ᐅᖃᓚᐅᑎᓯᐅᑏᑦ

You are here

ᒥᓂᔅᑕ ᓯᐅᑎᐊᐱᒃ ᓇᓪᓕᐅᓯᒪᔪᒥᒃ ᐅᖃᐅᓯᖃᖅᑐᖅ ᑖᒃᑯᓇᐊ ᖃᐅᔨᓴᖅᑕᐅᔾᔪᑎᒋᓯᒪᔭᖏᑦ ᐅᓂᒃᑳᓕᐊᖑᓂᖏᑦ ᐊᓯᐅᔨᔭᐅᓯᒪᔪᓄᑦ ᐃᓄᐊᖅᑕᐅᓯᒪᔪᓄᓪᓗ ᐊᕐᓇᓄᑦ ᓂᕕᐊᖅᓯᐊᓄᓪᓗ

ᔫᓂ 04, 2020

ᐅᖃᐅᓯᐅᔪᖅ

ᒥᓂᔅᑕ ᓯᐅᑎᐊᐱᒃ ᓇᓪᓕᐅᓯᒪᔪᒥᒃ ᐅᖃᐅᓯᖃᖅᑐᖅ ᑖᒃᑯᓇᐊ ᖃᐅᔨᓴᖅᑕᐅᔾᔪᑎᒋᓯᒪᔭᖏᑦ ᐅᓂᒃᑳᓕᐊᖑᓂᖏᑦ ᐊᓯᐅᔨᔭᐅᓯᒪᔪᓄᑦ ᐃᓄᐊᖅᑕᐅᓯᒪᔪᓄᓪᓗ ᐊᕐᓇᓄᑦ ᓂᕕᐊᖅᓯᐊᓄᓪᓗ

ᒪᓕᒐᓕᐅᖅᑎ ᐃᓕᓴᐱ ᓯᐅᑎᐊᐱᒃ, ᒥᓂᔅᑕ ᐃᓄᓕᕆᔨᒃᑯᓐᓄ, ᐅᓪᓗᒥ ᐅᖃᐅᓯᖃᖃᐅᔪᖅ ᐅᑯᓂᖓ:

"ᑕᕙᓂ ᐱᓇᓱᐊᕈᓯᕐᒥᑦ ᓇᓪᓕᐅᓯᒪᒻᒪᑕ ᑖᒃᑯᐊ ᐊᓯᐅᔨᔭᐅᓯᒪᔪᑦ ᐃᓄᐊᖅᑕᐅᓯᒪᔪᓪᓗ ᓄᓇᖃᖅᑳᖅᓯᒪᔪᑦ ᐊᕐᓇᐃᑦ ᓂᕕᐊᖅᓯᐊᓪᓗ ᐅᓂᒃᑳᓕᐊᖑᓯᒪᔪᑦ ᐱᔭᕇᖅᑕᐅᓂᖏᑦ ᐱᖁᓯᒪᕗᑦ ᑖᒃᑯᐊ ᐱᓂᓪᓗᑦᑕᐅᓯᒪᔪᑦ ᐊᑭᓴᖅᑐᖅᑕᐅᖁᔭᐅᓪᓗᑎᑦ. ᑖᓐᓇ ᐅᓂᒃᑳᖅ ᐅᖃᐅᓯᖃᓪᓗᐊᑕᖅᓯᒪᕗᖅ ᑲᓇᑕᐅᒥᓕᒫᑦ ᐋᓐᓂᓇᖅᑐᓂᑦ ᐊᑐᖅᓯᒪᔪᑦ ᐋᓐᓂᖅᓯᕆᓂᕐᒧᑦ ᐊᒻᒪ ᐊᑭᕋᖅᑐᓂᕐᒧᑦ ᓄᓇᖅᑲᖄᖅᓯᒪᔪᓂᑦ ᐊᕐᓇᓂᑦ, ᓂᕕᐊᖅᓯᐊᓂᑦ, ᐊᒻᒪ ᐊᕐᓇᐅᖃᑎᒌᑦ ᐊᖑᑕᐅᖃᑎᒌᑦ ᐊᓯᔾᔩᓯᒪᔪᑦ ᐊᒻᒪ ᐊᖑᑏᑦ ᐊᕐᓇᓯᐅᑎᓂᑦ ᐊᓐᓄᕌᓯᒪᓲᓄᑦ ᐊᒻᒪᓗ ᑖᒃᑯᓄᖓ ᒪᕐᕉᐃᓕᖅᑲᔫᒥᑦ ᐱᐅᓯᓖᑦ ᐃᓄᓐᓄᑦ.

ᓄᓇᕗᑦ ᒐᕙᒪᒃᑯᑦ ᐱᓕᕆᖃᑎᖃᖅᐸᓪᓕᐊᖏᓐᓇᖅᕗᑦ ᐃᓄᓐᓂᑦ, ᑲᓇᑕᒥ ᒐᕙᒪᖏᓐᓂᑦ ᐊᕕᑦᑐᖅᓯᒪᔪᓂᑦ, ᑲᓇᑕᐅᑉ ᒐᕙᒪᒃᑯᖏᓐᓂ ᖃᓄᐃᓕᐅᕈᑎᖃᖅᐸᓪᓕᐊᔪᓐᓇᖁᓪᓗᑕ ᑕᒪᒃᑯᐊ ᐱᒻᒪᕆᐊᓘᔪᑦ ᖃᓄᐃᓐᓂᐅᔪᑦ ᓇᓗᓇᐃᖅᑕᐅᓯᒪᔪᖅ ᐊᓯᐅᔨᔭᐅᓯᒪᔪᑦ ᐃᓄᐊᖅᑕᐅᓯᒪᔪᓪᓗ ᓄᓇᖃᖅᑳᖅᓯᒪᔪᑦ ᐊᕐᓇᐃᑦ ᓂᕕᐊᖅᓯᐊᓪᓗ ᐱᓪᓗᒋᑦ ᐅᓂᒃᑳᓕᐊᖑᓯᒪᔪᑦ ᐱᖁᔨᓯᒪᓂᖏᑦ ᐱᓂᕐᓗᑦᑕᐅᓯᒪᔪᑦ ᐊᑭᓴᖅᑐᖅᑕᐅᖁᓪᓗᒋᑦ. ᓱᓕ ᖃᓄᐃᓕᐅᕆᐊᕈᑎᒋᒋᐊᒃᑲᓐᓂᕋᔅᓴᐅᒻᒪᑕ, ᐊᒻᒪ ᐃᓕᓴᕆᔭᕆᐊᖃᓪᓚᕆᑦᑐᑎᒍᓪᓗ. ᐱᒻᒪᕆᐅᒋᕗᑦᑕᐅᖅ ᐱᓂᕐᓗᑦᑕᐅᓯᒪᔪᑦ ᐊᑭᓴᖅᑐᖅᑕᐅᓯᒪᙱᑦᑐᑦ ᐅᖃᐅᓯᕆᔭᐅᓗᑎᑦ ᐊᒻᒪ ᐅᓂᒃᑳᕆᓗᑎᒍᑦ ᖃᐅᔨᓯᒪᔪᑎᒍᑦ ᐊᕙᑎᑦᑎᓐᓂᑦ ᐊᑑᑎᔪᓂᑦ. ᐱᒋᐊᒃᑲᓐᓂᕈᑎᔭᕆᐊᓕᕗᑦ ᐱᐅᓂᖅᓴᒥᑦ.

ᐃᓕᓴᕆᓗᑎᒍᑦ ᐋᓐᓂᐊᓂᖏᑦ, ᖁᐊᖅᓵᓇᖅᑐᒦᔅᓯᒪᓂᖏᑦ ᐊᒻᒪ ᕿᔅᓵᓂᖏᑦ ᓄᓇᓕᓐᓂᑦ ᐊᑐᖅᑕᐅᔪᑦ ᐱᓕᕆᔾᔪᑎᑎᒍᑦ ᓇᐅᒃᑯᑐᐃᓐᓇᖅ ᐋᖅᑭᓱᖅᑕᐅᓯᒪᔪᑦ ᐊᑭᕋᖅᑐᕐᓂᕐᒧᑦ ᐊᒻᒪ ᐃᓚᐃᓐᓇᖅᓯᐅᕈᑕᐅᓪᓗᑎᑦ. ᓂᓪᓕᐊᔭᕆᐊᖃᖅᑐᒍᑦ ᓲᖑᔪᒥᑦ ᐊᒻᒪ ᐃᓕᕋᓱᙱᓪᓗᑕ, ᑲᑐᔾᔨᖃᑎᒌᑦᑐᒥᑦ ᓂᐱᒥᑦ ᐃᑲᔪᖅᓱᐃᔪᒥᑦ ᐊᓐᓇᐅᒪᓂᕐᒥᑦ, ᐊᒻᒪ ᑭᒡᒐᖅᑐᐃᖃᑎᒌᓐᓂᕐᒥᑦ ᑖᒃᑯᓂᖓ ᐃᓚᒋᔭᐅᖃᑕᐅᖁᔨᓂᕐᒥᑦ, ᓇᑭᑐᐃᓐᓈᖓᓗᑕ ᓇᓕᒧᖃᑎᒌᓪᓗᑕ. ᑕᒪᒃᑯᐊ ᐅᑉᐱᕆᓗᒋᑦ ᓱᓕᔪᕆᔭᕗᑦ ᓄᐃᑕᓪᓚᕆᒻᒪᑕ ᐃᓄᐃᑦ ᖃᐅᔨᒪᔭᑐᖃᖏᓐᓂᑦ ᑕᐃᒍᖅᑕᐅᓯᒪᔪᓂᑦ ᑖᒃᑯᐊ ᐅᑉᐱᕆᔭᐅᓪᓗᑎᑦ ᐋᖅᑭᓱᖅᑕᐅᓯᒪᔪᑦ ᐃᓅᖃᑎᒌᓐᓂᕐᒥᑦ ᐅᐱᒍᓱᖃᑎᒌᓐᓂᕐᒥᑦ ᐃᑲᔪᕐᒪᑕ.

ᐃᑲᔪᖅᑕᐅᔭᕆᐊᖃᕈᕕᑦ, ᖃᐅᔨᒃᑲᐃᒋᑦ ᐅᖃᖃᑎᖃᕐᓗᑎᑦ ᐃᓄᓕᕆᔨᒥᑦ ᖃᓄᐃᑦᑐᓂᑦ ᐃᑲᔪᕈᑎᔅᓴᖅᑕᖃᕐᒪᖔᖅ ᐊᑐᐃᓐᓇᐅᔪᓂᑦ ᖃᐅᔨᓇᓱᓪᓗᑎᑦ. ᑲᑐᔾᔨᓗᑕ ᐊᓯᔾᔩᔪᓐᓇᖅᐳᒍᑦ"

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᓘᓯ ᐊᖅᐱᒃ
ᑐᓴᒐᒃᓴᓕᕆᔨᒻᒪᕆᒃ
ᐃᓄᓕᕆᔨᒃᑯᑦ
867-975-5207
LAqpik@gov.nu.ca