ᓯᕗᓪᓕᖅᐸᐅᑎᓂᐊᖅᑕᕗᑦ

ᑐᕌᖅᑕᕗᑦ

ᑐᕌᖅᑕᕗᑦ ᐱᓕᕆᐊᒃᓴᓂᒃ ᓇᓗᓇᐃᕈᑕᐅᕗᖅ 22-ᖑᔪᓄᑦ ᒪᓕᒐᓕᐅᖅᑎᓄᑦ ᑕᓪᓕᒪᒋᓕᖅᑕᖓᓂ ᒪᓕᒐᓕᐅᕐᕕᖕᒥ ᑲᑎᒪᓂᕆᔭᖓᓐᓂ. ᑎᑎᖅᑲᐅᕗᖅ ᑐᑭᒧᐊᒍᑕᐅᓂᐊᖅᖢᓂ ᓄᓇᕗᑦ ᒐᕙᒪᒃᑯᑦ ᐱᓕᕆᐊᕆᔭᖓᓄᑦ ᑎᑭᓪᓗᒍ 2021−ᒧᑦ, ᑕᑯᒃᓴᐅᑎᑦᑎᔪᖅ ᐱᔭᐅᔭᕆᐊᓕᖕᓂᑦ ᓯᕗᓪᓕᐅᔾᔭᐅᔪᒪᔪᓂᒡᓗ ᓄᓇᕗᒻᒥ.

ᐱᓕᕆᕝᕖᑦ ᓯᕗᓪᓕᐅᑎᖁᔭᖏᑦ ᐊᕕᒃᑐᖅᓯᒪᐅᖅᖢᑎᒃ

ᐱᓕᕆᐊᑦᑕ ᐃᓚᒋᓪᓗᓂᐅᒃ ᓯᕗᒧᐊᒃᑎᒃᑲᓐᓂᕋᓱᒃᖢᒍᓗᑐᕌᖅᑕᕗᑦ,ᖃᐅᑕᒫᖅᓯᐅᑎᓕᕆᓐᓇᖃᑦᑕᖅᑎᓪᓗᒍᑦᑕᐅᖅ ᐃᖅᑲᓇᐃᔮᑦᑎᓐᓂᐱᐊᓂᒃᓯᓇᓱᐊᖅᖢᑕ, ᑮᓇᐅᔭᓕᕆᔨᒃᑯᑦ ᓇᓗᓇᐃᖅᓯᓯᒪᓕᖅᐳᑦ ᐊᑖᓃᖦᖢᑎᒃ ᐱᐊᓂᒃᑕᐅᓇᓱᐊᕐᓂᐊᖅᑐᑦ 2020-21−ᒥ ᐱᓕᕆᐊᖑᔪᒃᓴᑦ ᐸᕐᓇᒃᑕᐅᓯᒪᔪᑦ ᒪᓕᒡᓗᒋᑦ. ᓄᓇᕗᑦ ᒐᕙᒪᖓᑦᑕ ᐃᑭᐊᖅᑭᕕᐊᓂ ᐊᔾᔨᐊᓂᒃ ᐱᔪᓐᓇᖅᐳᑎᑦ 2020-21 ᐱᓕᕆᐊᒃᓴᓄᑦ ᐸᕐᓇᐅᑎᑦᐅᕙᓂ.

ᓇᐃᓈᖅᓯᒪᔪᖅ ᐱᓕᕆᕝᕕᖕᓂᖔᖅᑐᑦ ᐱᓕᕆᐊᒃᓴᓄᑦ ᓯᕗᓪᓕᐅᑎᔭᒃᓴᑦ
ᑮᓇᐅᔭᓕᕆᔨᒃᑯᑦ 2021-22

ᐊᐅᓚᑦᓯᕕᐅᔪᖅ

• ᐱᓕᕆᐊᕆᓗᒋᑦ ᑲᒪᒋᔭᐅᑦᑎᐊᕐᓂᖅᓴᐅᓕᕐᓗᓂ ᐃᓚᓕᐅᔾᔭᐅᓂᐊᕐᓂᖓ ᐃᓄᐃᑦ ᖃᐅᔨᒪᔭᑐᖃᖏᑦ ᐃᖅᑲᓇᐃᔭᕐᕕᖕᒥ ᐃᓕᖅᑯᓯᕆᔭᐅᔪᓄᑦ ᐊᒻᒪ ᐊᐅᓚᓂᕆᔭᐅᔪᓄᑦ.
• ᕿᒥᕐᕈᔭᐅᖏᓐᓇᕐᓗᓂ ᐃᒥᐊᓗᓕᕆᓂᕐᒧᑦ ᐱᖁᔭᖅ ᐊᑐᓕᖁᔨᓂᕐᒧᓪᓗ ᐊᓯᔾᔨᖅᑕᐅᑐᐃᓐᓇᕆᐊᓕᓐᓄᑦ ᑕᐃᒪᐃᑦᑕᕆᐊᖃᑐᐊᖅᐸᑦ.
• ᕿᒥᕐᕈᔭᐅᕙᓪᓗᑎᒃ ᓇᓗᓇᐃᖅᑕᐅᓗᑎᒃ ᐊᒃᑐᐃᔾᔪᑕᐅᔪᑦ ᐃᖃᓗᓐᓂ ᕕᐊᑖᕐᕕᒻᒥ ᐅᐊᐃᓂᑖᕐᕕᖕᒥᓪᓗ ᐊᓯᖏᓐᓂᒃ ᓄᓇᓕᖕᓂᒃ ᖃᓂᕝᕕᓯᐅᖅᑐᓂᒃ.
• ᖃᐅᔨᓴᖅᐸᓪᓕᐊᖏᓐᓇᕐᓗᒋᑦ ᐊᑐᓕᖅᑎᑕᐅᔪᑦ ᓱᕐᕋᖕᓇᖅᑐᒧᑦ ᐱᖁᔭᕐᒥ ᐊᒃᑐᐊᓂᓖᓪᓗ ᐊᑐᐊᒐᐃᑦ ᒪᓕᒋᐊᓖᓪᓗ, ᐅᑯᐊᓗ ᑲᔪᓯᑦᑎᐊᖅᓯᒪᔪᑦ ᓂᐅᕐᕈᑕᐅᔪᑦ, ᐊᑐᓕᖅᑎᑦᑎᓂᖅ, ᐊᒻᒪ ᐱᔪᓐᓇᐅᑎᓕᕆᔾᔪᑎᑦ.
• ᓴᖅᑭᓪᓗᒋᑦ ᐊᒻᒪ ᓄᑖᙳᕆᐊᖅᑎᓪᓗᒋᑦ ᐃᓕᓐᓂᐊᕈᑎᒃᓴᓄᑦ ᐃᑲᔫᑎᒃᓴᑦ ᐊᒻᒪ ᐱᓕᕆᔾᔪᑎᒃᓴᑦ ᐃᒥᐊᓗᓕᕆᔨᒃᑯᓐᓂ ᓱᕐᕋᖕᓇᖅᑐᓕᕆᔨᒃᑯᓐᓂᓪᓗ ᖃᐅᔨᓴᖅᑎᑦ ᐃᑲᔪᖅᓱᖅᑕᐅᓗᑎᒃ ᐱᓕᕆᐊᒃᓴᖏᑦ ᐊᒻᒪ ᑲᒪᒋᔭᒃᓴᖏᑦ.
• ᑮᓇᐅᔭᓕᕆᔨᒃᑯᑦ ᐃᑭᐊᖅᑭᕕᒃᑰᕈᑖ ᓄᑖᙳᕆᐊᖅᑎᓪᓗᒍ ᑐᑭᓯᓇᑦᑎᐊᕐᓂᖅᓴᐅᓕᖁᓪᓗᒍ, ᐊᒻᒪ ᓄᓇᕗᑦ ᒐᕙᒪᒃᑯᑦ ᓴᖅᑭᔮᑦᑎᐊᕐᓂᖅᓴᐅᓕᕐᓗᑎᒃ ᑕᑎᒋᔭᐅᔪᓐᓇᖅᓯᒃᑲᓐᓂᕐᓗᑎᒡᓗ.
• ᐊᑐᓕᖅᑎᓪᓗᒋᑦ ᐋᖅᑭᒃᑕᐅᔪᑦ ᐱᓕᕆᔨᒻᒪᕆᖕᓄᑦ ᑲᑎᒪᔨᕋᓛᓄᑦ ᑭᒡᒐᖅᑐᖅᑎᖃᕐᓗᑎᒃ ᑕᒪᐃᓐᓂᒃ ᓄᓇᕗᒻᒥ ᑯᐊᐳᕇᓴᕆᔭᐅᔪᓂᒃ, ᐃᑲᔫᑎᒋᓗᒋᑦ ᐱᓕᕆᔾᔪᓯᑦᑎᐊᕙᐅᓛᑦ ᐊᒻᒪ ᖃᐅᔨᔾᔪᑕᐅᓪᓗᑎᒃ ᐱᓕᕆᐊᖑᖃᑦᑕᖅᓯᒪᔪᑦ ᑕᒪᐃᓐᓂᒃ ᑐᑦᑕᕐᕕᖕᓂᒃ. 
   

ᑮᓇᐅᔭᓕᕆᓂᕐᒧᑦ ᐊᐅᓚᑦᓯᓂᖅ

• ᖃᐅᔨᓴᖅᐸᒡᓗᑎᒃ ᓄᓇᕗᒻᒥ ᑮᓇᐅᔭᓕᕆᔾᔪᓯᖏᓐᓂᒃ ᐃᒪᓐᓇ ᖃᐅᔨᒪᔪᒪᓗᑎᒃ, ᒪᓕᖕᓂᖏᓐᓂᒃ ᑲᓇᑕᒥ ᐊᒡᒌᓯ 2019−ᒥ ᐊᖏᕈᑕᐅᓚᐅᖅᑐᖅ, ᐸᐅᕐᒧᑦ ᐊᑭᖓ ᑮᓇᐅᔭᓕᐅᕋᓱᐊᕈᑎᑦ ᐊᑭᕋᖅᑑᑕᐅᓯᒪᙱᑦᑐᖅ.
• ᑐᕌᒐᒃᓴᕆᔭᐅᔪᑦ ᐋᖅᑭᒃᓱᕐᓗᒋᑦ ᖃᐅᔨᓴᕐᓗᒋᓪᓗ ᐱᓕᕆᐊᒃᓴᓄᑦ ᓇᓗᓇᐃᒃᑯᑕᓪᓗᐊᑕᑦ ᖃᓄᐃᑉᐸᓪᓕᐊᖕᒪᖔᑕ ᖃᐅᔨᔾᔪᑎᒃᓴᑦ ᐃᖅᑲᓇᐃᔭᕐᕕᖕᒧᑦ ᐊᒻᒪ ᓄᑖᙳᕆᐊᖅᑎᑉᐸᒡᓗᒋᑦ ᐱᔨᑦᑎᕋᐅᑎᑦ ᓄᑖᙳᕆᐊᖅᑎᑦᑕᕆᐊᖃᓕᕌᖓᑕ.
• ᓄᑖᙳᕆᐊᖅᑎᓪᓗᒋᑦ ᓄᓇᕗᒻᒥ ᑖᒃᓯᓕᕆᓂᕐᒧᑦ ᖃᕆᓴᐅᔭᕐᒥ ᑐᖅᑯᖅᑐᐃᕕᖕᒥ ᐊᑑᑎᔪᓂᒡᓗ ᓄᑖᙳᖅᐸᓪᓕᐊᔪᓂᒃ.
• ᐱᕙᒌᔭᕐᓗᒋᑦ ᑎᑎᖅᑲᙳᖅᑎᓪᓗᒋᓪᓗ ᓄᑖᑦ ᓴᖅᑭᑉᐸᓪᓕᐊᔪᑦ ᐊᒃᑐᐊᓂᓖᑦ ᓄᓇᕗᒻᒥ ᑮᓇᐅᔭᓕᕆᔾᔪᑎᓄᑦ, ᑮᓇᐅᔭᑦ ᐊᑐᖅᑐᒃᓴᓄᑦ, ᒪᑭᒪᔾᔪᑎᓄᑦ, ᐊᒻᒪ/ᐅᕝᕙᓘᓐᓃᑦ ᑮᓇᐅᔭᑎᒍᑦ ᖃᓄᖅᑑᕈᑎᓄᑦ (ᓲᕐᓗ ᐊᕐᕌᒎᑉ ᕿᑎᐊᒍᑦ ᑮᓇᐅᔭᓕᕆᔾᔪᑎᑦ ᓄᑖᙳᕆᐊᖅᑕᐅᓗᑎᒃ).
• ᐱᖁᔨᕗᖔᓕᐊᕆᔭᐅᓯᒪᑎᓪᓗᒍ ᑲᓇᑕᒥ ᖃᐅᔨᓴᖅᑕᐅᔪᑦ ᐊᕐᓇᐃᑦ ᓂᕕᐊᖅᓵᓪᓗ ᓄᓇᖃᖅᑳᖅᓯᒪᔪᑦ ᐱᔾᔪᑎᒋᓪᓗᒋᑦ ᐃᓄᐊᖅᑕᐅᖃᑦᑕᖅᓯᒪᔪᑦ ᓇᓂᔭᐅᙱᓴᐃᓐᓇᖅᓯᒪᔪᓪᓗ, ᐃᓱᒪᒋᓗᒋᑦ ᐊᕐᓇᐃᑦ/ᐊᖑᑎᑦ ᐋᓐᓂᖅᑎᕆᓂᐅᖃᑦᑕᖅᑐᖅ ᐊᒃᑐᐊᓂᓖᓪᓗ ᐱᔾᔪᑕᐅᔪᑦ ᓄᓇᕗᑦ ᒐᕙᒪᒃᑯᓐᓂ ᑮᓇᐅᔭᑦ ᐊᑐᖅᑐᒃᓴᑦ ᐱᕙᓪᓕᐊᑎᑕᐅᑎᓪᓗᒋᑦ.

ᑮᓇᐅᔭᓕᕆᔨᒻᒪᕇᑦ

• ᐋᖅᑭᒃᓱᐃᓗᑎᒃ ᑎᑎᕋᕐᓗᑎᒡᓗ ᐱᓕᕆᐊᕆᓪᓗᐊᑕᖅᑕᖏᓐᓄᑦ ᓇᓗᓇᐃᖅᓯᔾᔪᑎᑦ ᓄᑖᙳᕆᐊᖅᑎᓪᓗᒋᓪᓗ ᐱᔨᑦᑎᕋᖅᑐᓄᑦ ᒪᓕᒃᑕᐅᕙᒃᑐᑦ ᑮᓇᐅᔭᓕᕆᓂᕐᒧᑦ ᐊᐅᓚᑦᑎᔨᑦ ᑮᓇᐅᔭᓕᕆᔨᒃᑯᓐᓂ ᐊᐅᓚᓂᕆᔭᖏᑦ.
• ᐊᑐᓕᖅᑎᑕᐅᓗᓂ ᐃᑲᔪᑐᐃᓂᕐᒧᑦ ᐱᓕᕆᐊᒃᓴᖅ ᑮᓇᐅᔭᓕᕆᔨᒻᒪᕆᐅᓂᕐᒧᑦ ᑎᒃᑯᐊᖅᑕᐅᔪᓄᑦ ᐃᖅᑲᓇᐃᔭᓕᓵᖅᑐᓄᑦ ᐃᖅᑲᓇᐃᔭᖅᑎᐅᖏᓐᓇᖅᑐᓄᓪᓗ.
• ᐋᖅᑭᒃᓱᐃᓗᑎᒃ ᐸᕐᓇᒍᑎᒥᒃ ᐱᓕᕆᕝᕕᓕᒫᑦ ᐱᓕᕆᖃᑎᒋᓗᒋᑦ ᐊᑲᐅᓂᖅᓴᒥᑦ ᓂᐅᕕᕐᕕᐅᔪᑦ ᐊᑭᓖᕙᓪᓕᐊᖃᑦᑕᖁᓪᓗᒋᑦ.
• ᐋᖅᑭᒃᓯᓗᑎᒃ ᓇᓗᓇᐃᔭᑦᑎᐊᖅᓯᒪᔪᒥᒃ ᑐᑭᓯᑎᑕᐅᕚᓪᓕᕐᓂᕐᒧᑦ ᐅᖃᓕᒫᒐᕐᒥᒃ ᐃᖅᑲᓇᐃᔭᖅᑎᑖᓵᑦ ᐃᓂᓪᓚᒃᐸᓪᓕᐊᓕᕌᖓᑕ ᐃᖅᑲᓇᐃᔭᕐᕕᖕᒧᑦ.
• ᖃᐅᔨᓇᓱᒡᓗᒋᑦ ᐱᓕᕆᐊᖑᖔᑐᐃᓐᓇᕆᐊᓕᑦ ᖃᕆᑕᐅᔭᒃᑯᑦ ᐊᑎᓕᐅᖅᑕᐅᓯᒪᔪᓐᓇᕐᓗᑎᒃ ᓄᓇᕗᑦ ᒐᕙᒪᒃᑯᓐᓄᑦ.