ᐱᓕᕆᔨᐅᖃᑎᒌᒡᕕᒋᔭᕗᑦ ᐃᓚᐅᕝᕕᒋᔪᓐᓇᖅᑕᑎᑦ!

ᑮᓇᐅᔭᓕᕆᔨᒃᑯᑦ ᐊᒻᒪ ᓄᓇᕗᒻᒥ ᐃᒥᐊᓗᓕᕆᔨᒃᑯᑦ ᓱᕐᕋᖕᓇᖅᑐᓕᕆᔨᒃᑯᓪᓗ ᑲᑎᒪᔨᖏᑦ ᖃᐅᔨᒪᓇᓱᐃᓐᓇᖃᑦᑕᖅᐳᑦ ᐱᓕᕆᔨᐅᖃᑎᒋᒃᑯᒥᒋᔭᖏᓐᓂᒃ. 

ᐃᖅᑲᓇᐃᔭᓯᒋᐊᕈᕕᑦ, ᒐᕙᒪᒃᑯᓐᓂ ᐱᔨᑦᑎᕋᖅᑎᒃᑯᓐᓂ ᐃᖅᑲᓇᐃᔭᖃᑕᐅᓕᕈᕕᑦ, ᐅᕝᕙᓘᓐᓃ ᐃᖅᑲᓇᐃᔭᖅᑎᐅᔅᓲᔭᓕᖅᑐᒥᒃ ᖃᓄᑐᐃᓐᓇᖅ ᖃᐅᔨᒪᔭᖃᖅᑐᒥᒃ, ᑮᓇᐅᔭᓕᕆᔨᒃᑯᑦ ᒪᓂᒻᒪᐃᓯᒪᕗᑦ ᐊᔾᔨᒌᙱᑦᑐᓂᒃ ᐃᖅᑲᓇᐃᔮᒃᓴᓂᒃ ᐃᖃᓗᖕᓂ, ᐃᖃᓗᒃᑑᑦᑎᐊᒥ, ᑲᖏᖅᖠᓂᕐᒥ ᐊᒻᒪ ᐃᒡᓗᓕᖕᒥ.

• ᐱᔨᑦᑎᕋᕆᐊᓕᖕᓂᒃ ᑲᒪᒋᔭᖃᕈᓐᓇᑦᑎᐊᖅᐱᑦ? ᐊᑭᓕᖅᑕᐅᔾᔪᓯᐊᖅᑐᓕᕆᔨ ᐃᑲᔫᑎᓂᒡᓗ ᑲᒪᔨᑦ ᐃᑲᔫᑕᐅᔪᓐᓇᖅᐳᑦ ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᓐᓂᒃ ᓇᓂᓕᒫᖅ ᐱᓕᕆᕝᕕᖃᖅᑐᓂᒃ ᖃᐅᑕᒫᑦ. 
• ᐱᔭᒃᓴᓕᓪᓛᓗᖕᓂ ᓂᐅᕕᕐᕕᐅᓲᓂᒃ ᓴᓇᖃᑕᐅᔪᒪᖃᑦᑕᖅᐱᑦ? ᐃᒻᒪᖄ ᐃᓄᖕᓄᑦ ᐱᔨᑦᑎᕋᖅᑎᐅᖃᑕᐅᓕᕈᕕᑦ ᓄᓇᕗᒻᒥ ᐃᒥᐊᓗᓕᕆᔨᒃᑯᓐᓂ ᓱᕐᕋᖕᓇᖅᑐᓕᕆᔨᒃᑯᓐᓂᓪᓗ ᐱᐅᑦᑎᐊᕋᔭᖅᑰᖅᑐᖅ. 
• ᒪᑭᒪᔾᔪᑎᓄᑦ ᐱᔾᔪᑕᐅᓲᓂᒃ ᑲᓇᑕᓕᒫᒥ ᐱᓂᐊᕐᓂᐅᔪᓂᒃ ᖃᐅᔨᓇᓱᕈᓘᔭᖃᑕᐅᔪᒪᖃᑦᑕᕋᔭᖅᐱᑦ? ᐊᖏᕈᕕᑦ, ᐃᓱᒪᒋᓪᓗᐊᖅᑕᑎᑦ ᒪᑭᒪᔾᔪᑎᓄᑦ ᑮᓇᐅᔭᓕᕆᔨᕗᑦ. 
• ᐃᕝᕕᓯᐅᑕᐅᕗᖃᐃ? ᑮᓇᐅᔭᓂᒃ ᐊᐅᓚᑦᑎᔨᒋᔭᕗᑦ ᑮᓇᐅᔭᓕᕆᔾᔪᑎᑦᑎᓐᓂ ᐊᒻᒪ ᐃᖅᑲᓇᐃᔭᖅᑐᓕᕆᔨᒃᑯᓐᓂ ᐃᖏᕐᕋᑎᑦᑎᑦᑎᐊᖏᓐᓇᓲᑦ.

ᖃᓄᑐᐃᓐᓇᖅ ᐱᓕᕆᐊᒃᓴᓂᒃ ᖁᕕᐊᒋᔭᖃᕈᕕᑦ, ᖃᐅᔨᓇᓱᒍᓐᓇᑦᑎᐊᖅᑕᑎᑦ ᑮᓇᐅᔭᓕᕆᔨᒃᑯᓐᓂ ᐃᖅᑲᓇᐃᔮᒃᓴᑦ ᐊᓯᖏᓪᓗ ᓄᓇᕗᑦ ᒐᕙᒪᒃᑯᓐᓂ ᐃᖅᑲᓇᐃᔮᒃᓴᑦ ᐅᕙᙵᑦ: https://www.gov.nu.ca/iu/public-jobs.

 

ᐃᖅᑲᓇᐃᔭᑲᐃᓐᓇᖃᑦᑕᕐᓂᖅ

ᑮᓇᐅᔭᓕᕆᔨᒃᑯᑦ ᐃᖅᑲᓇᐃᔭᑲᐃᓐᓇᖅᑎᑦᑎᖃᑦᑕᖅᑐᑦ ᓇᓂᓕᒫᖅ ᐱᓕᕆᕝᕕᒋᔭᐅᔪᓂᒃ ᑮᓇᐅᔭᓕᕆᔨᒃᑯᓐᓂ. ᑐᑭᓯᒋᐊᒃᑲᓐᓂᕈᒪᒍᔅᓯ ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᑦᑎᑲᐃᓐᓇᕈᓯᖏᓐᓂᒃ, ᐃᖅᑲᓇᐃᔮᒧᓪᓗ ᐱᔪᒥᓴᐅᑎᑦ ᐃᓚᓕᐅᑎᓂᐊᕐᓗᒍ ᓄᓇᕗᑦ ᒐᕙᒪᒃᑯᑦ ᖃᕆᑕᐅᔭᓕᕆᔾᔪᑎᖏᓐᓄᑦ, ᐃᕐᖐᓐᓈᖅᑕᐅᒃᑯᑦ ᑎᑎᕋᕈᓐᓇᖅᑐᑎᑦ ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔭᖅᑐᓕᕆᔨᒃᑯᖏᓐᓄᑦ ᐅᕗᖓ[DC1] : gnhr@gov.nu.ca.

 

ᐃᓄᖕᓂᒃ ᐃᖅᑲᓇᐃᔭᖅᑎᑦᑎᓂᖅ

ᑮᓇᐅᔭᓕᕆᔨᒃᑯᑦ ᐊᒻᒪ ᓄᓇᕗᒻᒥ ᐃᒥᐊᓗᓕᕆᔨᒃᑯᑦ ᓱᕐᕋᖕᓇᖅᑐᓕᕆᔨᒃᑯᓪᓗ ᑲᑎᒪᔨᖏᑦ ᐃᑲᔪᖅᓱᐃᑦᑎᐊᓲᑦ ᐃᓄᖕᓂᒃ ᐃᖅᑲᓇᐃᔭᖅᑎᓂᒃ, ᓄᓇᕗᒥᐅᓂᒡᓗ ᐃᓄᖕᓂᒃ ᕿᓂᕋᔪᒃᖢᑎᒃ ᐃᖅᑲᓇᐃᔭᖃᑎᒃᓴᖏᓐᓂᒃ.

ᐃᖅᑲᓇᐃᔭᖃᑎᒌᑦ ᐃᓕᓐᓂᐊᒐᒃᓴᑦᑎᐊᕙᖕᓂᒃ ᐱᕙᓪᓕᐊᔾᔪᑎᒃᓴᑦᑎᐊᕙᖕᓂᓪᓗ ᒪᓂᒻᒪᒃᑎᑦᑎᓲᑦ. ᐊᔪᕈᓐᓃᖅᑕᑎᑦ ᐅᕙᑦᑎᓐᓂ ᓅᔾᔪᑕᐅᔪᓐᓇᑦᑎᐊᖅᑐᑦ, ᑐᙵᕕᑦᑎᐊᕙᐅᓪᓗᑎᓪᓗ ᓯᕗᓂᒃᓴᒥ ᐃᖅᑲᓇᐃᔮᒃᓴᓄᑦ, ᓄᓇᕗᑦ ᒐᕙᒪᒃᑯᓐᓂ ᐊᒻᒪ ᓯᓚᑖᓂ ᑲᑐᔾᔨᖃᑎᒌᒡᕕᖕᓂ, ᐃᓚᓕᐅᑎᓪᓗᒋᑦ ᓇᖕᒥᓂᖃᖅᑏᑦ.

ᑐᑭᓯᒋᐊᒃᑲᓐᓂᕈᒪᒍᔅᓯ ᑮᓇᐅᔭᓕᕆᔨᒃᑯᓐᓂ ᐃᓅᓪᓗᑎᒃ ᐃᖅᑲᓇᐃᔭᖅᑎᓄᑦ ᐸᕐᓇᐅᑎᑦ, ᐅᓇ ᓇᕿᑦᑐᓐᓇᖅᑕᑦ.

 

ᐊᐅᔭᒃᑯᑦ ᐃᓕᓐᓂᐊᖅᑎᓂᒃ ᐃᖅᑲᓇᐃᔭᖅᐸᒃᑐᓄᑦ ᐱᓕᕆᐊᑦ

ᑮᓇᐅᔭᓕᕆᔨᒃᑯᑦ ᐊᒻᒪ ᓄᓇᕗᒻᒥ ᐃᒥᐊᓗᓕᕆᔨᒃᑯᑦ ᓱᕐᕋᖕᓇᖅᑐᓕᕆᔨᒃᑯᓪᓗ ᑲᑎᒪᔨᖏᑦ ᐃᖅᑲᓇᐃᔭᕆᐅᖅᓴᑎᑦᑎᔪᓐᓇᑦᑎᐊᖅᑐᑦ ᐃᓕᓐᓂᐊᖅᑎᓂᒃ ᓄᓇᕗᑦ ᒐᕙᒪᒃᑯᑦ ᐊᐅᔭᒃᑯᑦ ᐃᖅᑲᓇᐃᔭᓚᐅᑲᖕᓂᐊᖅᑐᑦ ᐊᖅᑯᑕᐅᓪᓗᓂ. ᐱᓕᕆᐊᖑᕙᒃᑐᓂᒃ ᖃᐅᔨᒃᑲᓐᓂᕈᒪᒍᕕᑦ, ᖃᐅᔨᒋᐊᕐᕕᒋᔭᒃᓴᐅᔪᑦ ᐃᖅᑲᓇᐃᔭᖅᑐᓕᕆᔨᒃᑯᑦ.

ᐃᖅᑲᓇᐃᔭᖅᑎᐅᓪᓗᓂ ᑮᓇᐅᔭᓕᕆᔨᒃᑯᓐᓂ ᐅᕝᕙᓘᓐᓃᑦ ᓄᓇᕗᒻᒥ ᐃᒥᐊᓗᓕᕆᔨᒃᑯᓐᓂ ᓱᕐᕋᖕᓇᖅᑐᓕᕆᔨᒃᑯᓪᓗ ᑲᑎᒪᔨᖏᓐᓄᑦ ᐱᕕᖃᕈᑎᑦᑎᐊᕙᐅᕗᖅ ᐃᓕᓐᓂᐊᖅᑎᓄᑦ ᖃᐅᔨᕈᓘᔭᕐᓇᕐᒪᑦ ᖃᓄᑐᐃᓐᓇᖅ ᐱᓕᕆᐊᖑᕙᒃᑐᓂᒃ, ᐱᓗᐊᖅᑐᒥᒃ ᐊᒃᑐᐊᓂᓕᖕᓄᑦ ᑮᓇᐅᔭᓕᕆᓂᕐᒧᑦ ᐊᐅᓚᑦᑎᓂᕐᒧᑦ ᐊᒻᒪ ᑮᓇᐅᔭᓕᕆᓂᕐᒥᒃ, ᐊᑐᐊᒐᕐᓂᒃ ᖃᐅᔨᓴᕐᓂᕐᒧᑦ ᐊᒻᒪ ᐋᖅᑭᐅᒪᓂᖏᑦ, ᐊᒡᓚᕝᕕᓕᕆᓂᖅ, ᓂᐅᕕᖅᐸᒃᑐᓂᒃ ᐱᔨᑦᑎᕋᕐᓂᖅ / ᓂᐅᕕᖅᑎᐅᓂᖅ, ᐊᒻᒪ ᐊᑭᓕᖅᑕᐅᔾᔪᓯᐊᖅᑐᓕᕆᓂᕐᒥᒃ / ᐃᖅᑲᓇᐃᔭᖅᑎᓄᑦ ᑮᓇᐅᔾᔭᒃᓵᓕᕆᓂᖅ.

ᐅᕙᑦᑎᓐᓂ ᑐᓴᖅᑕᓯ ᓈᓚᑐᐃᓐᓇᙱᓪᓗᒋᑦ − ᐃᓕᓐᓂᐊᖅᑎᑦ ᐃᖅᑲᓇᐃᔭᖃᑕᐅᖃᑦᑕᖅᓯᒪᔪᑦ ᓈᓚᒃᐸᒡᓗᒋᑦ ᐅᖃᐅᓯᒃᓴᖏᑦ ᐅᕙᑦᑎᓐᓂ ᐱᔾᔪᑎᓕᑦ:

 

ᕌᓐᑎ ᖃᑦᑕᓕᒃ // ᖃᕆᓴᐅᔭᓕᕆᓂᕐᒧᑦ ᓇᓗᓇᐃᔭᐃᔨ ᐱᒋᐊᓕᓵᕐᓂᑯ // ᐃᖃᓗᖕᓂ, ᐊᐅᔭᒃᑯᑦ 2019-ᒥ

ᑮᓇᐅᔭᓕᕆᔨᒃᑯᓐᓂ ᐊᐅᓚᑦᑎᔨᑦ ᐃᓚᐅᕝᕕᒋᓕᓚᐅᖅᓯᒪᔭᒃᑲ ᐱᒋᐊᓕᓵᖃᑕᐅᓪᓗᖓ ᖃᐅᔨᓴᖅᑎᐅᓪᓗᖓ ᑮᓇᐅᔭᓕᕆᔨᒃᑯᓐᓂ. ᐱᒻᒪᕆᐅᓪᓗᓂ ᐱᕙᓪᓕᐊᔾᔪᑎᒋᓚᐅᖅᐸᕋ ᓯᕗᓪᓕᖅᐹᒥ ᐊᐅᔭᒃᑯᑦ ᐃᖅᑲᓇᐃᔭᖃᑕᐅᓚᐅᖅᓯᒪᒐᒪ ᐃᖅᑲᓇᐃᔮᕆᔭᓐᓂ ᐅᑭᐅᑦ ᑕᓪᓕᒪᑦ ᐊᓂᒍᖅᑐᓂᒃ. ᑲᑎᖅᓱᐃᕈᓘᔭᓚᐅᖅᐳᖓ ᖃᐅᔨᕙᓪᓕᐊᕙᒃᖢᖓ ᐊᕐᕌᒍᒃᑳᖓᑦ ᒫᓐᓇᓕ ᐃᑲᔪᓲᖑᕗᖓ ᐊᒻᒪ ᐃᓕᓐᓂᐊᖅᑎᑦᑎᓲᖑᕗᖓ ᐊᓯᖏᓐᓂᒃ ᑮᓇᐅᔭᓕᕆᔨᒃᑯᓐᓄᑦ ᐃᖅᑲᓇᐃᔭᖅᑎᓂᒃ.

 

ᕼᐄᓕ ᒪᒃᕼᐊᒐᒃ // ᐃᖅᑲᓇᐃᔭᖅᑎᓄᑦ ᐊᑭᓕᖅᓱᖅᑕᐅᔾᔪᓯᐊᓂᒃ ᐃᑲᔪᖅᑎ // ᐃᖃᓗᒃᑑᑦᑎᐊᖅ, ᐊᐅᔭᒃᑯᑦ 2019−ᒥ

ᐃᖅᑲᓇᐃᔭᖅᑎᓄᑦ ᐊᑭᓕᖅᓱᖅᑕᐅᔾᔪᓯᐊᓂᒃ ᐃᑲᔪᖅᑎᒋᔭᐅᓚᐅᖅᐳᖓ ᑮᓇᐅᔭᓕᕆᔨᒃᑯᑦ ᐊᑭᓕᐅᓯᐊᖅᑐᓕᕆᔨᒃᑯᖏᓐᓂᒃ ᐃᑲᔫᓯᐊᖅᑐᓕᕆᔨᒃᑯᖏᓐᓂᒡᓗ ᐃᖃᓗᒃᑑᑦᑎᐊᒥ. ᐃᓕᑦᑎᓚᐅᖅᐳᖓ ᑐᖅᑯᖅᑐᐃᓂᕐᒥᒃ, ᖃᕆᑕᐅᔭᕐᒧᐊᖅᑎᕆᓂᕐᒥᒃ ᐊᖏᖅᐸᒃᖢᒋᓪᓗ ᐃᑲᕐᕋᓕᐊᕆᔭᐅᔪᑦ ᐊᒻᒪ ᑐᖅᑯᖅᑐᐃᔪᓐᓇᖅᓯᓪᓗᖓ. ᖃᐅᔨᕈᓘᔭᓚᐅᖅᑕᒃᑲ ᐊᒃᓱᕈᕐᓇᖃᑦᑕᓚᐅᖅᑐᑦ ᐃᓛᓐᓂᒃᑯᑦ, ᑭᓯᐊᓂᓕ ᐃᓕᑦᑎᕐᔪᐊᖅᓯᒪᓕᖅᑐᖓ. ᐅᑎᒃᑲᓐᓂᓛᕈᒪᒐᓗᐊᖅᐳᖓ!