ᐅᖃᓚᐅᑎᓯᐅᑏᑦ

You are here

ᐃᒥᐊᓗᓕᕆᓂᕐᒧᑦ ᓂᕈᐊᕐᓂᖅ ᐊᒻᒪ ᐊᕐᕕᐊᕐᒥᐅᑦ ᐃᓄᓕᒫᖅᑎᑕᐅᓪᓗᑎᒃ ᑲᑎᒪᔪᑦ

ᐊᒃᑐᐸ 19, 2020

ᐃᓄᖕᓄᑦ ᑐᓴᒐᒃᓴᖅ ᒐᕙᒪᒃᑯᓐᓂ

ᐃᒥᐊᓗᓕᕆᓂᕐᒧᑦ ᓂᕈᐊᕐᓂᖅ ᐊᒻᒪ ᐊᕐᕕᐊᕐᒥᐅᑦ ᐃᓄᓕᒫᖅᑎᑕᐅᓪᓗᑎᒃ ᑲᑎᒪᔪᑦ

ᑭᓇᐅᔭᓕᕆᔨᒃᑯᓐᓄᑦ ᒥᓂᔅᑕ ᐊᕐᕕᐊᕐᒥᐅᑦ ᓂᕈᐊᕈᒪᑎᓪᓗᒋᑦ ᐊᖏᖅᐸᖏᑦ ᓄᓇᖅᑲᑎᒌᑦ ᓂᕈᐊᖁᓪᓗᒋᑦ ᐊᓯᔾᔨᑐᐃᓐᓇᕈᕆᐊᓕᖕᒥᒃ ᐃᒥᐊᓗᓕᕆᓂᕐᒧᑦ ᐊᐅᓚᓂᕆᔭᖓᓂᒃ. ᓇᒡᒐᔾᔭᒥ, ᓄᕕᐱᕆ 9, 2020, ᓂᕈᐊᓛᕐᒪᑕ, ᓂᕈᐊᖅᐸᒋᔭᓛᕆᓪᓗᑎᓪᓗ ᓇᒡᒐᔾᔭ, ᓄᕕᐱᕆ 2, 2020−ᒥ.

ᒥᓂᔅᑕ ᑎᑭᑕᐅᓚᐅᖅᐳᖅ ᐊᑎᓕᐅᖅᑕᐅᓯᒪᔪᒥᒃ ᑐᒃᓯᕋᐅᑎᒥᒃ ᐊᕐᕕᐊᕐᒥᐅᓂᒃ ᓂᕈᐊᕈᒪᓪᓗᑎᒃ ᐊᓯᔾᔨᖅᑕᐅᖁᓪᓗᒍ ᐃᒥᐊᓗᓕᕆᔾᔪᓯᖓᑦ ᐊᔪᖅᑎᑕᐅᔪᓂᒃ ᐃᒥᐊᓗᒃᑖᕈᓐᓇᖅᓯᓗᑎᒃ ᖃᔅᓰᓐᓇᕐᓂᒃ. ᑕᒪᓐᓇ ᑐᑭᖃᖅᐳᖅ ᐊᕐᕕᐊᕐᒥᐅᑦ ᐊᓯᔾᔨᖅᑕᐅᖁᔨᓗᑎᒃ ᓂᕈᐊᖅᐸᑕ, ᓂᐅᕕᕈᓐᓇᖅᓯᓂᐊᖅᐳᑦ ᐅᕝᕙᓘᓐᓃᑦ ᑲᓇᑕᐅᑉ ᓯᓚᑕᓂᙶᖅᑐᓂᒃ ᑎᑭᓴᐃᔪᓐᓇᖅᓯᓂᐊᖅᑐᑦ ᐃᒥᐊᓗᖕᓂᒃ ᓄᓇᓕᖕᓄᐊᖅᓯᔪᓐᓇᖅᓯᓗᑎᒃ. ᑐᒃᓯᕋᐅᑕᐅᔪᑦ ᑭᒡᓕᒋᖁᔭᐅᔪᑦ 8.552 ᓖᑕ ᐱᐊᓂᒃ (24 x 355ml ᐃᐳᐃᑦᑐᑦ) ᐊᒻᒪ 8 ᓖᑕᑦ ᐅᐊᐃᓂᓂᒃ (2 x 4 ᓖᑕ ᐴᒃᓴᖅ ᐅᕝᕙᓘᓐᓃᑦ 10 x 750 ml ᐊᓕᒍᐃᑦ) ᐅᓪᓗᑦ 7 ᓈᑐᐊᕌᖓᑕ. ᐃᒥᐊᓗᓕᕆᓂᕐᒧᑦ ᐱᖁᔭᒃᑯᑦ, 60 ᐳᓴᐸᓗᖏᑦ ᓂᕈᐊᖅᑏᑦ ᓂᕈᐊᕆᐊᖃᖅᐳᑦ "ᐊᖏᕐᓗᑎᒃ" ᐊᓯᔾᔩᖁᔨᒃᐸᑕ ᓄᓇᓕᖕᓂ ᐃᒥᐊᓗᓕᕆᓂᕐᒧᑦ ᖃᓄᐃᓕᖓᓂᕆᔭᖓᓂᒃ.

ᐃᑲᔪᕐᓂᐊᕐᓗᒋᑦ ᐊᕐᕕᐊᕐᒥᐅᑦ ᑐᑭᓯᑎᓪᓗᒋᑦ ᓄᓇᕗᒥᐅᑦ ᐃᒥᐊᓗᓕᕆᓂᕐᒧᑦ ᒪᓕᒐᖏᓐᓂᒃ ᐊᒻᒪ ᐊᓯᔾᔨᖁᔭᐅᔪᓂᒃ, ᑭᓇᐅᔭᓕᕆᔨᒃᑯᑦ ᐃᓄᓕᒫᖅᑎᑦᑎᓗᑎᒃ ᑲᑎᒪᑎᑦᑎᓂᐊᖅᑐᑦ. ᑲᑎᒪᑎᑦᑎᓛᖅᑐᑦ ᕿᑎᖅᑰᑦ, ᐅᑐᐱᕆ 19, 2020 12:00−ᒧᐊᖅᐸᑦ ᐅᓪᓗᕈᒻᒥᑕᕐᓇᒥ ᐊᒻᒪ 6:00-ᒧᐊᖅᐸᑦ ᐅᓐᓄᒃᑯᑦ John Ollie Complex−ᒥ. ᓄᕙᒡᔪᐊᕐᓇᖅ-19 ᐱᔾᔪᑕᐅᓪᓗᓂ, ᐃᓯᖅᓯᒪᔪᓐᓇᖅᑐᑦ 100−ᖑᔭᕆᐊᓕᑦ ᐅᕝᕙᓘᓐᓃᑦ 75% ᐃᓐᓄᒍᓐᓇᕐᓂᕆᔭᖓ ᐃᒡᓗᕐᔪᐊᖅ, ᓇᓕᐊᒃ ᒥᑭᓐᓂᖅᓴᐅᑐᐊᖅᐸᑦ, ᐃᓄᖕᓂᒃ ᑲᑎᒪᑎᑦᑎᔪᓐᓇᖅᑐᑦ. ᐊᕐᕕᐊᓂ, ᑭᓯᐊᓂ 100 ᐃᓄᐃᑦ ᐅᐸᒍᑎᔪᓐᓇᓛᖅᑐᑦ ᑕᒪᐃᓐᓂᒃ ᑲᑎᒪᕕᒡᔪᐊᕐᓇᓂᒃ.

ᐊᕐᕕᐊᕐᒥᐅᓕᒫᑦ ᑐᙵᓱᒃᑎᑕᐅᕗᑦ ᐃᓚᐅᖁᔭᐅᓪᓗᑎᒃ ᐅᖃᐅᓯᖃᖃᑎᒋᔭᐅᔪᒪᓪᓗᑎᒡᓗ ᐊᓯᔾᔨᕈᑕᐅᑐᐃᓐᓇᕆᐊᓕᖕᓂᒃ ᒫᓐᓇᓕᓴᖅ ᓄᓇᓕᖕᓂ ᐃᒥᐊᓗᓕᕆᔾᔪᓯᖅ ᑭᒡᒐᖅᑐᖅᑎᖃᖅᖢᑎᒃ ᑮᓇᐅᔭᓕᕆᔨᒃᑯᓐᓂ ᐊᒻᒪ ᓄᓇᕗᒻᒥ ᓂᕈᐊᖅᑎᓂᒃ. ᑕᒧᓗᒐᒃᓴᖅᑕᖃᓛᖅᑐᖅ.

ᑐᑭᓯᒋᐊᒃᑲᓐᓂᕈᒪᒍᔅᓯ ᐃᓄᓕᒫᓂᑦ ᑲᑎᒪᑎᑦᑎᓂᐅᓛᖅᑐᒥᑦ, ᐃᕐᖐᓐᓈᖅᑕᐅᒃᑯᑦ ᑎᑎᕋᕈᓐᓇᖅᐳᓯ ᐅᕗᖓ financeinfo@gov.nu.ca.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᐅᐃᑦᓰᓐ ᑦᓵᓐ
ᐊᐅᓚᑦᑎᔨ, ᑐᓴᒐᒃᓴᓕᕆᔨᒃᑯᓐᓄᑦ
ᑮᓇᐅᔭᓕᕆᔨᒃᑯᑦ
867-975-6818
FinanceComs@gov.nu.ca