ᐅᖃᓚᐅᑎᓯᐅᑏᑦ

You are here

ᓄᓇᕗᑦ ᒐᕙᒪᖓ ᐊᒻᒪ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐃᓕᓐᓂᐊᕈᑎᑦ ᐊᑐᒐᒃᓴᖏᓐᓂᒃ ᓴᖅᑭᑦᑎᓂᐊᓕᖅᐳᑦ

ᔫᓂ 04, 2021

ᐱᕙᓪᓕᐊᔪᑦ ᐅᖃᐅᓯᐅᔪᑦ

ᓄᓇᕗᑦ ᒐᕙᒪᖓ ᐊᒻᒪ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐃᓕᓐᓂᐊᕈᑎᑦ ᐊᑐᒐᒃᓴᖏᓐᓂᒃ ᓴᖅᑭᑦᑎᓂᐊᓕᖅᐳᑦ

ᐃᖃᓗᐃᑦ, ᓄᓇᕗᑦ (ᔫᓂ 4, 2021) − ᐅᓪᓗᒥ, ᐃᓕᓐᓂᐊᕐᓂᓕᕆᔨᒃᑯᑦ ᐊᒻᒪ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐊᑎᓕᐅᖅᑲᐅᕗᑦ ᑐᑭᓯᐅᒪᖃᑦᑕᐅᑎᓂᒃᑯᑦ ᐊᖏᖃᑎᒌᒍᑎᒥᒃ ᑲᑐᔾᔨᖃᑎᒌᒃᐸᓪᓕᐊᓗᑎᒃ ᓴᖅᑭᑦᑎᔪᒪᓪᓗᑎᒃ ᐃᓕᓐᓂᐊᕈᑎᑦ ᐊᑐᒐᒃᓴᖏᓐᓂᒃ ᐃᓄᐃᑦ ᐃᓕᖅᑯᓯᑐᖃᖓᓂ ᐅᖃᐅᓯᖓᓂᒡᓗ ᑐᙵᕕᖃᖅᑐᓂᒃ. ᑐᑭᓯᐅᒪᖃᑦᑕᐅᑎᓂᒃᑯᑦ ᐊᖏᖃᑎᒌᒍᑎ ᐃᓕᖅᑯᓯᑦᑎᓐᓂ ᓇᓗᓇᐃᖅᓯᒃᑲᓐᓂᕈᑕᐅᓂᐊᖅᐳᖅ ᐊᒻᒪ ᐃᓄᒃᑐᑦ ᐅᖃᕆᐅᖅᓴᒃᑲᓐᓂᕐᓗᑎᒃ ᐃᓕᓐᓂᐊᕆᐅᖅᓴᓕᓵᖅᑐᑦ ᓄᑕᖅᑲᑦ, ᐃᓕᓐᓂᐊᓕᓵᖅᑐᑦ ᖁᑦᑎᖕᓂᓕᖕᒧᑦ 12−ᒧᑦ ᑎᑭᓪᓗᒍ ᐃᓕᓐᓂᐊᖅᑎᑦ, ᐊᒻᒪ ᐃᓐᓇᐃᑦ ᐃᓕᓐᓂᐊᖅᑎᑦ ᓄᓇᕗᒻᒥ.

"ᐃᓕᓐᓂᐊᕐᓂᓕᕆᔨᒃᑯᑦ ᐱᓕᕆᖃᑎᖃᕈᒪᓪᓚᕆᒃᐳᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓂᑦ ᐃᓕᓐᓂᐊᕈᑕᐅᕙᒃᑐᑦ ᐊᒻᒪ ᐃᑲᔫᑎᒃᓴᐃᑦ ᐃᓄᐃᑦ ᐅᖃᐅᓯᖓᓂᒃ ᐃᓕᖅᑯᓯᖓᓂᒡᓗ ᓴᖅᑭᔮᖅᑎᑦᑎᒃᑲᓐᓂᖅᑐᓂᒃ ᐃᓕᓐᓂᐊᖅᑎᑦᑎᓐᓄᑦ ᐊᒻᒪ ᓄᓇᖅᑲᑎᑦᑎᓐᓄᑦ," ᒥᓂᔅᑕ ᐃᓕᓐᓂᐊᖅᑐᓕᕆᓂᕐᒧᑦ ᑕᐃᕕᑦ ᔪᐊᓇᓯ ᐅᖃᖅᐳᖅ. "ᐱᓕᕆᖃᑎᒌᒡᓗᑕ, ᐃᓄᐃᑦ ᐅᖃᐅᓯᖓᓂ, ᑭᓇᐅᓂᑦᑎᓐᓂ ᐊᒻᒪ ᐃᓕᖅᑯᓯᖓᓂ ᑲᔪᓯᑎᑦᑏᓐᓇᕐᓂᐊᖅᐳᒍᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᐊᒃᑐᐊᓂᖃᖅᑐᓂᒃ ᐃᓚᐅᑎᑦᑎᔪᓂᒡᓗ."

ᑐᑭᓯᐅᒪᖃᑦᑕᐅᑎᓂᒃᑯᑦ ᐊᖏᖃᑎᒌᒍᑎ ᐱᓕᕆᖃᑎᒌᒍᑕᐅᓕᒃᑲᓐᓂᖅᐳᖅ ᐃᓕᓐᓂᐊᕐᓂᓕᕆᔨᒃᑯᓐᓂ ᐊᒻᒪ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓂᑦ ᐊᐅᓚᑦᑎᓗᑎᒃ ᐃᓕᓐᓂᐊᕈᑎᑦ ᐊᑐᒐᒃᓴᖏᓐᓂᒃ ᐱᕙᓪᓕᐊᑎᑦᑎᔪᓂᒡᓗ ᐱᓕᕆᐊᒃᓴᓂᒃ ᑲᑐᔾᔨᓗᑎᒃ ᐱᔪᒥᒋᔭᐅᔪᓂᑦ. ᑐᑭᓯᐅᒪᖃᑦᑕᐅᑎᓂᒃᑯᑦ ᐊᖏᖃᑎᒌᒍᑎᒥ ᓇᓗᓇᐃᖅᓯᒪᕗᖅ ᐃᓕᓐᓂᐊᕐᓂᓕᕆᔨᒃᑯᑦ ᐱᓕᕆᐊᒃᓴᖏᓐᓂᒃ ᑲᒪᒋᔭᒃᓴᓪᓚᑦᑖᖏᓐᓂᒡᓗ ᐃᓕᓐᓂᐊᕈᑎᑦ ᐊᑐᒐᒃᓴᖏᓐᓂᒃ ᐱᕙᓪᓕᐊᑎᑦᑎᓂᖅ, ᓴᖅᑭᑎᑎᓂᖅ, ᐊᒻᒪ ᑐᓂᐅᖅᑲᐃᓂᖅ ᐱᔾᔪᑎᒋᓪᓗᒍ.

"ᑖᓐᓇ ᐊᖏᖃᑎᒌᒍᑎ ᓴᖅᑭᑎᑦᑎᕗᖅ ᐅᔾᔨᕐᓇᖅᑐᒥᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐱᓇᔪᒍᑎᒌᓐᓇᖅᑕᖓᓂᒃ ᐃᓄᐃᑦ ᐃᓕᖅᑯᓯᖓ ᐅᑎᖅᑎᒃᑲᓐᓂᕈᒪᓪᓗᒍ ᐊᕕᒃᑐᖅᓯᒪᔪᓕᒫᓂᑦ," ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐊᖓᔪᖅᑳᖓ ᐸᐅᓗᓯ ᐊᕿᐊᕈᖅ ᐅᖃᖅᑐᖅ. "ᓂᕆᐅᒃᐳᒍᑦ ᐃᓕᓐᓂᐊᕐᓂᓕᕆᔨᒃᑯᑦ ᐱᓕᕆᖃᑎᒋᔪᒪᓪᓗᒋᑦ ᐃᓄᐃᑦ ᓄᑕᖅᑲᑦ ᓯᕗᓂᒃᓴᖃᑦᑎᐊᖁᓪᓗᒋᑦ."

###

ᐱᕙᓪᓕᐊᔪᓂᒃ ᖃᐅᔨᒋᐊᕈᒪᒍᕕᑦ ᐅᓇ ᖃᐅᔨᒋᐊᕐᕕᒋᓗᒍ:

ᑐᕋᐃ ᕉᑦᔅ
ᐊᐅᓚᑦᑎᔨᐅᓚᐅᑲᒃᑐᖅ, ᑐᓴᒐᒃᓴᓕᕆᔨᒃᑯᓐᓄᑦ
ᐃᓕᓐᓂᐊᕐᓂᓕᕆᔨᒃᑯᑦ
ᓄᓇᕗᑦ ᒐᕙᒪᖓ
867-975-5680
trhoades@gov.nu.ca

ᕕᐅᓪ ᕼᐋᑉᑭᓐᔅ
ᑐᑭᒧᐊᒃᑎᑦᑎᔨᐅᑉ ᑐᒡᓕᐊ, ᑐᓴᐅᒪᖃᑦᑕᐅᑎᓕᕆᓂᕐᒧᑦ
ᑐᓴᐅᒪᔪᓕᕆᔨᒃᑯᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
867-975-8413
whopkins@qia.ca