ᐅᖃᓚᐅᑎᓯᐅᑏᑦ

You are here

ᓄᓇᕗᒻᒥ ᐳᔪᕐᓗᖕᒧᑦ ᐃᑲᔫᑎᑦ

ᐱᔾᔪᑎᐊ

ᔪᓚᐃ 2019−ᒥ ᓴᖅᑭᑎᑕᐅᓚᐅᖅᑐᖅ, ᓄᓇᕗᒻᒥ ᐳᔪᕐᓗᖕᒧᑦ ᐃᑲᔫᑎ (NCR) ᓇᑉᐸᖓᓂ ᐊᑭᓖᖃᑦᑕᖅᖢᑎᒃ ᒐᕙᒪᑐᖃᒃᑯᓐᓄᑦ ᐃᓯᐊᕿᑎᑕᐅᔪᒧᑦ ᑖᒃᓰᔭᕈᑎᓄᑦ ᐅᖅᓱᐊᓗᖕᒧᑦ ᓲᕐᓗ ᐃᒐᓯᐅᒻᒧᑦ ᐊᒻᒪ ᐅᖅᓱᕐᒧᑦ. ᓂᐅᕕᖅᐸᒃᑐᑦ ᓄᓇᕗᒻᒥ ᓇᑉᐸᖓᓂ ᐊᑭᓖᖃᑦᑕᖅᐳᑦ ᐅᖅᓱᐊᓗᖕᒥᒃ ᓂᐅᕕᕌᖓᒥᒃ.

ᓄᓇᕗᒻᒥ ᐳᔪᕐᓗᖕᒧᑦ ᐃᑲᔫᑎ ᐊᑐᖅᖢᒋᑦ, ᓄᓇᕗᑦ ᒐᕙᒪᒃᑯᑦ ᐊᑭᓪᓚᑦᑖᖓᓂ ᒥᒃᖠᒋᐊᖅᑎᑦᑎᖃᑦᑕᖅᐳᑦ ᒐᕙᒪᑐᖃᒃᑯᓐᓂ ᐃᓯᐊᕿᑎᑕᐅᔪᓄᑦ ᑖᒃᓰᔭᕈᑎᖏᓐᓂ ᓄᓇᕗᒻᒥᐅᑦ ᓇᖕᒥᓂᓖᓪᓗ ᐊᑭᓕᖅᐸᒃᑕᖓᓂ ᓂᐅᕕᓕᖅᑎᓪᓗᒋᑦ. ᑕᐃᒪᐃᓕᐅᖃᑦᑕᖅᐳᑦ ᖃᐅᔨᒪᔭᐅᒐᒥᒃ ᓄᓇᕗᒻᒥᐅᑦ ᖃᓄᖅᑑᕈᑎᒃᓴᖃᑦᑎᐊᙱᒻᒪᑕ ᐆᒪᔪᕕᓂᕐᓂᑦ ᐅᖅᓱᐊᓗᒃᓴᒥᒃ ᐊᑐᓗᐊᙱᓐᓂᖅᓴᐅᖁᓪᓗᒋᑦ ᐊᓯᖏᓐᓂ ᑲᓇᑕᒥᐅᑎᑐᑦ.

 

ᖃᓄᖅ ᐱᓕᕆᐊᖑᖃᑦᑕᕐᒪᖔᑦ

ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ' ᐅᖅᓱᐊᓗᓕᕆᔨᒃᑯᑦ ᐅᖅᓱᐊᓗᓕᒫᑲᓴᖕᓂ ᓄᓇᕗᒻᒧᑦ ᐊᒡᔭᖅᑐᐃᖃᑦᑕᖅᐳᑦ. ᓂᐅᕐᕈᑎᖃᖅᑎᐅᓪᓗᑎᒃ, ᐅᖅᓱᐊᓗᓕᕆᔨᒃᑯᑦ ᐱᓕᕆᐊᒃᓴᖃᖅᐳᑦ ᒐᕙᒪᑐᖃᒃᑯᓐᓂ ᐃᓯᐊᕿᑎᑕᐅᔪᓄᑦ ᑖᒃᓰᔭᕈᑎᓂᑦ ᑲᑎᖅᓱᐃᓪᓗᑎᒃ ᑲᓇᑕᒥ ᐃᓐᑲᒻᑖᒃᓯᓕᕆᔨᒃᑯᓐᓂ ᑭᒡᒐᖅᑐᐃᓗᑎᒃ ᐊᕐᕌᒍᓕᒫᒥ. ᐅᖅᓱᐊᓗᓕᕆᔨᒃᑯᑦ ᑖᒃᓰᔭᕈᑎᓄᑦ ᑲᑎᖃᑦᑕᖅᑕᖏᑦ ᑲᓇᑕᒥ ᐃᓐᑲᒻᑖᖅᓯᓕᕆᔨᒃᑯᓐᓄᑦ ᒪᓕᖃᑦᑕᖅᐳᑦ ᐅᖅᓱᐊᓗᓕᕆᔨᒃᑯᓐᓂ ᓂᐅᕐᕈᑕᐅᔪᑦ ᐊᖏᓂᖓᓂ ᖃᓄᐃᑦᑑᓂᖓᓂᓪᓗ.

ᐅᖅᓱᐊᓗᓕᕆᔨᒃᑯᑦ ᑲᔪᓯᑎᑦᑎᒐᔪᒃᐳᑦ ᑖᒃᓰᔭᕈᑎᑦ ᐊᑭᓕᒫᖓᓂ ᓂᐅᕕᖅᐸᒃᑐᓄᑦ. ᓄᓇᕗᒻᒥ ᐃᓯᐊᕿᑎᑕᐅᔪᓄᑦ ᐃᑲᔫᑎᑦ ᐱᓪᓗᒋᑦ, ᓲᖃᐃᒻᒪ, ᐅᖅᓱᐊᓗᓕᕆᔨᒃᑯᑦ ᓇᑉᐸᐃᓐᓇᖓᓂ ᑲᔪᓯᑎᑦᑎᖃᑦᑕᖅᐳᑦ ᐃᓯᐊᕿᑎᑕᐅᔪᒧᑦ ᑖᒃᓰᔭᕈᑎᓂᑦ ᓂᐅᕕᖅᐸᒃᑐᓄᑦ. ᑮᓇᐅᔭᓕᕆᔨᒃᑯᑦ ᓇᑉᐸᖓᓂ ᐊᑭᓖᖃᑦᑕᖅᐳᑦ "ᐃᓛᒃᑯᑦ." ᑕᐃᒪᐃᓕᐅᖅᖢᑎᒃ, ᓄᓇᕗᑦ ᒐᕙᒪᒃᑯᑦ (ᐅᑎᖅᑎᑦᑎᖃᑦᑕᖅᐳᑦ) 50-ᐳᓴᖓᓂᑦ ᒐᕙᒪᑐᖃᒃᑯᑦ ᐃᓯᐊᕿᑎᑕᐅᔪᓄᑦ ᑖᒃᓰᔭᕈᑎᖏᓐᓂᒃ ᓂᐅᕕᖅᐸᒃᑐᓄᑦ ᐅᖅᓱᐊᓗᖕᒥᑦ ᓂᐅᕕᑐᐊᕌᖓᒥᒃ.

 

ᐃᓯᐊᕿᑎᑕᐅᔪᒧᑦ ᑖᒃᓰᔭᕈᑎᐅᑉ ᒥᒃᓵᓄᑦ

ᓄᓇᕗᑦ ᒐᕙᒪᒃᑯᑦ ᐃᑲᔪᖅᑐᐃᕗᑦ ᐊᒃᓱᕉᑕᐅᔪᒥᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᓄᖅᑲᖅᑎᑦᑐᒪᓪᓗᒍ, ᐅᑯᓂᖓᓗ ᖃᓄᐃᓕᐅᖅᑎᑦᑎᓗᑎᒃ ᐃᓯᐊᖅᑭᙱᓐᓂᖅᓴᐅᓕᖁᓪᓗᒍ ᐳᔪᕐᓗᒃ ᐊᑦᑕᕐᓇᖅᑐᖅ. 

ᐃᓯᐊᕿᑎᑕᐅᔫᑉ ᐊᑭᒃᓴᖓ ᐋᖅᑭᒃᑕᐅᓯᒪᕗᖅ ᐃᓯᐊᕿᙱᓐᓂᖅᓴᐅᖁᓪᓗᒍ ᐊᑦᑕᕐᓇᖅᑐᒥᒃ ᓇᓗᓇᙱᑦᑐᓂᒃ ᐱᓕᕆᑎᑦᑎᑲᑕᖕᓂᒃᑯᑦ, ᓲᕐᓗ ᐆᒪᔪᕕᓃᑦ ᐅᖅᓱᐊᓗᒃᓴᖅ ᐅᖅᓱᒃᓴᕆᑲᑕᒃᖢᒋᑦ, ᐊᑭᑐᓂᖅᓴᐅᖕᒪᑕ. ᐅᖅᓱᐊᓗᒃ ᐊᑭᑦᑐᖅᐸᓪᓕᐊᑎᓪᓗᒍ, ᐃᓄᐃᑦ ᓇᖕᒥᓂᖃᖅᑏᓪᓗ ᑮᓇᐅᔭᓕᕆᓂᕐᒥᒃ ᑲᔪᓯᑎᑦᑎᑦᑎᐊᒃᑲᓐᓂᕆᐊᖃᖅᐳᑦ ᐊᑐᓗᐊᙱᓐᓂᖅᓴᐅᖁᓪᓗᒋᑦ.

2019−ᒥ, ᑲᓇᑕᐅᑉ ᒐᕙᒪᒃᑯᖏᑦ ᐱᒋᐊᖅᑎᑦᑎᓚᐅᖅᐳᑦ ᐃᓯᐊᕿᑎᑕᐅᔪᒧᑦ ᑖᒃᓰᔭᕈᑎᒥᒃ ᑲᓇᑕᓕᒫᒥ, ᐆᒪᔪᕕᓃᑦ ᐅᖅᓱᐊᓗᒃᓴᑦ ᐊᑭᑦᑐᕆᐊᖅᖢᑎᒃ ᓲᕐᓗ ᐅᖅᓱᖅ ᐊᒻᒪ ᐃᒐᓯᐅᑦ ᖃᔅᓯᐊᕐᔪᖕᓂᑦ ᓴᕕᕋᔭᖕᓂᑦ ᓖᑕ ᐊᑕᐅᓯᖅ. ᑖᒃᓰᔭᕈᑕᐅᔫᑉ ᐅᓄᕐᓂᖓ ᐅᖅᓱᐊᓘᑉ 'ᓴᓗᒪᓂᖓᓂ' ᒪᓕᖕᓂᐊᖅᐳᖅ (ᖃᓄᑎᒋ ᓱᕈᕐᓇᖅᑐᖅ ᐊᓂᐊᑎᑕᐅᕙᖕᓂᖓ ᐊᑐᖅᑕᐅᕙᓪᓕᐊᑎᓪᓗᒍ). ᐅᖅᓱᐊᓗᒃ ᓱᕉᓂᖅᓴᐅᒃᐸᑦ, ᓲᕐᓗ ᐃᒐᓯᐅᑦ, ᑖᒃᓰᔭᖅᑕᐅᓂᖓ ᐊᖏᓂᖅᓴᐅᖃᑦᑕᖅᐳᖅ ᓴᓗᒪᓂᖅᓴᒥᑦ, ᓲᕐᓗ ᐳᓪᓚᒧᑦ. ᑖᒃᓰᔭᕈᑕᐅᔪᑦ ᐅᓄᖅᓯᒋᐊᖃᑦᑕᕐᓂᐊᖅᐳᑦ ᐊᕐᕌᒍᑕᒫ 2022−ᒧᑦ ᑎᑭᓪᓗᒍ.

ᐊᐃᕆᓕ 1  2019 2020 2021 2022
$ / ᑕᓐ 20 30 40 50
ᐅᖅᓱᖅ ($/ ᓖᑕ) 0.0442 0.0663 0.0884 0.1105
ᐃᒐᓯᐅᑦ ($/ ᓖᑕ) 0.0537 0.0805 0.1073 0.1341
ᐳᓪᓚᒧᑦ ($/ ᓖᑕ) 0.0310 0.0464 0.0619 0.0774

ᓄᓇᕗᑦ ᒐᕙᒪᒃᑯᑦ ᐃᑲᔪᖅᓱᐃᖕᒪᑕ ᑲᓇᑕᒥ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ ᒥᒃᖠᒋᐊᖅᑎᑦᑎᓇᓱᒃᑐᓂᑦ, ᑭᓯᐊᓂ ᖃᐅᔨᒪᕗᑦ ᓄᓇᕗᒥᐅᑦ ᖃᓄᖅᑑᕈᑎᒃᓴᖏᑦ ᐅᓄᙱᓐᓂᖅᓴᐅᕗᑦ ᒥᒃᖠᒋᐊᕈᑎᒃᓴᓂᒃ ᐆᒪᔪᕕᓃᑦ ᐅᖅᓱᐊᓗᒃᓴᑦ ᐊᑐᙱᓐᓂᖅᓴᐅᖁᓪᓗᒋᑦ ᖃᓪᓗᓈᓂ ᐊᑐᖅᑐᓂᑦ.

ᐅᖓᓯᒃᑐᒦᑦᑐᑦ ᓄᓇᓖᑦ, ᐊᐅᓚᔪᓐᓇᐅᑎᖃᑦᑎᐊᙱᓐᓂᖅ ᐊᒻᒪ ᑮᓇᐅᔭᓕᐅᕈᑎᒃᓴᑦ ᒥᑭᑦᑐᑦ ᑐᑭᖃᖅᐳᖅ ᐊᑯᓂᐅᓂᖅᓴᖅ ᐱᓕᕆᐊᖑᓇᔭᕐᓂᖏᓐᓂᒃ ᓄᓇᕗᒥᐅᑦ ᓇᖕᒥᓂᖃᕐᕕᖏᓪᓗ ᐋᖅᑭᒋᐊᕋᓱᒡᓗᒋᑦ ᐊᑭᑐᓂᖅᓴᓄᑦ. ᑕᒪᓐᓇ ᐱᔾᔪᑎᒋᓪᓗᒍ, ᓄᓇᕗᑦ ᒐᕙᒪᒃᑯᑦ ᒥᒃᖠᒋᐊᖅᑎᑦᑎᔪᒪᓪᓚᑦᑖᖅᐳᑦ ᐊᑭᓪᓚᑦᑖᖓᓂ ᒐᕙᒪᑐᖃᒃᑯᓐᓂ ᐃᓯᐊᕿᑎᑕᐅᔪᑦ ᐊᑭᖓᓂ−ᓄᓇᕗᒻᒥᐅᓂᑦ ᓇᖕᒥᓂᓕᖕᓂᓪᓗ ᐋᖅᑭᒋᐊᖅᑎᑦᑎᔪᓐᓇᕐᓂᖅᓴᐅᓪᓗᑎᒃ ᐊᑭᑐᓂᖅᓴᓄᑦ.

 

ᑮᓇᐅᔭᖃᖅᑎᑦᑎᓂᖅ

ᑮᓇᐅᔭᓕᕆᔨᒃᑯᖅ ᐊᑭᓖᖃᑦᑕᖅᐳᑦ ᓄᓇᕗᒻᒥ ᐃᓯᐊᕿᑎᑕᐅᔪᒧᑦ ᐃᑲᔫᑎᒃᓴᒥᑦ ᑮᓇᐅᔭᑦ ᐊᑐᖅᑐᒃᓴᖏᓐᓂᑦ, ᒪᓕᒐᓕᐅᕐᕕᖕᒥ ᐱᔭᐅᕙᒃᑐᒥᑦ ᐊᕐᕌᒍᑕᒫ.

ᐅᑎᖅᑎᑕᐅᔾᔪᑎᒃᓴᑦ ᐊᑭᓪᓚᑦᑖᖓ ᒪᓕᖃᑦᑕᖅᐳᖅ ᐃᓯᐊᕿᑎᑕᐅᔪᒧᑦ ᑖᒃᓰᔭᕈᑎᑦ ᐅᓄᕐᓂᖓᓂ ᐅᖅᓱᐊᓗᓕᕆᔨᒃᑯᑦ ᐊᑭᓕᕆᐊᓕᖓᓄᑦ ᑲᓇᑕᐅᑉ ᒐᕙᒪᖓᓄᑦ, ᓇᖕᒥᓂᖅ ᒪᓕᒃᑭᓪᓗᑎᒃ ᐅᖅᓱᐊᓘᑉ ᖃᓄᐃᑦᑑᓂᖓᑕ ᐊᖏᓂᖓᓂᒃ ᓄᓇᕗᒻᒥᐅᑦ ᐊᑐᖅᐸᓪᓕᐊᔭᖓᓂ. 

ᓄᓇᕗᑦ ᒐᕙᒪᒃᑯᑦ ᐋᖅᑭᒃᓱᐃᓚᐅᖅᐳᑦ ᓄᓇᕗᒻᒥ ᐃᓯᐊᕿᑎᑕᐅᔪᒧᑦ ᐃᑲᔫᑎᒥᑦ ᓄᓇᕗᒻᒥᐅᑦ ᓅᑉᐸᓪᓕᐊᖁᓪᓗᒋᑦ ᒐᕙᒪᑐᖃᒃᑯᑦ ᐃᓯᐊᕿᑎᑕᐅᔪᒧᑦ ᑖᒃᓰᔭᕈᑎᒧᑦ ᖃᖓᙳᖅᐸᓪᓕᐊᓗᓂ, ᐃᑲᔫᓯᐊᖅᑖᖅᑎᑦᑎᙱᓪᓗᑎᒃ ᐅᖅᓱᐊᓘᑉ ᐊᑭᖓᓂ ᑕᐅᕗᖓᓕᒫᖅ. 2024−ᒥ ᐱᒋᐊᕐᓗᓂ, ᓄᓇᕗᑦ ᒐᕙᒪᒃᑯᑦ ᐊᑭᒃᖠᒋᐊᖅᑎᑦᑎᕙᓪᓕᐊᓂᐊᖅᐳᑦ ᓱᒃᑲᐃᑦᑐᒥᑦ ᓄᓇᕗᒻᒥ ᐃᓯᐊᕿᑎᑕᐅᔪᒧᑦ ᐃᑲᔫᑎᒃᓴᑦ ᐊᑭᖓᓂ ᐱᓕᕆᐊᖑᓂᖓ ᑭᓯᐊᓂ ᓄᖅᑲᖅᑎᑕᐅᓕᖅᐸᑦ 2028−ᒥ. 

 

ᑐᑭᓯᒋᐊᕈᑎᒃᓴᒃᑲᓐᓃᑦ

ᓄᓇᕗᒻᒥ ᐃᓯᐊᕿᑎᑕᐅᔪᒧᑦ ᐃᑲᔫᑎᑦ – ᐃᑲᔫᑎᑦ ᐊᑐᐊᒐᖓ
ᓄᓇᕗᒻᒥ ᐃᓯᐊᕿᑎᑕᐅᔪᒧᑦ ᐃᑲᔫᑎᑦ – ᐊᐱᖅᑯᑕᐅᒐᔪᒃᑐᑦ
ᓄᓇᕗᒻᒥ ᐃᓯᐊᕿᑎᑕᐅᔪᒧᑦ ᐃᑲᔫᑎᑦ − ᓱᓕᔪᑦ ᑎᑎᕋᖅᓯᒪᔪᑦ
ᑲᓇᑕᓕᒫᒥ ᐱᓕᕆᔾᔪᑕᐅᓂᐊᖅᑐᖅ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐊᒻᒪ ᐅᓄᖅᓯᕙᓪᓕᐊᓂᖏᓐᓄᑦ