You are here

ᓄᓇᕗᑦ ᒐᕙᒪᒃᑯᑦ ᐊᒻᒪ ᓄᓇᕗᒻᒥ ᐃᓕᓴᐃᔨᑦ ᑲᑐᔾᔨᖃᑎᒌᑦ ᐊᑎᓕᐅᖅᐳᑦ ᓄᑖᒥᒃ ᑲᑐᔾᔨᖃᑎᒌᒃᖢᑎᒃ ᐊᖏᖃᑎᒋᒍᑎᒥᒃ

ᔭᓐᓄᐊᓕ 19, 2022

ᐱᕙᓪᓕᐊᔪᑦ ᓴᖅᑭᑕᐅᔪᑦ

ᓄᓇᕗᑦ ᒐᕙᒪᒃᑯᑦ ᐊᒻᒪ ᓄᓇᕗᒻᒥ ᐃᓕᓴᐃᔨᑦ ᑲᑐᔾᔨᖃᑎᒌᑦ ᐊᑎᓕᐅᖅᐳᑦ ᓄᑖᒥᒃ ᑲᑐᔾᔨᖃᑎᒌᒃᖢᑎᒃ ᐊᖏᖃᑎᒋᒍᑎᒥᒃ

ᐃᖃᓗᐃᑦ, ᓄᓇᕗᑦ (ᔮᓄᐊᕆ 19, 2022)−ᓄᓇᕗᒻᒥ ᒐᕙᒪᖓᑦ ᐊᒻᒪ ᓄᓇᕗᒻᒥ ᐃᓕᓴᐃᔩᑦ ᑲᑐᔾᔨᖃᑎᒌᖏᑦ ᐅᓪᓗᒥ ᐊᑎᓕᐅᖅᑲᐅᕗᑦ ᓄᑖᒥᒃ ᑲᑐᔾᔨᖃᑎᒌᒃᖢᑎᒃ ᐊᖏᖃᑎᒌᒍᑎᒥᒃ. ᓄᓇᕗᒻᒥ ᐃᓕᓴᐃᔨᑦ ᑲᑐᔾᔨᖃᑎᒌᑦ 86−ᐳᓴᖏᑦ ᓂᕈᐊᓚᐅᖅᐳᑦ ᓈᒻᒪᒃᓴᖅᖢᑎᒃ ᑲᑐᔾᔨᖃᑎᒌᒃᖢᑎᒃ ᐊᖏᖃᑎᒌᒍᑎᒥᒃ.

ᐊᕐᕌᒍᓄᑦ ᑎᓴᒪᓄᑦ ᐊᖏᖃᑎᒌᒍᑎ ᑲᑎᖦᖢᒋᑦ ᑮᓇᐅᔾᔭᒃᓵᖏᓐᓂ ᐅᓄᖅᓯᒋᐊᖅᑎᑦᑎᕗᖅ 7−ᐳᓴᒥᒃ, ᐱᒋᐊᕐᓗᓂ ᑭᖑᓂᐊᓄᑦ ᐊᑭᓕᖅᑕᐅᓗᑎᒃ ᔪᓚᐃ 1, 2021−ᒥ ᐱᒋᐊᕐᕕᖃᕐᓗᓂ. ᐊᖏᖃᑎᒌᒍᑎ ᐱᖃᓯᐅᔾᔨᒋᕗᖅ ᐊᓯᔾᔨᖅᑕᐅᓪᓗᑎᒃ ᓄᖅᑲᖓᔾᔪᑎᖏᑦ ᓲᕐᓗ ᐃᓕᓴᐃᔩᑦ ᐅᓪᓗᓄᑦ ᐱᖓᓱᓄᑦ ᑎᑭᖦᖢᒍ ᐊᖏᕐᕋᒥᓂ ᐋᓐᓂᖅᓯᖅᑕᐅᕙᒃᑐᑦ ᓄᖅᑲᖓᔾᔪᑎᑖᖅᑎᑕᐅᓪᓗᑎᒃ.

ᖁᔭᓐᓇᒦᕈᒪᔭᒃᑲ ᓄᓇᕗᒻᒥ ᐃᓕᓴᐃᔨᑦ ᑲᑐᔾᔨᖃᑎᒌᑦ ᐃᖏᕐᕋᑦᑎᐊᓚᐅᕐᒪᑕ, ᕿᓚᒻᒥᐅᓪᓗᑎᒃ ᐊᒻᒪ ᑲᔪᓯᑦᑎᐊᖅᖢᑎᒃ ᐊᖏᖃᑎᒌᒐᓱᒃᑎᓪᓗᒋᑦ," ᐃᖅᑲᓇᐃᔭᖅᑐᓕᕆᔨᒃᑯᓐᓄᑦ ᒥᓂᔅᑕ, ᐋᑕᒻ ᓚᐃᑦᔅᑑᓐ ᐅᖃᖅᑐᖅ. "ᑖᓐᓇ ᐊᖏᖃᑎᒌᒍᑎ ᓴᖅᑭᑎᑦᑎᕗᖅ ᓄᓇᕗᑦ ᒐᕙᒪᒃᑯᑦ ᐱᓕᕆᔪᒪᓪᓚᑦᑖᕐᓂᖏᓐᓂᒃ ᐃᓕᓴᐃᔨᓄᑦ. ᐃᓕᓴᐃᔩᑦ ᐃᓕᓴᐃᑐᐃᓐᓇᖃᑦᑕᙱᒻᒪᑕ, ᑭᓯᐊᓂ ᑲᔪᖏᖅᓴᐃᔨᐅᒐᔪᒃᐳᑦ ᐃᓕᓐᓂᐊᖅᑎᓂᓪᓗ ᑐᙵᕕᖃᖅᑎᑦᑎᕙᒃᖢᑎᒃ. ᑖᓐᓇ ᐊᖏᖃᑎᒌᒍᑎ ᐃᓕᓴᐃᔨᑦᑎᓐᓂ ᓈᒻᒪᒃᑐᓂᒃ ᐃᑲᔫᓯᐊᖅᑖᖅᑎᑦᑎᓂᐊᖅᐳᑦ ᐊᑭᓕᖅᓱᐃᔾᔪᑎᓂᓪᓗ.

ᓄᓇᕗᒻᒥ ᐃᓕᓴᐃᔩᑦ ᑲᑐᔾᔨᖃᑎᒌᑦ ᑭᒡᒐᖅᑐᐃᕗᑦ 850−ᓂᒃ ᐅᓪᓗᓕᒫᖃᑦᑕᖅᑑᑉ ᐱᓕᕆᐊᒃᓴᖏᓐᓂ ᐅᑯᓂᖓᓗ ᐃᓕᓴᐃᔨᑦ, ᐃᓕᓴᐃᔨᑦ ᐊᖓᔪᖅᑳᖏᑦ, ᐊᖓᔪᖅᑳᖏᑕ ᑐᖏᓕᖏᑦ, ᐃᓕᓐᓂᐊᖅᑐᓄᑦ ᐃᑲᔪᖅᑎᑦ ᐊᒻᒪ ᐃᓕᓴᐃᔨᑦ ᐃᑲᔪᖅᑎᖏᑦ ᐃᓕᓐᓂᐊᖅᑐᓕᕆᔨᒃᑯᓐᓂ ᐃᖅᑲᓇᐃᔭᖅᑎᒋᔭᐅᔪᑦ. ᐊᖏᖃᑎᒌᒍᑎᑖᓵᑉ ᐃᓱᓕᕝᕕᒃᓴᖓ ᓯᕗᓂᐊᒍᑦ ᐅᓪᓗᖃᖅᐳᖅ ᔪᓚᐃ 1, 2021−ᒥ ᐃᓱᓕᕝᕕᒃᓴᖃᖅᖢᓂ ᔫᓂ 30, 2025−ᒥ.

"ᖁᕕᐊᓱᒃᐳᖓ ᓄᓇᕗᑦ ᒐᕙᒪᒃᑯᑦ ᐊᒻᒪ ᓄᓇᕗᒻᒥ ᐃᓕᓴᐃᔩᑦ ᑲᑐᔾᔨᖃᑎᒌᑦ ᕿᓚᒥᑯᓗᒃ ᐊᖏᖃᑎᒌᓚᐅᕐᒪᑕ," ᐃᓕᓐᓂᐊᖅᑐᓕᕆᓂᕐᒧᑦ ᒥᓂᔅᑕ, ᐹᒥᓚ ᕼᐊᑯᖓᒃ ᒍᕋᔅ ᐅᖃᖅᑐᖅ. "ᓄᓇᕗᒻᒥ ᐃᓕᓴᐃᔩᑦ ᑐᙵᕕᒋᔭᐅᕗᑦ ᐃᓕᓐᓂᐊᖅᑐᓕᕆᔾᔪᑎᑦᑎᓐᓄᑦ, ᕿᑐᕐᙵᑦᑎᓐᓂ ᒪᒃᑯᒃᑐᓂᓪᓗ ᐃᓕᓐᓂᐊᖅᑎᑦᑎᕙᒃᖢᑎᒃ ᐃᓕᑦᑕᕆᐊᓕᖏᓐᓂᒃ ᐊᔪᙱᓐᓂᓕᒫᖓᓂ ᑎᑭᐅᑎᖁᓪᓗᒋᑦ. ᐊᖏᖃᑎᒌᒍᑎᑖᓵᖅᑎᓪᓗᒋᑦ, ᓄᓇᕗᒻᒥ ᓱᓕ ᐊᑐᐃᓐᓇᐅᑎᑦᑎᓂᐊᖅᐳᑦ ᑮᓇᐅᔾᔭᒃᓵᓂᒃ ᐃᑲᔫᓯᐊᓂᒡᓗ ᑲᔪᓯᑦᑎᐊᕐᓂᖅᓴᓂᒃ, ᐃᖅᑲᓇᐃᔭᖅᑎᖃᐃᓐᓇᖁᓪᓗᑕ ᐃᖅᑲᓇᐃᔭᖅᑎᑖᖅᐸᓪᓕᐊᓗᑕᓗ ᐃᓕᓴᐃᔨᑦᑎᐊᕙᐅᓂᖅᐹᓂᒃ ᓄᓇᑦᑎᓐᓂ."

ᑲᑎᒪᑎᓪᓗᒋᑦ, ᓄᓇᕗᒻᒥ ᐃᓕᓴᐃᔩᑦ ᑲᑐᔾᔨᖃᑎᒌᑦ ᐊᖓᔪᖅᑳᖓ ᔭᔅᑎᓐ ᒫᑦᑕᑦ ᐃᒪᓐᓇ ᐅᖃᓚᐅᖅᐳᖅ, "ᐃᓚᒋᔭᐅᔪᑦ ᑭᒡᒐᖅᑐᖅᖢᒋᑦ, ᖁᕕᐊᓱᒃᐳᖓ ᐊᑎᓕᐅᕈᓐᓇᕋᒪ ᑲᑐᔾᔨᖃᑎᒌᒃᖢᑎᒃ ᐊᖏᖃᑎᒌᒍᑎᒥᒃ ᓄᓇᕗᒻᒥ ᐃᓕᓴᐃᔩᑦ ᑲᑐᔾᔨᖃᑎᒌᓂᑦ ᐊᒻᒪ ᓄᓇᕗᑦ ᒐᕙᒪᖓᓂ. ᐃᓚᒋᔭᐅᔪᑦ ᐊᖏᖃᑎᒌᒍᑎᒥᒃ ᓂᕈᐊᖁᔭᐅᖕᒪᑕ, ᐅᓄᖅᑐᓄᑦ ᐊᖏᖅᑕᐅᓚᐅᖅᐳᖅ.  ᐅᒃᐱᕈᓱᒃᐳᒍᑦ ᑖᓐᓇ ᐊᖏᖃᑎᒌᒍᑎᑦᑎᐊᕙᐅᖕᒪᑦ ᐊᖏᔪᒥᒃ ᐊᑐᐃᓐᓇᐅᑎᑦᑎᓪᓗᓂ ᐃᓚᒋᔭᐅᔪᓄᑦ. ᓄᓇᕗᑦ ᒐᕙᒪᒃᑯᑦ ᖁᔭᓐᓇᒦᕈᒪᔭᕗᑦ ᐱᓕᕆᖃᑎᒋᑦᑎᐊᓚᐅᕋᑦᑎᒍᑦ ᐊᖏᖃᑎᒌᒐᓱᒃᑎᓪᓗᑕ, ᐱᓇᔪᒃᖢᑎᒃ ᐊᖏᖃᑎᒌᒐᓱᓚᐅᕐᒪᑕ ᐊᔾᔨᒌᒃᑎᑦᑎᓪᓗᑎᒃ ᓈᒻᒪᒃᖢᓂᓗ. ᓂᕆᐅᒃᐳᒍᑦ ᓴᙱᒃᑎᑉᐸᓪᓕᐊᖏᓐᓇᕈᒪᓪᓗᑕ ᓄᓇᕗᑦ ᒐᕙᒪᖓᓂ ᑲᑐᔾᔨᖃᑎᖃᕐᓂᑦᑎᓐᓂ ᐱᐅᓯᒋᐊᖅᑎᑦᑎᓇᓱᒡᓗᑕ ᐃᓕᓴᐃᔩᑦ ᐱᓕᕆᐊᕆᕙᒃᑕᖏᓐᓂᒃ ᐊᒻᒪ ᐃᓕᓐᓂᐊᖅᑎᑦ ᐃᓕᓐᓂᐊᕐᕕᒋᕙᒃᑕᖓᓂ.

ᓱᓕᔪᑦ:

  • ᐊᕐᕌᒍᓕᒫᖅ ᑮᓇᐅᔾᔭᒃᓵᖏᑦ ᐅᓄᖅᓯᒋᐊᓚᐅᖅᐳᑦ 2−ᐳᓴᒥᒃ ᓯᕗᓪᓕᕐᒥ, 1 1/2-ᐳᓴᒥᒃ ᐊᕐᕌᒍ ᐱᖃᑖᓂ, 1 1/2−ᐳᓴᒥᒃ ᐊᕐᕌᒍ ᐱᖓᔪᖓᓂ ᐊᒻᒪ 2−ᐳᓴᒥᒃ ᐊᕐᕌᒍ ᑎᓴᒪᖓᓂᒃ ᑲᑐᔾᔨᖃᑎᒌᒃᖢᑎᒃ ᐊᖏᖃᑎᖐᒍᑎᒥᒃ ᔪᓚᐃ 1, 2021−ᒥ ᐱᒋᐊᖅᖢᓂ. ᐅᓄᖅᓯᒋᐊᖅᑕᐅᔪᑦ ᔪᓚᐃ 1−ᒥ ᐊᑐᖅᑕᐅᓕᖃᑦᑕᖅᐳᑦ ᐊᕐᕌᒍᑕᒫ ᑲᑐᔾᔨᖃᑎᒌᒃᖢᑎᒃ ᐊᖏᖃᑎᖐᒍᑎᒥ.
  • ᐊᖏᕐᕋᒥᓂ ᐋᓐᓂᖅᓯᖅᑕᐅᕙᒃᑐᑦ ᓄᖅᑲᖓᔾᔪᑎᒥᒃ ᐊᑐᐃᓐᓇᐅᑎᑦᑎᓂᐊᓕᖅᐳᑦ ᐃᖅᑲᓇᐃᔭᖅᑎᓄᑦ, ᐅᓪᓗᓄᑦ ᐱᖓᓱᓄᑦ ᑎᑭᓪᓗᒍ ᐊᑭᓕᖅᓱᖅᑕᐅᓗᑎᒃ ᓄᖅᑲᖓᔪᓐᓇᖅᓯᓗᑎᒃ ᑕᑯᔭᐅᕝᕕᒃᓴᒥᓂᒃ ᐅᐸᒍᑎᔪᓐᓇᖁᓪᓗᒋᑦ ᐱᓕᕆᔨᓪᓚᕆᖕᓂᑦ, ᒪᓕᒐᖅᑎᒍᑦ ᐱᕙᓪᓕᐊᑎᑕᐅᔪᓂᑦ, ᐅᕝᕙᓘᓐᓃᑦ ᐱᓕᕆᖃᑕᐅᑎᓪᓗᒋᑦ ᐊᓯᖏᓐᓂᒃ ᐱᓕᕆᐊᕆᔭᕆᐊᓕᖕᓂᒃ ᐃᑲᔪᖅᑐᐃᔪᓂᑦ ᖃᓄᐃᙱᓐᓂᕐᒧᑦ, ᐊᑦᑕᕐᓇᖅᑕᐃᓕᒪᓂᕐᒧᑦ ᐊᒻᒪ ᑲᒪᒋᔭᐅᑦᑎᐊᕐᓂᕐᒥ.
  • ᐱᔾᔪᑎᖃᕐᓗᑎᒃ ᓄᖅᑲᖓᔾᔪᑎᒃᓴᖃᕐᓂᐊᓕᕐᒥᔪᑦ ᐃᖅᑲᓇᐃᔭᖅᑏᑦ ᐅᓪᓗᓄᑦ ᑕᓪᓕᒪᓄᑦ ᖃᑕᙳᑎᒥᓂᒃ ᐃᓅᔪᓐᓃᖅᑐᖃᓚᐅᖅᑎᓪᓗᒍ ᐊᒻᒪ ᐅᓪᓘ ᓇᑉᐸᖓᓂ ᐃᓗᕕᖅᑕᐅᔪᖃᖅᑎᓪᓗᒍ ᐊᒃᑲᒥᓂᒃ ᐊᑦᑕᒥᓂᒡᓘᓐᓃᑦ.
  • ᐊᖓᔪᖅᑳᙳᖅᑐᑦ ᓄᖅᑲᖓᕙᒃᑐᑦ ᐊᓯᔾᔨᖅᑕᐅᔪᓂᑦ ᒪᓕᖕᓂᐊᖅᐳᑦ ᒐᕙᒪᑐᖃᒃᑯᓐᓂ ᐃᖅᑲᓇᐃᔭᕐᓂᕐᒧᑦ ᓇᓪᓕᐅᒃᑯᒫᖏᓐᓄᑦ, ᐃᖅᑲᓇᐃᔭᖅᑏᑦ ᓄᖅᑲᖓᔅᓲᔭᕈᓐᓇᖁᓪᓗᒋᑦ ᐃᑲᔫᓯᐊᕐᓗᑎᒡᓗ ᐊᖓᔪᖅᑳᙳᖅᑐᓄᑦ ᓄᖅᑲᖓᔅᓲᔭᕐᓂᐊᖅᑐᓄᑦ.
  • ᐊᕐᕌᒎ ᐃᓚᖓᓂ ᐃᓄᐃᑦ ᐃᓕᖅᑯᓯᕐᒥᓄᑦ ᓄᖅᑲᖓᓂᐊᖅᑐᑦ ᐃᓇᖐᕗᖅ ᐊᖑᓇᓱᒃᖢᑎᒃ, ᐃᖃᓪᓕᐊᖅᖢᑎᒃ, ᓂᕿᒃᓴᖅᓯᐅᖅᖢᑎᒡᓗ ᓄᖅᑲᖓᔾᔪᑎᒥᒃ, ᐅᓪᓗᖅ ᐊᑕᐅᓯᕐᒥᒃ ᐱᔾᔪᑎᖃᕐᓗᑎᒃ ᓄᖅᑲᖓᔪᓐᓇᖅᓯᓪᓗᑎᒃ ᐅᓪᓗ ᐱᖃᑖᓗ ᐊᑭᓕᖅᓱᖅᑕᐅᓇᓂ ᓄᖅᑲᖓᔪᓐᓇᕐᓗᓂ.
  • ᑎᒍᐊᙳᐊᖑᖃᑦᑕᖅᑐᑦ ᓇᓗᓇᐃᖅᑕᐅᕗᖅ ᐃᖅᑲᓇᐃᔭᖅᑎᐅᑉ ᖃᑕᙳᑎᖓᓄᑦ ᐃᓚᒋᔭᐅᓪᓗᓂ.
  • ᐱᖓᔪᖓᑦ ᐃᓄᐃᑦ ᐅᖃᐅᓯᖓᓄᑦ ᐃᑲᔫᓯᐊᑦ ᐱᔭᐅᓯᑲᐅᑎᒋᖃᑦᑕᕐᓂᐊᖅᐳᑦ ᐃᖅᑲᓇᐃᔭᖅᑎᑖᕆᔭᐅᔪᓄᑦ ᐅᑯᓄᖓ ᐃᓕᓐᓂᐊᕈᑎᓂᑦ ᐃᓕᓐᓂᐊᖅᑎᑕᐅᔪᓂᑦ ᐃᓄᒃᑎᑐᑦ ᑭᓯᐊᓂ ᖃᐅᔨᓴᖅᑕᐅᔪᓐᓇᖅᓯᒃᐸᑕ.
  • ᐃᓕᓐᓂᐊᖅᓯᒪᙱᑦᑐᑦ ᐃᓕᓴᐃᔨᓂᑦ ᐃᓇᖐᕙᒃᑐᑦ ᐊᑭᓕᖅᓱᖅᑕᐅᔾᔪᑎᖏᑦ $175-ᒥ ᐊᑭᑦᑐᕆᐊᕐᓂᐊᖅᐳᑦ ᐅᓪᓗᖅ ᐊᑕᐅᓯᖅ, $150-ᐅᓚᐅᖅᖢᓂ ᐅᓪᓗᖅ ᐊᑕᐅᓯᖅ.

###

ᐱᕙᓪᓕᐊᔪᓂᑦ ᖃᐅᔨᒋᐊᕐᕕᒃᓴᑦ:

ᒫᑎᐅ ᐃᓛᓯᕗᐃᒃᔅ
ᐊᐅᓚᑦᑎᔨ, ᑐᓴᒐᒃᓴᓕᕆᔨᒃᑯᓐᓄᑦ
ᐃᖅᑲᓇᐃᔭᖅᑐᓕᕆᔨᒃᑯᑦ
ᓄᓇᕗᑦ ᒐᕙᒪᖓᑦ
867-975-6292
millaszewicz1@gov.nu.ca

ᑐᕈᐊᐃ ᕉᑦᔅ
ᑐᓴᒐᒃᓴᓕᕆᔨᓄᑦ ᐅᖃᐅᔾᔪᐃᔨᒻᒪᕆᒃ
ᐃᓕᓐᓂᐊᕐᓂᓕᕆᔨᒃᑯᑦ
ᓄᓇᕗᑦ ᒐᕙᒪᖓᑦ
867-975-5680
info.edu@gov.nu.ca

ᐸᑐᕆᓴ ᒪᒃᓂᐅᓪ
ᑐᑭᒧᐊᒃᑎᑦᑎᔨᒻᒪᕆᐅᑉ ᐃᑲᔪᖅᑎᖓ
ᓄᓇᕗᒻᒥ ᐃᓕᓴᐃᔩᑦ ᑲᑐᔾᔨᖃᑎᒌᑦ
867-979-0750 x224
pmacneil@ntanu.ca