ᐅᖃᓚᐅᑎᓯᐅᑏᑦ

You are here

ᐋᖓᔮᕐᓇᖅᑐᓄᑦ ᐱᕈᖅᑐᕕᓂᕐᓄᑦ ᐊᐱᖅᓲᑎᖏᑦ ᓴᖅᑭᑕᐅᔪᑦ

ᑎᓯᐱᕆ 15, 2017

ᐱᕙᓪᓕᐊᔪᑦ ᐅᖃᐅᓯᐅᔪᑦ

ᐋᖓᔮᕐᓇᖅᑐᓄᑦ ᐱᕈᖅᑐᕕᓂᕐᓄᑦ ᐊᐱᖅᓲᑎᖏᑦ ᓴᖅᑭᑕᐅᔪᑦ

ᐃᖃᓗᐃᑦ, ᓄᓇᕗᑦ (ᑎᓯᐱᕆ 15, 2017) − ᒥᓂᔅᑕ ᑮᓇᐅᔭᓕᕆᔨᒃᑯᓐᓄᑦ ᑕᐃᕕᑦ ᐊᕿᐊᕈᖅ ᐅᓪᓗᒥ ᓴᖅᑭᑎᑦᑎᖅᑲᐅᕗᖅ ᓄᓇᕗᑦ ᒐᕙᒪᖓᓂ ᐃᑭᐊᖅᑭᕕᒃᑯᑦ ᐊᐱᖅᓲᑎᒋᓚᐅᖅᑕᖓᓂᒃ ᐋᖓᔮᕐᓇᖅᑐᑦ ᐱᕈᖅᑐᕕᓃᑦ ᒥᒃᓵᓄᑦ.

"ᓂᕈᐊᖅᑕᐅᓵᓚᐅᖅᑐᑦ ᒐᕙᒪᒋᓕᖅᑕᕗᑦ ᐱᒻᒪᕆᐅᔪᒥᑦ ᐊᑐᐊᒐᕐᒥᑦ ᐃᓱᒪᓕᐅᕈᑎᖃᕆᐊᖃᓕᖅᐳᑦ ᑕᖅᑭᓂ ᖃᔅᓯᐊᕐᔪᖕᓄᑦ, ᑲᓇᑕᐅᑉ ᒐᕙᒪᒃᑯᖏᑦ ᒪᓕᒐᙳᖅᑎᑦᑎᓚᐅᙱᑎᓪᓗᒋᑦ ᐋᖓᔮᕐᓇᖅᑐᒥᒃ ᓴᐃᓕᔾᔪᑕᐅᓪᓗᓂ ᐊᑐᖅᑕᐅᖃᑦᑕᖅᑐᒥᒃ ᔪᓚᐃ 2018-ᒥᑦ," ᒥᓂᔅᑕ ᐊᕿᐊᕈᖅ ᐅᖃᖅᑐᖅ. ᐊᐱᖅᓲᑎᓄᑦ ᑭᒡᒍᑏᑦ ᑐᑭᓯᕚᓪᓕᕈᑎᒋᓚᐅᖅᐸᕗᑦ ᖃᓄᖅ ᓄᓇᕗᒻᒥᐅᑦ ᐃᓱᒪᒋᔭᖃᕐᒪᖔᑕ ᑕᒪᑐᒥᖓ, ᐊᒻᒪ ᖃᐅᔨᒪᔾᔪᑎᒋᓂᐊᖅᖢᑎᒍᑦ ᐱᓕᕆᐊᕆᔭᑦᑎᓐᓂᒃ ᐋᖓᔮᕐᓇᖅᑐᖅ ᐱᕈᖅᑐᕕᓂᖅ ᐊᐅᓚᑕᐅᓂᐊᕐᓗᓂ ᓄᓇᕗᒻᒥ."

ᐋᒌᓯ 22 ᐊᒻᒪ ᓯᑎᐱᕆ 22, 2017 ᐊᑯᓐᓂᖓᓂ, 1,400 ᐅᖓᑖᓂ ᓄᓇᕗᒻᒥᐅᑦ ᑭᐅᓚᐅᖅᐳᑦ 26-ᓄᑦ ᐊᐱᖅᑯᑎᓄᑦ. ᐊᐱᖅᑯᑎᓄᑦ ᖃᐅᔨᔭᐅᓪᓗᐊᑕᖅᑐᑦ ᐃᒪᐃᓕᖓᕗᑦ ᑭᐅᔪᑦ:

  • ᐱᔪᒥᒍᓱᖕᓂᖅᓴᐅᔪᑦ ᒪᓕᒐᖅᑎᒎᖓᓕᕐᓗᓂ ᐋᖓᔮᕐᓇᖅᑐᖅ ᐱᕈᖅᑐᕕᓂᖅ;
  • ᐊᔾᔨᒌᙱᑦᑐᓂᒃ ᐃᓱᒪᖃᓚᐅᖅᐳᑦ ᓱᐴᖅᑐᖅᑕᐅᓲᑦ ᓱᐴᖅᑐᖅᑕᐅᕙᙱᑦᑐᓪᓗ ᐋᖓᔮᖕᓇᖅᑐᑦ ᐱᕈᖅᑐᕕᓃᑦ ᖃᓄᖅ ᐊᑐᖅᑕᐅᖃᑦᑕᕋᔭᖕᒪᖔᑦ ᐃᓄᒋᐊᒃᑐᒃᑯᕕᖕᓂᑦ.
  • ᐊᔾᔨᒌᙱᑦᑐᓂᒃ ᐃᓱᒪᖃᓚᐅᖅᐳᑦ ᑭᓇ ᓯᐊᒻᒪᒃᑎᕆᖃᑦᑕᕋᔭᖕᒪᖔᑦ ᓂᐅᕕᐊᒃᓴᖃᖅᐸᒡᓗᑎᒡᓗ ᐋᖓᔮᕐᓇᖅᑐᓂᑦ ᐱᕈᖅᑐᕕᓂᕐᓂᑦ.
  • ᐃᓱᒪᓚᐅᖅᐳᑦ ᓄᓇᕗᑦ ᒐᕙᒪᒃᑯᖏᑦ ᐋᖅᑭᒃᓯᒋᐊᖃᕋᓱᒋᓪᓗᒋᑦ ᒪᓕᒐᖅᑎᒍᑦ ᐅᑭᐅᕆᔭᐅᓇᔭᖅᑐᒥᑦ 19-ᒥᑦ.
  • ᓄᓇᕗᑦ ᒐᕙᒪᒃᑯᓐᓂᑦ ᐱᓕᕆᐊᖁᔨᓪᓗᐊᓚᐅᖅᑐᑦ ᓯᖁᒥᑦᑎᓂᒃᑯᑦ ᓂᐅᕕᐊᒃᓴᖃᓲᓂᑦ ᖃᐅᔨᓴᕐᓗᑎᒃ ᖃᓄᐃᓕᕙᖕᒪᖔᑕ ᐋᖓᔮᖕᓇᖅᑐᒥᑦ ᐱᕈᖅᑐᕕᓂᕐᓂᑦ ᐊᑐᖅᐸᒃᑐᑦ; ᐊᒻᒪᓗ
  • ᖃᐅᔨᒃᑲᓐᓂᕈᒪᓚᐅᖅᑐᑦ ᖃᓄᐃᑉᐸᖕᒪᖔᑕ ᐋᖓᔮᖕᓇᖅᑐᖅᑐᖅᐸᒃᑐᑦ ᐱᕈᖅᑐᕕᓂᕐᓂᒃ.

ᓄᓇᕗᑦ ᒐᕙᒪᖓᑦ ᓄᓇᕗᒻᒥᐅᑦ ᐃᓱᒪᒋᔭᖏᓐᓂᒃ ᖃᐅᔨᓇᓱᐃᓐᓇᕐᓂᐊᖅᐳᑦ ᐋᖓᔮᕐᓇᖅᑐᖅ ᐱᕈᖅᑐᕕᓂᖅ ᒪᓕᒐᙳᖅᑎᑕᐅᓂᖓᓂᑦ 2018 ᐱᒋᐊᕐᓂᖓᓂ ᑭᒃᑯᑐᐃᓐᓇᓂᒃ ᑲᑎᒪᖃᑎᖃᖅᐸᒡᓗᑎᒃ ᐱᖓᓱᓂᑦ ᐊᕕᒃᑐᖅᓯᒪᔪᓂᑦ.

ᓄᓇᕗᒻᒥ ᐋᖓᔮᕐᓇᖅᑐᑦ ᐱᕈᖅᑐᕕᓂᑦ ᒥᒃᓵᓄᑦ ᐃᓱᒪᒋᔭᐅᔪᑦ − ᓇᓗᓇᐃᖅᑕᐅᔪᑦ ᓄᓇᕗᑦ ᒐᕙᒪᒃᑯᓐᓂ ᐋᖓᔮᕐᓇᖅᑐᑦ ᐱᕈᖅᑐᕕᓂᑦ ᐊᐱᖅᓲᑎᖏᓐᓂᑦ ᐅᕙᓂ ᑕᑯᔭᐅᔪᓐᓇᖅᐳᑦ : https://www.gov.nu.ca/sites/default/files/cannabis_legalization_survey_results-inuk.pdf

ᑐᑭᓯᒋᐊᒃᑲᓐᓂᕈᒪᒍᕕᒃ ᐋᖓᔮᕐᓇᖅᑐᑦ ᐱᕈᖅᑐᕕᓂᑦ ᒥᒃᓵᓄᑦ, ᑲᓇᑕᐅᑉ ᒐᕙᒪᒃᑯᑦ ᐃᑭᐊᖅᑭᕕᖓᓄᑦ ᑕᑯᒋᐊᕈᓐᓇᖅᐳᑎᑦ ᐅᕗᖓ www.canada.ca/en/services/policing/justice/ledalization-regulation-marijuana.html, ᐅᕝᕙᓘᓐᓃᑦ ᓄᓇᕗᑦ ᒐᕙᒪᒃᑯᑦ ᐃᑭᐊᖅᑭᕕᖓᓄᑦ : https://www.gov.nu.ca/iu/kiinaujalirijikkut/information/aangajaarnaqtuq-piruqtuviniq.

###

ᑐᓴᒐᒃᓴᓕᕆᔨᑦ:

ᑕᓃᔅ ᒡᕌᓐᒪᐃᓴᓐ ᐊᐅᓚᑦᑎᔨ, ᑐᓴᒐᒃᓴᓕᕆᔨᒃᑯᑦ
ᑮᓇᐅᔭᓕᕆᔨᒃᑯᑦ
867-975-6818
FinanceComs@gov.nu.ca