ᐅᖃᓚᐅᑎᓯᐅᑏᑦ

You are here

ᑐᕌᒐᖃᒃᑲᓂᕋᓱᓐᓂᖅ ᓄᓇᕗᒻᒥ ᐃᓕᓴᐃᔨᒃᓴᓄᑦ ᐃᓕᓐᓂᐊᕐᓂᕐᒧᑦ ᓴᙱᑦᑎᒋᐊᑲᓐᓂᕐᓗᒍ ᐃᓄᐃᑦ ᐅᖃᐅᓯᖓ ᐊᒻᒪᓗ ᐃᓕᖅᑯᓯᖓ ᐃᓕᓐᓂᐊᕐᕕᓐᓂᑦ

ᓯᑎᐱᕆ 10, 2019

ᑐᓴᒐᒃᓴᖅ

ᑐᕌᒐᖃᒃᑲᓂᕋᓱᓐᓂᖅ ᓄᓇᕗᒻᒥ ᐃᓕᓴᐃᔨᒃᓴᓄᑦ ᐃᓕᓐᓂᐊᕐᓂᕐᒧᑦ ᓴᙱᑦᑎᒋᐊᑲᓐᓂᕐᓗᒍ ᐃᓄᐃᑦ ᐅᖃᐅᓯᖓ ᐊᒻᒪᓗ ᐃᓕᖅᑯᓯᖓ ᐃᓕᓐᓂᐊᕐᕕᓐᓂᑦ

ᐃᖃᓗᐃᑦ, ᓄᓇᕗᑦ (ᓯᑎᐱᕆ 10, 2019) − ᓯᕗᓪᓕᐹᒥᑦ ᐱᓕᕆᐊᖑᕙᓪᓕᐊᔪᒪᔪᑦ ᐊᕐᕌᒍᓄᑦ ᖁᓕᓄᑦ (10) ᑲᑐᔾᔨᖃᑎᒌᖕᓂᒃᑯᑦ ᐱᓕᕆᖃᑎᒌᖕᓂᖅ ᑲᑐᔾᔨᓗᑎᒃ ᓄᓇᕗᒻᒥᑦ ᓯᓚᑦᑐᓴᕐᕕᒃᑯᑦ ᐊᒻᒪᓗ ᓂᐅᕙᓐᓛᓐᒥ ᒥᒧᐊᕆᐅ ᓯᓚᑦᑐᖅᓴᕐᕕᔾᔪᐊᖓ ᐊᐅᓚᑎᑦᑎᓂᐊᖅᑐᑦ ᑐᕌᒐᖃᒃᑲᓂᕋᓱᓐᓂᕐᒥᑦ ᓄᓇᕗᒻᒥ ᐃᓕᓴᐃᔨᒃᓴᓄᑦ ᐃᓕᓐᓂᐊᕐᓂᕐᒧᑦ, ᐱᒋᐊᕐᓗᓂ ᐱᓇᓱᐊᕈᓯᐅᑉ ᓄᙳᐊᓂᑦ ᖃᑦᓯᑲᓪᓚᓐᓂᑦ ᓄᓇᕗᒻᒥᑦ ᓄᓇᓕᐅᔪᓂᑦ.

ᑐᕌᒐᖃᒃᑲᓂᕋᓱᓐᓂᖅ ᓄᓇᕗᒻᒥ ᐃᓕᓴᐃᔨᙳᕆᐅᖅᓴᔪᓂᑦ ᐃᓈᖐᔪᖅ ᓯᕗᓪᓕᕐᒥᑦ ᓄᓇᕗᒻᒥ ᐃᓕᓴᐃᔨᙳᕆᐅᖅᓴᔪᓄᑦ ᐃᓕᓐᓂᐊᖅᑕᐅᖃᑦᑕᓚᐅᖅᑐᓄᑦ ᐊᒻᒪᓗ ᐊᑐᓕᖁᔭᐅᓯᒪᔪᑦ ᒪᓕᒡᓗᒋᑦ ᓄᓇᕗᒻᒥ ᐃᓕᓴᐃᔨᙳᕆᐅᖅᓴᔪᓄᑦ ᕿᒥᕐᕈᔭᐅᓚᐅᖅᑐᖅ ᓴᖅᑭᓚᐅᖅᓯᒪᔪᖅ 2017-18-ᖑᑎᓪᓗᒍ. ᐃᓕᑉᐸᓪᓕᐊᔪᑦ ᒫᓐᓇᐅᔪᖅ ᐃᓕᓐᓂᐊᖃᑕᐅᓕᖅᑐ ᐱᑕᖃᕇᖅᑐᒧᑦ ᐃᓕᓐᓂᐊᑕᐅᔪᓄᑦ ᑐᓂᕐᕈᓯᐊᕐᓂᐊᖅᑐᑦ ᐱᔭᕇᖅᓯᔾᔪᓯᐊᕐᒥᑦ ᓯᕗᓪᓕᖅᐹᖅᓯᐅᑎᒥᑦ ᓂᐅᕙᓐᓛᓐᒥ ᒥᒧᐊᕆᐅ ᓯᓚᑦᑐᖅᓴᕐᕕᔾᔪᐊᖓᓂᑦ ᐃᓕᓐᓂᐊᖅᑕᒥᓂᑦ ᐃᓱᓕᑦᑎᒍᓂ. ᑐᕌᒐᖃᒃᑲᓂᕋᓱᓐᓂᖅ ᓄᓇᕗᒻᒥ ᐃᓕᓴᐃᔨᒃᓴᓄᑦ ᐃᓕᓐᓂᐊᕐᓂᖅ ᐱᖁᔭᑎᒍᑦ ᑎᒥᙳᖅᑎᑕᐅᓂᐊᖅᑐᖅ ᐃᓄᒃᑐᑦ ᐅᖃᐅᓯᕐᒥᑦ ᐃᓕᖅᑯᓯᕐᒥᒡᓗ ᐃᓕᓐᓂᐊᕐᓂᐊᖅᑎᓪᓗᒋᑦ ᐅᔾᔨᕆᔭᐅᑦᑎᐊᕋᓱᓐᓂᐊᖅᑐᖅ ᐃᓕᓐᓂᐊᖅᑕᒥᓐᓂᑦ ᐃᓱᓕᑦᑎᓂᐊᕋᓗᐊᕐᒪᖔᑕ ᐅᐸᓗᒐᐃᔭᖅᑎᑕᐅᓯᒪᓗᑎᒡᓗ ᓄᓇᕗᒻᒥᐅ ᐊᔾᔨᐅᖏᑦᑐᒃᑯᑦ ᐅᖃᐅᓰᓐᓂᒃ ᒪᕐᕉᓐᓂᑦ ᐃᓕᓐᓂᐊᑎᑦᑎᖃᑦᑕᕐᓂᖏᓐᓄᑦ.

ᐱᔭᕇᖅᐹᑕ ᓯᕗᓪᓕᐹᒥᑦ ᐃᓕᓐᓂᐊᖅᑕᒥᓂᒃ ᑐᕌᒐᖃᒃᑲᓂᕋᓱᓐᓂᖅᕐᒧᑦ ᓄᓇᕗᒻᒥ ᐃᓕᓴᐃᔨᒃᓴᓄᑦ ᐃᓕᓐᓂᐊᕐᓂᕐᒧᑦ, ᐃᓕᓐᓂᐊᖅᑐᑦ ᑐᓂᓯᔭᐅᐸᔭᖅᑐᑦ ᓄᓇᕗᒻᒥ ᐃᓄᒃᑐᑦ ᐅᖃᕆᐅᖅᓇᑎᑦᑎᖦᐅᓂᕐᒧᑦ ᐃᓕᓐᓂᐊᕐᓂᕐᒧᑦ ᐃᓕᓴᕆᔭᐅᔾᔪᑎᑖᖅᑎᑕᐅᒐᔭᖅᑐᑦ. ᐃᓕᓐᓂᐊᖅᑏᑦ ᐃᓕᓐᓂᐊᖅᑕᒥᓂᒃ ᐱᔭᕇᖅᑐᑦ ᐊᕐᕌᒍᑉ ᐊᐃᑉᐸᖓᓂᑦ ᐃᓕᓐᓂᐊᑲᓐᓂᕈᓐᓇᖅᑐᑦ ᐅᖃᐅᓯᓕᕆᓂᓪᓚᕆᒻᒧᑦ ᐱᔭᕇᕈᓯᐊᕈᓐᓇᕋᔭᖅᑐᑦ ᐊᒻᒪᓗ ᐊᔪᙱᑎᑕᐅᓗᑎᒃ ᓄᓇᕗᑦ ᐃᓕᓐᓂᐊᕐᕕᖏᓐᓂᑦ ᐃᓕᓴᐃᖦᐅᔪᓐᓇᕐᓂᕐᒥᑦ. ᐃᓕᓐᓂᐊᖅᑏᑦ ᐃᓕᓐᓂᐊᖅᑕᒥᓂᒃ ᐱᔭᕇᖅᑐᑦ 150−ᓂᑦ ᐃᓕᓐᓂᐊᖅᑕᒥᓄᑦ ᐊᔪᖏᔾᔪᓯᐊᖅᓯᒪᒍᓂ ᓄᓇᕗᒻᒥ ᐃᓕᓴᐃᔨᒃᓴᓄᑦ ᐃᓕᓐᓂᐊᕐᓂᕐᒧᑦ ᐃᓂᖃᖅᑎᑕᐅᒐᔭᖅᑐᖅ ᐱᔭᕇᖅᓯᔾᔪᓯᐊᕐᒥ ᓯᕗᓪᓕᖅᐹᒥᑦ.

ᐃᓕᓐᓂᐊᕐᓂᓕᕆᔩᑦ ᑲᔪᓯᔪᑦ ᐱᓕᕆᓪᓗᑎᒃ ᑐᕌᒐᖃᒃᑲᓂᕋᓱᓐᓂᕐᒥᑦ ᐃᓕᓐᓂᐊᕈᑎᓄᑦ ᓄᓇᕗᒻᒥ ᐃᓕᓴᐃᔨᒃᓴᓄᑦ ᐃᓕᓐᓂᐊᕐᓂᕐᒧᑦ ᐅᖃᐅᔪᐃᔨᑦ ᑲᑎᒪᔨᕋᓛᖏᓐᓄᑦ ᐊᒻᒪᓗ ᐃᓄᒃᑐᑦ ᐅᖃᐅᓯᕐᒧᑦ ᐃᓕᖅᑯᓯᓕᕆᓂᕐᒧᓪᓗ ᑲᑎᒪᔩᕋᓛᖑᑲᐃᓐᓇᖅᑐᓄᑦ ᐱᖃᑎᖃᖅᑐᑦ ᑭᒡᒐᖅᑐᐃᔨᓂᑦ ᐃᓕᓐᓂᐊᕐᓂᓕᕆᔨᒃᑯᓐᓂᖔᖅᑐᒥᑦ ᐊᒻᒪᓗ ᐃᓕᖅᑯᓯᓕᕆᔨᒃᑯᓐᓂᑦ, ᓂᐅᕙᓐᓛᓐᒥ ᒥᒧᐊᕆᐅ ᓯᓚᑦᑐᖅᓴᕐᕕᔾᔪᐊᖓᓂᑦ ᓄᓇᕗᑦ ᑐᙵᕕᒃ ᑎᒥᖁᑖᓂᓪᓗ (ᓄᓇᕗᑦ ᑐᙵᕕᒃ ᑎᒥᖁᑖ). 2019-2020 ᐃᓕᓐᓂᐊᕐᓂᖅ ᐊᑐᖅᑎᓪᓗᒍ, ᐃᓕᓐᓂᐊᕐᓂᓕᕆᔩᑦ ᐃᓕᓐᓂᐊᖅᑎᑎᓂᕐᒧᑦ ᐱᓕᕆᕕᖓ ᐱᕙᓪᓕᐊᑎᑦᑎᓂᐊᖅᑐᑦ ᐊᔾᔨᒌᖏᑦᑐᓂᑦ ᐅᖃᐅᓯᓕᕆᓂᕐᒨᖓᔪᓂᑦ ᑲᔪᓯᑎᑦᑎᓂᐊᖅᑐᑦ ᑲᔪᓯᑎᑕᐅᓗᓂ ᐅᑎᖅᑎᑕᐅᓇᓱᐊᕐᓂᖓ ᖃᐅᔨᒪᓂᖃᑦᑎᐊᕐᓗᑎᒡᓗ ᓄᓇᕗᒻᒥ ᐃᓕᓴᐃᔨᒃᓴᓄᑦ ᐃᓕᓐᓂᐊᕐᓂᓕᒫᓄᑦ. ᑐᕌᒐᖃᒃᑲᓂᕋᓱᓐᓂᖅ ᓄᓇᕗᒻᒥ ᐃᓕᓴᐃᔨᒃᓴᓄᑦ ᐃᓕᓐᓂᐊᕐᓂᕐᒧᑦ ᑲᔪᓯᓂᖃᖅᑎᐊᕐᓂᐊᖅᑐᖅ ᓂᐅᕙᓐᓛᓐᒥ ᒥᒧᐊᕆᐅ ᓯᓚᑦᑐᖅᓴᕐᕕᔾᔪᐊᖓ ᐃᓄᐃᑦ ᐱᔭᕇᖅᓯᔾᔪᓯᐊᖃᑦᑕᓕᖅᐸᑕ ᓯᕗᓪᓕᖅᓯᐅᒻᒥᑦ ᐃᓕᓐᓂᐊᖅᑕᒥᓐᓂᑦ ᐱᔭᕇᖅᓯᑎᓪᓗᒋᑦ ᓄᓇᑦᓯᐊᕗᒻᒥ. ᑲᑎᒪᔨᕋᓛᑦ ᐅᔾᔨᕈᓱᑦᑎᐊᕐᓂᐊᖅᑐᑦ ᐃᓕᓯᒪᓂᖃᑦᑎᐊᕋᓗᐊᕐᒪᖔᑕ ᑐᕌᒐᖃᒃᑲᓂᕋᓱᓐᓂᕐᒥᑦ ᐃᓕᓐᓂᐊᕈᑎᓄᑦ ᓇᓕᒨᑎᔪ ᓄᓇᕗᒻᒥ ᐃᖅᑲᓇᐃᔮᖃᕈᓐᓇᖅᑐᓄᑦ ᑭᙴᒪᒋᔭᐅᔪᓄᑦ.

“ᑕᐃᑦᓱᒪᓂ ᐃᓄᐃᑦ ᑲᓇᑕᒥ ᐊᓯᔾᔩᑎᓪᓗᒋᑦ ᓄᓇᕗᑖᖅᑎᓪᓗᒋᑦ, ᐋᕿᑦᓯᓚᐅᖅᓯᒪᔪᒍᑦ ᐃᓕᓐᓂᐊᕐᓂᓕᕆᓂᕐᒥᑦ ᐊᑦᑐᐊᓂᖃᖅᑎᐊᖅᑐᒥᑦ ᐅᖃᐅᓯᓕᕆᓂᕐᒧᑦ ᐃᓕᖅᑯᓯᓕᕆᓂᕐᒧᓪᓗ ᐊᒻᒪᓗ ᐅᔾᔨᕆᔭᐅᑦᑎᐊᕐᓗᓂ ᓄᑕᕋᑦ − ᓱᕈᓰᑦ ᐃᕐᖑᑕᕆᔭᐅᔪᓪᓗ ᐸᕐᓇᑦᓯᒪᑦᑎᐊᕐᒪᑕ ᐃᓕᓐᓂᐊᕐᕕᒻᒧ ᐳᖅᑐᓂᖅᓴᒧᑦ ᐃᓕᓐᓂᐊᕆᐊᖃᓐᓂᕐᓂᐊᕆᐊᖏᓐᓂᑦ ᐊᒻᒪᓗ ᑭᖑᓂᐊᒍᑦ ᐃᖅᑲᓇᐃᔭᑖᕐᓗᑎᒃ,” ᐅᖃᖅᑐᖅ ᐸᑎᖅ ᓇᑦᓯᖅ, ᙵᓂᔅᑕ ᑲᒪᒋᔭᖃᖅᑐᖅ ᓄᓇᕗᒻᒥ ᓯᓚᑦᑐᖅᓴᕐᕕᒻᒥᑦ. “ ᑲᔪᓯᓂᖃᑦᑎᐊᕐᓂᐊᕈᑎᒃ ᑐᕌᒐᕆᔪᒪᔭᒥᓂᑦ, ᓯᓚᑦᑐᖅᓴᕐᕕᒃ ᐱᓕᕆᖃᑎᖃᕐᓗᓂ ᓂᐅᕙᓐᓛᓐᒥ ᒥᒧᐊᕆᐅ ᓯᓚᑦᑐᖅᓴᕐᕕᔾᔪᐊᖓᓂᑦ ᓴᖅᑭᑎᑦᑎᓗᑎᒃ ᐃᓕᓐᓂᐊᕋᑦᓴᐅᒐᔭᖅᑐᓂᑦ ᐊᔾᔨᒋᓗᓂᐅᒃ ᐃᓄᐃᑦ ᖃᓪᓗᓈᓪᓗ ᐱᒻᒪᕆᐅᔪᖁᑎᖏᑦ ᐊᒻᒪᓗ ᐱᕙᒌᔭᕐᓗᑎᒃ ᓄᓇᕗᒻᒥᐅᑦ ᐃᓕᓐᓂᐊᖅᑎᑦᑎᔪᓐᓇᖅᓯᓗᑎᒃ ᐊᐊᔾᔨᐅᖏᑦᑐᒥ ᐃᓕᓐᓂᐊᖅᑎᑦᑎᔪᑎᒋᕙᑦᑕᑦᑎᓐᓂᑦ.”

“ᐅᑉᐱᕈᓱᑦᑐᖓ ᐃᓕᓴᐃᓯᑦᓴᓄ ᐃᓕᓐᓂᐊᖅᑕᐅᔪᖅ ᑲᔪᓯᓂᖃᑦᑎᐊᕐᓂᐊᕆᐊᖓᓂᑦ ᐊᒥᓱᕈᕆᐊᕐᓗᑎᒃ ᐃᓕᓴᐃᔩᑦ ᐃᓄᒃᑐᑦ ᐅᖃᕈᓐᓇᖅᑐᑦ ᐃᓕᓐᓂᐊᕐᕕᒻᒥᑦ,ᐃᓕᓐᓂᐊᕐᓂᓕᕆᔨᒃᑯᓄᑦ ᒥᓂᔅᑕ ᑕᐃᕕᑎ ᔪᐊᓇᓯ. “ “ᒪᒃᑯᑦᑐᑦ ᓄᓇᕗᒻᒥ ᐊᒻᒪᓗ ᓯᕗᓂᑦᓴᖓ ᓄᓇᕗᒻᒥ ᐃᓕᓴᐃᔨᒃᓴᓄᑦ ᐃᓕᓐᓂᐊᕐᓂᕐᒧᑦ ᐃᓕᓐᓂᐊᖅᑕᒥᓐᓂᑦ ᐱᔭᕇᖅᓯᖃᑦᑕᖅᑐᑦ ᑲᔪᓯᖁᔪᒥᓇᖅᑐᑦ ᐃᓕᓐᓂᐊᕐᓂᕐᒧᑦ ᑲᔪᓰᓐᓇᖁᓪᓗᒋᑦ ᐱᔭᑦᓴᖃᖅᑎᑦᑎᐊᕐᓗᒋᑦ ᓴᐳᔭᐅᓯᒪᓗᑎᒃ, ᓴᙱᓂᖅᑖᖅᑎᑦᑎᓗᑎᒡᓗ ᐃᓄᐃᑦ ᐅᖃᐅᓯᖏᓐᓂᑦ ᐃᓕᖅᑯᓯᑐᖃᖏᓐᓂᔨᓗ ᑲᔪᓯᓂᖃᑦᑎᐊᕐᓂᐊᕐᒪᑕ ᑭᖑᕚᑦᓴᑦᑎᓐᓄᑦ.”

ᐊᒥᓱᑲᓪᓚᐃᑦ ᐃᓕᓐᓂᐊᖅᑏᑦ ᐊᑎᓕᐅᖅᓯᒪᔪᑦ ᓯᕗᓪᓕᖅᐹᒥᑦ ᐃᓕᓐᓂᐊᖅᑐᑦ ᓂᐅᕙᓐᓛᓐᒥ ᒥᒧᐊᕆᐅ ᓯᓚᑦᑐᖅᓴᕐᕕᔾᔪᐊᖓ ᐃᓕᓐᓂᐊᖅᑕᒥᓂᒃ ᑐᕌᒐᖃᒃᑲᓂᕋᓱᓐᓂᖅᕐᒧᑦ ᓄᓇᕗᒻᒥ ᐃᓕᓴᐃᔨᒃᓴᓄᑦ ᐃᓕᓐᓂᐊᕐᓂᕐᒥᑦ, ᐅᑯᓇᓂ ᓄᓇᓕᓐᓂᑦ ᐃᓕᓐᓂᐊᖅᑎᑦᑎᔾᔪᑕᐅᔪᖅ ᐃᖃᓗᒃᑑᑦᑎᐊᖅ, ᓴᓪᓕᖅ, ᐃᖃᓗᐃᑦ ᐸᖕᓂᖅᑑᕐᓗ. ᐃᓕᓐᓂᐊᖅᐸᓪᓕᐊᔪᑦ ᐃᓕᓐᓂᐊᕆᐊᓚᐅᖅᓯᒪᔪᑦ ᐊᕐᕕᐊᓂᑦ, ᖃᒪᓂ'ᑐᐊᕐᒥᑦ, ᐅᖅᓱᖅᑑᒥᑦ, ᐃᖃᓗᓂᑦ, ᑰᒑᕈᒃᒥᑦ ᑲᖏᖅᖠᓂᕐᒥᓪᓗ ᐃᓕᓐᓂᐊᖅᑕᒥᓐᓂᑦ ᐃᓱᓕᑦᑎᓂᐊᖅᑐᑦ ᐱᔭᕇᖅᓯᔾᔪᓯᐊᕐᓗᑎᒃ ᓯᕗᓪᓕᖅᐹᒥᑦ ᐅᕙᓐᓛᓐᒥ ᒥᒧᐊᕆᐅ ᓯᓚᑦᑐᖅᓴᕐᕕᔾᔪᐊᖓᓂᑦ.

ᐊᔪᖏᓐᓂᖅᓴᐅᓇᓱᐊᖅᑐᑦ ᐱᓕᕆᖃᑦᑕᖅᑐᑦ ᐊᕐᕌᒎᑉ ᓄᙳᐊᓂᑦ ᐊᔪᖏᓐᓂᑭᓴᐅᑎᖃᑦᑕᖅᑐᑦ, ᑭᒡᒐᖅᑐᐃᔪᑦ ᓄᓇᕗᒻᒥ ᓯᓚᑦᑐᖅᓴᕐᕕᒻᒥᑦ, ᓄᓇᕗᑦ ᒐᕙᒪᒃᑯᖏᑕ ᐃᓕᓐᓂᐊᕐᓂᓕᕆᔨᒃᑯᓄᑦ ᓄᓇᕗᑦ ᑐᙵᕕᒃᑯᑦ ᑎᒥᖓᓄᓪᓗ ᓂᕈᐊᖅᑕᐅᓯᒪᔪᖅ ᓂᐅᕙᓐᓛᓐᒥ ᒥᒧᐊᕆᐅ ᓯᓚᑦᑐᖅᓴᕐᕕᔾᔪᐊᖓ ᐱᓕᕆᖃᑎᒋᔭᐅᓪᓗᓂ.

###

ᑐᓴᒐᒃᓴᓕᕆᔨ, ᓄᓇᕗᒻᒥ ᐅᑭᐅᖅᑕᖅᑐᕐᒥ ᓯᓚᑦᑐᖅᓴᕐᕕᒃ:
ᒥᐊᕆᐋᓇ ᐹᓂ
ᐊᐅᓚᑦᑎᔨ, ᓂᐅᕕᐊᒃᓴᓕᕆᓂᕐᒧᑦ ᑐᓴᐅᒪᔪᓕᕆᓂᖕᒧᑦ ᐃᖅᑲᓇᐃᔭᖅᑎᑖᖅᓂᖕᒧᓪᓗ
867-979-7242
mariana.barney@arcticcollege.ca
www.arcticcollege.ca

ᑐᓴᒐᒃᓴᓕᕆᔨ, ᒪᒧᐊᕆᐅᓪ ᓯᓚᑦᑐᖅᓴᕐᕕᒡᔪᐊᖅ:
ᑕᐃᕕᑎ ᓱᐊᕋᓐᓴᓐ
ᐊᐅᓚᑦᑎᔨ, ᑐᓴᐅᒪᔪᓕᕆᔨ
ᓂᐅᕐᕈᑎᒃᓴᓕᕆᓂᖅ ᑐᓴᐅᒪᑎᑦᑎᓂᕐᓗ
709 864-2143
mobile 709 685-7134
sorensen@mun.ca
www.mun.ca