut-atuagait-matuikanniqpata-juuni-1-2020mit

Inuinnaqtun - https://gov.nu.ca/in/ilinniaqtuliqiyikkut/information/nutaqqiqiviit-igluqpaini-maligahat-angmaffaaqata-imaruqtirviani-1

French - https://gov.nu.ca/fr/education/information/directives-pour-la-reouverture-des-etablissements-de-garde-denfants-le-1er

 


ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᓕᕆᕝᕕᖓ - ᒪᐃ 25, 2020

ᐃᓕᓐᓂᐊᕐᓂᓕᕆᔨᒃᑯᑦ ᐋᖅᑭᒃᓯᓯᒪᕗᑦ ᐊᑐᖅᑕᐅᔪᓐᓇᖅᑐᓂᒃ ᐸᐃᕆᕝᕕᑦ ᒪᑐᐃᖅᑕᐅᒃᑲᓐᓂᕋᔭᕐᓂᖏᓐᓄᑦ,ᐃᓚᖃᐊᖃᖅᖢᓂ ᑕᒪᓐᓇ ᑐᓴᖅᑕᐅᔪᒃᓴᓂᒃ ᐱᐅᓯᒋᐊᖅᓯᒪᔪᓂᒃ ᓴᓗᒻᒪᖅᓴᐃᓇᔭᕐᓂᕐᒥᒃ ᓴᓗᒪᓇᔭᕐᓂᕐᒥᒡᓗ, ᑎᒥᒃᑯᓪᓗ ᐅᖓᓯᒌᒋᐊᖃᖅᐸᖕᓂᕐᒥᒃ ᐊᔾᔭᖅᓯᔪᖃᕌᖓᑦ ᐊᐃᒃᖠᖅᑐᖃᕌᖓᓪᓘᓐᓃᑦ.

ᐃᓕᓐᓂᐊᕐᓂᓕᕆᔨᒃᑯᑦ ᖃᐅᔨᒋᐊᕐᕕᖃᕐᓂᐊᖅᐳᑦ ᑕᒪᐃᓐᓄᑦ ᓚᐃᓴᓕᖕᓄᑦ ᐸᐃᕆᕝᕕᖕᓄᑦ ᐅᓪᓗᓂ ᐊᒡᒋᖅᐸᓪᓕᐊᔪᓂ.

 

ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᓕᕆᕝᕕᖓ - ᒪᐃ 08, 2020

ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᔨᑦᑎᕋᐅᑎᖏᑦ

ᐱᔪᓐᓇᐅᑎᖃᖅᑐᓄᑦ ᐸᐃᕆᕝᕕᖕᓄᑦ

  • ᒫᑦᓯ 17−ᒥᑦ ᐊᐃᕆᓕ 21, 2020−ᒧᑦ, ᓄᓇᕗᑦ  ᒐᕙᒪᖓᒃᑯᖏᑦ ᐱᑎᑦᑎᓚᐅᖅᐳᑦ ᓚᐃᓴᓕᖕᓂᒃ ᐸᐃᕆᕝᕕᖕᓂᒃ $885,000−ᓂᒃ ᐊᑭᓕᐅᑕᐅᓇᔭᖅᑐᓂᒃ ᐊᖓᔪᖅᑳᑦ ᐊᑭᓕᕋᔭᖅᑕᖏᓐᓂᒃ. ᑕᒪᓐᓇ ]ᖕᓇᐅᔭᖃᖅᑎᑦᑎᓂᖅ ᐊᔪᖅᑎᑦᑎᙱᓚᖅ ᐃᓂᒋᔭᐅᔪᓂᒃ ᐊᑭᓖᙱᓐᓇᖃᑦᑕᕈᓐᓇᕐᓂᕐᒥᒃ ᐃᖅᑲᓇᐃᔭᖅᑎᓂᒃ, ᓅᑉᐸᓪᓕᐊᓂᖏᓐᓂ ᑮᓇᐅᔭᑎᒍᑦ ᐃᑲᔪᖅᑐᖅᑕᐅᓂᕐᒧᑦ ᐱᓕᕆᐊᖑᕙᒃᑐᓄᑦ ᒪᓂᒪᑎᑕᐅᔪᓄᑦ ᑲᓇᑕᐅᑉ ᒐᕙᒪᖓᓂᑦ, ᓲᕐᓗ ᐅᑯᐊ, ᑲᓇᑕᒥ ᑐᐊᕕᕐᓇᖅᑐᖅᑕᖃᖅᑎᓪᓗᒍ ᑭᐅᓯᓂᕐᒧᑦ ᐱᕚᓪᓕᕈᑕᐅᕙᒃᑐᑦ ᐊᒻᒪᓗ ᑲᓇᑕᒥᐅᓄᑦ ᐊᑭᓕᖅᓱᖅᑕᐅᕙᖕᓂᕐᒧᑦ ᐃᑲᔫᓯᐊᕐᓂᕐᒧᑦ ᐱᓕᕆᐊᖑᔪᒥ.
  • ᑖᓐᓇ ᑲᓇᑕᒥᐅᓄᑦ ᐊᑭᓕᖅᓱᖅᑕᐅᕙᔭᖕᓂᕐᒧᑦ ᐃᑲᔫᓯᐊᕐᓂᕐᒧᑦ ᐱᓕᕆᐊᖑᔪᖅ 75% −ᖓᓂᒃ ᐃᖅᑲᓇᐃᔭᖅᑎᐅᑉ ᐊᑭᓕᖅᓱᖅᑕᐅᕙᖕᓂᖓᑕ ᐱᑎᑦᑎᕗᖅ, ᒫᓐᓇᓗ ᐅᖓᕙᕆᐊᖅᑎᑕᐅᓯᒪᓕᖅᖢᓂ ᔫᓂ ᐅᖓᑖᓄᑦ.
  • ᐃᓕᓐᓂᐊᕐᓂᓕᕆᔨᒃᑯᑦ ᐱᑎᑦᑎᕗᑦ ᓚᐃᓴᓕᖕᓂᒃ ᐸᐃᕆᕕᖕᓂᒃ ᐃᒪᓐᓇᓂᒃ
  • $4.2−ᓂᒃ ᐊᕐᕌᒍᑖᒫᑦ ᐊᐅᓚᓂᕐᒧᑦ ᑲᒪᒋᔭᖃᖅᐸᖕᓂᕐᒧᓪᓗ ᑮᓇᐅᔭᖁᑎᒋᔭᐅᔪᓂᒃ. ᑕᒪᓐᓇ ᑮᓇᐅᔭᖃᖅᑎᑦᑎᓂᖅ ᑲᔪᓰᓐᓇᕐᓂᐊᖅᐳᖅ ᑕᒪᒃᑯᐊ ᐃᓂᒋᔭᐅᕙᒃᑐᑦ ᒪᑐᔭᐅᓯᒪᑎᓪᓗᒋᑦ ᑕᐃᒪᐃᔾᔪᑎᖃᖅᖢᑎᒃ ᓄᕙᒡᔪᐊᕐᓇᖅ-19 ᓇᒧᙵᕈᓘᔭᖅᑐᒧᑦ.
  • ᐃᓕᓐᓂᐊᕐᓂᓕᕆᔩᑦ ᐱᑎᑦᑎᖃᑦᑕᐃᓐᓇᖅᐳᑦ ᓚᐃᓴᖃᖅᑎᑦᑎᓂᕐᒥᒃ ᐸᐃᕆᕝᕕᖕᓄᑦ, ᐊᔪᕈᓐᓃᖅᓴᖅᑎᑦᑎᓂᕐᒧᑦ ᐃᖅᑲᓇᐃᔭᖅᑎᓂᒃ, ᓴᖅᑭᑎᑦᑎᓂᕐᒧᓪᓗ ᑐᓂᐅᖅᑲᐃᓂᕐᒧᓪᓗ ᐃᓕᓐᓂᐊᕐᓂᒧᑦ ᐊᑐᖅᑕᐅᖃᑦᑕᕐᓂᐊᖅᑐᓂᒃ
  • ᓄᓇᕗᑦ ᒐᕙᒪᖓ ᐱᓕᕆᖃᑎᖃᐃᓐᓇᖅᐳᖅ ᑲᓇᑕᐅᑉ ᒐᕙᒪᖓᓂᒃ, ᓄᓇᕗ ᑐᙵᕕᒃᑯᓐᓂᒃ, ᐊᕕᒃᓯᒪᓂᕐᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ, ᐊᓯᖏᓐᓂᒡᓗ ᐱᖃᖃᑕᐅᔪᓂᒃ ᐃᑲᔪᖅᑐᐃᔪᒪᓪᓗᑎᒃ ᐸᐃᕆᕝᕕᖕᓂᒃ ᓄᕙᒡᔪᐊᕐᓇᖅ-19 ᓇᒧᙵᕈᓗᔭᖅᓯᒪᓂᖓᓂ.

ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᓕᕆᕝᕕᖓ - ᐄᐳᕈ 30, 2020

ᐃᓕᓐᓂᐊᕐᕖᑦ ᒥᑦᑎᒪᑕᓕᖕᒥ ᒪᑐᔭᐅᓯᒪᕗᑦ ᓄᓇᓕᖕᒥᐅᓄᑦ, ᐃᓚᒋᔭᐅᓪᓗᑎᒃ ᐃᓕᓐᓂᐊᕐᕕᖕᒥ ᐃᖅᑲᓇᐃᔭᖅᑏᑦ, ᑐᓴᖅᑎᑦᑎᔪᖃᒃᑲᓐᓂᓚᐅᙱᓐᓂᖓᓂ ᐊᓯᐊᓂᒃ.

ᑐᓂᐅᖅᑲᐃᕙᖕᓂᖅ ᐃᓕᓐᓂᐊᖅᑏᑦ ᐃᓕᑦᑎᕙᓪᓕᐊᓂᕐᒧᑦ ᐊᑐᖃᑦᑕᕐᓂᐊᖅᑕᖏᓐᓂᒃ ᒥᑦᑎᒪᑕᓕᖕᒥ ᓄᖅᑲᖅᑎᑕᐅᕗᖅ ᐅᖃᐅᓯᐅᒃᑲᓐᓂᓚᐅᙱᓐᓂᖓᓂ.

ᑕᒪᕐᒥᑦᑎᐊ ᐃᓕᓐᓂᐊᕐᓂᓕᕆᓂᕐᒧᑦ ᐃᖅᑲᓇᐃᔭᖅᑏᑦ, ᐃᓚᒋᔭᐅᓪᓗᑎᒃ ᐃᓕᓐᓂᐊᕐᕕᖕᓂ ᐃᖅᑲᓇᐃᔭᖅᑏᑦ, ᐃᖅᑲᓇᐃᔭᕆᐊᖃᖅᑎᑕᐅᕗᑦ ᐊᖏᕐᕋᕆᔭᒥᓂ ᐊᔪᕐᓇᙱᑉᐸᑦ.

ᑕᒪᒃᑯᐊ ᐊᑐᖅᑕᐅᔪᒃᓴᐃᑦ ᓇᓗᙱᑦᑎᐊᕈᑕᐅᓂᐊᖅᐳᑦ ᖃᓄᐃᙱᑦᑎᐊᕐᓂᖏᓐᓄᑦ ᖁᐊᖅᓵᕐᓇᖅᑐᒦᙱᓐᓂᖏᓐᓂᒡᓗ ᒥᑦᑎᒪᑕᓕᖕᒥ ᐃᓕᓐᓂᐊᖅᑏᑦ, ᐃᓚᒌᑦ, ᐃᖅᑲᓇᐃᔭᖅᑏᓪᓗ.

ᐃᓕᓐᓂᐊᕐᓂᓕᕆᔨᒃᑯᑦ ᐃᑲᔪᖅᑐᐃᓂᐊᖅᐳᑦ ᐊᓯᖏᓐᓄᑦ ᓄᓇᕗᑦ ᒐᕙᒪᖓᑕ ᐱᓕᕆᕝᕕᖏᓐᓄᑦ ᑕᐃᒪᐃᑦᑕᕆᐊᖃᕌᖓᑕ.

 


ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᓕᕆᕝᕕᖓ - ᐄᐳᕈ 29, 2020

ᐃᓕᓐᓂᐊᖅᑏᑦ ᐃᓕᑦᑎᕙᓪᓕᐊᓂᕐᒧᑦ ᐊᑐᕐᓂᐊᖅᑕᖏᑦ

  • ᐊᒥᓱᑦ ᐃᓕᓐᓂᐊᖅᑏᑦ ᐱᓯᒪᕙᒌᓕᖅᐳᑦ ᓯᕗᓪᓕᖅᐹᖅᓯᐅᑎᓂᒃ ᐃᓕᑦᑎᕙᓪᓕᐊᓂᕐᒧᑦ ᐊᑐᖃᑦᑕᕐᓂᐊᖅᑕᒥᓂᒃ ᐃᓕᓴᐃᔨᒥᓂᑦ.
    • ᑕᒪᕐᒥᑲᓴᒃ ᑲᑎᖅᓱᑕᐅᓯᒪᔪᑦ ᐃᓚᖃᖅᐳᑦ ᐃᓕᑦᑎᕙᓪᓕᐊᓂᕐᒧᑦ ᐊᖏᕐᕋᕆᔭᐅᔪᓂ ᐱᓕᕆᐊᒃᓴᓂᒃ ᐱᓕᕆᐊᖑᔪᓐᓇᖅᑐᓂᒡᓗ ᐊᑕᐅᓯᕐᒧᑦ ᒪᕐᕉᖕᓄᓪᓘᓐᓃᑦ ᐱᓇᓱᐊᕈᓰᖕᓄᑦ.
    • ᑕᒪᒃᑯᐊ ᐃᓕᑦᑎᕙᓪᓕᐊᓂᕐᒧᑦ ᑲᑎᖅᓱᖅᑕᐅᓯᒪᔪᑦ ᑕᐅᑐᒐᖃᓪᓗᐊᑕᖅᐳᑦ ᓴᙱᒃᑎᒋᐊᖅᑎᑦᑎᓂᕐᒥᒃ ᐊᔪᕈᓐᓃᖅᑕᐅᕙᒃᑐᓂᒃ ᑎᑎᕋᕈᓐᓇᕐᓂᕐᒥ/ᐅᖃᓕᒫᕈᓐᓇᕐᓂᕐᒥ, ᓈᓴᐅᓯᕆᓂᕐᒥ, ᐋᓐᓂᐊᖃᕐᓇᙱᑦᑐᓕᕆᓂᕐᒥᓗ ᖃᓄᐃᙱᑦᑎᐊᕈᓐᓇᕐᓂᕐᒥᓗ.
    • ᑲᑎᖅᓱᖅᓯᒪᔪᓂᒃ ᐱᑕᖃᖅᐳᖅ ᐊᓕᓇᔪᕐᓂᒃ ᖃᕆᑕᐅᔭᒃᑯᓪᓗ−ᑐᙵᕕᓕᖕᓂᒃ ᐱᓕᕆᐊᒃᓴᓂᒃ, ᑕᒪᓐᓇ ᑕᐃᒪᐃᔾᔪᑎᖃᖅᖢᓂ ᐃᓕᓐᓂᐊᖅᑎ ᑕᐅᑐᒃᖢᒍ ᖃᓄᐃᓕᖓᓂᕆᔭᖓᓄᓪᓗ.
  • ᐃᓚᒌᑦ ᓂᕆᐅᒋᔭᖃᓪᓗᐊᖅᐳᑦ ᐃᓕᑦᑎᕙᓪᓕᐊᓂᕐᒧᑦ ᑲᑎᖅᓱᖅᑕᐅᓯᒪᔪᓂᒃ ᑕᒪᑐᒧᖓ ᐊᒥᐊᒃᑯᒋᔭᐅᔪᒧᑦ ᐃᓕᓐᓂᐊᕐᓇᒧᑦ.
  • ᐃᖅᑲᐃᑎᑦᑐᒪᕙᒃᑲ ᐊᖓᔪᖅᑳᑦ ᐃᓕᓐᓂᐊᖅᑏᓪᓗ ᑕᒪᒃᑯᐊ ᓴᓴᕙᐅᓯᒪᓂᖏᓐᓂᒃ ᐃᑲᔪᖅᑐᐃᒃᑲᓐᓂᕈᑕᐅᔪᒪᓪᓗᑎᒃ ᐊᔪᕈᓐᓃᖅᑕᐅᕙᒃᑐᓂᒃ ᐃᓕᓐᓂᐊᖅᑏᑦ ᐃᓕᓯᒪᕙᒌᓕᖅᑕᖏᓐᓂᒃ, ᐊᑐᖅᑕᐅᔮᙱᖦᖢᑎᒡᓗ ᖃᐅᔨᓴᕈᑕᐅᓗᑎᒃ ᐃᓕᓐᓂᐊᖅᑎᓂᑦ ᑭᖑᓪᓕᖅᐹᒧᑦ ᐊᔪᕈᓐᓃᕐᓂᕆᔭᐅᕙᒃᑐᓄᑦ.
  • ᐱᓕᕆᕝᕕᒋᔭᐅᔪᖅ ᐱᑎᑦᑎᓯᒪᒋᕗᖅ ᑲᔪᓰᓐᓇᖅᑎᑦᑎᓂᕐᒥᒃ ᐃᓕᓐᓂᐊᖅᑎᑦᑎᓂᕐᒧᑦ ᒪᓕᒃᑕᐅᔭᕆᐊᓕᖕᓂᒃ ᑕᒪᐃᓐᓄᑦ ᐃᓕᓐᓂᐊᕐᕕᖕᓂ ᐃᖅᑲᓇᐃᔭᖅᑎᓄᑦ, ᑕᒪᒃᑯᐊᓗ ᓇᓗᓇᐃᔭᐃᓪᓗᑎᒃ ᖃᔅᓯᑲᓪᓚᖕᓂᒃ ᐊᑐᖅᑕᐅᔪᓐᓇᖅᑐᓂᒃ ᐃᓕᓐᓂᐊᕐᕕᖕᒥ ᐃᖅᑲᓇᐃᔭᖅᑏᑦ ᑐᓴᐅᓴᑎᑦᑎᔪᓐᓇᕐᒪᖔᑕ ᐃᓕᓐᓂᐊᖅᑎᓂᒃ ᐃᓚᖏᓐᓂᒡᓗ.
  • ᐱᓕᕆᕝᕕᒋᔭᐅᔪᖅ ᖁᔭᓕᔪᒪᕗᖅ ᑕᒪᐃᓐᓂᑦᑎᐊᖅ ᐃᓕᓐᓂᐊᕐᕕᖕᓂ ᐃᖅᑲᓇᐃᔭᖅᑎᓕᒪᓂᒃ ᐃᑲᔪᖅᑐᐃᓂᖏᓐᓄᑦ ᐃᓕᓐᓂᐊᖅᑎᖁᑎᓂᒃ ᐃᓚᖏᓐᓂᒡᓗ ᑕᒪᒃᑯᓇᓂ ᐅᓪᓗᓂ ᐊᑐᖅᑕᐅᓚᐅᖅᓯᒪᙱᑦᑐᓃᑎᓪᓗᑕ.

ᐃᓕᓐᓂᐊᕆᐅᖅᓴᔪᑦ ᐸᐃᕆᕕᓪᓗ ᐃᑲᔪᖅᑐᖅᑕᐅᓂᖏᑦ

·       ᒪᓕᒃᖢᒍ ᖃᓄᐃᖁᔭᐅᓯᒪᔪᖅ ᐋᓐᓂᐊᖃᕐᓇᙱᑦᑐᓕᕆᔨᓪᓗᐊᑕᕐᒥᑦ, ᑕᒪᕐᒥᑦᑎᐊᖅ ᐸᐃᕆᕝᕖᑦ ᒪᑐᓯᒪᔭᕆᐊᖃᖅᐳᑦ ᓄᑕᖅᑲᓄᑦ ᑐᓴᖅᑎᑦᑎᔾᔪᑎᒋᔭᐅᓚᐅᒃᑲᓐᓂᙱᓐᓂ.

·       ᑕᐃᒪᓐᓇ ᒪᑐᔭᐅᓯᒪᓂᖏᓐᓂ, ᐃᓕᓐᓂᐊᕐᓂᓕᕆᔨᒃᑯᑦ ᑲᔪᓰᓐᓇᕐᓂᐊᖅᐳᑦ ᐊᑭᓖᖏᓐᓇᖃᑦᑕᕐᓗᑎᒃ ᑕᒪᐃᓐᓂᑦᑎᐊᖅ ᐊᐅᓚᑦᑎᓂᕐᒧᑦ ᑲᒪᒋᔭᖃᕐᓂᕐᒧᓪᓗ ᑮᓇᐅᔭᐃᑦᓇᐅᔭᖁᑎᒋᔭᐅᔪᓂᒃ ᑕᒪᒃᑯᓄᖓ ᓚᐃᓴᓕᖕᓄᑦ ᐸᐃᕆᕝᕕᒋᔭᐅᕙᒃᑐᓄᑦ.

o   ᑕᒪᓐᓇ ᐱᔾᔪᑎᖃᓪᓗᐊᖅᐳᖅ ᐊᖏᔪᑲᓪᓚᖕᒥᒃ ᐃᓚᖓᓂᒃ ᑕᖅᑭᑕᒫᑦ ᐊᐅᓚᓕᖕᓄᑦ ᐊᑭᓕᖅᓱᕆᐊᖃᖅᐸᒃᑐᓄᑦ ᑕᐃᒪᐃᑦᑐᒥᒃ ᐃᓂᒥᒃ.

o   ᑕᒪᒃᑯᐊ ᐸᐃᕐᕆᕝᕖᑦ ᒪᑐᔭᐅᓂᖏᑦ ᐅᐸᓗᖕᓇᓚᐅᕐᓂᖏᓐᓄᑦ ᓂᕆᐅᓇᓚᐅᙱᓐᓂᖏᓐᓄᓪᓗ ᑕᐃᒪᐃᓐᓂᐊᕐᓂᖏᓐᓂᒃ, ᐱᓕᕆᕝᕕᒋᔭᐅᔪᖅ ᐊᑭᓖᓚᐅᖅᐳᖅ ᐊᖓᔪᖅᒡᑲᑦ ᐊᑭᓕᖅᓱᕆᐊᖃᖅᑕᖏᓐᓂᒃ ᐊᑭᓕᓚᐅᑲᒃᖢᒋᑦ ᖃᐅᔨᒪᑦᑎᐊᕈᒪᓂᕐᒧᑦ ᑕᒪᒃᑯᐊ ᐃᓃᑦ ᐊᑭᓖᖏᓐᓇᕈᓐᓇᖁᓪᓗᒋᑦ ᐃᖅᑲᓇᐃᔭᖅᑎᒥᓂᒃ, ᐱᕕᒃᓴᖃᖅᑎᑦᑐᒪᓪᓗᒋᑦ ᐃᓃᑦ ᐱᓇᔪᒍᓐᓇᕐᓂᕐᒥᒃ ᒐᕙᒪᑐᖃᒃᑯᓐᓂᑦ ᐃᑲᔫᓯᐊᓄᑦ, ᓲᕐᓗ ᑲᓇᑕᒥ ᑐᐅᕕᕐᓇᖅᑐᖅᑕᖃᓕᖅᑎᓪᓗᒍ ᐊᑭᓕᖅᑕᐅᕙᖕᓂᕐᒧᑦ ᐃᑲᔫᓯᐊᓂᒃ.  ᑲᑎᖦᖢᒋᑦ ᐊᑭᖓ ᑕᒪᑐᒪ ᑮᓇᐅᔭᖃᖅᑎᑦᑎᓂᐅᑉ $885,000-ᖑᓚᐅᖅᐳᖅ.

·       ᐃᓕᓐᓂᐊᕐᓂᓕᕆᔨᒃᑯᑦ ᐃᖅᑲᓇᐃᔭᖅᑎᖏᑦ ᐱᑐᐃᓐᓇᕆᐊᖃᖅᓯᒪᓕᖅᐳᑦ ᐃᑲᔪᖅᑐᐃᓂᕐᒥᒃ ᐸᐃᕆᕝᕕᖕᓂᒃ ᐱᓇᔫᑎᒋᔭᖏᑦᑎᒍᑦ ᑕᒪᒃᑯᓄᖓ ᒐᕙᒪᑐᖃᒃᑯᑦ ᐱᓕᕆᐊᕆᔭᖏᓐᓄᑦ, ᐅᖃᖃᑎᖃᖃᑦᑕᖅᓯᒪᓪᓗᑕᓗ ᑖᒃᑯᓂᖓ ᐃᓂᓂᒃ ᑕᒪᑐᒪ ᒥᒃᓴᓄᑦ.

·       ᐱᓕᕆᕝᕕᒋᔭᐅᔪᖅ ᕿᓃᓐᓇᖅᐳᖅ ᐊᑐᖅᑕᐅᒃᑲᓐᓂᕈᓐᓇᕋᔭᖅᑐᓂᒃ ᐃᑲᔪᖅᑐᐃᓂᐊᕐᓗᑎᒃ ᐸᐃᕆᕝᕕᖕᓂᒃ, ᐃᓚᒋᔭᐅᓪᓗᓂ ᐊᑐᑐᐃᓐᓇᕆᐊᖃᕐᓂᖅ ᒐᕙᒪᑐᖃᒃᑯᑦ ᑮᓇᐅᔭᖁᑎᖏᓐᓂᒃ.

 


ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᓕᕆᕝᕕᖓ - ᐄᐳᕈ 17, 2020

ᒥᓂᔅᑕᐅᑉ ᐃᓕᓐᓂᐊᕐᓂᓕᕆᔨᒃᑯᓐᓄᑦ ᓄᑖᙳᕆᐊᖅᑎᑕᖏᑦ:

ᐅᓪᓗᒃᑯᑦ,

ᖃᓄᐃᙱᑦᑎᐊᕈᓐᓇᕐᓂᖏᑦ ᑲᔪᓯᓂᖃᑦᑎᐊᕈᓐᓇᕐᓂᖏᓪᓗ ᓄᓇᕗᒻᒥᐅᑦ ᓄᑕᕋᖏᑕ ᒪᒃᑯᒃᑐᖁᑎᖏᑕᓗ ᓯᕗᓪᓕᖅᐸᐅᑦᑎᐅᑎᔭᐅᓯᒪᒻᒪᕆᒃᐳᖅ ᐃᓕᓐᓂᐊᕐᓂᓕᕆᔨᒃᑯᓐᓄᑦ. ᑕᒪᒃᑯᓇᓂ ᐅᓪᓗᓂ ᓇᓗᓇᕈᔪᒃᑐᓂ, ᖃᐅᔨᒪᓂᖃᑦᑎᐊᕈᒪᕗᒍᑦ ᑕᒪᒃᑯᐊ ᐃᓕᓐᓂᐊᖅᑏᑦ ᐱᕕᒃᓴᖃᕋᓗᐊᕐᒪᖔᑲ ᑲᔪᓯᓂᖃᑦᑎᐊᕈᓐᓇᕐᓂᕐᒥᒃ, ᐱᓇᔪᒍᓐᓇᕐᓗᑎᒡᓗ ᓯᕗᓂᒃᓴᒥ ᖃᓄᑐᐃᓐᓇᖅ ᐊᑐᕈᒪᓇᔭᓛᖕᑕᒥᓂᒃ ᐱᔪᒪᔭᒥᓂᒃ.

ᐃᓕᓐᓂᐊᖅᑏᑦ ᖃᓄᐃᙱᑦᑎᐊᕈᓐᓇᕐᓂᖏᓐᓄᑦ ᐃᓱᒪᒥᐅᑕᕆᓗᒍ, ᐃᒪᓐᓇ ᐅᖃᖅᐳᖓ ᐅᓪᓗᒥ, ᑕᒪᕐᒥᑦᑎᐊᖅ ᐃᓕᓐᓂᐊᕐᕖᑦ ᓄᓇᕗᒻᒥ ᒪᑐᓯᒪᓂᐊᖅᑐᑦ ᐃᓕᓐᓂᐊᖅᑎᓄᑦ 2019-20-ᒥ ᐊᒥᐊᒃᑯᒋᔭᖓᓂ ᐃᓕᓐᓂᐊᕐᓇᐅᔪᒥ.

ᑕᒪᓐᓇ ᒪᑐᓯᓂᖅ ᐃᑲᔪᖅᑐᖅᑕᐅᕗᖅ ᐋᓐᓂᐊᖃᕐᓇᙱᑦᑐᓕᕆᔨᓪᓗᐊᑕᕐᒧᑦ.

ᐃᓕᓐᓂᐊᖅᑎᓕᒫᑦ ᐊᑐᙱᑉᐸᒌᖅᓯᒪᓕᕐᓂᖏᓐᓄᑦ ᑕᖅᑭᐅᑉ ᐅᖓᑖᓃᑦᑐᒧᑦ ᐃᓕᓐᓂᐊᕐᓇᕐᓂᕐᒥᒃ, ᑕᐃᒪᓕ ᐱᒻᒪᕆᐅᓂᖅᓴᐅᕗᑦ ᑕᒪᕐᒥᑦᑎᐊᖅ ᐃᓕᓐᓂᐊᕐᕕᖕᒥ ᐃᖅᑲᓇᐃᔭᖅᑏᑦ ᐃᖅᑲᓇᐃᔭᕆᐊᖃᖅᐸᑕ ᐊᐃᕆᓕ 21, 2020−ᒥ.

ᑕᐃᒪᐃᓐᓂᖓᓄᑦᑕᐅᖅ ᐊᓯᑦᑎᓐᓂ ᐊᕕᒃᓯᒪᓂᕐᓂ ᐅᑭᐅᖅᑕᖅᑐᒥᓗ ᐊᕕᒃᑐᖅᓯᒪᓂᕐᓂ, ᓄᓇᕗᒻᒥᐅᑦ ᐃᓕᓐᓂᐊᕐᕕᖕᓂ ᐃᖅᑲᓇᐃᔭᖅᑎᖏᑦ ᐱᒻᒪᕆᐊᓘᕗᑦ ᓇᓗᙱᑦᑎᐊᕈᒪᓂᕐᒧᑦ ᐃᓕᓐᓂᐊᖅᑎᖁᑎᕗᑦ ᑭᖑᕙᓯᓕᖅᐸᓪᓕᐊᙱᒃᑲᓗᐊᕐᒪᖔᑕ ᐃᓕᓐᓂᐊᖅᐸᓪᓕᐊᓂᕆᔭᒥᓂᒃ.

ᐃᓕᓐᓂᐊᕐᓂᓕᕆᔨᒃᑯᑦ ᐋᖅᑭᒃᓱᐃᓯᒪᕗᑦ ᒪᓕᒃᑕᐅᕙᓪᓕᐊᔪᓐᓇᖅᑐᓂᒃ ᐃᑲᔪᕈᒪᓪᓗᒋᑦ ᐃᓕᓐᓂᐊᕐᕕᖕᓂ ᐃᖅᑲᓇᐃᔭᖅᑏᑦ ᐋᖅᑭᒃᓱᐃᕙᓪᓕᐊᓂᖏᓐᓂ ᐃᓕᓐᓂᐊᕐᓂᕐᒧᑦ ᐊᑐᖅᑕᐅᖃᑦᑕᕋᔭᖅᑐᓂᒃ ᐊᖑᒻᒪᑎᔪᒪᓪᓗᑎᒃ ᐱᑐᐃᓇᐅᙱᑦᑐᓄᑦ ᐱᔭᐅᔭᕆᐊᓕᖕᓄᑦ ᐃᓕᓐᓂᐊᖅᑎᖁᑎᒥᓄᑦ. ᐃᖅᑲᓇᐃᔭᖅᑏᑦ ᐱᓕᕆᖃᑎᖃᕐᓂᐊᖅᐳᑦ ᐃᓕᓐᓂᐊᖅᑎᓂᒃ ᐃᓚᖏᓐᓂᒡᓗ ᐋᖅᑭᒃᓯᒪᓕᖅᑎᑦᑎᔪᒪᓪᓗᑎᒃ ᖃᓄᖅ ᐱᐅᓛᒃᑯᑦ ᐃᑲᔪᖅᑐᐃᔪᓐᓇᕐᒪᖔᒥᓂᒃ ᐃᓕᑦᑎᕙᓪᓕᐊᓂᕆᔭᐅᔪᒥᒃ.

ᑕᒪᓐᓇ ᐃᒪᓐᓇ ᑐᑭᖃᖅᐳᖅ, ᐃᓕᓐᓂᐊᖅᑎᖁᑎᑦᑎᓐᓄᑦ ᐃᓕᓐᓂᐊᓕᓵᖅᑐᓂᑦ ᐊᔪᙱᓐᓂᓕᖕᓄᑦ 9−ᒥᒃ, ᐃᓕᓴᐃᔩᑦ ᓯᕗᓪᓕᖅᐸᐅᑦᑎᐅᔾᔨᓯᒪᓂᐊᖅᑐᑦ ᐅᖃᓕᒫᕈᓐᓇᕐᓂᕐᒥᒃ/ᑎᑎᕋᕈᓐᓇᕐᓂᕐᒥᒃ ᓈᓴᐅᓯᕆᔪᓐᓇᕐᓂᕐᒥᒃ, ᑕᐃᒪᐃᓕᐅᕐᓂᕐᒥᓂᒡᓗ ᓴᙱᒃᑎᒋᐊᖅᑎᑦᑎᓗᑎᒃ ᐊᔪᕈᓐᓃᖅᑕᐅᕙᒃᑐᓂᒃ ᖃᐅᔨᒪᓂᕆᔭᐅᔪᓂᒡᓗ ᐃᓕᓐᓂᐊᕐᑕᐅᓯᒪᓕᖅᑐᓂᒃ ᒫᓐᓇᒧᑦ ᑎᑭᖦᖢᒍ ᑕᒪᑐᒪᓂ ᐃᓕᓐᓂᐊᕐᓇᐅᓵᖅᑐᒥ ᐊᕐᕌᒍᒥ.

ᖁᑦᑎᒃᑐᒦᓐᓂᖅᓴᓄᑦ ᐃᓕᓐᓂᐊᖅᑎᓄᑦ, ᐃᓕᓴᐃᔩᑦ ᐊᐅᓚᑦᑎᔩᓪᓗ ᖃᐅᔨᓴᖅᓯᓂᐊᖅᑐᑦ ᑕᒪᒃᑯᓂᖓ ᐃᓛᒃᑰᕐᓗᒋᑦ ᖃᓄᐃᓕᖓᓂᕆᓕᖅᑕᖏᓐᓄᑦ ᐃᓕᓐᓂᐊᖅᓯᒪᓂᕐᒥ. ᐃᓚᖏᑦ ᐃᓕᓐᓂᐊᖅᑏᑦ ᐱᔭᕇᖅᓯᓯᒪᓕᖅᐸᒌᑐᐃᓐᓇᕆᐊᓖᑦ ᐃᓕᓐᓂᐊᕐᓂᓕᕆᔭᒥᓂᒃ ᐱᔭᕆᐊᖃᖅᑕᒥᓂᒃ ᐊᓂᒍᐃᓂᐊᕐᓗᑎᒃ ᐃᓕᓐᓂᐊᖅᑕᒥᓂᒃ. ᐊᓯᖏᑦ ᐱᔭᕇᖅᓯᔭᕆᐊᖃᑐᐃᓐᓇᕆᐊᓖᑦ ᐱᑐᐃᓐᓇᐅᙱᑦᑐᓂᒃ ᐊᔪᕈᓐᓃᖅᓴᒐᒃᓴᓂᒃ ᐊᔪᖅᑎᑕᐅᔪᓚᙱᒃᑯᑎᒃ ᐊᓂᒍᐃᓂᕐᒥᒃ. ᐃᓕᓴᐃᔩᑦ ᐱᑎᑦᑎᑐᐃᓐᓇᕆᐊᓖᑦ ᐱᕕᒃᓴᓂᒃ ᐃᓕᓐᓂᐊᖅᑎᓄᑦ ᖁᕝᕙᕆᐊᖅᑎᑦᑎᔪᓐᓇᕐᓗᑎᒃ ᐃᓕᓐᓂᐊᕐᓯᒪᔭᒥᓂᒃ ᐱᓗᑎᒡᓘᓐᓃᑦ ᐊᓂᒍᐃᔾᔪᑎᒋᔭᕆᐊᖃᖅᑕᒥᓂᒃ ᐱᔭᕇᖅᓯᕙᒡᓗᑎᒃ ᐱᓕᕆᐊᖑᖁᔭᐅᔪᓂᒃ ᐱᓕᕆᐊᒃᓴᓂᒡᓗ.

ᐃᓕᓴᐃᔩᑦ ᕿᒥᕐᕈᐊᖅᓯᒃᑲᓐᓂᕐᓂᐊᖅᐳᑦ ᐃᓕᓐᓂᐊᖅᑎᖁᑎᖏᑕ ᖃᓄᐃᓕᑎᓯᒪᔭᖏᓐᓂᒃ ᐅᓪᓗᒥᒧᑦ ᑎᑭᖦᖢᒍ, ᐊᑕᐅᑦᑎᑰᖃᑎᖃᓕᖅᑎᓪᓗᒋᑦ ᐊᔪᕈᓐᓃᖅᑕᐅᕙᒃᑐᓄᑦ ᓴᙱᒃᑎᒋᐊᖅᑕᐅᔭᕆᐊᓕᖕᓄᑦ, ᐃᓱᒪᒥᐅᑕᕆᓗᒍᓗ ᑭᓱᑦ ᑖᒃᑯᓄᖓ ᐊᓂᒍᖅᑎᑕᐅᔪᓐᓇᕐᒪᖔᑕ ᐊᖏᕐᕋᕆᔭᒥᓂ. ᓴᙱᔪᒥᒃ ᑕᐅᑐᒐᖃᓪᓗᐊᑕᕐᓂᐊᖅᐳᑦ ᐃᑲᔪᖅᑐᐃᓂᕐᒥᒃ ᖃᓄᐃᙱᑦᑎᐊᕈᓐᓇᕐᓂᕐᒥᒃ ᐋᓐᓂᐊᖃᕐᓇᙱᑦᑐᓕᕆᓂᕐᒥᒡᓗ. ᑕᒪᓐᓇ ᐃᓚᖃᖅᐳᖅ ᐊᖏᕐᕋᕆᔭᐅᔪᓂ ᐱᓕᕆᐊᒃᓴᓂᒃ ᐱᓕᕆᐊᖑᕙᒃᑐᓂᒡᓗ ᐱᕕᒃᓴᖃᖅᑎᑦᑎᔪᓂᒃ ᐃᓚᒌᓂᒃ ᐊᑕᐅᑦᑎᒃᑯᑦ ᐃᓕᑦᑎᕙᓪᓕᐊᔪᓐᓇᕐᓂᕐᒥᒃ, ᓲᕐᓗ ᐅᖃᓕᒫᖃᑎᒌᒡᓗᑎᒃ, ᑎᑎᕋᖅᓯᕙᓪᓕᐊᕙᒡᓗᑎᒃ ᖃᐅᑕᒫᖅᓯᐅᑎᓂᒃ, ᐱᓕᕆᐊᒃᓴᓂᒡᓗ ᓴᓇᑐᓂᕐᒥᒃ ᓴᖅᑭᑎᑦᑎᓕᖅᐸᒃᑐᓂᒃ ᐃᓕᓐᓂᐊᖅᑎᓂᑦ.

ᐃᓕᓐᓂᐊᕐᓂᓕᕆᔨᒃᑯᑦᑕᐅᖅ ᖃᐅᔨᒪᒋᕗᑦ ᐊᒥᓱᑦ ᐃᓚᒌᑦ ᒫᓐᓇ ᓄᓇᒧᙵᐅᓯᒪᓂᖏᓐᓂᒃ ᐱᔪᓐᓇᙱᑐᐃᓐᓇᕆᐊᖃᖅᖢᑎᒡᓗ ᐃᓕᓐᓂᐊᖅᑏᑦ ᐃᓕᑦᑎᕙᓪᓕᐊᓂᕐᒧᑦ ᐱᔪᓐᓇᖅᑕᖏᓐᓂᒃ. ᓄᓇᒥ ᐱᓕᕆᐊᖑᕙᒃᑐᑦ ᓲᕐᓗ ᐊᖑᓇᓱᖕᓃᑦ ᐃᖃᓗᒐᓱᖕᓃᓪᓗ ᐃᑲᔪᖅᐸᒃᑭᕗᑦ ᐃᓕᓐᓂᐊᖅᑏᑦ ᐃᓕᑦᑎᕙᓪᓕᐊᓂᖏᓐᓂᒃ, ᑖᓐᓇᓗ ᐱᓕᕆᕝᕕᒋᔭᐅᔪᖅ ᑕᒪᒃᑯᓂᖓ ᐱᓕᕆᐊᒃᓴᓂᒃ ᑎᓕᐅᕆᔾᔪᑎᖃᑦᑎᐊᖅᖢᓂ.

ᐅᔾᔨᕆᔭᖃᕐᓂᖅ ᓄᓇᕗᒻᒥᐅᑦ ᐱᓕᕆᔾᔪᑕᐅᕙᒃᑐᓂᒃ ᐃᓱᓕᑦᑕᕐᕕᖃᕐᓂᖏᓐᓂᒃ, ᐱᓗᐊᙳᐊᖅᖢᓂ ᐃᓄᑭᓐᓂᖅᓴᓂ ᓄᓇᓕᖕᓂ, ᐃᓕᓐᓂᐊᖅᑏᑦ ᑲᔪᓯᐊᔪᒥᒃ ᐃᓕᑦᑎᕙᓪᓕᐊᓂᕆᔭᖓᑦ ᐊᑕᖏᑦᑎᐊᕐᓗᓂ ᐃᑭᐊᖅᑭᕕᒃᑰᕆᐊᖃᖃᑦᑕᔾᔮᙱᓚᑦ. ᑕᒪᓐᓇ ᐃᒪᓐᓇ ᑐᑭᖃᖅᐳᖅ, ᑕᒪᒃᑯᐊ ᐃᓕᓐᓂᐊᖅᑏᑦ ᐃᓕᑦᑎᕙᓪᓕᐊᓂᕐᒧᑦ ᖃᓄᐃᓕᖓᕈᓘᔭᖅᑎᑕᐅᓂᐊᖅᐳᖅ−−ᐃᓚᖏᑦ ᐊᓕᓚᔪᕐᓂᒃ−ᑐᙵᕕᖃᕐᓂᐊᖅᐳᑦ, ᐃᓚᖏᑦ ᐱᓕᕆᓂᕐᒧᑦ−ᑐᙵᕕᖃᕐᓗᑎᒃ, ᐃᓚᖏᓪᓗ ᖃᕆᑕᐅᔭᒃᑰᖓᓂᐊᖅᐳᑦ. ᑭᓯᐊᓂᓗᑦᑕᐅᖅ, ᑕᒪᕐᒥᑦᑎᐊᖅ ᑖᒃᑯᐊ ᐱᕕᒃᓴᖃᖅᑎᑦᑎᓂᐊᖅᑐᑦ ᐃᓕᓐᓂᐊᖅᑎᓂᒃ ᐱᕕᒃᓴᒥᒃ ᐃᓕᓐᓂᐊᕐᓂᕐᒥᓂᒃ ᐅᖓᕙᕆᐊᖅᑎᑦᑎᕙᓪᓕᐊᔪᓐᓇᕐᓗᑎᒃ

ᐊᔪᕐᓇᙱᑐᐊᕌᖓᑦ, ᖃᐅᔨᒋᐊᕆᐊᖃᖃᑦᑕᕐᓂᐊᖅᐳᑦ ᐃᓚᒌᓄᑦ ᐱᓇᓱᐊᕈᓯᑕᒫᑦ, ᖃᐅᔨᕝᕕᒋᔪᒪᓗᒋ ᖃᓄᐃᓕᕙᓪᓕᐊᖕᒪᖔᑕ ᐃᑲᔪᖅᑕᐅᔭᕆᐊᖃᒃᑲᓐᓂᖅᐸᑕᓗᓐᓃᑦ ᐊᑐᖅᑕᐅᔪᒃᓴᓂᒡᓘᓐᓃᑦ ᐱᔭᕆᐊᖃᒃᑲᓐᓂᑐᐃᓐᓇᕆᐊᖃᖅᐸᑕ. ᐱᐅᓛᖅ ᑐᓴᐅᒪᖃᑦᑕᐅᑎᓂᐊᕐᓗᓂ−−ᐅᖄᓚᐅᑎᒃᑯᓪᓘᓐᓃᑦ, ᑎᑎᕋᖃᑦᑕᐅᑎᕝᕕᒃᑯᓪᓘᓐᓃᑦ, ᓄᓇᕗᑦ ᒐᕙᒪᖓᑕ ᖃᕆᑕᐅᔭᒃᑯᑦ ᑎᑎᕋᖃᑦᑕᐅᑎᕝᕕᖏᑎᒍᑦ, ᐊᓯᖏᑦᑎᒍᓪᓘᓐᓃᑦ ᐊᑐᖅᑕᐅᔪᓐᓇᖅᑐᑎᒍᑦ ᖃᕆᑕᐅᔭᒃᑯᑦ−−ᐋᖅᑭᒃᑕᐅᓯᒪᓕᕐᓂᐊᖅᐳᖅ ᐃᓕᓐᓂᐊᖅᑏᑦ ᐃᓚᒌᓪᓗ ᐋᖅᑭᒃᓯᖃᑎᒋᓗᒋᑦ.

ᓴᖅᑭᑎᑦᑎᓂᐅᑉ ᖄᒃᑲᓐᓂᐊᒍᑦ ᐃᓕᓐᓂᐊᖅᑏᑦ ᐃᓕᑦᑎᕙᓪᓕᐊᓂᕐᒧᑦ ᐱᔭᖏᓐᓂᒃ, ᐃᖅᑲᓇᐃᔭᖅᑏᑦᑕᐅᖅ ᐃᑲᔪᖅᑐᐃᖃᑦᑕᕐᓂᐊᕆᕗᑦ ᐃᓕᓐᓂᐊᖅᑎᓂᒃ ᖃᐅᔨᓴᖅᓯᕙᒡᓗᑎᒃ ᐱᓕᕆᐊᕆᓯᒪᔭᖏᓐᓂᒃ ᐃᓕᓐᓂᐊᕐᕖᑦ ᒪᑐᔭᐅᓚᐅᙱᓐᓂᖏᓐᓂ, ᖃᐅᔨᒪᓕᕈᒪᓂᕐᒧᑦ ᑭᖑᓪᓕᖅᐸᖅᓯᐅᑎᓂᒃ ᐊᔪᖁᓐᓃᕐᓂᕐᒧᑦ ᓇᓃᑎᑕᐅᓕᕋᔭᕐᓂᕐᓂᒃ ᐊᔪᙱᓐᓂᕐᒥ, ᐋᖅᑭᒃᓱᐃᕙᓪᓕᐊᓗᑎᒡᓗ ᐊᕐᕌᒎᑉ ᐃᓱᐊᓄᑦ ᐅᓂᒃᑲᐅᓯᐊᕆᔭᕆᐊᖃᖃᑦᑕᖅᑐᓂᒃ ᐃᓕᓐᓂᐊᖅᑎᓄᑦ.

ᓄᓇᕗᒻᒥᐅᑦ ᖁᑦᑎᒃᑐᒦᓐᓂᖅᓴᓄᑦ ᐃᓕᓐᓂᐊᖅᑎᓄᑦ ᐃᓚᖏᓐᓄᓪᓗ, ᐃᖅᑲᐃᑎᑦᑎᔾᔪᑎ ᐅᓇ, ᑕᒪᕐᒥᑦᑎᐊᖅ ᐃᓕᓐᓂᐊᕐᓂᓕᕆᐱᔨᒃᑯᑦ ᖃᐅᔨᓴᕐᓂᕆᕙᒃᑕᖏᑦ ᐃᓕᓐᓂᐊᖅᑎᓄᑦ ᓄᖅᑲᖅᑎᑕᐅᕗᑦ ᑕᒪᑐᒪᓂ ᐃᓕᓐᓂᐊᕐᓇᒧᑦ ᐊᕐᕌᒍᒋᔭᐅᔪᒥ. ᑕᐃᒃᑯᓄᖓ ᐊᔪᙱᓐᓂᓕᖕᓄᑦ 12−ᒥᒃ ᑲᔪᓯᓂᖃᑦᑎᐊᖅᑐᓄᑦ ᐊᓂᒍᐃᓂᐊᕐᓂᕐᒥᒃ, ᖃᐅᔨᒪᑦᑎᐊᖁᕙᔅᓯ ᑕᒪᒃᑯᐊ ᐃᓕᓐᓂᐊᕐᕖᑦ ᐊᖓᔪᖅᑳᖏᑦ ᐃᓕᓴᐃᔩᓪᓗ ᐃᓕᖕᓂᒃ ᐱᓕᕆᖃᑎᖃᖃᑦᑕᓂᐊᕐᒪᑕ ᖃᐅᔨᒪᑦᑎᐊᕈᒪᓂᕐᒥᓄᑦ ᐱᔭᕇᖅᓯᒐᓗᐊᕐᒪᖔᖅᐱᑦ ᓇᓕᐊᖕᓂᑐᐃᓐᓇᖅ ᐱᓕᕆᐊᖑᔭᕆᐊᖃᓪᓚᕆᒃᐸᒃᑐᓂᒃ. ᑕᒫᓃᑉᐳᒍᑦ ᐃᓕᔅᓯᓐᓂᒃ ᐃᑲᔪᕈᒪᓪᓗᑕ ᑲᔪᓯᓂᖃᑦᑎᐊᕐᓂᕐᒧᑦ, ᓴᖅᑭᔮᓕᖅᑎᑦᑎᓗᓯᓗ ᑐᕌᕆᔪᒪᔭᔅᓯᓐᓂᒃ.

ᑭᖑᓪᓕᕐᒥᒃ, ᐃᓕᓐᓂᐊᕐᕕᖕᓂ ᐃᖅᑲᓇᐃᔭᖅᑏᑦ ᐱᕙᒌᔭᕐᓂᐊᕆᕗᑦ ᐋᖅᑭᒃᓱᐃᕙᓪᓕᐊᓗᑎᒡᓗ 2020-21-ᒧᑦ ᐃᓕᓐᓂᐊᕐᓇᐅᓛᕐᒥᔪᒧᑦ, ᐱᓗᐊᙳᐊᖅᖢᓂ ᓇᓗᓇᕈᔪᒃᑐᖅᓯᐅᕐᓂᑦᑎᓐᓄᒃ ᓄᕙᒡᔪᐊᕐᓇᖅ-19 ᐱᔾᔪᑎᒋᓪᓗᒍ ᐃᓱᒪᒥᐅᑕᕆᓗᒍ.

ᐃᓕᓐᓂᐊᕐᕕᖕᓂ ᐃᖅᑲᓇᐃᔭᖅᑎᓄᑦ ᐃᓱᒪᖅᓱᖅᖢᑎᒃ ᐅᑎᖅᓯᒪᔪᓄᑦ ᐃᖅᑲᓇᐃᔭᕐᕕᖕᒥᓄᑦ ᐱᕙᒌᔭᖅᓯᕙᓪᓕᐊᓕᕇᖅᑐᓄᓪᓗ ᐃᓕᓐᓂᐊᕐᓂᐊᕐᒧᑦ ᐊᑐᖅᑕᐅᖃᑦᑕᕐᓂᐊᖅᑐᓂᒃ, ᐊᒥᓱᒻᒪᕇᑦ ᐃᓕᓐᓂᐊᖅᑏᑦ ᐃᓚᒌᓪᓗ ᐃᓕᓴᖅᓯᕗᑦ ᐊᒃᓱᕈᖅᖢᑎᑦ ᐱᓕᕆᐊᕿᖃᑦᑕᖅᑕᕐᓄᑦ ᓇᓗᓇᐃᖅᓯᓪᓗᑎᒡᓗ ᖁᔭᓕᓂᕐᒥᓂᒃ ᐃᓕᔅᓯᓐᓂᒃ. ᐊᖓᔪᖅᑳᕆᔭᐅᓂᓐᓄᑦ, ᒥᓂᔅᑕᕆᔭᐅᓂᓐᓄᓪᓗ ᐃᓕᓐᓂᐊᕐᓂᓕᕆᔨᒃᑯᓐᓄᑦ, ᐅᖃᐅᓯᖃᓪᓚᕆᒍᒪᕗᖓ ᖁᔭᓕᓪᓚᕆᒃᓯᒪᓂᓐᓂᒃ ᐃᓕᔅᓯᓐᓂᒃ ᐱᓇᔪᓪᓚᕆᒃᐸᖕᓂᔅᓯᓐᓂᒡᓗ ᐆᒻᒪᕆᒃᓴᑦᑎᐊᖅᐸᖕᓂᔅᓯᓐᓄᓪᓗ ᐱᓕᕆᐊᖃᓕᕌᖓᔅᓯ. ᖁᔭᓐᓇᒦᒃ ᐱᓇᔪᖕᓂᔅᓯᓐᓄᑦ ᐱᓕᕆᐊᖃᓪᓚᕆᒍᒪᓯᒪᓂᔅᓯᓐᓄᓪᓗ ᓄᓇᕗᒻᒥᐅᑦ ᐃᓕᓐᓂᐊᖅᑎᖁᑎᖏᓐᓄᑦ.

ᑕᒪᑦᑖᓗᒃ ᕿᑐᕐᖓᕗᑦ ᐱᐅᓛᒥᒃ ᐊᑐᖁᕙᒃᐸᕗᑦ. ᐃᓕᓐᓂᐊᕐᓂᓕᕆᔨᒃᑯᑦ ᖁᔭᓕᕗ5 ᐃᑲᔪᖅᑐᐃᓂᐅᕙᒃᓂᒃ ᐅᑕᖅᑭᑦᑎᐊᕈᓐᓇᖅᐸᖕᓂᖏᓐᓄᓪᓗ ᓄᓇᕗᒻᒥᐅ, ᐃᓕᓐᓂᐊᕐᓂᓕᕆᓂᕐᒧᓪᓗ ᐱᓕᕆᖃᑎᒋᕙᒃᑕᑦᑎᓐᓄᑦ, ᑕᒪᒃᑯᓇᓂ ᐅᓪᓗᓂ ᐊᑐᖅᑕᐅᓚᐅᖅᓯᒪᙱᑦᑐᓃᑎᓪᓗᑕ. ᑕᒪᓐᓇ ᓇᓗᓇᖅᑐᖅᓯᐅᕐᓂᖅ ᐊᔪᕐᓇᙱᑦᑐᑯᓘᖃᑦᑕᖅᓯᒪᙱᓚᖅ, ᑭᓯᐊᓂᓗ ᐅᕙᒍᑦ ᐊᑕᐅᑎᒃᑯᑦ ᑕᒪᓐᓇ ᐊᓂᒍᖅᑎᓐᓂᐊᖅᐸᒐᕗᑦ. ᖁᐊᖅᓵᕐᓇᖅᑐᒧᐊᖅᑕᐃᓕᒋᔅᓯ, ᑕᒪᔅᓯᑦᑎᐊᖅ.

ᖁᔭᓐᓇᒦᒃ, ᖁᐊᓇ, thank you, merci.

ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᓕᕆᕝᕕᖓ

  • ᐃᓕᓐᓂᐊᖅᑏᑦ ᓄᓇᕗᒻᒥ ᐃᓕᓐᓂᐊᔾᔮᔪᓐᓃᖅᑐᑦ 2019-20-ᒥ ᐃᓕᓐᓂᐊᕐᓂᕆᔭᐅᓪᓗᐊᖅᑐᒥ.
  • ᐃᓕᓐᓂᐊᕐᕕᖕᓂ ᐃᖅᑲᓇᐃᔭᖅᑏᑦ ᐃᖅᑲᓇᐃᔭᐃᓐᓇᕐᓂᐊᖅᑐᑦ ᐃᑲᔪᖅᑐᐃᔪᒪᓂᕐᒧᑦ ᐃᓕᓐᓂᐊᕐᓂᕆᔭᐅᔪᓂᒃ ᐊᖏᕐᕋᕆᔭᐅᔪᓂ ᑕᒪᓐᓇ ᐃᓕᓐᓂᐊᕐᓇᒧᑦ ᐊᕐᕌᒍᒋᔭᐅᔪᖅ ᐃᓱᓕᓐᓇᓱᖕᓂᖓᓂ.
  • ᐃᓕᓐᓂᐊᖅᑏᑦ ᐱᓕᓂᐊᖅᑐᑦ ᐃᓕᓐᓂᐊᕐᓂᕐᒧᑦ ᐊᑐᖃᑦᑕᕈᓐᓇᕐᓂᐊᖅᑕᖏᓐᓂᒃ ᐃᓕᓐᓂᐊᕐᕕᖕᒥᓂᑦ ᐃᑲᔪᖅᑐᐃᔪᒪᓂᕐᒧᑦ ᐃᓕᑦᑎᐊᕙᓪᓕᐊᓂᕆᔭᐅᔪᓂᒃ ᐊᖏᕐᕋᕆᔭᐅᔪᓂ.
  • ᐃᓕᓐᓂᐊᕐᕕᖕᓂ ᐃᖅᑲᓇᐃᔭᖅᑏᑦ ᐃᓚᒌᓄᐊᖃᑦᑕᕐᓂᐊᖅᐳᑦ ᐱᓇᓱᐊᕈᓯᕐᓂ ᐊᒡᒋᖅᐸᓪᓕᐊᔪᓂ.
  • ᑕᒪᕐᒥᑦᑎᐊᖅ ᐃᓕᓐᓂᐊᕐᕕᖕᓂ ᐊᓂᒍᐃᔾᔪᑎᑖᕐᓂᕐᒧᑦ ᖃᐅᔨᓴᖅᑕᐅᓃᑦ ᑕᒪᑐᒧᖓ ᐊᕐᕌᒍᒧᑦ ᓄᖅᑲᖅᑎᑕᐅᕗᑦ, ᑕᒪᒃᑯᐊᓗ ᖁᑦᑎᖕᓂᖅᓴᒥ ᐃᓕᓐᓂᐊᕐᕕᖕᒥ ᓇᓗᓇᐃᒃᑯᑕᖅᑖᕆᔭᐅᔪᑦ ᓇᓃᔨᓕᖕᓂᕐᒧᑦ ᑐᙵᕕᖃᖅᑎᑕᐅᓂᐊᖅᐳᑦ ᐊᔪᕈᓐᓃᓴᖅᑕᐅᓂᑯᑐᐊᕐᓄᑦ.
  • ᐃᓕᓐᓂᐊᖅᑎᓕᒫᑦ ᐱᔪᓐᓇᐅᓂᐊᖅᑐᑦ ᐊᕐᕌᒎᑉ-ᓄᙳᐊᓂᑦ ᐃᓕᓐᓂᐊᖅᑕᒥᓂᒃ ᐱᓕᕆᑦᑎᐊᖃᑦᑕᖅᓯᒪᓂᕐᒧᑦ ᑎᑎᕋᖅᓯᒪᔪᓂᒃ.

ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᓕᕆᕝᕕᖓ - ᐄᐳᕈ 15, 2020

ᐃᖅᑲᓇᐃᔭᖅᑏᑦ ᐱᔪᓐᓇᐅᑎᖃᖅᑎᑕᐅᔪᓂᑦ ᐸᐃᕆᕝᕕᖕᓂ ᐊᑭᓕᖅᓱᖅᑕᐅᖏᓐᓇᖁᓪᓗᒋᑦ, ᐃᓕᓐᓂᐊᕐᓂᓕᕆᔨᒃᑯᑦ ᐊᖓᔪᖅᑳᕆᔭᐅᔪᑦ ᐊᑭᓕᖅᓱᕆᐊᓕᖏᓐᓂᒃ ᑮᓇᐅᔭᖃᖅᑎᑦᑎᓂᐊᖅᐳᑦ ᐊᐃᕐᕆᓕ 21, 2020-ᒧᑦ ᑎᑭᓪᓗᒍ.

ᓄᓇᕗᑦ ᒐᕙᒪᒃᑯᖏᑦ ᖃᓄᐃᓕᐅᖅᓯᒪᒻᒪᕆᒃᑐᐃᑦ ᐊᐃᑦᑐᐃᓗᐊᖅᑕᐃᓕᒪᑎᑦᑎᓪᓗᑎᒃ ᓄᕙᒡᔪᐊᕐᓇᖅ-19−ᒥᑦ, ᐸᐃᕆᕖᓪᓗ ᒪᑐᓯᒪᐃᓐᓇᕆᐊᖃᖅᖢᑎᒃ ᑭᓯᐊᓂ ᑐᓴᖅᑎᑦᑎᒃᑲᓐᓂᕐᐸᑕ.


ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᓕᕆᕝᕕᖓ - ᐄᐳᕈ 8, 2020

ᒥᓂᔅᑕᐅᑉ ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐅᓪᓗᒥᒨᖓᔪᑦ ᑐᓴᖅᑎᑦᑎᔾᔪᑎᒃᑲᓂᕈᑎᖏᑦ

ᐃᒃᐸᒃᓴᖅ, ᐃᓕᓐᓂᐊᕐᓂᓕᕆᔨᒃᑯᑦ ᓇᒃᓯᐅᔾᔨᓚᐅᖅᑐᑦ ᑎᑎᖅᑲᒥᒃ ᐃᓕᓐᓂᐊᕐᕕᓕᒫᑦ ᐃᖅᑲᓇᐃᔭᖅᑎᖏᓐᓄᑦ ᐅᑎᕐᓂᕐᒧᑦ ᐃᑳᓇᐃᔮᖏᓐᓄᑦ ᐊᖏᕐᕋᖏᓐᓂ ᓄᓇᓕᖕᓂᑦ ᐊᐃᐳᕈ 21, 2020-ᒥ. ᑖᓐᓇ ᑐᕌᖓᔪᖅ ᐃᖅᑲᓇᐃᔭᖅᑎᓄᑐᐊᖅ, ᐱᕙᒌᔭᐅᔪᓐᓇᕐᓂᐊᕐᒪᑕ ᐋᖅᑭᒃᓱᐃᓗᑎᒃᓗ ᑲᔪᓯᓂᕐᓂ ᐃᓕᑦᑎᓂᕐᒧᑦ ᐱᕙᒌᔭᐅᑎᓂᒃ ᐃᓕᓐᓂᐊᕐᕕᒃ ᒪᑐᒪᓂᖓ ᐅᖓᕙᕆᐊᖅᑕᐅᓇᔭᖅᐸᑦ.

ᓇᓗᓇᕈᓐᓃᖅᑎᑦᑐᒪᔭᕋ ᓈᓴᐅᑎᑦ ᐱᑎᓚᐅᖅᑕᒃᑲ ᐃᒃᐸᒃᓴᖅ − 1,185−ᖑᔪᑦ ᐃᖅᑲᓇᐃᔭᖅᑎᑦ ᐃᖅᑲᓇᐃᔭᓲᑦ ᐃᓕᓐᓂᐊᕐᕕᖕᓂ ᓄᓇᕗᓕᒫᒥ. 93−ᖑᔪᑦ ᑖᒃᑯᓇᓂ ᐃᖅᑲᓇᐃᔭᖅᑎᓂᒃ ᒫᓐᓇᐅᔪᖅ ᓄᓇᕗᒻᒦᖏᑦᑐᑦ, ᐊᖏᕐᕋᐅᕙᓪᓕᐊᓕᖅᑐᑦ ᓄᓇᓕᖏᓐᓄᑦ. ᑖᓐᓇ ᑭᒡᒐᖅᑐᐃᔪᖅ 8 ᐳᓴᓐᑎᖓᓂᒃ ᐃᓕᓐᓂᐊᕐᕕᖕᒥ ᐃᖅᑲᓇᐃᔭᖅᑎᓕᒫᓂᒃ.

ᐃᓕᓴᐃᔨᑦ ᓄᓇᕗᓕᒫᒥ ᐱᓕᕆᕐᔪᐊᖅᑐᑦ ᐃᑲᔪᕐᓗᒍ ᐃᓕᓐᓂᐊᕐᓂᖅ ᐊᖏᕐᕋᒥ ᐃᓕᓐᓂᐊᖅᑎᓄᑦ ᐊᑐᑦᑎᐊᙱᓪᓗᑎᐅᔾᔮᖏᒻᒪᑕ ᐃᓕᓐᓂᐊᕐᕕᑦ ᒪᑐᒪᑎᑕᐅᓂᖏᓐᓄᑦ. ᐃᓕᓐᓂᐊᖅᑎᕗᑦ ᐱᔭᕆᐊᖃᖃᑕᐅᔪᑦ ᐊᔾᔨᖓᓂᒃ ᐃᑲᔪᖅᑕᐅᓂᕐᒥᒃ, ᑕᐃᒪᐃᒻᒪᓪᓗ ᐱᖁᕙᕗᑦ ᐃᓕᓴᐃᔨᑦ ᐃᖅᑲᓇᐃᔭᕐᓗᑎᒃ ᑕᒪᓐᓇ ᐊᑐᖅᑎᓪᓗᒍ.

ᐃᓕᓴᐃᔨᑦ ᐅᑎᓕᖅᑐᑦ ᐃᖅᑲᓇᐃᔮᖏᓐᓄᑦ ᐃᑲᔪᕐᓗᒋᑦ ᐃᓕᓐᓂᐊᖅᑎᑦ ᐃᓕᓐᓂᐊᕈᑎᖏᓐᓂᒃ ᖃᓄᐃᙱᑦᑎᐊᕈᑎᖏᓐᓂᒃᓗ ᐋᖅᑭᒃᓱᐃᓂᒃᑯᑦ ᐃᓕᓐᓂᐊᕈᑎᒃᓴᓂᑦ. ᑖᓐᓚ ᐱᒻᒪᕆᐅᓪᓗᐊᑕᖅᑐᖅ ᐃᓕᓐᓂᐊᖅᑎᓄᑦ ᐱᔪᓐᓇᙱᑦᑐᓄᑦ ᖃᕆᑕᐅᔭᒃᑯᑦ ᐱᑕᖃᖅᑐᓂᒃ ᑕᐃᒃᑯᓄᖓᓗ ᐊᔾᔨᐅᙱᑦᑑᑎᑕᐅᔪᓄᑦ ᐃᓕᓐᓂᐊᕐᓂᕐᒥᒃ ᐸᕐᓇᐅᑎᓄᑦ.

ᐃᓕᓐᓂᐊᕐᕕᖕᒥ ᐃᖅᑲᓇᐃᔭᖅᑎᑦ ᐊᐅᓪᓚᖅᓯᒪᑐᐃᓐᓇᕆᐊᓕᑦ ᓄᓇᓄᑦ ᓯᓚᑖᓄᑦ ᐊᑐᕆᐊᖃᖅᑐᑦ ᐱᔭᕆᐊᖃᒻᒪᕆᒃᑐᒥᒃ 14−ᓄᑦ ᐅᓪᓗᓄᑦ ᐃᓄᒡᑐᓗᑎᒃ ᐊᓂᑦᑕᐃᓕᓂᕐᒥᒃ ᓄᓇᕗᒻᒥ ᒐᕙᒪᒃᑯᑦ ᑐᓂᓯᒪᔭᖏᓐᓄᑦ ᐃᓄᑑᓗᑎᒃ ᐊᓂᑦᑕᐃᓕᒪᓂᕐᒧᑦ ᑐᔪᕐᒥᕕᖕᓂ ᖃᓪᓗᓈᑦ ᓄᓇᖏᓐᓂ ᐅᑎᓚᐅᙱᑎᓪᓗᒋᑦ ᓄᓇᕗᒻᒧᒃ. ᑖᓐᓇ ᐊᔾᔨᒋᔭᖓ ᐱᕙᓪᓕᐊᔾᔪᑎᖓᑦ ᓄᓇᕗᒻᒥ ᓄᓇᓕᓕᒫᑦ, ᓄᓇᕗᒻᒥ ᐃᓕᓐᓂᐊᖅᑎᑦ ᑮᓇᐅᔭᖃᖅᑎᑕᐅᓂᖏᓐᓄᑦ ᐃᑲᔫᑎ ᐃᓕᓐᓂᐊᖅᑎᓄᑦ, ᐋᓐᓂᐊᕕᓕᐊᖅᑐᓄᓪᓗ ᐊᐅᓪᓚᖅᑎᓄᑦ ᐅᑎᓕᖅᑐᓄᑦ ᓄᓇᕗᒻᒧᑦ ᒪᓕᑲᑕᒃᑕᖓᒍᑦ. ᑖᓐᓇ ᐱᕙᓪᓕᐊᔾᔪᑎ ᐋᖅᑭᒃᑕᐅᓚᐅᖅᑐᖅ ᐱᖁᔭᐅᔾᔪᑎᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᖓᓄᑦ.

ᓄᓇᕗᒻᒥ ᓄᓇᓖᑦ, ᐃᓚᐅᓪᓗᑎᒃ ᐃᓕᓐᓂᐊᕐᕕᖕᒥ ᐃᖅᑲᓇᐃᔭᖅᑎᑦ, ᑲᒪᒋᔭᖃᖅᑎᑕᑦ ᐊᐅᓪᓚᕈᑎᑦ ᐊᑭᖏᓐᓂᒃ ᐅᑎᕐᓗᑎᒃ ᐊᖏᕐᕋᖏᓐᓄᑦ ᓄᓇᕗᒻᒥ. ᓄᓇᕗᒻᒥ ᒐᕙᒪᒃᑯᑦ ᐊᑭᓕᖅᓯᓂᐊᖅᑐᑦ ᐊᑭᖏᓐᓂᒃ ᐃᓄᑑᓗᑎᒃ ᐊᓂᑦᑕᐃᓕᓂᕐᒥ ᑐᔪᕐᒥᕕᖕᓂ ᓄᓇᕗᓕᒫᒥ ᓄᓇᓕᐅᔪᓄᑦ, ᐃᓚᐅᓪᓗᑎᒃ ᐃᓕᓐᓂᐊᕐᕕᖕᒥ ᐃᖅᑲᓇᐃᔭᖅᑎᑦ.

ᓄᓇᕗᒻᒥ ᒐᕙᒪᒃᑯᓐᓄᑦ ᐃᒻᑲᓇᐃᔭᖅᑎᓕᒫᑦ, ᐃᓚᐅᓪᓗᑎᒃ ᐃᓕᓴᐃᔨᑦ, ᓂᕆᐅᒋᔭᐅᔪᑦ ᐃᖅᑲᓇᐃᔭᕐᓗᑎᒃ ᐃᓗᐊᓃᓪᓗᑎᒃ ᓄᓇᕗᑦ. ᓴᖅᑭᑎᓐᓂᐊᖅᐸᕗᑦ ᖃᓄᑐᐃᓐᓇᖅ ᑐᒃᓯᕋᖅᑕᑦ ᐃᖅᑲᓇᐃᔭᖅᑎᓂᒃ ᒫᓐᓇᐅᔪᖅ ᓄᓇᕗᒻᒦᖏᑦᑐᓄᑦ ᐃᖅᑲᓇᐃᔭᕐᓗᑎᒃ ᓯᓚᑖᓂ ᐊᑕᐅᓯᐅᓈᖅᑎᑕᐅᕙᓪᓕᐊᓗᑎᒃ.

ᐃᓕᓐᓂᐊᕐᓂᓕᕆᔨᒃᑯᑦ ᖃᐅᔨᓇᓱᐃᓐᓇᖃᑦᑕᖅᑐᑦ ᓄᓇᕗᒻᒥ ᐃᓕᓴᐃᔩᑦ ᑲᑐᔾᔨᖃᑎᒌᖓᓄᑦ ᐊᒻᒪ ᑭᒡᒐᖅᑐᐃᔨᖏᑦ ᐃᓕᓐᓂᐊᖅᑐᓕᕆᔨᒃᑯᑦ ᓄᓇᕘᒥ.

ᑕᒪᒃᑮ ᐃᑲᔪᖅᓱᐃᔫᒃ ᐋᖅᑭᒃᑕᒥ ᐃᓕᓴᐃᔨᑦ ᐅᑎᖅᑎᓪᓗᒋᑦ ᐃᖅᑲᓇᐃᔮᖏᓐᓄᑦ ᐱᖁᓪᓗᒍ ᐃᓕᓐᓂᐊᖅᑎᑦ ᑲᔪᓯᓗᑎᒃ ᐃᓕᑦᑎᕙᓪᓕᐊᓂᕐᒥᒃ ᐃᑲᔪᖅᓱᖅᑕᐅᔪᓪᓗ ᐃᓕᓐᓂᐊᕖᑦ ᒪᑐᒪᔭᐅᑎᓪᓗᒋᑦ.

ᐃᓕᓐᓂᐊᕐᕖᑦ ᒪᑐᐃᖅᑕᐅᒃᑲᓐᓂᑕᐃᓐᓇᕋᔭᖅᑐᑦ ᐃᓕᓐᓂᐊᖅᑎᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᖓ ᐊᑕᕐᓇᕈᓐᓃᕋᓱᒋᒍᓂᐅᒃ ᐅᑎᕆᐊᒃᓴᖅ. ᑕᐃᒪᐃᒃᑲᓗᐊᖅᑎᓪᓗᒍ, ᐃᖅᑲᓇᐃᔭᖅᑎᕗᑦ ᐅᑎᖅᓯᒪᖁᔭᓄᑦ ᐃᖅᑲᓇᐃᔮᖏᓐᓄᑦ ᐊᐃᐳᕈ 21−ᒥ ᐱᕙᒌᔭᕐᓗᒋᑦ ᐃᓕᓐᓂᐊᖅᑎᖁᑎᑦᑕ ᑲᔪᓯᔪᓐᓇᕐᓂᖏᑦ ᐱᕙᓪᓕᐊᓂᕐᒥ, ᖃᓅᒐᓗᐊᖅᐸᑦ ᖃᓄᐃᓕᐅᕆᐊᒃᑲᓐᓂᕈᑎ.


ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᓕᕆᕝᕕᖓ - ᐄᐳᕈ 7, 2020

ᐄᐳᕈ 7−ᒥᑦ ᐱᒋᐊᖅᖢᓂ, ᐃᓕᓴᐃᔩᑦ ᒫᓐᓇ ᑕᒫᓃᑦᑐᑦ ᐃᓕᓐᓂᐊᕐᕕᖕᓄᑦ ᐅᑎᕈᓐᓇᓕᖅᐳᑦ ᑕᒪᓐᓇᓗ ᐃᓱᒪᖅᓲᑎᒋᓪᓗᓂᔾᔪᒃ, ᐃᓕᓐᓂᐊᕐᕕᓕᐊᖃᑦᑕᕈᑎᒃ ᐋᖅᑭᒃᓱᐃᕙᓪᓕᐅᔪᒪᓕᕐᓂᕐᒥᓄᑦ ᐃᓕᓐᓂᐊᕈᑎᒃᓴᓂᒃ ᐃᓕᓐᓂᐊᖅᑐᓄᑦ. ᒪᓕᒋᐊᓕᖕᓂᒃ ᑲᔪᓯᑎᑦᑎᓂᐊᕐᓗᓂ ᑕᒪᒃᑯᓂᖓ ᐃᓕᓐᓂᐊᕈᑕᐅᓂᐊᓕᖅᑐᓂᒃ ᐃᓕᓐᓂᐊᖅᑎᓄᑦ, ᑭᖑᓪᓕᖅᐹᖅᓯᐅᑎᖏᑦ ᐋᖅᑭᒃᓱᖅᑲᐅᕙᓪᓕᐊᕗᑦ ᐃᓕᓐᓂᐊᕐᓂᓕᕆᔨᒃᑯᓐᓂᑦ.

ᑕᒪᕐᒥᑦᑎᐊᖅ ᐃᓕᓐᓂᐊᕐᕕᖕᓂ ᐃᖅᑲᓇᔭᖅᑎᓕᒫᑦ ᐃᖅᑲᓇᐃᔭᕐᕕᖕᒥᓄᑦ ᐅᑎᕐᓂᐊᕋᓱᒋᔭᐅᕗᑦ ᐊᖏᕐᕋᕆᔭᒥᓂ ᓄᓇᓕᖕᓂ ᐊᐃᕐᕆᓕ 21, 2020−ᒥ. ᐃᓕᓴᐃᔩᑦ ᒫᓐᓇ ᐊᐅᓪᓚᖅᓯᒪᔪᑦ ᑕᒫᙵᑦ ᐅᑭᐅᖅᑕᖅᑐᒥᑦ ᐊᑐᕆᐊᖃᖅᑎᑕᐅᓂᐊᖅᐳᑦ 14−ᓄᑦ ᐅᓪᓗᓄᑦ ᐅᐸᒃᑕᐅᑦᑕᐃᓕᒪᓂᕐᒥᒃ ᐋᖅᑭᒃᑕᐅᓯᒪᕙᒌᖅᑐᒥ ᐅᐸᒃᑕᐅᑦᑕᐃᓕᕝᕕᖕᒥ ᐅᑎᓚᐅᙱᓐᓂᕐᒥᓂ ᓄᓇᕗᒻᒧᑦ. ᐃᓕᓴᐃᔨᓂᒃ ᐱᒋᐊᖅᑐᖃᕈᓐᓇᙱᑉᐸᑦ 14−ᓄᑦ ᐅᓪᓗᓄᑦ ᐅᐸᒃᑕᐅᑦᑕᐃᓕᒪᔭᕆᐊᖃᕐᓂᕐᒥᓂᒃ ᐅᑎᕆᐊᖃᕐᓂᐊᕐᓗᑎᒃ ᐊᐃᕐᕆᓕ 21−ᒥ, ᐃᓕᓐᓂᐊᕐᕕᖓᑕ ᐊᖓᔪᖅᑳᖓ ᖃᐅᔨᑎᑦᑕᕆᐊᖃᑦᐸᐅᒃ ᑐᓴᖅᑎᓪᓗᒍᓗ ᑐᓴᖅᑎᔾᔪᑎᒋᔭᕆᐊᖃᖅᑕᒥᓂᒃ ᓄᒃᑕᕐᓂᕐᒧᑦ ᖃᓄᐃᓕᖓᓂᐊᕐᒪᖔᒥᓂ, ᐅᖃᖃᑎᖃᖅᐸᒡᓗᓂᓗ ᓇᓕᐊᖕᓂᑐᐃᓐᓇᖅ ᐅᐸᒃᑕᐅᑦᑕᐃᓕᒪᕝᕕᖕᓂᒃ ᐅᖃᐅᑎᔪᒪᓗᒋᑦ ᖃᓄᑐᐃᓐᓇᖅ ᑭᖑᕙᕆᐊᕆᐊᖅᑎᑕᐅᑐᐃᓐᓇᕆᐊᓕᖕᓂᒃ.  

ᐊᐃᕐᕆᓕ 21-ᖑᓕᖅᐸᑦ, ᐋᖅᑭᒃᑕᐅᓯᒪᓕᖅᑐᖃᓛᖅᑐᖅ ᒪᓕᒃᑐᖃᕐᓗᓂ ᐋᓐᓂᐊᖃᕐᓇᙱᑦᑐᓕᕆᔨᓪᓗᐊᑕᐅᑉ ᖃᓄᐃᓕᐅᖁᓯᒪᔭᖏᓐᓂᒃ.

ᐃᓕᓐᓂᐊᕐᕖᑦ ᒪᑐᒪᐃᓐᓇᕆᐊᖃᖅᐸᑕ:

  • ᐃᓕᓐᓂᐊᕐᕕᖕᒥ ᐃᖅᑲᓇᐃᔭᖅᑏᑦ ᐊᐅᓚᓂᕆᕙᒃᑕᒥᓂᒃ ᐊᐅᓚᑎᑦᑎᔭᕆᐊᖃᓛᖅᑐᐃᑦ, ᐊᐱᕆᔭᐅᓂᐊᖅᖢᑎᒡᓗ ᐋᖅᑭᒃᓱᐃᖁᔭᐅᓗᑎᒃ ᐃᓕᓐᓂᐊᕈᑎᒃᓴᓂᒃ ᐋᖅᑭᒃᓱᐃᕙᓪᓕᐊᖏᓐᓇᕐᓂᕐᒥᒃ ᐃᓕᓐᓂᐊᖅᑎᓕᒫᓄᑦ.
  • ᐃᓕᓴᐃᔨᑦ ᑐᓂᔭᐅᓂᐊᕐᑐᑦ ᑐᑭᓯᓇᑦᑎᐊᕐᑐᓂᑦ ᒪᓕᒐᒃᓴᓂᑦ ᖃᓄᖅ ᖃᐅᔨᓴᕋᔭᖕᒪᖔᖏᑦ, ᖃᓄᕐᓗ ᑭᖑᓪᓕᖅᐹᖅᓯᐅᑎᓂᒃ, ᐃᓕᓐᓂᐊᖅᑏᑦ ᓇᓕᖅᑲᖏᓐᓂᒃ, ᖁᑦᑎᒃᓯᕙᓪᓕᐊᓃᓪᓗ ᑎᑭᑕᐅᓂᐊᖕᒪᖔᖏᑕ.

ᐃᓕᓐᓂᐊᕐᕖᓪᓕ ᒪᑐᐃᒃᑲᓐᓂᕐᓂᖅᐸᑕ:

  • ᐃᓕᓐᓂᐊᕐᕕᖕᓂ ᐊᐅᓚᓂᕆᔭᐅᕙᒃᑐᑦ ᑲᔪᓯᑐᐃᓐᓇᕐᓂᐊᖅᑐᑦ ᑲᔪᓯᓂᕆᕙᒃᑕᒥᑐᑦ.

ᐱᓕᕆᕝᕕᖕᓂᑦ ᖃᐅᔨᓴᕈᑎᑦ ᖁᑦᑎᓛᓄᑦ ᐃᓕᓐᓂᐊᕐᑎᓄᑦ ᓄᖅᑲᖅᑎᑕᐅᓚᐅᕐᐳᑦ ᔫᓐ ᐃᓱᐊᓄᑦ.


ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᓕᕆᕝᕕᖓ - ᐄᐳᕈ 3, 2020

ᐊᐃᑉᐹᓂ, ᐊᐃᕐᕆᓕ 7, ᐃᓕᓐᓂᐊᕐᕕᖕᒥ ᐃᖅᑲᓇᐃᔭᖅᑏᑦ ᐃᓕᓐᓂᐊᕐᕕᖕᒧᐊᕈᓐᓇᕐᓂᐊᓕᖅᑐᑦ ᐱᔪᒪᒍᑎᒃ ᐃᓕᓐᓂᐊᕈᑎᒃᓴᓂᒃ ᐋᖅᑭᒃᓱᐃᕙᒌᕆᐊᖅᑐᕐᓗᑎᒃ.

ᐃᓕᓐᓂᐊᕐᓂᓕᕆᔨᒃᑯᑦ ᐱᓕᕆᖃᑎᒌᓂᒃ ᐱᑕᖃᖅᐳᑦ ᒪᓕᒋᐊᓕᖕᓂᒃ ᐋᖅᑭᒃᓱᐃᕙᒃᑐᓂᑦ ᐃᓕᓴᐃᔨᓄᑦ ᓇᓗᓇᐃᖅᓯᓇᓱᒃᑐᓄᑦ ᐊᔪᙱᓐᓂᖏᓐᓄᑦ−ᑐᕌᖓᔪᓂᒃ ᐱᔾᔪᑎᖃᓪᓗᐊᑕᖅᑐᑦ ᐃᓕᓐᓂᐊᕈᑎᓂᒃ ᑲᑎᖅᓱᖅᓯᒪᔪᓂᑦ. ᑲᑎᖅᓱᖅᓯᒪᔪᑦ ᐊᔾᔨᒋᙱᑐᐃᓐᓇᕆᐊᓖᑦ ᐊᑐᓂ ᐃᓕᓐᓂᐊᖅᑎᓄᑦ.

ᐃᓕᓐᓂᐊᕐᕕᖕᒧᐊᕈᓐᓇᕐᓂᖅ ᐃᖅᑲᓇᐃᔭᕐᓂᕐᒧᑐᐊᖑᕗᖅ ᐱᙳᐊᕆᐊᖅᑐᕐᓂᖕᒨᙱᑦᑐᖅ ᐊᓯᖏᓐᓄᓪᓘᓐᓃᑦ ᐃᓕᓐᓂᐊᕐᓂᕐᒨᙱᑦᑐᓄᑦ ᐱᓕᕆᐊᒃᓴᓄᑦ.

ᐃᓕᓐᓂᐊᕐᓂᓕᕆᔨᒃᑯᑦ ᑕᒪᐃᓐᓂ ᐃᓕᓐᓂᐊᕐᕕᖕᓂᑦ ᐱᑎᑦᑎᓂᐊᕆᕗᑦ ᐋᓐᓂᐊᖃᖅᑕᐃᓕᓂᕐᒧᑦ ᐊᑦᑕᕐᓇᖅᑕᐃᓕᒪᓂᕐᒧᓪᓗ ᒪᓕᒋᐊᖃᖃᑦᑕᕐᓂᐊᖅᑐᓂᑦ ᓄᕙᒡᔪᐊᕐᓇᖅ-19−ᒧᑦ, ᐱᖃᓯᐅᓪᓗᓂ ᐊᓂᖅᑎᕆᔾᔪᓰᑦ, ᐊᒡᒐᖕᓂ ᐅᐊᓴᐃᖃᑦᑕᕐᓂᖅ, ᐊᒻᒪ ᖃᓂᒌᓗᐊᕆᐊᖃᙱᓐᓂᖅ.


ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᓕᕆᕝᕕᖓ - ᒫᑦᓯ 31, 2020

ᒥᓂᔅᑕᐅᑉ ᐃᓕᓐᓂᐊᕐᓂᓕᕆᔨᒃᑯᓐᓄᑦ ᓄᑖᙳᕆᐊᖅᑎᑕᖏᑦ:

ᒪᑦᓯ 17−ᖑᓚᐅᕐᓂᖓᓂᑦ, ᓄᓇᕗᒻᒥ ᐃᓕᓐᓂᐊᕐᕖᑦ ᒪᑐᔭᐅᓯᒪᕗᑦ ᐃᑲᔪᕈᒪᓂᕐᒧᑦ ᓯᐅᒻᒪᒃᑎᕆᑦᑕᐃᓕᒪᔪᒪᓂᕐᒧᑦ ᑕᒪᑐᒥᖓ ᓄᕙᒡᔪᐊᕐᓇᖅ-19−ᒥᒃ. ᑕᐃᒪᐃᓐᓂᖓᓄᑦ, ᐊᖓᔪᖅᑳᑦ ᑲᒪᔨᒋᔭᐅᕙᒃᑐᓪᓗ ᐊᐱᕆᖃᑦᑕᖅᓯᒪᕗᑦ ᐃᓕᓐᓂᐊᕐᓂᕐᒧᑦ ᐊᑐᖅᑕᐅᔪᓐᓇᖅᑐᓂᒃ ᐃᑲᔪᕈᒪᓪᓗᒋᑦ ᓄᑕᖅᑲᑎᒃ ᐃᓕᓐᓂᐊᒋᖏᓐᓇᕐᓂᕐᒧᑦ.

ᐅᓪᓗᒥ ᓇᓗᓇᐃᖅᓯᕗᖓ ᐅᖃᐅᓯᖃᖅᖢᖓ ᐃᓕᓐᓂᐊᕐᓂᓕᕆᔨᒃᑯᑦ ᐋᖅᑭᒃᓱᐃᓯᒪᓂᖏᓐᓂᒃ ᐃᓕᓐᓂᐊᕙᓪᓕᐊᓂᕐᒧᑦ ᐊᖏᕐᕋᕆᔭᐅᔪᒥ ᐃᑭᐊᖅᑭᕕᖕᒥᒃ ᐆᒥᖓ, ᐊᖏᕐᕋᒥ ᐃᓕᓐᓂᐊᕐᓂᖅ, (angirrami.com). ᑖᓐᓇ ᐃᑭᐊᖅᑭᕕᒋᔭᐅᔪᖅ ᒪᓂᒪᑎᑦᑎᕗᖅ ᐊᑭᖃᙱᑦᑐᒥᒃ ᐊᑐᖅᓯᔪᓐᓇᕐᓂᕐᒥᒃ ᐃᓚᖏᓐᓄᑦ ᑖᒃᑯᐊᑦᑕᐃᓐᓇᕐᓗᑦ ᐊᑐᖅᑕᐅᕙᒃᑐᓄᑦ ᐃᓕᓐᓂᐊᕐᕕᑦᑎᓐᓂ.

ᑖᒃᑯᐊ ᐃᓚᖃᖅᐳᑦ ᖃᕆᑕᐅᔭᒃᑯᑦ ᐱᔭᒃᓴᐅᔪᓂᒃ ᐅᖃᓕᒫᒐᕐᓂᒃ ᖃᕆᑕᐅᔭᒃᑰᖓᔪᓂᒃ ᐅᖃᓕᒫᒐᕐᓂᒃ ᐃᓕᓐᓂᕆᐅᖅᓴᓕᓵᖅᑐᓄᑦ ᐊᕐᕌᒍᓕᖕᓄᑦ ᖁᑦᑎᒃᓯᕙᓪᓕᐊᖓᓪᓗᑎᒃ; ᐃᓕᓐᓂᐊᖅᑎᑦᑎᔾᔪᑕᐅᒃᑐᑦ ᑐᓵᓪᓗᒋᑦ ᐅᖃᔨᒫᒐᐃᑦ ᐊᐅᓚᔪᙳᖅᑎᑕᐅᓯᒪᔪᓪᓗ ᑕᕐᕆᔭᒐᒃᓴᓄᑦ; ᐊᑐᖅᑕᐅᔪᓐᓇᖅᑐᓄᑦ ᐱᓕᕆᐊᒃᓴᓄᓪᓗ ᐃᓕᓐᓂᐊᖅᐸᓪᓕᐊᓗᓂ; ᐊᒻᒪᓗ ᐊᑐᖅᑕᐅᔪᓐᓇᖅᑐᓂᒃ ᐊᐅᓚᑦᑎᕝᕕᖃᕐᓂᐊᕐᓗᓂ ᐊᒃᓱᕈᓐᓇᖅᓯᔪᓂᒃ ᐃᓱᒪᒃᑯᓪᓗ ᖃᓄᙱᑦᑎᐊᕈᓐᓇᕐᓂᕐᓂᒃ.

ᐊᒻᒪᑦᑕᐅᖅ ᐊᑕᓕᕐᕕᐅᔪᓐᓇᖅᑐᓂᒃ ᖃᕆᑕᐅᔭᒃᑯᑦ ᐱᕝᕕᐅᔪᓐᓇᖅᑐᓂᒃ ᐱᔨᕆᕝᕕᒋᔭᐅᔫᑉ ᐃᓄᒃᑐᑦ ᐅᖃᐅᓯᕐᒧᑦ ᐃᓕᓐᓂᐊᖅᑎᑦᓂᕐᒧᑦ ᐱᔭᐅᔪᓐᓇᖅᑐᓂᒃ ᖃᕆᑕᐅᔭᒃᑯᑦ:

  • ᐅᖃᐅᓰᑦ ᐱᙳᐊᕈᓰᑦ ᖁᕕᐊᓇᖅᑐᓂᒃ ᐱᓕᕆᐊᒃᓴᖁᑎᖃᖅᐳᑦ ᐃᑲᔪᖅᑐᐃᔪᓂᒃ ᐃᓄᐃᑦ ᐅᖃᐅᓯᖓ ᖃᓄᐃᓕᖓᓂᖓᓂᒃ ᖃᓄᕐᓗ ᓂᐱᖏᓐᓂᒃ ᐃᓕᓴᖅᓯᔪᓐᓇᕐᓂᕐᓂᒧᑦ, ᐅᖃᐅᓯᕐᓄᓪᓗ ᐱᕙᓪᓕᐊᓂᕆᔭᐅᔪᒥᒃ.
  • ᑎᑎᕋᕆᐅᖅᓴᐅᑎ ᓴᖅᑭᑎᑦᑎᕗᖅ ᐃᓄᐃᑦ ᐅᖃᐅᓯᖓᓄᑦ ᓇᓗᓇᐃᒃᑯᑕᕐᓄᑦ ᓂᐱᖏᓐᓄᑦ ᑎᑎᕋᖅᓯᕙᓪᓕᐊᓂᕐᒧᓪᓗ ᖃᓄᐃᓕᐅᖅᑕᐅᕙᓪᓕᐊᕙᒃᑐᓄᑦ.
  • ᕿᒥᕐᕈᓇᐅᑦ ᐱᓕᕆᕝᕕᒋᔭᐅᔫᑉ ᓄᑖᖑᓪᓗᓂ ᐃᓄᒃᑎᑐᑦ ᖃᕆᑕᐅᔭᒃᑯᑦ ᐅᖃᓕᒫᒐᕐᓄᑦ ᕿᒥᕐᕈᐊᒐᖃᕐᕕᖕᒥ ᐊᑐᖅᑕᐅᔪᓐᓇᖅᐸᒃᖢᓂ.

ᑕᒪᒃᑯᐊ ᖃᕆᑕᐅᔭᒃᑯᑦ ᐱᔭᐅᔪᓐᓇᖅᑐᑦ ᒪᓂᒪᕗᑦ Android−ᓄᑦ ᐊᒻᒪᓗ iOS−ᓄᑦ ᐊᑐᖅᑕᐅᕙᒃᑐᓄᑦ ᖃᕆᑕᐅᔭᒃᑯᓪᓗ ᐱᔭᐅᔪᓐᓇᖅᖢᑎᒃ ᐅᑯᓇᙵᑦ, Google Play ᐅᕙᓘᓐᓃᑦ Apple App ᓂᐅᕕᕐᕕᖕᓂᑦ.

ᐊᖏᕐᕋᒥ ᐃᓕᓐᓂᐊᕐᓂᖅ ᐱᑎᑦᑎᕙᒃᐳᖅ ᐊᑕᓕᕐᕕᐅᔪᓐᓇᖅᑐᓂᒃ ᐊᓯᖏᓐᓄ ᖃᕆᑕᐅᔭᒃᑯᑦ ᐃᑭᐊᖅᑭᕕᒃᑯᑦ ᐃᓕᓐᓂᐊᕐᓂᕐᒧᑦ ᐊᑐᖅᑕᐅᔪᓐᓇᖅᑐᓂᒃ ᐃᓕᓐᓂᐊᖅᑎᑦᑎᔾᔪᑕᐅᕙᒃᑐᓄᑦ ᓲᕐᓗ, ᖃᐅᔨᓴᖅᑐᓕᕆᓂᖅ, ᓈᓴᐅᓯᕆᓂᖅ, ᖃᓄᐃᓕᐅᖅᑕᐅᕙᓚᐅᖅᑐᓕᕆᓂᖅ, ᐃᓄᓕᕆᓂᕐᒥᒡᓗ. 

ᐅᔾᔨᕈᓱᖁᒡᒋᕗᖓᑦᑕᐅᖅ ᑖᓐᓇ ᐃᑭᐊᖅᑭᕕᐅᔪᓐᓇᖅᑐᖅ ᖃᕆᑕᐅᔭᒃᑯᑦ ᐅᓪᓗᒥ ᐱᒋᐊᖅᑎᑕᐅᒐᓗᐊᖅᑎᓪᓗᒍ, ᓄᑖᓂᒃ ᐊᑐᖅᑕᐅᔪᓐᓇᖅᑐᓂᒃ ᖃᖓᙳᕌᖓᑦ ᐃᓕᓯᕝᕕᐅᖃᑦᑕᕐᓂᐊᖅᐳᖅ. ᓯᕗᓪᓕᖅᐸᐅᔾᔭᐅᓯᒪᔪᖅ ᑕᒪᒃᑯᐊ ᐃᓄᒃᑎᑑᖓᔪᑦ ᐃᓄᐃᓐᓇᖅᑑᖓᔪᓪᓗ ᐊᑐᖅᑕᐅᔪᓐᓇᖅᑐᑦ ᐃᑭᐊᖅᑭᕕᖕᒧᐊᖅᑎᕈᒪᓪᓗᑎᒍ ᓱᒃᑲᓕᔪᓐᓇᕐᓂᓕᒫᕗᑦ ᒪᓕᒡᓗᒍ. ᖃᓪᓗᓈᑑᖓᔪᑦ ᐅᐃᕖᑎᑑᖓᔪᓪᓗ ᐊᑐᖅᑕᐅᔪᓐᓇᖅᑐᑦ ᖃᖓᑦᑎᐊᒃᑯᑦ ᐃᓕᐅᖅᑲᖅᑕᐅᔨᓛᕐᒥᔪᑦ.

ᑕᒪᕐᒥᑦᑎᐊᖅ ᐊᑐᖅᑕᐅᔪᓐᓇᖅᑐᑦ ᓇᓂᔭᐅᔪᑦ ᑕᕝᕙᓂ ᐃᓂᒥ ᓴᖅᑭᑎᑕᐅᓚᐅᖅᐳᑦ ᐃᓕᓐᓂᐊᕐᓂᓕᕆᔨᒃᑯᓐᓂᑦ ᐱᓕᕆᖃᑎᒋᕙᒃᑕᖏᓐᓂᓪᓗ, ᐃᓚᒋᔭᐅᓪᓗᑎᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑭᒡᒐᖅᑐᐃᔨᓗ ᓄᑕᖅᖃᕝᑲᓄᑦ ᒪᒃᑯᒃᑐᓄᓪᓗ ᑎᑎᕋᕐᕕᖓ, ᐊᒻᒪᓗᑦᑕᐅᖅ ᐃᓗᓕᕆᔨᒃᑯᑦ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ, ᐊᕙᑎᓕᕆᔨᒃᑯᑦ, ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ.

ᖁᔭᓕᔪᒪᕙᒃᑲ ᑕᒪᕐᒥᑦᑎᐊᖅ ᐃᓕᓐᓂᐊᖅᑏᑦ, ᐊᖓᔪᖅᑳᑦ, ᑲᒪᒡᒋᔭᐅᕙᒃᑐᓪᓗ ᐅᑕᖅᑭᔪᓐᓇᑦᑎᐊᕐᓂᖏᓐᓄᑦ. ᖃᐅᔨᒪᕗᖓ ᐃᓕᔅᓯᓐᓄᑦ ᐊᒥᓱᓄᑦ ᐊᔪᕐᓇᙱᑦᑐᑯᓗᖃᑦᑕᖅᓯᒪᙱᓚᖅ ᑕᒪᒃᑯᐊ ᐃᓕᓐᓂᐊᕐᕖᑦ ᐸᐃᕆᕝᕖᓪᓗ ᒪᑐᓯᒪᓂᖏᓐᓄᑦ. ᑭᓯᐊᓂᑦᑕᐅᖅ, ᑕᒪᑦᑎᑕᑦᑎᐊᖅ ᐱᓕᕆᐊᖃᕆᐊᖃᖅᐳᒍᑦ ᐱᓕᕆᔪᓐᓇᖅᑕᑦᑎᓐᓂᒃ ᓯᐊᒻᒪᒃᑎᕆᑦᑕᐃᓕᒪᔪᒪᓂᖅ ᓄᕙᒡᔪᐊᕐᓇᖅ-ᒥᒃ.

ᖃᐅᔨᒪᑦᑎᐊᖁᕙᔅᓯ ᐱᓕᕆᕝᕕᒋᔭᕋ ᐊᒃᓱᕈᖅᖢᓂ ᐱᓕᕆᖃᑦᑕᖅᓯᒪᓂᖓᓂᒃ ᑖᓐᓇ ᐃᑭᐊᖅᑭᕕᐅᕙᒃᑐᖅ ᐱᑐᐃᓐᓇᕆᐊᖃᓕᖅᑎᑦᑐᒪᓪᓗᒍ ᐊᔪᕐᓇᙱᓐᓂᓕᒫᖓ ᐊᑐᕐᓗᒍ ᖃᓂᓛᒃᑯᑦ.

ᑎᓕᐅᖅᐸᒃᑲ ᓄᓇᕗᒻᒥᐅᑦ ᕿᓂᖁᓪᓗᒋᑦ ᑕᒪᐃᓐᓂᑦᑎᐊᖅ ᐊᑐᖅᑕᐅᔪᓐᓇᖅᑐᓂᒃ ᑖᔅᓱᒪ ᐃᑭᐊᖅᑭᕕᐅᑉ ᒪᓂᒪᑎᖃᑦᑕᕐᓂᐊᖅᑕᖏᓐᓂᒃ. ᐃᓕᑦᑎᕙᓪᓕᐊᓂᖅ ᐃᓚᓕᐅᑎᓗᒍ ᖃᐅᑕᒫᑦ ᐊᑐᖅᐸᒃᑕᕐᓄᑦ!

ᖁᔭᓐᓇᒦᒃ, ᖁᐊᓇ, thank you, merci.

ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᔨᑦᑎᕋᐅᑎᖏᑦ

ᐅᓪᓗᒥ, ᐃᓕᓐᓂᐊᕐᓂᓕᕆᔨᒃᑯᑦ ᓴᖅᑭᑎᑦᑎᕗᑦ ᐃᓕᓐᓂᐊᖅᐸᓪᓕᐊᓂᕐᒧᑦ ᐊᖏᕐᕋᕆᔭᐅᔪᒥ ᐃᑭᐊᖅᑭᕕᖕᒥᒃ ᐆᒥᖓ, ᐊᖏᕐᕋᒥ ᐃᓕᓐᓂᐊᕐᓂᖅ, (angirrami.com). ᑖᓐᓇ ᐊᖏᕐᕋᕆᔭᐅᔪᒥ ᐃᓕᓐᓂᐊᕈᓐᓇᕐᓂᕐᒧᑦ ᐃᑭᐊᖅᑭᕕᒃ ᐋᖅᑭᒃᓱᖅᑕᐅᓂᑯ ᐃᓕᓐᓂᐊᕐᓂᓕᕆᔨᒃᑯᓐᓂᑦ ᐱᑎᑦᑎᕙᒃᐳᖅ ᐊᑭᖃᙱᑦᑐᒥᒃ ᐊᑐᖅᓯᔪᓐᓇᕐᓂᕐᒥᒃ ᐃᑲᔪᕈᒪᓪᓗᒋᑦ ᓄᑕᖅᑲᑦ ᒪᒃᑯᒃᑐᓗ ᐃᓕᑦᑎᕙᓪᓕᐊᖏᓐᓇᕐᓂᕐᒥᒃ ᐅᖃᐅᓯᕐᒥᑎᒍᑦ ᐃᓕᓐᓂᐊᕐᕖᑦ ᒪᑐᔭᐅᓯᒪᓂᖏᓐᓂ.

ᑕᐃᒪᐃᖁᔭᐅᓯᒪᓂᕐᒥᓄᑦ ᐋᓐᓂᐊᖃᕐᓇᙱᑦᑐᓕᕆᔨᓪᓗᐅᑕᒥᑦ, ᐃᓕᓐᓂᐊᕐᕖᑦ ᐸᐃᕐᕆᕝᕖᓪᓗ ᒪᑐᓯᒪᓂᖏᑦ ᐃᓕᓐᓂᐊᖅᑎᓄᑦ ᓄᑕᖅᑲᓄᓪᓗ ᐅᖓᕙᕆᐊᖅᑕᐅᕗᑦ ᐄᐳᕈ 20 ᐅᓪᓗᐊ ᐃᓱᓕᓐᓇᓱᖕᓂᖓᓂ. ᑕᐃᑲᓃᓕᕈᑦᑕ ᖃᖓᙳᖅᐸᓪᓗ, CPHO-ᑯᑦ ᖃᐅᔨᓴᖅᓯᒃᑲᓐᓂᓛᖅᐳᑦ ᐱᑎᑦᑎᓗᑎᒡᓗ ᖃᓄᐃᓕᐅᕆᐊᖃᓕᕐᓂᕐᒥᒃ.


ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᓕᕆᕝᕕᖓ - ᒫᑦᓯ 25, 2020

ᐱᔨᑦᑎᕋᐅᑎᑦ ᑲᔪᓯᔪᑦ: 

  • ᕙᓯᒃᑯᑦ ᑳᑦᑐᓛᒃᑕᐅᓯᒪᔪᑦ ᐊᑭᓕᖅᑕᐅᖃᑦᑕᐃᓐᓇᕐᓂᐊᖅᑐᑦ ᐱᓇᓱᐊᕈᓯᕐᓂᑦ ᐱᖓᓱᓂᒃ ᒪᑐᓯᒪᑎᓪᓗᒋᑦ.

ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᓕᕆᕝᕕᖓ - ᒫᑦᓯ 24, 2020

  • ᐃᓕᓐᓂᐊᕐᓂᓕᕆᔨᒃᑯᑦ ᐃᑲᔪᖅᑐᑦ ᐃᓄᓕᕆᔨᒃᑯᓐᓂᒃ ᑐᑭᒧᐊᖅᑎᑦᓯᓪᓗᑎᒃ ᐅᑎᖅᑎᑕᐅᒍᓐᓇᕐᓂᖏᓐᓂᒃ ᓄᓇᕗᑦ ᓯᓚᑖᓂ ᐃᓕᓐᓂᐊᕆᐊᖅᓯᒪᔪᓂᒃ ᐃᓚᖏᓐᓂᓪᓗ ᓄᓇᕗᒻᒧ.
  • ᐃᓕᓐᓂᐊᕐᓂᓕᕆᔨᒃᑯᑦ ᑮᓇᐅᔭᖃᖅᑎᑦᓯᔪᑦ ᓚᐃᓴᓐᓯᓕᓐᓄᑦ ᐸᐃᕆᕕᓐᓄᑦ ᑭᖑᕝᕕᐅᑎᒐᑦᓴᓂᒃ ᐊᖏᔪᖅᑳᕆᔭᐅᔪᓂᒃ ᐊᑭᓕᐅᑎᐅᖃᑦᑕᖅᑐᓂᒃ ᒫᑦᓯ 17-ᒥᒃ ᐃᐳᕈ 7-ᒧᑦ, 2020.
  • ᓚᐃᓴᓐᓯᓖᑦ ᐸᐃᕆᕕᓕᒫᑦ ᓄᓇᕗᒻᒥ ᐊᑭᓖᑎᑦᓯᖃᑦᑕᖅᑐᑦ ᐊᖏᔪᖅᑳᕆᔭᐅᔪᓂᒃ ᐱᔪᓐᓇᖃᑕᐅᓂᐊᖅᑐᑦ ᐃᑲᔫᑎᒥᒃ.
  • ᑮᓇᐅᔭᐃᑦ ᐊᑭᓕᐅᑎᑦ ᑲᒪᒋᔭᐅᓂᐊᖅᑐᑦ ᐊᐅᓪᓚᖅᑎᑕᐅᓗᑎᓪᓗ ᓚᐃᓴᓐᓯᓕᓐᓄᑦ ᐸᐃᕆᕕᓐᓄᑦ ᑐᖔᓂ ᑕᓪᓕᒻᒥᖅ, ᒫᑦᓯ 27, 2020. ᒫᓐᓇᐅᓂᖓᓂ, ᐊᖏᔪᖅᑳᕆᔭᐅᔪᑦ ᐊᑭᓖᖃᑦᑕᕆᐊᑐᙱᑦᑐᑦ ᐸᐃᕆᕕᓐᓄᑦ.

ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᓕᕆᕝᕕᖓ - ᒫᑦᓯ 23, 2020

  • ᐃᓕᓐᓂᐊᕐᓂᓕᕆᔨᒃᑯᑦ ᑮᓇᐅᔭᖃᖅᑎᑦᑎᓂᐊᖅᑐᑦ ᓄᑕᖅᑲᑦ ᑲᒪᒋᔭᐅᕕᖏᓐᓄᑦ ᐱᔪᓐᓇᐅᑎᓕᖕᓄᑦ ᐃᓂᓄᑦ, ᐊᑭᓖᔪᒪᓪᓗᑎᒃ ᐊᖓᔪᖅᑳᑦ ᐊᑭᓕᕆᐊᖃᖅᑕᖏᓐᓂᒃ ᒫᑦᓯ 17−ᒥᑦ ᐄᐳᕈ 7, 2020-ᒧᑦ.
  • ᑕᒪᕐᒥᑦᑎᐊᖅ ᓄᓇᕗᒻᒥ ᐸᐃᕆᕝᕖᑦ ᐱᔪᓐᓇᐅᑎᓖᑦ ᐊᑭᓕᒐᒃᓴᖅᑖᖅᑎᑦᑎᕙᒃᑐᑦ ᐊᖓᔪᖅᑳᓂᑦ ᐊᑭᓕᖅᑕᐅᔭᕆᐊᖃᖅᐸᒃᑐᓂᒃ ᐊᔪᖅᑎᑕᐅᔾᔮᙱᓚᑦ ᑐᓐᓂᖅᑯᓯᐊᕈᓐᓇᕐᓄᑎᒃ ᑮᓇᐅᔭᓂᒃ.
  • ᑖᒃᑯᐊ ᑮᓇᐅᔭᑦ ᐱᓕᕆᐊᖑᓂᐊᖅᐳᑦ ᓇᒃᓯᐅᔾᔭᐅᓗᑎᒡᓗ ᓚᐃᓴᓕᖕᓄᑦ ᐸᐃᕆᕝᕕᖕᓄᑦ, ᐅᓪᓗᑐᐃᓐᓇᖅ, ᒫᑦᓯ 27, 2020 ᑎᑭᓚᐅᙱᓐᓂᖓᓂ.
  • ᑕᒪᓐᓇ ᒫᓐᓇ ᐊᑐᕐᓂᑦᑎᓐᓂ, ᐊᖓᔪᖅᑳᕆᔭᐅᔪᑦ ᐊᑭᓖᔭᕆᐊᖃᔾᔮᙱᓚᑦ ᐊᖓᔪᖅᑳᕆᔭᐅᔪᓂᑦ ᐊᑭᓕᖅᑕᐅᔭᕆᐊᖃᖅᐸᒃᑐᓂᒃ.
  • ᒪᑐᓯᒪᔪᑦ ᑲᔪᓰᓐᓇᖅᐸᑕ ᐄᐳᕈ 7 ᑎᑭᐊᓪᓚᓚᐅᖅᑎᓪᓗᒍ, ᑖᓐᓇ ᐱᓕᕆᕝᕕᒋᔭᐅᔪᖅ ᖃᐅᔨᓴᖅᓯᒃᑲᓐᓂᓕᕐᓂᐊᖅᐳᖅ ᐃᑲᔪᖅᓯᓕᕐᓗᓂᓗ ᐱᔪᓐᓇᐅᑎᓕᖕᓂᒃ ᐸᐃᕆᕝᕕᖕᓂᒃ ᐃᓂᒋᔭᐅᔪᓂᒃ ᐋᖅᑭᒃᓯᖃᑎᒋᓗᒋᑦ ᖃᓄᖅ ᓯᕗᒻᒧᐊᕈᓐᓇᕋᔭᕐᒪᖔᑕ.

ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᓕᕆᕝᕕᖓ - ᒫᑦᓯ 20, 2020


ᐋᖅᑭᒋᐊᖅᑕᐅᓯᒪᓕᖅᑐᑦ ᐱᔨᑦᑎᕋᕈᑕᐅᕙᒃᑐᑦ:

  • ᐊᑐᖅᑎᑦᑎᓪᓚᕆᒃᑲᓐᓂᕈᒪᓂᕐᒧᑦ ᐃᓅᖃᑎᒥᒃ ᖃᓂᒃᓴᓗᐊᕆᐊᖃᙱᓐᓂᕐᒥᒃ, ᒥᑭᒡᓕᒋᐊᖅᑎᑦᑎᓯᒪᔪᒪᓂᕐᒧᓪᓗ ᓇᒧᙵᖅᑎᑦᑎᓕᑐᐃᓐᓇᕆᐊᖃᕐᓂᕐᒥᒃ ᑕᒪᑐᒥᖓ ᓄᕙᒡᔪᐊᕐᓇᖅ-19−ᒥᒃᒪ ᐃᓕᓐᓂᐊᕐᓂᓕᕿᔨᒃᑯᑦ ᐃᓱᓕᑦᑕᖅᑎᑦᑎᓕᖅᐳᑦ ᑎᑎᕋᕐᕕᖕᓂ ᐱᓕᓂᐅᔭᕆᐅᔭᕆᐊᓕᖕᓂᒃ ᑕᒪᒃᑯᓄᖓᑐᐊᖅ ᐊᑐᖅᑕᐅᔭᕆᐊᖃᒻᒪᕆᒃᐸᒃᑐᓄᑦ ᐃᖅᑲᓇᐃᔭᖅᑎᓄᑐᐊᖅ.

ᒪᑐᔭᐅᔪᖅ/ᓄᖅᑲᖅᑎᑕᐅᔪᖅ/ᓄᖅᑲᖓᑎᑕᓚᐅᑲᒃᑐᖅ ᐱᔨᑦᑎᕋᐅᑏᑦ:

  • ᑕᒪᕐᒥᑦᑎᐊᖅ ᐃᓕᓐᓂᐊᕐᕖᑦ ᓄᑕᖅᑲᓄᓪᓗ ᐸᐃᕆᕝᕖᑦ ᓄᓇᕗᒻᒥ ᒪᑐᔭᐅᕗᑦ ᐱᓇᓱᐊᕈᓯᕐᓄᑦ ᐱᖓᓱᓄᑦ, ᑕᒪᓐᓇ ᒪᑐᓯᒪᓂᖓᑦ ᐱᒋᐊᕐᓂᐊᖅᖢᓂ ᐊᐃᑉᐹᓂ, ᒫᑦᓯ 17, 2020−ᒥ.
     


ᐃᓕᓐᓂᐊᕐᓂᓕᕆᔨᒃᑯᓐᓄᑦ ᓄᑖᙳᕆᐊᖅᓯᒪᔪᑦ - ᒫᑦᓯ 19, 2020

ᐃᓕᓐᓂᐊᕐᓂᓕᕆᔨᒃᑯᑦ ᖃᔅᓯᑲᓪᓚᐃᓪᓗ ᓄᓇᕗᑦ ᒐᕙᒪᖓᑕ ᐱᓕᕆᕝᕕᒋᔭᖏᑦ ᐱᓕᕆᖃᑎᒌᑦᑎᐊᖅᐳᑦ ᒥᑭᒡᓕᒋᐊᖅᑎᑦᑎᔪᒪᓪᓗᑎᒃ ᐊᒃᑐᖅᓯᓂᕆᔭᐅᔪᒥᒃ ᐃᓕᓐᓂᐊᕐᕖᑦ ᒪᑐᔭᐅᓂᖏᓐᓂᒃ ᑕᒪᒃᑯᓄᖓ ᓂᕆᑎᑦᑎᓂᕐᒧᑦ ᐱᓕᕆᐊᖑᕙᒃᑐᓄᑦ.

ᐃᓕᓐᓂᐊᕐᓂᓕᕆᔨᒃᑯᑦ ᐱᑎᑦᑎᓂᐊᖅᐳᑦ ᑮᓇᐅᔭᓂᒃ ᑕᒪᐃᓐᓄᓕᒫᖅ ᓚᐃᓴᖃᖅᑐᓄᑦ ᓄᑕᖅᑲᓂᒃ ᐸᐃᕆᕝᕕᒋᔭᐅᕙᒃᑐᓄᑦ.

ᑖᒃᑯᐊ ᑮᓇᐅᔭᖁᑎᒋᔭᐅᔪᑦ ᓇᓕᒧᒋᔭᖃᕐᓂᐊᖅᐳᑦ ᐊᖓᔪᖅᑳᕆᔭᐅᔪᑦ ᐊᑭᓕᖅᐸᒃᑕᖏᓐᓄᑦ ᓚᐃᓴᓕᖕᓄᑦ ᐸᐃᕆᕝᕕᖕᓄᑦ ᐃᓇᔭᖅᑕᕋᓗᐊᙱᑦᑐᑦ ᑕᒪᑐᒪᓂ ᐱᓇᓱᐊᕈᓯᕐᓄᑦ ᐱᖓᓱᓄᑦ ᒪᑐᓯᓯᒪᓂᕆᔭᐅᔪᒥ.

ᑕᒪᓐᓇ ᐱᕕᖃᖅᑎᑦᑎᓂᐊᖅᐳᖅᐸᐃᕆᕝᕕᖕᓂᒃ ᐊᓕᒐᒃᓴᖅᑖᖅᑎᑦᑎᙱᓪᓗᑎᒃ ᐊᖓᔪᖅᑳᑦ ᐊᑭᓕᐅᑎᒋᕙᒃᑕᖏᓐᓂᒃ ᑕᒪᓐᓇ ᐊᑐᖅᑎᓪᓗᒍ, ᑭᓯᐊᓂᓗᑦᑕᐅᖅ ᐃᖅᑲᓇᐃᔭᖅᑎᒥᓂᒃ ᐊᑭᓕᖅᓱᐃᖏᓐᓇᕐᓂᐊᖅᖢᑎᒃ.

ᒪᑐᔭᐅᔪᖅ/ᓄᖅᑲᖅᑎᑕᐅᔪᖅ/ᓄᖅᑲᖓᑎᑕᓚᐅᑲᒃᑐᖅ ᐱᔨᑦᑎᕋᐅᑏᑦ:

  • ᑕᒪᕐᒥᑦᑎᐊᖅ ᐃᓕᓐᓂᐊᕐᕖᑦ ᓄᑕᖅᑲᓄᓪᓗ ᐸᐃᕆᕝᕖᑦ ᓄᓇᕗᒻᒥ ᒪᑐᔭᐅᕗᑦ ᐱᓇᓱᐊᕈᓯᕐᓄᑦ ᐱᖓᓱᓄᑦ, ᑕᒪᓐᓇ ᒪᑐᓯᒪᓂᖓᑦ ᐱᒋᐊᕐᓂᐊᖅᖢᓂ ᐊᐃᑉᐹᓂ, ᒫᑦᓯ 17, 2020−ᒥ.